الفصل 22
:. الحلقة 22 .:.
.:. التكلمه .:.
.:. وبعدها سكتت نجلا متردده لو تتنازل عن الشكوى .. كانت اتفكر بكلام امها بخوف وتردد .:.
ام خليفه ( تسال ) : اشفيج سكتي ؟ ان شالله قاعده اتفكرين بالتفكير السليم !! وانا اقولج تعوذي من ابليس وشيلس هالشي من راسج .. مهما يكون هذا اخوج الكبير
تنهدت نجلا وسالت : واذا تعرض لي مره ثانيه ؟
ام خليفه : انا اوعدج انه ما بيتعرض لج مره ثانيه بس بشرط .. انج تتركين عنج سوالف المغازل هذي .. فاهمه ؟
ما اقتنعت نجلا : فاهمه .. لكن والله يا يمه لو تعرض لي مره ثانيه بسجنه واكاني حلفت
***************
ابيه .. ابيه .. الساعه 1 الحين ! وليما البس واطلع من البيت واروح المطعم بتصير الساعه 2 .. ما ادري ليش حاسه بارتباك مو طبيعي ورعشه بجسمي مخوفتني .. كل هذا لاني بشوف البدر بس !! انا ليمن الحين مستغربه من نفسي شلون تجرا وقلتله بشوفك ؟ ما اقول غير الله يستر ابستره ان شالله !!
^^
.:. كانت الدانه مثل المينونه مو مستوعبه شي .. اتلف وتدور بدارها متخرعه من دقت الساعه 2 .. كلها ساعه وحده بس تفصلها عن لقائها بالبدر .:.
***************
.:. ابيت بوبدر .:.
.:. ابدار امنه .:.
طق اخوها نايف عليها باب الدار يسال : امون ممكن ادخل ؟
ابتسمت امنه : اكيد
.:. دخل نايف دارها وقعد على الكرسي امجابلها .:.
استنتجت امنه : اممم .. شكلك تبي اتقول شي ؟!
ابتسم نايف : عليج نور .. ابكلمج بخصوص دراستج بلبنان
سكتت امنه للحظه وسالت : انت كلمت ابوي قلت له شي ؟
.:. هز نايف راسه بلا .:.
تضايقت امنه : ليش عاد ؟ ليش يا نايف ما كلمته ؟
نايف : ما دامي انا موافق اهو ماله شغل فيج
استفهمت امنه : وشلون بطلع من قطر بدون موافقته ؟
مسك نايف ايدها بابتسامه : انا سالت وقالوا لي اي احد يقدر يطلعها من المطار .. بشرط يكون ابوها .. عمها او اخوها
استانست امنه من هالخبر : عن جد هايدا الشي ؟؟
ابتسم نايف : ايه
***************
.:. ابيت بوفواز .:.
.:. كانت لميا اتراقب اخوها ومتعجبه من هالشي اللي يسويه .. كان منسدح بالميلس ويكلم نفسه كلام مو مفهوم .. كلام ميانين .:.
لميا ( تسال ) : انت شتسوي يا المينون ؟
التفتت فواز بابتسامه : امثل دور الحبيب .. ليش تسالين ؟؟
استغربت لميا : اها
استفهم فواز : ليش ؟؟ اكو شي ؟؟
لميا : سلامتك والله .. بس سمعتك اتخربط شويه بالكلام .. وتقول كلمات مو مفهومه .. كلمات غبيه مو عربيه
ابتسم فواز : ماكو والله بس هذي لغتي الخاصه .. انا الفت مجموعه من الكلمات .. مثلا سيريا يعني عطيني بوسه .. كيارا بيرا يعني احبج .. سيسوكا يعني لميني .. ومن هالكلام هذا
بطلت لميا عيونها متعجبه من هالينون : الحمدلله والشكر
رد فواز : كريكاشتا بيخو را
ما فهمت لميا شي : شنو يعني ؟؟
فواز : يعني الحمدلله والشكر عليج انتي
عصبت لميا : انجب يا المتخلف .. والله صرت اشك ان اكو يني ساكن ابداخلك يتحكم فيك !!
