الفصل 6
الجزء الســــادس ))
×
ولربما أقسو عليك وفي دمي
جمرً من الآلام والأشواق
وأقول لا ارجو وصالك ثانياً
وأنا اجرجر في هواكِ وثاقي
وادير وجهي لادعاء تجلدي
وودت لو يحويك طوق عناقي
×
بعد شهر ..
غرفه منصور وبدريه .. منسدحه بوسط السرير وتناظر الفراغ وافكارها تاخذها وتجيبها
انطوت ع حالها من بعد ماتحدد زواج عمر بعد ماتنتهي عدة امه بااسبوع .. زواج بسيط ع قولتهم
تحس خلاص ماعاد فيها حيل تحارب وتعيش كم مره فكرت بالانتحار وتتعوذ من ابليس فااخر لحظه وتروح تصلي وتبكي خاايفه تحس انها قاعده تنطفي وتستسلم لذيك النقطه السودا تسحبهاا وتدمرها
نجلا فتحت الباب لما ماردت عليها ناظرتها بحزن ع حالها : أمنية تعالي تعشي
أمنية جلست تبي تهرب من هالنقطه : جايه
نجلا مشت قبلها .. وصلت للمطبخ تساعد امها ..
طوقه تسخن الخبز : وش قالت
نجلا بضيق : تجي الحين يمه احس مايصير نسكت ع حالها احسها مريضه لازم نقول لعمر
طوقه : هذي بس حركات عشان تفركش زواج اخوك ولا كانت طيبه مافيها شي وش هالتعب الي ماجا الا وقت تحدد زواج عمر نصابه دامها تاكل وتشرب معناته طيبه
نجلا جلست ع الكرسي ولفت تشوف أمنية الي دخلت وجلست بهدوء وبدت تاكل وتسرح بوسط الاكل ..
طوقه جلست تاكل معهم : أمنية اذا محتاجه تروحين لدكتورتك نجلا تروح معك وبدون مااحد يدري لاتخافين
أمنية تهز راسها : انا بخير وش شايفه يعني
طوقه : ماتجلسين معنا بس جالسه بروحك
أمنية : انا مرتاحه بعزلتي
طوقه : الي يريحك
أمنية وقفت واخذت علبه مويه ومشت كذا صار اكلها قليل ..
راحت لغرفتها .. ضمت جاكيتها لما حست الهوا البارد منن الشباك المفتوح ..
وقفت ع الشباك قبل تقفله .. شافت عمر توه وقف سيارته بالمظله ونزل وكأنه حس ان في احد يناظره رفع راسه لشباكها ووقف يناظرها
ناظرته بقرف وقفلت الشباك بسرعه ..
قبل كم يوم سمعت طوقه تكلم اختها تقول انه يدور ع شقه
ودها تطردهم وهذا كان مناها بس لما جا الجد ماتقدر تخاف شلون تعيش بروحها ..
ناظرت جوالها الي يدق .. اخذت نفس وردت ببرود : نعمم
عمر : انزلي ابي اتكلم معك
أمنية : انت ماتفهم ماابي اقابلك ماابي اشوفك ولاعاد تدق وترسل تراك ازعجتني
عمر وبنفسه يدعي ع عبدالرحيم الي اخذ منه عهد قبل يمشي انه مايدخل البيت اذا يبي امه او اخته يجونه ع الباب : لمتى طيب ؟!
أمنية بجديه : الى مالا نهايه
عمر : طيب انتبهي ع نفسك
أمنية قفلت بوجهه ورمت حالها ع السرير وصارت تبكي .. شوي كذا جلست وصارت ترمي كل شي حولها بقهرر وتصاارخ تبي تنهي هالضعف
تحس بكرره وحقد تجااه الكل
*
في احد المولات ..
