الفصل 2
البارت الثــــاني
أم نرجس: يا ساتر .. لا تقول أسمك عند امها ..
نرجس: ليه وش بيصير ؟
أم نرجس: يعني بتطردني من الجمعية أم عبدالعزيز ..
نرجس بقلق: لا يا يمه مو لهدرجة ..
أم نرجس: وأزود من كذا بعد ..
نرجس: هي الدنيا سبهلاله كذا ؟
أم نرجس: يعتمد على التصويت لو صار عدد ألي قابلين خروجي أكثر من عدد الرافضين يعني خلاص بح ..
نرجس: ياربي ..
أم نرجس: أتصلي بها يا نرجس ..
نرجس صارت تتصل بـ راغده و راغده جوالها مغلق ..
أم نرجس: أكتبي لها رسالة وبيبان عندك كان هي قرأتها أو لا ..
نرجس : هـي لاغية مؤشر القراءة ..
أم نرجس بعدم أستيعاب: يعنـي شنو ؟
نرجس: يعني لما أرسل لها أي رسالة ما يجيني صحين أزرق ..
أم نرجس: وتعرفين متى تقوم هي؟ ولا ألغت أخر ظهور بعد ؟
نرجس: لا ما ألغته الحمدلله , تصحى 8 أو 9 صباح ..
أم نرجس: حطي لك ساعة يلا عشان تقولين لها وتحذرينها ما تعلم أمها بـ أسمك , وهذا إذا ما قالت وخلصت ..
نرجس بخوف: أنا بحاول يمه على قد ما أقدر و يا رب أنك تعيين ..
رن المنبـه على الساعة 6 صباحا
قامت غسلت وجها وحطت واقـي شمس ولبست ملابسها الرياضية وجزمتها رفعت شعرها ذيل حصان
ونزلت تحت بالحوش ألي سوتها حديقة وصارت تمشي ثم تهرول ثم تركض وبعد ساعة إلا ربع
دخلت داخل وبدون ما تناظرها: لا تسوين فطور , بفطر برى ..
ماريان: أوك سنيورة ..
راغده: بتلاقين ملابسي فوق السرير روحي أكويها ..
أخذت دوش لكامل جسمها ..
وشافت لبسها مكوي ومعلق قبال التسريحة..
كانت عبارة عن تنورة سكيني سوداء وبلوزة رسمية أزرق نيلي ..
حددت حواجبها وحطت واقـي شمس ومرطب شفاه ولبست كعبها الأسود
لبست عبايتها وضبطت حجابها ولبست نظارتها الشمسية وصعدت سيارتها وحمتها إلا تشوف أتصال من نرجس 5 مرات ورسالة بالواتس جات بتفتحها إلا بإتصالها
راغده: أهلين ..
نرجس بفرحة أنها ردت عليها: أخيرا رديتي ..صباح الخير ..
راغده: صباح النور ..
نرجس: ما أعرف هل رحتـي بلغتي أمك بخصوص ألي قلته ..
راغده قاطعتها: لا تشيلي هم , ما بذكر أسمك
نرجس بفرحة: وياليت لو يكون بيني وبينك ..
راغده: ما في شيء بيني وبينك بس أن كان اتصالك هو للمعرفة فـ تطمني ..
نرجس " مدري ليه رافضة أي احتكاك بيني وبينها" شكرا لك ..
راغده: وغيره ..؟
نرجس: سلامتك ..
راغده: أوك " سكرت الخط"
نرجس: سكرت الخط بوجهي ! على أيش شايفة نفسها ؟
أم نرجس: مش مهم الأهم أنها ما علمت أحد ..
نرجس: فيها كمية غرور وثقة ما شفتها بأحد ..
أم نرجس: معليش يا بنتي هذا هم مديرات الأعمال ..
نرجس بقهر: لا تزودين قهـري يمه ..
& & & &
دخلت غرفتها وطفت التكييف وولعت الأنوار وبحده: يلا قم هات من الفوال ..
طلال بطل عينه بثقل ..
أم فهد بنفس حدتها وعند الباب: قوم لا تخليني أرجع لك من جديد ..
طلال: وفهد وش وضعه ؟
أم فهد: فهد مو مثلك بإجازة ..
طلال " صبي عندها أنا ! " وقام بكسـل
.
.
.
توجهت لعيادة الأسنان للكشف على أسنانها ..
الدكتور: أسنانك مش بحاجة لتنظيف ماهي كده كويسة جدا ..
راغده تشوف على المراية: هذا بداية تسوس دكتور ممكن تحشيه لي , وهذا بعد ..
الدكتور: تمام ..
وبعد مضي ساعة إلا ربع توجهت لصالونها
أول دخولها , الطاقم: صبـاح الخير ..
راغده وهي تمشي بثقة: صبـاح النور ..
صعدت لمكتبها , نهلة قامت وراها: صباح الخير ..
راغده: صباح النور , أي مواعيد ؟
نهله وهي تأخذ عباية راغده: لا ..
راغده تجلس على كرسي مكتبها : والموقع أيش صار عليه ؟
نهلة : بعتت طلب عبر البريد الإلكتروني وللآن ما جاني رد ..
راغده: والفطور ؟
نهلة: طلبتها من ربع ساعة ..
راغده: نهلة ضيفي لجدول أعمالي يوم الخميس الساعة 9 للجمعية ..
نهله: أبشـري , تأمرين بشيء ثاني ؟
راغده: تسلمين ..
وبعد لحظات وصلني منقوشتين زعتر وشاي بالنعناع ..
