الفصل 9
البارت التـــاسع
راغده ذابت على قربه وغمضت عينها
طلال قرب منها
بصوت عالي: الله الله عليكم عايشين بمسلسل رومانسي؟
ريهام تصفق بحرارة ونزلت جوالها: واااو .. كـــــات ..
طلال وراغده انخرشوا وبعدو عن بعض بسرعة .
طلال: و أنتي مستقعده علينا يا عمه .. تدخلين بوقت غلط .
ام عبدالعزيز بابتسامة قهر: طبعا يا روح عمتك تريد تستفرد بنتي .. مو انا قلت لك لا تجي هنا إلا بوجود مرافق ؟
طلال:......
ام عبدالعزيز كملت وهو تحس أنها سوت شيء عظيم وبراحة: الحمد لله ان ربي ألهمني وخلاني ادخل عليكم بهاللحظة ..
طلال " ألي يسمعها يقول أنها مسكتنا متلبسين بجريمة "
راغده ووجها ألوان : بشرب مويا بالأذن ..
ريهام راحت ورى اختها ونظرها لطلال وغمزت له: يا روش ..
ام عبدالعزيز بضرب على راس ريهام : وجع هبله وبلهه هـ الثنتين مدري وين اروح يا ربي ..
ريهام ويدها على رأسها بمشيه سريعة وبحماس لعند راغده: وش هـ الحركــات وشغل الأروبيين ذول ..
راغده فتحت البراد وطلعت قارورة مويا وشربتها بنفس واحد
ريهام: بسم الله وش بك ..!؟
راغده صبت على وجها ونحرها المويا الباردة: احتاج استوعب ألي صار ..
ريهام بحب: كل شيء كان حلو, لو ما صوت أمي الي خربت المقطع ..
راغده تناظرها بستغراب: اي مقطع؟
ريهام: المقطع الفيديو الي سويته و انتو ترقصون حضرنا من بداية ما طف الانوار واااو رومانسية بحته .. الا صحيح راغده مو تخافين من الانوار الطافية والخافته ..ايش ألي غيرك ..
راغده تجفف وجها بالمنديل: مو قايلة انك ما بتجين؟
ريهام: ظليت ابكي لأمي لما وافقت اروح عندك وأصرت تنزل معي لعندك ما اكتفت بالتوصيل خصوصا بعد ما شافت سيارة طلالك ..
بالصالة ..
ام عبدالعزيز: انت وبعدين وياك ! مو قلت لا تجي هنا الا بوجود مرافق..
طلال بمرح: ذكرتيتي بـ أيام المدرسة يا عمه لا يتوجب الحضور الا بولي الأمر ..
ام عبدالعزيز: تستظرف انت ووجهك ..
طلال: حاشاك يا عمه .. انا جيت عشان البروفا لرقص زي ما انتي شايفة ..
ام عبدالعزيز: قلنا انك تزوجتها عن حب بس مو بهالطريقة لو يشم احد خبر جيتك هنا بننفضح .. وجيرانكم لو عرفوا ما بيسكتون هذا اذا ما عرفوا من الآن ..
" فركت يدها" اسمع أنت لا عاد توطوط هنا وبخصوص البروفا اتصل بي وأنا اخليك تجي لبيت عمها تدربون هناك ..
وبدخله راغده وريهام وبيدها الشاي واعطت امها: يا يمه السالفة مو مستاهلة , ما صار شيء من ألي ببالك ..
البروفا خلصناها بس باقي اخر بروفا ونكون مستعدين لأن علي ملاحظات ..
ام عبدالعزيز: بسيطة! تعالوا عندي و تعلموا بس ماله داعي هو يجي لهنا ..
راغده: حاضر يمه ..
ريهام تناظر للفوشار واكواب العصير وبابتسامة: كانت سهرة حلوة غدو
راغده اعطت اختها نظرة يعني اسكتي
ام عبدالعزيز ألتفتت للي حولها وبذهـول: ما شاء الله تبارك الله وفيلم رومانسي بعد .. يعني مخططين لكل شيء...
راغده تناظر طلال بـ معنى تكلم ..
طلال: لا عمه كل شيء كان صدفة ..
ريهام بمرح: الله يجعل صدفكم دايمة على هالمستوى ..
ام عبدالعزيز: اوص ولا كلمة و ايش جلسك هنا عشان تتعلمين قلة الأدب وتطبقينه علي .. روحي الغرفة الثانية يــــلا ..
ريهام تتحلطم بمكانها: كلا يطردوني من المكان ..
ام عبدالعزيز اخذت نفس عميق: انتو وين عايشين ؟ ما تهتمون لكلام الجيران والناس ! تاركين كل شيء سايب ؟
" وتناظرها" وانتي يالعاقلة وين راح عقلك ؟ صدق كبيرة و هبيلة ..
طلال: وجهي الكلام لي , راغده ما سوت شيء وهي ما تدري بجيتي هنا ..
راغده تناظر بطلال وهي تتخيل ألي صار وقامت وبإحراج: يمه اعذريني انا تعبانة بنوم بكره وراي دوام ..
ام عبدالعزيز: برافو عليك بس جات أمك تعبتي من قبل لا ما بقى لفه ما لفتوها هنا >> تقصد الرقص
كنستو الصالة كناس " وبسخرية " اكيد بتتعبين يا يمه ..