سحبت الكرسي وجلست بتعب وطلعت دفتر صغير من شنطتها : الحين ايش باقي لناا
سهام جالسه قبالها : نروح البيت خلاص تأخرت اخاف تركي يهاوش
ساره تكتب صح عند الاشياء الي جابتهم : باقي مهام اليوم ماخلصت كذا بيتخربط جدولي
سهام : اجل روحي جيبي شي اكله لين اكلم تركي واصحصح
ساره اخذت محفظتها وهي تضحك : الشهر الي قبل عرسي بااخذ اجازه عن الشغل والله ماالمس شي
سهام ابتسمت : الله يتمم ع خير
سهام اتصلت ع تركي وجاها صوت جميله : هلا والله ويين الناس
سهام : ليه تردين ع جواله وينه فيه
جميله : انتِ الي وين هايته خلاني اسوي العشا وهو عليك جعلك ماتربحين
تركي سحب منها الجوال وضربها ع راسها : وجع ان شاءالله
سهام : الوو تركي انا بتأخر شوي مع ساره للحين ماخلصت
تركي : اجل نامي عند اهلك انا بنام ماني منتظر اجيبك الصبح
سهام : زين شكراً
تركي قفل منها وهو يتنهد : اييه لو سويره تقدر وتخلي عمير يطلق بنت عمه البطرانه
جميله : ماهو مطلقها وبيعرس عليها بعد سويره
تركي : انا الغلطان الي سمعت كلام الحريم لو خليتها عندي وماشافتها امي كان هالحين زوجتي وكل حلالها باسمي ميير حظي طايح من يومي الي الله بلاني فيك
*
اخذت الصندوق من سومرا وطلعت تجري لغرفتها .. حلوو وصلت طلبيتها بسرعه
دخلت وقفلت الباب وراها وهي تضحك بشرر ..
جلست ع الارض وفتحت الصندوق .. طلعت الكاميرا الصغيره تأملتها وهي تفكر كيف تخبيها
مر الوقت سريع وهي تضبطها مع جوالها وتعدل فيها ..
بعد ماخلصت لبست جاكيت وحطتها بجيبته وطلعت من غرفتها ..
ابتسمت وهي تشوف طوقه واختها ريم جالسات ومعهم دفتر ويكتبون المعازيم عشان ماينسون احد
ريم : لا لا ام خالد لاتعزميها عرس بناتها الثنتين ماعزمتنا
طوقه : بس ولدها عزمتنا اكتبي اسمها بس انا عاونتها ب500 مع انها ماتستاهل خل ترجعها
ريم تكتب : اي والله صادقه
أمنية تسحبت بدون ماينتبهون لهاا .. راحت لغرفه عمر وهي تتبسم مبسوطه من جوا لها زمان ماانبسطت كذا
نجيله فالجامعه وطوقه مشغوله بمعازيمها هه والعريس بدوامه اييه هيين والله مااخليكم تفرحون وانا بنت ابوي
*
الساعه 12:30ص
جالس ع سريره وبيده جواله يرد ع ساره
" باقي مالقيت شقه تعجبني "
ساره
" لو تقنع ابوي واروح معك تكون معنا نجلا خاطري انا اختار الشقه "
عمر
" اكلمه بعدين وقت التأثيث خلي الشقه علي "
ساره
" تمام اهم شي الاثاث انا اختاره
تبي تنام الحين ؟ "
عمر
" ايه تبين شي ؟ "
ساره
" لا سلامتك نوم العافيه "
عمر
" يعافيك ربي "
وطلع وقفل جواله ورماه جنبه وانسدح بتعب .. يصحى بدري يداوم ولما يرجع ماينام يشغل نفسه بااي شي طول يومه صاحي ويتحرك عشان اذا جا الليل ينام بسرعه من التعب ومايفكر ..
ومع هذا لازم تطري عليه .. مشتاق لها
ينحرم من شوفتها ولقاها بعد مارجعت ايامهم صعب .. زمان كان مأقلم نفسه انها تتغطى عنه وماتجوز له تعود ع بعدها بس بعد ماصارت حلاله وشافها بعد ماكبرت صار صعب يتأقلم ع بعدها
فز قلبه لما دق جواله وكأنه عرف مالكته هي المتصله .. جلس باارتباك ورد : هلا
أمنية بهدوء : وينك ؟
عمر : بغرفتي
أمنية : ابي اجيك عادي ؟
عمر يمسح ع شعره : ا طيب تعالي وش فيك انتِ
أمنية همست : اشتقت
وقفلت الخط .. وبسرعه راحت تشوف ردت فعله
شافته ثابت بمكانه يناظر الجوال وابتسامته تتوسع .. ضحكت : هههههههههه مبسوط هااه عاجبك ان في بنت تحبك وتشتاق لك كذا ترضي غرورك صح هييين ياعميير ههههههه
لفت تناظر المرايه تاركه شعرها سايح ووجهها خالي من اي مكياج
لبست جاكيت طويل خفيف .. ع قميصها القطني علاقي ولحد ركبتها هزت كتفها وهي تناظر المرايه وتتبسم بروقاان : هالجاكيت انت الي بترميه ياعوومرريّ ههههههخخخ
رشت عطر خفيف وطلعت من غرفتها .. شافت نور غرفه نجلا مفتوح .. تمام واذا صاحيه يكون احسن بعد
نزلت الدرج تتمخطر وابتسامتها تتوسع ياترى وش يسوي الحين ينتظرها ياحلات السحبه عليه والله بس مو وقتها الايام جايه ..
