الفصل 83
❤️📝 روايات وقصص مميزة 📝❤️:
🎀 386 💕
أسيل : أنا لي 3 أيام ماشفت الوضحه الكل مانعني عنها بروح لها ..
الجده : أخاف تطيحين مثل ذيك المره
أسيل توقف : لا باخذ نسكافيه بروح قبل يصحون وخصوصا حمد ..
الجده سلمى : روحي بس أنتبهي لنفسك
أسيل : حاضر
أمينه وسعاد : السلام عليكم
الجدتين : وعليكم السلام
سعاد : كأني سمعتك تسولفين على احد
الجده : أيه أسيل
أمنيه : وينها ؟؟
الجده : راحت تجيب سكنافيه
سعاد وأمينه : هههههه ..
أمينه : يمه نسكافيه
الجده : أيه هذا ..
كات جايبه الفطور : صباح الخير مدام
أمينه وسعاد : صباح النور
أمينه : كات مدام أسيل وين
كات : مدام ياخز نسكافيه ويتلع برا
الجده : خلنها
سعاد : برد يمه برد
الجده : تجي ماهي مبطيه(متأخره)
الجده سلمى : خلنها على راحتها
سعاد : يمه أسيل وين رايحه لا يكون للوضحه ؟؟
أم خالد وأم أسيل وأم حمد وأم أحمد : السلام عليكم
سعاد والجده عايشه والجده سلمى وأمينه : وعليكم السلام
أم أسيل تصب قهوة : سمعت الوضحه علامها ؟؟
سعاد : بنتك المجنونه ماكفاها المره الفاتت راحت للوضحه
الجده بعصبيه : المجنونه أنتي لا تقولين عنها مجنونه ..
أم حمد : ياخاله حمد محذرها ماتركبها وحالف أن ركبتها من غير علمه لايطلع الوضحه من المزرعه ..
الجده : خله يقول لها شيء والله لأزعل عليه والوضحه راح تتم هنا رضا ولا أنغصب أفطرن بس ولا تحاتن ...
حمد أزعجه جواله اللي يرن : ألو........ من ...........(بعصبيه) مدحت يالزفت ليه متصل....... من ..أيه ..قلت لك.........(فز من سريره) شنو......... طيب أنا جاي
غير ونزل مسرع و وقفه صوت جدته التفت
الجده : حمد
حمد : هلا جده
أم حمد : ما تصبح علينا
حمد : العذر صباح الخير
الكل : صباح النور
الجده : فين رايح حمد
حمد : الأسطبلات
الجده : أسمع يا حمد أنا عارفه أن قالولك أن أسيل عند الوضحه وان زعلتها لأزعل عليك والوضحه ما تطلعها ..
حمد كتم غيضه : حاضر يا جده أسمحوا لي ..
أسيل تمسح على ظهر الوضحه : آه يالغاليه أشتقت لك (حركت السرج عشان تتحرك الوضحه) صدق أنسى العالم ههههه هذا حمد دوم يقول كذا
حمد واقف عند السياج ويأشر لها تقرب وباين عصبي ..
أسيل أنصدمت وفي نفسها : الساعه 7 شنو صحاه ما يصحى هذي الحزه ياويلي ياويلي ..
أنزلت ومسكت السرج وصلت له وهي تعض على شفايفها أبتسمت
أسيل : صباح الخير
حمد بصوت عالي : مدحت مــــــــــــــــــــدحـــــــــــــــــــــت
اسيل : حمد تكفه حمد خلها
حمد بصوت عالي : مـــــــــــــــــــــدحـــــــــــــــــــت
مدحت بخوف : آمر يابيه ..
أسيل : حمد حمد أسمعني تكفه طلبتك
حمد يصر على ضروسه : خذ الوضحه
مدحت : حاضر تسمحي يا مدام أسيل
أسيل تمسك السرج : لا لا
حمد : عطيه الوضحه
مدحت : أرغوك أديني الوزحه
أسيل تمد له السرج وهي تشوفه يا خذها وتدمع عيونها وخلاص راحت الوضحه
أسيل : ليه حمد ؟؟
حمد مارد عليها ورجع للبيت وهي بقت بروحها دخلت الحظيره تطالع للوضحه عارفه أن حمد إذا قال كلمه نفذها ومو عارفه أن جدتها أمرته مايطلع الوضحه وحمد ماقال لها وماتبي ترجع للبيت تبي تجلس مع الوضحه لين ياخذونها سحبت حزمة قش(تبن) قدام الوضحه وتطالع لها وكل تفكيرها انه خلاص بياخذونها رغم أنه برد إلا أنها ما هتمت ..
