الفصل 11
*الجزء الحادي عشر
(في بيت أم عبدالرحمن..)
,,تحديدآ في المجلس..
رهف بخوف:يبه الحين الساعة 3,30 البنك باقيله نص ساعة ويقفل..
سلطان وهو معصب:داري عشان كذا أنا جاي آخذك بسرعة عشان يمدينا نلحق عليه قبل مايقفل..
رهف:مشاري موفيه وأنا ماأقدر أطلع وهو برا..
سلطان: أنتي منتي طالعة لحالك أنتي طالعة مع أبوك... اخلصي البسي عباتك وخلينا نلحق عالبنك قبل مايقفل.. [وبأعلى صوت] رهف بســـــــرعه..اسمعي الكلام..
,,خافت رهف وحست إنها متورطة وانطلقت لغرفتها .. اول مادخلت خذت جوالها ودقت على مشاري.. رن الجوال ورن بس مشاري مارد عليها..
عصبت رهف ورمت الجوال عالسرير..
خذت عباتها ودفتر (كرت) العايلة ونزلت من الدرج بسرعة ومرت على لطيفة اللي
كانت واقفة تبي تصلي العصر..
رهف:عمه.
لطيفة وهي مستغربة: ها يارهف..
رهف:عمه.. ابوي جا ويبيني اطلع معه ضروري وقاعدة أدق على جوال مشاري مايرد..
لطيفة وهي تناظر للساعة:يابنيتي الحين أمداه بالمسجد يستعد للصلاة..
رهف:تكفين عمتي أبوي مادري شفيه يبيني الحين أطلع معه.. شوفي تكفين إذا مشاري رجع وأنا لسه ماجيت قوليله ..
لطيفة :طيب وشفيك ترتجفين أهلك فيهم شي؟؟
رهف:مادري عنهم ياعمه ... خلاص أنا بطلع الحين لأبوي قبل مايعصب زيادة..
,,كملت رهف طريقها ودخلت عند أبوها..
سلطان بعصبية:وشفيك تأخرتي؟؟
رهف وهي تلبس نقابها: لاولاشي..
,,
في سيارة سلطان..
رهف وهي خايفة..
يارب ارجع قبل مايجي مشاري.. أنا مادري ليه طاوعت أبوي وطلعت ليتني قلتله إنا نروح بكرة أحسن..
لويجي مشاري وأنا موبالبيت بيسوي مصيبة.. لحظه ليه ما أدق الحين أكيد خلص صلاة..
,,قتحت رهف شنطتها ودورت جوالها لكنها مالقته.. وتذكرت إنها رمته عالسرير..
عضت رهف شفتها وغمضت عيونها بقوة وقالت الله يستر..
,,وقف سلطان عند البنك وقطع تفكيرها بصوته وقال:
رهف ادخلي وطلعي بطاقة جديدة بدل بطاقتك اللي انتهت.. وحطي نفس الرقم السري الأول..
,,تنحت رهف في أبوها وقالت:
يبه إنت ماخذني من بيتي عشان بس أجددلك البطاقة..
سلطان:الحين مو وقت كلام انزلي وادخلي البنك بسرعة قبل مايقفلون..
,,تألمت رهف من أسلوب أبوها وتفكيره.. ودخلت البنك وطلعتلها بطاقة جديدة ..
ورجعت مرة ثانية للسيارة..
سلطان بلهفة:ها كل شي تمام..
رهف: إيه..
سلطان : وينهي البطاقة؟؟
رهف وهي تعطيه: هذي هي..
سلطان وهو يحطها بجيبه وهو مبسوط:تسلمين تسلمين..
,, سكتت رهف وحست نفسها بتموت من القهر والظلم..
الحين يجيني بعز الشمس والحر عشان أروح معه البنك.. من أول ماتزوجت ماطب عندي ولا شفته الا يمكن ثلاث مرات .. وهالمرة جا عشان الفلوس..
ومو أي فلوس.. الفلوس فلوسي راتبي.. كل هالسنين ياخذها وأنا ساكته.. حتى بعد ماتزوجت مو ناوي يرجعلي بطاقتي.. اشهالظلم.. سنين وأنا أكرف وهو ماخذ كل شي..
,,بدون تفكير قالت رهف: يبه..
