الفصل 65
❤️📝 روايات وقصص مميزة 📝❤️:
🐚 296 ✨
على الساعه 9.........
وصلت دانه مع أمها وأختها وتعرفوا على أهل المعرس والعروس وجلسوا على الطاوله المخصصه لهم كان التزيين يغلب عليه اللون العنابي بالذهبي طاولات وشموع والنخيل والأشجار مزينه بالأضائه الملونه والكوشه عبارة عن نصف قفص ذهبي منثور عليه ورد جوري بأسماء المعاريس ..
ودانه أرتاحت مع البنات اللي ما حسسنها أنها غريبه وعرفنها على خامس عضوه بالشله مها الدكتوره مها اللي حضرت هي وأهلها ..
على الساعه 10 زفوا بشاير بثوبها الفرنسي كان بسيط وجميل يغلب عليه البساطه ومسكتها الورد الجوري من تصميم فراس هديه لها كان بدون طرحه ما حبت الطرحه جلست على الكوشه والكل جاها يبارك ويهني والمصوره تلقط الصور للعائله ..
أسيل : بشوره خذي العصير ..
بشاير : تسلمين عطشانه ياقلبي
أسيل : حاسه فيك بس أنتبهي لا ينكب
بشاير : أوكيه
أسيل دق جوالها : ألو هلا... خلاص ..... مع السلامه (لفت لبشاير) بيدخل فراس الحين ألبسك ردائك ..
بشاير ترجف : أسوله
أسيل تمسك يدها : بسم الله عليك أهدي (تأشر لأوراد وعايشه يوم جن) فراس بيدخل ..
أوراد :بشاير أهدي لا تبكين يخرب المكياج ..
بشاير : والله مو قادره
عايشه : لبسيها الرداء ببلغ راعية الدي جي ..
أسيل : طيب أرسلي لي عبايه ولفه
أعلنوا دخول المعرس وتغطوا الحريم دخل فراس وأخوانه وعمامه عيالهم وبعد ما سلموا وصوروا شالوا عن بشاير الرداء
فراس بلع ريقه من جمالها وباس جبينها بعد ما اشرت له عايشه : مبروك ..
بشاير بحيا : الله يبارك فيك
بعد ما جلسوا وباركوا لهم الأهل ..
أسيل : ألف مبروك ياخوي ..
فراس : الله يبارك فيك .. تركتهم أسيل لوحدهم ولف فراس لبشاير : بشاير والله مو مصدق أنك معي ..
بشاير تبتسم : صدق ..
فراس : خلينا نقوم خاطري نكون لوحدنا زهقت من الرسميات والمشلح (البشت)
بشاير : ...............
فراس : أموت باللي يستحون ..
وجدان : ألف مبروك ياخوي
فراس : هلا جودي الله يبارك لك الفال لك ترى سعود يسلم عليك ..
وجدان : فراس ...
أسيل جتهم : يا حبك للأحراج ..
فراس حب يحرجها : وأنتي بعد حمد يرسل لك سلامات ويقول الوعد بعد شهرين ..
أسيل كاشفته : ويه فديته سلم عليه ..
فراس : عينك قويه قدامي بعد ..
أسيل تغمز له : مو أنت اللي تقوله ؟؟
فراس يطالع لبشاير : أسيل بنقوم ..
أسيل حبت ترفع ضغطه : خلاص قوم من ماسكك بس خل بشاير عندنا الليله ..
بشاير كتمت ضحكتها :.....................
فراس صر على ضروسه : لا أحلفي والل ..ه
اسيل شافته عصب محد يمزح معه : ههههه خلاص أمزح ..
سلموا على الأهل وصعدوا لجناح حمد الخاص(السري بنعرفه بعدين ونكتشفه) .. وألتقطت لهم المصوره الصور وغيروا لبسهم ونزلوا للسياره اللي حمد حلف إلا يسوقها .. وأحمد راح معهم فراس وبشاير جالسين بالخلف ..
أحمد : فراس ما أوصيك على أختي
فراس : بعيوني يا أبو محسن
حمد : فراس ترى سفرك بعد بكره المغرب لا تنسى ..
فراس : الله يهديك قايل لك خلها بعد أسبوع ..
أحمد : منت صاحي شنو الفرق
فراس : باخذ راحتي ..
