الفصل 15
(يعني انته تظلمني وانا ماتكلم ..
واذا انا اخطيت صارت جريمه؟ ..
يعني انت تتألم وانا ما تألم ..
انا على فكرة .. حياتي اليمه )
وقفت متنرفزة : انته اشلون تسمح لنفسك تيي وتقعد احذاي بعد ..
ارتجفت بخوف .. وحسيت بنرفزة عميييقه .. انسان .. كريه .. جريء .. خبيييث .. و و ماله خص بالعادات ولا الدين .. انسان وقح !!
وقف بسرعه : سارة .. لحظة اسمعيني ..
قلت بعصبيه وانفعال/ اسمع شنو .. انته الي اسمع .. جوف ياهيه ياانت ..اذا مرة ثانيه كلمتني .. ولاطاح لسانك فلساني .. والله (ورفعت سبابتي عند حلجي وانا اعيد حلفتي) والله انه مايردني عن منصور شي .. والله اني اخبره بكل شي .. وبنجوف ساعتها شبتسوي ..
وقف بطوله الفارع : اسمعي
طالعته بااحتقار .. هه .. وله ويه بعد يتكلم .. قليل الخاتمه .. حتى بعد ماجاف الموت بعينه وبعد مايتوب .. صج ان بني ادم مايملي عينه الا التراب .. اخ بس اخ .. مقهورة .. هالانسان من شنو مصنوع انا مادري ؟؟ .: انته احقر انسان في الوجود..
تحركت بسرعه .. وسمعت سالم يقول :: سارة وقفي .. اكلمج .. عيب عليج اكلمج وتطنشيني .. ياهل الاحقج انا؟؟
وقفت بعصبيه والتفت له : ليش انته تعــــــــــــــرف العيب اصلا؟؟؟
طالعته بااحتقار وصديت ..
نزل راسه .. هه .. يمثل انه مستحي .. ياحرام .. لايكون عباله صدقت انه مستحي .. هالعايله مادري عندهم حب تمثيل ولا شسالفه ؟؟ .. ماورثوه من غريب .. ياما ابوهم مثل انه يحب ابوي .. صج انه ياما تحت السواهي دواهي .. : يمكن لو قلت لج اني غلطان .. فـ انا تعديت الغلط بمراحل كثيره
قاطعته وقلت بااحتقار : يعني اتعرف عن نفسك .. حتى حتى ماراعيت اخوووك .. ولا راعيت الدم الي بينا .. (فتحت عيوني بااوسعها وانا اكمل بكل كره) انته مااستحيت على ويهك وعلى دمك وانت تتلفظ بذاك الكلام ؟؟
حسيت بقشعريرة فجسمي .. اشلون فكر فيني جذي ؟؟ .. واشلون يرضاها علي ؟؟ .. على بنت عمه... عرضه .. لحمه ودمه ..
قلت والدمعه تلمع بعيني : انته مو بس طحت من عيني .. انته اصلا صار مالك وجود فحياتي .. ومابي اي صله تربطني فيك .. اذا انت يا ولد عمي .. وجي فكرت فيني .. اشخليت للناس؟؟ .. صج صج صدمتني ..
................
"سالم"
شعور بالذنب والخزي .. شعور بالاستحقار ..منحرج من نفسي وااايد ... انا اشلون تجرأت وقلت لها الكلام .. انا اشلون فكرت هذيج الحزة .. يالله سامحني .. سامحني .. انا تماديت وايد .. غلطت وااايد .. آآآه .. شقول لج يا سارة .. ماقدر اسكت اكثر .. قلت افضفض لاكثر انسانه تكرهني .. : انا كنت اعصي الله وايد .."حسيتها بتقاطعني فكملت " لا تقاطعيني .. خليني افضفض حتى لو تحتقريني .. انا احتاج لاخت افضفض لها .. سلوى رقيقه حساسه .. ماتستحمل اقول لها .. وسلطانه مع ريلها ومااحب الهيها .. انا يا سارة كنت اتمرد على كل شي .. ماعندي احد يوجهني .. كل الي كان اييني الفلوس وبس .. ولا مرة حسيت ان في احد يهتم فيني .. ولا مرة حسيت اني شخص مهم .. توجهت لطريج خطأ .. وماكان فيه اي احد يمسك بيدي ويدليني ع الطريج الصح .. ابوي ملتهي بالشركات والسفرات .. امي مع سيدات المجتمع .. من مكان لمكان .. من حفله للثانيه .. محمد متزوج وماله خص بااحد .. سلطانه ولها بيت بروحها .. سلوى منعزله .. منصور كان يهيج على اقل شي .. ومحد كان يحاجيه نظرا لان نفسيته كانت تتعب وايد .. ماعندي احد يوجهني .. ماعندي احد ينصحني ..
مرة جفت وحدة بالمزرعه بالغلط .. جذبتني وايد .. خصوصا نظرة عيونها .. ويها كان يشع براءة .. غير عن البنات في ذاك الزمان .. يمكن ماحبيتها ... بس حبيت شخصيتها وبرائتها .. شدني هالشي لا شعوريا لها .. قررت العب عليها .. واكتشفت انها تصير لي .. كنت كل مرة احاول ابعدها عن تفكيري .. اشوفها ترد له .. سألت عنها ..طلعت بنت خالتج .. قررت اجي بيتكم بااستمرار .. وهالشي ماكان يمنعني من اني انرفزج .. واقلل من ثقتج بنفسج .. كنت اعاني انا من عدم الثقه بنفسي .. كنت اتظاهر بالثقه والغرور .. وانا من داخلي اجوَف فاضي .. مافيني اي شي .. مافيني ذرة ثقه .. ادري صيحتج وايد .. بس كنت ارتاح وانا اجوفج متعذبه .. ارتاح يوم اجوف غيري متعذب .. كنت اكرهج .. واكره اخوج ماجد .. واكره فهد .. لانكم كنتوا اكثر الشخصيات الي اواجههم في حياتي \.. فهد دايما كانو يقارنوني فيه .. وهو الشاطر الناجح .. وانا الكسلان الصايع ... كنت دايم انقهر من التفرقه .. كانت امي ساعات تفرق بينا وتقول لي صير مثله .. وانا كنت اعاند .. حتى اني عدت صفوف كثيرة بس عشان احرج اهلي جدام الناس .. كنت ابغي ابين لهم انهم مايستحقون نجاحي .. لانهم مايساهمون فولا شي من حياتي .. تنهدت بتعب وانا استرجع الذكريات ..مرة المدير اتصل فـ ابوي .. وقاله عن الشغب الي اسويه فكل حصه لنا .. وقال له عن رسوبي المتكرر .. تدرين شردة فعل ابوي ؟؟ .. حرمني من المصروف شهر .. وحبسني يوم واحد بعد ما اكلني العقال .. حسيت بالقهر .. والكره اتجاه ابوي .. قررت اتمرد اكثر واكثر .. انا ماكنت اعبر مثل منصور بالكسر .. والهواش .. صحيح .. كنت ساعات اتهاوش ويا اولاد المدرسة بس عشان يوصل الامر لابوي ويتفشل .. كنت ابغي الفت انتباهه .. بس ابوي ابد ماالتفت لي .. اهملت دراستي وايد .. وفالاخير اضطروا ينجحوني حتى يفتكون من ويهي .. الي كل سنة مسبب لهم مشاكل .. ورغم واسطات ابوي الكثيرة .. الا انه ماكان يتدخل في امورنا .. وكأنه جابنا ونسانا ..
تنهدت وانا اكمل .. واجوف ابعد نقطه في البر جدامي : كنت اسافر وايد .. احاول اغير من روتيني .. على الرغم من كثرة اصدقائي الا انه ماكان عندي صديق مقرب لي .. يحمل اسراري .. يشاركني همومي ... كنت وحيد ... ساعات كنت افكر فـ منصور .. وانه يحتاج هالشي مثلي .. بس دايما كنت اتردد .. واهون .. سمعت بعد فترة .. ان البنت الي جذبتني .. وقصيت عليها اني احبها .. انخطبت .. ين ينوني .. حسيت اني بموت لو راحت عني .. مش عشان اني احبها او اموت فيها .. لا .. بس كنت ابي امتلك انسانه مثلها .. شفافه,,, وبريئه .. وتزوجتها .. عانت معاي وايد .. وخصوصا مع تقلباتي الكثيرة .. وكانت كلها ترجع لـ ردات فعل .. اي شي كانت تسويه .. كنت ادري ان وراه شي .. لكن اكتشفت انها اسمى من انها تسوي شي عشان يكون وراه شي ثاني ..
