رواية عادت ايامك في خجل - والأخيير 11 - مكتملة | روايتك

((الجزء الحــادي عشر)) والأخـــيـــــر × يوم العيد العصر .. بالحوش واقفين عند السياره .. عبدالرحيم : ايه بس اعيد ع أمنية والحقك عمر مستند ع باب سيارته : قلت لها تطلع لك ولا كيف عبدالرحيم : امي راحت تقولها أمنية وقفت عند باب البيت تشوفه واقف مع عمر عند السياره .. عمتها صحتها من النوم عشان تلحق تعيد ع رحيم لانه مشغول بيروح يجهزلملكه بكره .. تحس انها مو طايقته هو الثاني ونفسها بخشمها لبست الشبشب الي عند الباب ومشت بجهتهم .. عبدالرحيم يناظرها ببجامتها وشال ع كتوفها مستغرب وين كشخه العيد .. تحرك يستقبلها أمنية مدت يدها بدون نفس .. عبدالرحيم صافحها وهو يشوف كشرتهاا .. سحبها كلها لحضنه : كل عاام وانتِ بخيييرر وبصحه وسلامه أمنية تفاجأة من هالحضن تحس العبره خنقتها مابين مستحيه منه ومابين محتاجه هالحضن والاهتمام : وانت بخير عمر يشد ع اسنانه وهو يناظرهم .. عبدالرحيم يمسح ع شعرها : علامك مكشره بيوم العيد من مزعلك أمنية تمسكت بثوبه من ورا بقوه وبكت وهي تدفن راسها بصدره اكثرر عبدالرحيم يحاول يرفع راسها وهي رافضه وتبكي : افااا تبكيين وانا اخووك عمر تقدم لهم بسرعه وصوت بكاها هز قلبه : أمنية شفييك أمنية بصوت مخنوق من البكا وبدون ماترفع راسهاا : خله ينقلع ماابي اشوووفه عبدالرحيم ناظر عمر بعتب : هذا وانت قايلي اموركم تعدلت عمر : وهي تعدلت بس هوشه بسيطه أمنية صرخت : ماابي اسمع صووته خل ينقلللع عبدالرحيم يمسح ع ظهرها يهديها : روح ياعمر بعدين نتفاهم عمر اخذ نفس وراح وهو متنرفز من بكاها بحضن غيره .. تكذب عليه وتضايقه ثم تروح تبكي وتتشكى ويل قليبك ياعميير * ملكه نجلا وعبدالرحيم .. في صالة البيت مزينين الكوشه .. جالسين العرسان طوقه تزغرت مبسوطه .. وشيهانه تساعد عبدالرحيم يلبس نجلا الشبكه قبل يدخل عبدالرحيم قالو للحريم يتفضلو بالحوش الي من اول فارشينه والحفله كلها فيه .. بس لقافه البنات والحريم لبسو عباياتهم ووقفو يتفرجو وسببو زحمه بالصاله الصغيره .. أمنية لفت ع البنات : قلنا تفضلو هناك عرساننا يبوون هواا فاطمه تهمس للبنات : هادمة اللذات ومفرقه الجماعات فتون تضحك وهي ماسكه لثمتها الي كاشفه نص وجهها : سوو نفسكم ماتسمعون روان : شووفو جووج ياعمري كيف مستحيه خزامى بخرفنه : مو منها من نظراته شوفو كيف يناظرها شيهانه : الفف الفف مبرووك حبايبي والله ان الفرحه ماهي سايعتني نجلا وصوتها واطي عكس عبدالرحيم الي صوته طغى ع صوتها : الله يباارك فييك يارب ام نوره الي واقفه عند الباب بعبايتها تناظر وتنقد بنفسها وش هالمعرس الي مايستحي يجلس عند الحريم وجارتها ع يمينها تناظر وتهمس لها : يافضحي بنات هاليوم مايستحن شوفي ذرعانها باينه عند الرجال ام نوره : جيل اقشر من اول مره يشوفها كذا وين ايامنا