@storykaligi
🎀 387 💕
أما بالبيت.........
رنا أول وحده صحت : صباح الخير
الكل : صباح الخير
الجده : تعالي عندي ياقلبي
جلست رنا جنب جدتها اللي حضنتها بحب خلت رنا تدمع عيونها ..
الجده : علامك ؟؟
رنا تبكي : أشتقت لأمي
الكل دمعت عيونهم : الله يرحمها ..
رنا حست أنها أختنقت وطلعت من الصاله تبي هواء ..
الجده بخوف : سعاد يمه روحي لها ..
رنا عند الباب صدمت براشد اللي مسكها قبل تطيح ..
راشد : بسم الله عليك
رنا أبعدت عنه وحطت يدها على وجهها كأنها ناقصه هذا الموقف المحرج اللي كمل عليها وطاحت ..
راشد خاف عليها : رنا آسف مو قصدي
سعاد تضم رنا: رنو حبيبتي علامك ؟؟
راشد : عمه والله مو قصدي أطيحها
سعاد تبتسم : لا ياراشد مو انت السبب بس تذكرت أمها الله يرحمها رح ياقلبي لا تحاتي ..
راشد بخبث : رنا ترى ما أحب زوجتي المستقبلية تبكي ..
رنا رفعت راسها بعصبيه : مالت عليك أنا آخذك ..
راشد بجرأه ولا عبر عمته غمز لها : كلمت أبوك أمس ووافق أنا آخذك لا تاخذيني ..
رنا بصدمه : شنو !!!
راشد : هههههه
رنا : خالتي شوفيه
سعاد : هههه والله لايقين على بعض ..
راشد : شفتي الناس اللي تفهم ..
رنا : لو كنت آخر رجال بالعالم ما أخذتك(تركتهم ورجعت لجدتها) ..
سعاد : ههههه منت صاحي غيرت مزاجها بلحظه لو ما أعرفك كان قلت من صدق تتكلم يله خلني ارجع للحريم ..
راشد في نفسه : والله ماتعرفيني ياعمه خلني آخذ الفطور للشباب لا يذبحوني(يدخل المطبخ) صباح الخير دادا ..
حليمه : صباح النور كيفك ياولدي
راشد : بخير الفطور جاهز
حليمه : أيه
راشد دخل على الشباب بالفطور وقعدوا يفطرون ..
حمد يدخل : السلام عليكم
الكل : وعليكم السلام
فهد : حياك أفطر ولا أفطرت مع القمر ..
حمد يجلس جنبه : لا والله القمر زعلان
عبدالله : أفا زعلت القمر ليه ؟؟
راشد : ترى ماتهون علينا
حمد ياخذ خبزه : والله أخذت الوضحه منها وزعلت علي ..
محمد : ياخوك الوضحه غاليه عليها
حمد أبتسم : وهي غاليه علي المره اللي فاتت ربك ستر وهذي المره لا ياخوك مو مستغني عنها ..
جراح : آه من الحب الله يخليكم لبعض
الكل : أمين
أحمد : إلا الحجيج بكره يجون ولا بعده
فراس : لا بكره يوادعون ويمشون على الساعه 1 بالليل يكونون هنا بأذن الله
فهد : طيب العشاء اللي بنسويه لهم لما يرجعون هنا ولا لما نرجع ..
أحمد : بهذا أسأل أبوي وعمي سعدى..
جراح : إلا صدق الشياب وينهم
راشد : شفتهم يتمشون عند النخل الحين يجون ونسألهم
محمد : أمس أتصل زياد تصدقون قرر عرسه بعد شهر
عبدالله : مع عرس ولد عمي محمد
محمد : شنو عرفك ؟؟
عبدالله يبتعد عنهم ومعه قلاص(كباية) الحليب : الله يغنيكم أبدا اتصل علي زياد وطلب أسأل محمد ولد عمي إذا ماعنده مانع العرس مع بعض وقال محمد أبدا ماعنده مانع وانت متى ملكتك منت ناوي معهم بعد ..
محمد : الله يغنيكم أبدا العم بو حسن(أبو سوسن) مسافر الهند ويجي بعد 10 أيام بأذن الله ونحدد وأنا ما أبي ملكه وأبي بروحي بتفنن بعرسي ..