راحت عني بعد مابثت فيني مشاعر مااعرف ايش اسميها .. يمكن حب ..لا..مادري.. بس شي يفوق الحب .. بعد ماراحت .. اكتشفت اني احتاج لها .. احتاج لها وايد .. ادمنت على شي اسمه بنات .. صارت عندي هلوسه اسمها بنات .. ادور وادور .. يمكن الاقي شخص حياة فيهم .. لكن مالقيت .. لين .. لين جفتج .. اسف .. انا غلطت بحقج كثير .. بس كنتي دايم فعيني صورة حياة .. كنت دايم اجوفج حياة .. رغم الفرق بينكم ... سارة .. انا صج .. ندمت .. ندمت على كل المضايقات الي عرضتج لها ..
صدقيني سارة ..والله انا .. ندمان .. ندمان ..انا صج صج ماكنت اقصد الي قلته .. انا .. انا والله ماقصدت اسيء لج .. ياسارة .. والله وهذاني احلف لج .. اني ماكنت ابي شي غير اني احميج مب بس من منصور ومن بيتنا .. حتى مني ومن نفسج يا سارة ... ساره .. سارة انا .. انا ندمت على كل شي فحياتي .. انا احتجت اني افضفض .. اتكلم .. اصرخ واقول واعبر ... بس مافي احد يسمع لي .. الكل ضدي يا سارة .. الا منصور .. وسلوى ... سارة .. سارة انا .. انا اسف .. واسف لاني ضايقتج بكلامي ..
تحركت وانا متنرفز .. ومتضاااايق .. مشيت بهدوء .. وببطئ يمكن فأي لحظة تقول لي وقف سالم .. انا سامحتك .. لكن ماقالتها .. ماقالتها ..
التفت لها وطالعتها بحسره وندم واسف .. ايش يفيد الندم ايش؟ ولاشي غير الحسرة الي تشعل القلب نيران.. شفتها قاعده وهي تطالع الارض .. تعابيرها ماكانت واضحه .. تنهدت بحزن .. ليش فضفضت لج يا سارة .. ليش ؟؟ .. تنهدت بتعب .. لو اني فضفضت لفهد ابرك لي .. كان يمكن ينصحني ..
بس سارة .. نفس الكل .. دايما ضدي .. آآآآآخ يا خوي يا منصور .. ياريت لو تدري اشكثر جرحت مرتك .. وجرحت فيك .. واستغفلتك .. تذكرت البجامات الي تخلصت منهم .. واغراض سارة .. الي قطيتهم من عندي .. بس عشان اكفر عن الي سويته .. انا غلطان
وغبي .. ومليون غبي .. كتمت وكتمت وكتمت واخر شي ابوح عن هالكتمان للانسانه الي تكرهني .. لاكثر انسانه تتمنى زوالي .. غبي .. غبي ..
.....................
"امل "
حسيت اني مصدومة .. جاسم تحت؟؟!! .. اشيبي ؟؟ .. ارتجفت .. وحسيت بخوف غير طبيعي .. ليش ياي ؟؟؟ .. اهو اهو مايبيني .. ليش؟؟ .. مـ مـ مـ مـعقوله بـ بـ بـيطلقني؟؟ .. اكيــد اكيــد .. صكرت عيوني بألم .. حياتي كلها قلبت مأساه عشان غلطة وحدة .. هي الي جرتني لكل هالاشياء .. هي المستنقع الحقير الي جرني لهالمصير ..
نزلت عيوني من المنظرة وقلت لـ مريم : بس انا مب مستعدة اليوم ..
سمعت مريم تقول بغرابه : اموول .. شنو مب مستعده بعد؟؟ .. تستعدين ليش رايحه عرس انتي؟؟ كلها كلها بتنزلين .. ربع ساعه وبتردين .. يبغي يقول لج كلمتين ويظهر
كلمتين؟؟ .. اكيد .. انتي طالق ...
بلعت ريجي بحسرة .. وقلت لمريم : مابي انزل .. قلت لج مابي انزل ..
وبديت اصيح بشكل هيستيري .. جافتني مريوم مصدومة وبعدها يات لي لمتني وهي تقرا علي .. وتقول لي : تعوذي من ابليس اموول .. حياتي بس خلاص لا تصيحين ..
صحت زيادة وانا ادزها ابي اطلعها من الغرفه .. مابي اشوف احد مابي .. ومابي اشوفه .. يبي يطلق خل يطلق .. مابي اجوفهم مابي .. مابي يفضحني .. حرام عليه ..
كل دقيقه عايشتها في ترقب خايفه من الفضيحه .. خايفه يقول مابي بنتكم .. ماتشرفني مثل ماقال لي ع التلفون
صحت بعمق .. لالا .. حرام .. حرام .. مابي مابي انفضح
ليش ليش ..
آآآه .. سمعت طق ع الباب صرخت وانا ارد اصيح : روحووووووووووو مابي اجوفكم ماااااااااابي ..
غطيت ويهي ورديت اصيح بقوة .. وفجأة رفعت راسي من ع السرير .. وركضت بسرعه للموبايل .. وانا رايحه للتسريحة .. جفت نفسي .. وخفت .. كنت متغيره وايد .. جسمي مصفر .. وضعفااان .. مش ضعف ريجيم ولا ضعف عادي .. لا ضعف ايبين فيه المرض .. شعري متهالك وفقدت الكثير منه .. من حالتي واكلي القليل .. السواد الي تحت عيوني كان اكثر شي شدني له .. كان متواجد تحت عيني مثل الظل ... كان يخرع ..
مسكت الموبايل بااصرار ..
وطرشت مسج ..
ورديت ع السرير وانا ارتجف .. ونوبه بكاء ثانيه غرقت فيها وانا اسمع امي وخواتي ومريم يترجوني افتح الباب .. صكرت عيوني بضعف ووهن .. يالله .. عفوك ..!!
........................
قبل ايام ..
صراخ مالي البيت وبالاخص الغرفه الي فوق : اشلــــــــــــــون تخطبون هذي لي اشلووون؟؟ .. انتي مب قلتي اسمها ايمااان؟؟
ردت بخوف وهي ترتجف : لا .. قلت رفيجتي ايمان امدحتها وانا جفتها و و و وعجبتني .. و سألنا عنها ..لي لي ليش ماعجبتك؟؟
صرخ بقوة : انا مااابيهـــــــــــا ..
ردت برجفه : يعني .. اشلون .. ما بتتزوجها؟؟ ..
صرخ بعصبيه : طبعا لا ..
ظلت ساكته ومحتاره .. شنو قصده بطبعا لا .. طبعا لا بياخذها؟؟ .. ولا طبعا لا مابيتزوجها ؟؟ .. ظلت محتاره .. يعني معقوله شكلها ماعجبه .. مع ان شكلها كيووت .. انزين لو ماعجبه الشكل .. ليش جذي متنرفز .. شسالفه .. يكون كان يقص علينا ونخطب له ويفشلنا مثل كل مرة .. ويفج الخطبه .. بس هالمرة .. ملج .. يعني ماراح تكون مثل قبل فسخ خطوبه .. بيكون فسخ عقد بعد .... ارتجفت بخووف .. وهي خايفه من كلام الناس عليه .. مايعجبه شي .. دايما مايعجبه شي ..
اندق الباب .. : يمه شفيكم صراخكم واصل لين تحت ؟؟ ..
تنفس بقوة .. وزفر بضييييج ..شد شعره القصير لورا وهو يحاول يمسك اعصابه .. امه كبيرة بالسن وماتستحمل .. اخر شي كان يتوقعه .. انها تكون اهي .. ليش؟؟ لييييش .. معقوله .. يتزوج وحدة بايعه شرفها مثل هذي ..!!!
