رواية قيود - الفصل 13 - بقلم ساندرا - مكتملة | روايتك

البــــارت الثالــــث عشــر ام عبدالعزيز بعصبية: لا تكذبين كل شيء مكشوف كان يقول لك يا حبيبتي ولما سألته من يكلم ألتبك وسألته وش معك مع راغده ؟ قال لي أنه يكلمك ! فسري لي كلمة حبيبتي يقولها لك ليش ؟ ها تكلمي يا خرا .. راغده بصدمة وهي تسمع كلام أمها: يمه حمود يكذب والله أني ما أعرفه ولا في مرة كلمته الا باليوم ألي شفتينا به .." بتوتر" خبرك أنا ابتعد عن الشباب حتى بمراهقتي كنت عاقلة ماقد خطيت و.. ماوعت إلا بطراق على وجها وبخيبة ظن: للآسف انا اعطيتك فرصة تعترفي واعطيتك فرصة يا راغده أنك تبتعدين عن حمود لكن أنتي .. انتي فضلتي الإنكار .. من متى علاقتك بحمود متى بدأت ؟ الا بدخله مها وبيدها جوان: هلــوو .. عبير وراغده ألتفتوا واللبكة على وجهم كانت واضحة .. مها: بسم الله وش فيه وجهكم مخطوف ؟ صار شيء بخالي ؟ تكلموا راغده وعينها تحت: عن اذنكم بروح أتكلم مع ريهام .. وطلعت من المجلس توجهت لغرفة ريهام: ممكن تطلعين برا الغرفة ام شاكر معي كلام لريهام .. بعد خروج ام شاكر .. ألتفتت راغده لريهام وجلست بطرف سريرها: ريهام ايش ألي سمعتي ؟ ريهام: سمعت ما يكفي .. انك مع حمود .. راغده: وانتي تتوقعين هالشيء مني أنا يا ريهام ؟ ريهام: أجل ليه طلعتي منا ورحتي لبيت لحالك ؟ راغده: لي اسبابي ولكن ثاني سبب أن أبوك ما كان راضي أني ابقى هنا قال لي تزوجي ولا شوفي لك صرفه وانا كنت بانيه لي بيت على اي حال واول ماجهز انتقلت .. ريهام بعدم اقتناع: مها كانت دايم تشك ان حمود يكلم بنت .. " مسكت يدها" ارجوك لو هالكلام صحيح اتركيه .. راغده تناظر اختها بخيبة " حتى انتي معهم يا ريهام " ريهام بحزن: كانت تبكي مها كثير ان حمود مو معها ورفض أنها تحمل بعد جوان يقول ما يحب كثرة العيال .. راغده اول مرة كانت تعرف هالأمور: ريهام اعطيني فرصة ابرئ نفسي وحا تشوفي أنه كذاب وانا الصادقة .. ريهام: اتمنى .. بس الخبر وصل لابوي وقال أنه بيفصل طلال من العسكرية .. راغده قامت من مكانها واجرت إتصال لعمها فؤاد باندفاع: اسمعني لنهاية وأنا بشرح لك كل شيء .. ابو عبدالعزيز بحده: وش عندك من مصايب؟ راغده: ضروري اكلمك .. ابو عبدالعزيز: أنا أسمع راغده: ماينفع اتصال الموضوع مهم .. ابو عبدالعزيز: انا متوجه للمستشفى بقابل حمود .. راغده باندفاع: لحظة عمي ان وصلت لا تدخل ، بشرح لك كل شيء بس اقابلك .. صعدت سيارتها وتوجهت للمستشفى تقابلت مع عمها بموقف السيارات .. ابو عبدالعزيز رمقها بنظرة .. راغده تنهدت: ادري وش تفكر فيه لكن ممكن تترك الموضوع لي ؟ وأنا بنفسي راح ابرر نفسي من هالتهمة طيب ؟ ابو عبدالعزيز: ........ راغده: عطني ١٥ دقيقة تكفيني .. انت انتظرني بسيارتك وبتسمع كل شيء بأذنك .. خل جوالك عام أول ما أتصل فيك رد وخلك على ساكت .. ودخلت مبنى المستشفى وشافت دكتور حمود بالممر توجهت له وهو يشوف من ملامحها وخطواتها انها معصبة استأذن الدكتور الي جنبه واقترب منها راغده وهي تحاول تكبح نفسها: أيش قايل لأمي عني ؟ د.حمود بقلق: سامحيني راغده ما كان بيدي شيء غصب اكذب .. راغده بذهول: وليه حطيتها فيني .. أنا وش سويت لك ؟ د.حمود: أول ماشفت عمتي عبير وسألتني عنك دايركت جيتي ببالي .. راغده بخيبة أمل : طالمة أنت مو قد المغازلة ما كان حطيتني برأس المدفع ، ليه تتبلاني انا اصلا رقم جوالك مو معي ولا مرة تكلمنا ولا مرة ، تدري وش بيسوي عمي وامي فيني ؟ د.حمود بندم: سامحيني راغده أوعدك أني بتكلم مع عمي بكل شيء .. ابو عبدالعزيز بصوته الثقيل : عن وش يا دكتور .. د.حمود انصدم من وجود عمه راغده اقفلت الخط اول ما شافت دخول عمها واقتربت من عمها: انا ألي علي سويته أما باقي مصايبه أسمعها منه أفضل .. استأذنكم .. ابو عبدالعزيز اقترب من حمود: وش عذرك ؟ اعطيتك بنتي كذا تصونها ؟ حمود: عمي أنا بشرح لك كل شيء بس لا المكان ولا الزمان مناسب .. انا بمرك الليلة بمجلسك واقول لك كل شيء .. رجعت لصالونها واكملت شغلها لساعة ٩ بالليل توجهت لبيتها واخذت دوش لكامل جسمها عشان تصفـي ذهنها وتبعد كل الحزن والبلاء ألي جاها .. اتصلت بطلال عشان يمرها .. لبست اللبسة ألي جات بوجها تي شيرت مع ليغينز وصندل ناعم .. مكياج خفيف ناعم أول ما اتصل فيها نزلت تحت وصعدت بسيارته طلال بابتسامة: تــو منوره سيارتي راغده ألتفتت له " اشتقت لهالوجه": بنورك .. طلال بعد صمت دام ٧ ثواني: مو كأنك نسيتي شيء ؟ راغده بتفكير: لا ابدا ما نسـ .. طلال قاطعها وخطف بوسة سريعة وبابتسامة: الآن تمام .. وحرك السيارة راغده التفتت لنافذة وابتسمت ابتسامة عريضة تحاول تخفي ذوبانها وحبها لقربه .. كان الصمت سيد الموقف طلال نزل من السيارة وفتح لها الباب .. راغده صارت تناظر فيه كان في آخر شياكته بنطلون أسود وقميص أبيض وجاكيت جلد أسود وحذيان سوداء نزل مستواه لها و فتح حزام الأمان .. راغده كان قلبها بيوقف من قربه لها وبلبكة حطت يدها فوق يده عشان تفتح هي الحزام وألتقت نظراتهم ببعض بلعت ريقها : أعرف افتحه .. طلال ابتعد عنها: شفتك تأخرتي قلت اخدمك يا سنيورة .. أخذت شنطتها ونزلت من السيارة اقترب منها وشبك يده بيدها دخلوا المطعم .. فسح لها الكرسي وجلست المطعم كان هندي وبديكورات هندية وبانوار دافية اعطها الايباد تطلب لها منه .. راغده: على ذوقك .. طلال بعد الطلب ناظرها : بيعجبك .. راغده إن شاء الله ، واضح انك من ألي يفضلون الأكل الهندي .. طلال: جدا .. على فكرة أريدك ترافقيني للمسابقة .. راغده: جاء موعدها ؟ طلال: قدموا الموعد .. راغده: كيف نظامكم بالأستراحة ؟ طلال: قسم للحريم وقسم لرجال بس بيكون العكس انتو بتنحكرون بمكان واحنا ألي بننطلق للمطبخ على بال ما تنتهي المسابقة .. راغده: جميل ، يعني يوم الدلع لنسوان ؟ طلال مسك يدها: وذه يومك انتي .. راغده بخجل: هو كل يوم يومي ولا وش السالفة ؟ طلال بابتسامة: طالمة أنتي معي بتكوني دايم سيدتي و وردتي .. راغده تغير الموضوع: ما قلت لي وش صار ببيت اهلك ؟ ما قلقوا أنك مانمت برا .. طلال: أنا خبرت ميس تقول لهم أني بسهر بالأستراحة مع الشباب .. بس مرت أبوي كذا تدور المشاكل .. راغده بغيض: كل مرت أب وزوج الأم واحد ! كريهين ومافيهم خير .. طلال: العم فؤاد معهم ؟ راغده بلا تفكير: هو أولهم " انتبهت على نفسها" أقصد فيه حقهم مهما وش كانوا وبينوا يظلون فيهم خبث .. اتكلم بشكل عام .. طلال: أنا ما شفت هالشيء في عمك بالعكس حسيته مبسوط أنك تزوجتي وقبل بكل شيء عشانك علما بأن أبوي دايم يقول أن فؤاد بيرفضني لأنه ما بيقبل يزوج بناته لمستوى قليل .. راغده: هذا أنت قلتها بناته ، الحمدلله أني مو بنته .. اقصد من حبي لابوي ناصر رغم اني ماعشت معه ولا عرفته بس هو حب فطري .. طلال: فعلا .. راغده: وله فضل كبير بألي أنا فيه الآن .. طلال: كيف ؟ راغده: ورثت منه وأشتريت أرض كان ألي يساعدني هو خالي بدر وهو ألي فكر أني أشتري أرض لأنه كان يشوف أن عمي فؤاد مو متقبل وجودي أكثر كان وده يزوجني اليوم قبل بكره بس تدخل خالي بدر ورفض زواجي وكل ما جاني خطيب كان يرفضه خالي قبل ما يشاوروني عليه .. طلال " عشان يحلاله الجو الوصخ " : وايش ألي تغير الآن العلاقة بينك وبين خالك شفتها مو مرة اوكي .. راغده تخفي حزنها: كنت أشوفه مثل الصديق والخال والأخ لكن في ناس تخرب على نفسها .. طلال مسك بيدها وبدفئ : وأنا ما ينفع أكون أفضل واقرب منه يعني الصديق والزواج والأخ والحبيب .. راغده ناظرت عينه :كل شيء يعتمد عليك طلال اذا كنت حابب هالشيء أو لا .. طلال: أنا حابب يا راغده بس أنتي رافضتني .. رافضة صداقتي وقربي لك احسك دايم بعيدة وغامضة .. راغده نزلت عينها وبهمس مسموع: أخاف يا طلال لو دريت تزعل وممكن .. طلاا: ممكن آيش؟ راغده بحزن: أنك تتركني .. طلال شد على يدها وبشاعرية: لا يمكن أتركك راغده مهما وش جرى منك لا يمكن اتركك إلا أن تركتيني أنتي .. راغده: لا يمكن اتركك مهما وش صار .. طلال بابتسامة: تحبيني؟ راغده بخجل: أنت عارف .. طلال: ما يمنع أنك تقولينها لي ، ولا بتقولينها في بيتنا " وبغمزه " راغده تغير الموضوع: بتجي معي ؟ طلال: لابد نكمل السهرة ولا وش رأيك ؟ راغده بابتسامة: تمام .. جاء القارسون جاب طلبهم وبعد العشاء الطيب صعدوا السيارة توجهوا للبيت شافت سيارة امها: امي بالبيت ياربي .. طلال حرك السيارة: ما أريد اليوم وجع رأس .. راغده: وين نروح طيب ؟ طلال: معي مكان حلو .. وش حابه تسمعين ؟ راغده: على ذوقك .. طلال بحماس: أسمعك اغنية اهداء مني لك .. راغده: طيب .. إختـلفنا مين يــحــب الــثـــانـــي أكــثــر, و إتـفــقـــنــا إنـك أكــثــر و آنـا أكـثـر, من عدد رمـل الصحــاري و من المطر أكثر و أكثر. كـيــف نـخــفـي حـبــنـا و الــشــوق فـاضــح, و فــي مــلامـحـنـا مــن اللـهــفــة مــلامــح, عاشقين و نبضنا طفل حنــون لو تزاعلـنا يسـامح, و الـــــهـــــــوى شـــــي مـــــقـــــــدر, إختـلـفنـا مــن يـحــب الـثـانـي أكـــثــــر... هنني ياللي جميعـي لـك هنا, حطـني بـآخـر مـداي, طيرك اللي ما يبي غيرك أنا, ضمــنــي إنـت فضاي. صــدق إنـي فـيـك مــغــرم, فـيك مـغـرم فـيـك, و الـحياة إيـش الـحـيــاة, إلا مـشاهـد ناظريك. يــا نـهـار لـو تـغـيــب الــشــمــس واضـــح, يمك دروبي و كل الناس يـدروا بـي و أنــا أدري, كل قلب له حبيبــه و إنــت مـحـبـوبـي و تـدري, من عيونك صـعـب تسـرقـني سـواليــف البــشـــر, و أنـا النـظــر و إنــت لـعـيــوني النــظــر, و الـهـيـام اللي سـكـن فـيـنا تـعـدانا و كبر, صــــار مــــثـــل الـــريـــح جــــامـــــح كان طلال يغني وياه وكل شوي يبوس يدها .. راغده كانت تبتسم بخجل طلال ألتفت لها: حبيبي وش اطلب لك من دوز كافيه ؟ راغده: سبانش حار .. طلال نزل من السيارة مسكت جوالها شافت إتصالات من أمها ومها وريهام وعمها .. تركت رسالة لريهام أنها بتطول بالسهرة والحديث بكره .. حطت جوالها وضعية طيران دقايق إلا جاء طلال وتوجهوا للبحر جلسوا بـ أحدى الكراسي قبال البحر ومد لها القهوة: اذا بردانه أجيب لك حاجة تدفيك .. راغده: اي والله ياليت .. طلال مسك يدها وشد عليها: وكذا ؟ راغده بضحكة: تمزح صح ؟ طلال بذوبان: احب ضحكتك .. راغده ابعدت نظرها عنه وصارت تناظر البحر طلال: لبى ألي يستحون .. شلح جاكيته الجلد وحطه بكتفها: كذا دفيتي ؟ راغده ابتسمت بأمتنان : الله لا يحرمني منك .. طلال مد كوبه: بصحتك ؟ راغده: ههههههه بصحتك .. طلال: نخب الهرب للبحر .. راغده ابتسمت ابتسامة عريضة: مغامرة صارت .. طلال : ما أحب أشوفك حزينة .. راغده التفتت له: ما فهمت .. طلال: أنا أعرف أنهم يضرونك ويأذونك كثير يا راغده وأنا ما بيدي شيء أقدر أسويه لك .. كل ما قلت بتخذ موقف تجاه عمتي أقول ذي بالأخير أم راغده وش بيدي أسوي وأقول ، أشوف حزنك وكأنك شخص ثاني معهم باردة لا مبالية رسمية ! وشفت هالشيء بداخلك قلت لا يمكن إنسانة كذا إلا ولها أسبابها .. راغده: وآيش شفت ؟ طلال بدون ما يناظرها وعينه على البحر .. أخذ رشفة من القهوة: أن معك ماضي أليم ممكن خيبة وممكن صدمة أين كان ماكان هو سبب تصرفاتك معهم ومع كل شخص غريب ممكن يكون حذر أو رسمية .. تمنيت اسمع منك يا راغده كل شيء بدون إصرار مني أريدك تفتحي قلبك وثقي أني لا يمكن أخذلك بأي شكل من الأشكال .. اذا في اشياء ما تقدري تعلميني فيها علميني عن اشياء ثانية .. راغده تنهدت بحزن : ما أدري من وين ابتدي طلال .. بس راح ابتدي بالمشكلة المستجدة الآن هي زوج أختي د.حمود قابلته أمس وأنا كنت رايحه بقصد احلل صاحبتي كانت حامل أو لا تقدر تقول مرافق لها ، كنت اروح أجيب لها قهوة يلزم ساعة على بال ما تطلع النتيجة ، اسمع حمود يكلم وحدة طلعت زوجته الثانية .. طلال بصدمة: اف ! معقولة ؟ راغده: محد كان عارف يا طلال أنا الي اول وحدة عرفت ومن سوء حظي لما جيت بكلمه اول مرة بحياتي يشوفني عمي فؤاد وأمي وظنوا أني على علاقة معه .. علاقة غير شرعية للأسف أمي صدقت وجات تتهجم مثل ما شفت أنت الصبح .. ولما شفتني أمس بحالة فضيعة كنت مخلصه هوشه معها .. طلال بغرابة: وكيف تتهمك بدون دليل بس عشان أنها شافتك معه ، يعني ليه ماقالت مثلا انك تعالجين ؟ راغده ابتسمت بسخرية: سوء الظن عند امي ألف وللأسف ممكن هذا الشيء ألي ورثته ببقية عيالها من زوجها الثاني .. طلال: وأنتي ؟ راغده: علاقتي بـ أمي ما كانت قوية ولا حتى مبنية على الثقة ، كانت تشك بي بكل شيء تقول احب لفت الانظار والانتباه ، حتى لما تبكي مها او عبدالعزيز بدون سبب تقول انا ضاربتهم غيرة .. طلال: أمك غريبة وخالك بدر كان مختلف عنها .. راغده: جدا جدا بس ما كنت أعرف أنه لغرائز ثانية عنده توقعته حب طاهر .. طلال بفضول: آيش صار ؟ راغده بتردد: تـ..تحرش .. طلال يدعي الصدمة: ايش ؟ راغده باندفاع وبقلق من ردة فعله: طلال انت وعدتني انك ما بتتركني لو علمتك .. طلال: عمتي تدري ؟ راغده: لمحت لها مرة .. بس بعدين قالت لي ذه اخوي مالي غيره ما أتحمل احد يكسرني فيه من بعدها ماعدت قلت شيء وأول ما راح يدرس بالكويت أنا خلصت بناية البيت وآثاث وتو لي ناقلة قول الان اخذت ٣ شهور ممكن.. طلال بعدم اقتناع: بس هذا ألي صار ؟ راغده شربت قهوتها: واضح أنك بردت طلال خذ جاكيتك أنا دفيت .. طلال ما ناقشها ولبس جاكيته في حيرة: طيب والظلام راغده ؟ راغده كان واضح لبكتها: اي ..