الفصل 34
34
كان منتظر يجي اليوم يوم راغده ..
اتصل عليها تستعجل بحجة أنه يريد يشوف عياله ..
وصلت بعد ساعة شافته جالس بالصالة وحاط رجل على رجل ببلوزة رسمية بلون الأزرق النيلي
بـ الكم الحاير والبنطلون الرمادي والحزام الأسود.. كان يعرف ان اللون يعجب راغده وتحبه عليه ..
جات بتتكلم إلا تسمع صوت جاي من وراها ..
هالة بابتسامة: اهلين راغده .. سبرايـــس ..
راغده ردت لها الابتسامة: هلـــو هالة .. نورتي ..
هالة: اعذريني جيت بدون أذن وموعد بس اشتقت لتوائم قلت لطلال جيبها لعندنا قال أنك بترفضين ..
راغده ناظرت طلال ثم ناظرتها: ابد .. متى ما بغيتي تشوفيهم بلغيني وأنا اجيبهم ..
هالة بفرحة: حلـو .. و بـ هالمناسبة الحلوة قلت نجتمع سوا ..
راغده: وميس ليه ماجات ؟
هالة: هي بالحمام الآن ..
راغده " حلو اقلها ما اجلس معه لحالنا " : تمام اعطوني نصف ساعة بس عشان ألبس ..
هالة جلست جنب طلال الي كان يلاعب توائمه .. ناظرتها لما اختفت من عينها: انا بضبطك .. لا تشيل هم طلول ..
طلال بنفس همسها: ما علمت احد بمشكلتنا الا لك .. لاني عارف انك كفو وبتحلينها لي ..
هالة بابتسامة: اعتمد علي بكل شيء بفلها لكم بس قول لي كل شيء صار من ذكريات معكم قبل ..
.
دخلت راغده غرفتها ..
شلحت عبايتها ..
ولبست جمبسوت أبيض بأكمام طويلة وفتحة الصدر v ومن الخصر حزام ذهبي ، من اردافها جيوب مخفية ومن تحت البنطلون ماسك عليها صندل عالي أحمر ..
فردت شعرها الويفي اعتمدت بالمكياج على الأضاءة والروج الأحمر الصريح على شفاتها الممتلئة .. كثفت الماسكارا وحدت من الايلاينر فوق جفنها ..
ولبست جوكر ذهبي وساعة ذهبية وخاتم ذهبي لامع .. كان شكلها وكأنها بتروح لحفلة أو مناسبة مهمة ..
نزلت عند الدرج الكل ناظرها مصدوم من شكلها وريحتها ألي ملأت المكان كله ..
طلال انبهر من شكلها وجمالها ألي يأسر قلبه حس ان التحدي كان قايم من لما شافت لون ملابسها باللون الأبيض المحبب له ..
ميس: اوه ! وين بتروحين ؟
راغده وقفت جنب طلال وهي تناظره: حبيبي طلال هو ألي مختارة لي .. شفته فوق السرير مو ؟
طلال تخرفن على نظراتها ودلعها وبسمتها وهي تتكلم وبتوتر: اي.. اي صـ ..ـحيح ..
راغده ناظرتهم وهي شابكة بيدينها: جاييني حماواتي الغاليات والبس اي كلام ! معقولة ! ..
ميس بابتسامة: يا بعد قلبي طول عمرك تبهرينا بجمالك و لطفاتك .. وكلك على بعضك مزيونة ايش ما لبستي ..
هالة بحماس: واخيرا جلسنا سوا ، وبنسهر لو ما عندك مانع راغده ..
راغده جلست جنب طلال ورفعت يده وحطتها لكتفها ورى وبحب: ما في مانع ابد خوات طلال هم خواتي .. البيت بيتكم ..
طلال حس بخدران وهو يناظر بشفتها وشكلها , غمض عينه عشان يستعيد وعيه: صحيح .. " انتبه لغمزة هالة له " حياتي راغده .. هالة تو سألتني عن ألبوم الصور حقنا .. ودها تشوف زواجنا ما صدقت انه كان بالبيت ..
ميس بحماس: يوه يا هالة تقولين أوروبيين والله شيء مو طبيعي ..
راغده قامت وجابت الكاتلوج من المكتبة ومدت لها: تفضلي ..
هالة قامت وجلست جنب طلال واصرت لميس تجلس جنبها : راغده اجلسي على يسار طلال .. خلينا نشوف كلنا ..
راغده جلست جنب طلال
صاروا يشوفون الصور من ايام الملكة و استهبالهم وصورة السيلفي لها وبحفلتهم وبزواجهم وبعد نفاسها وصورهم سوا بالبروفا للحفلة .. وبجزيرة بالي ..
شريط ذكرياتهم سوا مرت عليهم
طلال التفت لراغده الي شاف لمعة بعينها انخرطت نظراتهم سوا الممزوجة بالشوق والحنين والألم ..
ميس تأشر: شوفي هنا رقصوا على أغنية يابانية واغنية اسبانية والاجواء كانت مو طبيعية شيء خورافي والله ..
هالة ألي كانت تناظر فيهم وهي تدرس نظراتهم وحبت تزود عاطفتهم: بالله ؟ معك الأغنية طلال نفسي اسمعها ؟
طلال ألي ما كان معهم ..
هالة مسكت كتف طلال
طلال انتبه لها: هه ..
هالة: وين الأغنية معك طلال ؟
طلال: اي معي ..
مسك جواله وشغل الأغنية الإسبانية ..
ميس بحماس: تصدقي هالة .. هاي غنوها على طلب الحضور بس طلول وراغده ضبطوها مع إيقاع الأغنية .. لدرجة شكينا أنهم مدربين عليها ..
هالة بنفس حماس ميس: الله ! ورونا .. ارقصوا عليها .. عشاني بليـــز طلال ..
طلال صار يدرس ملامح راغده الحزينة: انا ما عندي مانع بس راغده ..
هالة: لا ما عليك راغده ما بتعارض ..
راغده قامت بدون ما تلتفت: عن اذنكم نسيت شغله فوق بجيبها ..
صعدت فوق بخطوات سريعة سكرت باب غرفتها واطلق العنان لدموعها وقهرها " المفروض يرفض من نفسه مو ينتظر ردي ! ايش يفكر فيه هو ! يظن كلمة احبك سهل أنه يلعب فيها ، كيف بقدر احافظ على هدوء اعصابي كيف !؟ اخاف عيني تخوني وتنزل
دمعتي قدامهم .. ايش هالورطة انا حتى لو عارضت خواته بيحنون فوق رأسي وبرقص .. يا رب ساعدني ما اريد ابين لهم ان بيننا اي مشاكل وحساسية " قاطع افكارها طرقة الباب بهدوء حاولت تعدل صوتها ما تريد تبين انها كانت تبكي: نعم ؟
طلال: ممكن تفتحين ؟
راغده مسحت دموعها بطبطبة وفتحت الباب وعينها تحت راحت لعند التسريحة ..
طلال: فيك شيء راغده ؟
راغده تضبط البودرة: لا ابد رحت بس اضبط مكياج فجأة تذكرت اني ما حطيت شيء بوجهي .. لزوم اكون تمام خصوصا واحنا بنرقص سوا ..
طلال يناظر فيها: مش مجبورة انك ..
راغده قاطعته: انا جهزت يلا ننزل ..
نزلوا سوا من عند الدرج .. كانت الانوار خافته والعيال عند ماريان بغرفتهم ..
هالة وميس شغلوا الأغنية الإسبانية ..
طلال وقف قبالها ومد يده لها .. مسكت طرف يده ومشو عند المساحة الفاضية الي قبل كانوا يتدربون عليها
حط يده ورى ظهرها .. وهي حطت يدها بكتفه العريض وهي تستشعر عضلاته المشدودة .. رجعت لهم الذكريات مع كل حركة وكلا دورة .. كانت مشاعرهم قبل بالفرحة والاعجاب والحب ، كيف ممكن لذكرى أن تكون سلاح فتاك مؤلم لهزيمة كل العناد والتحدي والجروح الي بينهم
بهاللحظة طلال استشعر أنهم مثل قبل وكأن شيء ما صار .. قربها منه زود وهو يناظر بعيونها اللمعة الخايفة العاشقة .. نظراتها الي فحصتها
طلال بحده بنظراته: ٣ دورات ..
ودورها ثلاث مرات وسحبها لعنده بقوة .. وسط شهقتها
وميس فرحانة وهالة تدرس الي بينهم من نظرات ورقصهم ألي كان مدروس ولا قدرت تخفي اعجابها .. ميس كأن اول مرة تشوفهم يرقصون
ختمها بنهاية الرقصة قربهم الشديد واختلاط انفاسهم المرتبكة ..
ميس وهالة صفقوا بحرارة لهم ..
راغده ابتعدت عنه وهي ملتبكة وسط انفاسها السريعة ..
طلال حوطها من خصرها وجلسها جنبه وهي مشت معه بصمت ..