حتى وجهي نادراً يشوفه رجلي ام صبحي : اييه والله ام سعود ريحت راسها طلعت برا عن هالمنظر ام نوره : وانتِ ليه ماريحتي راسك مثلها ام صبحي بضحكه : امووت من حرتي لو ماشفت وش يسوون عبدالرحيم يبتسم لأمه الي راحت ترقص بسعاده .. لف يناظر نجلا الي توزع نظراتها ع الي حولهم .. لف بعيونه يدور أمنية .. أمنية راحت له لما شافته يأشر لها بعيونه تعالي : هلاا نجلا تناظر أمنية واقفه قدامهم .. عبدالرحيم : باالله خففي هالزحمه من اول قلت ماابي الا محارمي أمنية تأففت : والله من اليوم اتكلم اووف متطفلين مايفهمون نجلا وهي بعد متضايقه : قولي لامي تكلمهم أمنية : طيب وراحت لطوقه الي تصفق وتشجع شيهانه .. مسكت ذراعها وهي تلف شعرها ورا اذنها : عمتي قولي للحريم يطلعون عبدالرحيم مايبي الا محارمه حتى نجلا متضايقه منهم طوقه : اجل بس تخلص هالاغنيه وكلنا نطلع ونشغل السماعات برا أمنية اخذت نفس واشرت لعبدالرحيم ونجلا اوك .. * أمنية جلست ع الكرسي تحس رجولها مو شايلتها الكعب اتعبها بظهرها ورجولها .. ابتسمت وهي تناظر الي يرقصون والهوا البارد يحرك شعرها .. اليوم الجو عليل يهبل هنا ماشاءالله الحريم الكبار طربيات واغلب شي هم يرقصون غطو ع البنات .. تأملت عمتها ام تركي ترقص مصري .. كتمت ضحكتها ااه ياربي طربانه وتحسب ان رقصها حلو وهي بس كرشتها تهتز ههههههه اووف ياربي مااقدر امنع نفسي من التريقه الداخليه هههههههه ولا شوفو ام نايف حرام باالله هزت الارض وصدمت الناس شوي شوي ياحرمه من قال ان الرقص المصري رباش بالهداوه حبي هههههههه ااخخ يابطني عاد الي تردد مع الاغنيه وتمثل ونظرات حكااايه ثاانيه .. تحس انها بتختنق من كثر ماكتمت ضحكها .. اخذت نفس وصدت عنهم فتحت جوالها .. لقت رساله من عمر " الفجر امرك ونروح المزرعه " ماتت ابتسامتها .. كذا بس .. وانت حتى ماعيدت علي زي العالم والناس .. سلمت علي عادي مثلي مثل محارمك مو كأني غير عنهم .. زوجتك .. حبيبتك مثل ماتقول هه !؟ حتى رسالتي الي شرحت له فيها انا وين كنت واني ماكذبت عليه الا لاني خفت وقتها .. يرد علي طيب !!؟ هو يبي الزعل من الله حتى لو البيت مليان .. هذا هو قال نطلع المزرعه مفروض من اول .. ليش طول فتره القطاعه .. تحس صدرها يغلي من القهر ارسلت له " مااني رايحه معك " عمر "ماشاورتك . " أمنية رفعت حاجب وكتبت " ولا انا شاورتك . " عمر " تمام اجل بعد مايروحون الناس نروح المزرعه " أمنية " ماني رايحه معك لا الفجر ولا بعد شوي . " عمر " قلت لك مااشاورك انا اعطيك خبر فقط " أمنية " مع نفسك " وطلعت من المحادثه .. وتناظر جوالها تنتظر يرد .. بس تأخر وواضح انه مارح يرد خلاص . * دخلت المطبخ شافت طوقه حايسه مع الشغالات الي مأجرينهم لليوم يساعدونهم .. وقفت بدلع : اليوم ملكة بنتك وتاركه المعازيم وتشتغلين مثلك مثل الشغاله الحين صدقت