راغده : ريهام اصعدي فوق .." ناظرتهم" بالأذن
طلع من بيتها وتوجه لبيت خالته ..
شريفة: هلا هلا أبوي ..
طلال يشوفها بتقوم تسوي له شاي: لا خاله شربت كثير ..
شريفة: عند مين ؟
طلال بابتسامة: عند راغده
شريفة ببهجة: ما شاء الله تبارك الله ، والله وصرت تتبسم من تذكرها ، قل لي وش الي صار ؟ هجدت ورجع لها عقلها ولا ظلت تدلع ..
طلال: هجدت ..
شريفة تلولش: كللـــــووش , هذا هي الأخبار الزينة .. ومتى حفلتهم المزعومة ؟
طلال: وهذا ألي جاي عشانه أنا .. اعزمك على الحفلة الملكية ..
شريفة بضحكة: على قولك .. ووين بتكون ؟
طلال: في قاعة ال*
شريفة: ما شاء الله .. زين معي فستان لهالمناسبة ..
طلال: عاد ألي بقوله لك شيء ثاني ..
شريفة: قول يا يمه
طلال: بلبس بدلة ..
شريفة: ما فهمت !
طلال: البداية بلبس ثوب وجلسة تصوير ثم بدلة رسمية مثل الأروبيين ذول بحفلاتهم ..
شريفة: وي وي .. وليه ؟
طلال بضحكة: حركات يا خاله والبدلة جابتها عمتي اليوم شغل عدل ..
شريفة بحماس : وينها ؟
طلال: بالسيارة بخليها عندك أضمن .. تعرفين مرت ابوي وحركاتها ..
اخاف تحرقها او تسوي شيء ..
شريفة: اي الله حسيبها .. بيوم اختباراتك حرقت ثوبك والثاني عبته عصاير وقهوة .. ذي مدري وش بتسوي في حياتها .. عسى ربي لا يبلانا
طلال: الله حسيبها يا خاله ..
شريفة: عاد العوض بـ راغده زين خفت اللعب والهبل ألي هي فيه .. عسى ربي يرزقكم بالبنين والبنات قول امين
طلال: آمين يارب .
شريفة: ومتى يا ولدي يوم الحفلة؟
طلال: يوم الثلاثاء ..
شريفة: اي صحيح وليه تلبس البدلة ؟
طلال: عشان أرقص ..
شريفة بفهاوة: نعم !
طلال: برقص مثل الي نشوفهم بالأفلام الرومانسية ..
شريفة: يا رب سترك .. صرنا مثلهم ! ومن فكرته ذي ؟
طلال: العمة عبير ..
شريفة: أنا من شفتها ذاك اليوم وهي تضرب راغده قدامي وأنا عرفت أنها مو طبيعية واضح انها مريضة .. يا رب أنك تعافيها ولا تبلانا ..
طلال: ممنوع أروح لـ راغده إلا بولي أمري ..
شريفة حطت يدها على رأسها: وي وي .. ويلوموني فيها ان قلت انها خبلة اجل ذي سواة ؟ بأي زمن احنا يعني متطورين بكل شيء و مسووين انهم ذول الشقر والحمر.. وعلى ذه أي كلام !؟
طلال: هههههههه خايفة اني استفرد ببنتها ..
شريفة: لا يا يمه انتبه تسوي بها شيء ما تدري ايش ممكن يصير ..
أسمع ألي حملوا بفترة الملكة وهات اهاليهم زوجوهم بسرعة قبل لا يبان عليهم ..
طلال: مستحيل أرضى عليها هالشيء خاله ..
شريفة: اي يا ولدي ..
طلال: عاد يا خاله عاوزتك في خدمة ..
شريفة: قول يا يمه ..
طلال: أريدك تجين معي الأسبوع الجاي قبل يوم الثلاثاء لعند راغده ..
شريفة: روح لها بدون ما تدري
طلال: ما اقدر يا خاله كل ما جيتها امها تدخل عندنا فجأة ..
شريفة: ما تشوف الافلام ؟ روح تخبا بمكان لما تروح ..
طلال: تدخل عندنا كذا يا خاله ..
شريفة فهمت قصده: ايواا معها مفتاح للبيت .. ما يصير لما تتزوجون لابد لها خصوصية ..
طلال: بشوف طويلة العمر بعدين مو الان ..
& & & &
مدت لها القهوة : اشربي راغده وتكلمي بشويش ..
راغده: دكتورة احس بشيء معه ..
د سلمى: نفس أغراض الحالة ولا ؟
راغده: لا مختلفة حاجة كذا تخلي قلبي في حالة خفقان دايمه لمسه منه توترني وتربكني .. شوفته لحالها مربكة ..
د.سلمى: ما قد صارت لك من قبل وقبل هالحالة .. اقصد بالمراهقة او شيء من هالقبيل ..
راغده بنفي: لا .. قبل انا ماكنت مريضة مرضت بسن ال٢٢ مو بالمراهقة ..
د.سلمى ناظرتها: اقصد ما حبيتي من قبل حب اربكك ..
راغده: وش دخل الحب بوضعي هذا ..
د.سلمى: لانك تحبيه !
راغده بذهول: لا لا مش لهدرجة ..
د.سلمى: الحالة واضحة يا راغده انتي تحبين طلال وممكن لو زادت الايام توصل للعشق ..
راغده:........