عمر : ههههههه مستعجل
محمد : تقدر تقول كذا الفال لك يالنسيب
عمر : هههه ياخوك شكلنا مالنا نصيب بنسبكم
محمد : والله ياخوك العطيه ماتنرد وأبوي عطاك شهد ولولا أنه مو معتبرك بحسبة ولد من أولاده ما رخصها لك ..
عمر : أفا لا يا خوك شهد ماهي رخصيه شهد لها العز والكرامه ..
مشعل : والله الحبيب يقول حكم
فهد : هذا من تأثير الحب
أحمد : لا والله ماصدقت هذا من تأثير أختي عليه جننته
عمر : ههههه والله صدقت شاب راسي منها ومن تغليها
الكل : ههههه ..
سعد ومحسن : السلام عليكم
الكل : وعليكم السلام
سعد : ماشاء الله ضحكونا معكم
جراح : مو يالغالي محمد مستعجل على العرس
محسن : بس يرد أبو محسن بالسلامه ونتفق معه بأذن الله (لف لحمد) حمد تعال
حمد وقف وجلس قدام عمه ومحسن قرب وهمس بأذنه والفضول ذابح الكل وخصوصا لما أبتسم حمد ..
حمد يحط أصبعه على خشمه : على هالخشم تامر ياعم
طلع حمد والشباب التفتوا لمحسن يترجونه بعيونهم يقول لهم
محسن : لا تحاولون ولا تتحركون لين يرجع ..
فارس زوج سعاد : السلام عليكم
الكل : وعليكم السلام
راشد : صح النوم ياخال
فارس يتثاوب ويحك راسه : صح بدنك ماتعرفون تصحوني خونه
سعد : لا وأزيدك من الشعر بيت فطروا ..
فارس : يالزطيين ماتخلولي شيء أهب
الشباب مع بعض : قل أعوذ برب الفلق قل ماشاء الله
فارس : ههههه خايفين من الحسد ما أحسد عيوني بارده
أحمد(يطالع له بنص عين) : أحلف كثر منها بغيت أتحرول(أطيح) ذاك اليوم لما قلت لي أهب عليك مشيه كانها مشيت شيوخ رزه
الكل : ههههههههههههههههههههههههههههههههههههههههههه
فارس : منت ماتعرف تمشي مثل الأوادم وما أبي أحسد ماشاء الله ألحين بيجيني أحلى فطور ثواني
زليخه(هذي خدامة سعاد) : بابا فارس فطور
جراح : أهب مضبط عمره أبو رياض
فارس : ههههههههههههههه ماهون على عمتك سعاد الله يخليها لي راشد جب الفطور منها
راشد : تامر يا خال
@storykaligi
🎀 388 💕
اما حمد ............
عمه أرسله لأسيل يراضيها دخل الحظيره شافها ضامه رجولها لصدرها ومحوطتها بأيديها ومنزله راسها على ركبها وساكته
حمد حن عليها : أسيل
أسيل(ماغيرت وضعيتها) : ........................
حمد جلس جنبها على حزمت الق) : كلميني
أنتبه انها تشاهق معناها تبكي لعن نفسه ليه تركها ازود من ساعتين على هالحاله وعارف الوضحه بالنسبه لأسيل الغلا كله بعد امها كره الوضحه وحس بالغيره الكل مو فاهم انه بيبعد الوضحه عنها لانه يغير من قربها من أسيل ..
حمد حاوطها بايديه : ليه تبكين عشان الوضحه يعني والله كنت أمزح وانا أقدر أبعدها عنك ..
أسيل رفعت راسها ووجها كله دموع وخشمها أحمر وتشاهق لما تتكلم : يعني ماتاخذها برا المزرعه ..
حمد يبتسم ويمسح دموعها بأيديه : لا بخليها هنا
أسيل : وماقلت لي ليه
حمد : أبي أعلمك درس تسمعين كلامي اذا قلت لك ..
أسيل عصبت ودفته عنها : أكرهك أكرهك ساعتين وزود ذابحه نفسي من البكي وأنت فرحان أبتعد ما أبيك أكرهك ..
حمد يضحك وهو ضامها : هههه والله ما أخليك تكرهيني وانا أحبك كيف تقدرين تكرهيني ..
أسيل أنصدمت وجمدت بين أيديه وفي نفسها : أحبك أحبك أنا أحبك تكرهيني أنا أحبك انا أنا أنا أحبك اعترف بحبه أحبك احبك حمد يحبني انا أنا أنا ..