***************
.:. الساعه 2 بالضبط .:.
.:. بمطعم البستان .. كانت الدانه قاعده بطاوله امجابله المنظره .. منتظره البدر على احر من الجمر .. كانت ترتجف من الروع والخوف ومن اللي ممكن يصير بعد شويه لما يكتشف البدر ان اسيرته اهي نفسها الدانه بنت عمه .. بشحمها ولحمها ومو بنت غيرها .. كانت متغشيه وهم حاطه ايدها على راسها .. كانت بالدقيقه اتشوف ساعتها وهم اتشوف المنظره اللي كانت تعكس الاشخاص اللي يدخلون المطعم .:.
.:. وعالساعه 2 ودقيقتين .. شافته من المنظره .. كان توه داخل المطعم ويسال الجرسون عن الطاوله المحجوزه باسم البدر .. ولما اشر له الجرسون على الطاوله التفت البدر وشاف اسيرته قاعده تنتظره واتشوفه بالغشوه وهو متشوق ومتلهف يقرب منها ويكلمها ويسالها منو انتي ؟؟ كانت الدانه تتصب عرق من الخوف .. كانت اتفكر تشرد باللحظه هذي .. دقات قلبها تخفق بشده وجسمها يرتعش بطريقه مو طبيعيه .. كانت اتحس بالحراره بجسدها والخنقه بس ما باليد حيله .. هذا البدر واقف جدامها ويشوفها وعلى بعد 3 امتار بس !!
.:. وبعدها .:.
قرب البدر منها بابتسامه : هلا والله
.:. خافت وارتبكت وحست ان بيغمى عليها وقامت من الكرسي متروعه واهي ماسكه غشوتها خايفه من انها تطيح بالغلط .:.
تعجب البدر : اشفيج ؟؟ عسى ما شر ؟؟ ليش متخرعه ؟؟ ممكن تقعدين ابمكانج ؟؟ والله العظيم اني ما اخرع والله
.:. ابتسمت الدانه من داخلها وقعدت على الكرسي واهي اتسمي بسم الله .:.
ابتسم البدر : حلو
وبعدها سال : انتي شسمج ؟؟
.:. سكتت وما علقت بشي .. كانت خايفه تتكلم وينكشف امرها بس بكلا الحالتين كان البدر بيكتشف من اهي باليوم هذا .:.
سال البدر مره ثانيه : اشفيج ساكته ما اتردين ؟؟ انتي شسمج ؟؟
.:. وهم ماردتت .:.
استغرب البدر :ok ممكن لو سمحتي اتشيلين الغشوه ؟؟
.:. من اسمعت هالطلب ارتجفت وارتبكت وحطت ايدها على الغشوه .. كان البدر متعجب من هالسلوك هذا .:.
ما فهم البدر شي : اسيرتي اشفيج ؟؟
.:. استانست الدانه من كلمة اسيرتي وابتسمت .. وهزت راسها بلا ان سلامتك يا البدر ماكو شي .:.
.:. وبعدها .:.
.:. قرب الجرسون يسال شنو اهو الطلب ؟
التفت بدر على الدانه يسال : شنو تبين تطلبين ؟؟
.:. هزت راسها بلا .. ان ما ابي اطلب شي .. وباللحظه هذي زاد استغرابب البدر .. ليش انها ما تتكلم معاه .:.
ابتسم بدر للجرسون : والله تونا ما استقرينا على طلب معين
ابتسم الجرسون بالمثل : مو مشكله
.:. كانت الدانه اتحس نفسها سخيفه باللي اتسويه بس هم حست نفسها مجبوره على هالشي .. كانت تتمنى تشرد باللحظه هذي .:.