راغده ببتسامة: هذا ألذ فطور ..
ام حسن: فيه العافية ..
راغده: أفطرتي ؟
أم حسن: أي الحمدلله من ساعة كذا ..
راغده ناظرتها: تريدين شيء ؟
أم حسن بتردد: أي طال عمرك , أنتي عارفه العام الدراسي بعد شهر محتاجة سلف 1000 ريال لمقاضي مدرسة العيال ..
راغده: أبشري لا تشيلين هم " مسكت جوالها وأجرت عملية التحويل لحسابها " وهذا حولنا أيش ثاني ؟
أم حسن رفعت يدها لفوق: الله يعمر بيتك ويرزقك الزوج الصالح بالقريب العاجل " انتبهت على نفسها "
أقصد الله يزيدك من فضله كمان وكمان " وعند الباب " أستأذنك ..
راغده تنهدت" مدري وش الغاية من الزواج , وليه الناس تدعي لي بزيادة بالزوج الصالح ؟
كلهم منحرفين ووصخين , الله يأخذهم بس " مسكت المراية وصارت تشوف وجها: هذا أنا قمر وشباب ما شاء الله تبارك الله ..
ومسكت جوالها وجلست على الواتس آب : ايش معك شغل الليلة بعد صلاة العشاء ؟
فرح: أهلين حبيبي , ما معي شيء ..
راغده: أتمنى ما تتعذرين مثل كل مرة , عازمتك على مطعم بحري ..
فرح: ودك بمريم ومروة معنا ؟
راغده بفرحة: ودي , معك تواصل معهم ؟
فرح: أي العلاقة ما أنقطعت
راغده بحماس: مختفيات عن الأنظار خليها مفاجأة لهم قولي أنك أنتي ألي عازمتهم ..
فرح: تـم براسلهم وأكد عليك مباشرة ..
راغده: أرسلت فيس يبتسم مع قلب
سرحت بفكرها " الله على أيام الثانوية كنا صديقات وبعد الثانوية الكلية وكل وحدة ما عادت
مثل أول مشغولات بحياتهم , كل ما حاولت ألتقي بهم ما تضبط , ظروفهم تحكمهم
ويارب هالمرة تضبط " بابتسامة نقزت على التلفون: تعالي نهلة ..
نهلة: حاضر طال عمرك ..
دخلت نهلة لراغده وبحماس سألتها: لو معك صاحبات ما شفتيهم من زمان أيش أفضل هدايا ممكن تعطينهم اياها ..
نهلة : على حسب نوع العلاقة , يعني هل هم صديقات مقربات أم زميلات و ألتقيتوا ؟
راغده بحالمية: صار لنا فترة ما ألتقينا أكثر من عشر سنوات , بس بيننا تواصل على الواتس آب ..أقصد متواصلة مع وحدة منهم , وذي متواصلة مع الباقي ..
نهلة: حلـو , أنا بحجز لكم مطعم راقي vip
راغده: أعتمد عليك يا نهلة , حبثا تكون الليلة على الساعة 8 ولو تم كل شيء على خير أرسلي رابط الموقع ..
نهلة: لكم شخص ؟
راغده: 4 أشخاص ..
نهلة: تم
راغده: الله يحفظك
نهلة نزلت راسها وطلعت من المكتب
بعد 7 دقايق وصل لها الموقع وأرسلت لفرح وخبرتها الخطة الجديدة ..
.
.
.
على الغداء كانت معه بالمطبخ طلال: لا تحاولين ما بتتعلمين هو يعتمد على النفس ..
نوال بضحكة: خف علينا يالشيف رمزي ..
طلال: لو مو عاجبك طبخي , كان ما طلبتي مني البرياني
نوال: ما ذقت أحد مثلك بالطبخ يا طلال ..يا بخت من ألي بتتزوجها ..
طلال:........
نوال: ليه سكت ؟
طلال ناظر أخته: وهل الزواج أساسي يا نوال ؟
دخلت عليهم ميس وبابتسامة: يا مساء الخير جميعا , أنا شامة ريحة أكل فضيعة دوختني , قلت بشوف طلول كان حسبني أو لا ..
طلال: هو أنا أقدر ما أحسبك ؟
نوال: حزر فزر أيش الطبخة ؟
ميس: لا مش معقول طالمة نوال بالمطبخ يعني برياني ..
طلال ونوال بصوت واحد: صــــــح ..
ميس: هههه أنا ذكية ..
نوال: لو ذكية كنتي خلصتي الجامعة مو نايمة فيها ..
ميس بتأفف: زين أني دخلت الكلية , بس ليه سكتوا لما دخلت بينكم سر ؟
نوال: لا بس كان السؤال هل الزواج ضروري ؟
ميس: عن نفسي أساسي " وهي تتلفت وبهمس " عشان أفتك من أمك ..
نوال وطلال: هههههههههه ..
ميس بحالمية: متى بس يجي وأنا موافقة وبدون مهر ..
نوال: لا تسمعك أمي بتقومها عليك ..
ميس: محد يقدر يأخذ راحته بهالبيت , حتى السوالف ممنوعة ..
أم فهد عند الباب: عسـى هالجمعة خير .. !
ميس جمدت مكانها: يمــه !
أم فهد ناظرتها: علامك كذا كأنك شايفة جني ..
ميس: أبد يمه بس دخلتي فجأة ..
أم فهد تناظر طلال بنصف عين: وأنت كلا بالبيت و هالإجازة ذي ما خلصت ؟
ولا جالس تطبخ مثل النسوان ..
