الفصل الثاني
رواية عزوتي
الحلقة1
عمر: يلا يابابا امشي جهزي شنطتك باش تروحي معاي
سالي: شافت لخوتها بصدمة وخوف😰
تميم: كيف كيف شن تجهز شنطتها وشن تروح معاك
عمر: اي تمشي تعيش معاي وتقعد مع مرتي احسن من قاعدة بروحها اهني
غسان: انظني هي مش عايشة بروحها عايشة في حوشها ومع خوتها
عمر: انا عارف في حوشها ومع خوتها بس حوشي احسن تكون مع مرتي وبنتها يتوانسو مع بعضهم احسن من قاعده مع شباب
سالي: مقعمزة جنب خوها همام وماسكة يده بخوف
همام: ماسك يد سالي بقوة وكأنه محسسها بالامان.... اسألها لو تبي تمشي معاك ارفعها
سالي: بصدمة وخوف... لالا م مممنبيش نمشي نبي نقعد اهني😢
عمر: ايح عاد هيا كلمة وقلتها البنت كبرت معادش عندها قعده اهني بروحها مع شباب
عزت:وقف ويشبح لبوه بتحدي وحاط يده في جيوبه.... وهي كلمة يابوي سامحني فيها البنت هدا مكانها ومعندهاش طلعة منها وتم الموضوع.
عمر: وقف وهو معصب.... شن يعني بتكسرو كلامي خلاص معادش فيه لا احترام لا خوف من بوكم
تميم: كلامك واحترامك على العين والراس يابوي ولا اني و لاحد من خوتي بنعصوك ، بس سالي خط احمر سامحني فيها اختنا ونحنا اللي ربيناها من هي صغيرة مستحيل توا نخلوها تعيش بعيدة عنا وتاني شي حتى البنت رافضة تمشي معاك يعني مش غصب هوا وثالث شي والاهم مرتك عندها ولد كيف تبينا نخلوها تمشي تعيش معاه في حوش واحد
عمر: باهي ياتميم باااهي.... وطلع وهو متنرفز
همام: خلي نلحقه نرضيه بكلمتين احسن مايروح وهو زعلان منا.... وطلع لحق بوه
عزت: تي فوته ياراجل يزعل ولا يطربق، توا جاي في اخر عمره تفكر ان عنده بنت وجاي بيرفعها ههه لعب هو
تميم: عيب ياولد في الاخير هدا بوك
عزت: بصوت واطي... ايح لا بوي لا كرناطي يارا فوتني😒
سالي: 😢😢
تميم: تلفت شاف لسالي لقاها تبكي....خيرك حبيبتي اسكتي ماحدش حيقدر ياخدك من حوشك ولامنا
سالي: خايفة😢
غسان: تعالي معاي... مسكها من يدها وركبها لدارها
عزت: وين همام يجي يديرلنا عشانا
تميم: انت صكر فمك ووتعالا نبيك في موضوع
عزت: اي علينا اني مش فاضي لمواضيعك توا... و وقف
تميم: اوقف واسمعني واحترم خوك الكبير لما نكلمك
عزت: وقف بقلة صبر وربع ايديه.... اها تفضل احكي ياخوي الكبير يا استاد تميم🙂
تميم: الطريق اللي ماشي فيها تطلع منها والله ماتصلحش بيك ياعزو
عزت: اما طريق عن شن تحكي
تميم: انت عارفني على شن نحكي، نقصد تهريب الاجانب والهجرة الغير شرعية واتبعلي في ناس ضايعة متعين سوابق حشيش وتعاطي وسرقة والله ياعزو الطريق هدي ماتصلحش بيك ياخوي و حيجي يوم وتندم عليه و...
