الفصل 10
الحلقة 10
ممكن ادخل يا الدانه ؟؟
تفضل يبه .. حياك
.:. دخل بوالدانه لدارها وكانت اهي ماسكه مجله وتقراها .:.
سال ابوها : مشغوله يا ابنيتي ؟
ابتسمت وقالت : ابد يبه .. امر .. بغيت شي ؟؟
بوالدانه : ما يامر عليج عدو .. بس انا بغيت اسالج عن شي !!
استفهمت دانه : خير يبه .. اكو شي ؟
تنهد ابوها وسال : اكو مبلغ بقيمة 300 الف ريال مسحوبين من حسابج .. ممكن اعرف لشنووو انسحبوا ؟؟
تغير ويه الدانه : شنوو ؟؟
بوالدانه : اقولج اكو مبلغ بقيمة 300 الف ريال مسحوبين من حسابج .. لشنو ساحبتهم يا الدانه ؟
توهقت الدانه : انا .. انا .. سحبتهم للفقاره والمحتاجين
استغرب ابوها : هالمبلغ الكبير للفقاره والمحتاجين ؟؟ وبعدين انتي من متى تسحبين لهم ؟؟
.:. سكتت الدانه وما عرفت شتقول .:.
سال ابوها مستفهم : سالج من متى وانتي تسحبين لهم ؟؟
دانه ( بتلعثم ) : من هذاك اليوم
وبعدها سالت : وبعدين انت ليش قاعد اتحقق معاي يا يبه !! مو هذي فلوسي وحسابي وانا حره فيهم
ابوها : ما قلنا شي .. هذي فلوسج وحسابج وانتي حره فيهم .. بس من حقنا انعرف هالفلوس بشنو تصرفينهم ؟؟
دانه : قلتلك سحبتها للفقاره والمحتاجين .. للجمعيات الخيريه
ما اقتنع ابوها : والله ما ادري شاقولج .. عموما ان شالله اتكون هالتبرعات ابميزانية حسناتج
دانه : ان شالله
.:. وبعدها طلع ابوها من الدار .. وحست الدانه بالضيق وتانيب الضمير ليش انها كذبت على ابوها .:.
دانه ( وهو تكلم نفسها بضيق ) : السموحه منك يبه .. هذي اول مره اكذب عليك .. بس سامحني .. ما تجرات اقولك ان هالفلوس انسحبت للبدر ! ليش اني شريت له المرسيدس !!
***************
مابي اخطب الدانه !! مابي !!
هون عليك يا البدر .. هونها وان شالله بتهون
ما اقدر يا غدير .. والله العظيم ما اقدر
غدير : بس هذا ابونا
بدر : وهذي حياتي انا
تنهدت غدير : الله كريم ان شالله
سال بدر بضيق : شاسوي يا غدير ؟؟ قوليلي شاسوي ؟؟
سالت غدير بسؤال ثاني : الليله انتوا رايحين لبيت عمي ان شالله ؟؟
بدر : للاسف ايه
غدير : والله ما ادري شاقولك يا البدر .. والله العظيم ما ادري !!
تنهد البدر : حسبي الله ونعم الوكيل !!
***************
شرايج بالسرير هذا يا سلوى ؟؟
التفتت له : اممم .. مو حلو .. وانا ما احب هالنوعيه الكبيره من الاسره
سال بوبدر : عيل شتحبين ؟؟
سلوى : احب نوعية الاسره الصغيره
بوبدر : بس هذا وايد حلو .. ويتسع لشخصين
سلوى ( تسال ) : وانا شابي بالسرير بو شخصين ؟؟ ما احتاجه وانا لحالي بنفسي بالدار
بوبدر ( محاوله للقناعه ) : اممم .. يمكن امنه او غدير او حتى امج ينامون عندج بيوم !!
تنهدت سلوى : ما اظن انهم بينامون بيوم .. بس اللي اتشوفه يا عمي
سال بوبدر : يعني اعتمد عليه الحين ؟؟ اشتريه ؟؟
.:. هزت راسها ايجابيا .. مع انه مو عاجبها ومو مقتنعه فيه .. بس اسكتت وما علقت عشان تفتك من حنت بوبدر .:.