نوال: يمـه ..
أم فهد: أطلعي أنتي برا مع أختك ..
نوال: بس ا...
ميس خذت نوال برا
أم فهد: من أنت عشان يعطونك إجازة 8 شهور حتى ألي معه منصب كبير ما سووها له ..
طلال: معليش يا مرت أبوي ..
أم فهد رفعت حاجبها: ما تقدر تقول خالتي أو عمتي .. ولا على ترباية شرفوه
طلال: خالاتكم أمهاتكم وأنا ما شفت هالشيء فيك , مرت أبوي يعد لفظ محترم على ألي تعامليني فيه ..
أم فهد : الله الله والله وطلع لك صوت يا طلول , أنت ناسي أيش ممكن أخلي أبوك يسوي فيك ؟
طلال بتريقة: أكثر من ألي تسونه فيني ؟
أم فهد عطته ظهرها: وش سوينا لك ما كل وشارب والبيت يسترك ..
طلال: بيت يسترني ؟ وينه ؟ كل سواليفي عند الجيران وعند أهلك ,
وليت الكلام صحيح أيش فايدة أعمدة البيت ألي أنحطت لستر وفيها ألي يفشيها ويخلي البيت شفاف ..
أم فهد رفعت حاجبها: ما يحتاج أوصل إنجازاتك لناس وبعدين أنت تظن كذبك علينا بيستمر ..
طلال: أي كذبة .. !!!
أم فهد بتوعد: طيــب , خلك كذا وش أيش بيصير ..
& & &
أختارت لبسة خفيفة لمناسبة عظيمة بالنسبة لها وهـي تتعطر: أحسن من روحتي لهالجمعية
ألي هدفها بس زواج , ألتقـي بـ أصدقاء الثانوية أفضل ومنها أغير جو ..
حطت ميك آب نو ميك آب ..
لينغز تايقـر وبدي أحمر بحمالات عريضة وكعب متوسط أحمر واكسسواراتها بلون الذهبـي قلادة طويلة وخاتم وساعة ..
رفعت شعرها ولبست عبايتها وحجابها وصعدت سيارتها وبرسالة من فرح ( وصلنا للمطعم أنتظرك )
راغده ابتسمت: الحمدلله أخيرا بنتشاوف ..
وبالمطعم ..
دخلوا الغرفة مروة بأعجاب: حبيبي فرح ليه متكلفة كل ذه ؟
مريم: أكيد معك خبر أو به مناسبة خاصة ..
مروة بحماس: بمـوت من الوناسة بصور سناب وأقهر حماواتي المهرجات ..
مريم: وأنا بعد ..
فرح: أسمعوا بنات خلو التصوير على جنب و انتبهوا لي ..
ألي حجزت وعزمتنا هـي راغده ..
مريم ومروة تغيرت ملامحهم: نعـــم !
مروة: وش تقولين أنتي ؟
مريم: ناقصنا حسد أحنا ؟
فرح: حتى لو ما تحبونها تكلفت عشانا والله ..
مروة بقهر: الله يسامحك يا فرح أنا لو أدري إن هي بتجي ما كنت قبلت بعزميتك ..
مريم: أي والله , عينها حارة بتحط عينها علينا ..
فرح: مو ذنبها لأنها ما تزوجت ..
مريم: بس ذه ذنبك أنتي لأنك قبلتي دعوتها ..
مريم بخوف: قل أعوذ برب الفلق , قل أعوذ برب الناس ..
مريم: وليـه أيش تريد منا ؟ وأيش معنا الآن مو أحنا قاطعنا علاقتنا فيها من بعد زواجنا ..
مروة: أي هي معقدة وتريد تخرب عقولنا عشان نصير مثلها لا زواج ولا أهداف ..
مريم: يــوه جلست اتذكر كيف كانت بالكلية " بتفكير "
كان عمرنا 22 سنة ممكن وهي إنسانة ثانية كنا عندها إنفصام وتحقد على كل وحدة متزوجة ..
فرح: هيه هيــــه لا تبالغون عاد , ممكن هي ما تحب أو مو متقبلة موضوع الزواج ..
مريم ومروة ناظروا ببعض وفطسوا ضحك ..
فرح: !!!
مروة بضحكة: طالـع هاذي بس ..
مريم: ههههه هي مو عشان ما تحب هي مو حــــاصل لها كم عمرها الآن ولا تزوجت
وشوفينا الحمدلله متزوجات لكن هـي وش سوت ووش عندها أصلا ؟
مروة: ومدري من وين جابت هالفلوس عشان تحجز لنا بهالمطعم أنا زوجي راتبة فوق الـ 11 الف ولا فكرنا حتى نمر عليه ..
مريم: بسم الله بسم الله ليكون سرقة ولا وش !
فرح: عن الدراما أنتي وهي , وخلاص أسكتوا قبل لا تسمعكم ..
مروة بدون أهتمام : وخير يا طير , لو هي قدامي بقول هالكلام بوجها ولآني بخايفة ..
مريم: وأنا بعد , ناسية لما ...
فرح باندفاع: اوووص جـــات ..
دخلت راغده بابتسامة العريضة: هلــــو ..
الكل أنصدم من شكلها: !!!!!
راغده اقتربت من فرح وحضنتها ومروة ومريم وبشوق كبير: يــا الله يا بنات قد إيش اشتقت لكم يعني لو ما فرح تعاونت معي ولا ما كان شفتكم ..