قمرهم كلهم
09-27-2010, 12:02 PM
"ماجد"
صرخت عليها بعصبيه : ردي ..ردي اقووووووووووولج ..
سمعت ضحكتها وهي تقول بعناد : لالا .. برد بس بشرط ماتضربني ..
قلت بعصبيه واضحه : بتردين السيارة ولا اشلون ..
سمعت صرختها وهي تقول : على شرررررررررررررررررط
قلت بعصبيه : اخلصي علي .. بيأذن الظهر وابي اقوم اصلي .. ورانا غدى ننجبه
ضحكت وهي تقول : احلف انك ماتسوي فيني شي واردها
ضحكت عليها .. هالانسانه عنيدة ماينقدر عليها : زين يالله مب مسوي لج شي
قالت بطفوله : احلف اول
ضحكت عليها .. ياناس ياحبيبتي والله .. حسيت بالذنب ساروة للحين صغيرة ع الزواج والمسؤوليه .. اخاف ان احنا ظلمناها بالزواج .. واكيد منصور الضحيه .. ابتسمت يوم تذكرت منصور .. والله انه داهيه وخبيث ولد العم .. اشلون لعب ع الكل .. يعني لو انا مرة ماسمعته وهو يكلم فهد و واحد ثاني معاه فالشركة .. كان مادريت انه صاحي .. وكان لعب علي مثلهم .. تذكرت يوم يوم عصبت عليه وتهاوشنا .. بس ماوصلت للايادي .. بس كانت هوشه كلاميه .. كنت معصب فيها .. حسيت منصور يستغلنا .. وانه يكذب على اختي هذي كبيرة وايد .. لكنه فهمني .. انه يحاول يخفف من حدة الموقف بينه وبين سارة .. خصوصا وهو يدرك كره ساره له
صراحه كبر بعيني .. هالانسان .. غريب ... اشلون مشى امورة .. واتقن كذبته .. قال لسارة انه يروح مدرسة للاميه .. تقريبا وهو هالوقت يداوم في الشركة ... والغريب ان سارة ماسألت واهتمت كالعادة .. اخبر سارة تهتم فكل شي بتفاصيله خصوصا اذا شي تحبه .. اوووه صح .. نسيت سارة ماكانت تستلطف منصور ... واتوقع كل هاي لانها عرفت من منصور ان ابوي توفى ..
آآآآه يا بوي .. ياريتك ويانا .. والله الحياة صعبه بدونك .. انتبهت من سرحاني ع سيارتي الي موقفه بالعرض بعيدة عني .. والاغاني تصدح فيها
ابتسمت على هباله ساروه .. الشيخه بايقه سيارتي .. ورايحة تدور فيها هي والبنات .. منصور عصب يوم عرف انها ماخذه السيارة .. وخصوصا .. لانه مايدري ان سارة حريييفه في السواقه ..
توجهت لسيارتي وخذتها .. وانا راجع للمخيم .. وقفت السيارة بحيث تغطي الجانب المفتوح ... من الخيم .. احنا صافين السيارات محاوطة الخيم حتى لو احد مر .. مايجوف الحريم والبنات ..
جفت عبود وثنوي .. يضحكون بخبث .. رفعت حواجبي مستغرب .. وتوجهت لهم بعد ماعدلت تيشيرتي الرياضي .. وغسلت يديني ..
جفتهم الخبيثين مخلين منصور يقطع البصل وهم يقطعون واحد يقطع خيار والثاني يقشر باذنجان .. ومنصور .. واقف وهو معصب ... واغلبيه شباب عايلتنا يخلصون بقيه امور الغدى ..
احنا يوم نطلع البر .. يكون شغل الغدى والعشا على الشباب .. والحريم على قولتهم ماخذين اجازة .. وماغير سوالف ويكسرون حب !! ..
سمعت صراخ يسوووف ... والتفت له .. جفت ثنوي يدعس قطعه بصله فحلجه .. وهو يصارخ ميت من الصياح ..
رحت لعند ثنوي وفريت اذنه : انته وبعدين وياك ها؟؟ .. ريال الي كبرك وياهم عيال .. وحاط دوبك من دوب ولدي
ثنوي ضحك : ههههههههههههههههههههه ولدك يقول لي مااحبك احب منصور اكثر .. قاعد ااكله الي قطعاه منصور .. وابيه يفرق بين الي يقطعه منصور والي اقطعه انا ... عشان يحبني اكثر
ضحكت وانا ادزة من جتفه واشل يسوف الي من جافني رفع يدينه الثنتين وهو يصيح ويقول : بابا .. اول ماشلته تعلق برقبتي ومات من الصياح وهو يأشر على ثاني : ماهبه ماهبه ...بابا تكه ماهبه ..
ثاني بعبط : ياسلام مجود صرت كباب مشهور .. ماجد تكه .. مش كباب تكه
ضحكت وانا اتوجه بيوسف للبنات : ههههههههههههههههه يعني تنكت حضرتك
ثاني بعبط وهو يضم عبدالله ويفتح حلجه ويدخل داخله البصله : لا احاول
سمعت صرخه عبدالله : ثنووووووووووي يالزززززززززززفت جايفني مرتك تلمني .. لاتعال بوسني .. تكفى
ثاني وهو يضحك : لالا.. ترجاني اكثر .. بفكر اذا ببوسك ولا لاء
ضرباه عبدالله وهو يقول : وصمخ لا تضحك فااذني ..قوم زين .. صاير متين ويعه كسرت ظلوعي
التفت عنهم وانا اضحك واهز راسي بضحكه .. متعودين على خبالهم هالاثنين .. طالعت منصور .. وجفته يطالعهم مندهش من تصرفاتهم .. طبطبت على ظهر يوسفاني الي يهمس لي انه مايحب ثنوي .. ويحب منصور اكثر منهم كلهم ..
دخلت المطبخ متوقع اجوف مرام هناك .. لكني سمعت حس بنات داخل وقررت ماادخل بس شدني شي : آآآه حتى وهو متزوج ومعاه ولده .. بعد احبه .. مب قادره انساه يا شيخة مب قادرة ... تغير وايد .. وايد ...
عقدت حياتي .. من هذي؟؟ .. صوتها مب غريب .. بس من؟؟ .. ومن هذا الي تحبه ؟؟ ..غريبه !! ..
طلعت موبايلي .. واتصلت لـ مرام .. تجي تاخذ ولدها ..
وجفت سارة طالعه تركض من الخيمه واسمع صرخه وحدة من البنات وراها ..ومن جافتني .. صرخت وهي تحاول تشرد من جهة ثانيه .. تكون بعيدة مني ..
ابتسمت وهزيت راسي بيأس .. مستحيل تعقل .. ولاكنها متزوجه ..
جفتها لفت بترجع .. وركضت ومسكتها وهي صرخت متفاجأة اني مسكتها .. ماتت من الضحك وهي تحلف : والله حلفت عليك ماتطقني
ضحكت وانا افرصها : ماطقيتج فرصتج .. كم مرة قايل لج استأذني ولا تبوقين ها؟؟ ..
ضحكت وهي تلهث بقوة وهي تقول بصوت عالي : انا فـــــــــــــ امااااااااااااااااااااااااااااااااااااااااااااان ماتقدرين تقربين مني
وضحكت زياده وهي تنخش وراي .. هزيت راسي وانا اقول : مابتعقلين انتي
ضحكت وهي تهز راسها بالنفي وتأشر علي وهي تقول : امااااان ههههههههههاي
ابتسمت وانا اجوف منصور واقف وراها ويطالعها وهو عاقد حياته .. وشكله مب عاجبه شي .. فضلت انسحب ..
: زين وخري ماتنعطين ويه خنقتيني
ضحكت ساروه وهي تسوي لي باي .. بس منصور وقفها : سارة ..
انسحبت .. ياني مسج من مرام .. ابتسمت ..
ليه احس اني معاك انسان ثاني واني اسعد شخص في هذا الوجود
وان بيديني مفاتيح الاماني
كل درب امشيه مفروش بورود
بكل ماشفتك تسمرت بمكاني
كن في عيونك لخطواتي قيود
كلمتين وكني مضيع لساني
نظرتين وكل مافيني يجود
...............
