الفصل 25
(25)
التاسعة ليلا. . .#
تجلس هي واختها دلال في الصالة العلوية
وهي تهتف بقهر/ تخيلي دلال خطب لبتال وما قالي. . . اول مرة يسويها بتال ويسوي شي من وراي. . .
تحكمه بعيالي مو معقول.
دلال ابتسمت/ تعوذي من الشيطان مها اللي يزيد اختار لبتال بنت اصول وطيبة أنشهد انه عرف يختار.
يكفي انها من الدخيل بيت عز وحسب ونسب وامها بنت الضاوي. . . لو لفيتي العالم ما لقيتي لولدك احسن منها تعوذي من ابليس وخلي بتال يتهنى بحياته اللي اختارها هو. . .انتي ما تهمك سعادة عيالك. . .؟
اجابتها مها بغصة/ وشلون ما تهمني وانا عندي اهم شي بالدنيا سعادتهم
بس هم اللي مو هامتهم سعادتي. . . سعود يرمي علي كلام مثل وجهه
وبتال راح يتزوج اللي ما ابيها. . . حتى يوسف عاندني وهذا هو بيكمل دراسته برا.
دلال ربتت على كتفها بحنية/ حبيبتي مها تراك شايلة الدنيا كلها فوق راسك وهي ما تسوى
خليهم يسوون اللي يبونه وانتي عيشي حياتك بعيد عن مشاكلهم
لو عاندتيهم بيعاندونك. . . حدادك ما بقى عليه شي ويخلص مو مبسوطة. . .؟
ابتسمت مها وكأن الحزن تبدد شيئا فشيئا/ وشلون مو مبسوطة بس. . .؟ الا بطير من الوناسة
اول شي بسويه بروح املك لسعود على اونيلا وبعدين بروح لباريس بسوي حفلة هناك
بناتك وعدوني يصيرون موجودين. . . وانتي بعد لازم تحضرين حفلتي.
دلال بهدوء/ لا فكيني من الحفلات. . . بناتي اعتبريهم بناتك واخذيهم مثل ما تبين
بس انا اعذريني اول شي ما احب اسافر برا وبعدين مو يم الحفلات.
مها برجاء/ تكفين ام خالد عشاني. . . خلي كل الناس يشوفونك انتي وبناتك معاي.
دلال ابتسمت/ اذا قدرت ابشري. . . انتي عازمة احد. . .؟
مها بإبتسامة جانبية تحمل الكثير من الالم/ من وين اعرف احد يا حظي. . .!!
عزمت نور اخت مشعل تقول اذا فاضية بتجي.
دلال استغلت الفرصة/ انتي للحين تطلعين مع مشعل. . .؟
لن تصمت مها هذه المرة لتقول بحدة/ ومستحيل استغني عنه ومكالماتي معاه ما انقطعت ولا يوم
مشعل مثل ولدي وتعودت على وجوده بحياتي وما احد له كلمة علي.
استغربت دلال هجومها لتقول/ وش فيك. . .؟ انا اسألك بس.
مها وضعت رجلا فوق الاخرى والغضب يتملكها/ كل شوي مألفين على قصة
مرة يقولون احبه ومرة يقولون بنتزوج. . . انا احب مشعل بس يشهد الله انه مثل عيالي.
دلال لا تحب علاقة اختها بمشعل فهمها تكون طبيعتها يبقى مشعل ليس محرما لها
وخروجها معه محرم/ مهما كان يبقى غريب عنك.
ابتسمت مها لتقول/ اقرب لي من روحي. . . تصدقين يفهمني اكثر من عيالي
لما قلت له بتال يبي عريب قال لو كنت بالرياض املك عليها ولا يضيق خاطرك.
دلال اجابت بحيادية/ عريب ان شاء الله من نصيب بتال. . . هه شوفي انخطبت وتفركشت خطبتها.
هتفت بغيظ/ دام الشيخ يزيد مع بتال وناوي يزوج بتال عريب لو يخطبونها مليون ما راح تتزوج.