سلطان: نعم..
رهف:يبه ممكن ترجعلي بطاقتي..
سلطان وهو مطير عيونه: نعم وشقلتي؟؟؟
رهف:يبه.. خلاص البطاقة قعدت معاك بمافيه الكفاية... ممكن ترجعها لي..
,,تنرفز سلطان وفار دمه وحس الدنيا تلف فيه ولا إراديآ رفع يده اليمين على رهف وضربها بقبضة يده..
,,رهف جت الضربه على عينها وعلى أعلى خدها وسارت ماتشوف شي ونزلت راسها وحطت يدها على مكان الضربة وهي تتأوه ومفجوعه..
سلطان بأعلى صوت:نعم.. والله وطلعلك لسان ياقليلة الأدب ياقليلة الخاتمة.. هذي جزاي..
هذي آخرة تربيتي فيك.. ياوقحة ياقذرة..تحسبين نفسك تزوجتي وخلاص ماعد أقدر عليك.. هالفلوس اللي آخذها منك ماتوفي ربع تعبي عليك..
ولانسيتي من رباك وسهر عليك وصرف عليك لين سرتي هذا كبرك.. ولاخلاص عيشة القصور نستك أبوك ونفسك..
شوفي يارهف لو ترجعين تقولين هالكلام واسمعه منك مرة ثانية.. أو تفكرين تاخذين مني بطاقتك.. لاانتي بنتي ولا اعرفك.. وبقطعك أنا وزوجتي وبناتي واخوك صالح..
,,رهف مصدومة وخايفة وللحين يدها على عينها..
سلطان: سمعتي.... سمعتي..
رهف وهي يالله تتكلم وشافت من مصلحتها إنها ماتعند أكثر لأنه بيجرم فيها:
.... طيب..
(في بيت أم عبدالرحمن..)
,,تحديدآ في الصالة..
مشاري وهو توه يدخل: السلام عليكم..
لطيفة:يا هلا وعليكم السلام..
مشاري:شكل الناس جوا من دواماتهم وناموا..
لطيفة:إي والله كلهم نايمين... متى تداوم بجامعتك..
مشاري:اليوم رحت أعدل جدولي ومارح أداوم إلا الأسبوع الجاي..
الأسبوع هذا مافي محاضرات..
لطيفة:الله يوفقك ويناولك ماتتمناه..
مشاري:اللهم آمين.. يمه قولي لوحدة من الشغالات تجيب غداي..
لطيفة:طيب... صح مشاري ترى رهف جا أبوها وأخذها...
مشاري تنح: نعــــم.. اشلون أخذها...يعني طلعت معاه؟؟
لطيفة:جا وماقعد بالمجلس خمس دقايق وأخذها وراح..
مشاري: تطلع من غير ماتقولي؟؟
لطيفة: تقول إنها دقت عليك ولا رديت.. خلني أقوم للمطبخ عشان أقولهم يجهزون غداك..
مشاري بعصبية:لا خلاص مابي شي.. أنا بطلع الغرفة راسي مصدع..
,,,طلع مشاري لغرفته فوق وهو معصب عالآخر ورمى شماغه وثوبه عالكنبه وجلس عالسرير..
"هين ياسلطان.... طيب يسير خير ..إنت اللي جبت طلاق بنتك على يدك..
وهين يارهف وصلت فيك المواصيل تطلعين من بيتي على كيفك..
لكن سويتي خير... اختصرتي علي مشوار طلاقك.. طلاقك انتي جبتيه بيدك لنفسك..
,,راح مشاري وفتح الثلاجة وطلعله عصير وسكر الأنوار وفتح أبجورة وحدة بس وتمدد عالسرير وفتح التلفزيون..
,,
.. بعد مرور عشر دقايق..
,,فتحت رهف باب الغرفة ودخلت وسكرت الباب وراها وهي ترتجف..
مشاري:حمدالله عالسلامة..
,,كملت طريقها رهف وفصخت عباتها وجلست على كرسي الكمدينة..
,, مشاري يحاكي عمره: هين يارهف تسفهيني...
مشاري من غير مايطالعها: رهــــــــــف... شيلي ثيابك وارجعي مكان ماجيتي..
رهف: مشاري خلني أفهمك..