شلحت حجابها وجلست جنب فرح وهي قبال مريم مسكت يدها: يا الله يا ميمي تغيرتي .. كيف حالكم ؟
مريم وهي تتحسس يد راغده الناعمة: وش جرى عليك ؟ تغيرتي بقوة ..
مروة بنفس ذهولها: لو مريتي قدامي ما كان عرفتك ..
فرح: أحلويتي ونحفتي راغده ..
راغده حست أن بوجها شيء: بروح الحمام أعزكم الله , بالأذن ..
أول ما أختفت عن عيونهم كلهم بصوت واحد: من ذي ؟
مريم: مصيبـة مسوية تجميل ؟
مروة: لا مستحيل ملامحها نفسها بس حلوت كثير ..
مريم: سقـى الله أيام الكلية كانت سمينة والآن شوفي كيف ..
فرح بحماس: نفسي أشوف جسمها بدون عباية , بنظم حفلة ببيتي قريب أجل ونشوف كل شيء , هي كانت تقول لي نادي ونادي ..
مروة: أقول بنات نترك كل شيء لبعدين الأهم نعرف إيش تستخدم وأيش تسوي والله كأنها أم 22 سنة ..
مريم: أيش رايكم نضيفها سناب ؟
مروة: لا مستحيل والله أن تجيك مصيبة ..
مريم: أسمعـيني , هـي نسوي لها تخصيص ما نضيفها من ضمن إطار قصتي ممكن هي من النوع ألي يصور ..
سمعوا صوت كعبها وألتزموا الصمت وجلست معهم بابتسامة: حي الله هالشوفة ..
فرح: تغيرتي أيش سويتي يا بنت ؟
راغده: ما سويت شيء بس شيكت على حالي بالمراية ..
فرح بضحكة: لا أسالك عن شكلك كـ اجمع ..
راغده: هههههه معليش تو أنتبه , أشياء كثيرة ..
مروة مسكت جوالها: معك سناب ؟
راغده: طبعا ..
والكل ضافوها ..
راغده: أيش خاطركم تطلبون ؟
.
.
.
أبو عبدالعزيز: أنا ما كنت راضي من البداية أنها تسكن ببيت لحالها , الناس وش بتقول عني ؟
أم عبدالعزيز تمد له الشاي : هالبنت عنيدة تحب تسوي أي شيء يقهرني ويرفع ضغطي ..
مها: مو ممكن هي تبغى تسكن هناك عشان تتزوج وتسكن به هـي و زوجها ..
أم عبدالعزيز فتحت عينها: لا عاد مو لهدرجة ..
أبو عبدالعزيز: بنتك كل شيء تسويه وما أعتقد أن فكرة مها غلطانة ..
أم عبدالعزيز: بنتي أصلا ما تفكر تتزوج أصلا عشان تسكن زوجها معها ..
أبو عبدالعزيز: حاولي تقنعينها بالزواج بعد سنتين ما عاد بيكون لها فرص زي الآن ..
أم عبدالعزيز تنهدت: من أحين ما عاد فيه أصلا ..
أبو عبدالعزيز: علمـي نفسك أجل وأقنعيها ..
مها: أتركوا هالشـيء علي أنا بكلمها ..
أم عبدالعزيز بأندفاع: كلميها بعد يوم الخميس , لو كدرتيها ممكن ما تجي وأنا بالموت أقنعتها ..
ويارب تعجب بها أم صهيب وتخطبها لولدها ..
أبو عبدالعزيز: وأيش لازمك أغراض للجمعية ؟
أم عبدالعزيز: وصيت عبدالعزيز عليها ..
أبو عبدالعزيز: هالولد مختفي مرة ..
أم عبدالعزيز: جياته ما تصادف جياتك , وتلقاه مشغول أصلا ..
أبو عبدالعزيز: وأخبار د.حمود ؟
مها: مشغول مرة يا دوب يفضـى لي ..
أبو عبدالعزيز: هذا هـي مهنة الدكاترة الله يعينه ..
.
.
.
بتردد: يبه أنا فصلت من الدوام ..
أبو فهد عدل جلسته: وش تقول ؟ وش السبب ؟
طلال: بسبب سفرتي مع نوال ..
أبو فهد: كلمتهم ؟
طلال: أي و مابه فود ..
أبو فهد: لا حول ولا قوة إلا بالله ..
طلال: أنا بشتغل بالقطاع الخاص بعد شهرين إن شاء الله ..
أبو فهد: الله يكتب لك الأجر , ويعينك على ما أبتلاك به , أنت توك صغير وما يندرا إيش بيصير بعدين ..
طلال" كل شيء يكون سهل بدون مرت أبوي وتدخلاتها ": إن شاء الله ..
إلا بدخول فهد: السلام عليكم ..
أبو فهد وطلال: وعليكم السلام والرحمة ..
فهد جلس جنب أبوه: أبو ظافر جارنا يشتكي من عبدالرحمن ..
أبو فهد: وش مسـوي ؟
فهد: يقول كل شوي داخل وطالع عندهم والبنات مو مرتاحات ما عندهم خصوصية ..
أبو فهد: هـــاه .." بصوت عالي " يا عبدالرحمن .. يا عبدالرحمن , قـم يا طلال ناده ..
طلال قام: أبشـر ..
أبو فهد: وكيف يدخل ويتمشـى عندهم ..
جات ميس بروعه: علامك يبه تصارخ ؟
أبو فهد: أخوك الثـور ..
طلال وعبدالرحمن دخلو ..
فهد بحده: صح أنت كل يوم عند الجيران ؟
عبدالرحمن : أي جيران ؟!!!