د سلمى: صدقيني راغده تحسي بسعادة بس تكوني معه وودك تسمعي صوته وبس تشوفيه تحسي بسعادة الأدرينالين يرتفع عندك وهذا هرمون طبيعي ..
راغده برفض تام: كل الي قلتيه مو فيني اقول لك اتوتر مو انبسط لما اشوفه وهذا لي أيام ما اكلمه هو الي يتصل ويجي ..
د.سلمى بابتسامة: بتحاربي حبك له يا راغده ؟ مهمتك صعبة لان لابد يكون جنبك طلال ويساعدك .. ووجوده يعزز الثقة لك وبلا شعور راح تتعمقي فيه وتحبيه اكثر " قامت من مكتبها وتوجهت لكرسي راغده اقتربت من الخلف " ولا من متى راغده تسمح لاي رجل يمسك يدها وخصرها ويراقصها ..
راغده توترت: لان .. اصلا ... لاني
د.سلمى نزلت لمستواها : لانك تحبينه راغده ..
راغده التفتت لها بسرعة والكلمة تردد برأسها : مستحيــــــل ..
د.سلمى رجعت ظهرها لورى وحطت يدها بجيب البالطو: انكري زي ما انتي رايده بس لين متى ؟ محد يقدر يهرب من نفسه من احاسيسه ومشاعره ...ومثل قبل رفضك ان فيك خلل وبعدها اعترفتي وصرتي تراجعيني .. بتعترفي بحبك وميولك لطلال .. وهذا من حقك هو زوجك . !
راغده شربت آخر شيء في كوبها وقامت : انا تأخرت اعذريني ..
د.سلمى باندفاع: وقصة الظلام تلاشت ! ولا كيف لما تكوني معه ..
راغده وقفت عند الباب وبنبرة ثقة: كيف اقدر أثبت لك أن كلامك خطاء ..
د.سلمى: اطلبيه عندك بالبيت شوفي شعورك لما يطفئ الأنوار كاملة ايش بتكون ..
راغده بدون ما تناظرها: الي بيكون ان حالتي بترجع ..
وفتحت الباب وطلعت منها وتوجهت للبيت
دخلت سيارتها بالكراج إلا بصوت نرجس جاتها تركض : لحظة راغده ..
راغده ما أنتبهت لها طفت السيارة ودخلت بيتها
نرجس بقهر: تتعمد أنها ما تسمعني ولا وش وضعها ..
وجات بتجي لعند الباب الأمامي إلا تشوف عبير وريهام ومها وبنتها جوان نازلين من السيارة وبهمس: أكيد في سالفة .. جايين كلهم عندها ولا العوبة الست راغده مو مال جمعه وحشيمة وتقدير ..
فتحت الباب بمفتاحها الاحتياطي ودخلت مع عيالها
شافت ماريان تشيل عباية راغده وتوجهت للغسيل ..
ام عبدالعزيز تشوف بعينها المكان ..
مها: من تدورين يمه؟
ريهام: تدور طلال ..
مها بغرابة: ما فهمت ليه هو يجي هنا ؟
ريهام: ايي تقول أمي مو أول مرة تشوفه هنا وكلا صدفة ..
ام عبدالعزيز بصوت مسموع: يا ماريان ماريان نادي معزيتك
راغده سمعت صوت أمها تحت غيرت ملابسها ولبست بجامة مريحة ونزلت تحت وعند الدرج: اهلين " انتبهت لجوان وبحماس" جينـــا حبيبي ..
ريهام باندفاع: شوي شوي لا تطيحين ..
راغده خففت سرعتها وهي تتذكر طلال بنفس الموقف وشالت جوان وباستها: حبيبة خالتها ..
ام عبدالعزيز: الي ما يتسمى هنا ؟
ريهام: مستحيل ولا كان شفتيهم مع بعض ..
ام عبدالعزيز: جب ولا كلمة ..
راغده تنهدت : تطمني ما جاء من ذاك اليوم ..
ام عبدالعزيز: اي زين .. تعالي شوفي ايش بـ نختار للمصممة إيمان .. ما باقي شيء ترى ..
انا اخترت للبنات ..
مها بحماس ورتها الموديل: امي اختارته لي ..
ام عبدالعزيز: يناسبك كل شيء لانك بيضاء ..
راغده تناظرهم بصمت
ام عبدالعزيز: وانتي يا راغده حنطية فاتحه يبا له وقت نختار صح ، عشان لونك يفتحك أكثر ..
راغده: تسلمين ما أريد أطلب منها ، معي فستان حلو ..
ام عبدالعزيز: ذي حفلة ملكتك مو اي كلام ..
راغده: تطمني .. واطمنك هاللون مناسب علي ..
ام عبدالعزيز: في كل شيء تعاكسيني ! حتى على هاليوم ..
مها: معليش راغده اتركي امي تختار لك ..
راغده: البيت بيتكم خذو راحتكم ..
وصعدت فوق لغرفتها
ام عبدالعزيز بنرفزة: محد بيشيب رأسي غيرها ..
قفلت باب غرفتها ..
ورجعت ذاكرتها لورئ .. قبل ١٤ سنة
أول سنة لها بالكلية ..
ام عبدالعزيز رجعت من السوق: تعالي مها شوفي ايش جبت لك ..
بدر: الله ! وحبيبة خالها مالها ..
راغده مدت بوزها: اي انا البطة السودة ..