دلال برجاء خاص/ تكفين مها لا تزعلين على بتال وتغثينه والله ما يستاهل
سوي نفسك راضية بهالزواج ولا تضايقينه. . . صدقيني لو رفضتي زواجه ما راح يبقى بالرياض
هو اصلا قالي اذا امي بترفض زواجي وتنهيه ما اقعد بالرياض واسافر اي مكان ولا عاد تشوف وجهي.
ردت مها بهلع/ يتزوج اللي يبي اهم شي ما يبعد عن عيني. . . يكفي هم يوسف اللي ما ادري وشلون بصبر على بعده
كل شي عندي ولا يتركوني عيالي. . . مجنون بتال والله يسويها.
-
ضحى الاثنين. . .اليوم التالي
استدعاها والدها الذي يجلس في الصالة الواسعة
نزلت السلم وهي تعلم انه سيحدثها عن خطوبة بتال
قبلت رأسه وجلست بجواره وهو يقول/ يسعدلي صباحك.
احتضنت عريب عضد والدها وهي تقول/ صباحك اسعد.
هتف والدها/ من وانتي صغيرة وانا اتمنى ما ياخذك الا اللي يستاهلك. . . والحين جاء اللي يلبق لك وتلبقين له.
ابتسمت لحديث والدها وهي تدعي انها لا تعلم شيء عن خطوبة بتال لها/ يبه مو انهينا موضوع فارس خلاص. . .؟
الله يعوضه باللي احسن مني. . . بعدين الحمدلله الرجال ما اخذ بخاطره ولا شي
تدري يبه قالي انا ما اعرفك ولا اعرف عنك شي الموضوع ببساطة كنت حاب اناسب منذر
وهذا منذر يقول بيخطب اخته. . . الحمدلله عدت على خير.
هتف والدها بإبتسامة واسعة/ لا يبه ما اقصد فارس. . . خطبك مني امس بتال ولد محمد
الف وحدة تتمناه. . . نعرفه ويعرفنا وما يحتاج تسألين عنه امك تعرفه من صغره
ويزيد ولد خالتك يقول ما يناسب عريب غيره. . . هو يبي الرد بهاليومين واذا الله كتب نصيب كتب كتابكم الخميس.
تتمنى لو انها لم تُخطب لفارس لوافقت على بتال دون ادنى تردد
اجابت والدها بدلع/ يبه ما ابي زواج ما ابي اترككم.
قبل والدها رأسها واجابها/ يا يبه هذي سنة الحياة ومصير كل بنت تتزوج وتشوف حياتها
وبعدين مو رايحة بعيد تبقين بالرياض ومتى ما بغيتينا تجينا.
اجابت والدها ودموعها تغرق عينيها/ ما ابي يبه والله ما ابي.
انصعق والدها من دموعها/ عريب وش فيك. . . فيه شي انا ما اعرفه. . .؟
تكلمت بكل شفافية/ يبه انا ما ابي الناس تتكلم علي بالعاطل شي بديهي بيعرفون سبب فسخ خطوبتي من فارس عشان بتال
انا ما ابي سمعتي تتشوه عشان موضوع مثل هذا. . . خلاص قوله ما فيه نصيب.
كلامها صحيح ولكن هو وعد بتال/ يا بنتي الاهم صورتك قدام ربك الناس ما راح تسلمين من كلامهم.
اجابت والدها بكل صدق/ لو خاطبني بتال بغير هالوقت صدقني وافقت بدون تردد
بس الحين والله صعبة يعني توه الخميس فسخت خطوبتي تبي بأقل من اسبوع وانا متملكة. . .؟
فارس بنفسه بيشك بالموضوع. . . وتعرف الناس ما يصدقون ويلقون سالفة الا هي واصلة اقصى الدنيا.