عزت: قاطعه.... اطمن ياخوي مش حيجي اليوم هدا ومش حنندم على شي واني كبرت عارف روحي شن ندير اطمن
تميم: فوتها الطريق هدي وارجع لدراستك وكمل من وين وقفت واجتهد زي خوك همام
عزت: صبره نفد .... افففف ياتميم اففف خلاص فوتني خليني براحتي اه... خلاه وطلع عنه
همام: خاش واصتطدم بي عزت وهو طالع
عزت: تي حول ياراجل انت التاني ... وطلع وهو متنزفز
همام: خيره هدا🙄
تميم: والله هالولد عناده وتسكير راسه بيضيعوه
همام: ربي يهديه هي نستأدن بنمشي نرقد
تميم: شن مابتتعشوش اليوم ولا شن
همام: اني ماعنديش نية في شي ونبي نرقد بكرا عندي امتحان.... وركب لداره
تميم: اففف ...وقف وخش للكوجينة يدير العشيء
في حوش عمر
وردة : شن ياعمي حتى اليوم مابتش تجي معاك الست سالي😒
عمر: لالا
نبيل: بصوت واطي... الزفت😤
هاجر: انا مش عارفة كيف بوها وماتقدرش تجيبها حتى لو هي ماتبيش المفروض تكرها من شعرها غصبآ عنها
عمر: تي لو البنت بروحها نقدر نجيب امها لكن خوتها هما اللي حاكمين فيها واني الصراحة منقدرش عليهم
هاجر : شني خايف من اولادك ولا شن
عمر: مش خايف منهم بس عندهم الحق اني لي سنين غايب عنهم توا بس بنمشي نرفع البنت منهم😓
وردة: سامحني ياعمي على الكلام اللي بنقوله بس اولادك وبنتك مايتحشموش على اوجوهم لو دايرين قيمة لبوهم ماكنوش ردوك وعصو كلامك
هاجر: الله غالب بوهم هوا اللي مش موريهم العين الحمرة كان هدا مايقدروش يردو كلمته😒
عمر: افففف خلاص خلاص انتي وياها البنت ماتبي تجي خلاص براحتها.... وقف وخش لداره
وردة: اخخخخ يا امي قداش قاهرني راجلك لمنعج هدا
هاجر: امالا اني شن نقول
نبيل: لازم الفرخة سالي تجي اهني انقني نبيها 😍
هاجر: طيح سعدك واني نبيها تجي هنا عشان فلوسها وفلوس امها اللي عندها
نبيل: لنقانها مزززة
وردة: والله حق لو تجي سالي كلنا حنستفيدو 😌
هاجر:وانتي شن بتستفيدي منها ولا بتسرقي لبسها ومكياجها😒
وردة: تي لا ع الاقل لما تسكن معانا اكيد خوتها بيقعدو يترددو علينا واني نصطاد واحد منهم ونتزوجهه🙊
نبيل: ياكلبه تقولي في هالكلام قدامي اقلبي وجهك من بحداي نووضي😤
وردة: ناضت وهي متنرفزة... مالا شن تبي بروحك تتصيع معاها 😒..وهربت
نبيل: مش متربية بنتك اهي يامي ربيها قبل مانقتلها
هاجر: ياسركم انت وياها وخلونا نفكرو في طريقة نقدور نجيبو بيها هالسالي
قبل كل شي نعرفكم بشخصيات ابطال الرواية🔥
* سالي بطلة الرواية : الاخت الوحيدة لخوتها مواليد ال99 جمالها طفولي قصيرة ورشيقة وشعرها طويل ملامحها ع الاشقر دلوعة وكيوت بس هادية وبريئة دلوعة خوتها وهما اللي ربوها وكبروها من بعد ما امها توفت وهي صغيرة
تميم:الاخ الاكبر مواليد87 محامي كبير وشخصية رسمية ومحترم ويعتبر هو المسؤول عن خوته وحامل مسؤوليتهم موصفاته طويل وسيم جسمه وشخصيته يهببببلو
غسان: مواليد ال88 جوه وشخصيته اصغر من عمره شهلول يحب لهياجة والسفر كوميدي العيلة مواصفاته طويل عريض لحية كبيرة😍
همام: مواليد ال91 اكتر واحد هادي وعاقل فيهم يحب قرايته تخصص طب ومواصل في دراسته باش يكون دكتور
عزت: مواليد ال94 مشكلجي بلطلجي شخصية قوية وعصبي ديما يصبغ شعره عنده وشم ف دراعه ضحكته تهبل احلى واحد في خوته عكس طبعه😁
عمر: بوهم👆 من اول ما توفت زوجته أم صغاره مشى تزوج مراءة ارملة عندها بنت و ولد من زوجها المتوفي..طبعآ عمر من لما تزوج طاحت كلمته وشخصيته وقدره لان مرته موريته العين الحمرة بالعامية مخليته استيرسو يمين وحتى من بنتها و ولدها هازيين عليه
غسان: مقعمز جنب سالي.... توا علاش مزال تبكي قلنالك لا بوك ولا خالك ولا عمك يقدرو ياخدوك منا ولا انتي مش واثقة فيا ولا شن
سالي: تمسح في دموعها.... بابا يغيب يغيب ويرجع يجي يبي ياخدني عنده مايبيش يفوتني وكل مانمشي لمناسبات العيلة يقعدو خالاتي وعماتي يحدفولي في دوة لان عايشة مع شباب