ام عبدالعزيز: لا عشان مها بيضاء تناسبها كل الألوان عكس راغده حنطية ..
بدر: اجل لو شفتي السمر ذاليك ايش بتقولين ! ترى راغده لونها ملكي ..
راغده تمد لسانها لامها: شفتي كيف أنا لوني ملكي ..
ام عبدالعزبز: محد مكبر راسها غيرك يا بدر ، شف كيف تسوي .. وعنيدة ما تسمع كلامي ..
مها جات: الله يمه جبتي لي ملابس ..
ام عبدالعزيز بحماس تطلع الملابس وتحطها على جسم مها: شوفي كيف اللون يأكل منك حته ..
مها بغرابة: شوفي يمه هذا منها ٢ ..
ام عبدالعزيز: جات بالغلط .. خذيها راغده لك ..
راغده حز بخاطرها أن أمها ما تذكرتها ولا بقطعة: لا ما أريدها خلاص ما عجبتني ..
ام عبدالعزيز: اصلا اللون مو مناسب لك ..
راحت لغرفتها تبكي وجاء وراها خالها واحتضنها يهديها: يا راغده ما عليك من أمك ترى ما تعرف تميز بين الزين والشين .. مو كل بيضاء حلوة شوفي انتي بعيني اجمل واجذب من أختك ولاحظي هالمقاس صغير عليك أصلا فـ ليه تزعلين ؟
راغده بين دموعها: دايم تسويها مو من الان وش ذنبي ان ربي خلقني حنطية مو بيضاء مثل اخواني ..
بدر حط يده بظهرها ورى: انتي بعيوني ملكة جمال ..
راغده غمضت عينها بقوة ورجعت لواقعها " انسي هالذكريات يا راغده لا خالك ولا أمك يحبونك " نزلت دمعه على خدها وتسطحت بالسرير وغفت بلا شعور , غفوة 20 دقيقة
قامت على رنة جوالها وردت بدون ما تشوف: هلا
: وقضتك ؟
راغده ميزت الصوت وفتحت عينها: طلال .. !!!!
طلال: وينك غاطه به ؟
راغده قامت من سريرها: مشغولة ..
طلال: طيب انزلي تحت ..
راغده: انت تحت ؟
طلال: شوفيني من النافذة ..
راغده فتحت شوي من النافذة وشافته يأشر لها وباندفاع: ايش تسوي هنا ؟ لو شافك احد وش بيقول ؟
طلال: اجل افتحي لي ..
راغده: ارجع طلال ترى امي وخواتي تحت ..
طلال: مو هنا شفتهم طالعين ..
راغده: من متى كنت تنتظر؟
طلال: لا تبطين علي الدنيا برد ..
وسكر السماعة ..
اخذت جاكيتها الصوفي لبسته ونزلت تحت وفتحت له الباب ..
طلال شد على جاكيته الأسود ودخل وهو يناظرها: حبيت ستايلك ..
راغده نست انها لابسه بجامة وعليها الجاكيت الصوفي وباحراج طارت لفوق وقفلت غرفتها: عن ابوها من إحراج " تشوف نفسها بالمراية" ليه أنا حلوة ومرتبة بس مرطب شفاة وعطر وخلاص ..
ونزلت تحت وهو يناظرها وكاتم ضحكته وبعلامة تعجب: ايش فيك ؟
طلال نزل راسه وعض على شفته : ولا شيء بس توقعت انك طرتي عشان تغيرين ملابسك
راغده باحراج: لا أبد أصلا انا رحت بسرعة لأني تذكرت اني خليت صنبور المويا شغال ..
طلال يصدق كذبها: اييي تمام ..
راغده تشوف الساعة: انت وش جيبك مثل هالوقت ؟ تعرف كم الساعة ؟
طلال: الساعة ١١ وربع بدري ..
راغده: وليه جاي ؟
طلال: شفت انك صادتني قلت اجي اعرف البنت وش فيها .." يصغر عينه " عينك حمراء ..
راغده تذكرت انها كانت تبكي ونزلت راسها: من قلة النوم ..
طلال اقترب منها وضم وجها بيده رفعها لنظرة ونزل نفسه لمستواها وهو يناظر عينها: ملتهبه ..
راغده توترت من قربة: لا ..ظليت احكها عورتني و ..
ماوعت إلا بقبلة على عينها جمدت مكانها
طلال بابتسامة: أذهب أيها الألم اذهب ولا تعد .. اذهب
راغده صارت تناظر فيه بضياع وهي تشوف غمازته وشفته ويتكلم بس مو فاهمه عليه كأنه الزمن توقف على هاللحظة وعت على فرقعة صبعه: راغده وين وصلتي ؟
ابتعدت عنه بسرعة ووجها أحمر واعطته ظهرها: عسى جيتك لشيء مهم ..
طلال: عشان البروفا ..
راغده: مالي مزاج اسويها ..
طلال: جيت اخذ منك موعد ..
راغده: يا سلام لهدرجة أنت فاضي جيت بس عشان تأخذ موعد .. كان خذتها عن طريق نظام ابشر ..
طلال: هههههههههه تعرفين تنكتين ..
راغده بضحكة تريقه: هي هي هيي
طلال تغيرت نبرة صوته: لانك ما تردين علي قلت اجيك واخذه منك الموعد
راغده تسد اذنها: نبرة صوتك ذي ما أريد اسمعها لا لا لا لا ما اسمع شيء ..