حمد : هههههههه خذ راحتك أحد ماسكك ..
بشاير أنحرجت منهم واحمد حس فيها وعرف حمد وفراس الحياء معدوم منهم ..
أحمد : أقول أثقل أنت وهو ..
فراس : حمد ..
حمد : هلا
فراس : ترى اسيل تسلم عليك ..
بشاير تشد على ايده وتهمس له : فراس حرام عليك ..
فراس بهمس : خليها أجل تنتقم مني ..
حمد : فروس أيش قلت لها عشان تقول كذا ..
فراس : قلت لك سلام من حمد قالت ويه فديته سلم عليه ..
أحمد : منت صاحي تموت بالأحراج
حمد يبتسم : الله يسلمها
نعود للحفل ........
@storykaligi
🐚 297 ✨
البنات راحن للحمامات (وأنتو بكرامه) يغسلن أيديهن بعد العشاء ..
دانه : مسكي نجد شنطتي عفيه ثواني بدخل الحمام ..
نجد : أوكيه
سلوى بعد مادخلت دانه : نجد شنو رايك بدانه
نجد : تهبل صدق مثل ما قلتن
رنا : حبوبه ترى ما عندها بنات عم وولا بنات خوال كلهم اولاد ..
نجود تعدل شعرها قدام المرايه : واي تعبت من الرقص ..
سلوى : أيه والله تعب إلا راحت مها وأهلها
نجد : أيه (دق جوال دانه) ياهوه هذا جوالها ..
نجود : خليه
دانه من داخل الحمام : بنات عفيه ردن أكيد أخوي وأخاف يعصب ..
نجد تطلع الجوال : والله متردده ..ألو
يوسف معصب : تو الناس ..
نجد بعدت الجوال تخرعت من صوته : يمه يمه عصبي كبريت(عطت الجوال نجود اللي رفضت وعطته سلوى وسلوى عطته رنا تخاف) ..
رنا تشجعت : ألو
يوسف : من أنتي ووين دانه هذا مو جوالها ..
رنا(حست وكأن قطار صدمها عرفت الصوت ) : مـ مـ مـ من أ أ أ أنت
يوسف بعصبيه : من أنا أنا أخو صاحب هذا الجوال يوسف بن طلال ..
رنا حست أنها تختنق وبصوت مخنوق : هي بالحمام ..
رنا عطت نجد الجوال واشرت لها تكلمه لأنها أختنقت وطلعت من الحمامات لبرى ..
رنا : معقوله ليه تستغلني هي أخته أخته وأنا غبيه أقول لها عنه كلامه وأفعاله وأتصالاته ليه وهي عارفه خطه يعني وأنا تسليه بينهم ..
البنات طلعن لها وشافنها متسنده على الطوفه(الحيطه) ..
سلوى : رنا فيك شيء أنادي أمي
رنا : لا
دانه : رنـ...
رنا لفت لها بعيون دامعه : لا تتكلمين معي ؟؟
نجود مستغربه : علامك هذي دانه !!
دانه : رنا أنتي فاهمه غلط أنا
رنا تسد أذونها : ما أبي أفهم أكرهك أكرهك وأكره أخوك طلعوا من حياتي ..
دانه : رنا أرجوك
رنا تبعد عنها : ليه يادانه ليه ماكنت أتوقع أنك كذا خساره ..
دانه ترد على جوالها : جايه جايه (سكرته) أسفه ..
طلعت دانه والبنات بدوامه أخذن رنا اللي أنهارت وصعدنها قبل أحد يشوفها
نجد ك رنا شنو حصل ؟؟
رنا : ما أصدق !!
سلوى : رنا أيش حصل من كلمتي أخوها أنقلب حالك قال لك شيء ؟؟
رنا : لا لالا
نجود : حرام عليك البنت طلعت تبكي أكرهك شنو هالكلمه
رنا : لأنها أخته أخت يوسف اللي يتصل
البنات : دانه ..
رنا حطت وجهها بين أيديها : مو قادره أفهم ليه تسوي كذا تتعرف علي عشان تنقل أخباري لأخوها معاي شيء ومعاه شيء ليه حرام انا الغبيه أشكي همي لها لأخت من كان السبب بالهم آه ..
