الفصل 4
(( الجزء الرابـــــع ))
×
قل للحبيب الذي يرضيه سفك دمي
دمي حلال له في الحل والحرم
والله لو علمت روحي بمن علقت
قامت على رأسها فضلا عن القدم
يالائمي لاتلمني في هواه فلو
عاينت منه الذي عاينت لم تلم
×
سعود والشر يطلع من عيونه : قومي البسي عباتك والحقيني بسررعه
أمنية قلبها يدق بقووه من الفجعه ومن عمها همست : وين بتاخذني
سعود تقدم ووقف بنص الغرفه : ع جهنمم يله تحرركي
أمنية وقفت وهزت راسها بطيب .. وراحت للشماعه القريبه من الباب .. وبس وصلت حطت رجلها وجرررري طلعت من الغرفه .. نزلت الدرج
تبي تروح لجدتها ماعندها غيرها تحميها منه هي تغيرت صارت تحن عليها وتقولها يابنيتي ..
منيره شافت أمنية نازله تجري وهي رافعه جلال صلاتها لاتتعثر .. وسعود وراهاا
أمنية وصلت جدتها ولفت وراها : تكفين ياجدتي فكيني منه ومدري وين بياخذني
منيره رفعت عصاتها تمنع سعود يقرب وبقوه : ابعددد ورااك وش سوت لك
سعود بقهر : يرضيك يايمه ولدك سجل كل حلاله بااسمها محلاته وشغله كله مايمشي غير بتوقيع منها وين اودي وجهي بين الرجال وحرمه تديرهم حتى ليتها صاااحيه مهبوله وحالتها حاله
أمنية انصدمت ابوها سجل كل شي بااسمها !!
منيره ونفس صدمه أمنية وبعتب : الله يسامحه منصور ع هالفعله
سعود وبراحه ان امه نفس رايه : اييه عشان كذا باخذها تسوي لي توكيل وانا اقابل الرجال
أمنية شهقت : تعقققب والله ماسوييت
منيره نزلت عصاها سامحه لولدها يتصرف ..
سعود ع طول وصل لها وشدها مع ذراعها تطلع من ورا ظهر امه : بتسوين لي وانتِ ماتشوفين الدرررب ماعندنا بنات يقودون الرجال
أمنية صررخت وهي تحاول تسحب نفسها منه : وانت عااد نفسك منهم
سعود ضربها كفف خلاها تطيح ع الارض : مابقى الا هي بزر طول يدي تشكك برجولتي
أمنية سندت يديها ع الارض تاخذ نفس تحس وجهها تخدر من الكف وراسها ثقل ..
سعود نزل لها ووخر الحجاب المرتخي عن شعرها وشد شعرها رافع راسها مخليها تناظره : صوتك بس لو يرتفع علي بسحب لسانك واقصه دلع ابووك ولى
أمنية همست بألم : ليتك مت وبقى هو
منيره بضيق : ياسعود خلها عنك ضعيفه
انفتح باب البيت بقوه ودخل عمر الي جن جنونه لما شاف ابوه شاد شعرها .. وبقووه وهو يتقدم لهم : فكها ياابووي
سعود خفت قبضته وهو يناظره يستوعب انه يدافع عنها ايه صح مو صارت زوجته ..
حس بعمر يسحبها منه
عمر لفها وراه وهو يناظر ابوه وجدته ويحاول يتمالك اعصابه وبقوه : محدد له حق يمد عليها يده وانا موجود ان غلطت ع احد علومني انا وانا اتفاهم معها
طوقه اخذت نفس براحه وهي فالمطبخ بعد مااتصلت ع عمر الي كان بدوامه وقالت له الحق ابوك ناوي ع أمنية ..
سعود : انا عمها واربيها واربيييك بعد ياولد ترفع صوتك علي وانا ابووك !!
منيره الا عمر عندها وقفت : تعوذ من ابليس ياسعود هو مارفع صوته
عمر يقاطعها وهو يشد ع يد أمنية لما حس انها بتسحبها : ع راسي ياابوي بس أمنية زوجتي ولاارضى احد يضربها من اليوم ورايح الي يهينها يهينني
أمنية شهقت وسحبت يدهاا : نعممم !!؟ "وناظرت عمها وجدتها" زوجتوني وانا مدري الله ياخذكم كلكم
سعود بقهر : وقصص لسان ان شاءالله
منيره : ابوك هو الي زوجكم قبل وفاته ولاحنا راضيين عن هالزيجه
عمر لف ع أمنية وشد يدها بسرعه : امشي معي افهمك
أمنية تحاول تسحب يدها وتصارخ : وخرر عني لو انك اخر واحد بهالحياه ماقبلت فيك "وثبتت رجولها بالارض تحاول ماتمشي معه" فككني يا.. الله ياخذك
سعود ابتسم بشماته : ورني شلون بتعيش معها ياولد سعود
عمر سحبها معه بقوه لغرفته ..
أمنية تضربه بيدها الثانيه وهي خلاص تعبت مافيها طاقه هالفتره ماتاكل زين وكف عمها رج راسها .. همست بصوت باكي : فكني شتبي مني انت بعد
عمر فتح غرفته ودخلها ودخل وقفل الباب وراه واستند عليه .. ناظرها ع طول جلست ع طرف السرير بتعب وكأن رجولها مو شايلتها : عمي وصاني عليك وايه زوجك لي قبل يتوفى
أمنية بكت بتعب : لييه ياابوي لييه ااه
عمر يناظرها بحنيه وتحرك بشويش وجلس جنبها : عشان الي تو صار مايبي ابوي يكون والي عليك هو اخبر الناس باابوي وشفتي تو انا امي اتصلت وعلمتني لو ماجيت ماكان بيقدر يرده احد عنك
أمنية غطت وجهها بكفوفها صار تبكي من الحقيقه المره ..