فهد: أقصد أبو ظافر لا تستغبى معي ..
عبدالرحمن: أي أروح ..
أبو فهد بعصبية: وش دخلك عندهم ما تدري البيت به حريم ..
عبدالرحمن: أي حريم ! أنا أدخل المجلس بس ..
فهد بعصبية: مو أنا محذرك ما تدخل بيتهم !
عبدالرحمن: لا تدخل أنا أكلم أبوي ..
فهد فتح عينه على الآخر وقام عليه يضربه: أيا ألي ما تستحي على وجهك تقـل أدبك بعد ..
أبو فهد بصوت عالي: بـــس أنت وياه ..
طلال يحاول يفصل بينهم
ميس بصراخ: يا ويلي خلاص يا فهد بتذبحه ..
عبدالرحمن كان يغرس أظافره الطويلة بجلد فهد ويدافع عن نفسه على قد ما يقدر ..
طلال مسك فهد بقوة وبعده عن عبدالرحمن
ميس أبعدت عبدالرحمن : بـس بـــس خلاص ..
أبو فهد : ما عندكم إحترام لي جالسين تتطاققون قدامي ..
عبدالرحمن بعصبية: هو ألي بدأ يبه كل ما سويت مشكلة أو سوء فهم ما غير يجلدني يحسب أني أصغر عياله , يظن أني صغير مثل قبل ما أقدر أدافع عن حالي ..
أبو فهد: جـــب , توك أبو 14 سنة ولسانك طويل على أخوك الكبير , أحترم وجودي على الأقل ..
فهد يتنفس بسرعة: آسف يبه بس هو ألي بدأ بطولة اللسان ..
أبو فهد: في شيء أسمه تفاهم مو تضربه على طول ..
عبدالرحمن بسخرية: شف على كم ضربه ونفسه بينقطع من الدخان ..
فهد بعصبية: أنت ولا كلمة ..
أبو فهد ناظر فهد: صح هالكلام يا فهد ؟
فهد: يكذب مو صدق ..
عبدالرحمن: أنا يبه معي مقطع مصورينه وهو يتفنن بالتدخين وطلع الدخان من خشمه بعد ..
طلال: خلاص يا عبدالرحمن رح غرفتك ..
أبو فهد بحده: وقف , وين المقطع ؟
فهد تغير معالم وجهه وناظر بعبدالرحمن بوعيد
إلا بدخلة أم فهد: وش صاير ؟ " وهي تناظر بولدها يده مخدوشة ومجروحة بقوة وبخوف: وي وي من ألي مسوي بك كذا ..
طلال: يا مرت أبوي أ...
أم فهد ناظرته بكره وقهر: جعل يدك الكسر أنت حيوان ؟ وش هالحوافر ألي معك وش سويت بولدي ..
ميس: يا يمه لا تصيرين مثل فهد تهجم على طول , أسمعي السالفة ..
أبو فهد: وأنا من أطلع شوي تصير أمور كثيرة ..
أبو فهد: خلك من هالسيرة وين جوالك يا عبدالرحمن ..
عبدالرحمن فتح المقطع ووراه أبوه
أبو فهد بصدمة: أيا أسود الوجه أجل ذي سواتك ؟ ولما أسالك قبل تقول إشاعة ؟ تقلع الله يقلعك
فهد عند الباب بقهر: أنا أوريك ..
أبو فهد: ويهدد أخوه بوجهي بعد ..
أم فهد: وش السالفة ..؟
ميس مسكت يد أمها وبهمس: تعالي يمه أنا بعلمك ..
وراحت معها
طلال: يا يبه هد نفسك , ذي صحته وبراحته ..
أبو فهد بقهر: أحصلها من العود ولا من المراهق ألي بالشني بكل يوم مصيبة يا مرة مكسر لمبة أبو جابر ولا فالع واحد ولا متهاوش والآن عند أبو ظافر ..
طلال: يا يبه مراهق وش لك به , أنا بنفسي بكلمه لا تشيل هم وإذا على فهد هو كبير مو صغير وعارف وش قاعد يسوي ..
أبو فهد: أنا ما أريده يصير مثل عمه الله يرحمه , مات بسبب سرطان الرئة وش سبته التدخين ..
طلال تنهد: لا حول ولا قوة إلا بالله ..
وبالصالة جلستها وصارت جنبها: جاء فهد من برا وقال له إن أبو ظافر يشتكي من عبدالرحمن داخل طالع عندهم
والحريم يشتكون منه , إلا بدخله عبدالرحمن وتصير نجرة بينهم ذه يضربه وذاك يرد عليه بكفخة ..
أم فهد: يعني طلال ماله علاقة , كان يباعد بينهم من أول ؟
ميس: يمه مو أنتي شايفة بعينك أن طلال كان ماسك فهد بقوة وش يعني ؟ يعني أن هو ألي باعد
بينهم , وبعدين ليه تحبي تطيحي كل شيء برأس هالطلال , مسكين والله ..
أم فهد: لأن عمره مو معتبركم إخوانه هو خبيث أنا أعرفه من كان صغير , ماتت أمه من كان عمره 5 سنوات , وهو شري ما تحملته والله ..
ميس: طيب الآن هو كبير ما يوصخ ولا يسوي شيء ..
أم فهد: والمطبخ ألي مخليه حسرة؟
ميس: يا يمه به شغالة تنظف مو لازم تنظفين أنتي , وبعدين طلال لجاء يطبخ نظيف جدا , شوفيني أنا لطبخت خليت المطبخ إعصار ..
