رواية اسيرة البدر - الفصل 5 - مكتملة | روايتك

الحلقة 5 .:. بو بدر وهو ماسك اعصابه : انتي ما تسمعيني او تتصيمخين يعني ؟ اكلمج انا !! اوقفي .:. وهم ما ردتت .:. .:. حس بدر ان بيصير شي من هالعناد .:. صرخ بو بدر معصب : قلت لج اوقفي !! .:. وبهالحظه اوقفت سلوى بس ما التفتت .:. وسالت ببرود تام : خير عمي بغيت شي ؟؟ مسك بو بدر اعصابه على كثر ما يقدر : سلامتج ما بغيت شي .:. وبعدها كملت مشيتها .:. وسال بدر مستفهم : عسى ما شر يبا ؟ التفت بو بدر على بدر معصب : وانت شكو ؟ ادخل دارك وانت ساكت .. ولا تتليقف باللي ما يخصك !! .:. استغرب بدر من موقف ابوه ودخل داره وهو مو فاهم شنو سبب هالعصبيه .:. *************** .:. دخلت الدانه البيت والحزن كان امبين من عيونها .. كانت امها قاعده بالصاله اتشوف تليفزيون واستغربت ييت الدانه بهالسرعه .:. ام دانه ( تسال ) : عسى ما شر ؟ ليش راجعه البيت هالحزه ؟ مو كانج طالعه من توه !! ابتسمت دانه متظاهره بالسعاده : حفلتها كانت بسيطه وتونا امخلصين .:. استغربت ام دانه والتفتت للساعه اتشوف الوقت .:. ام دانه : اشدعوه ؟ الساعه ثمان توه امبجر !! شنو هالحفله اللي بساعه بس !! ابتسمت دانه مره ثانيه : مو حفله يمه عيد ميلاد ام دانه : ما هو نفس الشي .. حفله او عيد ميلاد .. ما يمديكم اتسون كل شي بساعه !! .:. وبعدها اسكتت الدانه وما عرفت شتقول .:. سالت امها مستفهمه : انتي اتقصين علي ولا شنو ؟ يعني ما تبين اتقولين لي ليش راجعه امبجر ومخليه البنات ؟ توهقت دانه : ما ادري يمه .. بس حسيت ان راسي عورني وحبيت ارد البيت استغربت امها : توج اتقولين خلصتوا والحين اتقولين راسج يعورج !! .:. شافت الدانه امها بصمت .:. ام دانه ( تسال ) : اشفيج ساكته ؟ بما اني اعرفج عدل اكيد احد قط عليج كلمه او 2 وانتي كالعاده ما استحملتي وحبيتي تنحاشين من هالموقف عدل كلامي ؟؟ .:. شافت الدانه امها بنظرة حزن .. يعني اي عدل كلامج يا يمه .. تنهدت امها بدون ما اتقول شي وراحت عنها .:. *************** .:. مر اليوم بسرعه بنظر البنات اللي كانوا مستمتعين بيوم الميلاد .. ولكنه مر ببطئ بنظر الدانه اللي ما قدرت تنام الليل وهي اتفكر بالموقف اللي اسوته .:. *************** من صباح الله خير نغمة رنة المسج .. كان دايخ حده بس مسك الفون وفتح المسج وقرا المكتوب .:. || صباح الخير يا اغلى الناس .. يالله قوم .. بسك نووم .. ادري انك نايم || .:. وبعدها .:. قام بدر من سريره متنرفز : حسبي الله عليج من ابنيه .. قومتيني من النووم امبجر واليوم اليمعه !! *************** .:. كانت سلوى قاعده بدارها .. وفجاه رن موبايلها .. شافت رقم المتصل وكانت ساندرا .. وما كان لسلوى خلق انها اترد عالاتصال .:. امنه ( تسال ) : اشله ما اتردين عالفون ؟ سلوى : مالي خلق امنه : عالاقل شوفي منو اللي داقلج من صباح الله خير !! سلوى : هذي ساندرا امنه : اذا ساندرا عيل زين اتسوين انج ما اتردين استفهمت سلوى : وليش يعني ؟ امنه : من الموقف الحقير اللي سوته بالمسكينه دانه ولو انا اللي كنت بمكان الدانه جان مت بجي سلوى : بس اهيا سوت لها اهي وما سوت لي انا استغربت امنه : يعني انتي راضيه باللي سوته ؟ سلوى : لا طبعا .. بس انا اقولج يعني انها ما احرجتني انا عشان ما ارد عليها .. بس هذا مو معناته اني راضيه على موقفها .. راح اتصلها بعدين بس مو قبل ما اكلم الدانه واشوف شخبارها بعد اللي صار .. *************** .:. صارت الساعه 11الظهر .. توه بو بدر يبي يفتح باب غرفة بدر عشان يصحيه للصلاة كالعاده .. الا شافه فاتح باب الدار قبله .:. استغرب بو بدر : بدر قاعد بنفسه !! والله شي غريب !! ضحك بدر : لا يبه .. ماكو شي غريب ولا شي .. ومن يوم ورايح بقوم بنفسي ان شالله استغرب بو بدر مره ثانيه : سبحان مغير الاحوال ابتسم بدر وقال لنفسه : مو مني .. من هالبنت المزعجه اللي كل صباح الله خيير امأذيتني بمساجاتها المجهوله *************** .:. في بيت بو دانه .:. .:. كانت الدانه منسدحه عالسرير وكانت الساعه 12الظهر تقريبا .. حست نفسها انها ما نامت واييد من كثر التفكير بموقف امس .. ما نامت لين الساعه 4 الفير .:. .:. وتوها تبي اتقوم من السرير الا يرن موبايلها وكانت سلوى المتصله .. بالبدايه رن الموبايل ليمن سكر بنفسه وما كانت حابه اترد .. وبعدها رن للمره الثانيه وفتحت الخط .:. دانه ( بصوت هادي ) : هلا سلوى سلوى : اهلين دانووه شلونج ؟؟ دانه : بخير .. الله يسلمج .. انتي شلونج ؟؟ سلوى ( بضيق ) : انا متصله عشان اسالج عن اخبارج وخاصه بعد اللي صار امس فماله داعي تساليني عن اخباري لاني متضايقه من الموقف اللي .. قاطعتها دانه : حصل خير حبيبتي وانا ادري ان انتي مالج يد باللي صار وماكو داعي والله تتضايقين عشاني .. واذا على موقف امس اني هديتج ومشيت السموحه منج بس غصبا عني تضايقت من الشي اللي سمعته .. اما الحين انا بخيير والحمدلله حست سلوى بالراحه : متاكده من هالحجي ؟ يعني مو شاله بخاطرج علي او شي !! ابتسمت دانه : متاكده ابتسمت سلوى بالمثل : فديتج والله ريحتيني .. يعني صافي يا لبن !! دانه : صافي يا لبن *************** .:. عالساعه1 الظهر .. طلع بو بدر وبدر ونايف من المسيد .. بو بدر رجع البيت .. ونايف طلع مع ربعه .. اما بدر وده سيارته للوكاله لانها محتاجه لبعض التصليحات .:. .:. وهو بالطريج سمع رنة نغمة المسج اللي اعتاد دوم وكل يوم يسمعها .:. فتح المسج وقرا المكتوب : اعتقد ان الصلاة خلصت الحين .. انا يا البدر بغيت اطلب منك طلب .. اهو بصراحه طلب صغير وما بيتعبك بشي .. ابيك ما عليك امر اتمر مكتبة الفجر اللي بالمرخيه .. وتسال الهندي اللي قاعد هناك ان اكو ضرف ابيض صغير باسم البدر .. اخذه