عمر ظل ساكت تاركها تبكي ع راحتهاا
أمنية بوسط بكاهاا : ابوي سجل حلاله بااسمي "وشهقت ببكا" عمي يبيني اسوي له توكيل
عمر بقهرر : مااله حق
أمنية : اييه وانا رفضت وضربني
عمر يلف عليها وحرك يده بالهوا ورجعها جنبه : انتِ اهدي الحين وانا اتفاهم مع ابوي
أمنية وخرت يديها وناظرته ودموعها تنزل : بس انا ماابيك انا كرهتك والله
عمر يتأمل ملامحها الباكيه وخدها الاحمر من كف ابوه .. مد يده بتردد مو قادر يمنع رغبته .. مسح ع خدها بحنيه : نصيبناا
أمنية وملمس يده ع خدها صحاها خلاها تستوعب وضعها .. " عمر تزوجها "
دفت يده بقوه ووقفت وناظرته بكره : لو تبوس رجولي مارضيت فيك وبشلعك من حياتي انت وابوك وفوقكم عجوز النار منيروه انا ماني ضعيفه اذا ابوك تجرأ ومد يده علي اليوم بكره بكسررها وبيني وبينكم المحاكم لين تذلفوون من هالبيت
وطلعت من الغرفه بسرعه والنار تغلي بصدرهاا .. تكره هالغرفه الي شهدت ذلها
*
فالجامعه ..
ساره تمشي ويديها بجيوب جاكيتها الجو اليوم باارد : ماكلمني
نجلا وبيدها قهوتها تدفيها : اكيد مارح يكلمك ينتظر قرارك
ساره تنهدت : احسه بايعني مو هامه رضيت او لا عادي عنده اروح
نجلا : لاتلوميه شي طبيعي مابعد عرفك زين بس والله هو شاريك ووافق عليك بااقتناع بس جت الظروف بسرعه
ساره : وهي للحين ماعلمتوها
نجلا : ايه ماتدري ومو عارفه والله اتوقع ردت فعلها أمنية تغيرت عن زمان انا كل شوي اجيها واتكلم واحاول اغير من جوها وهي مسرحه وماهي معي اخاف بس ترجع لحالتها النفسيه ذيك
ساره سكتت وبنفسها " هه اكيد بتموت من الفرحه انها تزوجت عمر حبيبها بس والله مااخليه لهاا المريضه "
*
يوم الجمعه ..
أمنية جالسه ع السرير الي جايبينه فالمجلس لشيهانه طلعت من المستشفى وجات عندهم ترتاح .. وتناظر جدتها الي رجعت لطبعها ..
منيره : وش هالتمر الي ماينذاق بسم الله ع النعمه لاقهوة زينه ولا تمر وش حاطه عليه
طوقه بصبر : حطيت عليه اعشاب اصلاً سويته لشيهانه
منيره شهقت : لا امنعييني بعد مااكل من حلالنا
طوقه : ماقصدت كذا بس اقول
منيره تقاطعها تبعد عنها الصينيه : الله لايحوجني لك وييينها نجيله تسوي لي قهوه "وناظرت أمنية" قليله مسده مامنك فايده حتى قهوه ماتعرفي تسوين
أمنية رفعت حاجب الحين جا دورها بعد طوقه : وحتى لو اعرف مارح اسوي لك
منيره بسرعه ومن قلب : الله لايحوجني لك "وبصوت عالي" نجلاااا يانجلااااا
طوقه طلعت من الغرفه تشوف نجلا وينها تجي تسوي لها وتفكهم اووف
شيهانه الي كانت تبدل .. دخلت الغرفه ع طلعه طوقه : تنادون نجلا انا ارسلتها فوق تجيب جوالي من العيال
منيره : ياجييل الفلس بس ع الجوالات
شيهانه : الله يهديهم
*
وقفت ع باب الغرفه .. شافت زايد يلعب بالسيارات ع الارض وناظرت رايد الي بيده جوال أمه ويصور رسمته : الحين ليه ماخذ جوال امك بدون استئذان هاته تبيه
رايد مطنش كلام نجلا : اخلي نجلا تصور الرسمه احسن
نجلا بعدم فهم : وش !!
عبدالرحيم الي كان يكلمه فديو بالسناب : خلاص اكلمك بعدين
نجلا انخرشت لما سمعت الصوت وماعرفته ع طول مسكت الجوال ويديها ع الكام من قدام وورا تخاف يكون صورها اصلاً ماتدري يتكلم مع مين هالبلوه رؤود ..
شافت اسمه وخشته وارتاحت رحييم هفف
رايد بكى بصوت عالي : لاتقفلييييي هااتي الجوال
نجلا تسوي له حركات تهديد بوجهها واص بيدهاا ..