طلال استغرب من تصرفاتها وشال يدها من اذنها بقوة: رجعت لك الحالة
راغده صارت تناظر به وقلبها يزيد نبضاته وقلبت وجها
طلال بقلق: راغده بك شيء ؟
راغده تحاول تحرر يده منها: خلاص تعال بكره يناسبك؟
طلال يشد على يدها: على كم الساعة؟
راغده: على الساعة ...
الا تسمع صوت مفتاح الباب الرئيسي وباندفاع: امي جات امي جات ..
طلال بربكة: وش السواة ..
راغده: اصعد فوق لغرفتي ولا تصدر صوت ..
طلال ما قدر يصعد فـ راح ورى الكنب
انفتح الباب
عبير بروعه: بسم الله الرحمن الرحيم مو كنتي نايمة وش ألي مصحيك ؟
راغده وهي تشوف طلال مستخبي ورى الكنب وبتوتر ملحوظ : عـ..طشت قلت انزل اشرب مويا الا بجيتك ..
ام عبدالعزيز: وليه لابسه سترتك بالبيت ؟
راغده بنفس توترها: شعرت بالبرودة ونمت عليها خبرك هرمونات ..
ام عبدالعزيز هزت رأسها بالإيجاب: اي دورتك قربت ..
راغده باحراج: خلاص يمه..
ام عبدالعزيز: علامك مستحية أنا امك وياما تقولين لي مو جديد ..
راغده ويدها على شعرها :وليه رجعتي ؟
ام عبدالعزيز: الله يصلح جوان بس كنا بمنتصف الطريق ظلت تبكي تريد ايبادها نسته عندك .. تقول بالكنب
راغده بفجعة: بالكــــنب !! يمه خليها بكره
ام عبدالعزيز بـ فزعة: راغده ووجــع فجرتي طبلة أذني ..
راغده لفت أمها بمكانها وهي تناظر بطلال بمعنى اصعد فوق وباندفاع وهي تدور سالفة: يمه بخصوص الفستان ..
ام عبدالعزيز: وش فيه ؟
راغده: جلست افكر بيني وبين نفسي اقول ليه ما ترسلين لي حسابها اطلع عليه وانا بنفسي اختار ..
ام عبدالعزيز: انا ما معي مشكلة , بس تصرفاتك غريبة اليوم ..
راغده: تعرفي هرمونات ..
ام عبدالعزيز: ماعدت استغرب شيء منك " ويرن جوالها" تأخرت عليهم يلا بقول لمها تسوي لك منشن لما أصعد السيارة " اخذت الايباد " يلا باي باي ..
لما اختفت امها من نظرها تنهدت براحة وصعدت فوق : هيه .. وينك ..وين راح ذه ..
سمعت صوت بغرفتها ..
شافته متسطح بالسرير وبذهول: ما شاء الله وش تسوي فوق السرير ..
انزل يلا ..
طلال ويده لورى راسه: مريح مرة .. متى بنوم هنا .. الله يعجل بالأيام ..
راغده:........
طلال: علامك سرحانة؟ " قام واقترب منها" شكلك تتمنين اليوم الي نجلس فيه ببيت واحد ..
راغده باحراج: لا كنت افكر بشيء ثاني ..
طلال: بالدورة حقتك ؟
راغده صار وجها اشارة مرور : ايا الي ما تستحي على وجهك" خذت الوسادة وحذفتها عليه ولا صابته"
طلال بابتسامة: ما صابتني ما صابتني
راغده بقهر: انا اوريك
وخذت الوسادة الثانية وتحذفه عليه ولا صابته وبقهر شديد: واضح انك ما بتجيبها على بر ..
طلال بضحكة: مو ذنبي أنك ما تعرفين تصوبين ..
راغده: تمام الحذف ما ينفع لزوم اضربك فيها
واخذت الوسادة الصغيرة وصارت تضربه فيها وهي تقفز عشان توصل له
طلال فرطت من الضحك: كم طولك يالمتر ونصف ..
راغده بشهقة: طـولي ١٦٦ مو قصيرة بس انت عملاق ..
طلال: قصيرة ونصف ..
راغده بصراخ: يـا ربي منك
وشدت أذنه طلال بألم: خلاص طويلة طويلة ..
راغده : يلا برا برا ..
طلال: خلاص هدي اذني بطلع ..
راغده: لا لا ما في .. انت ما تجي الا بـ هالطريقة ..
طلال: اتركي اذني والا بتشوفي شيء مايسرك ..
راغده بذهول: وتهدد بعد في وضعك هذا..
طلال: انا حذرتك " وشالها وهي تصارخ " حذرتك ولا ؟
راغده بخوف: نزلني طلال
طلال يرفعها لفوق وينزلها بسرعة ويرفعها لفوق وينزلها بسرعة كأن بيقطها يعني
راغده بنفس صراخها: خــلاص نزلني لا تسوي كذا طلال اهئ اهئ ..
طلال بضحكة شريرة: من البطل؟
راغده: اهئ اهئ
طلال ينزلها بسرعة ويرفعها وبخوف
راغده: انت انت
طلال: ومن القوي .. تكلـــــمي
راغده: انت انت ..
طلال: ومن الي يرفع ضغطك ؟
راغده بصراخ: انت والله انت
طلال: من النرجسي؟
راغده: قسم انت ..