حمد حس أنها جمدت وكأن سيارة صدمتها او طاحت من جبل وهي بين أيديه
حمد : أسيل أسيل
أسيل طالعت لعيونه حست صادق بكلامه بس بعد شنو ورجعت تبكي دفته بعيد وبقوه وطلعت تركض بكل قوتها للبيت وحمد مستغرب من تصرفها ..
حمد : علامها خلي أروح أشوفها أحسن لا تظن جدتي أني زعلتها وتذبحني
الكل : هههههه ..
أسيل : لا والله الحق علي اللي أسولف لكن حتى أنتي ياجده
الجده : ياعمري ساعتين خليه يجي وأنا أوريك فيه ..
حمد يدخل : السلام عليكم ومن اللي يجي
الكل : وعليكم السلام
الجده : أنت
حمد : أنا خير شنو سويت بعد
أم حمد : ليه تزعل أسيل
حمد : أفا انا
الجده : ساعتين مخليها تبكي
أم أسيل : كان خليتها ساعه تكفي
أسيل : يمه بغيتك عون صرتي فرعون تتطنزين
حمد : هههه طيب كل هالسالفه عشان أسيل زعلانه أراضيها(غمز لها) هنا ولا
أسيل حمر وجها وبققت عيونها : حـــــــــــمـــــــــــــد
سعاد : أستح على وجهك اللي يبي حريمه ضيفه يشاوره تبي تراضي راضها ..
أسيل زاد أحراجها : ســـــــــــــــــــعـــــــــــــــــــــاد
الكل : هههه ..
أسيل وقفت وطلعت من البيت تحس بالأحراج من كلامهم وهي تتوعد بحمد ..
أم حمد : ياحلوك يا اسيل وجهها أحمر وزعلت وطلعت ..
حمد : عمه صبي لي فنجان قهوه يمه ترد الحين وش أسوي زوجتي حيويه
سعاد : تامر بس ليه سويت كذا فيها
حمد ياخذ فنجان القهوه : والله خفت عليها ولولا جدتي كان طلعتها من هنا اليوم ..
روابي تنزل : السلام عليكم مع السلامه
الكل : وعليكم السلام
أمينه : تعالي تعالي وين مع السلامه
روابي :بروح لأسيل يمه ..
أم خالد : علامك على البنت
روابي : أروح يمه
أمينه : روحي بس لا تتأخرين ..
روابي : حاضر
أسيل كانت متسنده على باب الحظيره للخيل : لا كان ماجيتي احسن
روابي : علامك كبريت أول ما دقيتي جيتك
أسيل : طيب يله
روابي : يله شنو ؟؟
أسيل : قولي لمدحت يطلع الوضحه
روابي تشهق : نعم نعم تبين حمد يذبحني
أسيل : عفيه رورو طلبتك
روابي : لا لا لا لا
أسيل : تكفين طلعيها لي أنا اذا قلت له بيتصل بحمد طلبتك
روابي : لا والله واطيح فيها أنا اذا عرف لا ما أقدر حمد عصبي ..
أسيل تطلع جوالها : هين يالخوافه ....... ألو هلا ........... سمعي قولي للبنات عندي مسابقه للخيل ........ أيه اللي تفوز لها 2000 ريال........... والله نقدي........ أنا وروابي واللي تبي........ أوكيه بس لا أحد يعرف ........ أنتظركم باي ..
روابي : مجنونه
أسيل تخبط رجلها بالأرض : كيفي أبي أركبها وأخوك مانعني جنني الله يا أيام زمان يوم أجي لجدي وكل ما أبي اركبها ركبتها صار الزمن يتحكمون فيني وفيها أف ليتني ما تزوجت وبقيت حره على كيفي كل شيء ..
روابي : ماقول إلا الله يستر ..
@storykaligi
🎀 389 💕
نزلن البنات وحده ورا الثانيه نجد نجود رنا سلوى هيام وجدان مناير شهد وطلعن برا البيت ..
الجده : هذلن علامهن ؟؟
أمينه : مدري ينخاف منهن ...
طيف تعدل لفتها بشكل مهمل وتنزل : السلام عليكم
الكل : وعليكم السلام
طيف أنتبهت لحمد ونظراته الناريه بخوف: حمد شلونك ؟؟
حمد من غير نفس : بخير ..