عبدالرحيم يناظر سواد الكاميرا وصوت بكا اخوه : خلاص رؤود اقفل وانت ارسلي صوره الرسمه اشوفها
رايد يحاول يسحب الجوال من نجلا : لاا لاا ماابي نجلا حيوانه والله لااقول لبابا
عبدالرحيم ماسك ضحكته : ممكن تعطين اخوي الجوال وتطلعين برا
نجلا ناظرته بقهرر خيير انت ووجهك ميته عليك انا .. رمت الجوال ع السرير واشرت لرايد اعلم امك ومشت عنه
عبدالرحيم لمح مقفاهاا لما رايد رفع الجوال وقبل يلف الكام ع وجهه وهو يبكي : تقول تعلم امي علي
عبدالرحيم : لاتبكي خلاص انا اتفاهم مع امي
*
*
مع وجود شيهانه عندهم البيت مافضى كل شوي زايرهم احد .. والتوم معطين البيت جوو
حست ان وجودهم فعلاً هذا وقته انشغلت معهم عن التفكير بسلبيه .. والاهم عمها سعود مسافر لوين ماتدري بس اهم شي ارتاحت منه ..
طلعت من غرفتها بعد مانامت نوومه طويله ماتدري شصار فالبيت .. ومايهمها شي جوعاانه وتبي تاكل بسس
وهالحين الساعه 9 بالليل اكيد في عشا اممم
سومرا قابلتها عند الباب : هذا عمر يقول يبغى انتِ
أمنية لوت فمها : قولي له ينقلع
سومرا هزت راسها ومشت ..
أمنية نزلت تحت وسيده ع المطبخ وهي تسمع صوت عمتها ام تركي فالمجلس من متى عندهم ذي ..
وقفت ع باب المطبخ وشهقت متفاجأه ..
عمر الي جالس ع الكرسي واوراق قدامه ع الطاوله .. انتبه لها قبل تنتبه له
سومرا دخلت وراها وتعدها ووقفت قدام عمر : ماما يقول قولي له ينقلع
عمر رفع عيونه لأمنية الي واقفه متنحه .. مبين اصلاً انها صاحيه نوم وجهها مفقع وشعرها مربوط وطالعه شعرات بشكل فوضوي وبجامتها ساده رصاصي اول مره يشوفها ببيجامه ووضح له ملامح جسمها .. وبهدوء بدون مايتحرك من مكانه : صباح الليل
أمنية استوعبت موقفها وناظرته بقهر : وش تبي وبعدين احترم نفسك وين داخل المطبخ وماخذ راحتك
عمر : كل الي فالبيت محارمي وين المشكله ؟
أمنية تناظره بااحتقار : تخسي وتعقب ماصرت محرمك
عمر ضحك بااستفزاز : هههه اجل روحي تغطي وتعالي "وطق بالقلم ع الاوراق الي قدامه" استلمي شغل ابوك
أمنية تنرفزت منه وطلعت يحسب مااروح اتغطى الا اروح هه .. وراحت لصندوق الجلالات ولبست واحد وتلثمت .. ورجعت للمطبخ ناظرت سومرا الواقفه عند الثلاجه وتناظر عمر ومسرحه وهو مو منتبه لها : انتِ هيي سوي لي شي اكله لين مااخلص من ذا
عمر ناظرها تجلس قدامه وهي متلثمه عقل طفله والله مالها داعي بس طنش .. ودف الاوراق والملف لها : انا تفاهمت مع ابوي ان انا اكون بالوجه مع الرجال وامري لله اكون بين شغلي وشغلك
أمنية تناظر الورق تحاول تفهم ودها تحارش وتقول ماتبيه بس هي ماتعرف هو اعرف منها اشتغل مع ابوها كثير : وهذول وشو
عمر : نسخه من العقود احتفظي فيهم عندك
أمنية ترجع الاوراق بالملف بدون ماتناظره ..
طوقه وقفت ع باب المطبخ ووراها نجلا لما شافتهم .. رجعت بسرعه وقفلت الباب وتقدمت من أمنية بقهر : ياسلااام وهذي الي تقول مماتبيه ع طول مقابلات بالمطبخ وساره بالمجلس تبين تخربين بيت ولدي زود ماانتِ خاربته خلقه
نجلا استندت ع الباب وهي خايفه ساره تلحقها وتدري ..
عمر : يمه اهدي انا ناديتها عشان الشغل
أمنية وقفت وبيدها الملف وتناظر طوقه : اخرر همي ساره وولدك واشوف جازت لكم نومتي محد صحاني لانها هنا والله لو اني اييش ههههه
طوقه : اييه جازت لنا وياليت تروحين غرفتك ماتطلعين وتفكينا من شرك
أمنية نقلت نظراتها بينهم الثلاثه حتى سومرا ..
عمر ونظرتها وجعت قلبه : يمه الله يهديك أمنية في حالها واشتطيتي عليها من لا شيء
أمنية حست انها بتضعف مع دفاعه عنها وكأنها بتبكي بس لاا .. ناظرت طوقه : افككم شري طيب
ومشت للباب وصرخت ع نجلا : وخرري
نجلا حست ان نيتها شييينه : وش بتسوين
أمنية فتحت الباب بقووه وفصخت جلالها ورمته بعيد وصاارخت بااعلى صوتها : ساااااااارررررااااهه سااااااررره
طووقه لحقت بسرعه تحاول تسكتهاا : اصص انططمي الله ياخذك
عمر واقف بمكانه يناظرها باحتقار مجنونه .. تظنه يخاف من ساره .. رعب اذا شافته عندها هه ههههه غبيه
طلعت ام تركي وساره وامها ووراهم منيره ع مركادها مرعوبين من صراخها وش فيييه..