قبل رأسها لهتف بحب/ الله لا يحرمني من هالعقل الكامل. . . يبه بقول لبتال يأجل الموضوع شهرين ثلاثة. . . تمام. . .؟
اجابت والدها وهاجس مها يغزوها/ ما ابي بتال اصلا. . . امه ما تحبني ولا تحب امي
وانا ما ابي حياة فيها مشاكل.
هز والده رأسه/ الله يكتب لك الخير والخيرة.
-
الرابعة عصرا. . . في سيارته عائدا الى المنزل بعد انتهاء عمله
تلقى خبر رفض عريب لبتال
اشتعل غضبا وهو يبحث عن رقمها ضمن قائمة ارقامه
اتصل واجابت سريعا/ هلا يزيد.
تحدث وهو يحاول السيطرة على نفسه حتى لا يصرخ بها/ هلا بك. . . وش سبب رفضك لبتال.
استغربت منه بشدة لتقول/ ما ابيه وبس. . . ابوي ومنذر ما عارضو على هالشي عشان تعارض انت.
اجابها بحزم/ اصلا ما يمديك تفكرين ردك على بتال بيكون يوم الاربعاء
خذي راحتك وصلي استخاره وبعدين ردي علينا.
غضبت منه/ كأنك بتجبرني على اخوك يا ولد خالتي. . .؟!!
اجابها بإبتسامة جانبية/ تأكدي لو اقدر ما قصرت . . . بتال ما ينرفض. . . ابي لك الزين والله.
عريب اجابته برجاء/ تكفى يزيد بلغ اخوك رفضي وخلاص انا اصلا ما ابي اتزوج . . .غضب هو. . .؟
يزيد لم يقتنع بردها ليقول/ مثل ما قلت لك ردك بيكون الاربعاء. . . الحين بعتبر نفسي ما سمعت شي.
عريب انفعلت/ انا قررت وخلاص.
اجابها بحدة اعتادها عند مشاحناتهم/ عريب تعرفيني زين كلمتي ما اثنيها. . . ردك الاربعاء
وبيكون موافقة مو غيرها.
هي ايضا احتدت لتنطق بغضب/ مو على كيفك. . . زواج من اخوك ما ابي.
ابتسم وهو يتذكر اسلوب ابنة خالته التي يعتبرها اخته
ولتحرر عائلتهم فعريب عاشت مع يزيد كحياتها مع منذر/ خلاص اهدي الحين وروقي وبعد المغرب بجيكم ونتفاهم.
امالت شفتها جانبا/ ليتك للحين بلندن وما شفناك.
ابتسم/ عريب والله ابي لك الزين فرصة ما ابيها تروح عليك.
غاضبة منه جدا/ اعرفه بتال اعرفه. . . بس ما ابيه مو غصب.
شدد على كلماته حرفا حرفا/ ردك الاربعاء مو الحين. . . المغرب بجيكم.
هتفت/ حياك الله.
انتهت المكالمة والهم ينحره كيف يخبر بتال برفض عريب وهو الذي احيا الامل بداخله
كيف يبلغه رفضها وهو الذي فسخ خطوبتها من فارس
يبدو انه سيواجه مشاكل لا تعد ولا تحصى.
-
بعد ساعتين. . . نزلت للأسفل وهي تستنشق رائحة البخور المختلط برائحة القهوة/ من زمان عن الاجواء اللي كذا وش الطاري. . .؟
اجابتها والدتها التي تضع المُبخر على الطاولة الجانبية يسار باب المدخل/ يزيد بيجي. . . يقول يبيك بكلام خاص.
زفرت/ يمه ما ابيه يتكلم معاي بموضوع بتال. . . انا ما ابيه.
ابتسمت والدتها/ عفية على بنيتي. . . بس لا جاء يزيد وقالي اتدخل ترا بسوي نفسي موافقة.
اخبرتهم الخادمة بقدوم يزيد لتقول لوالدتها وهي تصعد السلم/ بلبس حجابي واجي. . . علميه اني ما ابي بتال.
ردت عليها والدتها وهي تنظر لها/ مو شغلي الكلام من راسك لراسه.