أم فهد: ليه تحبونه أكثر من فهد ؟ رغم أن فهد أخوكم من أم وأب واحد ..
ميس: يمه أنتي عارفه طبع فهد عصبي وحريقة , لكن طلال لا ,
نصيحة يمه حاولي أنك تلينين على طلال ما تدرين ممكن هو الوحيد ألي يفيدك وأحنا ننشغل ولاهيين ..
أم فهد: ما أحبه ولا أحب أمه وأهلها , ما بغت تحمل إلا لما تزوجني أبو فهد ..
ميس بعجب : يمه أنتي الدخيلة بينهم , مو أم طلال ترى أنتي الثانية وهي الأولى وبعدين مو ذنبها أنها ما حملت إلا لما تزوجك أبوي ..
ام فهد: كنت متوقعة أنها بتطلق بعد ما تزوج عليها لكنها جلست معه وعادي ..
ميس: يا يمه لا تصبين كرهك على طلال ترى الظلم ظلمات ممكن ألي صاب نوال بسبب ظلمك له ..
أم فهد: أنا ما ظلمته بس ما أحبه , وبعدين ألي في نوال بسبب العين ..
ميس: الله يدري , حتى لو نكرتي , ولا تبيني لأبوي كرهك له خلاص , بيجي يوم يوقف ضدك وممكن هو سنة بالكثير ويتزوج بنت عمي ..
أم فهد: يتزوج من يا حسرة ؟ من ألي بتقبل فيه بدون وظيفة ..
ميس بعدم أستيعاب: مافهمت عليك ؟؟
أم فهد: فصلوه خلاص , وبنت عمك ولا غيرها بتقبل فيه .. أبوك لو عرف بيطين عيشته لأنه معطي اخوه كلمة أن جنان لطلال ..
ميس: يا رب أنك تعين ..
نوال الي كانت تسمع الكلام كامل دخلت غرفتها بهدوء ..
.
.
.
أنتهت الأمسية راغده عند سياراتها: أحد يريد أوصله ؟
مريم باندفاع: أنــــا ..
فرح: خلاص أنا باخذ مروة وأنتي خذي مريم ..
راغد ببتسامة: يلا ..
وصعدت معها السيارة , مريم ألي كانت تشوف سيارتها بإعجاب : أقول راغده خذيني أول لبيت أهلي بأخذ عيال ..
راغده: ماشاء الله معك عيال ؟
مريم: أي 2 ..
راغده: الله يحفظهم لك ..
مريم: آمين ..
وقفت عند الاشارة شافت جوالها 7 مكالمات من نهلة كتبت لها رسالة" أوصل وأكلمك "
راغده: ودك بشيء , قهوة أو شاي تتسلين بالطريق ؟
مريم: لا أنا فل .. خلاص ما به مجال أكل أكثر ..
راغده: بالعـافية ..
وصلت لبيت أهل مريم وخذت بناتها ووصلتها لشقتها وتوجهت لبيتها أول ماحطت سيارتها للكراج أتصلت بها : هلا نهلة أعذريني كان جوالي صامت ..
نهلة: إن شاء الله كانت أمسية حلوة ؟
راغده: جدا ..
نهلة: ردوا علي الموقع بالبريد قالو من أول كان عملتي حجز مثل العادة ..
راغده: نسيت والله , عارفه تو أنتقلت لبيتي وما كان معي وقت , لكن بلغيهم أني بكره بتناقش معهم ..
نهلة: ما ينفع الآن ؟
راغده: ودي , لكن الآن الساعة متوخرة وأنا أول ما أدخل الصالون بتفاهم بإذن الله وبباشر فيهم ..
نهلة: تأمرين بشيء ..
راغده: سلامتك ..
وسكرت الخط وصعدت فوق لغرفتها , شلحت عبايتها وحذيانها وقطت نفسها بالسرير " أيام , أيام ما تغيروا مثل ما خبرتهم "
يوم الخميس كل شوي تتصل أم عبدالعزيز , تأكد لبنتها عشان ما تنسـى الروحة
لبست فستان زيتي طويلة وبه كسرة من ورى ماسك على الجسم بحمالات عريضة وجاكيت جينز وصندل متوسط الطول ذهبي مع أكسسوارات ذهبية
رفعت شعرها ذيل حصان , ورخت شعرها من قدام
مكياج ناعم وغلوس أورنج خفيف ..
عند قدوم الساعة 9:12
وصلت و استقبلتها مها وبعد السلام: ليه ما تردين على أتصالات أمي ؟
راغده: أنا قلت كلمة أني بجي يعني بجي مو كل شوي تشيك تتأكد ..
مها: طيب كان رديتي ..
راغده: ناسية أني أسوق ؟
ريهام: ياربي.. مو وقت عتاب ولوم .. بنتأخر على أمي يلا ..
جات الخدامة شالت عبايتي , فتحت شنطتها وتعطرت وشيكت على حالها بالمرآية
وضبطت شعرها دخلت مجلس الحريم وشافت أعضاء المجموعة من ضمنهم أم نرجس وبنتها
سلمت على أمي وعلى الموجودين , نرجس تناظر فيها من فوق لتحت وبهمس لأمها: وجات السنيورة ..
ام نرجس بإعجاب: جسمها نحت تبارك الله ..
نرجس بغيرة: أي الله يسلم فلوسها ..
أم نرجس: يمـــه من غيرتكم يالبنات ..
نرجس: احتاج أكون مروقة يمه رجاءا ..