***************
الو
هلا
اهلين .. ممكن احكي مع امنه ؟
استغربت امنه : هلا والله .. انا امنه .. مو انت ؟؟
انا جوزيف .. خيا لساندرا
انصدمت امنه @_@ وبنفس الوقت تعجبت : جـوزيـف !!
جوزيف : ايه هيدا انا .. كيفيك امنيحا ؟؟ سوري عالتطفل بس انا اطلبيت الرئم من ساندرا .. بادي احكي معيك
تشققت امنه وما صدقت : تبي اتكلمني انا ؟؟
جوزيف : ايه انتي .. من يوم ما شفتك هديك المره بالبيت وامس بالمول وانتي ابالي وبفكر فيكي
ما استوعبت امنه : انااا !!
جوزيف : التيلك ايه انتي
.:. انصدمت وتعجبت وبنفس الوقت استانست وتشققت .. معقوله هاللبناني الوسيم يبي يكلمها ويفكر فيها !! ما عرفت امنه شتقول او شلون اترد !! واستحت واسكتت .:.
سال جوزيف : شو ماليك اسكتي ؟؟ ما باديك اتكوني حبيبتي ؟؟
انصدت امنه @_@ : شنو !! اكون حبيبتك !!
.:. وفجاه .:.
منو هذا اللي اتكونين حبيبته ؟؟
تخرعت امنه وسدتت الخط : نايف !! بسم الله الرحمن الرحيم !! اشفيك جذي داخل علي !! خرعتني !!
سال نايف : ما قلتيلي منو هذا ؟؟
استفهمت امنه بخوف : شنو ؟؟ اشفيك ؟؟ شنو منو هذا !؟
نايف : لا تستهبلين يا امون .. منو هذا اللي اتكونين حبيبته ؟؟ ومن الاساس انتي منو كنتي اتكلمين ؟
حست امنه بالوهقه : هذي لولو رفيجتي
نايف : عن الكذب يا امون !!
امنه ( تحاول تقنعه ) : وليش اكذب ؟؟ قلتلك هذي لولو رفيجتي !! اشفيك مو مصدقني ؟؟
نايف ( يسال ) : شلون رفيجتج وسمعتج اتقولين من شويه اكون حبيبتك ؟؟
ما عرفت شتقول وتمت اتخربط : هذا سيناريو من مسلسلل كنت متاثره فيه وقلته حق لولو
ما اقتنع نايف : امون .. قلتلج لا اتكذبين !!
امنه : وانا قلتلك اني ما اكذب عليك
.:. وبعدها رن تليفون البيت .. تخرعت امنه وما شلته .:.
وقالت بقلبها : يالله عساه ما يكون اهو !!
.:. وبعدها .:.
سال نايف مستفسر : ليش ما اتردين عالتليفون ؟؟ مو يمكن اتكون رفيجتج لولو مثل ما اتقولين ؟؟
امنه ( بتلعثم ) : اممم .. توني مسكره منها وما اعتقد انها اهي .. انا رايحه لداري بذاكر .. يالله سي يا
وتوها بتقوم من الكرسي الا بنايف ينادي : امون .. اوقفي ابمكانج .. وتعالي ردي عالتليفون الحين وجدامي
امنه ( شويه وبتصيح من الخوف ) : وليش مو انت اللي اترد عليه ؟؟
نايف : انا ابيج انتي اللي اتردين عليه .. وبسرعه شيلي السماعه قبل ما يسد المتصل الخط وحطيه سبيكر !!
طاح قلب امنه ابطنها من الخرعه : بس يا نايف انا ..
قاطعها نايف : لا بس ولا شي .. انتي ليش متخرعه ؟؟ تعالي وشيلي السماعه قلتلج وبسرعه !!
.:. وبعدها .:.
.:. قربت امنه من التليفون وشلت السماعه واهي اتسمي بسم الله ميته من الخوف ليكون جوزيف اهو المتصل وحطته سبيكر .:.
امنه ( وهي ترتجف ) : الوو
هلا امون .. شلونج ؟؟ وشخبارج ؟؟ وانا كل ما اتصل لبيتكم احصلج انتي عند التليفون ؟؟
ارتاحت امنه لما سمعت المتصل : اهلين لولو
وقالت بقلبها : الحمدلله يا ربي .. اشكرج يا لولوه انقذتيني من الموت المرير !!