هالة بأعجاب: حركات والله .. طلال وش هالخفة ذي ما شاء الله والله وطلعت راقص واحنا ما ندري ..
طلال ألتفت لراغده: ماكنت بكون كذا لو ما روعه راغده ورشاقتها ..
ميس: اووه وش عليك راغده ..
راغده نزلت راسها وهي تدعي الخجل ..
سالفة تجر سالفة وهي منغمسة بتفكيرها " ليه كل هالتوتر وليه ما اقدر اندمج معهم بعد ما رقصنا سوا ، كيف ممكن يقدر يكون
بهالثبات وانا ألي منخرطة بتوتري ورعشتي من ادنئ لمسة منه ! بهالوقت بس محتاجة اجلس لحالي وابكي بدون أي تحفظات "
وعت على حوارهم بلمسة من طلال بابتسامته الساحرة: صحيح حبيبي ؟
هالة: مو معنا هي .. وش تفكرين فيه راغده ؟
راغده باندفاع: كنت أفكر هل بنطلب عشاء برا ولا بنطبخ سوا ..
ميس: بنطبخ سوا طبعا .. وبنشوف فيلم وكل شيء ..
طلال بهمس دافي: جوعانة حبيبي ..؟
راغده " حبيبي ! هالكلمة ذي اشعر بدفاها منه .. تربكني وتضيعني " هزت رأسها بالايجاب ..
طلال بحب: وش ودك نطلب من برا ولا نطبخ ؟
راغده:..........
هالة: نبدأ التصويـــــــت ؟
كان تصويت الكل نطبخ ..
راغده " اخترت معهم الأهم انجو من هالموقف ألي اكاد اجزم أنه يعشقني "
كتبوا بـ ٤ أوراق الي خاطرهم فيه على العشاء وطلع التصويت على باشميل كان من اختيار ميس ..
ميس بحماس تصفق: واخيرا ابتسمت لي الحياة ..
الكل: هههههههههههههههههههه ..
هالة: يالخبلة تراها باشميل بس مو سفرة ولا شيء ثاني ..
ميس: يا مفسدة اللذات أنتي وش قاهرك ! خليني انبسط اني فزت عليكم .. وكان النصيب من حظي ..
طلال قام ومسك يد راغده : يلا قوموا على المطبخ ..
سحب يدها للمطبخ وهم قاموا معهم
طلال " بستغل الفرصة والوقت بس لمصافحة كتفك والقرب منك راغده ، عقابك لي قاسي بلا رحمة .. كيف ممكن تحرميني منك وانتي تدرين بحبي لك ؟ "
كان الكل مشتركة بالوصفة بس طلال كان اساسها ..
هالة: وش شعورك وانتي متزوجة رئيس الطهاة ؟
راغده اعجبها اللقب : ههههههههه راحة !
ميس تنهدت: اي بالله الي راحة .. طلول قبل من اجوع على طول للمطبخ ويلبي رغباتي الان من تزوجك ما عاد يقومني ويقول يلا سويت العشاء او الفطور ..
طلال: كم سنة وانا طاهي عندك , الآن لراغده وبس ..
راغده " رقص قلبي من الفرح لما قال راغده وبس ! حسيت يخبرني انه لي لحالي ولا لي شريكة " ابتسمت بخجل ..
بعد ساعة كاملة استواء الباشميل ..
راغده ألي بدأت تنسى توترها ومشاعرها المتناقضة دخلت الجو معهم : بقوم أغير لبسي لحاجة مريحة وأرجع لكم ..
هالة: طلال ذوقه حلو .. اختار لها وخلنا نشوف ذوقك بالبيجامة
راغده " كذبة كذبتها والان جالسة أكلها "
ميس: اساعدكم ؟
طلال وراغده باندفاع وصوت واحد:لااااا
ميس انفجعت: بسم الله
هالة ألي كانت تعرف انهم ينامون منفصلين : اي خليها مفاجأة يلا ننتظركم ..
صعدت معه لغرفتها ..
طلال: لو صعدت معنا ميس بتلاحظ ان احنا ننام بغرف منفصلة ، كويس انها ما أصرت ..
راغده تنفست براحة: ربك ستر ..
طلال شافها حجة: مش كل مرة تسلم الجرة ..
راغده: وش قصدك ؟
طلال: ننام بغرفة وحدة مثل قبل .. حتى بدون اي علاقة وياك .. يصير مثل بداية زواجنا ..
راغده: هذا لما كنت واهمة ان معك ضعف ..
طلال: طيب الان انا ما اسوي شيء لك ! شوفي المزرعة وقبل ..
راغده سكتت لأن كلامه صحيح
طلال: الليلة بنقل اغراضي الاساسية لعندك ..
توجه لعند الدولاب واختار لها روب بيت مريح بلون السماوي ومد لها
طلال يناظر فيها من فوق لتحت: لاتلبسين كذا قدام احد ..
راغده تناظر نفسها بالمراية بالجمبسوت الابيض: وايش فيه ؟
طلال بغيرة: بس .. يلا ألبسي هذا ..
دخلت راغده تغير ملابسها وطلعت عند التسريحة تتعطر وناظرته بالمراية: ايش فيه لبسي مساع!
طلال بقهر :لو بيننا وفاق ما خليتك تطلعين لهم كذا .. صدرك كله طالع لهم ..
راغده بحيا: أنا مو طالعه عند رجال! وبعدين لا تبالغ مو كل شيء طالع ..
طلال قام وصار قبالها وبنظرات ثاقبة: ولو ! مفاتنك تطلع لي انا وبس ، لا عاد يتكرر طيب ؟
راغده " لمحت غيرته ! ولا يتهيأ لي "
طلال بحده: طيب ؟
راغده: ان شاء الله..
طلال: شوفي كيف لبسك كذا حلو مطلعك طفلة ، قبل بالجمبسوت طالعة ... جذابة ..
راغده التفت له ببطء: وهالشيء غلط ؟
طلال: لا! بس يكون بيننا ألبسي قد ما تحبي ..
راغده: بترضى !
طلال : بايش ؟
راغده:اقصد بترضى البس كذا ومالك شيء فيه ؟
طلال بقهر تنهد: بتحمل .. " اخذ منديل مسح مكياجها " وبعدين لاتحطين لون أحمر .. امسحيه ..
راغده: بيخترب مكياجي كامل ..
طلال باصرار: تمسحيه ولا امسحه لك ! وبعدين ما يناسب لبسك هذا الان
راغده بعناد: ما بمسحه ، عاجبني ..
طلال مسك يدها وجاء بيمسح روجها بس هي بعدت فتح عينه : راغده وبعدين معك ..
راغده تحرك راسها سريع: لا لا .. بكيفي ليه كلا تبغى تجبرني ..
طلال عض شفته كا ردة فعل ومسك راسها ومسح شوي من احمر شفاها
راغده دفعته وبقهر: وش قصتك أنت .. لا تتجاوز طالمة أنا معك محترمة ..
طلال بأمر: راغده تعالي بالطيب يلا ..
راغده عند السرير: والله ما اجي ولآني بماسحته ..
اقترب منها وصار يعاركها وهي تصارخ كا ردة فعل
طلال رجع يمسك وجها عشان بيمسح روجها ماقدر
دفعته لعند السرير لكن الي ماعملت حسابه أنه مسك يدها وطاحت فوقه ..
راغده: ااااه ..
طلال استغل الوضع ومسح روجها بقوة ..
انفتح الباب وعلامة الخوف تحولت لصدمة وصدو عنهم ..
راغده قامت بسرعة منه وهي ممزوجة بالحيا والقهر ..
طلال قام ورفع يده لمستوى كتفه ببراءة: مالي دخل .. هي الي ... " وسكت وهو مصحوب ببسمة "
ميس ناظرت راغده الي الروج موزع بذقنها وخدها ونزلت عينها باحراج: سمعناكم تصارخون خفنا ان صار لكم شيء ..
هالة تناظر بطلال وبراغده: كان انتظرتو لما نروح ليه مستعجلين !؟
راغده قلب وجها إشارة مرور: لا لا ..السالفة وما فيها ان اخوكم مصر اغير روجي الأحمر ..ما خلاني اتهنئ بمكياجي الا وتلفه كله ..
ميس تناظر طلال بلوم: حرام عليك طلال مكياجها خرب كله ..
راغده تشوف نفسها بالمراية شوي وتصيح ..
طلال ببراءة: ما اقصد بس شوفو كيف لبسها ناعم ومكياج مو ضابط عليه ..
ميس: يا سلام ! وذيك تلبس روب بيت عادي وتدق الروج الباذنجاني ما قلت شيء وش معنى راغده !
عم الصمت فجأة ..
ميس انتبهت لنفسها ناظرت هالة بمعنى انجديني
هالة باندفاع: يا ربي جعت .. بسرعة انزلو ..
مسكت يد ميس ونزلت معها لتحت ..