ذهبت الى حجرتها لتسحب طرحتها السوداء وتلفها على رأسها بسرعة
لباسها بنطلون ازرق وبلوزة بيضاء تصل الى اعلى ركبتيها
نزلت للأسفل وهي ترى يزيد يقف للسلام عليها
صافحته بسرعة ليهتف لها/ وش أخبارك. . .؟
جلست على يساره لتقول بضيق/ بخير.
يزيد اتسعت ابتسامته/ افا يا بنت الخالة زعلانة. . .؟
اجابته وضقها يتجذر/ لا. . . بس فكني من مواضيعك.
ابتسم لخالته التي باللتو انضمت لجلستهم ونظر لعريب/ انتي تعرفين ليش جاي.
عريب تشعر بضيق شديد فهي تود الموافقة ولكن مبادئها ترفض ذلك
عاشت جميع سنوات عمرها بأطيب سمعة أ تفسد سمعتها بزواجا حُكم عليه الفشل قبل بدايته
فوجود أمرأة كمها عدوة لها سيفشل كل شي فلا يوجد ندا لمها ابدا/ اعرف. . . خلاص برد عليك الاربعاء.
ضحك وهو يعلم انها قالت كهذا حتى لا يناقشها/ بس ما كان هذا كلامك لي العصر. . .؟
عريب برجاء/ تكفى والله ضاق خلقي من هالموضوع انا ما ابي اتزوج وخلاص.
رفع حاجبه وهو يشعر بقليلا من الغضب/ وش أسبابك. . . جاوبيني بصراحة.
شبكت كفيها ببعض بتوتر بالغ/ السبب انه خايفة على سمعتي.
عقد حاجبيه بإستفهام/ وش دخل سمعتك. . . شايفة شي على بتال. . . ؟
هتفت بسرعة/ لا مو رافضة بتال نفسه رافضة الفكرة كلها . . . يعني الخميس فسخت خطوبتي من فارس
وانا اللي مكلمته بنفسي وقايلة ما ابيك تبي بعدها بأسبوع ملكتي على بتال. . .!!!
لا والله جنيت السمعة الزينة بين الناس. . . اكيد الكل بيشك بالموضوع.
كلامها لم يقنعه ابدا/ خليك من هالخرابيط. . . اخوي ما راح ابلغه رفضك وانا اللي زرعت فيه الامل بعد ما كان يأس.
اجابته بغضب شديد/ والله اذا سمعتي ما تهمك فهي تهمني. . . مستحيل مستحيل ارضى يصير لي هالشي. . .
خلاص امي او ابوي يبلغونه رفضي ليش انت. . .؟!
انزل فنجانه بغضب/ عريب صعبة ترفضين بتال. . .اخوي متعلق فيك وما يبي غيرك.
شدت من ضمها لكفيها محاولة اخفاء ارتعاشتها/ أدري.
نظر لها بإستغراب/ تدرين. . .؟!
أجابته بخجل/ من زمان. . .
لا تعلم كيف تتحدث، ليس هذا موضوعهم هتفت/ المهم ما ابيه.
نظر الى خالته/ ما تقولين شي يا خالة. . . بنتك متناقضة.
نظرت فاتن الى ابنتها/ يمه على الاقل قدري عنوة يزيد.
ضحكت بسخرية/ الله والعنوة ترا كلها مسافة شارعين.
هتفت والدتها/ يمه اللي خطبك رجال وفيه الخير. . . وش المانع لو وافقتي. . .؟ ماني فاهمتك ابد.
اعادت عريب كلامها التي وضعته والدتها برأسها فأصبحت تفكر به بقوة/ المانع سمعتي اللي بتتشوه
لو سامعين بوحدة فسخت خطوبتها ومامر اسبوع الا وهي متملكة شي طبيعي بنقول صاير شي.
هتف يزيد/ تدرين وشلون يا العنيدة. . .؟ بقول لبتال البنت موافقة بس تبي اعلان الخطوبة والملكة بعد شهر.