يقاطعها مشاري: ولاااااا كلمة... اتوقع انك سمعتيني... شيلي قشك كله وارجعي مع ابوك مكان ماجيتي..
,,فزت رهف وراحت عند مشاري وقعدت عالسرير وهي تبكي ومنهارة..
رهف:مشاري الله يخليك... الله يخليك...لا تظلمني.. والله إني طلعت غصبن عني..
,,ويلتفت مشاري بكل عصبية: تطلعين برا البيت من غير ماتستأذنين..
,, ويتفاجأ مشاري لما شاف رهف.. كانت عينها منفوخة وحمرا مثل الدم وخدها في ظربة زرقا..
مشاري: وشهذا بخدك؟؟
رهف وهي تبكي:ولا شي..
مشاري:وشلون ولا شي... من اللي ظربك .. وانتي أصلآ وين رحتي؟؟
,,رهف تبكي وترتجف..
مشاري:رهف تكلمي من اللي سوى فيك كذا..
,,رهف كانت حيرانه وورطانه ماتدري شتقول.. تقول لزوجها إن أبوها هو اللي ضربها.. تقول لزوجها إن أبوها أخذها عشان يستمر ياخذ فلوسها..
مشاري:رهف تكلمي ولا قسمآ بالله لأروح عند أبوك واعرف السالفة..
رهف وهي ترتجف وميته بكاء:مشاري أبوي جا هنا وأخذني وداني البنك قبل مايقفل.. عشان بطاقتي انتهت ويبيني أطلع وحدة ثانية.. ودقيت عليك بس مارديت علي..
مشاري: لحظة..لحظه... أنا موفاهم شي..
أي بطاقة تقصدين؟؟
رهف:بطاقتي..
مشاري: أي بطاقة..
رهف:بطاقة الصراف..
مشاري:الفلوس اللي في البطاقة هذي حقت مين.. حقت أبوك..
رهف:لا البطاقة هذي ينزل فيها راتبي..
مشاري وهو مصدوم:وشــو..راتبك.. وليه البطاقة طيب ياخذها أبوك..
رهف:هي دايمآ معاه..
مشاري وهو مصدوم:دايمآ معاه... بطاقتك اللي ينزل فيها راتبك مع أبوك.. من يوم أنتي بنت وهي مع ابوك؟؟
رهف: إيه..
مشاري:وخذك عشان تطلعين وحدة ثانية.. ورجع أخذها؟؟
رهف: إيه..
مشاري: طب من اللي ضربك؟؟
,,,ر هف نزلت راسها وقعدت تشاهق..
مشاري:رهف... أبوك هو اللي ضربك..
رهف تكلمي اللي سوا بعينك كذا هو أبوك..
,,رهف يوم شافت مشاري عصب خافت وقالت:
لا لا.. مو هو...
مشاري:جيبي المصحف يارهف واحلفي ان ابوك مو هو اللي مد يده عليك.. قومي ياللاه..
,,رهف حطت يدها على وجهها ونزلت راسها واستمرت تبكي وترتجف..
,,,ناظر مشاري لرهف بكل رحمة وهو في قمة القهر من سلطان..
"معقول معقول للدرجه هذي حقير وطماع.. حتى بنته ماسلمت منه..
حط يده على كتف رهف وحاول يمسك نفسه وقال:
شوفي الحين المغرب أذن.. قومي توضي و صلي وخذيلك غفوة ساعة.. وارتاحي وإهدي..
رفعت رهف راسها وقالت: مشاري يعني مو زعلان..
مشاري:الحين انتي صلي وارتاحي.... ولا ارتحتي وهديتي بيني وبينك كلام ثاني...
:::
طلع مشاري من عند رهف وهو معصب...
"طيب يا سلطان إذا ماخليتك تحرم توقف عند بابي ماأكون أنا مشاري..
وصلت فيك يالحقير تطلعها من البيت غصبن عنها... ومن دون علمي.. وتضربها وهي على ذمتي..
لكن مارح يوقفلك ويعلمك أدبك إلا أنا..
:::
::::
,,بعد ماصلت رهف المغرب وغيرت ثيابها.. قعدت على طرف السرير وجسمها يرتجف ومنظر أبوها يوم يرفع يده ويضربها كل شوي تتذكره وتبلع ريقها..