كانت ليلة فرح لفراس وبشاير الله يهنيهم وليله حزن لرنا ودانه والبنات حقيقه كلن يغني على ليلاه
صحت من النوم وطالعت جنبها عرفت انها عايشه حقيقه هي أخيرا مع فراس أبتسمت شكله حلو وهو نايم قامت تبي تاخذ دش قبل يصحى ما حست إلا باللي يسحبها له ...
@storykaligi
🐚 298 ✨
فراس : وين ؟؟
بشاير تبتسم : كنت باخذ دش ..
فراس : وتتركيني بروحي
بشاير : فراس أنا دوم بكون معك ..
فراس بحرك سريعه لف ودخل للحمام قبلها
فراس : هههههه ..
بشاير : يعني تلهيني عشان تسبق
فراس : مو انتو سنه لين تطلعن واحنا ثواني ..
بشاير : هين الأيام بيننا ..
فراس : قلبي باخذ دش وأطلع اطلبي لنا غداء على ذوقك أوكيه ..
بشاير : أوكيه
بشاير طلبت غدا وقررت تتصل على أقرب الناس لقلبها ..
أسيل كانت بالأسطبل مع الوضحه
أسيل بفرح : هلا بالعروس
بشاير : هلا بقلبي
أسيل : ألف ألف مبروك وصباحيه مباركه يارب ..
بشاير : الله يبارك فيك والفال لك يارب
أسيل : ههههه تظنين ..
بشاير : ليه التشائم ؟؟
أسيل : لأني أسيل وهو حمد ..
بشاير : يعني ؟؟
أسيل : بالمختصر مانحب بعض مثلكم ولا راح نحب بعض
بشاير ..: غلطانه الزواج والاستقرار لما تجتمعون مع بعض بيولد الحب ..
أسيل حبت تغير السالفه : إلا شخبار ليلة البارح هاه ..
بشاير : أسيلوه ..
أسيل : ههههه أموت باللي يستحون لا صدق شخبارك ..
بشاير : بخير لله الحمد رجعتوا للبيت ؟؟
أسيل : بنرجع بعد الغدا إلا أنتو ماراح تجونا
بشاير: مدري بس الأكيد راح نجي قبل نسافر عشان نسلم عليكم يله أسوله شكله طلع ..
أسيل : سلمي عليه باي
بشاير : باي
أسيل سكرت الجوال ورفعت نظرها للوضحه : آه يالوضحه تعبت تعبت ..
: سلامتك من التعب
أسيل تلف للباب : يالدبه خرعتيني ..
روابي : هههههه من كنت تكلمين ؟؟
أسيل : العروس تسلم عليك
روابي : يا حلوها إلا شنو اللي متعبك حاسه بشيء ؟؟
أسيل : علتي عله يا روابي ما منها شفى ..
روابي : قولي لي حاسه أنك مهمومه ..
أسيل : حاسه بضياع ..
روابي : ليه أسيل حنا حولك ليه أنتي تغيرتي ؟؟
أسيل تبتسم : لهذي الدرجه تغيرت ؟؟
روابي : مو ملاحظه نفسك ؟؟
أسيل : هههههه ..
روابي تطالع لها وخافت عليها من طريقة ضحكها : أسيل علامك تضحكين ؟؟
أسيل تضحك ودموعها على خدها : ههههههه ..
روابي مسكتها وهزتها : كفايه ..
أسيل طالعتها وضمتها وهي تبكي : آه تعبت برتاح مو قادره أرسى على بر وأعرف الحقيقه آه ..
روابي بحنيه : بسم الله عليك
أسيل توخر عنها وتمسح دموعها وتبتسم : روابي شنو رايك نتسابق بالخيل ..
روابي : تصدقين ودي ..
: حتى أنا ..
روابي وأسيل لفن للباب : حمد !!
حمد : حاب أتسابق معكن
روابي : أنا موافقه مدري أسيل
أسيل تعدل لفتها : إذا حاب ؟؟
حمد يقرب منها لدرجه أربكتها : ليه الدموع على الخدود الورديه النديه ..
أسيل بعدت ولبست نظارتها ومسحت الدموع : ولا شيء هذا شيء طاح بعيني ..