أم عبدالعزيز غمزت لأم شاكر وفهمتها وبترحيب: هلا بالزين كله , ماشاء الله تبارك الله..
راغده بابتسامة: هلا أم شاكر ..
أم شاكر: زاد نور المكان ..
راغده: تسلمين حبيبي ..
ومسكت يدها وجلستها عند أم صهيب , أم صهيب: وش هالزين ووش هالجمال ..
أم شاكر بابتسامة وبهمس: للآن كل شيء مبشر بالخير
أم عبدالعزيز بفرحة: الله كريم يـ أم شاكر , يارب يكون زواجها بهالسنة يارب ..
أم شاكر: أي يـ أم عبدالعزيز ادعي لها ترى دعوات الأم مجابة ..
أم عبدالعزيز: يارب أنك تجيب ..
أم شاكر: أجلسي جنب أم صهيب وأمدحيها وأثني عليها ..
أم عبدالعزيز جلست جنب أم صهيب: سمعت أن ولدك صهيب رجع لسعودية ..
أم صهيب بفرحة: أي الحمدلله ..
أم عبدالعزيز: الحمدلله على سلامته ..ومبروك تخرجة
أم شاكر: ومتى نفرح فيه ..؟
أم صهيب: هذا أنا جالسة ادور له ساعدوني ..
أم عبدالعزيز: مو ممكن تكون قبالك بس أنتي مو شايفتها ؟
أم صهيب: لا وين , تعبت وأنا ادور ما لقيت البنت المناسبة ..
أم شاكر: يعني هو معه مواصفات محددة؟
أم صهيب: ما قال بالضبط , بس يريدها على ذوقـي ..
" ألتفتت لراغده" وأخبارك راغده ما تزوجتي ..
أم عبدالعزيز باندفاع: لا للآن ..
ام صهيب: أي .. الله يرزقها , أما أنا ما بزوج ولدي إلا بشيخة البنات وياليت لو تساعدوني عليها ..أم عبدالعزيز وأم شاكر خبري معكم معارف
, وتروحون للمناسبات أريدها وحدة صغيرة ما تعدت الـ 28 سنة ..
ام عبدالعزيز تغير وجها , أم شاكر:.........
أم صهيب: وأريدها ست بيت , لا موظفة ولا شيء , أريدها تفضـى لولدي وهو ما يردها موظفة ..
راغده بحماس: كأني لقيت لك البنت الكفـو ..
أم صهيب بنفس حماسها: وينها؟
راغده بهمس:شوفي ألي جنب أم نرجس هي بنتها الوحيدة و لو أحكي لك
عن خلقها وأدبها , رغم أني ما أعرفها من زمان يا دوب من شهر من لما أنتقلت لبيتي ..
أم صهيب بغرابة: بيتك ؟
أم عبدالعزيز باندفاع وبكذب: أي بنتي بسم الله عليها أشترت أرض وبنتها ممكن تفكر تأجرها ..
أم صهيب: ماشاء الله ..
أم عبدالعزيز وبقهر من بنتها: روحي شوفي المعازيم وش ناقصهم ..
راغده أخفت أبتسامتها: طبعا يمه " وقامت "
أم صهيب: ماشاء الله عليها جميلة بنتك , وجسمها متعوب عليه , ما معك بنت بسن الزواج ؟
أم عبدالعزيز بخيبة: لا ما معي إلهام بسن الـ 14 ..
أم صهيب: أي صغيرة مرة, وليه للآن ماتزوجت بنتك راغده..
أم شاكر ألتفتت لأم صهيب: ما جاء ألي يدخل مزاجها للآن ..
أم صهيب بصدمة: أي مزاج , عمرها 33 سنة وللآن تفكر , لو أنا منك يـ أم عبدالعزيز زوجتها
أي واحد يدق بابها , على الأقل تجيب لها عيال , بس لأنها تأخرت بتجيهم ورى بعض الله يعينها ..
أم عبدالعزيز شدت على قبضة يدها: بنتي ما عليها عيب وقاصر , العيب ألي مثل تفكيرك ..
أم صهيب: وش غلطت به أنا ..؟ كلمة الحق صدق ينزعل منها ..
أم شاكر بتدخل: هـدو الله يعافيكم , ما صار إلا كل خير ..
أم عبدالعزيز: هي ألي بدأت , وبدأت تقط كلام ماله سنع لبنتي ..
أم صهيب بغرور: إذا كتب صهيب كتابة بعزمك على زواجه ..
ريهام راحت تركض لراغده: تعــالي بسرعة شوفي آيش يصير بالمجلس " وسحبت يدها للمجلس "
أم نرجس قامت: علامكم ؟ مو وقته كلش ..
أم صهيب: شوفي كيف متقطعة تريد ولدي يأخذ هالعجوز بنتها ..
أم عبدالعزيز: عجوز بعينك , على أساس ولدك الخمة توه بالعشرينات بسم الله عليه و يكون بعلمك هو من سن راغده ..
بنتي كونت نفسها بنفسها , ما أحتاجت لوقفة عمها أو وقفتي , مثل ولدك معتمد عليك وعلى أبوه ..
أم صهيب بقهر وضيم : أنا أوريك , هالأهانة ذي ما راح اعديها ..
أم عبدالعزيز: يمــه خفت انتفضت , يكون بعلمك لو تفكرين بس تفكير , برفع عليك قضية والفاظك النابية عن بنتي عليها شهود ..
