الفصل 23
الحلقة 23 .:[/COLOR].[/color]
.:. ابيت بوالدانه .:.
.:. دخلت الدانه البيت واهي ميته من الصياح .. تشهق مثل الياهل .. شافتها امها وتخرعت .:.
ام الدانه ( تسال بخوف ) : يما الدانه اشفيج ؟؟ اشصاير لج ؟؟
شافت الدانه امها بغضب : انتي وابوي السبب !! وانا اكرهكم .. اكرهكم
ما افهمت امها شي : انتي شقاعده اتقولين ؟؟
قربت الدانه من امها تسال بالم : انتي ليش يبتيني اخرع واشبه الجياكر ؟؟ ما اتقولين لي شنو استفدتي الحين من هذا ؟؟
استغربت امها : دانه انتي اشفيج ؟؟ شصاير لج ؟؟ اكو شخص ضايقج او سوالج شي ؟؟
صاحت الدانه بنهيار : الناس دوم يضايقوني بكلامهم وانا انجب واسكت .. بس هالمره غير
وكررت واهي اتصيح : هالمره غير .. هالمره غير يا يمه .. والله غير
امسكت امها ايدها بحنيه وسالت : شلون يعني هالمره غير ؟؟
نزلت الدانه راسها بياس وسالت : يمه .. انتي اتعرفين ليش انا رفضت البدر ؟؟
ام دانه : مو على قولتج لانج استخرتي وما ...
قاطعتها دانه : مو هذا السبب يمه
استغربت امها : عيل ؟؟
***************
.:. ابيت بوبدر .:.
صرخت سلوى واهي ماسكه سماعة التليفون تسمع الخبر : عميييييييييي .. يمااا .. اموون .. نااايف .. غدييير .. الحقوا علييي .. البدر امسوي حااادث واهو بالمستشفى الحييييييين !!
.:. الكل تخرع من سمع الخبر .. لدرجة ان امنه طاحت وهي تركض من على الدري .:.
سالت امنه واهي حاطه ايدها على ريولها اتعورها من الطيحه : شنو هاللي سمعناه يا سلوى ؟؟
وقرب بوبدر يسال : سلوى .. انتي شقاعده اتقولين ؟؟ انتي متاكده ؟؟
وتخرع نايف : شسالفه سلوى ؟؟ منو المتصل وقايلج هالخبر ؟؟
ادمعت عيون سلوى : اي متاكده وتوهم متصلين من المستشفى وقايلينلي
ما استحملت غدير وصاحت : وباي مستشفى اهو الحين ؟
سلوى : اكيد بحمد .. قسم الطواري
.:. وبعدها .:.
صرخت غدير : عيل اشتنطرون ؟؟ بسرعه خلونا انروح له !!
***************
انتي اشقاعده اتخربطين ؟؟
يمه .. انا مو قاعده اخربط .. هذي الحقيقه .. انا احب البدر وابيه .. ومثل ما قلتلج انا كنسلت الملجه بسبب رسالته .. بدر كان مغصوب علي يا يمه !!
سالت امها مستفهمه : والرساله ليمن الحين عندج ؟؟
دانه ( تسال ) : وليش تسالين ؟؟
ام دانه : سلامتج بس مجرد سؤال
.:. حست دانه ان امها تبي الرساله عشان اتوريها ابوها وعشان ابوها يعطيها لعمها بوبدر وبعدها بتبدا المشاكل .:.
ردت دانه باسف : للاسف يمه .. انا شقيتها
وقالت بقلبها : سامحيني يمه .. بس مهما يكون ما اقدر اعطيج الرساله
.:. وفجاه رن تليفون البيت وراحت امها اتشيله .. كانت الدانه واقفه ابمكانها بالم وحسره .. وكانت كلمات البدر القاسيه مطبوعه ابفكرها .:.
.:. وفجاه .:.
صرخت ام الدانه متخرعه : متى ؟؟ وشلون ؟؟
التفتت الدانه تسال : شسالفه يمه ؟؟ اشصاير ؟؟ عسى ما شر ؟؟
شافتها امها بحزن : هذا عمج بوبدر .. متصلنا يقولنا ان البدر سوه حادث من توه واهو الحين بالمستشفى !!
انصدمت الدانه وطاحت من طولها : البدر !!