طلال وبخبث: ومن ألي تحبيه ..
راغده: انت والله انت
ادركت وش كانت تقول اقصد: لا
طلال نزلها بشويش ولفها قباله وبنبرة دافية: وانا بعد أحبك ..
راغده الي حست ان قلبها بيطلع من صدرها ..
طلال رفع يده لخدها الناعم: أحبك .. كـ أخت وصديقة ..
راغده :....
طلال صار يناظر بعينها ثم ابتعد عنها وعند الباب: لو ما رديتي علي بكون هنا ووقتها ما بيهمني امك اهلك جيرانك بدرعم وتحملي سواتي لأنك سببه .. تصبحي على خير
راغده اول ما اختفى من عينها حطت يدها على صدرها الأيسر " عوذه عوذه .. وش بي معقولة كلام الدكتورة ؟ لا مستحيل .. شعور غريب و مو اكيد ممكن شيء ثاني بي ! لزوم أتأكد بخصوص الظلام " وطلعت من غرفتها بسرعة: لحظة ..
طلال التفت لها ..
راغده نزلت من الدرج بشويش وشدت على سترتها الصوفية : بخصوص الساعة تعال 8..
طلال: لا ..
راغده: مشغول بهالوقت ؟
طلال: لا .. بمرك الساعة 7 ..
راغده: ليه ؟
طلال بنبرة دافية: بنطلع لهايبر ..
راغده ترمش بسرعة: ممكن ما تكلمني بهالنبرة !
طلال بنفس نبرته مصحوبة ببسمة جذابة: ليه ؟ تربكك؟
راغده: جدا .. أقصد ما تخليني أرتاح ..
طلال بابتسامة عريضة بانت غمازته: طيب ليه ترمشين بسرعة ..
راغده بليكة : لان ...لان عيني ..
طلال نزل مستواه لمستواها وباس عينها اليسار ثم اليمين بـ هدوء وبنفس نبرته: لا عاد تبكين تمام ؟ تصبحين على خير حبيبي ..
راغده ولا حركة ولا كلمة جمدت مكانها ويدها على قلبها ..
وسكر الباب .. وصعد سيارته تبسم وغمض عينه ويده على قلبه: اهجد اهجد خلاص .. يا الله الصبر
&&&&&
د.سلمى: واضح ان اعصابك تعبانة او ما نمتي راغده روحي للبيت ونامي ..
راغده بنفاذ صبر : دكتورة انا دخلت النت وسألت اعراض الضعف صح ما طلعت بنتيجة والكل قال ما تعرفي إلا بعد التجربة بس من ضمنها أنه ما يتودد لك او يتقرب لان المفروض يكون خايف انه بعد هالشيء علاقة وألي شفته أنا العكس ..
طلال يتقرب مو خايف ابدا ..
د.سلمى: وليه يخاف طالمة هو اعترف وقر بوجود مرضه ..! غريبة انتي راغده
راغده: مو من حقي اني اشك ؟
د سلمى: تشكين فيه صح لكن تشكين فيني انا لا ..
راغده: اعتذر منك دكتورة مو قصدي
د سلمى: عذرك مقبول .. لكن فكري قبل لا تتكلمي .. ما ألومك لو فكرتي بتصرفات طلال ممكن هو عاطفي و رومانسي وهذا الي ممكن يقدمه لك .. على فكرة راغده في عندي كثير زوجات يشتكون من مواجه واعتراف رجالهم لوجود ضعف فيهم بالعكس ينكرون ويخلقون مشاكل عشان يبتعد من واجباته ، لكن طلال رضى واعترف ما تعدا خطوط هالشيء .. تعدا؟
راغده هزت راسها بالنفي
د.سلمى: خلاص أجل .. وليه انتي خايفة ؟ ليكون ..
راغده قاطعتها باندفاع: لا طبعا وتحليلك كله غلط ..
د.سلمى: أجل ليه للان سهرانة ؟
راغده: يعني ما يسهرون إلا العشاق وألي يفكرون ..
د.سلمى: طبعا .. فيه من مرض وفيه من جوع بس كل هالعلامات ما تدل عليك الا الحب ..
راغده نزلت عينها: من الألم .. معي الدورة ..
د سلمى: اوه سلامتك كان قلتي لي كنت عذرتك .. وطالمة تعبانة ليه جيتي ؟
راغده: الشك ذبحني .. كان لابد اجي واعرف الي يصير .. انا محب احد يستغفلني ، دم سنوني ..
د.سلمى " لو بيوم اكتشفتي كذبتي لك .. بتشركيني راغده لان بدأ فعلا طلال يسيطر على مشاعرك وخوفك وعلاجك بيد الله ثم بيده هو "
.
.
.
رجع من دوامه ..
شافهم مجتمعات
ميس: يا فهد ودنا بعد صلاة العصر ..
فهد: ما أقدر بأخذ اسيل والعيال لسوق ..
ميس: ما يخالف خذنا معها ..
فهد: ما تأخذ راحتها وياكم ووجهتها غير وجهتك ..
ام فهد: عشتوا بس ليه وين بتروح الأخت لباريس؟
نوال: خلاص نشوف طلال ..
ام فهد: وطلال فاضي لكم ؟ ما غير يسرح ويمرح ويرجع متأخر ..
نوال: يمه كلها امس جانا ١٢ مو من عوايده ..