أم صهيب شدت على قبضة يدها: أقلها بنتك بتظل عانس , يا حرام وما بيكون
به مجال تجيب طفل صاحي , ألي بعمرها عرضة أنها تجيب متلازمة داون ومرضى , بعد قال آيش قال ما بعد يجي الي على مزاجها , صدق عجايب ..
راغده صارت تناظر أمها ألي واضح أنها بتنهار وتبكي دخلت بشموخها للمجلس وبصوت رايق: لحظة يـ أم صهيب ,
الكل ألي بالمجلس "ألتفتوا لها وهم مصدومين من تواجدها"
أم صهيب تغير وجها لما شافت راغده:.......
المجلس كان ولا همس و الصوت ألي كان واضح , صوت كعبها بالبلاط: من قال لك أني ميتة على ولدك
أو حطيته من طموحاتي ..؟ تظنين أنه رجل يعني أنه يقدر يغطي على جرايمة ؟ ناسية فعايل ولدك ولا أذكرك فيها ؟
أم صهيب بلعت ريقها , راغده بابتسامة ثقة: الفضايح مو زينة , أنا لو أريده بأخذه حتى بدون شورك
, وهو بنفسه بيقول لك يمـه زوجيني راغده حتى لو عمرها 40 سنة ..
أم صهيب بقهر: وش هالثقة ألي فيك أنتي ؟
راغده اقتربت من أم صهيب ونزلت لمستوى طولها وبهمس لأذنها: أنصحك تلمين أغراضك وتطلعين
من البيت , مو عدلة اقول لعضوات الجمعية أن ولدك يلعب قمار
وبدل ما جالس يذاكر ويكمل تعليمه راح يفسفس فلوس أبوه على بنات الحرام ,
نصيحة من قبل لا تزوجينه روحي حلليه , حرام يعادي بنت الناس بأمراض معدية التهابات وفايروسات ..
أم صهيب جمدت مكانها وأرتبكت لما شافت حدة نظرات راغده القوية لها: هـ..هالكلام مو صحيح..
راغده بنفس همسها: حتى لو ما كان صحيح بالنسبة لك , أني اشهر بولدك عند الحريم مو زينة
, وبعدين ولدك بيطيح بكبدك , ووقتها روحي أخذي له أندونيسيا أو نيبالة تقبل فيه , وتلقينها متردده فيه بعد ..
أم صهيب فتحت عينها على الآخر: صدق أنك قليلة آدب ..
راغده رفعت ظهرها لورى: العين بالعين , والسن بالسن , أسحبي كلامك ألي قلتيه عني وأعتذري لأمي ..
أم صهيب بلا مبالة: وليه أسحب , وهذا الصدق ؟ قولي لي على واحد دق بابك
من دخلتي الـثلاثينيات وأمك تدور لك على زوج " وبتريقة" يا حياتي شايلة همك , ما تدري أن
ألي بيقبل بك أما مطلق أو أرمل أو معدد , ألي مثلك يتزوج أعزب ؟
راغده:......
أم صهيب كملت: خطابة ورى خطابة , ولا أحد قبلت فيك , ولدي لو أيش يذنب ويغلط ألي بتقبل به , لكن أنتي تؤ تؤ تؤ أحلام أمك عالية ..
راغده وهي تحاول تمسك أعصابها:الرجال موجود بس أنا وأمي مأجلينه لأسباب ..
أم صهيب بضحكة: موجود ..! هههههههه " وهي تأشر على أم عبدالعزيز" لو موجود ماكان عرضتك
على خطابات , ولا أم شاكر ألي دبلت كبدي بالمدح عنك , وش قصدها هاه؟؟
راغده: طبيعي بتمدحني , من حبها لي ودها أتزوج على ذوقها ..لكن أنا قلت لها ولد أم صهيب مو داخل مزاجي , كبير علي ..
أم صهيب: أكبر منك كلها أسبوع فقط ..
راغده: شايب , بتزوج شباب وصغير يزهر لي حياتي , ولا شايب وعايب يقرد علي حياتي ..
ام صهيب بتحدي: أتحداك تلقين الي يقبل فيك وهو بسن صغير إلا أن كان طايح من عين نفسه ..
راغده بنظرات ثاقبة: حا تشوفين , وعند نهاية هالشهر بيكون كتب الكتاب ..
أم صهيب ببتسامة ثقة: ووقتها أنا بسحب كلامي عنك ..
أم علي قامت: ووش الضمان أنها ما بتدور أي واحد من وسايطهم يتزوجها ..
أم صهيب بتفكير:أي صحيح ..
راغده: وش ألي يثبت لك ؟
أم صهيب ناظرت أم علي: بعد زواجك المزعوم وبعد شهر العسل ما يخلص تعالي هنا ببيت عمك أبو عبدالعزيز وأنا بشوف وبعرف كل شيء ..
راغده بعدم أستيعاب: ما فهمت ؟
أم علي: أم صهيب معها نظرة ما تخيب , معها حدس تعرف كان به حب له لك أو لا , أن كان مجبور أو لا ..
راغده بستخفاف: سهـلة ..
أم علي: شكلك واثقة من نفسك ..
راغده: لأن ألي بيتزوجني وده اليوم قبل بكره أنه يتزوجنـي ..
أم صهيب فرطت ضحك ومدت يدها للمصافحة: تــم ..
وسط ذهول الكل
نرجس تهمس لأمها: بسم الله , مخاوية ذي ؟
أم نرجس: أم صهيب ذي بنظرها تعرف الصادق من الكاذب , ومو صعب عليها تعرف كان هل ألي بتجيبه راغده هو صدق ولا زوج بالإيجار ..
انتهــى البـــارت ..