سعود لما كان يشكي لي منك يقول طول اليوم تشتغل ولاتهتم في نفسها لا لبس ولا ريحه حلوه احزن عليك ليه كذا ماعندك انوثتك طوقه بهتت ملامحها وهي تسمع كلامها .. سعود كان يقول عنها كذا .. وهي تخدم امه الي لو نقصت عليها شي كسر راسها .. أمنية دخلت المطبخ بعد ماسمعت كلامها : وانتِ حبيبتي ليه كذا ماعندك اموومه ولدك المريض ياعمري من اول ماجيتو حابسته فالغرفه ولاتطلعينه لنا تراه مريض عادي وحنا ناس مثقفين مو مثلك نتفشل منه ليه كذا ماتراعين شعوره سمعته اليوم وهو يصيح يبي يطلع ويلعب مع البزارين وانت تخوفيه باان في عجوز تاكله لييه ياجاهله ولدك مو متوحد انتِ تمرضين ولدك زيااده خلي عندك احساس بالامومه وروحي طلعي ولدك وافتخري فيه باي شكل كااان تعلمي من هالام العظيمه "واشرت ع طوقه" الي ربت عيالها واهتمت فيهم وطلعو ناجحين رغم قساوه ابوهم طوقه لما شافت شهد صارت تبكي : خلاص يا أمنية شهد صدت وطلعت من المطبخ وهي تمسح دموعهاا .. أمنية ناظرت طوقه الي جلست ع الكرسي .. طلعت من المطبخ تاركتها بروحهاا × نجلا جالسه ع فراشها ببجامتها .. وتمسح مكياجها بالمناديل خزامى : بكره العصر يجي ابوي ونروح نفسي نجلس اكثر مره انبسطت هنا نجلا : فعلاً الاجواء هنا حلووه خساره حتى امي وخالاتي بيروحون بكره شيهانه فالسيب تمشي .. ناظرت البنات وارسلت بوسه لنجلا وهي تضحك ومشت لغرفتها هي وام تركي الي ينامون فيها .. تحس بتعب تبي تنااام هذي ملكه وتعبت كذا شلون العرس نجلا انسدحت بفراشها .. وفتحت جوالها ترد ع الي يباركون لها .. ناظررت اسم ساره بضيق ليه كذا ؟! حتى مبروك مافيه ياقو قلبك ياساره.. دخلت ع حساب عبدالرحيم وهي تتبسم متجاهله ساره .. شافته توه من عشر دقايق منزل مقطع اغنيه "ماكنني بين البشر يوم شفته ‏ولاكن به حوله من أهله عذولين ‏ولاكن قبله مر في القلب مره ‏ولا أظن بعده تعشق العين لسنين .." ومعلق ع المقطع " فعلاً ماكنني بين البشر يوم شفته " حطت يدها ع فمها وهي مبتسمه وتحس بحراره خدودها .. النص ساعه الي جلستها معه بروحنا .. مررت بسرعه ماحسيت فيهاا .. اسلوبه لطييف وراقي نظراته لي لحالها كفايه تسعدني .. امم شعور حلو والله انا عمري مااهتميت بمشاعري مع ان خيالي واسع واكتب روايات .. بس في مشاعري جديه ماقد مر بحياتي شخص عجبني حتى بمراهقتي ماكنت نفس البنات الي يحبون المشاهير ويطيرون فيهم مرات احسني متبلده مدري العيب فيني انا مو فيهم حتى لما اتابع فلم او مسلسل حزين وفراق وكذا ماابكي اصلا مااذكر متى اخر مره بكيت .. هل انا متبلده !! بس اليوم حسيت بشعور حلوو مع عبدالرحيم احس روحي خفيفه .. عجبني اسلوبه احسنا متوافقين جلست لما وصلها اشعار منه وفتحته بالغلط : اووف لييه كذا مفروض اثقل شوي قرأت رسالته " يمديني اكلمك مو جايني نوم " نجلا ناظرت بنات عمتها نايمات .. هو قال انه رح يأجر