روابي : بسرج البرنسيسه بس لحظه لحظه الفايز شنو جائزته من الخسرانين ..
حمد : طلبن وأنا أنفذ إذا خسران ..
روابي : أبيك توديني السوق وأتسوق على حسابك وتعشيني بطعم فخم
حمد : ول صدق بطينيه (لف لأسيل وابتسم) وانتي ؟؟
أسيل : اللي أطلبه ..
حمد : اللي تبين طلباتك مجابه ..
أسيل : قدها يا حمد
حمد : قداها بس بشرط الطلاق لا
روابي : طلاق أسيل من صدق هذا اللي تفكرين فيه ..
أسيل تكتف أيديها : أيه ..
حمد : غيره
أسيل : ما أبي غيره
حمد : إذا تبينه أنا أبي اذا فزت آخر الأسبوع هذا نتزوج
أسيل : مو صاحي ؟؟
حمد يرفع حاجبه ويبتسم : أجل أنتي الصاحيه تطلبين الطلاق ..
أسيل تعدل النظاره : أيه لأن البعد رحمه ..
حمد : وأنا كم مره قلت لا تلبسين هالنظاره ..
أسيل بعناد : عاجبتني كيفي
روابي : الحين تبونا نتسابق ولا لا
حمد وأسيل : أيه
روابي : يعني موافقين على شروط بعض ..
حمد وأسيل يتبادلون نظرات التحدي : أيه ..
@storykaligi
🐚 299 ✨
حمد واسيل : أيه ..
روابي : أسيل أذا فزت أنا تعزميني على العشاء على حسابك
أسيل : يالواثقه (تطالع حمد) محد فايز غيري ..
حمد يغمز لها : نشوف موعدنا أخر الأسبوع سمعن ببدل ثوبي وأجي أسرجن الخيل ..
روابي : أوكيه
روابي تلف لأسيل : سمعي أبي أقولك ترى حمد فارس ممتاز ..
أسيل تسرج الوضحه : و أنا بعد ..
روابي : حمد فايز بكثير من الكؤوس بالفروسيه غلطتي يوم وافقتي ..
أسيل: روابي لا تخوفيني أنا عارفه
روابي تطالعها بنص عين : مع أنه ودي يتزوجك بسرعه و يأدبك عشان ما تتحدين بس ..
أسيل : بس
روابي تبتسم : بساعدك سمعي إذا شفنا حمد سبق سوي نفسك وكأنك تهدين و دختي عاد أخوي (تغمز لها) ما تهونين عليه و أنا أفوز ..
أسيل : جب و بعدين ليه تفوزين
روابي : أحسن من أخر الاسبوع زواجك
أسيل : موافقه ..
حمد يسكر زراير القميص : موافقه على شنو ؟؟
روابي : موافقه تطبخ لي إذا فزت
حمد: هههههه معزومه يا أختي على أخر الاسبوع ..
أسيل : هيه هزلت ان شاء الله طلاقي منك ..
روابي : يارب يارب فوزي ..
حمد : يالله طيب خلصني عدلن شيالكن و تلثمن لان الشباب بيتابعون ..
روابي تطلع الجوال : بخبر البنات .......... ألو هيوم سمعي ............. في سباق ............. أيه أنا و أسيل و حمد ..........طيب بسرعه خبري الكل ....... باي
حمد يهمس لأسيل : هين لأخليك تندمين ..
أسيل : والله أن تطلقت لأنقل لجده ..
روابي : والله لأدفعكم
طالعوا لبعض : هههه ..
طلعوا الحصن و تلثمن البنات وأسيل على الوضحه و روابي على البرنسيسه و حمد على الأشقر حصانه الخاص
أستعدوا لسباق و الشباب و الشياب و البنات يتابعون و تصفيق و تصفير و حماس على الأخر ..
و بـــــــــــــــــدا الـــــــــــــــــســـــــــــــــــبــــــــــــ ـــــــــــــــــــــــــاق
بالأول صدق حمد تقدم عليهن و أسيل الثاني و روابي الثالث حـــمـــد يتمنى الفوز ليرد الصاع صاعين لأسيل بزواجه أخر الأسبوع .. أســـيـــل
أرتعبت و بسرعه لفت لروابي اللي أشرت لها بتنفيذ الخطه حمد لف يشوف وين روابي و أسيل شاف أسيل تخفف و كأنها داخت خاف عليها يحصل لها مثل قبل أمس خفف سرعته و نسى السباق و بلحظه سبقته روابي اللي فازت والكل يصفق لها و الثاني حمد والثالث أسيل ..