وبعدها التفتت لنايف تسال : ارتحت الحين ؟؟ صدقت انها لولو .. بغيت مني شي ثاني يا سيد نايف !!
نايف ( وهو شاك بشي ) : سلامتج
شافت امنه ملامح نايف الشكاكه وما ارتاحت : الله يسلمك
.:. وبعدها راح نايف للدار وتمت امنه اتسولف مع لولو وهي اتفكر بجوزيف وبالكلام اللي قاله عن الحب وهالخرابيط .:.
***************
.:. وبالسياره .:.
.:. كانت سلوى مع بوبدر راجعين من المحل للبيت بعد ما اشتروا اثاث للدار .:.
التفت بوبدر لسلوى يسال : ما تبين تشربين شي حبيبتي ؟؟
تضايقت سلوى من كلمة حبيبتي : تسلم يا عمي ما ابي شي غير اني ارد للبيت !!
سال بوبدر : اشفيج مستعيله ؟؟
سلوى ( بضيق ) : مو مستعيله .. بس اظن ان احنا طلعنا لشغله معينه .. واكاهو الحين خلصنا
بوبدر : بس هذا ما يمنع من ان انمر ونشرب شي
سلوى : وانا قلتلك تسلم يا عمي ومو مشتهيه لشي
سال بوبدر : اشرايج انمر البحر شويه ؟؟
تضايقت سلوى اكثر : هم تسلم يا عمي بس انا ابي ارد للبيت
بوبدر ( معاند ) : كلها دقايق بس نتمشى بالكورنيش نسولف ونشرب شي !!
سلوى : بس انا حاسه بالتعب شويه
بوبدر : سلامتج حبيبتي .. البحر بيشيل عنج التعب ان شالله
تعبت سلوى من حنت بوبدر : اللي اتشوفه يا عمي
.:. وبعدها .:.
بوبدر ( يسال بخبث ) : اقول سلوى .. سمعتي اخر خبر ؟؟
استفهمت سلوى : اللي اهو ؟؟
بوبدر : بدور ان شالله بيخطب اليوم
انصدمت سلوى مو مستوعبه : شنووو !! البدر بيخطب اليوم !!
.:. وفجاه .:.
وقف بوبدر السياره على جنب يسال : ايه بيخطب اليوم .. وشفيج منصدمه ومو مستوعبه هالشي ؟؟
سلوى : ماكو شي بس ما توقعت يخطب يعني وهو ليمن الحين بالجامعه .. والشي الثاني انه ما قالي عن هالشي !!
عصب بوبدر : وليش يقولج يعني ؟؟ بصفتج منو بالنسبه له ؟؟ ليكون اتحبين هالثور وانا ما ادري !!
انصدمت سلوى من هالكلام : اشفيك عصبت يا عمي ؟؟ وشنو هالكلام اللي تقوله !! ومنو قالك اني احبه ؟؟
بوبدر : كلامج وحركاتج وكل شي فيج وهم ردتت فعلج اتبين هالشي !! انج اتحبينه !!
.:. ما توقعت سلوى ان بوبدر حاط اباله هالشي .:.
سلوى : انت غلطان يا عمي .. البدر ابمثابة اخوي نايف .. واذا عالخطبه الله يوفقه ان شالله .. بس ما قلت لي منو هاللي بيخطبها ؟؟
سكتت بوبدر وبعدها قال : الدانه بنت عمه جاسم
انصدمت سلوى مره ثانيه : الدانه !!
***************
.:. ابيت بوفواز .:.
.:. ام فواز كانت بالمطبخ تغسل المواعين وفواز كان يلعوزها بالشي اللي يسويه .:.
فواز : يمه احبج
ابتسمت امه : انا هم احبك بس لا تمسك شي بالمطبخ ولا اتلعوزني مو ناقصه اغسل المواعين من اول ويديد
ابتسم فواز وسال : اقول يمه ليش ما يصير الولد يتزوج امه ؟؟
تعجبت امه من هالسؤال الغريب : اشفيك انت ؟؟ شنو هالسؤال السخيف ؟؟
فواز : وليش سخيف ؟؟ نفرض مثلا ان الولد يحب امه ويبيها !!