بفندق بالمحافظه القريبه وينام وبكره يروح للمدينه .. كتبت " طيب انتظر شوي " ووقفت اخذت شاحن جوالها معها .. والجلال لفته ع كتفها وطلعت من الغرفه مشت لباب البيت تبي تطلع بالحوش اروق وتتكلم ع راحتها .. عمر الي كان بيدق الباب وقف لما شاف نجلا فتحته : اا شسمه نادي لي أمنية نجلا : طيب ورجعت للصاله .. مشت لغرفه أمنية المقفله .. دقت الباب : امون أمنية الي جالسه ع الارض وقدامها صحن فطاير وشاهي : ادخلي نجلا نجلا فتحت الباب ودخلت ناظرتها وابتسمت : خياانه ليش ماناديتيني أمنية : لو انك بروحك ناديتك بس عندك الشينه خزامى وبعدين الفطاير كثير بالمطبخ خذي لك نجلا تشد الجلال ع كتوفها : اصلا ماابي بس عمر برا يبيك أمنية تكمل اكل : قولي له اني نايمه نجلا : اكذب عليه !!؟ أمنية : ع اساس ماعمرك كذبتي روحي بس صرفيه يحسبني ع كيفه وقت مايبيني اجيه معصي والله نجلا هزت راسها مأيدتها وهي شايفه كيف عمر ساحب عليها من ايام ومثل ماقالت انها اعتذرت له ولااهتم .. طلعت لعمر شافته مستند ع الباب : أمنية نايمه عمر لف عليها : كذابه والله ادري انها صاحيه قولي لها تجي احسن ماانادي ع عماتي نجلا تأففت : خلااص عاد كلمها وتفاهم معها انا مالي شغل بينكم ولاا تناديني هفف " ودخلت البيت سافهته .. وراحت للباب الثاني الي جنب المطبخ ويطلع ع الحوش " طلعت من البيت وراحت عند المراجيح .. جلست ع وحده وارسلت ع عبدالرحيم " تمام فضيت " وع طول اتصل .. اخذت نفس وفتحت الخط : هلاا عبدالرحيم : هلا شلونك نجلا : بخير وانت عبدالرحيم : مبسوط ومرتااح حيل .. "سكت ينتظرها تقول شي " .. اييه ليه مانمتي ولا انتِ كذا نظامك سهر نجلا : لا انام بالليل وكنت بنام بس شفت رسالتك ورديت عبدالرحيم : طيب وهالعشر دقايق الي انتظرتهم ع جمر وش تسوين نجلا ضحكت بااحراج : ههههه امم كان عمر يدق الباب يبي امون وكنت بتأخر اكثر معهم بس سحبت عليهم عبدالرحيم ضحك : هههههههه زيين والله سحبتي عليهم ولا جلست للصبح انتظرك هوشاتهم ماتخلص نجلا تضحك : ههههههههه فعلاً عبدالرحيم بهدوء وضحكتها يحسها بقلبه : ايه ياجعلني فدا هالضحكه * يدق ع باب البيت : أمنييية اموووونتي "ويضحك بشوش ههههههه ويرجع يدق الباب وبجديه مصطنعه" امووون ليان طلعت من غرفتهم ع صوت الدق سمعته فتحت غرفة أمنية بدون ماتدق شافتها نايمه .. وراحت غرفة امها شافت شيهانه صاحيه : خاالتي عمر يدق الباب وينادي أمنية وهي نايمه اطلعي له شيهانه وقفت وراحت تشوف : وش فيه ؟! عمر : وين أمنية متفق معها نروح المزرعه اتصل عليها ماترد شيهانه ابتسمت : نايمه امون شكلها من التعب ياحرام ماحست بنفسها عمر بزعل مصطنع : لا مايصير انا مجهز لها مفاجأه صحيها عمتي باالله شيهانه : الله يسسسعدكم خلاص اشوفها وراحت غرفة أمنية .. شافتها نايمه .. جلست ع طرف السرير ومسحت ع شعرها : امون اصحي