اجابته عريب بإعتراض/ شهر قليل.
ابتسم وهو يعلم ان لا مانع لديها من الزواج ولكن فعلا هاجس سمعتها هو السبب/ ولا يهمك بعد شهرين ثلاثة.
هتفت فاتن بأعتراض/ لا ما تصير مها حماة بنتي. . . صدقني الزواج فاشل قبل لا يبدأ اصلا.
يزيد نظر الى خالته بمعنى ليس وقته/ مها مالها شغل وبيت بتال بيكون مستقل.
فاتن تداركت نفسها/ اخاف تضر بنتي. . . تعرف زوجة ابوك عقربة ما يسلم منها احد.
يزيد هتف برجاء/ تكفين فكينا من هالسيرة. . . مها والله مالها كلمة على عريب ولا راح تحتك فيها.
ثم نهض وهو يقول/ ترا بقول لبتال الخطوبة والملكة بعد شهرين. . . فمان الله.
هتفت خالته/ وين بدري. . . ما نشوفك الا بالشهر مرة وبتمشي بهالسرعة. . . والله ما تمشي الا انت متعشي عندي.
ضحك يزيد/ بالشهر مرة وانتي مضيفتني ثلاث ايام ورا بعض. . .؟
فاتن/ خلاص انا حلفت عشاك الليلة عندنا.
-
مضت الأيام. . . يوم الاربعاء.
الساعة التاسعة صباحا
يرن هاتف يزيد ليرد بإبتسامة/ هلا والله بالغالية.
اجابه الطرف الثاني/ هلا بك حبيبي. . . انا وصلت الرياض ومحتاجة بيتك ما ابي اشوف مها.
ابتسم/ خالتي امس خلصت حدادها اليوم بتسافر لباريس. . . رحلتها الظهر.
هذا الخبر اسعد هيا/ ابركها من ساعة. . . على كل الحالتين بجلس ببيتك معاي عيالي.
اجابها بصدق/ البيت بيتك يا الغالية. . . اخيرا جيتي للرياض. . . وينك الحين بجيك مشتاق لك حيل.
امالت شفتيها ببغض/ عند اخت علي بنسلم عليها ونتغدا عندها ونمشي. . . مجاملات اجتماعية.
ضحك يزيد/ انتي اصلا فيه احد تحبينه. . .؟
اجابته بصدق/ انا ما كرهت الا السطحيات اللي ماخلو خلق الله بحالهم. . . يتدخلون بكل خصوصياتي
اصلا انا وين وهالسوالف وين ما عندي لها وقت. . . خلها زي مها حقودة ولا هي حشرية ونمامة وفتانة.
اسلوب عمته يجعله يضحك كثيرا، ثم يهتف/ والله اني مشتاق لك ومشتاق لسوالفك. . . متى تجين. . .؟
هتفت بحب/ ياعمري انا اكثر والله. . . بجيكم ان شاء الله بعد صلاة العصر.
انتهت المكالمة بحب كما بدأت وهو يودعها آملا لقاءها بعد ساعات قليلة.
-
بعد ساعتين. . . الحادية عشر
تجلس في غرفتها وخبيرة التجميل تزين وجهها الجميل بالمساحيق التي زادتها جمالا
مكياج خفيف جدا ولكن للخبيرة لمسات سحرية جعلته يبرز ملامح وجهها الجميلة
تبدو غاية في الجمال والتأنق وكأنها احدى نجمات هوليوود
وشعرها البني حديث الصبغ عملته لفات غليظة
متأنقة ومتجملة وسعيدة جدا فهي ستذهب لحريتها وسعادتها.
رن هاتفها لتتناوله من على التسريحة وترد بترحيب حار/ هلا والله بمطول الغيبات يومين ما تكلمني. . . وين غاط. . .؟
ابتسم وهو يسمع اثير صوتها الجميل/ هلا بالغالية. . . اتغلى.