,,دخل مشاري الغرفة ويوم شافته رهف نزلت راسها وكش جسمها..
مشاري بهدوء:صليتي؟؟
رهف:إيه..
مشاري:هالأسبوع كله ماله داعي تداومين..
رهف :ليه؟؟
مشاري:اشلون ليه ماشفتي وجهك بالمراية من جهة اليسار كله معدوم..
,,نزلت راسها رهف وخنقتها العبرة وماقدرت تمسك نفسها وجلست تصيح..
وتقول بنفسها:
اللي يشوفك يامشاري.. يقول ان هالشي أول مره تشوفه..
ماكنك سويت أكثر من كذا... بس ماتنلام إذا هاللي سارلي من أبوي.. يعني معقول انت بتسير احسن منه..
,,بنفس اللحظه تذكر مشاري وجه رهف يوم ضربها ورجع يلوم نفسه ويقول..
"ليش يامشاري مستغرب.. ماكنك سويت فيها أكثر من كذا..
بس هذا أبوها ومهما سوت الأب مايسوي ببنته كذا أبدآ..وبعدين رهف ماسوت شي هو اللي ظالمها وماكل فلوسها...يا قواة قلبه..
...مسكينة رهف.. وين تروح.. وانا اشلون ارجع ارميها له مره ثانيه..
,,مشى مشاري بهدوء وجلس جنب رهف ولف يده على كتوفها وقال:
شوفي رهف.. تقدمين هالأسبوع إجازة انشالله ينخصم راتبك كله.. حتى أنا كل هالأسبوع مأجزماعندي محاضرات اقعدي معي.....وبكره الساعة تسع ونص آخذك ونروح البنك..
رفعت رهف راسها بخوف: ليه وشبتسوي؟؟
مشاري:شوفي يارهف..سالفة إن أبوك من أول ماتوظفتي وهو ماكل رواتبك مومشكلة اللي فات مات...لكن ان هالشي يستمر وانتي على ذمتي... لا والف لا..
رهف بخوف:مشاري الله يخليك أنا مابي مشاكل.. خل البطاقة معاه.. مابيها..
واذا خايف من مصاريفي واني اثقل عليك.. والله ما أطلبك شي خلاص...
مشاري:اسمعي يابنت الناس.. انتي فاهمة غلط...
مو أنا اللي ياخذ من زوجته ريال واحد.. انا أقدر أصرف على عشر حريم إذا بغيت... وسالفة إنه بطاقتك معاه وياخذ فلوسك تعبك وشقاك وانتي عندك عادي فأنا عندي هالشي موعادي... دامك على ذمتي يارهف ما أرضى أحد يهينك أو يدوس على طرفك... واللي سواه أبوك اليوم إنه ياخذك غصبن عنك... لاوبعد يمد ايده عليك هذا مواعتداء عليك بس هذا اعتداء علي أنا ... ليه أبوك شايفني بزر.. موداري إن وراك رجال...
اسمعي يارهف بكرة نروح البنك وتقولين ان بطاقتك اللي طلعتيها إنأخذت منك أو ضاعت ... وتكنسلينها وتطلعين بطاقة جديدة... برقم سري جديد..
وخلي البطاقة اللي معه تنفعه..
رهف ولازالت تبكي:مشاري يرحم والديك .. يرحم والديك.. ماله داعي تكبر السالفة أكبر من كذا... أبوي بيذبحني..خلاص خلها معاه.. مابيها..
مشاري: شوفي أنا ماأبي البطاقة تقعد معه يوم واحد زيادة ويستفيد ...خلاص... وبعدين خير انشالله وأنا وين رحت.. لاهو ولاعشر من أمثاله يمد إيده عليك وأنا موجود..لا تخافين..
,,سكتت رهف وناظرت بخوف لمشاري وقالت لنفسها:
الله يستر منك.. الله يستر... وانا ماسكن قلبي الخوف الا من يوم مادخلت حياتي يامشاري http://forum.te3p.com/te3pimages/buttons/quote.gif (http://forum.te3p.com/newreply.php?do=newreply&p=1970188)
رونق الاحساس
02-04-2011, 03:16 AM
(في غرفة أسيل..)