ياقلبي اموون أمنية معمقه بالنوم ولاترد عليها .. شيهانه تهز كتفها : يله اموون اصحي عمر ينتظرك مسوي لك مفاجأه اصحي لاتخربين ع نفسك أمنية بنعااس وشوي تبكي : اييش بناام تعبااانه شيهانه تمسح ع شعرها : صحصحي ياقلبي والله تندمين أمنية تدفن راسها بالمخده : ابي انام خلوووني شيهانه رحمتها ووقفت وطلعت من الغرفه وقفلت الباب وراها .. أمنية رفعت راسها وهي تضحك ع الصامت وترجع تدفن راسها بالمخده .. شوي جلست وهي تهز كتوفها وتحرك يديها .. وتغني بشويش وتتمايل : اجي بالحنيييه انا انا بورده وبهدييه اناا اناا بهتمااموو فيي لوحدي اناا بالزااات ونزلت من السرير ورمت المخده وكملت رقص وهي تناظر المرايه وكأنها تكلم عمر وتسوي حركات تستعبط : اجي بالحنيييه انا اناا * عمر ويعنني متلهف : هااه وينها شيهانه بتأسف : والله عيت تصحى مسكينه تعبت اليوم اعذرها عمر يهز راسه : حصل خير ومشى بااتجاه المجلس بشويش ولما شاف عمته قفلت الباب .. تحرك ولف ورا البيت لين وصل لشباك غرفتها دف الشباك بيده وسمعها تغني .. وخر الستاره بقوه : لا باالله تجيين بالغصب أمنية صرخت مفجوعه وجري للباب فتحته وطلعت .. عمر يضحك بقوه ع خلعتها ههههههههههه مسكينه كانت تترقص وتغني ونجلا من بعيد تناظره عند شباك أمنية يضحك ويضرب كفوفه ببعض ويمسك بطنه .. صارت تضحك من ضحكه وهي مو عارفه شصار .. فالسياره .. عمر يسوق وهو ساكت وبدون مايلف عليها .. من اول ماركبو السياره وهي تتحلطم .. أمنية لافه عليه بكل جسمها : والله لااطلع هالروحه من عييونك فشلتني عند عمتي وليان السوسه الحين عرفو اننا متهاوشين عمر ببرود : حبل الكذب قصير سبحاان ربي كشفتي نفسك بنفسك أمنية تناظره بقهر متفشله من عمتها الي عرفت انها كذابه مو نايمه لما طلعت من غرفتها تصارخ .. وانجبرت تروح مع عمر ترقع السالفه : كلله منك هفف عمر : انتظر اعتذار أمنية : نعممم !!؟ عمر يناظرها بثقه : اقصد اعتذارين عن كذبتك الاولى وكذبتك اليوم أمنية ضحكت وقدمت وجهها قريب منه : والرساله الي طول جبهتك عمر يقاطعها بحدده : قصدك طول لسانك الي رح اقصه بعد شوي أمنية تعض باطن خدها تفكر باللين باللين عمر يجي بالحنيه ههههههههه .. عدلت جلستها وفصخت نقابها ونزلت طرحتها ع كتفها ورتبت شعرها: امم اعتذرت لك بالرساله وهالمره كنت فعلا نعسانه عمر يناظرها وهو يحبس ابتسامته : ايه لدرجه ترقصين من النوم أمنية تناظره بااحراج : طيب انا قلت ماابي اروح عمر رجع يناظر الطريق الفاضي : وانا قلت لك ماشاورتك أمنية بنعومه : طب ليه كذا انا من حقي اقول رايي ابي الشي ولا ماابيه كل شي بالغصب يعني عمر يناظرها : لا مو غصب بس قولي رايك بهداوه نفس الحين وانا اقولك ابشري وتم ع امررك أمنية تلوي فمها بخجل وتقرب منه : يعني الحين ماانت زعلان مني عمر تنهد : وانا اقوى ؟ أمنية وقلبها يرفرف : بس انا زعلانه ليش تسفهني كل هالايام عمر : ماني زعلان ايه واحمدي ربك اني بعدت عنك لين هديت لاني مقهور منك وودي اكفخك اجل تروحين البيت المهجور الفجر ومحارش مع البنات لمتى !؟؟ والله لو اني مو متأكد ان الجهه هذيك فاضيه ومايمرون منها رجال كان ماسكتت ي أمنية أمنية : انا مارحت اصلا الا وانا اخبر المكان واعرف ان مافي احد حتى البنات جالسات برا كانو انا كبيره وعاقله تطمن عمر : مرره ماشاءالله مقطعك العقل يالكبيره أمنية تخصرت : لاا والله ترا صدق ازعل عمر يبتسم : ماتقوين أمنية تلف عيونها : هفف ياربي مو كأن الطريق طول انت كم تمشي ؟ عمر بضحكه : على وش مستعجله أمنية ماانتبهت لقصده الا لما شافته يضحك بقووه ع شكلهاا الفاهي .. * فالمستشفى .. منسدحه ع السرير الابيض ويدها ع بطنها .. نزلت دمعه سريعه ومسحتها بتعب .. التلفزيون قدامها مشغل ع قناة القرآن بس مافي صوت .. تناظر حولها تدور الريموت تبي تسمع قرآن وتريح اعصابهاا وعمر ماتدري وينه .. من صحت مالقته سألت الممرضه عنه قالت لها كان هنا وراح .. حتى جوالها مو معها تتصل ع احد .. الي تتذكره كانت فالمزرعه مع عمر العصر .. هو طالع ع النخله وينزل لها تمر ويضحكون .. ماتدري وش ضرب راسها وماتتذكر شي بعده .. مسحت ع بطنها بيدها الي فيها ابره المغذي وهمست بألم : شكل ابوك انحاش لما عرف عنك قال لي قبل مايتشرف فيني ام لعياله "وبكت" دخلت الممرضه السعوديه .. شافتها تبكي وبحنيه : سلامات يعورك شي اختي أمنية تناظرها وتبكي باانهيار : ابي امي وابوي اليتم يووجع والله الحين شسوووي الممرضه قربت منها وحضنتها تخفف عنها .. وأمنية تمسكت فيها وتبكي : احس قلبي يوجعني بمووت الممرضه : اذكري الله حبيبتي مابعد الشده الا الفرج عمر فتح الباب ووقف يناظرها بخوف : وش صاير أمنية رفعت راسها ووقفت بكا وناظرته وهي تشهق .. الممرضه وخرت عنها لما قرب عمر والقلق بعيونه : وش فيك ليه تبكين كذا أمنية تحاول تستوعب هو قدامها ماتركها .. يتكلم عادي .. مهتم ليش تبكي .. يعني !! الممرضه طلعت لما حست وقفتها غلط .. عمر جلس قبالها ع السرير وحضن وجهها بين يدينه ويمسح دموعها : ليه هالبكا علميني الدكتور يقول صحتك كويسه أمنية تحاول ماتبكي همست وهي تشد ع يدينه الي حاضنه وجهها : حسبت انك تركتني لما عرفت اني حامل عمر ناظرها بقهر ووخر يده : تبيين كف يصحيك وش الي اتركك لما عرفت انك حامل صااحيه انتِ أمنية تشهق وهي تلف شعرها ورا اذنها : انت قلت ماتتشرف اني اكون ام عيالك عمر بقووه وقهر : كنت حمااار أمنية ضحكت من بين دموعها وصدت عنه بألم .. عمر يلف وجهها له : ارجعي ناظريني أمنية وهالتفكير السخيف انسييه كلام متخلف مدري شلون قلته أمنية : الكلام الي ينقال وقت الغضب هو الصح هو الي بالقلب عمر : تماام كنت افكر كذا بس الحين لاا انتِ ياأمنية ضحيه مالك ذنب ومو كل من