طلال ناظر راغده ألي جلست بكرسي التسريحة وهي تطلع مناديل مسح المكياج ببطء وكأنها بعالم ثاني وملامح الحزن بوجها اقترب منها ونزل لتحت ركبتها وصار يناظرها وبهمس: انا آسف راغده ما كنت ناوي اخرب مكياجك كامل بس انتي اجبرتيني ..
راغده بدون أي إهتمام مسحت ذقنها وشفتها وخدها بالمنديل المبلل ..
طلال لما ماسمع منها كلمة مسك يدها: راغده ..
راغده بدون ما تناظره: ما اعرف ليه انت معي كذا .. عجزت افهمك واستوعبك .. انت وش تريد مني بالضبط؟
ليه كل ما شفتني تحاول تتسبب علي ! ما تقدر لحظة .. لحظة بس تخليني براحتي ..
طلال حس بكلامها الهادي كمية وجع وألم وبتفهم: ادري والله ادري وأنا غلطان .. وش يرضيك ؟
راغده نزلت دموعها: اتركني لحالي ارجوك .. " مسحت دموعها سريع" انت بكذا قدمت لي الكثير بس اطلع ..
طلال عند الباب: يكفيك ٥ دقايق ؟ عشان ما تبرد الصينية أكثر
..
راغده: ......
طلال طلع على طول عرف أنها مو بمزاج أنها ترد او تتكلم معه ..
مسحت مكياجها كامل واكتفت بمرطب وتنت ورسمت حاجبها كان شكلها فعلا حلو وناعم على لبسها السماوي .. لبست شبشبها السكري ونزلت تحت ..
شافت البنات يرتبون طاولة الطعام ..
طلال اول ما شافها أبتسم واقترب منها وبهمس: في وحده مثل جمالك ! لا ابد ما في ..
راغده انبسطت من كلامه رغم تعكر مزاجها إلا أنه يعرف كيف يراضيها بس مابينت ولزمت دور الزعلانة ..
وسط العشاء سوالف تروح وتجي
ميس: ايش رايكم نشوي ؟
راغده: كانت فكرة بنت الجيران أن احنا نشوي يا سلام لو نجتمع ..
ميس: فكرة حلوة ايش رايكم نتجمع بالأستراحة ومنها نغير جو بعد ..
راغده :خلاص على الاسبوع الجاي إن شاء الله نقرر ..
هالة: عندي لكم حتة فيلم ماحصلش ، لا تملون بطنكم ها .. في مفرحات مع الفيلم ..
راغده حست بتعب وألم فجأة قامت سريع: عليكم بالعافية ..
دخلت الحمام وعرفت أنها نزلت " وذه وقته الآن وش بيقولون مو حلوة اصعد فوق وارتاح واخليهم "
طلعت من الحمام وواضح عليها التعب ، شافتهم يتجهزون للفيلم ..
وبيدهم راشد وساره ..
ساره : اباا بابا ابا اااا ..
طلال كان مبسوط فيها ويلاعبها : يا روح الأباا انتي ..
ميس: اروح فدوة لهالسنوون انا .. ياربي نسخة راغده شوفي رشود ..
هالة بضحكة: محد فاز على الثاني .. صار تعادل .." انتبهت لدخول راغده" الان نشغل الفيلم يلا طفي الانوار ميس ..
راغده جلست معهم متجملة لمدة ٤٥ دقيقة بس الألم لا يطاق وقامت بثقل ..
هالة نقزرت طلال وبهمس: يلا قم انا وميس بنشوف الفيلم وهات سوير عنك .. يلا ..
طلال: تسلمين هالة .. حاولي تغطين وجودنا ما ببطي ..
هالة: لا تشيل هم ربي معك ..
"وناظرت بـ ميس" بعدها بنشوف فيلم ثاني وش رأيك ؟
صعد فوق شافها واقفة قبال السرير وكتوفها على قدام ويدها أسفل بطنها : راغده ..
راغده وهي مكشرة بوجها: برتاح شوي بس .. بعدها بنزل منيب مطولة ..
طلال حط يده ورى ظهرها وبيده الثانية مسك يدها: يلا ارتاحي اجيب لك كمادة وحبوب تخف شوي من وجعها ..
راغده:.......
سدحها بالسرير ولحفها نزل تحت وجاب الكمادة , دور بالدولاب الصيدلية ماشاف الدواء .. اعطى راغده الكمادة: حياتي انا بروح الصيدلية اجيب لك الدواء ما بتأخر ..
راغده وهي تحط الكمادة ببطنها: وخواتك يجلسون لحالهم صعبة والله ..
طلال: لا تشيلي هم باخذهم للبيت على اي حال الوقت تأخر جلسو ٣ ساعات كفاية .. " اقترب منها وباس جبينها " انتبهي على نفسك ..
نزل تحت من جديد وبيده سويج السيارة: يلا مشينا ؟
ميس: وين راغده ؟
هالة قامت أخذت عبايتها: يلا ميس مشينا ..
ميس مثل الأطرش بالزفة قامت بدون ماتفهم شيء
وصعدو مع طلال وعلمهم بتعب راغده .. أخذهم للبيت وهو توجه لصيدلية ثم رجع لبيت راغده
صعد بخطوات طويلة بالدرج فتح الباب شافها متكورة على نفسها ..
توجه عندها وفتح كرتون الدواء وحطها بفمها واعطاها كوب ماي
طلال بهمس: حا تتحسنين ..
راغده وهي مكشرة: من ولدت تو تجيني آلامها بهالطريقة ..
طلال شلح السنيكرز وانسدح جنبها وحط راسها بصدره ..
راغده بتعب: ايش تسوي؟
طلال وهو يفتح ازرار قميصه: بتتحسنين الآن ..
راغده انتبهت له وبحيا: ايش تسوي أنت ؟
طلال شلح قميصه وقربها منه وشد عليها: حا تتحسنين راغده .. ثقي فيني .. ارتاحي ما في أي نوايا ببالي ..غير أنك تقومين بالسلامة ..
راغده شعرت بالدفئ بسائر جسمها ..
طلال سحب الريموت ألي جنب الكوميدينا وطف التكييف
وبصوت قريب للهمس: شششش .. رخي لا تشدين على حالك ..
راغده كانت متوقعة كذبة أو يجيب كلام من باله بس فعلا بشويش ردت لها عافيتها وخف الألم بنسبة كبيرة.. حست بالدفئ ساير جسمها وبحيا: شكرا ..
طلال حوطها من خصرها وشدها له وهو يناظر بعيونها الذبلانة: الصح أنك تكونين مثلي ..
راغده بضياع: كيف مثلك ؟
طلال شبك يده بيدها : يكون جلدي بجلدك يعني ما في شيء يسترك اقلها من فوق .. " كانت بتضربه بس ردعها " أأأ وتضربيني بعد ! هذا جزاتي أعلمك ..
راغده ووجها احمر: من وين جايب هالكلام ..
طلال: ذه علم .. الاحتكاك من جلد لجلد يولد حرارة مافي حيا من العلم ..
رجع راسها لصدره وهو يمسح بشعرها البلاتيني
غمضت عينها وهي تستنشق عطره الرجالي ..
طلال لما سمع انتظام انفاسها قام بشويش من السرير وأخذ قميصه لعند غرفته دخل التواليت وسخن الماي ..رجع شعره لورئ استنشق عطرها قرب يده من خشمه .. ريحة عطرها ألي تحت اذنها وبراحة يدها
تغلغلت براسه غمض عينه بهدوء وافكاره توديه وتأخذه " لمتى بتصبر طلال ؟ لزوم تحط حد لراغده على نهاية هالاسبوع والقرار بيكون لها"
نزل رأسه والماي بلئ وجهه وهو عازم على إنهاء كل شيء عند نهاية الأسبوع ..
لف المنشفة عند خصره ..
وعند المرآية يمسح صدره " هل بلاقي حل معها ؟ وبتكف عن العناد وتضيعة الوقت " قاطع سلسة أفكاره قرع الباب : مين ؟
راغده: راغده ..
طلال اقترب من الباب وفتحه
دخلت على طول بدون ما تشوفه لانه كان ورئ الباب
راغده: طلال أنا " التفتت له وبصراخ" ألبس حاجة على الأقل ..
طلال ببرود توجه لغرفة الملابس: توقعت ان في شيء مهم .. وانتي تعبانة حرام اخليك برا لمدة طويلة وانا لسى ما أخترت ايش ألبس
راغده بإحراج: طيب استعجل ..
طلال: تختارين لي بيجامة على ذوقك
راغده: لا مو بحاجة ا.. " ونزلت عينها " طيب تحنحن مو تدخل على طول ..
طلال: ليه داخل على حريم ؟ انتي زوجتي عادي ..
راغده تشجعت ورفعت عينها له: أنا حبيت اشكرك بنفسي على اهتمامك ووقفتك معي بمثل هالظروف .. شكرا طلال ..