ام تركي وقفت تشوف طوقه تحاول تسكتها ونجلا واقفه وراهم بصمت : وش فيييه
أمنية لفت تشوف عمر واقف عند طاوله المطبخ ومكتف يدينه لصدره ويناظرها ببرود .. رجعت ناظرت ساره واشرت داخل المطبخ : تعالي خذي رجلك وفكيني منه يطاردني من مكان لمكان وكأني ناقصته
طووقه شهقت : حسسبي الله عليييك تبلين ع ولدي
عمر انصدم من كلامها طلع من المطبخ وشاف ساره تناظره بخذلان ..ولفت بسرعه راجعه للمجلس ومشت امها وراها
ام تركي ناظرت أمنية بقهر : استري نفسك عشان مايطاردك انتِ وهالضيق الي لابسته كاسيات عاريات الله لايبلانا
عمر لف ع أمنية بعصبيه : تبلين علي عيني عينك وامي واختي شايفين اوقح من كذا ماشفت
منيره تناظر ماتعرف كذب أمنية من صدقها من وهي صغيره هذا موالها مع عمر وشكل ايامهم راجعه وبقوه ..
نجلا مسكت ذراع عمر وناظرت أمنية بااحتقار : خلها مريضه
أمنية تقدمت من نجلا بجنون ودفتها مع كتفها بقوه : مييين المريضه هااه
نجلا صرخت بوجع من دفتها واستندت ع عمر القريب منها
عمر كان بيمسك يدها ويوقفها عند حدها تضرب اخته قدامه !!
بس ..
طوقه لفت أمنية عليها وضربتها كف وهي تصرخ : عياالي خط احمررر والله ان اذيتيهم مره ثانيه ماتشوفين خيرر
نجلا شهقت .. وعمر تجهم وجهه وكور يده يضبط اعصابه .. من بقى ماضرب هالخد الناعم ؟
وقدام عيونه بعد .. تنضرب ؟!!
أمنية حطت يدها ع خدها وبدون ماتبكي نقلت نظراتها بينهم .. جدتها عطهم مقفاها وراحت .. وام تركي واقفه وتتفرج بصمت
همست بتهديد : صدقيني بطردكم من هالبيت وترتاحون مني
ومشت عنهم بسرعه طالعه لغرفتهاا ..
دخلت وقفلت الباب وراها بقووه .. صارت ملطشه كل يضرب فيها عارفين ان ماوراها احد
وربي لاتندموون .. حتى الدموع ملت منها هالمره فعلاً
خلاص تعودت ع الضرب
راحت بسرعه للدرج الي احتفظت فيه بااغراض ابوها طلعت جواله ..
جلست ع السرير وفتحته وع طول بحثت عن الرقم الي تبيه "المحامي ذيب"
سجلت الرقم بجوالها واتصلت .. وهي تهدي انفاسها الغاضبه
جاها صوته الرزين : هلا مرحبا
أمنية برسميه : السلام عليكم
ذيب : وعليكم السلام
أمنية : انا أمنية بنت منصور ال.. واحتاج تساعدني
ذيب : حياك الله امري ولك الي تبين
أمنية اخذت نفس : ابي اشتري نص البيت الي بأسم عمي بس هو اكيد يرفض ومو عارفه يعني كيف تكون الاجراءات وشي ثاني بعد
ذيب : تفضلي اختي
أمنية : ابي ارفع قضيه خلع ماابي عمر وانت كنت معهم لما زوجوني بدون مااعرف وهالشي يفيدني صح ؟
*
الساعه 2 ص :
رجع البيت بعد مااشترى لها وجبه وهو ملغي عقله وتابع ضميره .. تذكرها لما تقول لسومرا تسوي لها اكل اكيد جوعانه طول يومها نايمه
واخرتها تنضرب وتروح غرفتها ماتاكل ..
دخل غرفته .. رمى شماغه ع الطاوله وهو يناظر ساعه يده الوقت متأخر والبيت هادي
يحس روحته لها غلط .. لو معه رقمها ع الاقل بس لا كان مستحيل ترد يعرفها
سما باالله وفتح باب غرفته الداخلي وطلع .. يمشي وبيده الوجبه هو مسؤول عنها عمه موصيه عليها .. هل يرضيه ان بنته تجلس بدون اكل .. لا
اجل خلاص اسكت ياعقلي
طلع الدرج وهدوء البيت يخليه يحس بدقات قلبه بكل وضوح .. ناظر باب غرفتها المطرف والنور شغال
تقدم له ودق الباب بشويش وواضح له من الباب الدولاب .. دق ثاني ونفس الهدوء
دف الباب بشويش وطل براسه الغرفه فاضيه .. دخل وهو ناوي يحط الوجبه ع الطاوله .. يمكن انها فالحمام اذا جت تلقاها
حطها ع الطاوله ولف بيطلع .. شافها داخله وحاضنه روب الحمام بقوه والمنشفه مغطيه شعرها .. متروشه وبردانه ..