*
وقفت بالسيب وهي تناظر باب غرفته بتردد .. بس شهقت لما شافت الباب ينفتح وعمر يناظرها
لفت بسرعه وحطت رجلها تجري مبعده حست فيه يجري وراها .. هي قادره تطير لغرفتها ولا يمديه يمسكها بس تباطئت متعمده
عمر مسك ذراعها قبل توصل الصاله : وين منحاشه
أمنية تتصدد عنه وهو يلفها عليه : مدري خفت
عمر ضحك : هههههه وش يخوفك تعالي انا طلعت لما تأخرتي ولا رحيم مااخذ مني عهد ماادخل البيت
أمنية مشت معه : انا مافيني نوم قلت اسولف معك شوي
عمر مببتسم ويهز راسه وهم متجهين لغرفته : زين حتى انا شبعان نوم
أمنية دخلت الغرفه وهو وراها .. دخل وقفل الباب وراه ناظرته بتوتر اشرت ع الباب : خلي الباب مفتوح
عمر لف وفتح الباب وخلاه مردود : تمام امم تفضلي تجلسين ع الارض ولا شسمه السرير
أمنية تناظره بحب واضح بعيونها بدون ماتتحرك ..
عمر تعلقت عيونه بعيونها نظرتها شلعت قلبه نفس ذيك النظرات لما جاته بهالغرفه تقوله لاتتزوج .. شبك اصابعه ببعض : فيك شي احد مضايقك ؟
أمنية بتردد : مشتاقه لك ابي اضمك بس مو قادره
عمر وكأنها عطته الضوء الاخضر .. تقدم بسرعه واخذها بحضنه وهو يتنهد ويدفن راسه بشعرها ويغمض عيونه ..
أمنية ابتسمت برضا رغم دقات قلبها الي ازعجتها .. همست : احبك عمر احبك حييل
عمر وخر وحضن وجهها بين يدينه ومشاعره واضحه بوجهه ونظراته .. كان يائس انه يسمع اعترافها مره ثانيه .. وبلهفه : هااه !!
أمنية تناظره وبدت ترجف بخوف صدقي من المشاعر الي شافتها بوجهه كان متوقعه انها اقوى ليش الحين خافت .. ماامداها تقول شي الايسحبها له بقبله خلت اطرافها ترجف وماعاد تشيلها ..
وهو يلف يده ع خصرها يرفعها له ويثبتها ماتطيح ويقبلها بكل لهفته وشوقه لها من سنين أمنيته الي ماتمنى غيرها هذي هي بين يدينه ويذوق حلاوتها لاول مره حبيبته حلاله ..
أمنية عقلها ينبهها يحاول يصحيها من حلاوة الشعور كيف تنسى الكاميرا وخطتها لااا مايصير تستسلم لمشاعرها وتخرب ع نفسها ..
ثبتت يدها ع صدره ودفته بقوه .. رجعت خطوه ورا وقلبها يدق بسرعه عشان الشعور حلوو لازم تصبر وتكمل حربها والله ماتذوقه ساره
نزلت دمعتتها ونار بصدرها من الغيره والتملك صرررخت وهي تمد يدها قدامها : لاا تقرررب
عمر بسط يده ع صدره الي يطلع وينزل يحاول يضبط مشاعره : اهدي أمنية لاتخافين مارح ااذيك
أمنية جلست ع الارض وغطت اذونها بيديها الثنتين وصاارت تصاارخ بااعلا صوتها ..
عمر خاف ذكرته بااول مره شافها بعد ماطلعت من المستشفى : بسم الله عليك حبيبتي لا تخافين والله مااسوي لك شي اهدي
أمنية ترجف وتصاارخ : وخررررر وخرررر
عمر يأشر لها وصوته ضايع مع صراخها : رح اطلع تماام اهدي بطلع
نجلا دفت الباب ووقفت عليه وهي تلهث من الجري لما سمعت صراخ أمنية وكل ماله يوضح لها ان المصدر غرفه عمر ..
شافتها متكوره ع نفسها وتصارخ وعمر لف يناظرها بخوف .. صرخت : انت شسويت فيهاا
عمر باارتباك لف يناظر أمنية
نجلا راحت تحضن أمنية الي ضمتها بسرعه وهي ترجف : اطلعع بررا حسبي الله اهددي اموون بسم الله عليك
عمر طلع بسرعه وقابل امه عند الباب .. وهو متورط مو عارف وش يسوي ووش يقول للحين اصلا مرتبك من قربها وقلبه ماهدا ..