أكرهك وأحبك ولا أبيـك وأبيـك
لخبطت فكري ماعرفت الحقيقـه
ماتوقعت أعشقك في يوم وأغليك
لين ماحبك أشعل بقلبي حريقـه
تاهت بحوري وأنا أدور موانيك
والروح بغيابك وبعـدك غريقـه
والقلب يتبع بالمشاعر خطاويـك
ودروب غيـرك تشكـي الظيقـه
راضي بتعبك وأتحمـل بلاويـك
وماطيق غيرك ولا حتى دقيقـه
انسى اني أكون بيـوم ناسيـك
محد(ن) بعد المحبه ينسى عشيقه
يفز قلبي لاجابو الناس طاريـك
حبك قدر عمري ونورك طريقـه
أهديك كلي وانا وكلـي لمعاليـك
وأهديك كل الورد واحلى رحيقـه
من قال ماحبك ولاأبيـك وأبيـك
هذي خرابيط شاعر بحكم السليقه
ولا الحقيقه تراني مبتلـي فيـك
مثل ظامي يحتري من يبل ريقـه
واخرها تذكرني ليا هلت لياليـك
انت حبيب القلب وانت صديقـه
"منصور "
ضحكتها هي الي شدتني لولوة مطرشة مسجات عتاب .. ابتعدت اقراهم .. ولفتتني ضحكتها الحلوة .. بس عصبت شوي .. اشلون تضحك بكل هالسهوله جدام الكل .. وبهالصوت الرفيع .. ولو سمعوها الشباب .. ؟
قلت بهدوء: سارة ... التفتت لي متفاجأة ..
كانت خدودها محمره .. وخصل من شعرها الناعم ظاهره من شيلتها .. وعيونها تلمع بنظرة مليئه بالفرحه .. وكان ويهها اكبر دليل على تفاجأها من وجودي ..
قالت بمرح : هااا .. بسرعه بسرعه وراي شغل..
ابتسمت عليها وقلت : ايوا يا بزنس ومن .. شوراج؟؟ ... مديت يدي ودخلت خصل شعرها ...
كملت بمرح :وراي ضرب بالخمس ..استحت يوم دخلت خصل شعرها .. وابتعدت شوي عني وهي ترتب شيلتها باانحراج
ضحكت على تعليقها وقلت : حشى متزوج ريال مب بنت ..
طالعتني مصدومة ثواني .. ومفهيه وهي تطالع ويهي بالاحرى عيوني ... بعدها ..ابتسمت بألم وقالت : مسترجله ..!!
وراحت بسرعه .. وقفت مصدوم ..فتحت عيوني مب مستوعب ... للحين متأثرة بالي كنا نقوله لها .. ماعرف ليش حسيت قلبي انعصر من جفت ابتسامتها .. مادري ليش حسيت بحزن ..
عقدت حياتي وانا افكر ...وسمعت صراخ البنات .. وهم يقولون ..:/ رجعي .. رجعي سارووو ..
طالعت الخيام .. وسمعت ضحكة ساروه وهي تقول : والله ماارجع الا يوم تغيرووون .. مب مسويه مب مسويه ؟؟؟
تسوي شنو؟؟ .. التفت .. باارجع لخيمه الريايل الي كانت ابعد خيمه .. وسمعت مرام تقول : مافي ساروه .. تراها لعبه .. يالله قومي ..
سمعت حسها المعصب : مابي .. مابي .. انتو ماتستحون .. مابي ياقليلات الادب
ضحكوا البنات .. وانا عقدت حياتي وابتسمت .. رجعت للشباب .. وانا اهز راسي .. متقلبه يا سارة متقلبه ..
قمرهم كلهم
09-27-2010, 12:05 PM
"سارة "
رجعت متألمه من منصور .. حسيت بحزن .. سمعت صراخ البنات .. وتذكرت .. انا قاعدين نلعب لعبه الغرشه .. دشيت المطبخ شربت ماي .. ورجعت للخيمه .. لعبنا شوي وتفاجأت بالطلب
قلت وبااحراج : بعدو عني .. بعدو عني .. قليللات ادب
ضحكت غدور بخبث : مايصير مايصير هاي لعبه ولازم تنفذين
قلت مقهورة وانا اتخصر : انتي جب .. اخر وحدة تعلق .. هي بروحها ماتسمع كلامنا .. وتبيني اسمع كلامها .. مساعه مااجوفج رحتي تقطعين بصل ..
ماتت غدور من الضحك : هههههههههههههههه .. انا مااعرف اغسل السجين تبيني اقطع بصل؟؟ .. بس انتي عاد سهله .. كل يوم موزعين بوسات
فلعتها بالمخده وانا اقول : جبي ياحمارة .. والله .. والله بروح ..
ضحكو البنات .. وقالت مرام : مافي ساروو .. تراها لعبه يالله قومي ..
عصبت من قلب .. وقلت بااحراج وانا افلعهم : مابي مابي .. انتو ماتستحون ؟؟ ... مابي قليلات الادب .. والله هاي الي قاصر .. اروح لخيمتهم وابوس ريلي .. يالله زين .. انا فالغرفه ماسويتها
ضحكو البنات وانسدحو من الضحك .. وانا طلعت معصبه منهم ..
شوي .. وكلهم ياو .. وبدينا نستعد لـ سباق البطابط ..
مرام : انا مب لاعبه ..
موزة توافقها : وانا بعد ..
طالعت موزة بطرف عيني .. اوفف .. صايرة ثقيله دم .. وقلت فداخلي احسن ..
وبديييييينا السبااااق .. غدور السباله .. لفت علي كم مرة .. وانا اصارخ عليها .. طبعا كنا مبتعدين عن الخيااااام وايد .. عشان ناخذ راحتنا .. وكلنا شلينا الشيل عنا .. لان المنطقه خاليه .. هذا اولا .. ثانيا بعيدة عن المخيمات وااااااااااااااااااااااااااااااااااااااااااااايد ..
غدور لفت علي ومشت جدامي ..
صرخت منفعله : غدوووور يالدبه .. لاتلفين علي .. غش .. والله غش ..
ضحكت غدور .. ودريت انها متعمده تيي جدامي حتى انفعل واتكلم واخفف من سواقتي .. دزيت نفسي شوي ع جدام والهوى يطير شعري .. وشعور البنات وياي ..
صرخت عبير وهي تقول بخوف : غديييييير .. لا تيين جدامي .. حرام عليج ..
التفت لها لقيتها مصكرة عيونها بخوف ومخففه سرعتها وااايد .. مت من الضحك عليها ..
غدور خبيثه .. لفت ع الكل عشان تسبقنا .. وفعلا سبقتنا .. وبعدها هي خففت سرعتها ليش ماادري .. المهم .. بقينا انا وهي نتسابق .. وبعدين يت بااغش واختصر الطريج .. وغيرت من اللفه .. ورحت ورا الشيره .. وسقت لصوب اليمين ..
انتبهت ان محد لا غدور ولا عبور وراي .. وقلت اكيد اني اختصرت وايد من الطريج .. ضحكت بخبث .. ورن موبايلي فهاللحظة .. طلعت الموبايل وكانت غدور .. اعرفها تبي تاخرني حتى تسبقني .. لكن مب علي يا غدور ..
:آآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآ آآآآآآآآآآآآآآآآه
اهتز جسمي لجدام .. وتحرك بكل قوته وانفلت ع الارض .. والبطبطه انقلبت وتوايرها للحين تتحرك بسرررررعه كبيرة ع الرغم من انقلابها ..
انفجعت من منظر البطبطه .. وجفت نفسي طايحة ع الارض ..رعب تملكني وانا اسمع حركة العجلات السريعه .. صكرت عيوني بألم .. و حاولت اقوم بس ماقدرت ..آآآآآآي...اه .. حسيت ان العظمة الي فريلي "فالكاحل.. فاللوزة " اتعورني وااااايد .. وانفجعت من جفت الدم والتراب مغطيهم .. حاولت امسك روحي عشان مااصيح .. ايييي اتعورني .. عضيت على شفايفي بقوة ...و لفيت ادور على موبايلي .. مالقيته .. حسيت اني باصيح خلاص مااقدر .. ريلي تحترق واتعوووورني وااااايد ..