طلال: السلام عليكم ورحمة الله وبركاته
الكل: وعليكم السلام والرحمة ..
ميس: الطيب عند ذكره .. عفيه طلول ودنا السوق ..
طلال: ضروري؟
ميس: بنت عمي جنان بتكتب كتابها على سطام ولد عمي ..
ام فهد يناظر طلال وبسخرية: ما تعطلت عليك ..
طلال تجاهله: على كم الساعة بتروحون بالضبط؟
نوال: ٤ زين ؟
طلال: تمام ..
ميس بحماس: لبى قلبك .. الله لا يحرمنا منك ..
دخل غرفته وترك لها رسالة" بروح مع خواتي لسوق اذا خلصوا بدري على موعدنا "
&&&&&&
وصلها رسالته .. نقرت على الزر: تعالي نهلة
دخلت نهلة: سمي طال عمرك ..
راغده: لا تلغي موعدي لجلسة الليزر
نهلة: ابشري طال عمرك ..تأمرين بشيء ثاني؟
راغده " كنت بلغي مواعيدي عشان حضرته .." : تقدرين تنصرفين ..
نهلة: المعذرة طال عمرك .. الهدايا لصديقاتك جهزوا ..
راغده: ممتاز ابعتيهم لبيتي قبل المغرب ..
نهلة: ابشري
نزلت راسها وطلعت ..
راغده" اعرف بيجي الليلة بس ما برجع البيت إلا متأخر "
اجرت إتصال مع فرح : هلوو..
فرح: هلوو بالقاطعة مالك حس كلش ..
راغده: اعذريني كنت مشغولة جدا هالأيام ..
فرح: ايش جدولك الليلة ؟
راغده: جدولي الليلة نطلع نتعشى برا مع البنات على مأكولات بحرية الي ما صارت ..
فرح: ما اعرف هل هم مشغولات او لا ..
راغده: حاولي معاهم بالله اليوم خاطري اتونس ..
فرح: براسلهم وارد عليك دقيقتين بس..
وسكرت منها وصارت تنتظر اتصالها وبعد ٤ دقايق اتصلت: هــا بشري ؟
فرح: مروة اعتذرت تقول ليه مانخلي العزيمة في بيتها ..
راغده: ماعندي مشكلة الأهم اتونس ..
فرح: على الساعة ٨ تمام ؟
راغده: على العشاء ..
فرح: طبعا
راغده: انا بطلب من المطعم وبجيبه معي لا تسوي شيء بلغيها ..
فرح: طيب ..
وسكرت السماعة وكلمت نهلة تطلب لها من المطعم ..
رجعت بدري من البيت وسوت رياضتها ساعة الا ربع ثم أخذت دوش ..
ولبست جمبسوت باذنجاني بأكمام طويلة مكشوف الصدر .. وحلق فضي طويل وخاتم وساعة
مكياج ناعم ولبست عبايتها وحجابها وطلعت ..
قبل ٤ ساعات .. بالسيارة ..
ميس بقهر: السيارة وش بتكفي الان ؟
ام فهد: اسكتي قبل لا تسمعك
نوال: هي قالت بتحط عيالها عند اهلها تطمنو ..
ميس: وفهيدان ليه ما يأخذها ..؟
ام فهد: الان قال لك انه جاته شغله..
ميس تتحلطم: مو جديد
ام فهد تشوفها من بعيد: جات اوص ولا كلمة ..
اسيل دخلت: السلام عليكم ..
الكل: وعليكم السلام ..
وتوجه لسوق ..
ميس: تعال طلال .. مو هذا حلو لنوال ..
طلال يضبط شماغه : ما أعرف شغلاتكم ..
ميس: حلو ولا
طلال: حلو ..كل شيء حلو على نوال ..
نوال باحراج: تسلم ..
ميس تناظر من بعيد مجموعة بنات: وكل ما رحنا معك إلا ونحصل معجبات ..
طلال التفت واخفى ابتسامة: حاسدتني عليهم ..
ميس: بس مو لهدرجة .. ما ماتوا الي يغازلون ..
نوال بضحكة: واضح أن اعمارهم ٢٤ وتحت ..
ميس: جعلهم الطير .. ليت راغده معنا ..
طلال جازت له السالفة: اي بلغيها خليها تخاف علي شوي ..
ميس: ههههههه مو واثق بحبها الأخ ..
طلال: إلا واثق بس محتاج لشطة شوي ..
ميس: ابشر بخليها تنهار بعد عطني رقمها بس ..
طلال دون رقمها بجوال اخته واتصلت فيها ما ترد
ميس: بكلمها واتس اجل
ارسلت مقطع صوتي: السلام عليكم كيف الحال راغده معك ميس اتصلت فيك ما رديتي قلت ممكن مشغولة
احنا مع طلال بالسوق وفي شلة بنات تلاحقة
طلال باندفاع: لا لا ميس ..
ميس: وش اقول اجل ؟
طلال: احذفي المقطع بسرعة
ميس بربشة جات بتحذف المقطع الصوت " حذف لدي " : يوه طلال حذفته لدي ما حذفته كلي
طلال : اما عاد ..
ميس: وش السواة احين !
نوال : متى وقفتي المقطع
ميس: لما قال لي طلال لا ..
نوال : راغده بتفهم انك كمشت ميس وهي تخبرها انك تغازل ..