طوقه ناظرت داخل الغرفه نجلا حاضنه أمنية ..
أمنية تبكي وترجف وتشهق : اقوو ولكم .. يت يتحرش فيني ماتصدقو ون ت ت تتعببت ابي امي وابوووي "وبكت بقووه"
عمر لف يناظرها مصدوم وش تقول هذي .. !!!
طوقه ناظرت عمر بخيبه وماترددت رفعت يدها وضربته كف : ماتخاف الله في هاليتيمه اذلف عن وجهي
أمنية سكتت ورفعت راسها تستوعب انه فعلاً طوقه ضربته كف .. شافته يناظرها والشر بعيونه .. دفنت راسها بسرعه بحضن نجلا
عمر صد عنهم وطلع بدون مايقول اي كلمه ..
*
صار له يومين مارجع البيت .. ينام بالاستراحه
صحى الصباح .. لقى اتصالات من ساره ورسايل كثير
فتح رسايلها ..
" حسبي الله فييك
انا وش سويت لك عشان تخونني مو قلت انا الاولى وانا وثقت بكلمتك
باقي 3 شهور ع عرسنا يامشفووح
دامك تبيها قلي ماابيك وننفصل مارح اموت بعدك بس مو تخدعني بهالشكل
والحين مقفل جوالك نذل عرفت انها وثقت وصاختك وكشفتك عندي مالك وجه تواجهني تفوو عليك
ورقت طلاقي توصلني بااسرع وقت
ولاعاد تكلمني عندك ابوي خلص امور الطلاق معه
وهاك شوف وصاختك
وانا بكون ارقى منك ومنها الكل.. واحذف المقطع "
فتح الفديو والصدمه بوجهه .. بدايته وهو يدخلها الغرفه ويقفل الباب .. لين دخلت نجلا وطردته
وكله بدون صوت ..
فز واقف وهو مصدووم كان يقول انها استغلت الموقف وتبلت عليه بس ان تطلع الشغله كلها تخطيط وحاطه كاميرا بغرفته وترسل التسجيل لساره !!
ضرب جبينه وهو يضحك بصدمه : ياالله شلوون هي بهالحقااره ههههههه طحت بالفخ بكل سهوله تقول اشتقت واحبك ههههههههههههههههههه "صار يدور حول نفسه ووقف يحك جبينه" أمنية جنيتي ع نفسك ورربي مااخلييييك
واخذ ثوبه بسرعه لبسه وطلع يهرول لسيارته والشر بعيونه ونارر بصدره من القهر ..
*
بالجامعه ..
تمشي وراها وهي مستغربه ليه لما شافتها صدت ورجعت : ساره لحظه
ساره وقفت : نعمم !!؟
نجلا وقفت قبالها تناظرها بااستغراب : وش فيك
ساره سكتت شوي تفكر : امم نجلا ماودك تقولين لي شي
نجلا : شي وش !
ساره : ماادري بخصوص عمر احسه متغير صاير عندكم شي بالبيت
نجلا ارتبكت : لا يمكن صاير معه شي بالدوام وتعرفين التجهيزات للزواج مشغلته
ساره بقرف : اهاا
نجلا تناظرها : وش فيك
ساره اخذت نفس : فعلاً انا قرفانه منك ومن اخوك لاابعد حد لاعاد اشوفك بوجهي وخليك كذا متستره ع اخوك بس ياحلوه الي ماترضيه ع نفسك لاترضيه ع بنات الناس ترا الدنيا دواره
نجلا فهمت انها عرفت : ساره والله انا مااقصد اخبي عليك انا مصدومه من عمر اصلا كيف له وجه يقولك !!
ساره : مو هو الي قال بنت عمك المريضه قالت وانا بنفصل عن اخوك خل تشبع فيه المجنونه
نجلا تمسك يد ساره : ساره انا مالي دخل فيهم
ساره تقاطعها بصراخ خلا البنات الي حولهم ينتبهون لهم : وخرري عني الحمدلله ان الاختبارات قربت واخلص ماعاد يجمعني فيك مكان
نجلا وقفت تناظرها تروح عنها .. ناظرت البنات حولها باانكسار .. وجلست ع الكرسي بندم
فكرت تقول لساره من اول ماحست بحب عمر لأمنية .. بس سكتت ليه ماتدري
شلون كذا يعني خسرت صديقه عمرها !! لا ساره طيبه وبتتفهم موقفها وبس تمر هالفتره بيرجعون لبعض ..