تامل البدر ويه الدانه اللي ما شاف منه شي : عفيه اسيرتي شيلي الغشوه شوي
.:. كانت شويه وبتصيح .. ما كانت تبي اتشيل الغشوه بس ما باليد حيله .. حطت ايدها على غشوتها تبي اتشيلها واهي اتسمي بسم الله .. كان البدر متشوق ويراقب الموقف بلهفه وهو مو داري بشي ! ايدها كانت ترتجف والبدر شاف هالشي .:.
.:. وفجاه .:.
صرخت الدانه مو مستحمله : ما اقدر .. ما اقدر يا البدر اشيل الغشوه .. والله العظيم ما اقدر .. ايدي تجمدت ابمكانها مو راضيه اتشيلها !!
.:. وبعدها .:.
.:. التفتوا الناس عالدانه والبدر مستفهمين شسالفه ؟؟ شك البدر بالصوت اللي اسمعه وانه سامعه من قبل بس ما يتذكر ابوين .:.
سال البدر مستغرب : شكو الحين ما تقدرين اتشيلينها ؟؟ وبعدين صوتج هذا يا ابنيه مو غريب علي بالمره .. ما عليج امر ممكن تتكلمين مره ثانيه ؟؟
وبعدها قال : واذا تبيني اشيل عنج الغشوه راح اشيلها ابنفسي لو ما تقدرين اتشيلينها مثل ما اتقولين !!
انزلت ادموع الدانه من الخوف من اللي ممكن يصير الحين : ماكو داعي اتشيلها انا بنفسي بشيلها
.:. وباللحظه هذي سمت الدانه بسم الله مره ثانيه وسحبت الغشوه من ويهها ليمن طاحت بيدها ورفعت راسها بشويش وشافت البدر بعيونه المتجمده المصدومه وكانت ادموعها اتبين بعيونها العسليه .. حاولت انها تبتسم له بس ما ابتسمت .:.
قام البدر من الكرسي مصدوم مو مستوعب : الدانه !!!
***************
الو
هلا غدير
تضايقت غدير من هالبرود : هلا خليفه
سال خليفه : تبين شي ؟؟
غدير : انا .. انا متصلتلك عشان اعتذر .. انا اسفه
سكت خليفه للحظه وسال : ومو متضايقه من اللي شفتيه بالمطعم ؟؟ اقصد انا وساندرا ؟؟
تنهدت غدير : بالبدايه اي تضايقت بس الحين وبعد ما شرحت لي كل شي انا نسيت السالفه ومتصلتلك الحين عشان اعتذر
ابتسم خليفه : ماله داعي تتاسفين
سالت غدير : يعني امسامحني ؟؟
خليفه : اكيد امسامج .. مو انتي مرتي حبيبتي
استانست غدير : تسلملي والله يا عمري انته
خليفه ( بابتسامه ) : الله يسلمج
وبعدها سال : هاا .. الحين متى تبين السفر ؟؟
ابتسمت غدير : اللي اتشوفه
.:. ما اندمت غدير ليمن اتصلت لخليفه واعتذرت لان هذا اهو التصرف السليم وخاصه ان خليفه ما غلط معاها بشي .:.
***************
من الصدمه تجمد ابمكانه ما يعرف شيقول ومو مستوعب شي : شنو هذا ؟؟ انا ابي افهم شنو هذا اللي اشوفه جدامي الحين ؟؟ وينها اسيرتي ؟؟ وانتي يا الدانه اشيايبج اهني اهني ؟؟ ما علينا وقوليلي الحين شسالفه ؟؟ اعتقد اني مواعد اسيرتي اهني وانصدم واشوفج انتي امجابلتني ؟؟ هل انا امضيعه بالطاوله او شنو ؟؟ هل انتي قاعده تنتظرين احد او شنو ؟؟ ليش ما تتكلمين او اتعلقين بشي ؟؟
نزلت الدانه راسها بحزن : انا اسفه يا البدر
استفهم بدر مو فاهم شي : اسفه على شنو ؟؟
دانه ( بضيق والم ) : انا اسفه ليش اني طول هالمده مثلت عليك دور شخصيتين !!