طيف تذكرت أمس شنو صار لها مع حمد كانت على الساعه 12 ونص جالسه تكلم بالتلفون بالصاله العلويه لما دخل حمد ..
طيف : يله باي (سكرت التلفون) حمد كيفك ؟؟
حمد خزها : كنت زين اﻷن صرت زفت ..
طيف بدلع : أفا ليه ؟؟
حمد طالع فيها من فوق لتحت بأشمئزاز : سمعي يا طيف أنا عرفت باللي صار بينك وبين أسيل ..
طيف : ماصار شيء ..
حمد مسكها بأيدها بقوه : أفهمي يا طيف أنك ما تهميني بحركاتك وأسلوبك مع أسيل عدليه ..
طيف : أي أنا وش قلت للبرنسيسه أسيل
حمد : طيف سالفه التعرض لزوجتي كل شوي ونقزاتك وأنك تحطينها بموقف أحراج كل مره ما تمشي عندي بالساهل فاهمه ...
طيف : حمد حرام عليك أنا وش سويت سألت سؤال بس ؟؟
حمد يدزها على ورا لين طاحت على الكرسي : والله يا طيف كل العالم بكفه وأسيل بكفه كله وإلا أسيل أمحيك من الوجود فاهمه وأنتي عارفه أن حمد بن فهد إذا قال لكلمه تنفذ ..
طيف خافت من عصبيته : هاه زين ..
حمد بأستهزاء : يا زين لك الخير يا طيف والحين أذلفي نامي بلا مكالمات أنصاف الليالي ..
طيف : بعد هذا بتتحكم
حمد : طـــــــــــــــــــيـــــــــــــــــــــــف
طيف ماتشوف غير غبرتها وراها دخلت الغرفه وقفلت الباب صحاها من ذكرياتها صوت الحوامل اللي نزلن عايشه وبشاير ورشا وأوراد ..
عايشه و بشاير ورشا و أوراد: السلام عليكم
الكل : وعليكم السلام
سعاد : إلا بالله بسألكن شنو وراكن
أوراد : مع أنهم مايبون تعرفون بس أسيل حاطه 2000ريال للي تفوز بسباق الخيل ..
حمد وقف وضيق عيونه : الخبيثه خطه يعني هين ..
أم أسيل : طلبتك ياحمد لا تسوي لها شيء والله صعب تخلي عادتها مع الوضحه ..
حمد : ياخاله ماراح أقول لها شيء
رشا : الله يعين أسيل
أوراد : بتذبحنا لو عرفت أنا قلنا له
عايشه تقعد : بتذبحك بروحك أنتي اللي قلتي حنا كنا ساكتين
أرواد : شنو!!!
رشا : وانا أشهد أنتي ملقوفه سيده خريتي الكلام ..
بشاير : ياويلك منها
أوراد : يمه منكن الظاهر بتصل على فهد يحميني ..
رشا : والله تبينها من الله عذر
أوراد : كلي تبن أيه توك أمس جايه مو حنا صار لنا أسبوع هنا ..
عايشه تطبل على الطاوله وتحرك حواجبها : وتغني اغنية الجسمي الرسالة ..
أوراد تحط يدها على قلبها : آه جبتيها بالصميم
الكل : هههههه ..
أما حمد اللي وصل شافهن يسرجن الخيول ومدحت المسكين يحاول يقنع أسيل ماتاخذ الوضحه وتعطيه جواله اللي أخذته منه بالحيله عشان تضمن ما يتصل على حمد ..
حمد : لا والله
الكل لف صوب حمد وبعدين طالعن لأسيل اللي بلعت ريقها من الخوف ..
حمد : وأنت ماتعرف تتصل وتقول لي
مدحت : والله يابيه المدام أخذت مني الجوال ..
حمد : بعد
روابي : مالنا شغل مرتك
حمد : عارف وعقابا لها ماراح تتسابق معكن
أسيل تحط يدها على خصرها : لا والله ما أبي أنا اللي حاطه الجائزه ..
حمد : عطي مدحت جواله ..
أسيل مدته لمدحت : آسفه
حمد : روح لشغلك
مدحت : حاضر
حمد : أنا بعطي اللي تفوز 5000 ريال بس أسيل لا
أسيل تترجى : حمد
حمد : لا
روابي : أنا هونت ما أبي أتسابق دام أسيل لا اللي تبي البرنسيسه تاخذها
نجد : ما أبي أختي تحتر أنا راجعه للبيت ..