انتبهت ان موبايلي مفرور بعييييييييييييييييييييييد .. تقوس حلجي وكنت على وشك اني اصيح .. سمعت صوت .. رياااال ..
وانفجعت .. خفت واااايد .. فالبر .. وبمكان بعيد عن خيمنا ... وريلي اتعورني مااقدر اقوووم .. والدنيا ظهر وحر .. بااحترق فهالشمس .. وغير هاي .. اذا طلع .. هالريال .. مب جنتل .. شاسوي .؟؟ .. ماراح اقدر ادافع عن نفسي اقل شي ..
حسيت بررررعب من هاللحظة خصوصا وانه بدت تتوضح ملامح الريال وانا اسمعه يقول : مـــــــــن هني؟؟؟ ..
صرخت بفرررررحة .. : عبووووووووووووووووووووووووووووووووود الحقني ..
من جفت ملامح ويهه من بعيد وانا استبشرت .. وعلى طول ناديت عليه .. يه لعندي .. وهو متخرع ..
قعد عندي متخرع ومفجوع : ساروة .. اشفيج اشايبيج هني بروحج ؟؟ ..
انتبه على البطبطة الي تتحرك عجلاتها للحين .. وانتبه ع الدم الي فريلي : آآ .. شصار؟؟ ..
قلت وانا اشوي واصيح .. : كنت اسوق بسرعه ومانتبهت على الحصااايه .. آآآآآآآآآآآآآآآآآآآي لا تهوس"تضغط" على ريلي اتعورني ....
وقف وهو يساعدني اوقف .. تسندت عليه .. وانا مثنيه ريلي ودموعي فعيوني بس زاخه نفسي ومابي اصيح ..
عبدالله : تقدرين تمشين ولا اشلج ..
تمسكت فذراعه بقوه : لالا اقدر .. اي اي .. ااه .. تحترق .. اتعووورني عبوود ..
سحب يدي وحطاها ورا رقبته يحاول يمشيني .. وانا اتأوه .. وهو كان يسولف وياي يغير من الجو .. وحتى انسى العوار
ثوواااني كنت اضحك واندمج وياه فالسالفه وثواني مااسمعه من الحرقه الي احس فيها
:ههههههههه ... صج؟؟ .. والحين شخبارها ؟؟؟ ...
عبود : تسلم عليج .. خخخ .. من مساعه اتصل فيها والحبيبه مطنشتني ..
ضحكت عليه .. وصكرت عيوني متألمه شوي ..
سمعت صفقه والتفت عبود .. وشي بديهي التفت وياه لانه يدي ورا رقبته .. ايي .. احس يدي انجلعت من مكانها اخ ..
فتحت عيوني على اوسعها وانا اجوف منصور واقف جدامنا .. وعيونه ماتبشر بالخير .. يووووه لو تجوفون عيونه .. اااااه عذااااب |..
لونهم خطييير مع اشعه الشمس .. ولا احلى .. >< الناس وين .. وهي وين؟
تخرعت من نظرته .. وماحسيت الا وهو ايرني من يد عبدالله ... حتى اني تعثرت بغيت اطيح .. بس وقفني بدفاشه : مو ناقص الا نسوي فلم لكم .. ؟ ..
طالعني بكرة .. وحقد وغضب ..
قلت بسرعه : منصور انت فاهم غلط .. و
قاطعني وهو يقول بااستهزاء : فاهم غلط؟؟ .. اجذب عيوني يعني ؟؟ .. شوي ويشلج .. وفاهم غلط ؟؟ .. وبعدين شهالعباله يعني ؟؟ .. بس قاطة الشيله .. جان قطيتي العباة مرة وحدة .. يعني عشان تاخذين راحتج اكثر ..
عصبت ويوم بغيت ارد قال عبدالله : استأذنكم .. شكله في نقاش .. ومب حلوة اكون موجود وياكم ..
منصور قاطعه بحده : وقـــــــف .. للحين ماتصافينا يالحبيب .؟؟
عبدالله عقد حياته : نتصافى على وشو ؟؟ ..
منصور بعصبيه : على الوقفه الحلوة .. واللقطه الاروع ..
عبدالله قال وهو للحين معقد حياته : واحد ويساعد اخته فيها شي؟؟ ..
منصور وهو يبتسم بااستهزاء : اختهـ.؟؟ .. اخبر بنت خالتك مب اختك ..
والتفت علي بحدة .. ولا شرايج يا مدام ؟؟
قلت بعصبيه : عبود رووح
فتح عيونه .. ورفع حاجبه بااستهزاء .. وعلى شفايفه ابتسامه استهزاء وبهمس لي: لا ؟؟ .. صج تخافين على الحبيب الولهان .. وماخفتي على روحج ... اقدر لج وفائج واخلاصج !!
قلت بعصبيه : عبود اخوي بالرضاعه ارتحت؟؟ ..
طالعني متشكك .. ورجع طالع عبود : لا تحاولون ترقعون ..
عبود : منصور .. يعني انته اتشك بمرتك ؟؟ .. واتشك فيني ؟؟ .. لا ياخوي .. ماهقيتها منك افــــــــا والله ..
منصور بعصبيه : انا عمري ماسمعت انك اخوها بالرضاعه !! وايي اجوف ريال لام مرتي شوي ويشلها .. تبيني اصفق لهم يالغالي؟؟؟
عبود بصدق : الكل يدري اني اخو سارة .. ومادريت انك ماتدري ولا كان سويت اعلان من قبل " وابتسم بغباء"
عقد حياته منصور .. وظل ساكت .. انسحب عبدالله بعد مااستأذن وعيونه مليانه خيبه من منصور .. اما انا فكنت متجتفه .. واحس ريلي تحترق ومب قادرة اوقف .. احس اني بطيح خصوصا اني واقفه ع ريل وحدة ..
منصور : صج الكلام الي قلتيه ولا ترقيعه ؟؟؟
قلت بعصبيه : لا اجذب .. تحركت باروح لخيمتنا .. وفقدت توازني لاني دست ع حصايه .. وطحت .. انفتحت ربطة شعري
وتناثر شعري بغجريه على ويهي وجتوفي ..احين هاي وقته؟؟ وقتك ياشعري المليق تنفتح الحين وانا حالتي حاله.. حسيت بفشيله .. ويدي مليانه رمل .. مااقدر اقوم واصكر شعري .. حاولت انفض ويهي من شعري .. لانه نغزني .. واحس بالحرارة تزداد .. خصوصا انه حررر \..وطولت وانا واقفه مساعه .. وبديت اعرق .. وشعري متلصق بيبهتي .. يعني شكلي بااختصار .. ايفششششششششششششششششششششششششل
ساعدني منصور .. وهو يعدلني وينفض معاي الرمل .. رفعت جتفي اليمين .. وحكيت فيه رقبتي ابعد شعري عن ويهي ورقبتي .. حـــــــــر حــــــــــــر حــــــــــــــر .. وريلي تحترق والله ..
مسك ريلي من الركبه ويراها قعد يتفحصها .. وهو يعدل قعدته : اشلون طحتي ..
صديت مابي اكلمه .. بعد كل الي سواه ويشك فيني اني بنت مب زينه .. واني اخونه .. حتى لو مااحبه .. مو معناته .. اروح اخلي ريال غريب ايي يساعدني .. بهالطريقه ..!! .. ماتوقعتها منك يامنصور ..
فر ويهي بيده وتناثر شعري على ويهي وعلى يده : يوم اكلمج .. لا تتصيمخين ..
قلت بعصبيه : ولك ويه تتحجى ؟؟ ..
منصور : لازم انتي الي مايكون لج ويه تتحجين مب انا ..
عصبت زيادة هالانسان بينني .. والله بينني .. اوف اوف اوف .. : اشتبي .. خلني ابي اروح ..