غسان: ههههه شن العباطة هدي الشباب هديم خوتك مش غريبين قصدي خيرك يا سالي تسمعي لناس تافهة ماعندهاش شي غير انهم يتكلمو على الناس المهم تعالي نديرو عشاء حسني جعت
سالي: هههه حتى اني جيعانة
غسان: قرص خدودها.... واخيررااا شفنا ضحكتك ياقمرنا ربي يخليك لينا مايحرمنا منك ياطشة
سالي: ويخليكم ليا ياعزوتي😢❤
غسان: مسك يدها و وقف.... يلا نمشو نتعشو
طق طق
تميم: خش لدار سالي ورافع صفرة العشاء.... جبتلكم عشاء على قولت المصريين" انما حاقه ايه حتكلو صوابكم وراها"😋
غسان: ههههه ونحنا كنا جايين بنديرو عشاء
سالي: ياعيني ياعيني اوخيي الشيف😍😁
تميم: ولووو لعيون اوخيتي مش غير نقعد شيف بس
سالي: باساته ... هههه نجك ليا ربي يخليك ليا يارب😊
تميم: حط الصفرة ع السرير سالي....هي قربو
سالي: وين عزت و همام
تميم: واحد طلع و واحد مايبيش فوتيهم وتعالي قبل مايبرد الاكل
سالي&غسان: قعمزو ع الصفرة
تميم: بسم الله... كلى كاشيك ورفع راسه بصدمه ويشوفلهم وهو ساكت😐
غسان: خيرك
تميم: شي😰
سالي: ضاقت الاكل .... بععععع شن الملححح هدا... حطت يدها ع فمها وطلعت تجري
غسان: ضاق وحدف الكاشيك بقوة لما لقاه مالح...تفوه عليك فعلا انما حاقة ايه خراااا😤... طلع من الدار وخلاه
تميم: افف شن عرفني انا اول مرة نطيب قلت عشر كواشيك ملح كويسات🙂😂
عزت: شن تقول انت
رضوان: كيف مانحكيلك شن عندنا اهني ياراجل خلي نركبو ونهاجرو مش خيرلنا
عزت: هههه اتبصر انت ولا،تي شن تهاجر ياراجل
محمود: والله الا عنده الحق رضوان اهني الحياة واقفة حتى التهريب معادش يجيب شي والمهاجرين نقصو من وين بنصرفو
عزت: صعبة ياراجل كيف بتخلو بلادكم واهلكم وبتمشو راه كان مشيتو معادش عندكم رجعة ع الاقل خلينا نلقطو ونمشو بوراقنا مش عن طريق البحر
رضوان: هههيي قلتلي نلقطو ههه يبيلها هلبه ياصاحبي كان بتلقط وبتمشي عن طريق البر ولا الجو وكلا انا ماعندي حاجة في لبلاد ومنبيش نرجع نتزوجلي وحدة من غادي تعيشني وتصرف عليا احسن😂
محمود: وانت الصادق 😂خلاص مالا زبط لمور وخبرني ياصاحبي
رضوان: شن وانت ياعزت مابتمشيش ولا شن
عزت: بتردد... م مممش عارف نشوف فيها صاعبة😓
محمود: لا صعبة لا واحد احنى مافيش حاجة صعبة علينا حشيش وبعنا مخدرات وتاجرنا مهاجرين غير شرعيين و هربنا جت علينا نحنا مانهاجرو قوي روحك وامشي ياراجل
رضوان: والله ماحسبتك هكي ياعزو مش قدها
عزت: لا انا قد كل شي لكن...
محمود: لكن شن
عزت: لا خلاص تمام زبطوا الامور وانا معاكم
رضوان: هدا الصح
عزت: اوكي هي اني بنروح
رضوان: خليك ياراجل مزال السهرة في اولها
عزت: لا والله تعبان بنرقد
محمود: بتفوتك لبضاعة توا بيجي فتحي وبيجبلنا حاجة نضيفه ع الكيف
عزت: بتوثر.... بالصحة عليكم اني منتهي بنرقد ،هي تشاو.... ومشى روح
رضوان: هههه هالفرخ مزال يخاف
محمود: لاحظته يبيله باش يتعلم
رضوان: غير خليه يتبعنا شوي تلقاه اكبر بلطلجي
محمود: هههه ان شاءالله احسنله من يقعد كخة
فتحي : السلااام
رضوان: وعلييييكم السلااام شن فرحنا جبت اللي وصيتك عليه؟
فتحي: ولو ... وطلع من جيبة مخدرات وحدفلهم
سالي: راقدة على سريرها سمعت صوت عزت رجع للحوش طلعتله... عزو خيرك متأخر عن الحوش قلقت عليك
عزت: لولي غزالتي وانتي عليش ساهرة لعند هالوقت
سالي: كنت نستني فيك اتصلت بيك تلفونك مقفل
عزت: قرب منها ومسكها من شدوقها.... ياقلبي انتي خايفة عليا
سالي: مالا شني كان ماخفت عليك على من بنخاف
عزت: ياحليلي منك يافرخة ماتخفيش عليا لمور طيبة ويلا خشي لدارك وارقدي باهي
سالي: عزت صح تشوفو فيا صغيرة بس انا نفهم في كل شي ونشوف فيك كيف تغيرت ونشوف في تصرفاتك وسمعت تميم لما ينصح فيك ا اني خ خخايفة عليييك ياعزو ... وقعدت تبكي
عزت: قرب منها وحضنها .... اششش لالا ياقلبي قلتلك ماتخافيش عليا اصلا تميم فاهم غلط واني منديرش في شي غلط خلاص امسحي دموعك وبري ارقدي
سالي: ...
#يتبع.....