ضحكت وهي تجيبه/ يالعيار عارف غلاك وش كثره. . . وش الموضوع اللي ارسلت لي امس تقول بكلمك فيه.
اشارت لخبيرة التجميل بأن تذهب بعدما انهت عملها
اجابها مشعل وهو يركز نظره على الشارع امامه/ اتصلت علي اونيلا امس تقول انها حامل بالشهر الثالث. . . ومستعدة تنزل الجنين عشان سعود. . . قلت لها ارد لك بكرة. . . وش رايك ام سعود.
صدمها خبر حمل اونيلا فهو سيخرب المخطط بالكامل/ مدري مشعل وش رأيك. . .؟
اجابها بهدوء/ من رايي تخلين سعود يصرف النظر عنها. . . انا ما ادري ليش احسها تكذب بس بتبين انها تضحي بكل شي عشان سعود.
مها ردت فورا/ اصلا سعود مشغلني يقول ما ابيها. . . خلها تولي. . . بس اخاف تبلغ ان زوجها مقتول وتصير مشكلة.
مشعل/ لا تخافين هي ما تملك اي دليل وبعدين هي القاتلة ما راح تبلغ.
مها/ الفيديو اللي صورنا للحين عندي بس اصواتنا طالعة بوضوح شوف حل للصوت وبنزله وننشره وخلها تروح بستين داهية.
ابتسم مشعل/ الله عليك. . . خلاص بس تجين باريس نشوف الموضوع مع بعض. . . انشهد انها بتنور باريس.
مها/ وقريب ان شاء الله بتنور فيك الرياض.
انتهت المكالمة، استدعت سعود الغاضب منها حتى الان
دخل سعود العائد من الشركة/ خير يمه وش فيك. . .؟
ابتسمت وهي تتجه له/ عندي لك بشارة.
ابتسم/ بشري. . .؟
../ خلاص فكيتك من اونيلا نهائيا.
استغرب بشدة/ وشلون رضت. . .؟
هتفت/ مو مهم وشلون رضت او كيف الطريقة الاهم انها خلاص طلعت من حياتك قبل لا تدخلها حتى.
هتف ببرود/ ما تفرق معي. . . انا ما ابي الا عايشة.
عادت الى كرسيها وهي تهتف/ اجل جعلك ما تزوجت ان شاء الله. . . انا اصلا وش دخلني فيك. . .؟
ولعلمك عايشة متزوجة من ثلاث شهور ونسيتك ونسيت ايامك وانت للحين تبكي على ذكراها.
فتح عينيه بصدمة/ متزوجة من ثلاث شهور وما قلتي لي. . . ؟ انا ما خليت ديرة ما دورتها فيها
يمه ليه تدورين شقاي. . .؟
تنظر الى طلاء اظافرها الاحمر وهي تقول/ ما ابي الا سعادتك. . . عايشة ما تصلح لك
بتصير مثلي يوم تزوجت ابوك ما اصلح له ولا يصلح لي.
اجابها بسخرية/ ايه يصلح لك مثل مشعل.
نظرت له بحدة لتهتف/ انا أمك لا تنسى. . . ماله داعي هالكلام
وتأكد لو ابي اتزوج تزوجت ما طقيت لكم خبر.
رفع حاجبه بغضب/ وليش ما يصير لي الحق اتزوج ما طقيت لك خبر.
وضعت عينها بعينه وهي تنهض/ منعتك عن شي أنا. . .؟ أدري عن زواجاتك اللي مالها عدد
وأدري بعد عن خرابيطك وعلومك اللي تسود الوجه بس ما ابي اعترض لانه هالشي يسعدك
أعترضت بس على عايشة شفت أني واقفة بطريقك وبحرمك من سعادتك
متخيل من بعد وفاة ابوك اللي تو كمل اربع شهور جبت لبيتي 3 من حريمك يعني حياتك مو اوفر وبس تعدت الاوفر
ما رديتك عن هالشي ابد. . . ويوم حسيت اني خانقتك بأونيلا وانت ما تبيها خلصتك منها
خلاص سعود الكلام بينا دايم يسم البدن. . . اطلع لبيتك انت مرخوص
البيت هذا ما يبقى فيه الا عيالي اللي يحترموني ويحطوني فوق راسهم
يزيد ولد ضرتي عمره ما قل ادبه معاي زيك.