روابي : واو فزت فزت ..
حمد بخوف : أسيل فيك شئ
أسيل تنزل عن الفرس تضحك :ههههه لا أبدأ بخير ..
روابي تنزل : ههههه تعيش و تاخذ غيرها ما فيها إلا كل خير ..
حمد عصب: يعني خطه بينكن ..
أسيل تمسح جبينها عن العرق : عندي تفوز روابي ولا أنت حتى لو الثمن خسارتي ..
روابي خافت على أسيل : أسيل ليه تعرقين و جهك كله عرق ..
أسيل تمسح جبينها : عادي عشان حر
حمد : أسيل الجو بارد فيك شئ
أسيل : لا أبـ..
حمد يمسكها قبل تطيح : أسيل
روابي تجس نبضها بصوت عالي : عــــــــمـــــــي مــــحــــــســــــن الــحــق عــــلــي عـــــمـــي
الكل يركض لها .............
محسن : أيش حصل
روابي : نبضها ضعيف و تعرق كثير ..
محسن : أسيل أسيل
أسيل تفتح عيونها بصعوبه : عمي
عبدالله بخوف : أسيل حبيبتي شنو فيك ؟؟
أسيل : أنا بخير بس من الحماس
محسن : خلونا ننقلها للمستشفى ..
أسيل : ما يحتاج أنا بخير أبي ماء ريقي ناشف ..
حمد بخوف : متأكده
أسيل طالعت لحمد تحاول تستكشف شنو تعني هالنظره خوف أو شماته حب ولا كره ..
اسيل ابتسمت : أنا بخير لا تحاتي ..
حمد وعبدالله سندوها توقف لكن أسيل ضنت أنها قويه بس انهارت مغمى عليها وكان هذا آخر ما تتذكره
في نفس الوقت بمكان ثاني ........
@storykaligi
🐚 300 ✨
دانه تمسح دموعها : أدخل
منيره : ليه تبكين أنتي من يوم ردينا من العرس مو عاجبتني ..
دانه : مافيه شيء بس تعبانه
منيره : علي أنا أعرفك
دانه : أنا غلطت على وحده من صاحباتي
منيره : ياقلبي إذا صاحبتك تحبك ماتزعل منك ..
دانه : يحق لها تزعل قالت لي تكرهني وما تبي تعرفني ..
منيره : أف أف أف من هذي اللي لهذي الدرجه تكرهك ..
دانه : رنا
منيره : رنا اللي أمس شفناها عاد ليه مو مبين عليها أنها زعلانه أو تكرهك أستقبالها لك بحفاوه في شيء ما اعرف ..
دانه : أيه بقولك شيء ماراح تصدقينه بس خليه بينا سر ..
منيره : خير ؟؟
دانه : رنا الفقيره اللي يوسف يبي يتزوجها وكلكم رافضين هي نفسها رنا اللي شفتيها البارحه ..
منيره : هههه تضحكين صح ..
دانه : لا والله صدق
منيره : كيف مو فاهمه ليه قالت ليوسف انها فقيره ..
دانه : لأن أخوك مغازلجي وهي بنت والله محترمه ظنت أن قالت له انها فقيره ومو من مستواه بيتركها وينقرف منها بس يوسف أخذ منحنى العند والكرامه كيف ترفضه يوسف اللي البنات يخقن عليه وعلى جماله ومنصبه وحده مثل هذي ترفضه ..
منيره : يوسف لو يعرف من هي لا تجيه جلطه ..
دانه : لا لا منيره تكفين حلفتك لا تقولين هذا سر بينا ما أبي مشاكل لرنا ..
منيره تبتسم : سرك ببير بس ليه زعلانه منك للحين ما فهمت ..
دانه : رنا ماتعرف أني أخت يوسف اللي يكلمها أنا والله صدفه عرفتها وهي الحين ما خذه مني موقف تعتقد أني متفقه مع يوسف عليها .. (بدت تبكي) منيره والله والله أنا ما قصدت حتى ماقلت ليوسف عنها البنت تنحب وصداقتها هي وبنات خوالها تنشرى بالألماس حبيتها وما بضرها بس ما صدقتني ..