بعدت يده عن ويهي ومسحت يدي على عباتي الوصخة من الرمل .. صارت بيضا .. مسحت عليها ابعد حبات الرمل الي متعلقه بيدي .. قعدت انفض يدي .. ويوم تخلصت اصابعي من حبات الرمل .. بعدت شعري عن ويهي .. لانه مضايقني .. عاد نفس جملته : ماقلتي اشلون طحتي؟؟ ..
قلت بملل : كنا نسوي سباق .. وابتعدت عنهم وماانتبهت للحصايه .. وانقلبت انا والبطبطة .. في شي ؟ .. خلصت التقرير .. وريلي اتعورني ..
قمرهم كلهم
09-27-2010, 12:06 PM
شق خلقه متوسطة من قميصه ولف ريلي فيها .. وانا اطالعه مدهوشه .. اشلون شق قميصه .. هذا صج مينون ..!!!! ..
قلت بغباء : اشلون بترد لهم جي ؟؟ ..
قال بضحكه : اشدعوه مفصخ؟؟ .. برتب نص القميص داخل البنطلون ونص برع .. يعني اونها حركة ..@@؟؟
طالعته مفهيه .. وقام وقف .. ومد يده لي .. وانا للحين اطالعه بغباء .. نقلت نظري بين يده .. وبين ويهه ..
ابتسم لي : يالله قومي ولا اعجبتج درجة الحرارة تحت الشمس؟؟ ..
انتبهت لحبات العرق الي كانت فيبهته .. وتذكرت خصل شعري المتلصقه بيبهتي .. وافشيلتاه .. بسرعه حركت قدلتي يمين يسار حتى ماترد تتلصق بيبهتي.. حركت قدلتي بتوتر وحركتها لليمين ولليسار حتى ماترد تتلصق فيبهتي.. اما منصور فـ فطس من الضحك .. قالت بااستغراب : اشفيك ..
مسك طرف بطنه وهو يقول ...: شكلج يضحك هههههههههه .. ليش جي مسويه.... مكششه قدلتج؟؟
بوزت على طول .. وانا احاول ارتب قدلتي والمشكله انها ترد تطيح مرة ثانيه على يبهتي وترد تتلصق فيهم .. احس شكلي كأنه وحدة هنديه تارسه شعرها دهن .. : مايخصك ..
وقفت وانا متجاهله يده .. بس هو ريح يده على جتفي وكأنه ماانتبه على تجاهلي ليده عمدا .. وقلت له : ايه ايه ايه .. شيل يدك .. والله انا المتعوره وهو الي يتسند علي ..
ابتسم وهو يقول : افا يالمتعورة .. اشلج اذا تبين .. (حاوط خصري وكمل وهو يجوف عيوني) .. بس ..( بعد شوي عني وهو لازال ماسكني وتفحص جسمي ).. متنانه اخاف تكسرين ظهري ..
حسيت ويهي يطبخ من الشمسس .. ومن الاحراااج ... نظرته .. تقهرررررررررررني .. طالعته بعصبيه وقلت له : امش امش .. يوعاااانه ..
ابتسم وهو يقول : ماقلت لج متنانه .. ههههههههههههههههههه
طالعته .. اول مرة يضحك جي .. انتبهت .. ضحكته وايد وايد حلوة ..
ابتسمت بداخلي ..
مشينا وااايد ..وكل شوي اخرط عليه ان ريلي قامت تعورني .. بس فعلا كانت تحرقني .. بس بس .. بس احس قلبي ينتفض ويدق بسرعه .. مب قادرة اخذ نفسي .. يالله اشفيني .. رفعت عيوني .. وانتبهت انه .. يالله شوي ونوصل الخيمه ..
......................
"روضه "
يلسنا في المطعم .. وكان فخم .. ومرتب .. واهم شي ان اكلاته هنديه .. لاني احب الاكل الهندي .. يلسنا .. وحمدان وحمدوه يطالعون المكان مبهورين .. وكل ساعه يأشرون ع الحديقه التابعه للمطعم يبون يروحون يلعبون ..
: ماما بنثير نلعب .
حمدان : اوفف عموه عذبه ليش قلتي لهم ايبون حمدوه .. اتفشل ماتعرف تتكلم
حمدوه بزعل : حمدان اثكت انته ماتعرف تتكلم ..
حمدان : انتي ماتعرفين .. قولي .. سارة سارت المدرسه اتحداااج .ز
حمدوه بتحدي : ثارة ثارت المدرثه
حمدان : شفتي كيف ماتنطقين السين صح
حمدوه : ثيييييييييييييييييييييييييين
حمدان : غلط ... ابويه سر ود بنتك عالجها ماتعرف ترمس ..
ابتسم سعيد وهو يطالع عياله .. انتبه اني اطالعه وغمز لي .. انحرجت ..وطالعت القائمه الي فيدي
ابتسمت غصب عني .. وطلبت "كاري ربيان " .. وحمدان وحمدونه .. طلبنا لهم برياني بدون سبايسي .. سعيد "كاري سمج " .. واخيرا عذوب .. " برياني سبايسي دياي|"
قعدنا نسولف في امور عامه .. ونضحك .. لين ماجابو لنا الغداء ..
سعيد كان مجابلني .. وحمدان ع يساره .. وحمدوة ع يميني واحذال حمدان .. وعذوب بيني وبين سعيد .. كانت الطاوله دائريه ..
واحنا ناكل .. حسيت بااحد يضرب ريلي .. رفعت عيني .. وكان سعيد .. واشر لي بالغلط .. ابتسمت وماعلقت .. ورديت اكل .. وعاد نفس الحركة .. وهالمرة ابتسمت واشرت له انه متعمد واني فاهمه انه متعمد .. ضحك فجأة ..
عذوب التفتت له بااستغراب : بسم الله عليك اخوي .. لا يكون بين السمج نكت بدال الشوك؟؟
سعيد وهو مبتسم : لاغناتي ماشي .. اكلي الربيان عدل ..
عذوب بااتسغراب : شو؟؟ انا طالبه دياي .. بلاك نسيت ؟؟ ..
ابتسم سعيد وهو يقول : هيه .. نسيت ...!
ابتسمت .. ورديت اكل .. اعرف انه يقصدني ..
التفت لحمدوه : مااما خلثت ايثير اروح العب؟؟
حمدان يتأفف : اوففف .. شو هاي اتفشلني ماباها اتيي وياي
تخصرت حمدوه : ليث ماتباني؟؟
حمدان بعبط : ليث فبيتهم .. ابويه .. تعرف شو معناة ليث؟؟
ابتسم سعيد : هيه .. اسد
حمدان : اي .. شي صبي ويانا فالصف اسمه ليث .. واقول له ان دايما اذكره ونحن فالبيت
سعيد بااستغراب : شو خصه؟؟
حمدان : حمدوه اختي كل ساعه تقول ليث .. اتذكره يا ريال ..!
ضحك سعيد ع حمدان الي يحاول يكون اسلوبه مثل اسلوب الرريايل ..
رن موبايلي وكان خلوف اخويه .. رديت عليه وانا مبتسمه .. وعيوني على حمدان وحمدوه وهم بالحديقه جدامنا .. التقت عيني بعين سعيد .. وكان يطالعني وبيده الشوكة والسجين .. انتبهت ان عذوب .. راحت الحمام ..
صكرت من خليفه : ليش ماتاكل؟ ..
تنهد سعيد .. ورد يطالع صحنه .. واكل : اكل .. خليفه؟
هزيت راسي بهدوء
قال سعيد : روضه .. لين متى ...!!
كنت ابغي اقول له اني خلاص سامحته .. بس مب عارفه كيف .. فكل مرة اقول بقول له .. مااقدر .. احس نفسي مااتهون
احس انه صعبها علي .. التزمت الصمت .. وتنهد مرة ثانيه .. شفته .. كان صاد ويطالع ع جنب ..
قلت له : توعدني ماتتكرر ..
طالعني وعقد حياته ..
طالعت صحنه .. وقال : افهم شو .. انج .........؟
هزيت راسي بـ اي ... واستحيت يوم مسك ايدي : صج؟؟ ..
ابتسمت : صج .. لكن ..