*
يدق ع باب غرفتها بقوه : افتحي الباب لااكسره ع راسك
طوقه بقوه : والله ياعمر اذا ماابعدت عن بابها لاني امك ولااعرفك
عمر لف ع امه بقهر : يمه لاتتدخلين الله يخليك هالبنت يبي لها تربيه من اول وجديد
أمنية من ورا الباب : مقهوور عشاني فضحتك عند ساره ووريتها حقيقتك
طوقه ضربت خدودها : ياويلي ساره دررت
عمر صرخ : حقيقه وش يالكذابه وربي لاتندمييين
أمنية ابتسمت بمتعه وهي تحرق اعصابه : تطلقني تسسسمع تطلقني بالطييب ولا اخلعك تحسب ماوراي احد طمعت فيني
" تدري انه مايقدر يطلقها بس كذا تسوي يعنني مظلومه قدام طوقه وانها ماتبيه وهي مبسوطه من ساره الي ع طول انسحبت وفضت لها الطريق "
طوقه تنهدت بتعب : تكفى ياعمر خل البنت فحالها طلقها وفكها من شرك وخل نشوف حل مع ساره
عمر رجع كم خطوه ورا عن الباب واخذ نفس واشر ع نفسه : افكها من شري اناا !! انا الشر الحيين صرت يمه
طوقه تعلي صوتها : اييه شر محدد زواجك ع بنتك الناس فالنور ومخلي هاليتيمه بالظلام عشان ماوراها احد خلاص انت واليها ومحد يردك عنها تطلقها غصبن عنك البنت ماتبيك
عمر ضحك بصدمه من كلام امه وببرود نزل عليه فجأه : مارح اطلقها
أمنية تدق ع الباب تأكد وهي تحبس ضحكتهاا : رح اخلعك والمحاكم بيننا
عمر ناظر امه : عشانها يتيمه وبنت عمي مااقدر اطلقها بعد مادخلت عليها وبسوي عرس بسيط بااقرب وقت
أمنية صرخت بصدمه وفتحت الباب بسرعه وناظرته شافت الكره والتهديد بنظرته : كذااب والله كذااب
طوقه تفلت ع الارض عند رجوله : تفوو عليك ياولد سعود
ومشت عنهم ..
أمنية تحركت بسرعه بتلحق عمتها بس هو مسك ذراعها وهي تصارخ : والله يكذب ياعمه لاتخليني مااابيييه
عمر يضحك بشماته وحقد وهو يدفها بغرفتها وطاحت ع الارض : طبخٍ طبختيه يالرفلا اكليه
أمنية بكت بخوف من الشر الي تشوفه بعيونه وصررخت : والله لااعلم رحييم عليييك رح اخلعك اطلع بررررا ياكذااب
عمر ضحك بتفشي وهو يشوف دموعها : علميه وانا اوريه الفديو ويلعن خيرك ليين تطلعين التسجيل كاامل ميير ابلعي العافيه واستري ع نفسك
أمنية اخذت التوحفه الي ع الطاوله ورمتها عليه : انقلللع ياكل..
عمر غمض عيونه متألم من التوحفه الي ضربت بكتفه .. تقدم لها بسرعه وهي حاولت تفز من ع الارض بس كان اسرع جلس ع ركبه ومسك فكها بيد وحده بقوه وتكلم من بين اسنانه : اسبوعين بالكثير بسوي زواجنا مو هذا الي تبينه يتفركش زواجي ع ساره واتزوجك انتِ
أمنية تحاول توخر يده الي تحسها شوي وتكسر فكها ويادوب طلع صوتها : لاا
عمر يناظر عيونها الدامعه وابتسم بتهديد : خفتي مني الحين بعد سواتك بتنحاشين ع بالك نفس كل مره تاذيني واسكت لاا هالمره حسابك عسير مثل ماهدمتي حياتي بهدم حياتك وادفنها دفن
أمنية مسكت فكها بعد ماتركها ووقف ودموعها تنزل بصمت رفعت راسها وناظرته بحقد : اسعد شي سمعته هدمت حياتك مسكين تبي تهدم حياتي ههههههه انا حياتي مهدومه من زماااان ماعاد عندي شي اخسره بتتزوجني تزوج وانا الي بدفن حياتك صدقني
عمر ناظرها بااحتقار وطلع وصفق الباب وراه
*
نهايه الجزء السااادس