عبدالرحمن: وشقلتي يا أسيل..
,,أسيل مصدومة ومستحية وراسها بالأرض..
عبدالرحمن:الرجال كويس ومحترم وسمعته زي المسك.. وولد ناس ومعروف ..
وماشالله مرتبته عاليه.. وكل الناس تمدحه هو وأهله..
منى: أسيل حبيبتي لاتستحين.. إذا انتي مواقفة أو رافضة قولي رايك لأبوك..
,,أسيل ساكته وعينها بالأرض وتحس بتشتت كبير..
عبدالرحمن:قبل ماتوافقين ياأسيل أو ترفضين لازم تعرفين إن معاذ يشتغل بسفارة السعودية بأسبانيا.. واذا تمت موافقتك بيتزوجك هالسنة وتسافرين معه في مقر عمله لأسبانيا..
,,انصدمت أسيل زيادة وهالمرة ماقدرت تسكت وقالت:
أروح أسبانيا؟؟؟ ودراستي..
منى: إذا وافقتي بتكملين دراستك هناك..
عبدالرحمن: يا أسيل فكري على مهلك واستخيري وقرري وقوليلي رايك..
واسبانيا ولا الشرقية ولا الرياض ماتفرق دامك مع إنسان كويس ومحترم ويحبك ويعيشك عيشة كويسه... البنت لاتزوجت يا أسيل تتبع زوجها وين ماراح... والدراسة لاتشيلين همها الولد متعلم وجامعي وأكيد مايرضى إن زوجته تسير أقل منه بالتعليم...
فكري زين وثقي ثقة تامة إني ماقبلت فيه وفاتحتك بالموضوع إلا وأنا شايف إنه زين لك..
,,طلع عبدالرحمن ومعاه منى وخلوا أسيل لحالها في دوامة كبيرة.. وحاسه نفسها موقادرة تفكربشي إلا بصالح..
***
****
*****
(في بيت عزام..)
كان جالس في الصالة قدام التلفزيون وماسك الجوال وفجأة فز من قعدته وهو طاير من الفرح وقال:
صدق يمه.. متى؟؟
أم عزام: مادري متى ماسمحت ظروف شغلي وشغل زوجي..
عزام:يمه تكفين طلبتك إذ جيتي لاتسكنين بفندق زي كل مرة تعالي بفلتي هنا.. تكفين ترى الفيلا وسيعه وتكفينا كلنا..
أم عزام: يسير خير لكل حادث حديث.. يللاه الحين أنا بقفل.. بس وشتبيني أجيبلك معاي؟؟
عزام:ولاشي يمه بس أبيك تجين وأشوفك..
,,وقفل عزام من أمه وهو متشقق من الوناسة وعلى طول دق على طارق..
طارق:هلا والله..
عزام: وينك؟؟
طارق:بالبيت..
عزام: البس ثواني وانا جاي آخذك..
طارق:ياخي توني شايفك بالجامعة وشتبي..
عزام:طارق.. اختار أفخم المطاعم بروح أعشيك فيها إنت ومشاري..
طارق:ليه وشمناسبة هالعزيمة؟؟
عزام: ماعندي شي بس مبسوط ومستانس..
طارق:وش اللي مبسطك؟؟
عزام: أمي ياطارق.. أمي بتجي هي وأخواني الصغارالرياض قريب وانا مبسوط إني بشوفها..
طارق:لااا... كويس خلاص يللاه قبلت عزيمتك..
,,,,قفل عزام من طارق وعلى طول دق على مشاري يعزمه وبعد صلاة العشاء تقريبآ مرعزام على طارق ومشاري وأخذهم وراحوا تعشوا برا..
وكملوا سهرتهم مع بعض...بفيلاة عزام..
***
****
*****
(في سيارة مشاري...)
,,,الساعة 10,15الصباح...
,,طلعت رهف من البنك وركبت السيارة..
مشاري: ها وشصار؟؟
رهف بحزن: كنسلت البطاقة الأولى...
مشاري:وطلعتي وحدة ثانية؟؟
رهف:إيه..
مشاري:طب وشفيك زعلانة؟؟
رهف: لاموزعلانة..
مشاري:طيب وشتبين تاكلين؟؟
رهف:ولا شي..