صرخت امها متخرعه : اشفيج يا الدانه ؟؟ اشفيج يا يمه ؟؟
***************
لعايله كلها تقريبا متجمعه بالمستشفى بعد ما سمعوا هالخبر .. غدير وامنه كانوا قاعدين على اعصابهم .. بوبدر الوحيد اللي كان ماسك اعصابه .. داليا كانت تنتظر رد الطبيب مع سلوى .. ونايف كان يدور يمين ويسار ناطر البدر يقوم بالسلامه .. بوخليفه وبوفواز كانوا واقفين مع ابوهم العود ينتظرون رد الطبيب .. اما بالنسبه لبودانه ليما الحين ما وصل له الخبر .. خالد وخليفه وفواز هم كانوا بالمستشفى بستثناء نجلا .. نور ولميا .:.
.:. وبعد نصف ساعه تقريبا من الانتظار .:.
ابتسم الطبيب يطمن : الحمدلله اهو بخير .. مجرد كسر باليد اليسار ورضوض بجسمه ان شالله تتعافى .. اما بالنسبه لراسه وجسمه الحمدلله والله احفظه من الشر .. لكنه يتم عندنا يومين عالاقل عشان نتطمن عليه اكثر
.:. الكل ارتاح وتطمن من سمع هالخبر .. بوبدر تنهد وشكر ربه ومن الرغم من قساوته الا ان دمعه من عيونه انزلت .. غدير صاحت من السعاده وكان خليفه يهديها .. سلوى رفعت ايدها للسما تشكر الله .. امون ناقزت بالمستشفى مستانسه .. فواز غمز لامه وعطاها بوسه بالهوا .. نايف ابتسم وتحمد الله .. ما بقى احد الا واستانس من هالخبر ..
***************
.:. بعد ما طاحت الدانه من سمعت خبر البدر تخرعت امها عليها ونقلتها لدارها وسمت بالرحمن عليهاوشربتها ماي .:.
قامت الدانه من السرير متخرعه : البدر ! وينه البدر !! اشفيه البدر ؟؟ اهو بخير ؟؟ ابي اشوفه .. ابي اكلمه .. ابي اتطمن علييه
وبعدها امسكت ايد امها تترجى : عفيه يمه خلينا انروح له المستشفى نتطمن عليه
ام دانه ( اتحاول اتهديها ) : ان شالله انتي بالاول نامي وارتاحي وبعدها انروح له ونشوفه
صرخت الدانه مصره : ما ابي انام ولا ابي ارتاح .. كل اللي ابيه اني اشوف البدر الحين واتطمن عليه
ام دانه : بس يا دانه انتي تعبانه
دانه : انا مو تعبانه انا بخير .. واذا ما وديتيني للبدر الحين بتعب عليج
تنهدت امها : انتي ليش راسج يابس جذي ؟؟ عموما انتظري شويه بتصل لعمج بوبدر بتطمن عالبدر وبالمره اقول لابوج عنه .. نسيت اقوله من خرعتي عليج
.:. وبعدها قامت امها وامسكت سماعة التليفون واتصلت لبوبدر تسال عن البدر وتطمن عليه .. ولما سكرت من بوبدر اتصلت لريلها وقالت له عن البدر .:.
التفتت ام دانه للدانه بابتسامه : مجرد كسر باليد واهو الحين بخير
.:. وبسرعه قامت الدانه وافتحت الكبت وطلعت لها ثياب عشان اتبدل .:.
سالت امها : اشناويه اتسوين ؟؟
دانه : مثل ما اتشوفين ببدل ثيابي بروح المستشفى اشوف البدر
***************
وبالمستشفى .:.
.:. بدار البدر .:.
نقزت امنه عالسرير مبتسمه : الحمدلله عالسلامة يا المتين
عصبت داليا : شو هايدي الحركات يا امون ؟؟
ضحك البدر : معليش خليها .. يعنيانتي يا مرت أبوي ما اتعرفين حركات امون ؟؟
.:. وبعدها نقز فواز عالسرير يقلد امنه .. تنرفزت امون وقامت من السرير تتذمر .:.
امنه : يا شين التقليد
.:. وبسرعه قربت غدير من البدر ومسكت ايده مستانسه .:.
غدير ( بابتسامه ) : ما تتصور شكثر كنت خايفه عليك يا البدر .. الحمدلله عالسلامه
ابتسم البدر : الله يسلمج يا غدير
وابتسمت سلوى : ما اتشوف شر يا البدر والحمدلله على السلامه
وقال نايف بعبط : اه .. انا مو معور قلبي غير المرسيدس .. تكنسلت للاسف
ضحك بدر وردت غدير : بالطقاق المرسيدس .. واهم شي ان البدر بخيير
.:. وبعدها .:.