طلال ابتسم ابتسامة جانبية: العفوو .. مو كنتي نايمة آيش ألي صحاك ؟
راغده: هي غفوة وأنا احس اني احسن بكثير ..
طلال:......
راغده لما ماسمعت رد منه توترت وباندفاع: على اي حال .. جيت بعد عشان اعرف كيف ارد لك الجميل !
طلال اقترب منه وابحر في عينها: يصير اطلب ولا تعترضي ؟
راغده توترت: همم
طلال مسح على شعرها: تعطين فرصة جديدة لعلاقتنا .. لاتجاوبين خذي راحتك وفكري زين راغده .. نهاية الأسبوع بعرف منك الرد وردك هو ألي بيحدد ايش ألي بيصير بعدين لعلاقتنا ..
راغده: ايش قصدك ؟
طلال اعطاها ظهره: لك حرية التفكير ..
راغده " ايش يقصد ؟ معقولة لو صديته بيرفضني ! وجايز يطلقني ! "
طلعت من غرفته بصمت ونزلت تحت للمكتبة على لابتوبها وكتبت كل ألي بخاطرها عشان ترتاح وتفضفص بكل شيء ..
جاها اتصال من فرح وردت: اهلين فرح كيف حالك ؟
فرح تنهدت: زي الزفت راغده ، مريم استخفت خلاص ما براسها الا الطلاق وزوجها رافض يطلقها بدون ماترجع لو جزء من المهر .. وهي قالت لو الشيخ طلبها بتبيع ذهبها وتعطيه مهره ..
راغده تنهدت: الله يكون بعونها ..
فرح: ماجيتك بس عشان كذا .. الصراحة مريم طلبت أنها تقابلك وضروري ..
راغده : ماعندي كلام وياها ! لو معها اي كلام توصله لك ..
فرح: قلت لها انك بترفضين بس هي أصرت ..
راغده: أعلميها عن رفضي في الحال ..
فرح: اوكي ..
سكرت الخط راغده وهي عارفه طالبتها ليه ..
سكرت اللابتوب وقامت لصالة شافته جالس بالصالة وبيده صحن مكسرات وشاي .. بيجامته احمر مع رمادي كان اول مرة يلبس احمر جميل جدا عليه عكست لون شفته الوردية ..
راغده جلست بعيد عنه بهدوء
وبتردد: كملت الفيلم مع البنات ؟
طلال: لا ..
راغده: ليه ؟
طلال: لأني طلعت معك مباشرة ..
راغده: ما ادري احس ان موقفي غلط عندهم لو أنك جلست معهم وانا كنت فوق ..
طلال ناظرها: عادي راغده ! هم جاو بدون موعد ! يتحملون ..
راغده " معه حق ، بس كان قصدي اسولف معه وهذا الي طلع معي "
طلال مد لها صحن المكسرات: معك شيء بتقولينه ؟
اقتربت منه أكثر وأكثر وحطت رأسها على صدره الأيسر أستغرب من تصرفها ..
راغده فهمت نظراته وبدون ما تناظره وبكذبة: عشان يخف الوجع ..
طلال بابتسامة: طيب ..
راغده غمضت عينها ببطء حاولت تسترخي بس صوت قضمات المكسرات كانت عالية : انت موكبانغ؟
طلال بعدم استيعاب: وش ذه ؟
راغده اخذت الريموت من حضنه وشغلت اليوتيوب وكتبت موكبانغ
ذول الي يحطون المايك عشان الصوت يطلع بـ اكلاتهم او بأي شيء ..
طلال: ايوا .. يفوزون الكوريين بالزلط يقدرون الأكل والبلعه هم ..
راغده صارت تمعن النظر في وجهه وهي تشوف لمعة بشفته ..صغرت عينها وبشك : حاط شيء بشفتك ؟
طلال ببراءة: لاحظتي ! اي والله حطيت من مرطب الكرز حقك ..
راغده فتحت عينها على الآخر: ايش ! دخلت غرفتي ؟
طلال: شفته فوق التسريحة وأخذته .. معك ٣ ما بيضر لو أخذت واحد صح ؟
راغده: وش لك فيه ؟
طلال: هذا جزأتي اتزين لك ! عشان ما تقولين أجلس عندك بسروال وفنيلة ..
راغده " ما نسى الي قلته قبل " : تتزين لي بمرطب ها ؟
طلال: يعني الأتراك لما يحطون الحمراء السحرية يغمى عليكم وتنهارون وأنا بس حطيت روج ماعجبك .. " عدل جلسته " انتي فاكره ألي يطلعون بالتلفزيون خصوصا الاتراك وشرق اسيا ذوق يطلعون لك كذا !
لزوم لهم سمكرة وعناية ومكياج خفيف ماتشوفيه انتي ..
راغده تناظر فيه وهي سرحانة كل تعبير له تبان غمازاته " يعني بدل ما انا اخرفنه انا ألي اتخرفن " حطت صبعها عند غمازته ..
طلال فسرها بشيء ثاني ورفع حاجبه: تظنين اني حاط مكياج حضرتك ؟
راغده " وي وي لااا ! " باندفاع: لا ابدا بس ..
طلال: بس ايش ؟
راغده بتفكير سريع: اي عشان كان في قشرة صغيرة من المكسرات ألي أكلتها ..
طلال مسح على عارضه: اها .. ظنيت انك مكذبتني ..
راغده: لا حاشى لله ماتطلع كذاب ..
طلال: تتمسخرين صح ؟
راغده بابتسامة: لا ابدا .. انا عموما بصعد فوق اخليك ترتاح .. جيت بس عشان اشكرك على اهتمامك فيني من جديد ..
جات بتقوم الا بيده تمنعها ..
مسك معصم يدها: أجلسي بتكلم معك بموضوع ..
راغده وهي تشوف ملامح وجهه الجدية ..
جلسها جنبه وبجدية: راغده انا كنت بتكلم معك
بخصوص علاقتنا .. ما يصير كذا ! زوجك ولا كأني زوجك ! حاطه حاجز بيننا ..
راغده : وجنان ؟
طلال بنفاذ صبر: وش بها ؟ انتي راغده وهي جنان ..
راغده تخفي قهرها وغيرتها: ألي اقصده ان حياتنا كانت حلوة سوا انت ماعجبك ورحت تزوجت جنان ، ما كنت مكتفي فيني طلال ! " قالتها بغصة"
طلال ناظرها بعد صمت ٧ ثواني .. فتح ذراعه اليسار وهي ارتمت بحضنه بفم حزين ..
طلال يمسح على شعرها: أنا زواجي من جنان ما كان عشان حب ،
لو عشان حب ماكنت تزوجتك راغده ، أنا اذا حبيت اخلصت .. شوفيني مخلص لك ..
راغده اعطته نظرة هو فهمها ..
طلال " يكفي أني ما قد اقتربت من جنان ولا حتى نظرت لها نظرة حب أو رغبة .. بس كيف اقولها لك " : راغده في اشياء لا تسألي عنها .. اعتبريها حكمة ! ممكن تعرفينها بعدين ومش ضروري تعرفي راغده !
راغده رفعت وجها وناظرته: ليه مش ضروري ؟ من حقي أعرف ..
طلال: راغده أنتي صار لك اشياء كثيرة وما علمتيني انا ألي اكتشفتها ولو ما اكتشفتها ماكنت دريت عنها لهاليوم صح ؟
راغده باقتناع: صح ! بس ذه زواج يعني كافة حياتي تغيرت .. علاقتنا وكل شيء طلال .. انت مش ملاحظ ؟
طلال بحنين وشوق لمس خدها الناعم: لو مش ملاحظ ما كنت تكلمت معك ، أنا لأني أحبك واريدك طلبت منك اكثر من مرة ان علاقتنا
ترجع وكنتي كل مرة تكسريني وترديني ، ماكنت بقول لك بس !
راغده حست أن قلبها رفرف وزادت نبضاته: بس آيش ؟
طلال ضم شفته السفلية وهو يدرس ملامحها سكت شوي : ما بيكون معي صبر أكثر ، اعرف بعدك مصدومة وموجوعة بعد الحب ألي .. اقصد ألي كان بيننا .. حا تقولين كذا صح ؟
راغده " طلال أنا أحبك واموت فيك بس لزوم افهم ليه سويت فيني كل ذه .. ألتمس بكلامك الصدق بس افعالك هي ألي تثبت نقيض كل شيء " : صح ..
طلال حس بأنكسار ونزل عينه لتحت " كنت متمسك بالأمل لاخر لحظة انك بتقولين لا غلط .. لا مش صح واني احبك يا طلال رغم كل شيء لكن .. "
عم الصمت فجأة وسط نظراتهم الجريحة لبعض قامت راغده الا بـ أتصال
طلال تنهد ورد: هلا جنان ..