مشاري:عالعموم أنا باخذلي سينبون وقهوة وباخذلك زيي..
,,سكتت رهف وطالعت من جهة اليمين وقلبها مقبوض وخايفة من اللي بيسير إذا عرف أبوها..
::
::
دخلت رهف ومشاري البيت وعلى طول مشاري راح جلس مع أمه لأنه لقاها صاحية..
,,طلعت رهف فوق وبالها مو معها أبدآ..
,, مادرت رهف إلا وأسيل وراها..
أسيل:رهف..
رهف:هلا أسيل..
أسيل: مارحتي دوامك؟؟
رهف: لا مارحت اليوم..
أسيل:رهف... وشفي وجهك؟؟
,,سكتت رهف وكشرت وهي تناظر تحت..
أسيل بعصبية:مرة ثانية... مرة ثانية يارهف يمد إيده عليك..
رهف: أول شي إنتي دام ماعندك هالأيام محاضرات وقاعدة بالبيت شمصحيك هالحزة.. ثانيآ ممكن تهدين وتدخلين غرفتك.. جبت معاي سينبون تعالي ناكله سوا..
,,وتروح رهف وتمسك أسيل اللي كانت واقفة بآخر الصالة مع يدها وتدخل وياها غرفة أسيل..
أسيل: رهف تكفين والله مالي نفس لشي أبدآ ونفسيتي تعبانة وشصارلك ليه وجهك كذا؟؟
,,تنهدت رهف وحكت لأسيل كل شي مع إنها ماتحب أبدآ تقول لأحد من عايلة مشاري شي على مشاكلها وظروفها..
بس هالمرة ماقدرت تسكت لأنها ماترضى مشاري ينظلم ويظنون إنه إهو اللي ضربها بعينها..
أسيل بذهول : رهف الله يعينك والله مادري شقول..
رهف وهي تمسح دموعها: أسيل بذمتك أمانة لاحد يدري..
أسيل وهي تمسك يد رهف: تطمني يارهف مارح أقول لأحد... بس تصدقين على كثر ماني زعلانة من اللي سواه أبوك.. على كثر ماني مبسوطة إن عمي مشاري مهتم فيك هالإهتمام..
رهف وهي سرحانة: الله يستر..
المهم ماعليك مني إنتي اشفيك قلقانة ومالك نفس لشي ونفسيتك تعبانة..
أسيل وهي تتهرب من الإجابة: لارهف ما فيني شي..
,,شدت رهف على يد أسيل وقالت:
ولو أسيل تخبين عني..
أسيل: خلاص بقولك لأني محتاجة أفضفض.. واستشير أحد..
,,قالت أسيل لرهف موضوع خطبتها وانها محتارة وتفكر ترفض..
رهف: أسيل دامه كويس وابن ناس.. شالمانع..
أسيل:شالمانع.. رهف بيوديني أسبانيا.. تعرفين يعني ايش أسبانيا.. يعني خلاص مابشوفكم إلا في الإجازت بس..
رهف:أسيل.. إذا يحبك وترتاحين معاه حتى لوكنتي معه عايشه على هضبة التبت بتسيرين سعيدة.. ولو إنه سيئ وخبيث وعشتي معه بغرفة من غرف هالبيت.. بتسيرين تعيسه.. المكان ماله دخل أبد بسعادة الوحدة..
أسيل: يعني هذا رايك..
رهف: والله انتي طلبتي مني رايي وقلته لك بصراحة..
أسيل وهي تضحك: بس حلوة هضبة التبت...من وين جبتيها؟؟
رهف وهي تضحك:هههههه عاد قلت أقولك شي غير أسبانيا..
أسيل: هههههههههه..
رهف بعد ماسكتوا مسكت إيد أسيل وقالت:حبيبتي إستخيري..
أسيل:رهف انتي استخرتي لما تزوجتي عمي مشاري..
,,تذكرت رهف ظروف زواجها من مشاري وإنها تزوجت من غير حولن لها ولاقوة... ونزلت راسها وهي تبتسم ابتسامة ألم..
أسيل:رهف جاوبي اشفيك ساكته استخرتي؟؟
رهف: والله لو أقولك يا أسيل اشلون تزوجت مشاري ماتصدقين..