يدخل الصحه النفسيه معناته هو سيء وغلطان لااا انا وعيالنا نتشرف فيك ونحطك فوق روسنا ماسويتي شي يعيب عشان نخجل منك أمنية رجعت تبكي : الا سويت بلعت مخدرات وش بعدها عمر يشد ذراعها بقوه يصحيها : مو بيييدك استغفلووك كنتِ تمرين بحاله اكتئاب حنا الغلطانين الي ماانتبها لك وحافظنا عليك حنا الغلطانين الي فتحنا المجال لغيرنا يحتويك أمنية تمسح دموعها بيدها الثانيه وبصوت بح من البكا : انت تجاملني ادري عمر بقوه وهو يهزها وعينه بعينها الباكيه : انا مااجاملك انا احبكك انا ماابي غيرك زوجه وام عيالي حاولت لما كان تفكيري حماار حاولت مع ساره بس ماقدرت تذكرين مره قلتي لي اجمل شي يقدمه الاب لعياله انه يحب امهم انا ماقدرت احب ساره حتى لما فركشتي زواجي ترا من داخلي فرحت احسني تخلصت منها بدون مايأنبني ضميري وش افيد عيالي اذا ماكنت احب امهم وقلبي وروحي مع غيرها انا جربت مع امي وابوي عمري ماشفت نظره حلوه بينهم امي طول الوقت تسب باابوي من وراه وابوي يهزأها قدامنا مابينهم اي حب وود تحسهم مغصوبين ع بعض ومكملين الحياه رجع حضن وجهها وقرب منها وسند جبينه ع جبينها : انا احبك انتِ وابي عيالي يشوفون شكثر ابوهم يحب امهم أمنية ابتسمت وتحس وجهها حار : عمر عمر همس : قلبه أمنية وعينها بعينه : انا اشهد ان ربي عوضني خيير عمر ابتسم : طيب في كلمه حلوه سمعتها مره وادري انها باقيه وابي اسمعها ثاني أمنية ضحكت بشويش .. ووخرت وجهها عنه وهي تحك خشمها بااحراج : امم احس مقدر اقول ههههه عمر والفرحه بوجهه : يله عاد قوليها وانتِ تناظريني أمنية ناظرت شوي وتحرك فمها وترجع تقفله وتضحك : ههههههههه خلاص عاد انت تعرف مو لازم انت تحرجني عمر يمسك يديها يثبتها ويغمض : يله بغمض أمنية ضحكت وهي تناظر وجهه مغمض عيونه ومبتسم .. لانت ملامحها ياالله هالمزيون يحبني زوجي ابو عيالي الي قلبي ماعرف غيره .. بشيب انا وياه ونشوف احفادنا سوا .. لمعت الدموع بعيونها من جديد عمر ثابت وهو حاس ببروده يديها .. حس فيها تقرب وتبوس عينه اليمين واليسار فتح عيونه لما حس بدمعتها نزلت ع خده .. اخذها بحضنه : ليه تبكين الحين أمنية تشهق ببكا وهي تشد عليه : لاني احبك مرره مرره انت كل اهلللي * نجلا بفستانها الوردي وتاركه شعرها براحته .. تدور ع المكان الي مزينينه وتتأكد ان كل شي في مكانه .. شافت رائد يطلع من ورا الطاوله وينحااش : رؤوود ووجع قلنا محد ياخذ من الي ع الطاوله لين يجون رائد يمد لها لسانه من بعيد .. نجلا : وقص لسان والله اعلم عمتي عبدالرحيم طل من ورا الجدار : يصير اخذ لي مويه ولا بتهزأ والله عطشان نجلا ابتسمت بخجل : لا خذ عادي رائد تخصر : ياسلااام ع التفرقه عبدالرحيم يضحك : اقلب وجهك بسس واخذ علبه مويه من ع الطاوله وشرب وهو يتأمل نجلا : ورده وربي نجلا ترتب شعرها بيدها : امم متى تروح المدينه