منيره تضمها : بس ياقلبي أهدي ..
دانه تشاهق من الصياح : كيف أهدى وهي ماتبي تشوفني او تعرفني ..
منيره : لا قلبي راح تفهم باذن الله أهدي غسلي وجهك وخلينا ننزل تحت
دانه : راسي مصدع ما ابي اشوف احد بنام
منيره : نامي يا حبيبتي على راحتك
أما عند عرسانا دخل فراس الغرفه وبشاير منزله راسها وبأيدها الجوال وتمسح دموعها
فراس : حبيبي شفيك ليه هالدموع من كنت تكلمين ؟؟
بشاير : كنت أكلم شهد ..
فراس أبتسم : لحقتي تشتاقين لها ؟؟
بشاير : كثير لفت له: فراس ..
فراس جلس جنبها : عيونه
بشاير : شهد قالت لي شيء ضيق خلقي ..
فراس بخوف : شنو قالت لك يخليك تبكين أحد من اهلنا صار له شيء ؟؟
بشاير تدمع عيونها : أسيل بالمستشفى أغمى عليها وأهم بالمزرعه
فراس : شنو !!
بشاير : أيه فراس طلبتك بروح اشوفها
فراس : أكيد مايبيلها كلام غيري وانا بغير ونروح لها هذي أسيل ..
بشاير تمسح دموعها وتبتسم : ثواني بس ..
أما بهذي اللحظه.........
أسيل بدت تصحى وشافت المغذي بيدها والتفتت حولها
أسيل تبتسم بتعب : يمه
الأم تمسك يدها بحنان : ياقلب أمك
أسيل : شنو صار ليه جبتوني للمستشفى
روابي تدخل : السلام عليكم
الام واسيل : وعليكم السلام
روابي تبتسم : صحت مريضتنا الدلوعه ..
أسيل : الدلوعه مقبوله من الغيره روابي ليه انا هنا ..
روابي : يعني بالله هذا سؤال وحده مريضه وين نوديها لسوبرماركت يعني ؟؟
أسيل : بس انا ما احب المستشفيات قايله لكم ..
روابي : أنتي حاله غريبه ممرضه بمستشفى ولا تحبين المستشفيات معادله صعبه ..
أسيل ترفع الغطى رغم تعبها : أنا بطلع من هنا
الأم : أسيل بعدك تعبانه وين رايحه
روابي : أسوله جلسي بلاش حركات بزران أنتي تعبانه لدرجه مو قادره توقفين على حيلك
مع محاولات روابي والأم بأقناعها بالبقاء دخل محسن وعبدالوهاب ..
روابي تلف لهم : زين جيتو تعالو تعبت معها
محسن بأسلوب أمر وحزم : أسيل رجعي مكانك على وين ؟؟
أسيل ترجع تنام تحس بتعب : ما احب المستشفيات ..
الأم : يا يمه لا تتعبينا خليك هنا لين نتطمن عليك ..
الأب : بس الليله أسيل
محسن : أسيل خليك لين تطلع التحاليل ونتطمن على النتائج وشنو سبب الدوخه والأغماء ..
أسيل : بس الليله
محسن ابتسم يعرف عند بنت اخوه : أوكيه
بشاير وفراس : السلام عليكم ..
الأب : هلا بالمعاريس ..
بشاير وفراس : هلا فيك
محسن : خير شنو جايبكم
فراس : أفا ياعمي ماتبينا
محسن : لا والله بس مستغرب فيكم شيء
بشاير تبتسم وتطالع لفراس : الحمد لله مافينا إلا كل خير (لفت لأسيل) بس عرفنا عن أسيل فحبينا نتطمن عليها ..
أسيل : فديتكم يارب
جلسوا عندهم ساعه وبعدين طلعوا يتعشون قبل يردون للفندق ونامت اسيل بعد ماطلعت امها وأبوها
أما في مكان آخر يغلب عليه طابع الرذيله والمحرمات والعياذ بالله ..
#انتهى
مكملين معكم غدا" بإذن الله
انتظرونا ....
@storykaligi