وافتحه وبعدها بقولك حق شنو !! على فكره انا مو قاعده استهبل معاك او استعبط .. السالفه جد واتمنى انك تقصد المكتبة الحين .. تعجب بدر من هالمسج : قومي انزين .. انا مينون اضيع وقتي مع وحده ما اعرف من اتـكون ! غير انها مسمية نفسها اسيرة البدر !! ماكو غير اني امسح هالمسج واطنش !! *************** .:. ابيت بو خليفه اخو بو بدر الكبير .. كانت نجلا اتسولف بالفون .. ونور تقرا مجلات .:. دخل عليهم خليفه يسال : نجلوه .. نوروه .. ما شفتوا امي ؟ .:. ولا وحده منهم ردتت .. نجلا كانت مندمجه بالسوالف .. ونور بالمجله .:. سال خليفه مره ثانيه : وصمخ يصمخكم انتوا الثنتين .. سالتكم ما شفتوا امي ؟ .:. اشرت نجلا بيدها بلا .. وهزت نوره راسها بلا .:. تنرفز خليفه : ما منكم فايده .:. وفجاه .:. خير خليفه يمه بغيتني بشي ؟ اسمعك تسال عني ؟ التفت خليفه على امه بابتسامه : هلا والله بالغاليه .. هلا والله ضجكت ام خليفه : اه منك يا العيار اكيد تبي شي !! ابتسم خليفه : تقريبا اسالت امه : خير يمه اشبغيت ؟ خليفه : مو اهني يمه .. تعالي الدار *************** .:. وصل بدر للوكاله .. وتوه نازل من سيارته الا نغمة رنة المسج .. تنرفز من كثرة هالمسجات اللي توصله .. وقبل ما يفتح المسج توقع انه من البنت السنداره .:. وبالفعل فتح المسج وقراه : بدر انت وينك ؟ ليش صيفت عالمكتبه ؟ وليش اصلا ما رحت ؟ انا توني متصله المكتبه وسالت الهندي لو شرفت بس قالي انك ما رحت والظرف بمكانه اهناك ما تحرك .. عفيه يا البدر عشاني روح المكتبه واخذ الظرف .:. وبعدها .:. تمسخر بدر : اروح المكتبه وعشانج ؟ ليش ان شالله ومن حظرتج ؟ ومن اتكونين بالنسبه لي عشان اتقولين عشاني !! والله ان بنات هاليومين حالتهم حاله .. فاضين وما عندهم سالفه .. وبعدين شنو يظمن لي انج ابنيه !! مو يمكن اتكونين ريال يستهبل !! .:. ومسح بدر المسج بدون ما يفتكر بشي .:. *************** انت شتقول ؟ مينون ؟ مو صاحي ؟ شارب شي ؟ يمه تكفين اسمعيني وهدي اعصابج شلون ؟ شلون يا خليفه تبيني اسمعك واهدي اعصابي بعد اللي سمعته منك من توه !! تبي تتزوج لي وحده ما عندها اصل ولا فصل !! وياليت لو خليجيه بعد .. لبنانيه وهم مسيحيه ؟ مو صاحي انت ؟ تبي تذبحنا ؟ برر خليفه : وشفيها اللبنانيه ؟ اكاهو عمي بو بدر متزوج لبنانيه !! واذا على انها مسيحيه ان شالله بخليها تسلم مع الايام ام خليفه : لا اتقارن داليا مرت عمك بهالبنت .. وانت عارف عدل ان عمك تزوج لبنانيه بعد ما ماتت مريم مرته القبليه .. وبعدين داليا تزوجت عمك واهي مطلقه وعندها عيال خليفه : شلون يعني ؟ تبيني اتزوج وحده قطريه وانتظر ليمن اتموت عشان اخطب ساندرا ؟ او تبين ساندرا تتزوج وبعدها تتطلق عشان اتزوجها !! ام خليفه : خلفوه لا تقعد تستضرف بدمك !! انا عن نفسي مو موافقه ولا راضيه عن هالزواج خليفه : بس انا احبها يمه .. والله العظيم احبها عصبت امه : حبتها القراده ان شالله قول اميين خليفه : مو زين ادعين عليها يمه .. والله مو زين ام خليفه : وهم خايف من دعواتي عليها وما خفت من ردتت فعلي انا ؟؟ خليفه : انا مو اني ما خفت .. بس قلت لنفسي لو انتوا اتحبوني وتبون راحتي اكيد بتوافقون ام خليفه : وراحتنا احنا انك تنسى هالفكره موليه تضايق خليفه : بس ليش يمه ؟ ليش ؟ انتي قابليها بالاول واعرفيها وبعدين احكمي وقرري ام خليفه : ما ابي اقابلها ولا حتي ابي اعرفها وبعدين حتى لو انا وافقت ابوك لو اتموت ما راح يوافق على هالشي !! فيستحسن انك اتشيل هالبنت من راسك .. واذا كنت تبي تذبح ابوك فاتحه بس بالموضوع !! .:. سكت خليفه وحس انه فقد الامل .. قربت منه امه ومسكت ايدينه بحنيه .:. ام خليفه : يا خليفه .. يا يمه .. انا لو ما احبك وما ابي مصلحتك جان ما قلتلك هالحجي .. وبعدين شنو يظمن لك ان هاللبنانيه مو لعابه !! يعني بالمره انسى السالفه يا يمه وانا ان شالله راح ادور لك على بنت الحلال اللي تسعدك واتحبك تنهد خليفه : بس انا ما ابي الا ساندرا !! وبعدين اهي مو لعابه وانا اعرفها من 4 شهور تقريبا !! ام خليفه ( تحاول تقنعه ) : واهي اسمها ساندرا بعد !! و 4 شهور مدة مو كافيه انك اتعرفها على حقيقتها .. والله يا خوفي امسويتلك سحر وانا ما ادري !! خليفه : لا اتخافين .. لا مسويتلي سحر ولا شي .. اصلا ساندرا مو مالت هالسوالف ام خلفيه : مالت او مو مالت .. انا قلتلك اخر كلامي !! لو تبي تذبح ابوك فاتحه بالموضوع وشوف !! .:. وبعدها طلعت امه من الدار .. وتم خليفه يفكر بكلام امه وهو متضايق .:. *************** .:. توه مخلص من الوكاله الا رن موبايله وكان الرقم لشخص غريب ورد عليه .:. بدر : الو المتصل : السلام عليكم بدر : وعليكم السلام .. منو ؟ المتصل : انا يبي يكلم واحد اسمه بدر بدر : انا بدر انت منو ؟ المتصل : انا رفيق مال مكتبه استفهم بدر : اي رفيق ؟ واي مكتبه ؟ المتصل : مال مكتبة فجر داخل مرخيه سكت بدر لثانيه وسال : خير ان شالله اكو شي ؟؟ المتصل : انت لازم الحين ايجي داخل مكتبه في سامان مال انت اهني استغرب بدر : سامان ؟؟ ليكون يقصد الظرف ؟ اشسالفتها هالبنت ؟؟ من صجها يعني ؟؟ امخليه الهندي يتصلي من المكتبه عشان هالظرف !! ماكو غير اني اروح المكتبه واشوف شنو اخرتها !! *************** .:. ابيت بو بدر .. امنه وغدير كانوا قاعدين يسولفون بالصاله مع داليا ام نايف .. اما عن سلوى كانت بالدار .. مر بو بدر من الصاله وما شاف سلوى معاهم فستنتج انها بالدار .:. .:. كانت سلوى قاعده اتمشط شعرها واتغني .:. .:. وفجاه .:. .:. دخل عليها بو بدر بدون ما يطق الباب وبسرعه سكر الباب وقفله !! تخرعت سلوى وقامت من الكرسي .:. سلوى ( بخوف ) : عمي !! انت شلون دخلت اهني وبدون حتى ما تطق الباب !