راغده الي كنت عند عتبة الدرج وقفت لما سمعت اسمها وقفت بدون ما تلتفت
طلال: ابشري .. بكره إن شاء الله اطلبي وين ما ودك بس اليوم لأم عيالي ..
راغده شدت على قبضة يدها بقوة وهي تشعر بالغيرة والألم صعدت فوق بخطوات سريعة ..
طلال أنتبه لصوت الشبشب القوي بالدرج الي واضح غضبها " معقولة سمعت ؟ " قام وراها ووقف عند باب غرفتها سمع بكائها وصياحها وحاجة طاحت فتح الباب بسرعة وبقلق: راغـ... " شاف كرسي التسريحة طايح وناظرها" انتي بخير ؟؟
راغده تحاول تمسك اعصابها: بخير ! من وين يجي منك الخير ؟ وأنت سبب كل تعبي وهمي ، أنا كنت بخير لما جيت أنت ! " ومدت صبعها السبابة وبعصبية " كان أكبر غلطة لما تزوجت ..
كنت سعيدة ومرتاحة ليه تزوجت ..
طلال كفت يده وبتعابير وجه توحي لتفكير: من جد .. سؤال يطرح نفسه ، ليه تزوجتي ؟
راغده قهرها بروده: محد بيجيب لي الشيب إلا أنت .. أنت .. أنت مستفز ..
طلال بخجل: تسلمين من ذوقك ..
راغده تلفتت وهي تدور على وسادة تضربه فيها شافت و سادة بالارض جات بتاخذها الا يده تسبقها
طلال باندفاع: تؤتؤتؤ عيب لمس الأشياء الحادة يا صغيرتي ..
راغده عضت شفتها بغيض: صغيرتي ! أنا أوريك ايش تسوي صغيرتك ..
وصارت تضرب كتفه وبطنه وهو يتصداها بضحكة: لا تدلدغيني ..
راغده بعصبية: اااه منك..
وصارت تضربه أكثر ، مسك يدها الثنتين وثبتها بالجدار
طلال بابتسامة عريضة: وأنتي ليه معصبة ! ايش سويت لك انا !
راغده تحاول تحرك يدها : أتركني .. قلت لك أتركني..
طلال شد على يدها اكثر: مو بالأول تقولين ليه معصبة وحذفتي الكرسي ليه ؟
راغده تحارب دموعها: أنت مافيك ذرة حيا ذرة دم .. كيف ممكن تسمح لها أنها تتصل فيك وهي تدري أن اليوم مو يومها .. ولا هي جكارة !؟
طلال أبتسم وبانت غمازته: كأني لمحت غيرة !؟
راغده نزلت عينها بتردد: غـ.. لا طبعا مافي غيرة ، بس هي المسألة ..." وسكتت "
طلال قرب وجهه منها وبهمس دافي: مسألة ايش ؟
راغده زادت نبضت قلبها حست بضعف كبير وبدون ماتقاومة: اتركني طلال .. قلت لك اتركني ..
طلال بتحدي وهو يناظر بعيونها اللامعة: تؤ مو على كيفك .. بالأول تقولين لي .. ليه معصبة وشوي وتبكين ؟
راغده بنكران: ذي بسبب الهرمونات ما في شيء طبيعي .. يلا اترك يدي ليه شاد عليها ..
طلال بخبث: لا .. مو باغية تردين لي الجميل ! رديه الآن ..
راغده: مافهمت ؟
طلال: بوسه ..
راغده ناظرت بشفته وبحيا: صدق انك ما تستحي .." وحركت يدها بسرعة" اتـــركني ..
انفجعت من حركته .. جمدت مكانها كل قوتها خارت وهو رخ قبضة يده ونزلت يدها وكأنها ساحت ..
ابتعد بعد ما طبع قبلة وقرب من اذنها بهمس: بعتبر انك أنتي الي اعطتيني وبكذا سددتي دينك ..
وراح عند الباب : تصبحين على خير صغيرتي ..
راغده رمشت لما سكر الباب وحطت يدها بشفتها " ايش ألي صار بالضبط ! لحظة! بجد ايش الي صار .. العالم كله وقف .. نبضات قلبي
زادت اشعر بـ اضطراب .. ايش صار ؟ وكأني وصلت لجنون الحب " ابتسمت على خفيف
" ليه يسوي بي كذا ؟ ليه دايم يستفزني وينرفزني .. ليه مش ضروري ما أعرف سبب زواجه اذا ما كان حب ايش يكون بالضبط !؟ "
جلست بالسرير على خفيف وضمت المخدة بقوة وهي مبسوطة ..
" خبلة انتي ! لهدرجة لعب فيك لعب ؟ بحركة منه يشيلك من الأرض شيل وبحركة ينزل لأسفل القاع ، من مساع كنتي معصبة وشوي وتسوين جريمة والان !
اااه منك يا طلال وش سويت بي ؟ ليتك ترحمني وترحم ضعفي "
بالنسبة لطلال ..
دخل لغرفته وهو يمشي فيها ويده على فمه " معقولة ! سويتها يا طلال ! يسس يــس .. ودي اصارخ ومحد يسمعني ، حسيت بـ انجاز كبير اليوم .. لمحت غيرتها اي غيرة ما فيها أي شك .. بس هي تكابر وما تريد تعترف .. لو تلين شوي بس شوي كان انا بخير .. وتنسى سالفة زواجي ذي بالمرة "
قط نفسه بالسرير وهو مبسوط
" طلال ! حتى وانت مراهق ماسويت كذا ! وش صاير فيك ؟ هبلت فيك بنت ناصر ! انشهد انها هبلت بي "
مشاعر الحب تشتعل في قلب راغده وطلال ..
كل منهم نامو بصعوبة ..
.
.
.
صحت و فطرت عيالها وراحت لشقة أختها بعد ما راسلتها ..
استغربت تغير مزاجية اختها المتقلبة: صاير شيء لا سمح الله؟
جنان بروقان مدت لها الشاي: صنعته بحب عشان اختي الجميلة اسوله ..
اسيل بابتسامة: اسوله بعد! هههههه اكيد في شيء .. قولي منتي بخالية ..
جنان بفرحة:امس كانت ليلة راغده .
اسيل باهتمام: اي؟
جنان بحماس: اتصلت فيه ، ورد ! مستوعبة انه رد علي ..
اسيل بصدمة: يارب انك تمزحين ! احين كل هالروقان عشان انه رد عليك ! وانا الغبية جيت من صباح الله عشان انه رد عليك ..
جنان: وش فيك يا اسيل ! اقول لك رد علي والليلة ليلتها ..قبل لو اتصل ٥٠ مرة ما يرد علي الآن من أول رنة رد !
اسيل تو تفهم الموضوع: تلمحين أنه صار شيء بينهم ؟
جنان بابتسامة خبيثة: طبعا حبيبتي طبعا..قصدك صارت بلاوي بينهم .. قلت له نطلع لحالنا قال اوك ! شكله مندبلة
كبده منها بس متحمل عشان هالتوائم ياعوينتي .. انا بصير امهم الثانية وبخليه يطلقها تريحنا ..
اسيل بصدمة: وش تهببين فيه أنتي !.؟ وش طلاق ذه ! تتوقعين انه بيطلق راغده ؟
جنان بثقة: أنا ما أتوقع أنا متأكدة والورقة الرابحة عندي ..
اسيل عقدت حاجبها: اي ورقة ؟
جنان: بعدين تعرفين الآن اختاري وش ألبس لهالمناسبة الحلوة .. ؟
.
.
.
صحت متأخر على الساعة ٩:٣٣ ..
بعد طقوسها اليومية نزلت تحت وشافت ماريان مع العيال: سوري ماريان ..
ماريان: سنيورة راغده .. بريكفاست فرست ..
راغده: ماعندي وقـ... " شافت منقوشة زعتر وكوب حراري شاي "
اقتربت شافت ورقة بجانب المنقوشة " سويتها لك اعرف تحبين المنقوشة فيه العافية .. طلال "
ابتسمت بلا شعور وجلست على الطاولة وهي تاكل مستلذة بلذة الزعتر
راغده " هي حلوة بجد ولا عشانها من يده ! وملاها زعتر مثل ما احب بالضبط "
بعد ما خلصت افطارها صعدت السيارة مع ماريان متوجهين لصالون ..
جلست بمكتبها : اعتذر على التأخير نهلة .. في اي حاجة مستعجلة اليوم ؟
نهلة: لا طال عمرك ..
راغده: تمام اسمحي لماريان تجي مع توائمي ..
نهلة: ابشري طال عمرك ..
راغده مسكت جوالها " أشكره على الفطور ! او ماله داعي .. ما بيضر لو شكرته ! "
ارسلت له رسالة نصية وهي مبتسمة تتخيل وش ممكن يكون ردة فعله ..
.
.
.
كان بدوامه لما تلقاء الرسالة ابتسم بلا شعور " المنقوشة جدا لذيذة تسلم شيف طلال " وجنبها قلب أبيض
طلال مسك جواله وباس الرسالة
سامي يناظر فيه : استلم ياخليفة .. خروف عسكري ..