.:. دخلت الدانه الدار ومعاها امها .. التفتت دانه لبدر .. شافها لثانيه وبسرعه نزل راسه .. سلمت دانه وامها عالموجودين .. وبعدها قعدت امجابله سريره .:.
الدانه ( بابتسامه ) : الحمدلله على سلامتك يا ولد عمي
رد وهو ما زال منزل راسه : الله يسلمج
وكمل بقلبه : يا اسيرتي
وسالت ام دانه : شلون صار الحادث يا البدر ؟؟
.:. تضايق بدر من هالسؤال وما رد .. وحست دانه انها السبب بالحادث .:.
.:. وبعدها .:.
ابتسم وقال : قضاء وقدر يا مرت عمي
ابتسمت ام الدانه بالمثل : على العموم الحمدلله على سلامتك .. وما اتشوف شر
بدر : الله يسلمج
اه يا البدر .. ليش منزل عيونك ؟ ليش ما ترفعها واتشوفني بعيوني ؟؟ لهدرجه محتقر فكرة اني اسيرتك ؟ والله يا البدر ما هقيتك
^^
.:. كانت الدانه اتسولف بينها وبين نفسها وعيونها الحزينه اتشوف حبيبها بالم .:.
.:. مر الوقت بسرعه والكل رد للبيت .. اما بدر تم بالمستشفى ليوم او يومين بالكثير .. ليمن تتحسن صحته بالكامل .:.
.:. صارت الساعه 2 الفير والبدر ليما الحين ما غطت له عين .. كان يحاول ينام بس ما قدر .. يفكر باللي صار له اليوم من احداث .. مو راضي يستوعب ان اسيرة البدر اهي نفسها الدانه !! وبعد هالتفكير الطويل تذكر البدر الرساله !! الرساله اللي عطته اياها الدانه يوم كانوا بالمطعم .. حط ايده بمخبة ثوبه بيطلع الرساله لكنه توه مكتشف انه لابس ملابس المستشفى !!
سال منقهر : ليكون رموا بالثوب وضاعت الرساله معاه ؟؟
.:. وبعدها .:.
التفت يمين ويسار وشاف مجموعه من اشيائه اللي كانت بالسياره محطوطه عالكرسي اللي يم السرير ومعاهم الرساله .. ابتسم وتطمن ليش ان الرساله مثل ما هي ما انفتحت .. مد ايده ومسك الرساله وفتحها بيقراها .:.
بدر ( وهو يقرا الرساله ) : ابي املك نظر عينك .. ابي املك نبض قلبك .. ابي لبسك .. وابي مشيك .. ابي نومك على كيفي .. ابي بالنوم تحلم بي وتحلم في .. ابي تصحى على شوقي .. ابي تفكيرك بعقلي .. وابي تنسى كل عقلك لي .. لاني صدق حبيتك .. وحبيتك .. وحبيتك .. وحبيتك .. واعيد احلف واقول اكثر لاني صدق حبيتك وحبيبتك وحبيتك .. دخيللك اطلب .. لا تستحي مني .. دخيل امك .. دخيل ابوك .. دخيل عيونك الثنتين .. دخيل اللي خلق فيك الجمال وامنه عندك .. تعال اطلب .. تبي قلبي .. تبي نبضي .. تبي روحي .. تبي دمي .. وربي كل شي يفداك .. تخيل 4 احرف .. ا .. ح .. ب .. ك .. عظيمه كلمة احبك .. حرام انطق بها لغيرك .. لاني موت حبيتك .. ابي املك ابيع الكل .. ابيك انت .. حياة وبس .. ابيك انت كل شي لي بالكون .. لاني بوح حبيتك .. ابي تفهم قبل ما اتعرف باني انسان .. قمة فرحته شوفك .. ابي تملك مشاعر شخص .. محتاج لحنانك انت .. ابي انسى هموم الامس .. ابي حزني يعود همس .. وتشفى كل جروحي لمس .. ابي لما انظر عيونك .. اشوف امي .. اشوف اهلي .. اشوف الكون بعيونك .. اشوف الناس .. واشوف الحب ايجي يمي .. انا يا البدر وربي يشهد علي اني حبيتك ..
ونسيت اقولك مبروك عالتخرج بس عفيه طلبتك لو رفضتني بالمطعم وفشلتني ابيك تنسى هالكلام وتشق الرساله بالحال .:.
.:. وبعدها طاحت الرساله من ايده وادمعت عينه .. قلبه عوره وحس بالضيق .:.
سال نفسه بحزن :ليش قاعد يصير لي كل هذا ؟؟ ليش ؟؟