رواية اسيرة البدر - الفصل 9 - مكتملة | روايتك

الحلقة 9 .:. التفتت له امعصبه : انت شنو ؟؟ عمي !! ما اتشوف !! رفع راسه وقال : مو التيليك يا صبيا باردون انصدمت امنه وتفشلت : جوزيف !! استفهم جوزيف : منو انتي ؟ تكلمت امنه بصعوبه : انا .. انا .. انا .. امنه سال جوزيف : ومنو امنه ؟ امنه : انا امنه اخت سلوى جوزيف : ومنو هيدي سلوى !! امنه : سلوى رفيجة اختك ساندرا .:. وبعدها .:. ابتسم جوزيف : انتي الصبيا اللي كينتي بالباب بالامس ؟؟ تشققت امنه : اي انا جوزيف ( يسال ) : كيفيك ؟ امنيحا ؟ امنه : الحمدلله .. امنيحا جوزيف : انتي لحالك جايه للمول ؟ امنه : لا معاي امي وسلوى ابتسم جوزيف : وانا معي ساندرا امنه ( تسال ) : وينها ساندرا الحين ؟ جوزيف : مع ارفيئها استغربت امنه : رفيجها !! جوزيف : ايه .:. وبعدها اسكتت امنه .. واكتفت بالابتسامه .:. جوزيف : انا ماشي لهلا .. ونايس تو ميت يو للمره التانيه امنه ( بابتسامه ) : نايس تو ميت يو تو وقالت بقلبها : يا اللبناني الوسيم *************** قام خليفة من الكرسي : اسمحيلي ساندرا بس انا لازم امشي الحين تضايقت ساندرا : بس يا خليفه .... قاطعها : لا بس ولا شي .. ولا تنسين وعدج لي .. هاليوم بيكون اخر يوم اشوفج فيه .. كل شي انتهى من بينا يا ساندرا !! هذا اهو الواقع المرير ولازم ترضين فيه .:. حست ساندرا بالقهر وبالهزيمه ليش ان خليفه بيتخلا عنها وبكل بساطه بسبب امه اللي بنظرها كانت لعينه .. سكتت ساندرا وما حبت اتكون جدامه بنت ضعيفه .:. .:. وبعدها .:. خليفه : فمان الله يا ساندرا مثلت دور القويه : الله معك *************** .:. عالساعه 9 بالليل كانوا رادين من المول للبيت .. سلوى كانت اتفكر بالشي اللي شافته اليوم بين ساندرا وخليفه .. وامنه كانت دايخه بتفكيرها بجوزيف اخو ساندرا .. اللبناني الوسيم .:. .:. توهم داخلين البيت وشافوا البدر منسدح عالكرسي ونايم بثوبه ومو حاس بشي .:. استغربت امنه : هذا شمنيمه هني ؟؟ وضحكت سلوى : بدور لما يكون تعبان ما همه شي .. وينام باي مكان .:. وبعدها .:. قربت سلوى من البدر بشويش وهمست : يا الفيييل يا ابو النوم .. انت شمنيمك اهني ؟؟ .:. وفجاه .:. صرخ بوبدر يسال : شمنيم هالثور بالصاله ؟؟ وانتي يا سلوى شتسوين لاصقه فيه !! تخرعت سلوى : عمي اشفيك !! عسى ما شر !! خرعتني !! وسالت امنه : اشفيك معصب يا عمي ؟؟ البدر يمكن نام بالغلط واهو يشوف تليفزيون !! وبعدين ما فيها شي لو نام اهني رد وهو معصب : هالثور مو بروحه بالبيت عشان ينام اهني ويضيق علينا المكان !! ولا اهو نسى ان اكو بنات غير اخته بالبيت !! ما يستحي !! وبعدها سالت سلوى : تقصدني انا وامون بالبنات ؟؟ سبق وقلت لك البدر مثل اخونا يا عمي .:. ما اهتم بوبدر لكلام سلوى وقرب من بدر وهو معصب .:. بوبدر ( بصوت عالي ) : ما اتقوم يا الثور !! .:. ليما الحين نايم بسابع نومه وما سمع ابوه وهو معصب عليه .. تنرفز بوبدر لان الشيخ بدر ما يرد عليه .. وقام ابوه وضرب الكرسي بريوله وبقوه ليمن تحرك الكرسي لورا وطاح البدر منه .:. تخرعت سلوى : بدر !! وصرخت امنه : عمي اشفييك !! وسالت داليا : شو مالك متعصب عالبدر هييك !! .:. ما رد بوبدر عليهم وقام البدر وهو متخرع من النوم وكان ماسك راسه اللي خبط بالطاوله وتعور شويه .:. .:. سمعت غدير صرخت امنه وخبطت الكرسي وتخرعت ونزلت تحت اتشوف شسالفه .:. غدير ( تسال بخوف ) : اشفيكم ؟؟ اشصاير !! .:. وبعدها .:. قام البدر يسال وهو مو فاهم شي : شسالفه ؟؟ رد ابوه بعصبيه : نايم بالصاله ومنبطح وماخذ راحتك وتسال شسالفه !! تعجب البدر : وشنو يعني !! اشسويت انا !! عصب ابوه بزياده : ما عندك دار يعني عشان اتنام اهني !! عبالك البيت لك بنفسك عشان اتسوي فيه اللي تبيه !! بدر ( بضيق ) : بس انا كنت تعبان وبدون ما ادري نمت .. وبعدين انا شسويت عشان كل هذا ؟؟ بايق يعني او مسوي منكر !! كلها نومه يعني !! .:. ما استحمل بوبدر هالموقف ولو ما تعوذ من ابليس كان بيمد ايده عالبدر .:. مسك نفسه على كثر ما يقدر : اقول بدور انجب واذلف دارك احسن لك لا والله العظيم بتشوف مني شي ما شفته !! .:. ما يدري شيسوي !! هل يسكت او يرد على ابوه او شنو !! لكنه تعوذ من ابليس اهو الثاني وسكت رايح لداره وهو متضايق .. وبالوقت نفسه متنرفز على هالشي اللي ما يستاهل هالموقف .:. استغربت داليا وسالت : لشو هيدا كلوا ؟؟ عصب بوبدر : داليا .. انا مو ناقصج انتي الثانيه !! فيستحسن انج تسكتين !! .:. تعجبت داليا اشفيه بوبدر !! امنه وغدير هم كانوا متعجبين .. اما عن سلوى كانت في حيره من امرها .. وشكلها اعرفت شنو هو السبب .:. سلوى ( تسال نفسها بتعجب ) : ليكون بوبدر يحبني وانا ما ادري !! كل مواقفه القبليه اتبين وتثبت هالشي !! *************** .:. باليوم التالي .:. .:. قام بدر من النوم وهو حاس بالضيقه مو موقف امس .. توه يبي يقوم من السرير الا يتفاجا وهو يشوف ابوه قاعد بالكرسي مجابله !! تعجب واستنتجب اشيبي ابوه منه وليش اهو بالدار .:. سال البدر مستنتج : هلا يبه .. اذا ياي اتقومني للجامعه اكاني قام بنفسي بوبدر : انا مو ياي اقومك للجامعه .. انا ياي اقولك شي بيصير الليله ان شالله استفهم بدر : شي وبيصير الليله !! اللي اهو ؟؟ بوبدر : انا ناوي اخطب لك اليوم انصدم البدر : شنو !! ناوي تخطبلي !! بس انا ما قلتلك ابيك تخطبلي ومن الاساس ما قلت اني ابي اخطب !! بوبدر : ما كان يحتاي انك اتقولي .. انا مو ياي اخذ رايك .. انا بس ياي عشان اعطيك خبر يعني .. ان الليله بتشرف معاي عشان اخطب لك البنت قام البدر من السرير وهو متضايق : يبه انت اشفيك ؟؟ ليش تبي تخطبلي !! انا توني ما اشتغلت وما افكر بالخطوبه !! بوبدر : اعتقد انك باخر سنه بالجامعه وما باقي غير اسبوعين وبعدها تتخرج وتشتغل .. وبعديناشتنطر يعني ما تخطب !! عمرك 24 سنه مو ياهل سال بدر : ومنو هالبنت اللي ناوي تخطبها لي ؟؟ بوبدر : بنات عمامك 4 ما شالله بدر : تقصد انك اتقولي اني اختار وحده من بنات عمامي !! بوبدر : انا ما قلتلك اختار .. انا اخترت لك وخلصت تعجب بدر : شنو !! انت اخترت لي وخلصت !! لو تبي تخطب لي على الاقل من حقي اختار البنت اللي بتكون مرتي بيوم من الايام عصب بوبدر : اخليك تختار !! ليش بالله عشان تختار سلوى بنت داليا !! هيهات وحامظ على بوزك تاخذها فاهم !! انصدم بدر : سلوى !! ومنو قالك اني ابختار سلوى ؟؟ بوبدر : بدور هالحركات ما تمشي علي وانا ابوك .. ادريبك عدل حاط عيونك على سلوى ومن زمان .. ولسبب هذا اقولك انسى هالشي .. سلوى ما تصلح لك بدر : والله العظيم مو حاط عيوني على سلوى ولا على غيير سلوى !! بوبدر : تحلف او ما تحلف ما عاد يهم هالشي .. واليوم بتيي معاي لبيت عمك نخطبها لك .. فزهب حالك من الحين ومو تنسى .:. وبعدها .:. سال بدر : ومنو من بنات عمي اللي بتخطبها لي ؟؟ بوبدر : الدانه بنت عمك جاسم انصدم بدر وما استوعب : شنوووو !! الدانه الدانه ما غيرها !! بوبدر : اي نعم الدانه وشفيها يعني ؟؟ تضايق البدر : ما فيها شي بس انا ما افكر بالدانه ومستحيييل افكر فيها لو شنوو !! عصب ابوه : مو على كيفك .. واليوم بتشرف معاي لبيت عمك جاسم وبنخطبها لك وتخسي اتقول شي ما اقتنع البدر : لكن يا يبه انا ما ابيها .. اختار لي اي ابنيه غير الدانه .. نجلا او نور او لميا مثلا !! لكن الدانه ما ابيها !! ما ابيها !! بوبدر : وليش ان شالله ما تبيها ؟؟ هذي الدانه بنت عمك ومن لحمك ودمك .. شوف بدور ماكو غير الدانه وهي الانسب لك ولو شتسوي ما راح اغير رايي .. وعالساعه 7 بالليل زهب نفسك ومو تنسى .. فاهم ؟؟ .:. وبعدها طلع ابوه من الدار وهو متنرفز وهم معصب .. وتم البدر متضايق ومو مستوعب هالشي اللي اهو ما يبيه ومغصوب عليه .:. .:. وبعدها بدقيقه رنة نغمة المسج .:. فتح المسج وقراه وهو متضايق : يا البدر شلونك اليوم ؟؟ اشتقتلك .. اممم ادري بتقولي انك ما اشتقت لي لانك ما شفتني وهم ما اتعرفني .. عموما يالله قووم وراك جامعه .. واتمنى انك قايم قبل هالمسج .:. وبعدها .:. تنهد البدر : تسالين عني ؟؟ والله ان حالي ما يسر يا ابنيه .. الوالد بيخطب لي اليوم الدانه بنت عمي وانا الصراحه ما ابيها .. قوليلي شاسوي ؟؟ بس شلون بتقولين لي وانتي من الاساس مو سامعتني ومو داريه بشي ؟! *************** .:. ابيت ساندرا .:. استغربت ساندرا من طلب جوزيف : وانت شنو باداك برئم امنه ؟ ابتسم جوزيف : هايك .. بتعجبني هالصبيا ساندرا : بس امنه ما عاندها موبايل جوزيف ( يسال ) : وانتي كيف ابتحكي مع سلوى ؟ ساندرا : بحكي معها بالموبايل تعبها جوزيف : اممم .. طيب اعطيني رئم البيت ساندرا ( تسال ) : وشو بادك فيه ؟؟ جوزيف : بادي احكي مع امنه .. التليك بتعجبني هالصبيا وبعدها سالت ساندرا : انت بادك تلعب عالصبيا يا جوزيف ؟؟ غمز جوزيف بخبث : تئريبا *************** .:. ابيت بوبدر .:. .:. كان بوبدر ينادي سلوى .:. طلت سلوى من الدري تسال : هلا عمي بغيت شي ؟ اشر بوبدر : البسي وانزلي بسرعه استفهمت سلوى : ليش ؟ اشصاير ؟؟ بوبدر : مو انا قايلج امس بنروح المحل انشوفج لج اثاث للدار !! سكتت سلوى لثانيه وقالت : ان شالله عمي .. دقايق واكون جاهزه ***************