أمنية شهقت لما شافته بوسط غرفتها : وش تسوي هناا اطلع براااعمر اشر ع الطاوله : انا دقيت ع الباب ومافي احد ودخلت خليت لك الوجبه هنا وطالع اساساً
أمنية تشد روبها وتحمدالله انه واسع وطويل لو حق الصيف مصيبه : ماطلبت منك خذها واطلع ووالله لو تجرأت ثاني وجيت لغرفتي بتشوف شي عمرك ماشفته
عمر يتأملها وكالعاده هالخد احمر : امم جبتها لواحد من العيال وطلع متعشي وتذكرت انك مااكلتي وقلت اعطيك اياها
أمنية تناظره انا ماتكذب علي ياعمر اكشفك بسرعه .. ابتسمت بخبث وبنبره هاديه : طيب شكراً لك
عمر صد عن ابتسامتها وشكلها الفاتن : عوافي
وتحرك متجه للباب بيطلع .. وهي للحين واقفه عنده
أمنية قبل يطلع نادته بشويش : عمر انا ماقصدت اليوم
وسكتت وهي تشوفه يناظرها ويتقدم الخطوه الي بينهم ..
عمر وبصوت واطي : ولا انا راضي بضرب امي لك
أمنية رفعت عيونها له تناظره بدون ماتقول شي
عمر ناظر عيونها شوي وراحت عيونه لخدها الاحمر بتردد ثبت يدينه ع خصرها وقربها منه .. نزل راسه وباس خدها بنعومه .. وظل ثابت يشمها وهي مابدرت منها اي مقاومه
قرب من اذنها وهمهم بشي مو واضح .. حركت يدها الي ترجف وحطتها ع صدره حست بدقات قلبه السريعه .. دفته بشويش ومشاعرها بتعمي عيونها لازم يطلع .. السحر بينقلب ع الساحر
عمر حس بدفتها .. وخر عنها وبدون مايناظرها طلع
وصل لغرفته مثل البرق .. دار فيها وهو يستوعب الي صار ليش يقرب منها ليش يتنازل لهواه
بلل شفاته وهو يحس ريحتها عالقه فيه وخاطره بااكثر ..
ابتسم باارتباك واتجه للباب وفتحه وطلع .. رايح لسيارته يبعد ويتمشى شوي ويعود لعقله .
*
الصباح ..
جالسه ع سريرها وبيدها جوالها تناظر الساعه وهي متأكده انه صاحي عشان الدوام بس متردده ومقهوره المفروض هو يتصل ويراضيها موهي !
صح نجلا علمتها بالي صار وصدقتها لانها تعرف أمنية هذي حركاتها .. بس التبرير مفروض يجي من عمر مو اخته
تأففت واتصلت تقطع ترددها ..
جاها صوته الثقيل : هلا
ساره تعدل جلستها وتضم المخده : صباح الخير
عمر طالع من البيت وبيده مفتاح سيارته فتحها من بعيد : صباح النور ا كنت بتصل وسبقتيني
ساره ابتسمت براحه : ايه وش كنت تبي
عمر : عن الي صار امس .. "رفع عيونه لشباك أمنية بعفويه شافه مفتوح والستاره تتحرك"
ساره تنتظره يكمل بس لما طول بسكوته ..: ايه قالت لي نجلا
عمر ركب سيارته وشغلها وهو يناظر شباك أمنية بقلق فاتحه الشباك في هالجو الباارد !!!؟ : زين
ساره تنرفزت يتكلم بالقطاره : التبرير مفروض يجي منك مو من نجلا عمر اذا ماتبيني قول ترا محد جابرك بس انك تقعد كذا سافهني ابد ماارضاها
عمر : ماني سافهك انا يعني قلت اخليك امس ترتاحين واليوم اكلمك وماادري ان نجلا كلمتك قبلي
ساره شوي وتبكي : اصلاً لو مهتم كان مشيت وراي وبررت لي ع طول
عمر حرك السياره وهو يتنهد : لاتلوميني انا وقتها كنت معصب وطلعت اصلاً ومارجعت الا اخر الليل
ساره : شفت قلت لك هالعوبا مارح تخلينا فحالنا الا تخرب مابيننا شفت كيف تبلت عليك عيني عينك لاتستحي ولا تخاف من احد
عمر : تمام ساره اكلمك وقت ثاني هالحين اسوق رايح الدوام
ساره : تمام بالتوفيق ياقلبي
عمر : وياك
وقفل منها ورمى الجوال بجيبه وهو يفكر .. ياقلبي !!؟
هل فعلاً تشعر بهالكلمه او هم كذا البنات عاطفيات حتى بكلامهم .. تنهد وهو يفكر انه مايحس بأي انجذاب ناحيه ساره يحسها ثقيله ع نفسه
عقله مستوعب هالشي بس مستصعب الخطوه خاصه انها عادي رضت تكمل معه حتى بعد الي صار
يحس انه حقير لما وصل لفكره "يخليها تطفش منه"
وش يعني ياعمر .. رضيت بأمنية !!؟ خلاص بتتبع قلبك وتسفه عقلك والمنطق ..
