رواية اسيرة البدر - الفصل 29 - مكتملة | روايتك

.:. التكمله .:. .:. حست الدانه بالسعاده ليش ان بدر ليما الحين متذكر صوتها ومو ناسيه مثل ما كانت معتقده .:. نست الدانه نفسها : مثل ما قلت .. اكيد تشابه بالصوت .. لاني اول مره اشوفك يا البدر وبسرعه حطت ايدها على حلجها : ابيه !! انا شلون قلت البدر !! انصدم البدر وبحلق بعيونه : اشقلتي ؟؟ توهقت دانه وما عرفت شتقول : ما قلت شي انا .. شقلت ؟ بدر : امبله الشيخه قلتي اسمي .. والشي المحير بالسالفه لما قلتي انج اول مره اتشوفيني ! عيل من وين عرفتي اسمي ؟ ارتبكت دانه : يمكن تكون مجرد صدفه او زلة السان !! ما اقتنع البدر : مستحيل تكون مجرد صدفه او زلة السان مثل ما تقولين .. اشمعنى قلتي اسم البدر بالذات ؟ حست الدانه انها تبي تشرد : اناا .. انا لازم امشي الحين .:. وبسرعه مشت .. لكن البدر مسك ايدها بيوقفها .:. سالت بخوف : اشفيك يا انت ؟ هد ايدي مو جدام الناس عيب عليك .. ليش ماسكني بالطريقه هذي ؟ اصلا من سمح لك انك اتجيسني ؟ .:. حس بدر انه دفش باسلوبه هذا .. وبسرعه شل ايده منها واعتذر .:. بدر ( باسف ) : اسف .. نسيت نفسي .:. ومشى بعدها مخلي الدانه وراه .. وهو بهاللحظه كان يفكر بالدانه .. ليش ان هالبنت ذكرته وايد بالدانه .. وهو ما يدري انها نفسها اسيرته .. الدانه بنت عمه .:. .:. تمت دانه بمكانها وعيونها تناظر بدر ليما اختفى .. تنهدت بعدها ومشت راده السياره .. الحمدلله ان الموقف عدى على خير .. هذا اللي قالته الدانه .. ركبت السياره من بعدها راده البيت وهي تخطط للقاء الثاني اللي ممكن يجمعها بالبدر .:. *************** قلت لك طلقني !! اشفيج انتي ؟؟ مينونه ؟؟ مو صاحيه ؟؟ شاربه شي ؟؟ اطلقج عشان سالفه ما تسوى ؟؟ كل هذا عشان سلوى واللي قالته بالمحكمه ؟؟ غدير ( بعصبيه ) : اي نعم عشانها ! خليفه : اشفيج انتي ما تفهمين ؟ الف مره اقولج وللمره المليون ان ما بيني وبينها شي .. انتي ليش مو راضيه تصدقين ؟ ما اقتنعت غدير : مستحيل ما يكون بينكم شي .. انا شفت بعيني نظراتك لها واحنا بالمحكمه هذاك اليوم .. اشكره مهتم لها تنهد خليفه : والله العظيم ما بيني وبينها شي .. بليز افهمي يا غدير وارحميني عااد .. واذا على النظرات تراها من الصدمه على اللي قالته عن الحب وبس سالت غدير متنرفزه : وعاد انت شكلك ما صدقت على الله ان اكو بنت اتحبك عدل ؟ مسك خليفه اعصابه : غدير انجبي ولا تكلميني بهالطريقه .. شنو شايفتني ان شالله ؟ ابو البنات عشان ما اصدق عالله انهم يحبوني ؟؟ تذمرت غدير : ما ادري عنك .. اسال نفسك هالسؤال هذا ! وتذكر شلون كانت نظراتك لها .. على قولتك نظرات الصدمه ! والله يا خوفي تكون نظرات الحب وانا ما ادري !! انفجرت اعصاب خليفه : قلتلج انجبي !! بقره انتي ما تفهمين ؟ يعني تبين الواحد غصب يغلط عليج ؟ .:. وبسرعه طلع بره الدار بعد ما خبط بالبيبان بقوه .. عصبت غدير من قلب ورمت بالكاس اللي كان على الطاوله وانكسر وتناثر الزجاج بزوايا الدار .:. دخل خليفه على امه معصب : يمه وينج ؟؟ تخرعت امه وسالت : عسى ما شر ؟ اشفيك ؟ رد متشتت : يمه .. انا بطلق غدير انصدمت امه : شنو ؟ استخفيت انت ؟ *************** .:. توها راده البيت .. دخلت دارها وسكرت الباب وقطت بنفسها عالسرير .. كانت تفكر لو اطرش له مسج من موبايلها او تتجاهل .. بس حست ان هذا اهو الوقت المناسب للمسج .. مسكت موبايلها وكتبت له المسج .:. .:. توه البدر طالع من سوق واقف وراكب سيارته الا يسمع نغمة المسج .. مسك موبايله بيشوف منو اللي مطرش له وما استوعب لما شاف رقم الدانه .:. بدر ( بلهفه ) : ما اصدق انا ! واخيرا طرشتي شي يا الدانه ؟ .:. وبعدها .:. فتح المسج يقراه : هلا ولد عمي شلونك ؟ ان شالله تكون بخير ؟ اكيد انك تتسائل انا وين كنت ؟ وليش فجاه اختفيت ؟ الصراحه كانت عندي اسبابي .. انا بس حبيت اسالك لو كنت فاضي باجر عالساعه 7 بالليل ابيك اتمر بيتنا .. بغيتك بشغله ما عليك امر تشقق البدر من الوناسه : اكيد بمر يا الدانه .. وحتى لو ما كنت فاضي بفضي نفسي عشانج وكتب لها بمسج : من عيوني يا الدانه .. ان شالله باجر عالساعه 7 اكون عندج *************** .:. ابيت بوخليفه .:. سالت ام خليفه مو مقتنعه : اشدعوه بطلق غدير عشان سالفة سلوى ؟ يعني معقوله هالشي يا خليفه ؟ رد خليفه : هذا اللي اهي تبيه ومو انا ام خليفه : مستحيل غدير تفكر بالطريقه هذي !! خليفه : والله اذا مو مصدقتني روحي اساليها .. شكها ان بيني وبين سلوى شي اهو اللي خلاها تطلب الطلاق استفهمت امه : وليكون بينك وبين سلوى شي ؟ تنهد خليفه : يعني بالله عليج شنو بيكون بينا يا يمه ؟ لمجرد ان سلوى قالت بالمحكمه انها اتحبني معناته ان اكو شي من بينا ؟؟ ام خليفه : مو هذا هو المهم الحين .. المهم انك تنسى فكرة الطلاق موليا .. اعنبو توكم متزوجين من شهر بس .. واذا على غدير خلها علي انا تنهد بضيق : اللي تشوفينه يمه *************** .:. بهاللحظه كانت غدير رايحه لبيتها .. كانت تبي تشوف سلوى عشان تحقق معاها وتسوي سالفه من ولا شي .. ولما وصلت بسرعه نزلت من السياره ودخلت البيت رايحه لدار سلوى .:. فتحت عليها باب الدار بقوه : وينج يا ام الريايل ؟؟ تخرعت سلوى والتفتت لها : بسم الله الرحمن الرحيم .. خرعتيني يا غدير !! وسالت مستنكره : وشنو هذي ام الريايل ؟ هذي ثاني مره تقولينها لي .. عيب عليج .. والله العظيم عيب عليج تمسخرت غدير : يا سلام يا سلام على البنت الشريفه يا سلام .. انتي تعرفين العيب ؟ المره الاولى لعبتي على ابوي المسكين ليمن اغريتيه وحاول انه يعتدي عليج .. والحين قاعده وتلفين على خليفه عشان تخطفينه مني !! استنكرت سلوى هالكلام : كل الكلام اللي قلتيه باطل يا غدير ضحكت غدير بسخريه : سكتي ولا تسوين روحج مثاليه .. انتي من عمايلج حتى ابوج تبرا منج وقالت بجديه : شوفي يا بنت الناس .. هذا لو كنتب بالفعل بنت ناس .. انا يايه اقولج شي وارد البيت .. ابتعدي عن خليفه احسن لج تضايقت سلوى من هذا كله : تطمني حبيبتي ما بيني وبينه شي .. واذا على الكلام اللي قلته بالمحكمه اعتبريه شي من الماضي شافت غدير سلوى بحتقار : ودي اصدقج باللي تقولينه يا الحقيره بس للاسف ما اقدر ادمعت عيون سلوى : الله يسامحج يا غدير ردت غدير بقسوه : اكره دموع التماسيح قربت سلوى من غدير ومسكت ايدها بالم : ليش صار كل هذا ؟ كنا من احسن ما يكون .. عايله وحده متفاهمه كلن يحب الثاني .. وفجاه افترقنا لاسباب انا استنكرها ! اسحبت غدير ايدها بقوه : اذا انتي استنكرتيها فانا ما اقدر استنكرها .. انتي السبب الاول والاخير باللي صار واللي قاعد يصير .. لو ما اغريتي ابوي من البدايه ما كان بيصير كل هذا سلوى : للمره المليون اقولج انا ما اغريت ابوج .. اهو اللي دوم كان يتحرش فيني والله .. يعني ما شفتي الفيديو المسجل بالموبايل ؟ ما سمعتي الكلام اللي دار بينا ؟ ما كان دلليل كافي لج على ان ابوح اهو السبب ؟؟ .:. ما عرفت غدير شتقول وسكتت .:. استفهمت سلوى : ليش سكتي ؟ اشوف ردي .. قولي شي ! سالت غدير بلا مبالاه : وشتبيني اقولج بالله ؟ كل اللي عندي قلته ردت سلوى : قولي ان الحق معاي انا وانج ما تبين تقتنعين بالشي هذا .. قولي انج معصبه علي ليش اني احب خليفه ومو عشان مقتل ابوج .. قولي كل هذا ! ما اهتمت غدير : ما ابي اقول شي .. ومثل ما قلت لج كل اللي عندي قلته .. وللمره الاخيره اقولج ابتعدي عن خليفه احسن لج .:. وبعدها طلعت بره الدار راده البيت .. حست سلوى بالضيق الشديد .:. سالت نفسها بحزن كبير : ليش يا غدير مو راضيه تستوعبين ان انا مالي خص بشي وان القدر اهو السبب بكل شي ؟ *************** .:. عالساعه 2 الفير .:. .:. ابيت بوخليفه .:. .:. كان خالد رايح المطبخ عطشان بيشرب ماي .. واستغرب لما شاف ان باب المطبخ الخارجي مفتوح .. طلع منه ليما وصل الحوش .. مشى شويه وشاف ان باب البيت الحديد هم كان مفتوح .. تخرع وارتبك وحس ان اكو حرامي بالبيت .. مشى بخطوات خفيفه بزوايا الحوش ليمن سمع صوت شي يتحرك بالمخزن اللي بره ! مسك نعال بيده لوول يعني سلاح وسم بسم الله وبسرعه فتح باب المخزن ومد بيده سيده وهو ماسك النعال .:. صرخت نجلا متروعه من قلب : بسم الله الرحمن الرحيم .. ياك الموت يا تارك الصلاة انصدم خالد وهو يشوف نجلا : نجلوه ! انتي شتسوين عندج بالمخزن ؟ وشله بيبان البيت امشرعه ؟ نطقت وهي ترتجف : انا بس كنت انا .. صرخ معصب : انتي شنو ؟؟ .:. وفجاه .:. سمع خالد صوت من وراه يسال : عسى ما طولت عليج حبيبتي نجلا ؟؟ انصدم خالد وهو يشوف نجلا : نجلوه ! انتي شتسوين عندج بالمخزن ؟ وشله بيبان البيت امشرعه ؟ نطقت وهي ترتجف : انا بس كنت انا .. صرخ معصب : انتي شنو ؟؟ .:. وفجاه .:. سمع خالد صوت من وراه يسال : عسى ما طولت عليج حبيبتي نجلا ؟؟ *************** .:. ابدار خليفه .:. .:. كان خليفه منسدح على السرير ما ياله نوم .. اما عن غدير كانت قاعده على الكرسي امجابلته وهم ما ياها نوم .. كانت اتفكر تكلم خليفه وتعتذر منه .:. سالت مستفهمه : نمت يا خليفه ؟ رد وهو مغطي نفسه باللحاف : ليما الحين .:. وبعدها .:. قامت من الكرسي وقربت يمه .. قعدت على السرير بتردد .. كانت ناويه تعتذر له .:. مسكت ايده بشويش : انا اسفه حبيبي ما عبرها : بعد شنو ؟ تضايقت وسالت : يعني شنو الحين ؟ ما راح اتسامحني ؟ التفت صوبها وسال : مو انتي مساعه طلبتي الطلاق ؟ ردت متحسفه : غيرت رايي استفهم خليفه : وشاللي غير رايج ؟ غدير : حسيت ان السالفه ما تسوى ومساعه انا كنت معصبه ونسيت نفسي سال خليفه : افهم من كلامج انج عقلتي واهم شي واثقه فيني ؟ غدير : اكيد ما اقتنع خليفه : متاكده ؟ كررت غدير : اكيد سال خليفه يجيس النبض : يعني عادي عندج احب سلوى ؟ انصدمت وما استحملت : شنو ؟ اتحب سلوى ؟ هذا معناته ان شكي كان ابمحله .. انت تحب سلوى وهي تحبك ؟ تنهد خليفه ولف ويها عنها : اقول غدير .. تصبحين على خير *************** .:. ومجددا بالمخزن .:. التفت خالد وراه وشاف بنت ضخمه واقفه جدامه وما كانت فيها اي انوثه .. بختصار كانت مسترجله .:. التفت لنجلا وسال بعصبيه : انتي اتواعدين لج بنات مسترجلات بالبيت يا الحيوانه ؟ .:. وفجاه .:. تليقفت المسترجله : هيه انت .. لا اتغلط على حبيبتي لا اغلط عليك تعجب خالد وما قدر يمسك الضحكه : شنو قلتي ماما ؟ حطت المسترجله بيدها على كتف خالد بجديه : بلا هالمسخره هذي يا انت .. وترى انا اكلمك من صجي وما اتغشمر معاك تنرفز خالد وشل ايدها بقوه : وقسم بالله لو ما كنتي بنت جان طيرتج وعدمتج بيدي استفهمت المسترجله : بنت ؟ ليش انت تشوف ان اكو بنات اهني غير نجول ؟ شافها بحتقار : الحمدلله والشكر على نعمة العقل والله والتفت لنجلا بنظره : وانتي بسرعه انجلعي داخل ودواج عندي بعدين تليقفت المسترجله مره ثانيه : هيه انت .. انا شقلت لك ها ؟ شكلك نسيت ؟ للمره الثانيه اقولك لا اتغلط او اتفكر انك اتهدد حبيبتي .. فاهم ؟ مسك خالد اعصابه على كثر ما يقدر : اقول نجول قولي لها تسكت او والله بقوم البيت كله وبكبر السالفه .:. تخرعت نجلا وبسرعه قربت من المسترجله .:. مسكت ايدها بحنيه : ايمان حبيبتي .. انتي امشي الحين وانا ان شالله بكلمج بعدين .. بليز فديتج ما ابي مشاكل مع اهلي تنهدت ايمان : ان شالله حبيبتي من عيوني .. وكل هذا عشانج انتي بس .. ولو الود ودي اسطر اخوج والله .:. انصدم خالد من هالكلام .. اشكره عيني عينك اتقول جذي بلا حيا ولا مستحى .. والله ان الدنيا تدمرت للاسف وهالبنت قوية عين .. والمصيبه انها طالعه هالحزه من البيت واهلها مو دارين عنها بشي .:. .:. وبعدها .:. .:. مرت ايمان من يم خالد متعمده وطلعت من الباب الحديد راده لبيتها .:. سحب خالد نجلا من ايدها : انجلعي جدامي بسرعه ارتعشت بخوف : خالد لا تتهور وتسوي فيني شي .. انا حلفت لو مديت ايدك علي مره ثانيه بسجنك !! رماها عالكرسي معصب : انا ما ابي الطخ ايدي بوحده حيوانه مثلج .. بس والله يا نجلوه لو كررتي هالسواة مره ثانيه ما اتلومين الا نفسج ! وصرخ يسال : فاهمه ؟ ارتجفت ونطقت : اي فاهمه *************** سحبت منه اللحاف بعصبيه : شلون لك نفس تنام بعد الكلام اللي قلتلي اياه من توك ؟ اتحب سلوى وهي هم اتحبك ! وقاعدين انتوا الاثنين تلعبون من وراي ؟ وسالت بصرخه : ما اتقوم ؟ ما تتكلم ؟ ما تقول شي ؟ .:. وبعدها .:. قام من السرير امفاور : انا كنت اجيس نبضج بالثقه يا المتخلفه وللاسف طلعتي مو مالت ثقه تعجبت غدير وانصدمت : تقولي متخلفه يا خليفه ؟ طقت جبد خليفه : متخلفتين بعد مو متخلفه .. ولو سمحتي شيلي ايدج من مخدتي انا بنام بالصاله .. بلا عوار راس بلا بطيخ تضايقت غدير : بتنام بالصاله وبتخليني بنفسي ؟ ما اهتم خليفه : بلعنه انصدمت : بلعنه !! .:. ما رد عليها وسحب قشه عشان ينام بالصاله .. انقهرت غدير وحست ان خليفه قاعد يضيع منها تدريجيا وهي السبب .:. *************** .:. بالبنك .:. .:. بشغل نايف .:. .:. كان مخلص شغله وقاعد بالمكتب لا شغل ولا مشغله وكانت ليلى معاه .:. تنهدت ليلى : ملل حط نايف ايده على خده : مللين بعد مو بس ملل .:. وبعدها .:. اقترحت ليلى : اشرايك نطلع للكوفي نشرب لنا نسكافيه ؟ رد نايف : ما ينفع يا ليلى .. بيخصمون من راتبنا لو طلعنا الحين تذمرت وسالت : اشمعنى المدير العام يطلع ويدخل على كيفه ؟ نايف : من اسمه .. المدير العام سالت ليلى : وشنو يعني ؟ مو انسان حاله حالنا ؟ .:. وفجاه .:. انتوا الاثنين شتسون ؟ وليش هالسوالف ؟ خلصتوا شغلكم ؟ التفتت ليلى للصوت وارتبكت : المدير العام !! *************** يمه .. ترى بدر ولد عمي بيزورنا اليوم بالبيت ان شالله .. لو يه دخلوه الميلس وناديني استفهمت ام الدانه : وشعنده ولد عمج بيزورنا ؟ مو من عوايده دانه : انا اللي طلبت منه انه ايي سالت امها مستفسره : وليش ان شالله ؟ ليكون عشان يشوفج بعد العمليه ويتعجب ؟ ابتسمت دانه : عليج نور يمه .:. ساعات قليله بس تفصل الدانه عن لقائها بالبدر .. شبيقول بدر لما يشوفها ويكتشف انها نفسها البنت اللي شافها بسوق واقف امس ؟ شلون بتكون ردة فعله ؟ كل هذا بيبين لما تصير الساعه 7 بالليل .:. *************** اي نعم .. هذا انا المدير العام .. ممكن اعرف شتسون ؟ او شنو سبب هالسوالف هذي ؟ ترى واصلتني شكاوي عليكم من موظفه معانا بالبنك .:. سكتت ليلى .. وعرفت اهي ونايف منو هالموظفه اللي مشتكيه عليهم .. اهي نفسها البنت الملقوفه اللي دوم تتجسس عليهم .:. سال نايف مستفهم : ومنو هاللي مشتكيه علينا ؟ وعلى اي اساس تشكتي ؟؟ رد المدير : على اساس انكم قابلين المكتب لمسخره تعجب نايف : مسخره !! المدير العام : انت فاهمني يا نايف ما استحمل نايف هالكلام : اي نعم فاهمك .. وفاهمك عدل بعد .. بس انت غلطان واشر على ليلى : هالبنت اللي اتشوفني 24 ساعه معاها ضحك وسوالف اتكون اختي يا المدير ما استوعب المدير : اختك ؟؟ نايف : اي نعم اختي .. واذا حاب تتاكد شوف الاسم تنهد المدير : ماكو داعي اشوف شي .. والسموحه منكم .:. الموظفه الملقوفه كانت ورا باب المكتب وسمعت الكلام اللي دار .. انصدمت وبالوقت نفسه تفشلت ليش انها حطت نفسها بهالموقف المحرج .:. *************** .:. ابيت بوبدر .:. .:. مرت سلوى من دار بدر وسمعته يغني بصوت عالي وكان مشتط .. ضحكت سلوى ليش انه ما يعرف يغني .:. تليقفت ومن ورا الباب سالت : شعنده البدر مستطرب ؟ وقالت بقلبها بضيق : وهذا وته ابوك ميت وانا السبب رد بحماس : هلا سلوى .. تفضلي .. دخلي الدار فتحت سلوى باب الدار مستفهمه : اشفيك ؟ شكلك اليوم مستانس ؟ رد بابتسامه : بشوف اسيرتي اليوم عالساعه 7 بالليل ان شالله استفهمت سلوى : تقصد الدانه ؟ بدر : عليج نور سالت سلوى : وينها طول هالمده ؟ وين كانت مختفيه ؟ بدر : اعتقد انها كانت مسافره .. بس وين ما ادري والله سلوى ( تسال ) : اقولك شي بس ما تزعل مني ؟ بدر ( بابتسامه ) : هلا امري .. ان شالله ما ازعل سلوى ( بتردد ) : ما يامر عليك عدو بس .. سال مستفهم : بس شنو ؟ تنهدت سلوى : الصراحه الدانه بنت عمك جاسم ما تستحي استغرب بدر هالهجوم : شكو الحين ما تستحي ؟ مو من كم يوم بس كنتي تقولين عنها مسكينه لانها اتحبني .. والحين تقولين ما تستحي ؟ سلوى : اللي اقصده انها شلون سافرت بهالظروف الصعبه ؟ شي محير استنتج بدر : مو يمكن عندها اسبابها ! ما اقتنعت سلوى : مهما يكون السبب كان المفروض انها تحظر الجلسه وتنهدت بضيق كبير : انا اسفه اني ذكرتك بالجلسه ومقتل ابوك .. سامحني ابتسم بدر : مو مشكله *************** مستحيل .. مستحيل .. مستحيل .. ليش عاد يا ام فواز تقولين مستحيل ؟ طيعيني وصدقيني ان هالسفره بتخليه يصير ريال ما اقتنعت ام فواز وتمت على رايها : ريال يكون او بنت ما يهمني .. انا بس ما ابي ولدي يسافر عني .. مستحيل .. الصراحه ما اقدر .. اخاف عليه .. وبثم احاتيه بالثانيه حاول بوفواز يقنعها : بس هو ما بيكون بروحه .. بيكون مع مجموعه من شباب المعهد .. فماله داعي تخافين عليه وهم ما اقتنعت : حتى ولو .. انا قلبي مو متطمن .. وقلب الام دوم يكون على حق .. اذا بقطر وهو يسوي سوالف بطاله .. شلون لو سافر لندن ؟ والله بيتدمر ! تنهد بوفواز : ترى خوفج هذا هو اللي بيدمره ومو السفر تذمرت ام فواز : انت اشفيك ؟ ها ؟ ليش تبي الفكه من ولدك ؟ حاول فواز على كثر ما يقدر انه يفهمها : ما ابي الفكه منه يا مره .. رجاءا افهمي .. انا بس ابيه يعقل ويصير ريال !! عصبت ام فواز : انا قلت لك ما ابيه يسافر !! يعني ما ابيه يسافر .. وسبق اني قلت لك مستحيييل هالشي !! *************** .:. ابيت بوالدانه .:. .:. كانت الساعه 3 العصر .. يعني 4 ساعات بس وبيشرف البدر للبيت .. كانت فاتحه الكبت ومن الحين تدور شي تلبسه .. طلعت لها تنوره سودا وبلوزا بيضا مخططه بالاسود .. كانت راقيه وناعمه .:. .:. وبعدها .:. شافت نفسها بالمرايا بابتسامه : ما اعتقد اني محتاجه للمكياج .:. وانسدحت عالسرير مستانسه وتمنت من الله ان هالسعاده تدوم للابد .:. See u