خليفة بضحكة: الا وانت الصادق خروف بوسة عن بعد ..
خليفة وسامي:ههههههههههههههههه
طلال مو منتبه لهم: وش ؟
سامي: امبــــاع ..
طلال فهمهم: زوجتي ! مو حلالي !
سامي: ايا الخـــروف ..
طلال: اوك خروف ! اذا ماخرفنتني زوجتي ام عيالي من الي بيخرفني ! خوياتك ؟
خليفة: بـــــوم .. ماكو جبهه سامي هههههههه ..
سامي باحراج : عن يومك ياشيخ .. كلتني بقشوري ..
طلال: تستاهل .. يا خروف التمر ..
خليفة وطلال: هههههههههههههههههه
سامي: ياربي للان مانسيت ..
طلال: ذكره يا خليفة ذكره ..
خليفة يقلد المحادثة بين سامي والبنت وبنعومة: حبيبي ما أقدر اكلمك قبل الفطور يرد عليها خوينا أول ما يأذن ادق عليك افطر على صوتك ..
طلال وخليفة بصوت واحد: سجل عندك خروف التمـــر ..ههههههههههههههه
سامي بندم: انا الغلطان ألي اسولف لكم عن إنجازاتي..
خليفة: ايش انجازاته أنت بعد ! استح على وجهك ..
طلال: والله لو ماتبطل عن سوالفك لنمسكها عليك ممسك يا خروف التمر ..
سامي: غلطان الي يعلمكم بسره احين وش الي ينسيكم عن هالسالفة والله انها من رمضان العام..
خليفة: وكل فترة بنذكرك فيها ..
سامي: يعني انت طالع منها ..
خليفة ببراءة: وش سويت انا بعد ! انا مامعي هالسوالف ..
سامي: انا اذكرك وش كاتب لحبيبتك ..
طلال: افا انت منهم يا خليفة ؟
سامي: اقلها انا خروف التمر لكن انت شيء ثاني ..
خليفة باندفاع: خلاص يا سامي الله يهديك ..
سامي: لا خله يعرف يألي ضارب المثل لك .. موريني محادثته مع بنت كاتب لها دعيني اوزع قبلاتي على شعرك الحريري حتى يزداد طولا ونعومة ..
طلال: افا يا خليفة .. طلعت خروف زيت دابر املأ ! هذا آخرتها ..
سامي فطس : ههههههههههههههههههههههههه حلـــوة ..
خليفة باحراج: ههههههه مقبولة منك طلول .. بس في شيء أنت ما تعرفه يا طلال وش مسوي خروف التمر ..
سامي: انا لله وش فيك علي أنت خلني بحالي ..
طلال عدل جلسته: في غير خروف التمر ..؟
خليفة: ذي كانت بداية رمضان العام أسمع نهايته حبيبته كاتبة له سامي أنا صايمة وافطرت لاني عطشانه عادي؟ ماعليك حبيبي صيامك جائز ..
طلال فتح عينه على سامي: على كيف امك ؟ يعني ما اكتفيت بخروف التمر الان خروف مفتي ؟
سامي حذف كرتون المنديل عليهم: لا لا بارك الله فيكم .. لو تمسكونها علي ماعاد بغطي عليكم وقت الحاجة ..
طلال:ههههههه زعلت؟
خليفة: الله يهديك يا سامي نمزح والله نمزح ..
سامي: لاعاد تعودونها ..
طلال : سولف لنا عن مغامراتك يا سامي .. عليك الآمان ..
خليفة رفع يده: اتعهد ..
.
.
تفاجأت بـ اتصالها ..
راغده: اهلين اسيل ..
اسيل: هلا راغده كيف حالك ؟
راغده: الحمدلله طيبة علومك ؟
اسيل: تمام .. امممم ودي بشوفتك وشوفة عيالك ، لو حابه نطلع سوا وميس معنا تغير جو .. نروح لسينما ..
راغده: ما معي شغل مو مشكلة على كم الساعة ؟
اسيل: بعد صلاة العشاء زين ؟
راغده: تمام الله معك ..
سكرت منها ..
نرجس الي كانت قبالها: وش تريد منك ؟
راغده: بس حابه نتمشى ونتسلى ..
نرجس: منيب متطمنة غدو انتبهي منهم ..
راغده وهي تكتب بالورقة : ليه ! وش بيسون ؟
نرجس: مدري ! اي شيء نجس ووصخ بيسون ومو اي شيء .. اكيد فيه خناق بينك وبين طلال ..
راغده بتفكير: ما اعتقد اسيل مسالمة مامعها حركات .. من تزوجت طلال مابيوم فكرت تضرني او تسوي اي شوشرة .. حتى الشقة
ألي اخذها طلال منهم ما فكرت بيوم تعاتب او تتشره او او .. بالعكس كافيه خيرها و شرها ..
نرجس: اي بيجوز .. بس اختها اكيد فيه ..
راغده ناظرتها: صح انا وياها مانحب بعض من قبل بس ما بمره حسيت أن معها كيد او حتى فكرت
بي حتى لما رحت بالاستراحة مافكرت تعترضني باي شيء ..
نرجس: صحيح ! بس لا تنسين كلام اسراء بنت عمها عنها .. كل شيء حطيه بعين الإعتبار ..
بعد صلاة المغرب توجهت لبيتها جهزت نفسها وعيالها لطلعة ..
توجهت لبيت عمها راشد صعدت معها ميس واسيل وعيالها وتوجهو للمول يتمشون ..
حطت عيالها مع ماريان يلعبون بالالعاب معهم اسيل ..
اسيل: شوي بس بلعبهم واجيكم مو مطولة ..
ميس بحماس: اوك .. تعالي راغده نشتري .. ودك اغير ستايلك
راغده: استغفر الله كم مرة بغير ستايلي! انا ستايلي حلو وكله الوان ابشرك .. انتي تعالي اغير ستايلك ..
ميس: ههههههه مو قصدي راغده بس احب ألعب واتسلئ واصير كأني جويل ..
راغده: وانا قبل توقعت ان في ستايلي شيء مو حلو ..
ميس: بالعكس ذوقك صار كله ألوان .. خلينا من سالفة الذوق وخلينا نشرب شيء منعنش ..
وجهة المطاعم أخذو لهم مشروب ..
جلسو بالكرسي
ميس: كيف بتكون حفلة الميلاد ؟
راغده: للآن .. بس فضلت تكون عائلية ومنها تأخذون راحتكم بالمرة ..
ميس: اي ان شاء الله .. " رن جوالها وردت" اهلين .. لا أنا طالعه بالمول مع راغده واسيل ..
جنان بخبث: صدق انكم خونه ليه ما اخذتوني معكم ..
ميس: انتي عارفه ... " وسكتت "
جنان:انا بعد بالمول مع طلول ، اي مول انتو ؟
ميس ماتريد تعلمها: اي تتهنون يارب ..
جنان:احنا بمول الـ#### ..
ميس انصدمت: ايش !
جنان بنفس خبثها: عاد تمنيت نجتمع سوا .. بس ضروري بكره بيوم مو يومي نتمشى ونغير جو ..
راغده ناظرت بميس ألي واضح انها اختبصت وبقلق: في شيء ميس ؟
ميس قفلت الخط: هالة ! هالة زعلانة وودي نرجع وناخذها للحديقة مثلا يصير افضل ..
راغده: تعتقدين هالكلام بيدخل مخي ، صار شيء ؟
ميس بتوتر: خايفة من الي بيجي ..
راغده بقلق: وش ألي بيجي ؟ عمي راشد بخير ؟
ميس: اي هم بخير تطمني .. بس الي اتصل بي ..
راغده بشك: جنان ؟
ميس ناظرت براغده بدهشة: كيف عرفتي ؟
راغده : صار شيء ؟ تكلمي ميس ..
ميس بسرعة :هي وطلال هنا .. بالمول ..
راغده ألي للحظة فسرت كل شيء صار على انه خطة مدبرة من اسيل وجنان ..
ميس فهمت راغده: انا مالي علاقة والله راغده .. زي ما انتي شايفة مادريت عن طلعتكم اليوم عشان العيال إلا لما انتو قلتو لي تعالي معنا ياميس وانا جيت ..
راغده تحاول تحافظ على هدوئها: لا تهتمي .. ان صادفناهم بيكون مو جديد .. قبل كنت اصادفهم سوا بالمول لما كان سطام عايش ..
ميس وهي تحاول تفتكر ، تغير معالم وجها: هي بس عشان تقضي لزواجها لانه كان قريب وطلال كان فاضي و.. " سكتت "
راغده شربت من عصيرها البارد تريد تبرد الحرارة ألي بداخلها وببرود مصطنع: ما طلبت منك اي تبرير يا ميس ! الآن هي حصلت عليه .. على حبيب القلب وش يفرق ؟
ميس: ليكون انتي مفكرة ان طلال وجنان بينهم حب ! لا بالعكس هو تزوجها عشان عمي ما رضى يزوجها لغريب ..