انصدم البدر : اشتقصدين ؟؟
تنهدت الدانه : انا يا البدر حبيتك .. والله العظيم حبيتك .. وعشان هالسبب ابيك اتسامحني على كل شي سويته .. عفيه سامحني
سال بدر : دانه انتي شقاعده اتقولين ؟؟ وشقاعده اتخربطين ؟؟ انا مو فاهم شي .. فهميني ؟؟
.:. وبعدها .:.
ادمعت عيون الدانه : كنت دوم العب معاك وانا ياهل .. اذكر بيوم لما كنا بالروضه احد الاولاد طقني وقالي يا المرعبه اتخرعين وانت عصبت ويت وطقيته وهم دافعت عني .. انا من يومها حسيت اني ابأمان وانا معاك .. وكبر هالتفكير معاي ليمن ثبت براسي وحبيتك .. ودوم كنت احلم فيك واتخيلك جدامي بكل مكان .. كنت انتظر الساعات اللي تجمعني انا وياك باي مكان .. والصراحه ما قدرت اقولك يا البدر || انا احبك || يمكن شكلي منعني من هالشي .. من انك اتفشلني بيوم !! وانا ادري اني مو حلوه ومحد يحبني ويبيني .. هالشي اهو اللي منعني من اني اقولك || احبك || وقلت ماكو غير اني اطرشلك مسجات عن طريق اسيرة البدر اللي بالحقيقه اهي انا ..
.:. وفجاه .:.
صرخ البدر مو مستوعب : الدانه انتي شقاعده اتخربطين ؟؟ انتي اكيييد تتغشمرين ؟؟
قالت بالم : عفيه يا البدر لا تقاطعني وخلني اكمل وبعدها قول اللي تبي اتقوله .. وهذا اهو الحل الوحيد اللي يه ابالي ساعتها عشان احس بالحب ولو شويه .. طرشتلك مسجات من الكمبيوتر عشان الرقم ما ابين .. طرشتلك مسجات يا بلفيت اني اسيرتك عشان اتحبني مثل ما انا احبك بس للاسف شكلي فشلت بالشي هذا .. قدمت لك سيارة مرسيدس من نفسي وهالشي اسعدني ليش انه اسعدك انت الثاني .. حاولت اتقرب منك عن طريق المسجات ليمن يه اليوم اللي قالتلي امي ان اكو شخص خاطبج من ابوج .. انا عفست الدنيا وقلت لها مستحيل اتزوج وانا ما افكر بالزواج الحين .. لكن لما عرفت انك الخاطب مت من الوناسه ونفتحت نفسيتي للحياة وحسيت اني اسعد انسانه بالعالم كله .. ما استوعبت ان حبيبي البدر خاطبني انا من دون البنات !! ما تتصور شكثر تشققت من الوناسه ساعتها .. لكن رسالتك لي باليوم هذاك حطمت كل حلم سعيد فيني .. اصدمتني وخلتني ارجع للواقع المرير وهو ان منو انا اصلا عشان اصدق ان البدر اللي بالسما خاطبني انا ؟؟ ما توقعت ان عمي بوبدر غاصبك على هالشي .. ابد ما هقيت هالشي والله .. حسيت بالالم والانهيار وانا اقرا رسالتك .. قلبي الضعيف تقطع من هالشي .. حاولت اشقها بس للاسف ما قدرت لانها منك انت !! وهالسبب اهو اللي خلاني اكنسل الملجه بنفسي .. ليش اني مستحيل اخليك اتعيش بتعاسه بسببي انا وانت ما تبيني موليا . ومثل ما انت شايف الحين انا الدانه بنت عمك جاسم .. اكاني جدامك الحين وسو اللي تبي اتسويه .. اما بخصوص اسيرتك اهي نفسها البنت اللي امجابلتك الحين !!
.:. وبعدها .:.