قاطعني : اوعدج ..
وابتسم ..
...................
" عذوب "
طلعت من الحمام .. وكنت قاصده هالعزيمه عسب اقرب منهم .. شهرين وهم يعانون .. خلاص حرام .. خلهم يردون لبعض ..
وانا طالعه شفت سعيد ساير لعياله .. ويضحك وياهم بفرح .. اما روضه فكانه تاكل ايسكريم ..
شكله سعيد طلب لنا ايسكريم .. سرت وقعدت عندها
واخذت ايسكريمها واكلته بغيض ..
ضحكت هي بقوة .. ورفعت حياتي مستغربه ..
انتبهت انها تأشر ع خشمي .. عقدت حياتي وبوزت : شووو؟؟ ..
ضحكت : شوفي ويهج مليان ايسكريم ..
فتحت عيوني مصدومة وانا اشوف الريال الي شفته فالمبزرة .. يوم سرنا وزف ساروة .. يطالعني وهو كاتم ضحكته .. ويمسح خشمه ..
انحرجت ومسكت الفاين بسرعه يالله يالله .. كل مرة اشوفه في موقف محرج اكثر من الي قبله ..
الي قبل نضحك ع يسوف وهو يصيح .. والحينه .. كأني مهرج .. احرااااااااااااااااااااااااااااااااج
مسحت ويهي .. وحسيت انيي بااصيح من الاحراج .. اما روضه فكانت تضحك بهدوء ..قرب سعيد .. وابتسم وهو يسلم على الريال
الرياااااااااااااااااااااااااااااااااال صاحب المبزرة .. اقصد الي شفناه فالمبزرة .. يعرفه؟؟ ... امبيه فشللللللللللله ..
حسيت اني ويهي تقطع من الاحرااااااااج
يه سعيد ..
ومشينا كلنا بنظهر من المطعم ..بعد ماحاسب سعيد لانه مارضى ادفع انا .. خوش انا اعزم وهو يدفع !! .,, عيل كل مرة بااعزمهم وهو يدفع هم ارفه عن نفسي وهم هو يدفع هههههههههههه اتغشمر اتغشمر ..
يلسنا في السيارة .. وانتبهت ان .. الريااااااااااال حرك هو الثاني من المطعم ..
سرحت فيه .. يااااه .. صدق احسه ريال .. بس ليش نظرة الالم بعيونه؟؟ .. مادري ..مادري ..
.................
"علي"
يالله شهالصدف .. هاي ثالث مرة اشوفها .. مرة في المبزرة .. ومرة في المطار .. والحين هني .. وطلعت اخت سعيد .. اي اخته .. وليش مش مرته؟؟ همممم .. اي لان مافي فيدها دبله .. اي صح .. صح ..
اخطبها؟؟ .. لالالا علي اشفيك توك ظاهر من تجربه فاشله .. وتبغي تتزوج
بس هالبنت غير.. انا حاس انها غير
مثل احساسك بأن لولوة غير .. كشرت من طاريها ..
لالا لولوة .. كنت احس باتجاها باحساس غير .. وهالبنت .. شي ثاني .. مب حب اكيد .. بس مااعرف مشاعر وديه صافيه احسها اتجاهها ..
وبعد احسها مب راعية شباب .. اممم .. اي .. من التزامها بااحجابها .. وحتى انها ماحاطة ميك اب ..
مممم ... يعني اتوكل ؟؟ .. اي ليش لا ... انا ريال .. وابغي اجوف عيالي .. وحتى لو من وحدة مااحبها
بس اهم شي ارتاح لها
ونسبهم يشرف
واخلاقها عاليه ..
يالله بتوكل .. والباقي ع الله
(انتهى)
قمرهم كلهم
09-27-2010, 12:08 PM
(ذكريات لاتنسى)
"سارة "
كنت قاعده وانا مستانسه حدي .. كل شوي حد دلعني .. ليش اني متعورة .. لاحظت ان طرف يبهتي وشفايفي منفوخين .. شكله والله من الطيحة .. اخ اخ اخ .. الحمدلله ماصار فيني شي .. ملت براسي على جتف امي وانا مبتسمه .. واحس فيها وهي تقرا على راسي .. صكرت عيوني مستمتعه بدلع امي .. احس اني انحرمت منها طول هالشهور .. عقدت حياتي وانا اتذكر بيت عمي .. هادي بااارد .. خالي من كل شي ..
..: يمه .. سارة يمه .. اشفيج سرحانه ..
انتبهت .. وابتسمت بخجل : لا ولاشي افكر بسلوي .. وحشتني .. بااتصل فيها ..
ابتسمت لي امي .. اما انا قمت شوي .. وانا اعري "اعرج" .. :هلااااااااا شخبارج
ياني صوتها الرقيق : تمام .. اخبارج انتي .. شمسويه؟؟ ..
ابتسمت من قلب : بخييييييييير والله .. انتي اخبارج واخبار جهازج ..؟؟
تنهدت وهي تقول : ساروه ميته من الخرعه والله .. مااقدر اتخيل مابقى غير اسبوع ونص ... احس اني باصيح
ضحكت وانا ااشر لـ غدور : لا لا يايييييييييه يايه ... احم هلا سلوي ؟؟
سلوى بااستغراب : انتي مب فالبيت؟؟
ابتسمت وقلت : للا لا .. وقلت بحماااس .. احنا فالبــــــــــــــــــــر
سمعت صرخة حماس من سلوى : لا عاد لا تقولييييييييين .. متى رحتو ؟؟ .. وليش مانطرتوني يالخوووووووونه
ضحكت وانا اقول|: خير العروس؟؟ .. نوديج البر نردج قطعه افحمه؟؟
ضحكت سلوى : جب يالله جب .. "حسيتها انحرجت من صوتها" .. مايسوى علي صرت عروس كلكم من كل صوب تذكرووني ؟..
ابتسمت وقلت اصرف سلوي : زين انتي الحين ماعندج شي انا وراي هيصه ولعب هني .. فالليل بنرد
شهقت سلوي : ايا الي ماتستحين .. انا مشتاقه لج وانتي اتصرفيني يالدبه
ضحكت بقوه :ههههههه اي عشانج اخت ريلي لازم عداوات اشفيج ههههه
سلوي : اي ضحكي ضحكي مع ويهج خلاص زعلت مب يايبه لج صوغه
ضحكت وقلت بخبث : افا افا افا يالذا العلم تزعلين من بنت عمج حبيبتج .. سوسو ؟؟ ..
سلوى بعيارة : اي عادي تراها تصرفني
ضحكت وقلت بمكر : افا افا افا وقمنا نزعل خلاص اطرش لج فيصل بكبره يراضيج
سلوى بااحراج : ساروه وجـــــــــع
\طووط طووط طوووط
رفعت الموبايل من على اذني ومت من الضحك .. ياربي فديت سلووووووووووووي والله .. وحشتني الدبه وايد وايد وايد .. فديتها
صكرت من سلوي وتحركت من ورا السيارات ابغي ارد وانا للحين اعرج
سمعت : سـارة..
التفتت .. وكان .. سالم : خير اشتبي؟؟
ملامحة ماكانت واضحه مع هالظلام : دريت انج تعبانه .. سلامات ..
مارديت عليه انتظر النهايه وياه؟؟ ...
تنهد وبعدين قال : سارة .. لاتصيرين ضدي؟؟
طالعته بحدة ... لكن الظلام كان كفيل بانه يغطي على ملامحنا ..
: انا اعتذر عن كل شي بذر مني .. سارة .. خلينا نتصافى .. انا .. انا اعتبرج اخـ اختـي احم .. واي شي يقصرج لاتترددين وتقولين لي .. ومنصور .. منصور خليه فعيونج .. واذا بدر منه اي قصور .. وماقدرتي تقولين له .. انا موجود .. وماراح اقصر
...: تقصر فـ ايش؟؟
التفت للصوت .. وكان منصور .. الي ملامحهه مطموسه بين الظلام .. دب الرعب في قلبي .. منصور وسالم .. وانا ...
بلعت ريجي .. وبللت شفايفي بطرف لساني .. سمعت سالم : اقصر في مساعدتكم .. انا مثل اخوها ..