راغده سكتت ٦ ثواني وفرطت ضحك:ههههههههههههههههههههه� � حلوة ذي ميس .. على اساس عيال عمامك خلو وماعاد فيه إلا طلال !
ترى معك عيال عم من جهة جدتكم الثانية .. ولا ناسية ان جدك متزوج حرمتين ؟
ميس: ادري راغده بس علاقتنا معهم شبه معدومة بس بالمناسبات نتشاوف .. نتشاوف اكثر شيء بالمسابقة الي عملوها سنويا ..
راغده: ميس ! خلاص ..
ميس بقلق: يعني وش ؟
راغده: يعني خلاص ! ليه تدافعين عن اخوك ! هو الشيء صار وخلاص انا مو زعلانة بجد لا منك ولا من احد ، ذه نصيب حبيبي .. يلا نمشي ! نشوف فيلم ؟
ميس:........
راغده قامت: انتهى وقت اسيل .. يلا
ميس قامت معها والي كانت خايفة منه صار .. وصادفو جنان وطلال ..
جنان أول ما شافت راغده شبكت يدها بيد طلال ..
طلال استغربت من تصرف جنان وناظر قدامه كانت الصدمة لما شاف ميس وراغده ..
راغده انتبهت لحركة جنان ابتسمت بسخرية وهو تعتصر الألم بجواتها .. ناظرت بطلال ألي كان بآخر شياكته ولابس البلوزة الازرق النيلي ألي تحبها عليه ..
جنان اقتربت من ميس وكأن شيء ما صار وبدلع: ياربي انتو هنا ! ايش هالصدف الحلوة .. تو قال لي تلال نروح لسينما .. في فيلم موت موت .. ايش رأيكم نشوفه سوا !؟
راغده وعينها مانزلت من طلال : استأذنك ميس ..
جات بتروح بس جات بوجها جنان وبصوت خافت: علامك راغده ؟ تضايقتي من وجودي؟ ولا ما تحبين تشوفين طلال مع وحدة غيرك ؟
المفروض انك تعودتي ..
راغده شدت من قبضة يدها..
جنان بابتسامة خبيثة: اهنيك على رباطة جأشك والله تشوفين ابو عيالك مع غيرك وكأن شيء عادي عندك ..
راغده بنظرات ثاقبة: والله مو قدك !
يجي لعندي بصباحية عرسكم !
جنان انقهرت من كلام راغده وهي تصر على اسنانها: لك جرأة تتكلمين بعد ما بعدتي بين حبيبين ! صدق انك وقحة ..
طلال اقترب منهم يالي كلامهم كان غير مسموع لكن انتبه ليد راغده وهي محكمتهم بقوة دليل انها معصبة: راغده ..
راغده ابعدت عينها عن جنان وناظرت ميس: أنا بروح اشوف العيال آلاعبهم .. معليش بنخرب على طيور الحب ، خلي اخوك وزوجته يرجعونك ميس بالاذن ..
ومشت بخطوات ثابتة وسريعة ..
ميس ناظرت فيهم: ما لقيتو الا هاليوم ؟
طلال التفت لجنان وبصرامة: وش قلتي لها ؟
جنان ببراءة: قلت لها اسفة ماكنت ادري انكم هنا بالمول لو كنت ادري ما جيت اعتذرت منها وهي الله يسامحها شتمتني .. " ومسكت يد طلال لما شافت نظرته لها خافت ونزلت يدها على طول " ٥ دقايق ويبدأ الفيلم طلال ..
طلال : ميس ادخلي معها انا شويات وبجي ..
جنان بغيرة: لوين طلال ؟
طلال مشى ولا عبرها ولحق راغده عند الألعاب ..
راغده: معليش اسيل روحي احضري الفيلم .. ميس هناك تنتظرك ..
اسيل تناظرها بغرابة الي مزاجها تغير فجأة: طيب ..
راغده توجهت عند عيالها الي يلعبون مع ماريان والحزن بوجها : يلا ماريان ..
بصوت من وراها: راغده ..
راغده " لا يمكن اخليه يشوف ضعفي ودموعي " ألتفتت له ببطئ
طلال باندفاع: راغده .. لحظة ..
راغده ببرود عالي: هلا !
طلال يناظر بعيونها اللامعة: كنتي تبكين ؟
راغده : لا وش دعوة بس تثائبت " وسوت نفسها تتثائب من جديد " واضح ان فيني النوم ..
طلال: مثلي على الكل الا علي لأني اعرفك من ايماءت ونظرات وحتى مشيتك ..
راغده صغرت عينه: يعني المفروض اني اهنيك ؟ على معرفتك لي بـ ادق تفاصيلي !
طلال بصوت قريب للهمس: مامعي علم انك بتطلعين راغده وكل شيء صار صدفة ابدا مو بقصدي ولا تعمدت انك تشوفين ألي شفتيه ..
راغده بقهر داخلي: ليه انا وش شفت ؟ كل ألي شفته عرايس جداد يتمشون ! وذي زوجتك على اي حال ..
طلال صار يناظر بعيونها كمية الآلم: طبيعي أشوف الدموع بعيونك متجمعة ! طبيعي أشوف كبريائك تقدمينه بكل شيء ! طبيعي أشوف غيرتك بنظراتك وخطواتك !؟
راغده نزلت عينها لتحت: ممكن اطلب طلب ؟ رح أرجع ولا تفوت الفيلم عليك واحرص أنك تختار فيلم أطفال
لان عيال اسيل بيكونون معكم .. وللحديث بقية يا " وهي تقلد دلع جنان" تلال ..
وراحت مع ماريان وهي تتحلطم : تلال! تلال وهضاب و اودية .. دلع ماصخ
صعدت سيارتها واتصلت بنرجس عشان تجيها ..
دخلت بيتها وغيرت لبسها لبيجامة مريحة ..
اندق الجرس وفتحت ماريان
دخلت نرجس : اهلين ..
راغده: روحي نامي ماريان انا بهتم بالعيال..
ماريان: اوكي سنيورة ..
نرجس جلست جنبها: تنام هالوقت ! والله انك مدلعتها ..
راغده: لزوم اريحها يا نرجس .. هي بشر بعد تحتاج تكلم اهلها تشوف عيالها بعد ، لو ما اريحها ما يندرا وش ممكن تسوي .. لزوم الحذر بعد ..
نرجس تناظر بعيون راغده الحمراء: بسم الله ! فيك شيء راغده ؟
راغده بصوت حزين: فيني بلاوي الدنيا يا نرجس .. اشعر أني كبرت سنين .. وكأني شايلة هموم على ظهري ، احيان اقول ليه استعجلت وتزوجت مير الظروف ..
نرجس: وايش مناسبة هالكلام ؟
راغده: رحت اليوم مع أسيل وميس للمول ودهم بسينما ومنها نرفه للعيال .. احزري من شفت هناك .. !
نرجس: مين ؟
راغده: تلال مع جنان ..
نرجس بصدمة: اما ! مستحيل يكون صدفة ولا ؟
راغده: طبعا مؤامرة عشان اشوف وضعهم وانهم مبسوطين و مرتاحين شفتها وهي مشبكة يدها بيده وهو ياسلام سلم .. اخر شياكة
وأحدث استايل لبسه بـــس عشان يطلع مع الخبيثة .. تصوري تتهمني اني سرقت طلال منها !
نرجس: نعم ! من الي سرق من ؟ شكلها تريد تاخذ دور مو دورها المصونة ليكون سكتي عليها ؟
راغده نزلت دموعها: ايش تبغيني ارد عليها يا نرجس وانا مو عارفه هل فعلا اخذته منها او لا ..
نرجس: مو هو الي خطبك ؟ وهو الي تعنى لك ليه تحسين بالذنب ؟
راغده " اصلك مو عارفه اي شيء يا نرجس " صارت تبكي بصمت ..
نرجس طبطبت على ظهر راغده: راغده ما يصير كل يوم والثاني تضعفين عشان نفس السالفة ؟
راغده بصوت يرجف وبعصبية: كيف تبغيني اهدأ يا نرجس ! شعور الخيانة موجع كيف تبغيني اتقبل زواجه بالساهل ليت في سبب عقم ولا ردأ فيني !
ابغى بس سبب واحد يريحني فيه .. حتى شكلي مستحيل يقولون اني بالثلاثينات عناية بكل شيء وش سويت عشان يعاملني كذا !
نرجس بحزن : في رجال كذا يا راغد يحبون يخربون على أنفسهم بكل شيء والله ..
راغده تمسح دموعها بالمنديل: تعبت اتصنع القوة تعبت والله تعبت ..
نرجس بانفعال: وليه تتصنعين ؟ اظهري كل مشاعرك اوعدي نفسك انك بتظهرين كل مشاعرك له ..