تجمد البدر ابمكانه مو مستوعب : انتي يا الدانه خدعتيني .. ليش سويتي فيني جذي ؟؟ ليش يا الدانه لعبتي علي ؟ ليش ؟
انصدمت وسالت : انا ما لعبت عليك !! قولي متى لعبت عليك ؟؟ انا حبيتك يا البدر .. وقسم بالله حبيتك .. انا ما سويت شي غير اني حبيتك
عصب البدر : امبله لعبتي علي .. مثلتي دور الشخصيتين .. الدانه واسيرتي !! لعبني ابمشاعري وتقولين ما سويتي شي ؟؟
حست الدانه بالضيق من هالكلام : والله يا البدر ما سويت شي .. انا ما لعبت ابمشاعرك .. انا من حبي لك سويت جذي .. كنت ابيك اتحبني .. بس ما هقيتك بتتهمني باللعب بالمشاعر !!
تمسخر البدر : ومنو اتكونين اصلا عشان احبج ؟؟ والحمدلله اني عرفتج بعد ما يفوت الاوان !! وبالنسبه لسيارتج انا ما ابيها وبردها لج البيت سالمه .. ولو كنت ادري بساعتها انها منج والله ما قبلتها
.:. انصدمت الدانه من هالكلام وما استوعبت ان البدر ممكن يقولها هالحجي بيوم !! شنو هالقسوه هذي يا البدر ؟؟ ليش اسلوبك تغير ومعاملتك قست بالطريقه هذي ؟؟ كانت اتحس بالالم بداخلها والحزن الكبير .. اول مره تنجرح من البدر .. اول مره يكلمها البدر جذي .. انزلت دموعها غصبا عنها ومو راضيه توقف .. وبعدها مدت الدانه ايدها للبدر وهي ماسكه رساله بيدها وكانت ترتجف .:.
الدانه ( واهي اتصيح بنهيار ) : بعد هالكلام القوي اللي سمعته منك ما ابي منك غير شي واحد بس .. واتمنى انك ما اترده .. ابيك اتمد ايدك وتاخذ هالرساله وتقراها بالبيت .. انا .. انا .. ما هقيتك بتكون بالقسوه هذي بس هم .. هم .. احبك يا البدر .. اناا .. انا .. اسفه لو .. لو بالفعل لعبت ابمشاعرك مثل ما اتقول .. بس .. انا .. انااا ..
.:. وفجاه .:.
سكتت وما استحملت .. طاحت الرساله من ايدها عالطاوله واهي اتصيح بحرقه وبسرعه حطت ايدها على ويهها وطلعت بره المطعم متناسيه البدر اللي كان واقف متجمد ابمكانه والصدمه ليمن الحين املازمته .. شاف الرساله طايحه ومد ايده ومسكها .. وبعدها تنهد وطلع بره المطعم يتمنى انه يقوم من هالكابوس .:.
.:. ركبت الدانه سيارتها .. وقالت للسايق واهي ميته من الصياح يرد البيت .. كانت تلعن شكلها القبيح وتلعن الساعه اللي طرشت للبدر مسجات باسم اسيرته .. وتلعن الساعه اللي قالت للبدر ابي اشوفك اليوم بمطعم البستان .. اما عن البدر .. اول ما طلع من المطعم ركب سيارته وهو متنرفز ومو مستعوب كل هذا .. كان يمشي بالمرسيدس على الشارع العام 190 وكل ماله يزيد بالسرعه وهو متناسي نفسه .:.
البدر ( وهو منهار يكلم نفسه ) : انا .. انا شلون كلمت الدانه بالطريقه الحقيره هذي ؟؟ شلون ؟؟ حسبي الله علي .. والله اني حقير ونذل وما استاهل حبها .. انتي يا الدانه وبعد الكلام اللي قلتيه مكانج فوق بالسما وانا مجرد اسم بدر وبس والا انا مكاني تحت بالحظيظ بعد الكلام اللي سمعتج اياه من توه !!
.:. كان يمشي بالسياره بسرعه جنونيه ليمن فقد السيطره على السكان وانقلب فجاه !! انصدمت السياره بعامود الاشاره .. تطاير الباب الخلفي بالهوا والتم البدر على السكان باقوى ما عنده .:.
See u