حسيته معصب وهو يقول : سارة ردي صوب الخيم ..
بلعت ريجي وهزيت راسي بـ اوكي .. واستوعبت انه مايجوفني في هالظلام : ا اآآآ او اوكي ..
تحركت بسرعه حتى حسيت ان شي كان تحت ريلي وتحرك صرخت مرعوبه .. وماوعيت الا وانا مسحوبه .. سمعت صوت من وراي : اشفيج ؟؟ ..
قلت بخوف ورجفه : ما ما مادري .. شي كان تحت ريلي .. تعلقت فيده اكثر .. منصور رجعني اخااااف ..
مسكني وقال : زين زين .. هدي مايحتاي تخافين .. روحي الطريج نفس مااهو ماتغير ..
مسكت يدة بخوف اكثر : لا مابي .. وصلني ..
سمعت حس سالم وهو معصب : امشي انا اوصلج .. دام ان منصور مب راضي يتحرك
حسيت منصور يقول بحده وهو ايرني : امشي ...راجع لك يا سالم ..
كنت ماسكه يده بكل قوة .. وميتة من الرعب اخاف اتحرك .. منصور حاول شوي يبعدني بس انا لصقت فيه ميتة من الخوف .. حسيته كارهني ومايبيني اوقف احذاه .. بس انا احين خايفه .. ومافي مجال ابعد مستحيل اصلا ..
منصور بغموض : اشيايبج هني ؟؟؟
تعلقت فيده اكثر وانا احسه يحاول يحرر يدة : منصور لا تهدني والله اخاف من الظلام .. كنت اكلم سلوي وماانتبهت اني بعدت عن الخيام
سكت وماعلق ... اول ماوصلنا للخيام .. قال لي : لاتبعدين مرة ثانيه عن الخيام وفهالليل سامعه؟؟
هزيت راسي بخوف من الي صار وقلت : انشالله
تنح شوي وهو يطالعني خصوصا ان الليتات الي حوالين الخيام والنار الي مشعلينها كانت منورة شوي من الظلام الحالك
انتبهت انه يطالعني .. انحرجت ومشيت بعرجه خفيفه .. ووصلت للقعده .. الكل كان موجود سواء بنات ولا شباب .. بس الشباب كانو ملتمين على المشاوي يشوون .. والي يكمل تقطع السلطة .. اما البنات فكانو مريحين وسوالف وضحك .. ولعب ..
رحت لامي وقعدت عندها ودفنت ويهي بجتفها ..
سمعت غدور تقول بغيره : جوفو الياهل انتو .. ياهل انتي ياهل شوي ونعطيج مرضاعه
قلت بدلع وانا الم امي اكثر : محتره ..
غدور : وي عشتااااااااااااااااااااااااااااااااااااااو احتر من وشو مع ويهج؟؟ .. اقول مويز لعبي لعبي ابرك
كشرت .. ولفيت صوب الريايل وانتبهت ان ثاني متنح وهو يطالع جهة البنات وبالاخص صوب غدور وموزة .. حسيت بغييييييييييض .. وقمت متعمده ورحت لهم .. وسويت روحي مااجوف ودست ع الاونو .. سمعت صراخهم ..
قعدت فالوسط بين غدور ومرام .. وقلت بغيض : اشرايكم نلعب انسان جماد حيوان ..؟؟؟
البعض وافق والبعض لا .. موزة : لا عاد قديمه اللعبه
قلت بخياس نفس : الي مايبي يلعب لا يلعب
تبادلو البنات النظرات ... وخزتني غدور .. وهي تأشر لي بـ ليش؟؟ ..
طنشتها .. وطالعت موزة من طرف عيني بااجوف تأثير جملتي عليها .. وفعلا كانت مصدوومة .. ودموعها متحجرة بعيونها من الاحراج .. لهالدرجة كلمتي محرجة ؟؟ ..
قامت موزة وانسحبت .. ومرام راحت لولدها .. عبير قامت بسرعه ورا موزة .. ومابقى من البنات الا انا وغدور
غدور بعصبيه : ليش قلتي لها جذي؟؟
هزيت جتفي ببراءة : ماقلت شي يزعل؟!
غدور بعصبيه : اتعرفين زين اشقلتي .. ابي اعرف اشغيرج على موزة؟؟ .. ليش جي تكلمينها؟؟ من الصبح وانا ملاحظة طناشج لها
يمكن عشان ثاني فضلها علي .. وخلاني اروح لمنصور .. سكت منحرجة من موقفي السخيف .. وعندت وقلت لها اني ماقلت شي غلط .. حسيت اني شريرة .. ولئيمه .. اوففف .. مابعتذر منها وماراح اعتذر يعني ماراح اعتذر .. تولي مايخصني فيها
غدور : تغيرتي سارو
طالعتها بعصبيه : انا مثل ماانا ..
غدور : لا ,,,,تزوجتي .. وتكبرتي .. يعني عشان تزوجتي واحد غني جي صرتي؟؟
ترقرقت الدموع فعيوني .. انا جي ؟؟ معقوله غدور تطالعني بهالنظرة .. انا متكبرة ومغرورة بس عشان تزوجت واحد غني؟؟
وقفت وقلت لغدور : ماظنيتها فيج يابنت الخاله
ورحت بسرعه مطنشتها .. رحت لامي وقعدت بضيج عندها .. جفت الريايل متحمسين ويشوون .. ركزت على منصور .. كان بعيد عنهم نوعا ما
قاعد على قطع خشب .. وبيده عصا ويقلب فالنار .. ووهج النار مرسوم على ويهه .. وعيونه السرحانه ..تسندت على جتف امي وتنهدت بعمق .. صكرت عيوني .. غفيت من التعب ع جتفها .. وانتبهت بعدها بشوي .. ان البنات كلهم موجودات والكبار يسولفون .. صكرت عيوني .. وقلت لامي اني بدخل خيمه البنات بنام ..
دخلت الخيمه وانتبهت لحركه فيها .. كانت موزة ...
سكت كنت مستحيه من نفسي .. اشلون كلمتها جذي .. كسرت عيوني .. وسويت روحي مو شايفتها .. تحركت لزوايه الخيمه .. وبديت افتش في شنطتي .. طلعت لي جلابيه
طلعت موزة .. وبدلت .. انبطحت ع الباق سليب الي فارشينه .. اول شي ترددت ارقد .. وخفت من الحشرات وهالخرابيط .. صكرت عيوني .. وحسيت بشي يمشي على جسمي ..ووقف ... ورد يمشي ع جسمي .. تخيلته ضب او حيه او حتى عنكبوت !!؟.. فزيت بسرعه وشعري تناثر على ويهي بعشوائيه .. حركته من على ويهي وعيوني .. انتبهت ان الحركه كانت بااطراف اصابع ناصعه البياض مع الاضاءه الخفيفه للخيمه .. رفعت عيوني والتقت بعيونه العسليه : عشا ....
تنفست براااحه عميقه .. وانا ارد انبطح .. وحطيت يد وحدة تحت راسي وانا اطالع خلق الخيمه الي فوقي : مابي
حسيت بحركة صوبي .. التفت ولقيته منسدح صوبي .. ومقلد حركتي .. ويطالع الخيمه فوقنا : ليش؟؟ .. عشان مساعه؟؟؟
عقدت حياتي ؟؟ .. ليش اشصار مساعه؟؟ .. تذكرت انه ماكان يبي يرجعني ويكلم سالم فـ شي .. قلت بملل : لا مب عشان مساعه .. بس انا شبعانه كثرت من الجبس والفلفل مساعه ومب مشتهيه ..
لف ويهي لجهته وانا انصدمت من حركته : ولا عشان قلت لج متنانه الصبح؟؟ ..وتبين تسوين ريجيم؟
التقت عيني بعينه .. ومع الاضاءة الخفيفه للغرفه .. غرقت فسحر عيونه ..سبحـــان الله شهالعيووون .. رسمة عينه .. رموشه السوودة الكثيييفه .. ولا لون عينه .. شي ثـــاني ...
قمرهم كلهم
09-27-2010, 12:10 PM