*
جالس ع الارض ياكل من العريكه الي جابتها جارتهم لشيهانه : ايه يومين وبرجع المدينه ماخلصت شغلي
منيره : اييه وشوو شغلك هذا علمني يارجل
سعود رفع راسه بطفش : ماني بزر تحققين معي خلاص عااد
شيهانه جالسه ع السرير وحاضنه المخده والنوم بعيونها لازم ترجع بيتها صح ان عند امها مرتاحه بس ماتتنهى بالنوم كل شوي قاطعينها .. لفت تناظر سعود الي اكل نص العريكه : هااي بقي لي ترا انا مخليتها اكلها بعدين
سعود : مين مسويها
منيره : جارتنا ام حامد
سعود قفل الحافظه : هذا الشغل السنع مو مثل الي عندي لاطبخ زين ولا وجه زين
شيهانه صحصحت من القهر : اقول احمد ربك طوقه شايله البيت شيل جعله نوم العافيه مسكينه خلها ترتاح
منيره : لو تنام بدري كان هالحين صاحيه بس ماغير هذره ع هالجوال مع خواتها
سعود يرفع يده بتأييد لامه : عز الله انك صادقه خواتها لازم تعطيهم موجز كاامل عن يومنا
شيهانه : مرره مااااشاء الله الاحداث الشيقه بيتنا محور الكون عشان يتكلمون بس فيه
سعود وقف وقاطعها : اقوول ع شحمم "ولف ع امه" بنت منصور نايمه ؟
شيهانه كتمت غيضها فعلاً الله يعين طوقه عليه ..
منيره بقلق : يمكنها نايمه ماشفناها وش تبي فيها
سعود اتجه للباب : ولا شي
شيهانه بعد ماطلع لفت ع امها : لارحت بيتي باخذ أمنية معي مارح اخليها عنده
منيره اخذت الفنجان بتتقهوى : هي لو تلم لسانها محد جايها حتى عمر الي يدافع عنها ماسلم منها وشفتي امس
شيهانه لوت فمها وهي تفكر تدري ان أمنية تتبلا ع عمر .. ماتلومها اكيد بتغار من ساره وتحاول تخرب بينهم الله يستر بس
*
منسدحه ع السرير بالعرض وتناظر السما من الشباك والغيمات البيضا المتفرقه .. مو حاسه ببروده الجو
كل ماتجلس لحالها تحس بنفس الشعور .. عالم اسود كئيب قاعد يسحبها يسحبها يبيها تدخله وتضيع فيه ..
جلست بسرعه : مارح ارجع لذيك الفتره المهلكه لا مااسمح الاكتئاب يموتني لاتفكريين امون لاتفكرين ريحي عقلك
لفت للباب بخوف رغم ان الدق كان هادي .. غمضت عيونها واخذت نفس تهدي اعصابها : ادخل
سعود فتح الباب وبهدوء : السلام
أمنية ماتحركت من جلستها وبهدوء مترقب : وعليكم السلام
سعود سحب كرسي التسريحه ولفه وجلس عليه : كلمني المحامي
أمنية : ايه !؟
سعود : موافق ابيع لك نصيبي فالبيت
أمنية بصدمه : ليه
سعود : وش ليه مو انتِ تبين البيت كله لك خلاص موافق ابيعه لك وابي الفلوس كااش
أمنية عدلت جلستها وفرحه داخليه تكتمها عشان مايستغلها ..
سعود قاطعها قبل تتكلم : وهالبيعه ابيها سر بيننا لين تتم عاد مصيرهم يدرون
أمنية : طيب بس مجرد مايصير البيت كله لي تاخذ اهلك وتدورون لكم مكان تسكنون فيه
سعود وقف : اكيد مارح اسكن عندك
أمنية كتمت ابتسامتها لين طلع وقفل الباب وراه .. وقفت وصارت تنط ع السرير وترقص ع الصامت .. وهي تتخيل كيف بتكون ردة فعل منيره واااه طوقه وربي لااطلع الكف من عيونك ونجيله المريضه هههههههههههههههههه اااه يالشعووورر
جلست بتعب ووخرت شعرها عن وجهها : واخلع عمير ومايصير له حكم علي وينقلعو كلهم من حياتي
رجعت براسها ع ورا وطاحت ع المخدات وغمضت عيونهااا : انا قاادره اعيش بالبيت لحالي قاادره مااخاف مااكتئب
*
ليله خميس ..
وقفت اعلا الدرج وهي تناظر البزارين ماليين الصاله وصايره فوضى .. هذا غير اصوات الحريم من المجلس سوالف وضحك ..
ولااحد معطيها اي اعتبار حتى عمتها شيهانه انشغلت مع بنات خالتها خوات طوقه ونستها
ولاكأن البيت بيتها .. اييه بيتها كله ابتسمت وهي تنزل الدرجات ياهي عندها خبرر قنبله ماصدقت المحامي لما قال لها
اجل عمي سعود متزوج بالسر من ثلاث سنوات وباع لها البيت واخذ فلوسه وهج لحرمته الي عنده منها ولدين وواحد منهم مريض ومحتاج علاج عشان كذا كان محتاج الفلوس ..
هذا انسب وقت افجر القنبله قدام اخت منيره وخوات طوقه وبنات خالات نجيله
وصلت اسفل الدرج وجا ببالها عمر الي طول هالاسبوع ماشافته ولا حاولت تتبحث عنه نفس زمان .. اليوم قالت للمحامي يقوله عن قضيه الخلع الي بترفعها خلاص دام انتهت من البيت الحين تتفضى له
شافت البزارين يجرون لباب البيت : مطر مطرر
بسرعه مشت وراهم وهي مبسوطه .. وقفت ع المدخل تناظر حبات المطر القويه والبزارين يلعبون ويصارخون بحماس ..