قلت بسبب التحرش تأثرت وتعبت ومن بعدها ما عدت اطيق اي رجل اقابله .. طلال: طيب راغده " مد لها كوبه" نخب الاعترافات راغده ابتسمت ابتسامة صفراء ان ممكن هذا هو الشيء ألي تقدر تقوله لطلال في اشياء يفضل انها تكون بالنسيان لانها ماضي لو تم قولها ما بيتم علاجها .. راغده: وعلى أي حال لا يمكنك أن تشفى في نفس البيئة التي جعلتك مريضاً .. فا قررت أطلع من هالعايلة طلال: وكيف هي علاقتك بـ أخوانك ؟ عبدالعزيز ويوسف .. راغده: رسمية مع عبدالعزيز بس يوسف أقل رسمية .. أنا حطيت لهم حواجز يا طلال صعب أنك تعيش بين أهل رافضينك ومن تصير أي مشكلة تكون انت كبش فدا .. طلال: على قد ما سوت بي مرت أبوي ما قدرت أترك خواتي وعبدالرحمن ممكن هم السبب ألي خلوني اصمد للآن .. راغده ابتسمت له: شيء جميل يكون معك شخص تتحمل الضيم عشانه لانه يستحق .. صعب تلاقي شخص يستحق هالتضحية .. . . أبو عبدالعزيز بعصبية: وأنت فعلا شخص ما يستحق .. حمود: اسمعني للآخر ياعمي .. أبو عبدالعزيز: وش أسمع ؟ بنتي صغيرة وايش يعيبها عشان تتزوج عليها ؟ أنا أقول البنت دايم تقول لي حمود بس مشغول وأنا أقول مايخالف يابنتي هذا هم الأطباء طلعت متزوج من وراها يألي ما تستحي على وجهك .. حمود باندفاع: عمي خلني اتفاهم معك واشرح لك كل شيء وبالتفصيل .. ابو عبدالعزيز: أنا أرسلت مها وريهام وعمتك لبيت راغده متعمد بس عشان بنتي لا تدري أو تسمع خبر ، معك فرصة شهر تطلق ألي معك ذي ولو ما طلقتها لي هرج ثاني مع أبوك .. مو بنتي ألي يمخذ عليها مره ثانية .. . . . التفتت له: مابتنزل ؟ طلال: لا بكره وراي دوام لابد انوم زين .. راغده بأبتسامة: اوك ، تصبح على خير .. طلال باس يدها: وأنتي من اهله حبيبي .. صار يناظر فيها لما دخلت بيتها توجه للبيت تسطح بسريره وهو سرحان فيها " الشيء ألي ما ودها تقوله لي ، ايش ممكن يكون هو سيء ؟ لدرجة أنها اخفته علي والدكتورة محتفظة فيه ، مثل ما تكلمت الآن بيجي يوم وتقول لي كل شيء " بابتسامة عريضة دخلت عليها: مساء الخيرات .. د.سلمى ردت لها الأبتسامة: مساء النور ماشاء الله مبسوطة ؟ راغده جلست بالكرسي: بشكل ماتتصورين اشعر براحة اشعر بسعادة الأدرينالين مرتفع .. د.سلمى بشك: عشان طلال ؟ راغده بحب: حتى أسمه يخليني انبسط .. د.سلمى باستغراب: اوه وش صار ؟ لك فترة غاطه عني والان تجين بهالحالة ! راغده بحماس: لما علمته عن بدر ما تركني .. د.سلمى: ايش قصدك ؟ قلتي له كل شيء ولا ؟ راغده: لا بس عن التحرش لاتقلقي يا دكتورة سلمى في اشياء ما تنذكر انا طويتها خلاص .. د.سلمى تنهدت براحة: اي يا راغده انتبهي الرجال صنف " ونزلت نظارتها " احنا بمجتمع يا راغده أناني الرجل عادي يتزوج وحدة عازبة بس ما يقدر يتزوج وحدة مطلقة لأن في أحد في حياتها قبل .. والعازبة ذي كان في حياتها ألف رجال وألف علاقة حرام .. انتي فاهمه قصدي صح ؟ راغده: للاسف صحيح .. أنا فاهمه وطويت هالصفحة خلاص ، والظلام ماعاد منه خوف دكتورة .. د.سلمى بفرحة: مبروك يا راغده ما قلتي لي عشان نحتفل سوا لكن يمدي نحتفل بكوب ساخن وش تشربي ؟ راغده: شاي بالنعناع .. د.سلمى نقرت الزر: ٢ كوب شاي بالنعناع .. " التفتت لها " احكي لي وش صار بينكم ؟ ووش هالتغيير الكبير ؟ راغده: لي أسبوع من اعترفت له ما تغير علي بالعكس صار أكثر قرب وطلعات وخروجات وعزمني هالاسبوع على مسابقة يسوونها أهله بالشالية حقهم " مسكت جوالها " شوفي أخذنا سيلفي لما كنا بالبحر وهنا لما اقمنا سهرة بالبيت .. د.سلمى صارت تناظر راغده وببهجة: الله يسخركم لبعض يا راغده ويجعل سعادتك تدوم وتدوم معه .. راغده: امين يارب ، لكن أمي اصرت علي أني احضر الحفلة الليلة .. بمناسبة خروج خالي بدر من المستشفى .. د.سلمى: لما تشوفيه ايش ممكن يصير لك ؟ راغده: ما أعرف لي فترة ما شفته دكتورة ، اخر مرة زرته فيها بالمستشفى والآن ما أعرف " بحزن وقلق" تتوقعي بيخليني لحالي ؟ د.سلمى: طالمة أنتي بمكان ثاني غير عن مكانه مابيده يسوي شيء وأنتي معك طلال الآن .. راغده ابتسمت وبحب: على رأيك .. د.سلمى: اقبلي الروحة راغده وشوفي ايش يصير لك إذا واجهتيه .. راغده هزت رأسها بالإيجاب .. --- الساعة ٩:١٢ بالليل ام عبدالعزيز سوت بوفية فخم وعزمت فيه أعضاء الجمعية وأهل فؤاد بمناسبة خروج بدر ورجعته من الكويت .. بالمجلس .. بدر بنفاذ صبر: واضح أن بنتك مامعها احترام لخالها شوفي كم الساعة وهي للآن ما جات .. عبير تهدي اخوها: الله يصلحك بس يابدر استهدي بالله الموضوع مو مستاهل الأهم شوفتك وأنت بصحة وعافية .. بدر بحده: وش بيقولون الناس عنا ؟ السالفة بدأت تنتشر أن بيننا خلاف وأنا ما يعجبني هالكلام .. عبير: وأنا بعد يا خوي ، بس " باندفاع" هذا هي تتصل .. الو هلا راغده اي طيب .." التفتت له " هذا هي وصلت بروح اكلم الشغالة تأخذ الأغراض منها .. أول مادخلت راحت أم عبدالعزيز تحضن بنتها قدام الناس وترحب فيها .. راغده وهي تشوف الجمعة كانت برا بحديقة البيت والبوفية على جنب وطاولة حدايق الثلاث وبإبتسامة: كل ذه عشان خالي ! ليه ماعاد بيرجع للكويت ؟ ام عبدالعزيز: طبعا خلاص .. والفرحة الكبيرة بتكون بعد ما يروحون المعازيم خلك هنا لين ما تخلص مو تهجين .. المهم ادخلي واشلحي عباتك بحمام الحديقة توجهت للتواليت شلحت عبايتها والخدامة أخذتها داخل لها وهي تشيك على نفسها بالمرآية كانت لابسة فستان سكري علاق شتوي ثقيل طويل وكارديغن بأكمام طويلة بني وكعب بني ومكياج ايلاينر مموه وروج أحمر مات ، رفعت شعرها كله ونزلت خصل عشوائية تعطرت بعطرها المثالي وهي تلبس حلقها الثقيل الذهبي وساعتها الذهبية وخاتم ذهبي توجهت للمعازيم جات بوجها نرجس وبابتسامة: والله وعندك عين تجين بعد ألي سوتيه ! راغده: الظاهر أن العلم ما وصل لك أن مالي دخل مجرد اشاعة زي كل الاشاعات الي تواجهني .. نرجس: ههههه خفي علينا يالمشهورة .. راغده انحنت لها وبهمس اربكها: يكفي أني مشهورة عندك تموتين وتعرفين جديدي وحياتي وكل شيء .. نرجس عضت شفتها بقهر راغده لطمت كتفها بكتف نرجس بقوة كا ضربة لها وتوجهت لعند خواتها .. ريهام باعجاب: عسل يا راغده .. الصبغة نار عليك .. لا تصبغي لون ثاني خلك على العسلي .. راغده تناظر مها بقلق: اي مو قد جمال مها .. اخبارك مها ؟ مها بابتسامة: لا وين اوصل جمالك راغده .. انتي ألي طمنينا عنك مختفية هاليومين .. راغده تنهدت براحة لما شافت مها ترد عليها " الحمدلله واضح ان الاشاعة ما انتشرت الا عند النطيحة نرجس " : أشغال .. ريهام: أشغال مع طلال !؟ راغده بابتسامة خجل : يعني منا ومناك .. ريهام ومها: هههههههههه حركات .. مها: أفضل .. تعرفي عليه أكثر وأكثر بهالفترة وحطي له النقط على الحروف شوفيني انا حمود ماعلمني انه مشغول هالقد وعلى هذا الحال .. ريهام تناظر راغده كأنها تقول شفتي .. ريهام تغير الموضوع: اي ووين قررتي لشهر العسل ؟ مها بحماس: روحي إندونيسيا غدو في جزر هناك ياربي ايش جمالها ورخيصة .. راغده: ما فكرت فيها .. بس شورك بهداية الله مها تسولف لها عن الأماكن ألي راحت لها باندونيسيا وبمناطقها واماكنها .. اخذت ريهام كذا صورة لاختها راغده واختارت الأفضل وأرسلتها لطلال .. طلال: وين رايحة بهالزين ؟ راغده: أمي مسوية حفلة عشان خالي .. طلال عدل جلسته: أنتي عندهم؟ راغده: أي في معازيم بس يروحون بجلس ممكن نصف ساعة واطلع .. طلال: راغده انتبهي على نفسك لو سوا لك اي شيء اتصلي به واوعدك اخليه مايطلع من المشفى الا بعربية .. راغده بحب: تخاف علي ؟ طلال: أكيد أنتي حبيبتي .. اتصل نصل راغده: هههههههه وش جدولك الليلة ؟ طلال: اجيك ؟ راغده: ياليت .. معك دوام بكره ؟ طلال: أي .. راغده بخيبة: يعني ما بنسهر ؟ طلال: ودك نسهر ؟ راغده بابتسامة: أي .. طلال: اسبقك للبيت ؟ راغده: اي تمام .. وسكرت السماعة بعد البوفيه شوي شوي الضيوف يطلعون وصار الموجود اصحاب البيت راغده تشوف ساعة يدها: اوك استأذن أنا بعد بكره وراي قومة لصبح و.. وبصوت اربكها: وليه مستعجلة راغده جمدت مكانها وهي تناظر فيه بقلق: زي ما سمعت وراي قومة لصبح .. مها بخيبة: لا راغده خلينا نسهر لساعة ١ وش وراك أنتي وعادي انتي رئيسة نفسك وتقومين الساعة ٩ عشان الصالون .. ام عبدالعزيز: تقوم من ٧ يا حظي تسوي تمارين .. بدر يناظرها بخبث:مع ان جسمك مو بحاجة مرسوم رسم ماشاء الله ولا وش رأيك يا مها ؟ مها بتأيد: فعلا مهتمة بعمرك مرة يا غدو ريحي شوي .. راغده جات بتروح الا بوجه بدر قدامها: مو ناوية تقصين الكيكة وياي ونشوف ذوقك بالكيك .. راغده وهي تشوف الكيكة الي جابتها فوق الطاولة وسط ريهام ومها وجوان وأمها اضطرت أنها تقبل جلست وجلس جنبها بدر وقامت دايركت هو قام معها وريهام تصور وبدر يقص الكيكة وسط تصفيق الكل .. صار الكل يبوسون رأسه إلا راغده تعذرت بالكيكة وصارت تأكل جوان .. الا بصوته الحاد وكأنه يعلن انهزامي وانصياغي له: مافي الحمدلله على السلامة .. راغده بدون ماتناظره: الحمدلله على سلامتك خالو .. ام عبدالعزيز: وجع راغده قومي بوسي رأس خالك .. راغده:....... بدر نزل مستواه لها: أنا أبوس رأسها راغده ذي شيء ثاني .. تربينا سوا .. راغده مدت يدها بصدره تبعده وقامت بسرعة: أنت زودتها .. الكل انصدم من ردة فعلها المبالغ فيها بينما عبير عصبت على بنتها:صدق قليلة ادب .. مها: ما يخالف يمه ترى راغده كذا من زمان ما تحب احد يقترب منها ماجات على خالي .. مو ناوية تقولي على المفاجأة ؟ ام عبدالعزيز خذت نفس عميق وهي تعدي حركات بنتها:لقيت البنت ألي تناسبنا وتناسب بدر .. بدر اختفت البسمة من على وجهه ريهام ومها بحماس: صدق يمه ؟ ام عبدالعزيز بنفس حماسهم: أي وجمال وأخلاق .. وش قلت يابدر اخطبها ؟ بدر يناظر بـ راغده: موافق بشرط راغده هي ألي تختارها وتخطبها لي .. راغده حست من نبرة صوته وكأنه يلمح لشيء وناظرته وبتحدي: ابركها من ساعة من لنا غيرك يالخال العزيز ، أنا بخطبها لك بنفسي بس الأهم نفتك اقصد نشوف عيالك وتفرح قلب امي .. ام عبدالعزيز: اي والله يا بدر منـى عيني اشوفك متزوج وعيالك حولك وش يعيبك عشان ترفض الزواج .. مها تضرب يد ريهام: بسك تصوير عورتي عيونا بالفلاش ومن كثر ما تكبشرين وجعتي أذني .. راغده: اعتذر منكم أخذت عبايتها وحجابها ولبستهم وتوجهت لسيارة إلا بجيه ريهام لها راغده نزلت النافذة: وش؟ ريهام مدت لها صحن بلاستيك : هذه لطلال اعطيه إياها .. راغده: بس انا برجع للبيت مابروح عنده ريهام بغمزه: سمعتكم .. ما بعلم أمي لا تخافين .. يلا باي .. راغده مشت وتوجهت لبيتها فتحت الباب وشافت طلال بوجها ، ركضت عنده وضمت بكل قوتها طلال شد عليها ذاب بريحتها العطرة: لهدرجة مشتاقة لي ؟ راغده " كيف أقول لك أني أهواك وأحبك فوق ما أنت متصور شوفتك آمان الله لا يحرمني منك " وبخجل ابتعدت عنه ومدت له الصحن: هذا لك .. طلال أخذ منها الصحن وحطه بالطاولة وفتح لها ذرعانه .. راغده دفنت وجها بصدره العريض .. طلال بهمس دافي: وحشتيني مرة .. راغده وريحة عطره الرجولي تغلغلت بخشمها: تأخرت عليك .. طلال جلسها على الكنب : احكي لي وش صار .. راغده: مو الأول اشلح عبايتي .. طلال: طيب لك ٧ دقايق ان تأخرتي لك عقاب .. راغده طارت عند الدرج: سريع سريع طلال ابتسم وهو يناظرها الا يسمع صوت الجوال رسالة ورئ بعض بشكل مزعج ألتفت ومسك جوالها شاف بالاشعارات ريهام " عسى بس ما صار شيء " جاء بيلف الجوال إلا يدخل على الواتس جاء بيطلع الا يشوف صورة راغده وبدر وهو ماسك خصرها تجمع الدم بوجهه وصعد فوق بغضب وغيرة فتح باب غرفتها وعند غرفة ملابسها مدرعم الا بصراخها .. راغده وهي تستر نفسها: وش فيك ؟ طلال صد بسرعة ومد يده لها وبغيرة: وش ذه راغده ؟ ليه هالقرب الشديد؟ مو أنا حذرتك ماتقربي منه وتنتبهي لنفسك منه راغده تلبس القميص النوم ألي جاء بوجها وبسرعة لبسته والتفتت له وهي تمسك الجوال وبلبكة: طلال أنا حاولت ابتعد عنه هو ظل ملازمني كأنه ظلي كل ما ابتعدت خطوة اقترب خطوات ومحد تكلم أو حس شافوا أن هالشيء طبيعي طلال افهمني كلها صور عفوية وأنا هنا كنت امنعه من انه يقرب مني شوف يدي " ناظرت فيه مستغربة من صمته ، انتبهت عينه وين راحت وجها صار اشارة مرور وغطت صدرها بيدها .. كان القميص بفتحة كاشفة الصدر شوي" طلال انتبه لنفسه وطير عيونه لفوق وبلبكة بنبرة صوته: نـ..تفاهم تحت ونشوف وش عذرك طلع من غرفتها بسرعة وهي يتحسس نفسه: مال الدنيا كذا حر .. جلس على جواله ودخل على الأستوديو وشاف صور راغده فيها وصار يسوي زوم لها وهز راسه بالرفض" وش فيني اليوم ، امسك نفسك طلال لا تسوي شيء وتنفضح عندها وقتها بتعرفك كذاب وانا بالموت كسبت ثقتها وقربها لي ، لدرجة أنها حبتني بس كيف امسك نفسي بتجيني لحظة بضعف فيها " جلست جنبه وواضح أنه شارد التفكير جلست جنبه وكانت زوم على صورتها .. راغده فتحت عينها على الآخر: ايش قاعد تشوف طلال انصدم من شافها قربه وهي تأشر الجوال وكان حاط زوم على شيء بجسمها وبربشة: كيف جات الصورة .. أنا كنت اشوف هالصورة " وفرر الصور لصورة ايرينا شايك " شوفي .. راغده: وليه تشوفها اصلا ؟ طلال: تعرفين انها نوعي المفضل .. راغده بغيرة: وش فيها زود .. في كثير احلى منها .. طلال يجاكرها: بس انا تعجبني هالروسية ذي .. راغده تعدل كم البجامة وهي مقهورة: طيب تتهنى .. طلال يقرب راسه منه: غيرانة ؟ راغده تبعد وجها عنه وكأنها تخفيه وتنزل رأسها مرة: لا مو غيرانة .. طلال يقرب اكثر وبابتسامة : الا اعترفي اعترفي .. راغده تتصدد زود عنه: وخر عني انا مو فاضية . . طلال بضحكة: تغارين تغارين خلاص عرفت .. راغده بنفاذ صبر رفعت وجها له بسرعة وصار وجهم قراب من بعض الفاصل سنتيمترات .. صارت تتأمل بوجه وبغمازته ألي ظهرت وهو كان يضحك .. طلال تلاشت ضحكته وهو يناظر بوجها بعينها ونزلت عيونه على شفتها .. الجاذبية كانت سيدة الموقف بينهم اقترب منها أكثر " طلال وش تسوي ابتعد ان قربت ما بتبتعد وبيخرب كل شيء " فتح عينه بشويش وهو يشوفها عينها مقفلة ابتعد عنها بشويش وجلس بالكنب : وش قصة قرب بدر منك ؟ راغده فتحت عينها ورجعت لوعيها وعرفت انه يغير الموضوع: قلت لك هو ألي يقرب وما صار شيء تطمن .. رجع الصمت لطلال وألتفت له كان مو على بعضه حطت يدها على جبينه: وش فيك طلال تحس بشيء ؟ طلال سحبها لحضنه بقوة وبصعوبة نطق: ر...اا...راغده اعذريني أنا .. راغده ابتعدت عن حضنه وعينها بعينه وباهتمام: وش؟ انطق ؟ طلال يبلع ريقه ورجعت له الهواجيس وقام بسرعة وسحب جاكيته من الكنب: اعذريني بقوم ارجع البيت .. راغده وقفت معه: مابتنام عندي الليلة ؟ طلال يتمتم بكلام مافهمته: ان نمت هنا ما يجي الشهر الجاي الا ويبان عليك الحمل .. راغده: وش تقول انت طلال بصوت مسموع: اقول معي شغل وما اقدر أنام هنا بيوم ثاني اكون اكثر تحمل .. راغده: تحمل وش .. صار شيء بالبيت ؟ طلال يلبس جاكيته بسرعة: يلا باي .. راغده طارت لعند الباب ووقفت قباله: قول وش السالفة ؟ ما بتطلع كذا .. طلال حس أن الوضع صعب غط عينه راغده بخوف مسكت يده: عينك تعورك ؟ طلال حس بدفئ يدها وشال يدها منه: راغده بعدين اشرح لك بعدين وابعدها من عند الباب وتركها في حيرة ... . . ظل يتجاهل اتصالاتها على قد مايقدر بحجة أنه مرابط لين جاء يوم المسابقة .. نهلة: طال عمرك الجو اليوم دافي لا تلبسين شتوي .. راغده بحماس: ايش ألبس بينهم ، أول مرة أروح بجمعة عند أهل وجماعة طلال نفسي اصير جذابة وحلوة بدون مبالغة .. نهلة تشوف الجوال: هذا أحلى جاي ربيعي مناسب لتقلبات الجو .. ومتى بتكونين هناك ؟ راغده: بعد صلاة المغرب .. نهلة بابتسامة: أول مرة أشوفك متحمسة لروحة مكان هالقد طبعا بستثناء يوم روحتك مع صاحباتك .. راغده بابتسامة عريضة: وايش اخذ له هدية ؟ نهلة: مو بالأول يفوز بعدين تهدينه بيوم كذا خاص .. راغده بتأيد: فعلا بس الفوز مختوم يا نهلة وأنا ما فكرت بالهدية لسى .. نهله: بكره بقدم لك اقتراحات لهدايا كثيرة .. راغده بحماس: كذا نموذج يا نهلة والمتميز فيهم بختاره .. نهلة نزلت رأسها: ابشري طال عمرك ..استأذن راغده أخذت صورة سيلفي وأرسلتها خاص لطلال .. عضت شفتها بحماس لهاليوم . . . بعد صلاة المغرب الكل متجمع والشباب يجهزون اغراضهم استعداد للمسابقة .. ميس واقفة برا تنتظر راغده وبدخولها والابتسامة بوجها: هلوو ميس ميس بهمس: تأخرتي .. راغده: المكان بعيد حبتين .. ميس تأخذ الأغراض من راغده: ماتقصرين راغده كلفتي على نفسك .. تفضلي من هنا .. ودخلت معها الأستراحة شلحت عبايتها وحطتها بشنطتها الكبيرة .. ميس:ادخلي هنا طبعا في بنات العايلة .." أنتبهت للبسها" كويس أنك صيفتي اليوم حر .. دخلت راغده وشافت اعداد بسيطة من الحريم كان واضح أن عايلة طلال مو كبيرة مرة ، ألتفتوا لها وبعد السلام والتحية دخلت جنان عليهم ورمقت راغده بنظرة من فوق لتحت وهي تشوف لبسها كانت لابسة فستان صيفي خفيف أخضر فاتح وفيه رسوم ورود سكرية صغيرة بأكمام حاير وفتحة الصدر بشكل مستطيل ومزمزم ونهاية الأكمام مزمزم وصندل بأحجار سكري وفضي وميك اب نو ميك آب وعدسات خضراء وشعرها سيحته ورفعت جزء الامامي ومن تحت مفتوح وفاردته على خصرها .. وحلق على شكل وردة بلون السكري .. كانت الأضاءة بكتفها وبارزة عظام الترقوة .. كانت النظارات بينهم كره وحقد ميس اقتربت منهم: هلا جنان .. تعالي راغده اجلسي هنا .. ام فهد " والله وجات ، توقعت حشمت نفسها من بعد ألي قلته لها لكن صدق الي استحوا ماتوا " أسيل جلست جنب راغده وصارت تسولف معها عن اعمالها واشغالها أسيل: ماشاء الله أجل طلال طاح على كنز .. جمال ودلال ولك دخلك الخاص .. ام فهد: أي عيني أجل تزوجها لآيش عشان فلوسها .. راغده: وش قصدك ؟ نوال: أمي تقصد أن طموح كل رجل امراة مثلك شايلة نفسها وطموحة .. ام فهد: لا ما قصدت كذا .. ميس: يمه خلاص .. راغده جات بترد عليها إلا بيد أسيل تمنعها وبهمس: هي كذا كانت معي بس بعدين تقبلتني تدرين غيره .. راغده: بس طلال مو ولدها عشان اعتبرها غيرة أم لابنها .. أسيل ترقع السالفة: اي ما يخالف هم كذا الكبار بس هي ممكن شايلة هم " وبمكر" أنك بتسكنين فوق معنا .. راغده: تطمن ما بسكن بشقة وضيقة طالمة أنا معي بيت ملك .. وش يحدني على الضيم ؟ اسيل انبسطت من كلامها وتنفست بأريحيه: اي احسن لك هي من أولها كذا ، ابعد عن الشر وغني له .. ام أسيل قامت تقهوي راغده وتضيفها جنان بقهر: شوفي قلة الأدب حتى ما قالت بصب عنك , أمي الكبيرة وتريد تخدمها بعد .. إسراء: بشوف وش عندها أنا ابد ما حبيتها يا جنان واضح انها متملقة .. اثير: لا بالعكس شوفي كيف جلستها واناقتها ما اقول بس يا بخت طلال فيها والله وعرف كيف يختار .. اسراء انزعجت من كلام أختها: اي من قدام هالله هالله ومن ورى يعلم الله .. ميس استغربت التألف بين إسراء وجنان وجلست جنبهم: أوه والله وتصافيتوا .. خبري فيكم حريم رجل .. اثير: اييي اختفى السبب .. ميس: اي سبب ؟ اسراء قرصت فخذ اختها وباندفاع: قصدها أن مافي سبب يخليني اكره بنت عمي وبنفس الوقت زوجة أخوي سطام .. ميس بعدم اقتناع: أها .. راغده كانت جالسة لحالها اخذت جوالها وراسلت طلال أنها هنا أول ما شاف رسالتها رد عليها : اطلعي من قسم المجلس ، قابليني هناك .. راغده ابتسمت وزادت من عطرها وطلعت من المجلس وسط عدم انتباهم وطلعت من قسم الرجال بالمجلس وعينها تدور طلال .. إلا بيد تسحبها ويد على فمها وابعدها عن المكان راغده تقاوم وبخوف:مممممم جاها من قدام وشال يده منها: أنا طلال لا تخافين .. راغده تجمعت الدموع بعينها وبخوف وعتب: ليه تسوي كذا ؟ طلال بابتسامة: اضيف لمسة اكشن ودراما .. راغده ماحبت تضخم الموضوع وسكتت طلال باعجاب: وش هالجمال ووش هالزين ! لاحظ دموعها المتجمعة بعينها احتضنها بعفوية وبهمس دافي: أنا آسف سامحيني راغده اوعدك ماعاد تتكرر هالسوايا .. راغده حوطت يدها بخصره وشدت عليه: أنا آسفة طلال بس غصبن عني .. طلال ناظرها وبحب: قابلتك بالخفية قبل لا تبدأ المسابقة أنتي الحظ حقي .. راغده تلاشى حزنها وبابتسامة: صدق؟ طلال: عندك شك ؟ راغده بعتب: ليه ماعدت تزورني ولا شيء وش جاك من ذاك اليوم .. طلال بصدق: شفت أن احنا زودناها وخفت ان امك تقتحم المكان وماعاد اشوفك بالمرة .. راغده: اذا على كذا لا تشيل هم انا بتصرف .. طلال بعفوية: مو عشان كذا ، اخاف اتهور واندم .. راغده بعدم استيعاب: مافهمت ؟ طلال انتبه على نفسه: اقصد لو شفت امك اخاف اتهور واقول كلام لها وتصير مشاكل .. وبدل ماهي تعاديك تعاديني أنا .. راغده مسكت يد طلال: أنا معك لا تشيل هم .. طلال" مو هذا بلاي انك معي واخاف ما أقدر أمسك نفسي " راغده بمزح: اجل وين لبس الطهاة ؟ طلال: ههههه اليوم حر حبيبي زين ولحقت وجبت لي لبس صيفي .. كان لابس تيشيرت باكمام حاير أبيض وسروال أسود فضفاض شوي .. طلال بابتسامة: عاد المفاجأة تقول أنك بتنضمين معي وأنا أطبخ .. راغده بفرحة: صدق طلال؟ طلال: اي ياروح طلال .. المكان بالمطبخ زحمة وأنا جبت معي عزبتي وبطبخ على كيفي تشاركيني أميرتي ؟ راغده مدت يدها له: هذا يشرفني .. طلال رفع يدها وباسها رتب الغرفة وصارت راغده تجهز معه البهارات وتغسل له الخضار .. طلال فتح النوافذ وجهز كل شيء .. جاتهم نوال: عمي يقول أنا المشرفة عليك في حالة لو غشيت أو حركات منا ومناك .. طلال بترحيب: هلا نوال حبيبي حياك اجلسي جنب راغده وارتاحوا .. نوال: لا تقص علي بهالكلام عيني عليك عشرة على عشرة .. صار طلال يطبخ وراغده ونوال قباله جالسين كأنه برنامج طبخ وكل فترة يسوي حركات وفن اما بالتقطيع او بالكلام كانت راغده تناظر فيه نظرة عاشقة حست ان كل يوم عن يوم يزيد حبها وتعلقها الزايد بطلال انتهى الوقت المحدد لشيف العايلة .. قامت نوال وراغده عشان لجنة التحكيم تدخل .. راغده على نار: يا ربي وش هي النتيجة .. نوال بضحكة: النتيجة معروفة غدو لا تشيلي هم .. الا بإتصال ابو فهد لأم فهد وردت ولما عرفت كشرت بوجها: الفايز طلال وسط صراخ وحماس البنات عدا جنان واسيل وام فهد .. جنان بقهر: فرحانة أن اخوك خسر .. اسراء: الأهم طلال فاز وفي فرق بين طبخه وطبخ طلال .. اثير: أنا الكلام ذه مايهمني الصحن وين اريد افدس فدس جوعانة .. الكل:هههههههههههههههه شويات إلا جاهم صحن من كل مشترك بالمسابقة بصحون وسط .. اثير بخيبة: طالمة يدري انه بيفوز ليه ما زاد .. نوال: القوانين تنص لكمية محددة بالرز .. كان اول صحن يخلص هو طبق البرياني لطلال .. راغده طلعت من المجلس ووقفت بالممر الداخلي: حبيت اتطمن عنك وعن نفسيتك بس عساك زينة ؟ فرح بحزن داخلي: لا تشيلي هم تعودت اني احلل ولا اطلع حامل لا تشيلي هم حبيبتي .. واضح انك طالعه .. راغده بفرحة: أي فروحه عند أهل طلال مسويين مسابقة وكذا .. فرح: حركات والله لابد تعلميني بالتفصيل الممل .. راغده: بس ارجع للبيت واراسلكم بالقروب .. ببعت لكم سيلفي بالسناب يلا .. وسكرت منها وصارت تصور كذا صورة إلا تسمع صوت تعرف عند الزرع تقرب منهم وبصدمة وهي تشوف طلال مع إسراء .. آنتهـــــــــى البـــــارت