طلال بابتسامة: الله على افكارك يا نوال ..
نوال وميس بستغراب: مو خايف تزعل !
طلال: احلى شيء في مثل هالاوقات الغيرة والصراع علـى ..
ميس قاطعته بحماس: الرمال !
طلال: وش قالو لك ****ب؟ ولا زواحف
الكل: ههههههههههههههههه ..
نوال بضحكة: مجنونة قسم ..
ام فهد مع أسيل تناظرهم من بعيد واقتربت منهم: صوتك لبرا .. انتو جايات تضحكون وتلعبون ولا تشترون لكم فساتين .. انا وراي عشاء لـ أبوكم عجلوا
ميس ونوال: اسفين يمه ..
اشترو لهم فساتين ..
ميس بهمس: شوف طلال هذا الفستان يجنن على راغده ..
طلال يناظر بالفستان : جدا
ميس: تقل صمموه لها ..
دخل المحل مع خواته وأخذ الفستان
ام فهد تشوفهم من بعيد: وش يسوون ذول داخل مو قالو خلصوا ؟
اسيل: سمعتهم يقولون الفستان لراغده .. الظاهر يشتري للمسعده فستان ..
ام فهد،: وخزياه مسوي فيها روميو ..
اسيل: مو على اساس متزوجها عن حب خلاص أجل .. بيصير روميو غصب ..
ام فهد كشرت بوجها: اي واضح الحب مقطعه شقفتين ..
اسيل رفعت حاجبها: عاد من زينها !
ام فهد: أنا ما شفتها ..
اسيل بغرابة: ليه ؟
ام فهد: أقول لك السالفة بعدين هذا هم جاو ..
صعدوا السيارة
طلال: ايش رأيكم نتعشى برا ؟
ام فهد: لا أنا وراي طبخ لأبوك
اسيل: بروح لاهلي عازميني ..
طلال وصل أسيل لبيت اهلها و مرت ابوه للبيت ..
ودخل عبدالرحمن السيارة: زين ما نسيتوني يالخونه ..
ميس: خلوني أنا ألي أختار المطعم صاحبتي مدحته لي بشكل مو طبيعي ..
لكم في البحريات؟
الكل: طبعا
ميس: خلاص أجل .. قطه ؟
طلال: لا هالمرة أنا عازمكم بعدها قطو على راحتكم ..
بالمطعم ..
طلال " هذا نفس المطعم ألي تحبه راغده " الجارسون :طاولة لكم ؟
طلال : ٤ اشخاص ..
جاء بيدخل المقصورة شافها مع نفس الجارسون قبل وكانت تبتسم وبانت سنونها اقترب منهم ..
راغده باحراج: مو بالعادة اخالف الوقت جيت بدري ..
الجارسون: لا تشيلي هم حطيت الأكل بالسيارة ..
راغده: ما نسيت شيء ؟
الجارسون: ما ننسى طلبات الزباين الكرام ..
راغده ابتسمت بخجل: الله يجزاك خير .. استأذنك
وطلعت متوجهه لسيارتها إلا بيده
راغده بخوف: مين ! " ناظرته بصدمة" طلال !
طلال بغيرة: وش لك كلام معه ؟
راغده: ما فهمتك مع مين؟
طلال: مع هالجارسون ..
راغده: ولا شيء بس كان يودي طلبيتي لسيارة ..
طلال يشوف السيارة من بعيد: اييي ..
راغده تشوف يده الي ماسكه يدها: اترك يدي احنا في مكان عام ..
طلال انتبه على نفسه وترك يدها
راغده: وانت .. وش تسوي هنا؟
طلال: كان اختيار ميس لهالمطعم وصادف انه مطعمك المفضل ..
راغده: وكيف عرفت انه المفضل عندي ؟
طلال: لانك عزمتيني فيه كنتي مبسوطة مرة وكـ اول مطعم نروح اخترتي بحري لحبك له فـ توقعت انك تحبيه .." يناظر عينها" وكيف حال عينك ؟
راغده تذكرت الي صار وبحيا: اي تمام الحمدلله ..
طلال بابتسامة: اكيد شفايفي فيها علاج ..
راغده: ويــع ..
طلال: إلا ميته عليهم ..
راغده وجها قلب ألوان: انت ما تستحي على وجهك .. بروح قبل لا يبرد العشاء ..
طلال فتح لها الباب: بعد المطعم بمرك ..
راغده صعدت سيارتها: بطول بالسهرة لا تجي ..
طلال: متى ترجعين ؟
راغده بدون ما تناظره: ما أعرف ..
طلال: اتصلي بي بس تكونين بالبيت
راغده: لا تنتظرني اجلها ليوم ثاني .. باي باي
ومشت وهي تناظره بالمراية : ياربي وش هالصدف .. اتحاشى شوفته وألاقيه هنا ..
رجع للمطعم ..
ميس: اقول طلال مواعدها هنا ولا صدفة " وبغمزة"
طلال: صدفة ..
ميس : اي صدقت ..
نوال: جاهز ليوم الحفلة ؟
طلال: اي باقي البروفا ..
نوال: بروفا وش ؟
طلال: سر ..
ميس بحماس: وش ألي ينطرنا لذاك اليوم ..
عبدالرحمن: وش بتطلبون ..؟
ميس: أنا بطلب لكم على ذوقي حايعجبكم ..
آنتهــــــى البــارت