طلعت من المدخل وحبات المطر تبللها .. فردت يديها ورفعت راسها للسما والمطر يضرب بوجهها .. غمضت عيونها وضحكت بسعاده .. والبزارين حولها
صارت تدور وهي تضحك وتلعب معهم مبسوطه من جوا الله ي المطرر فعلاً يغسل الروح وينعشها ..
طلع من مجلس الرجال لما سمع اصوات البزارين .. وقف عند الباب وعيونه عليها .. فستانها السماوي القصير يدور معها وشعرها الاسود الطويل تبلل كامل .. ضحكتها .. حركاتها العفويه
لو ماسمع البزارين وهم ينادونها أمنية .. ماكان صدق ان هذي هي .. أمنية المدمنه المجنونه !!؟
الي ماخلو شي شين ماقالوه فيها .. بس يسمع اسمها يشفق عليها .. يذكرها وهي بزر كتله نشاط وذكاء
كانت ماتحبه كل ماتشوفه تقوله "نايف الدب"
تسحب لباب البيت طلع بدون ماينتبهون له وكويس ان الوقت ليل ومطر .. ركب سيارته وارسل لاخته فتون
"حطيت اغراض امي بالمجلس ارسلي بزر يجي ياخذهم"
رفع راسه الا هذا عمر جاي ووقف سيارته ونزل بسرعه بدون ماينتبه له .. تنهد براحه اشوا انه طلع من البيت قبل يجي ويشوفه يناظر زوجته
ضحك : اجل يقولون تزوجها عشان عمه اقص ايدي اذا ماكنت ميت عليها من يشوف هالزين ويخليه هههههههه غير الدلخ تركي
*
عند مدخل البيت
فتون تناظر أمنية بااحتقار بعد مادخلو البزارين عن البرد : هي الي طلعتهم معها فهالبرد المريضه
خزامى واقفه جنبها وتشد الشال الثقيل ع كتوفها : هاااي حجيه ماتحسين البرد
فتون بصوت عالي : ماعندها احساس صدقيني ولا في احد يلبس قصير وكت بالشتا
خزامى ضحكت : هههههه ماتكون أمنية اذا ماطلعت جسمها تموت لو تسترت
أمنية متبلله كلها والمطر صار ينزل بشويش ناظرتهم متنرفزه لازم ينكدون سعادتها .. راحت بسرعه للزرع اخذت من عنده حصى ورمته عليهم : انقلعوو عن وجهي
فتون وخزامى صرخو بخوف وجرري لداخل البيت لاتفلقهم المجنونه ..
*
دخل البيت وهو مايشوف قدامه من العصبيه .. اجل ابوه باع لها البيت لاا وبترفع قضيه خلع
وتتواصل مع المحامي تكلمه يسمع صوتها وتناقشه
وقف لما شافها تاخذ الحصى وترمى ع بنات ودخلو .. اتجه لها بسرعه والشر يطلع من عيونه
كانت معطيته ظهرها شد ذراعها بقوه ولفها عليه : شريتي البييييت
أمنية حست قلبها بيوقف اولاً من وجوده المفاجأ لها والعصبيه الظاهره ع وجهه وصوته ..
وبثبات بدون ماتحاول توخر عنه : حقي
عمر يشد ع اسنانه ويدف كتفها بقوه لورا وهو يتكلم بقووه : وليش ماقلتي لي انااا اناا اخلص امورك الي تبينها كلهاااا مو المحامي باي حق تكلمينه هااه "دفها مره ثانيه وهي تمشي ع ورا وهو يتقدم" هااه رردي باي حق تكلمينه
أمنية تحس كتفها بينخلع من قو دفاته .. وقفت وناظرته بقوه : ابوي يثق فيه رجال محترم وكلمته بااحترام ماكلمته اغازله
صرخت بوجع لما شد ع فكها بيد وحده بقوه شوي ويكسره .. ويادوب طلع صوتها وهي تناظر عيونه الي تناظرها بكره : اتركني
عمر يهز فكها وهو يهمس بشرر : والله والله وهذاني حلفت ياأمنية لو ادري بس انك تواصلتي معه لااذبحه قدام عيونك
أمنية تضرب يده تحاول تبعدها فكها بينكسر لامحال مو قادره حتى تتكلم ..
عمر دفها ع ورا ووخر عنها ويرفع سبابته يهدد : انا علمتك
أمنية اخذت نفس وصرخت عليه وهي توخر شعرها عن كتفها بعصبيه : ماااالك حكم علي انا رح اخلعك تفهممم اخللعك ماااابيييكك
*
نجلا دخلت المجلس بسرعه : الحقوو عمر وأمنية بالحوش يتهاوشون
شيهانه فزت بسرعه هالمره مارح تسمح لهم يأذونها وهي موجوده .. طلعت اول وحده ووراها طوقه وخواتها والبنات الكل بيشوووف الهووشه
عمر يناظرها بحقد : انا الي مييت في هواك ي عيين ابووك كان قلتي لي طلق وابششري بدال هالخلع اناا الي ماابيك انااا "ويضرب ع صدره" انتِ ع ذمتي عشان طلب عمي فقط ولا انا خاطب ومبسوووط
أمنية تحس الم بقلبها تكرهه تكرهه تقدمت له خطوه وبهدوء : طلقني الحيين طيب يله
شيهانه تنزل درجات المدخل بسرعه : عمررر والله ان مديت يدك عليها يااويلك
عمر وأمنية لفو لجهة الصوت وشافو الكل طالع وشيهانه وطوقه وراها يقربون منهم والباقي وقفو ع المدخل متفرجين ..