راغده: وش الفايدة ؟ اذا ظهرته هل بينمحي الوجع ألي بقلبي ؟
الا بـ إتصال ام عبدالعزيز ماقدرت ترد بسبب صوتها
نرجس: وش بتسوين الان ؟
راغده وهي ماسكة الجوال تقرا محادثة امها: هذا ألي كان ناقصني بس يا نرجس ! زواج خالي بدر بكره ..
نرجس: يوه ! نسيت عنه أنا بعد .. من البلاوي ألي صارت لنا ..
راغده: وطلال بيرفض بس بروح وغصبن عنه ..
نرجس: وليه يرفض؟ عادي ذه خالك روحي وفليها ..
راغده : بالضبط ..
نرجس: ولا تبكين نفسك .. ولا تردين عليه حاولي تطنشين ..
راغده بوعيد: بكره بيكون كله عناية واهتمام انا اوريه بس ..
نرجس حطت لهم اغاني اطفال لعيال راغده وصعدت معها فوق تختار لها فستان لزواج بدر ..
.
.
رجعو البيت وهي مغتاضة من اختها : وش هالسواة يا جنان!
جنان بقهر: محد اكلها غيري والله يعني بدل ما اتهنا بيومي ! تجون انتو تخربون علي !؟ وبالاخير بدل ما يصير فيلم رومانسي صار اطفال !!
اسيل: هذا من نيتك وسوادة قلبك الان وش بقول لراغده ! بتحط ببالها اني متقصده ..
جنان: ويه ! وش عليه كل هالخوف و الاهتمام ؟ عادي هي لا نفعتك ولا ضرتك ..
اسيل: بالضبط .. ولانها ماتنفع ولا تضر ليه انا اضرها ! وهي كافية خيرها و شرها .. لكن احسن تستاهلين الي يجيك ..
جنان: مالت عليك وعليها ، الغلط اني اتكلم وياك
وصعدت لشقتها
.
بالسيارة
الي لسى ما نزلوا
ميس: اقسم لك طلال اني ما ادري ، اتصلت بي جنان وقالت انها تتمنى تكون معنا وسألتني احنا بأي مول ! ما جاوبتها الا شوي نشوفكم بوجهنا ..
طلال صغر عينه: متأكدة ميس ؟
ميس بخوف: بس لا تقول لجنان اني قلت لك .. ما اريد مشاكل مع حريمك ، انا احب جنان واحب راغده ..
محد منهم ضرني .. بس جنان تغار من راغده بقوة انا متأكدة ان جنان قاصدتها ..
طلال وهو يتذكر اصرار جنان انها تتمشى معه وهي تبكي عشان بس يوافق: لهدرجة ! " تنهد " استغفر الله بس وأنا ألي قلت أن كل شيء تمام بيننا ..
ميس: ليه ؟ كنتو متخانقين انت وراغده ؟
طلال تورط: لا لا .. بس تدرين كانت شايلة بقلبها إنو ليه تزوجت وزعلت شوي ، والان اكيد بتزعل من جديد ..
ميس بتفكير: اي والله ، مسكينة راغده .. وكاسرة خاطري جنان
طلال رفع حاجبه: انتي مع من بالضبط ؟
ميس: جنان بنت عمي بس ما ضرتني بيوم صح مقهورة انو ليه تزوجتها وراغده ما تستاهل بس ما بيدك شيء تسويه ، كافي أبوي
التعبان خايف بس على اخوه لا يصيبه شيء .. من بعد أخوه مات سرطان الرئة بسبب التدخين وهو تعبان بالحيل ولا ما كان قال لك تزوج جنان ..
طلال ألي بين نارين: طيب طيب انزلي ميس ، لو تأخرت اكثر بتشك جنان و ... " الا بـ اتصال منها " شفتي شلون ..
ميس بابتسامة: يا كايدهم .. الاثنين يعشقونك من قدك .. من كان يتصور ان جنان بتنسى سطام بلحظات من زواجها فيك .. وراغده الهيمانة فيك ..
طلال باهتمام: يعني انتي تشوفين ان راغده تحبني ؟
ميس: قال تحب قال ! اقول لك هيمانة فيك يكفي اليوم نظرتها يمه حسيت كأنها رصاصة راغده ممكن ماتبين لان معها كبرياء ..
طلال " نفسي اسمعها منها .. من بعد الي صار فترة طويلة ما عاد قالت لي كلمة حلوة ولا قال لي مثل قبل احبك طلال .. الله على ذيك الليالي "
ونزلوا من السيارة
توجه لشقته شاف جنان وهي مترتبة ومهندسة نفسها بقميص ناعم وردي واضح رسمة القلق بوجها
طلال يناظر بعينها: بخصوص ألي صار يا بنت عمي ، أنا بسوي نفسي كأني مو داري عن خطتك وبعتقد انها فعلا مصادفة ..
جنان تخفي قلقها: وهي فعلا مصادفة طلال ، أنا ما معي رقم راغده أصلا .. ! كيف بدبر مثل هالخطة ..
طلال ابتسم بـ استخفاف: واختك اسيل ؟ وميس ؟ معك ارقامهم ؟
جنان تمنت انها سكتت ولا فتحت لنفسها باب: هه ! اي بس تقدر تسألهم اني ما حددت مول ولا قلت لهم شيء .. صدفة يا طلال صدفة ..
طلال عقد حاجبه: جنان ! يعني ما بترتاحين إلا واقول لك انك كذابة ! واظهر كل شيء ضدك ؟
جنان بخوف بلعت ريقها: طلال والله مو قصدي شيء .. بس كان قصدي نتجمع مع بعض وابين لها إنو كل شيء عادي وأن لابد تتقبل فكرة زواجك مني ..
طلال ألي كان فاهمها : وانتي ليه شايلة هم تقبلها ! مالك علاقة جنان . " وبتهديد" لو تكررينها ما تلومين إلا نفسك ، لو اسمع و اشم ريحة بس تدخلك وأذيتك لها بالكلام أنا لي تصرف ثاني وياك ..
جنان خافت من تهديد طلال بس مالها إلا أنها تسكت عشان ما ينقلب كل شيء عليها ..
.
.
وعت على صوت بكاء بنتها تمغطت وشافت ساعة الحايط تشير للعاشرة صباحا ..
قامت سوت لبنتها رضاعة ودخلت للتواليت سوت طقوسها اليومية ..
طلعت وغيرت حفايض العيال بعد نومة ثقيلة وعميقة رغم كل ألي صار أمس..
فتحت جوالها شافت ٢ اتصال من ميس
٤ من أسيل
١ من أمها ..
دخلت واتس شافت كلام طويل من اسيل تبرر موقفها وحالها وان الي صار ماكان بتخطيط منها نهائي .. وتعتذر اكثر من مرة
اما ميس كانت نفس اسيل تعتذر وتبرر موقفها
انتبهت لرقم غريب مكتوب " لو انك تحبين طلال فعلا اتركيه لي ، مو كافي السنوات ألي عشناها بدون بعض .. مات سطام وربي رجعنا سوا ليه تسوين كذا .. انا اطلب منك بكل لين واحترام أنك تتركين طلال
.. ادري ان الي صار أمس بتخطيط مني بدافع الغيرة بس الآن اكلمك بكل ود ارجوك اتركي طلال أنا ما أقدر اتحمل فكرة انه يكون لغيري ، كافي عصرت قلبي
من قبل انه تزوجك بس عشان ينتقم مني ومن ابوي بسبب رفضه لطلال لان ماكان بدون وظيفة بس كان بيننا وعد وانصدمت لما انتقم مني بزواجه منك ..
امس طلب مني نطلع وانا الي حددت المول ولما صادفتك مع ميس كان وقتها تو محتفلين بزواجنا رغم كل هالشهور ! لاني ما كنت راضية يكون معي شريكة
بس هو أصر أنه يراضيني وقلت له ما اقدر أتقبل يكون معي شريكة .. هو قال بيسوي الأمور معك وانتي على اي حال مو بحاجته يا راغده انتي معك كل شيء وش لك بزوج قلبه مع غيرك ؟
انتي مو مثلي انا ما احسدك بس بفلوسك تقدرين تطمعين اي رجل فيك ! ومعك عيال ! اتركيني اعيش حياة حلوة مع حبيبي طلال .. "
هي مصدومة من ألي تقراه رجعت تقراه من جديد بفم حزين وعيون مليئة بالدموع وبنظرات صادمة .. دقات قلبها صارت سريعة وهي تعتصر الألم والحزن ..
انخرطت ببكاء صامت وهي تشهق وفكرة تأخذها وفكرة توديها ..
كأنها استنزفت كل طاقتها لفترة طويلة وهي تقاوم وتقاوم ..
حان وقت الأستسلام وانها تنسحب من حياة طلال كان أفضل من أنه هو ينسحب منها .. ممكن بكذا تحافظ على كبريائها ..
آنتهـــــــى البـــارت