استغربت امه : شي طبيعي ان كل ولد يحب امه ويبيها بس ما توصل للمصاخه والتفكير الغريب اللي بمخيلتك !!
سال فواز : انزين ولو انا كنت احبج وابيج ؟؟
عصبت امه : فواز يمه انت شقاعد اتقول ؟؟ شنو هالحجي اللي ماله لزمه !!
ابتسم وسال : وليش ماله لزمه ؟؟ انا من صجي يا يمه احبج
.:. حست امه بالينون من هالكلام الغريب اللي تسمعه من ولدها وسمت بسم الله عليه .:.
.:. وفجاه .:.
دخلت لميا : الحمدلله والشكر .. مو قلتلج يا يمه ولدج مينون ويبيله طبيب نفساني يعالجه من هالينون الحقير !!
تليقف فواز : انتي شكو الحين ؟؟ مالج شغل فينا انا وامي .. كنت احبج بس انتي ما عطيتيني ويه والحين احب امي واكيد بتعطيني ويه
وابتسم لامه : عدل يمه ؟؟
ضحكت ليما بمسخره : الحمدلله والشكر على نعمة العقل !!
.:. وما علقت امهم بشي وكانت مثل المصدومه مو فاهمه شي وكانت تتمنى ان ولدها يتغشمر بمثل هالسوالف .:.
***************
.:. ومجددا بالسياره .:.
سال بوبدر من يديد : وشفيج الحين انصدمتي مره ثانيه يوم عرفني ان الدانه اهي اللي بيخطبها بدر ؟
سلوى : مافي شي
بوبدر : شلون مافي شي وانتي ملامح ويهج تغيرت من يوم عرفتي اني بخطب الدانه لبدر ؟؟
سلوى : ابد بس ما توقعت انه يخطب من الاهل يعني
بوبدر : اهو اللي اختارها بنفسه والظاهر انه يحبها ويبيها
سلوى : عليه بالعافيه
وبعدها سال بوبدر : يعني مو متضايقه من هالشي ؟؟
سلوى : ابد مو متضايقه ولا شي .. بالعكس مستانسه للبدر .. والدانه ابنيه طيبه وتستاهل كل خير .. والله ان البدر عرف يختار
.:. ابتسم بوبدر وارتاحت نفسيته من هالشي وهو يخطط لليوم اللي يمتلك سلوى بيدينه .:.
***************
يمه عفيه اسمعيني .. فواز مينون ويحتاج لطبيب نفساني
ام فواز : بس اهو اكييد كان يتغشمر بالشي اللي قاله
لميا : والله انه ما يتغشمر يا يمه .. وقبل ما يقط عليج هالكلام تحرش فيني بالامس
ما استوعبت امها : بس شلون يقول هالحجي ؟؟
لميا : قلتلج مينون ومريض نفسيا والله !!
تنهدت امه : وشنو المطلوب مني الحين ؟؟
لميا : قلتلج انوديه لطبيب نفساني يشوف اشفيه !!
سالت امها : واذا ما وافق ؟؟
لميا : مو على كييفه .. بالطيب او بالقوه بيروح غصبا عنه !! هذا واحد متخلف ويبيله من يساعده على هالتخلف !!
ام فواز ( بضيق ) : يصير خير ان شالله
***************
.:. عالساعه 7 بالليل .. كان البدر يجهز نفسه للخطبه اللي اهو مو مقتنع فيها واللي ليما الحين بيت عمه ما يدرون بشي .:.
سال البدر نفسه : يا ترى انتي بتوافقين علي لو عرفتي بالخطبه يا الدانه ؟؟
.:. وبعدها .:.
ناداه ابوه من تحت : بدور .. شتسوي عندك ؟؟ يالله بسرعه انزل
تحلطم البدر بينه وبين نفسه : هذا واهم ما يدرون بشي وجذي مستعيل !! عيل شلون لو يدرون !! شبتسوي ؟؟
.:. وبعدها نزل البدر لبوه وهو يدعي بقلبه انه كل شي يتكنسل بلحظه .:.
Like
رد مع اقتباس إقتباس متعدد لهذه المشاركة الرد السريع على هذه المشاركة