طوقه : وش بعد متبليه ع ولدي هالمره يالعوبا
أمنية ناظرت جدتها الي تنزل درجات المدخل بشويش وابتسمت بشماته هذا وقته : ولدك مقهوور عشان ابوه باعني نصيبه من البيت هالبيييت بيت ابووي والحق رجع لاصحابه الحمدلله
عمر تقدم لها بسرعه وقفل فمها بيده بقوه ويناظرها بقوه وهمس خايف ع امه : لاتكمليين انطمي الله ياخذك
أمنية تتحاول توخر يده وترفسه برجولها وتدخلت شيهانه : وخرر عنها اقولك وخرر كتمتها
منيره : وشوو وش تخربط هالمجنونه باع عليها البيت !!!
عمر وخر يده وغصب عنه ناظرها برجا وعيونه تتكلم " لاتكملين لاتجرحين امي قدام هالمتفرجين "..
شيهانه حضنت أمنية الي يادوب تتنفس : بسم الله علييك خذي نفس
أمنية صدت عن نظرته .. وناظرت طوقه باانتصار : زووجك ياحلووه متزوج عليك من ثلاث سنوووات وعنده ولدييين هههههههههه
طوقه ضربت صدرها : وشوو
الكل شهق من هالخبرر وعلت الاصوات ..
عمر راح لامه : يمه لاتصدقينها
أمنية تقاطعه من وراه وهي تضحك : تكذب ع امك ياعميير
شيهانه : اسكتي وش الي قاعده تقوليه عمررر صددق ؟؟
طوقه تناظر عمر برجا
عمر حضن امه وماقدر يقول شي حتى هو مصدوم لما قاله المحامي للحين مااستوعب سوات ابوه ..
منيره : كذاااببه شلون يبيع عليك البيت
أمنية تقاطعها بقووه : بييييتي هذا الي انتِ عايشه فيه بيتي ولدك باع لي نصيبه وهج بالفلوس عند زوجته وعياله يااعمري يقول ولده الصغيرمريض ادعي له يالجده الحنونه
طوقه تبكي بحضن عمر : سوود الله وجهه سوود الله وجهه هذي اخرت صبري يتزوج علي ويبيع حلال عياالي تفوو عليه
ام منيف : قوومي ياام عمر لمي اغراضك وامشي معي مالك مكان بهالبيت
منيره جلست ع الارض تستوعب المصيبه .. شلون خذلها سعود وتركهم لمذله بنت منصور وهو ادرى الناس فيها
شيهانه وخرت عن أمنية وراحت لامها : بسم الله عليك يمه قومي معي داخل ارتاحي
طوقه ناظرت أمها : اييه بروح معكم مالي مكان بهالبيت "وناظرت عمر" وانت كلم هالخسيس وقله ورقه طلاقي تجيني بااسرع وقت
صرخت نجلا الي كانت تبكي بوسط البنات الي يهدونها : لاا تكفيين يمه لااا
أمنية وبقلبها خوف كبير من عمر .. تحركت بثقه مصطنعه لمدخل البيت بتنحاش قبل يمسكها .. وناظرت الي واقفين عند المدخل وبالذات فتون وخزامى : وانتم برا من غير مطرود
ودخلت بسرعه وجررري ع غرفتها توها تحس بالبرررد
*
حاولت توقف بس مافيها حيل رجعت جلست وانسدحت بتعب .. جسمها كله مكسر وتحس الجو باارد مووت وحلقها يوجعها
ااه مو وقتها الحراره .. غمضت عيونها وهي تتذكر امس عمر قعد يدق ع باب غرفتها ويتحلف لها وهي مطنشته
ماتدري وش صار بعدها
وغصب عنها تحس بالخوف من عمر لانها اخبر الناس فيه اذا عصب ماعنده ياامي ارحميني
كان صوته وهو يدق الباب امس مررعب ماتدري وش كان بيسوي فيها لو فتحت له الباب .. بس الي تعرفه ان عمر من كبر ماقد مد يده ع بنت.. يكسر يصارخ يعاقب بس مايضرب يمكن لانه عانى كثير من ضرب ابوه له
اووف انا وش قاعده افكر انا تعبانه بردانه اررجف لو اموت محد اهتم فيني .. محد يحبني .. انا لحااالي
سحبت جوالها من تحت المخده .. ودخلت ع رقم عبدالرحيم الي سجلته من كم يوم من جوال ابوها .. كان بتكلمه بس هونت
بس الحين لازم ..
كتبت ..
" السلام
انا أمنية الي محسوبه عليك اخت
انا احتاجك اكثر من اي وقت مر لو ماجيت صدق بنسى هالاخوه ولااعترف فيها بيوم "
واتصلت ع سومرا ..
سومرا : هالوو
أمنية وصوتها رايح : وين عمر
سومرا : مافي موجود
أمنية : انا تعبانه سومرا سوي لي شوربه وهاتي لي بنادول وليمون
سومرا : تمام
أمنية قفلت منها وشافت رد عبدالرحيم استغربت السرعه
" وش صاير معك "
أمنية
" اذا جيت تشوف "
عبدالرحيم
" ابشري بس اتفاهم مع ابوي اول واخذ اجازه "
أمنية
" شكراً "
*
نهايه الجزء الرابع ..