عبدالرحيم : بكره ان شاءالله اجلت روحتي اليوم لما كلمني عمر وقالي انه بيسوي حفله لأمنية ويبينا موجودين نجلا : اي ياعمري يبي يعدل نفسيتها الدكتور يقول انتبهو لها مع الحمل تكون معرضه للاكتئاب ، حز في نفسي لما قالنا انها تحسب اننا مانحبها اعطانا محاضره طويله عريضه فالتعبير عن المشاعر تخيل عمير يقولنا تحبونها قولو لها نحبك ليش جلفين عبرو لها هي محتاجه تعرف شكثر اهلها يحبونها ويخافون عليها عبدالرحيم يضحك : حتى انا اخذت نصيبي من هالمحاضره يعني انا احبها اختي بس ماقد حاولت احسسها بأهميتها عندي نجلا لفت تشوف جدتها وهي تطلع من باب البيت ومعها عمتها شيهانه وكلهم كاشخين .. رجعت ناظرت عبدالرحيم : جمعتنا اليوم غير نفس زمان محد يتغطى عن احد عبدالرحيم يلف ذراعه حول كتفها : بالضبط وانا وانتِ نفس الوقفه نجلا ضحكت وهي مستحيه من قربه .. وشيهانه تناظرهم ومبتسمه طوقه طلعت من باب البيت وبيدها الكيكه وحطتها ع الطاوله وزغردت متحمسه : كلللللوووش وييينهم مو كأنهم تأخرو وع كلمتها الاخيره دخلو رائد وزايد من البوابه الكبيره يجرون : جوو جوو نجلا الي هي وعبدالرحيم واقفين عند السماعه .. شغلتها .. رائد وزايد فتحو البوابه الكبيره عشان تدخل السياره وبعده يقفلونها .. مع ان بيتهم قدامه براحهه فاضي بس عشان يرتاحون اكثر .. عمر دخل بالسياره ويده بيد أمنية .. لف يشوفها تناظر الشرارات الناريه الي اشتغلت حوالين السياره أمنية ناظرت قدام تشوف جدتها وشيهانه وطوقه ونجلا وعبدالرحيم كلهم بالاستقبال .. همست : ايش فيه ؟! عمر بزعل مصطنع : طلع مو بس انا الي احبك أمنية ضحكت مصدومه ليش كذا .. ولما وقفت السياره .. نجلا جات تجري بشويش .. فتحت باب أمنية : تفضلي ي أميرره اليوم يومك أمنية رجعت ناظرت عمر !!! عمر يحط اصبعه ع فمه : لو تبكيين ياويلك ونزل من السياره .. وهو يشوفها تنزل ونجلا تفك نقابها وتنزل طرحتها ع كتوفها وهي مفهيه .. طوقه جت سلمت عليها وحضنتها : الفف مبرووك والله يقومك بالسلامه عاد لو جات بنت وسميتوها طوقه بتبرا منكم ههههههههههههه أمنية تضحك بعدم استيعاب .. وسحبتها شيهانه لحضنهاا : يارووحي نتفتي حاامل مااتخييل الفف مبروك حبيبتي عبدالرحيم بعد ماوخرت عنها امه .. سلم عليها بيده ويشد ع يدها ويهزهاا : لااوصييك جيبي ولد عشان ازوجه بنتي بعدين نجلا ضحكت ومشت أمنية لجدتها .. منيره تناظر أمنية والدموع بعيونها : ابيه ولد نفس جده منصور واسمه منصور بعد أمنية ماتحملت جلست ع الارض وصارت تبكي وبنفس الوقت تضحك نفس البزارين .. عمر : يالليل الدمووع الي مو خالصه رحييم رح جيب الوايت يشفط عنا لانغرق أمنية رفعت راسها له ومن بين دموعها : ماتضحك عمر يأشر لهم بيده : اضحكوو اضحكوو هااهاا هااهاا اول شي ضحكو يسلكون له بعدين صارو يضحكون جد حتى أمنية ضحكت معهم من قلب . * النهـــايـــه .