قبل رأسها ثم هتف بجمود/ طالع من هالبيت قبل ما تقولين. . . وعشانك بس ببقى ببيتي بس ما احد له شغل فيني.
مها تغالب دموعها واختناق صوتها/ ما احد له فيك شغل. . . كل اللي اتمناه تفكني من اتهاماتك الباطلة.
-
بعد صلاة العصر. . . يجلسون مع عمتهم هيا التي باللتو وصلت
سعيدة جدا بهذه الجمعة التي تلم ابناء اخيها حولها
فهي اشتاقتهم بقدر شوقها لاخيها الراحل
بعد ان طال الحديث عن الاخبار والذكريات هتفت بإبتسامة/ من زمان عن هالجمعات الحلوة
وانتم على كثر سفرياتكم ما تتذكرون ان لكم عمة تشتاق لكم ولازم تسلمون عليها.
هتف يزيد بإبتسامة/ انا طبعا مرفوع عني العتب ثلاث شهور قضيتها بلندن منقطع عن العالم بأكمله.
ربتت على كتفه بحب فهي لا تنكر انها تحبه اكثر من حبها لابناء مها/ وأنت متى تترك هالطبع الخايس. . .؟
تبهذلنا وحنا ندور عليك. . . كل الطواري الشينة طرت علي.
رد عليها بمرح/ اقولكم بروح للندن عشان من ثاني يوم وأنتم طابين علي. . .؟
هيا اجابته بسرعة/ لا لا تقول. . . بس بلغنا انك بتسافر عشان ما نقلب الدنيا عليك.
اجابها يوسف بإبتسامة/ هو قال لأمي بس حلفها ما تقول لنا.
نظرت هيا بشك الى يزيد/ لا صدقتك. . . قلت لمها وما قلت لخالتك فاتن. . .؟
اصلا من متى ومها تدري عن اخبارك. . . واكيد ما صدقت خبر وما تبي تعلم احد تلقاها لاعبة بذيلها من وراك.
لم يتمنى يزيد ان تتحدث عمته بهذه الصورة عن مها امام اخوته
مهما تكن فهي امهم، يتمنى ان لا تتحول هذه اللمة اللطيفة الى معركة كلامية
تحدث سعود بهدوء/ عمتي احترمي امي بوجودنا بس. . . ما نرضى هالكلام عليها.
وضعت رجلا فوق الاخرى والغضب يعتريها/ انتم على عيني وراسي بس امكم ما اطيقها.
تحدث هذه المرة يزيد وهو يشير لبتال ان يصمت/ خلاص عمتي سكري الموضوع
خالتي راعية البيت وحشمتها وتقديرها واجب بحضورها وغيابها.
زفرت بأوف/ شكله انا اللي راحت حشمتي وتقديري مع وفاة اخوي الله يرحمه. . .
نهضت واخذت حقيبتها وعبائتها/ اشوفكم بوقت ثاني افضل.
نهض بتال سريعا وامسك بيدها وقبل رأسها/ والله ما تطلعين وانتي زعلانة.
تلاها قُبل على رأسها من ابناء اخيها جميعا، رغم انها هي المخطئة ولكن رأو ان خروجها من منزلهم غاضبة
عيبا بحقهم فهذه عمتهم الوحيدة.
جلست وهي تقول بشيء من الغضب/ لا احد يجيب طاري مها عشان ما ازعل. . .
ثم نظرت الى بتال/ وانت بعد ما ادري عن خطوبتك الا من فاتن. . . ؟ شايلة بخاطري عليك والله
ابتسم/ والله ما صار شي يا عمتي اجلو الخطوبة الى بعد شهرين.
انتهى. . .