@storykaligi
🎀 390 💕
نجد : ما أبي أختي تحتر أنا راجعه للبيت
البنات أنسحبن وحده ورى الثانيه وبقت هي مبوزه ومقهوره منه وهو يبتسم قدامها ..
حمد : قدامي
أسيل :..................
حمد : أسيل أمشي قدامي أبيك بموضوع ..
أسيل فهمته وبدلع : حمد
حمد : شنو وليه هالنبره ؟؟
أسيل : أدلعك فيها شيء
حمد : ياخوفي خير ..
أسيل : طلبتك بروح لجدي الحين ما عايدته تكفه تكفه تكفه ..
حمد أبتسم : طيب ما نتأخر عنده روحي جيبي عباتك وانا بالسيارة ..
أسيل طلعت وهي تخطط لحمد ..
أسيل : هين بس ودني لأخليك تندم على اللي سويته ساعتين يالظالم أبكي ولا معبرني بتعلمني درس والله لأرد لك الدرس اللي حفظته يا أستاذي(طلعت جوالها وأتصلت على جدها تنفذ خطتها) ..
دخلت ولقت الكل قاعد بالصاله
أسيل مبتسمه : السلام عليكم
الكل : وعليكم السلام
سعاد : ما فيك دم ..
أسيل : بسم الله علي ليه
عايشه : قلنا بيذبحك
أسيل بغرور : هه لا حمد ما أهون عليه كات كات ..
كات : يس مدام
أسيل : جيبي عبايتي وشنطتي من فوق ..
أم أسيل : وين يمه ؟؟
أسيل تهمس لامها : طيب
أم أسيل تبتسم : طيب
كات : تفزل مدام
هيام : ما جاوبتينا وين ؟؟
أسيل : بتمشى مع حبيبي حمودي تشاو تشاو
طلعت مع حمد لمزرعة الجد وأسيل تفكر اذا خطتها بتنجح والا لا وحمد اللي يفكر كيف يروض أسيل وبس ينتظر لما يرد ..
بشاير تطالع ساعتها : شهد
شهد : ياعيونها
بشاير : تروحين معي نتمشى ..
شهد : يوه والله مالي خلق خليها بعد الغدا
بشاير : لا طلبتك بخاطري أمشي عشان البيبي ..
شهد : خذي رشا مثلك أو عيوش بآخر شهرها ..
رشا : لا أنا مشيت اليوم يكفيني مشي
عايشه : لا أنا ما أبي أمشي أخاف أتعب قبل عزيمة خالي
بشاير تبتسم: هاه وش قلتي ؟؟
شهد : زين (لفت لمناير ووجدان) تجن معنا
بشاير تأشر لهن يقولن لا وفهمن عليها ..
مناير تهمس لها : ما أقدر أخاف أشوف جراح وماني ناقصه حزن ..
وجدان : أنا بتجهز سعود وخالتي بيمرون يعايدون علينا وراي شغل ..
شهد توقف : أف طيب بجيب لفتي(طرحه – شيله) ..
بشاير : طيب روحي
الجده عايشه : الله يستر
بشاير : والله خايفه هالشوفه بينها وبين خالي تنقلب ضدي ..
هيام : ههههه مو عمي محسن غريب الحين بغير الحركات ويخلي الشوفه الشرعيه بينهم بين الطبيعه والأشجار ..
الكل : ههههههه ..
أوراد : يا حليل خالي يعني يمكن تقتنع ما هي عارفه عمر سواء بالطبيعه ولا بالبيت ..
الجده سلمى : والله ان ولدي يموت بالتراب اللي تمشي عليه ..
بشاير : بس خالي ياجده لسانه يحكه لين يقط كلمه أو ثنتين يفرح إذا شافها تتنرفز وتعصب
الكل : ههههه ...
شهد : يله مشينا
بشاير : يله أدعو لي أرجع سالمه
الكل : أمين ..
شهد : شنو السالفه ؟؟
بشاير : هههه ولا شيء يله مشينا ..
يتمشن وشهد رايقه وتغني وبشاير تدعي ربها يستر
بشاير : طربانه الأخت ..
شهد : أحب هالأغنيه حلوه
: لا والله أنتي الأحلى
بشاير وشهد لفن وشهد أنصدمت منه وأنتبهت لبشاير اللي تبتسم ولا انصدمت ...
شهد : انــ أنـ انت
#انتهى
مكملين معكم غدا" بإذن الله
أنتظرونا
@storykaligi