أسيل وهي متحمسه: رهف تكفين قوليلي تكفين..
,, تنهدت رهف وقالت لأسيل اشلون انخطبت من خالدالله يرحمه ومنيرة رفضته... واشلون صالح سوى ثوره بالبيت وقوم الدنيا ولاقعدها... وكمان يوم سلطان ضربه ويوم طلع من البيت ومارجع إلا يوم شهد على زواجها من مشاري..
أسيل: لا لامومعقول.. لحظه .. الحين منيرة مو أمك؟؟
رهف:لا يا أسيل مو أمي..مرة أبوي.. وامي توفت بعد ماجابتني..
أسيل:وصالح أخوك من أمك وأبوك ولا بس من أبوك..
رهف:صالح يسير أخوي من أبوي بس..
أسيل:تصدقين رهف توني أدري.. بس ماشالله موقف صالح معاك.. مايسويه إلا رجال.. صراحة صالح رجل وأخ بمعنى الكلمة..
بس من كلامك إنك تزوجتي عمي وإنتي مو راضية...
رهف:من قال إني موراضية بالعكس...
أسيل:صراحة يارهف مادري اشلون كنتي مع أب وزوجة أب زي كذا بس انشالله عمي مشاري يعوضك عن كل شي..
رهف وهي مدنقه راسها: انشالله..
,, سكتت أسيل وسرحت وراحت بعالم ثاني وقالت..
"ياربي مومعقول ... معقول أم مثل منيرة وأب مثل سلطان يكون عندهم ولد مثل صالح..
ماشالله أخلاقه ورجولته تجنن مثل ملامحه... ياليته هواللي خطبني..
وشـــــو... خير يا أسيل وشقلة الأدب هذي.. انتي تقولين هالحكي... انتي..
بس يا الله اشلون آخذ صالح وعنده أم مثل منيرة.... أعوذبالله...
,,ويقطع تفكيرها صوت رهف..
رهف: أسيل وين سرحتي..
أسيل:هااه.. لا ولاشي.. بتكملين نومك ولاننزل تحت عن جدتي..
رهف:بروح افصخ عباتي وأغير ثيابي واحطلي فاونديشن على هالضربة اللي بخدي وأنزل لأني ماشفت عمتي من لما جيت من البنك أمس..
***
****
*****
(في معرض للأثاث...)
,,الساعة 9 الليل..
طارق: حشى منت بصاحي.. بتشتريها بثلاثين ألف... انجنيت..
عزام: إي أشتريها واشتري المعرض كله..
طارق:يابن الناس تعوذ من ابليس أمك ميب جاية إلا يومين وترجع تسافر ليه هالإسراف.. غرفة نوم لها بثلاثين ألف وهي ميب قاعدة فيها... وبعدين تعال باقي على قولتك تشتري غرف نوم لبزارينها... يعني كم بيكلفك هذا كله.. أكيد فوق المية ألف..
عزام:تفداهم فلوس الدنيا كلها.. أهم شي يجون عندي مرتاحين..
طارق:ياخي أتذكر قبل ثلاث سنين يوم جت أمك الرياض سكنت بفندق يومين ورجعت سافرت..
عزام:لا هالمرة بتقعد معي هي وأخواني ببيتي..
طارق: وزوجها؟؟
عزام:لا يخسى موبجاي بتجي لحالها عندي... أكيد ماجت إلا هي مشتاقتلي..
,,طارق بنفسه:
الله يستر... ماقد جت أمك وراحت إلا وانت نفسيتك زي الزفت لو ماتجي أصرف..
***
****
*****
(في بيت أم عبدالرحمن...)
,,تحديدآ بغرفة أسيل..
,,الساعة 12 الليل..
كانت أسيل فاتحة نور خافت... ومتمدده على سريرها وسرحانة..
ياربي.. شهالغباء اللي أنا فيه..
معقولة أرفض إنسان اختاروه أهلي لي من بين كل الناس ...
عشان سراب...
بس صالح مو سراب.. صالح حقيقة..
مستحيل أنساه مستحيل.. [ابتسمت أسيل وحطت يدها بشعرها وقعدت تلعب فيه]
ومستحيل أنسى لمادخلت عليه المجلس اشلون استحى ونزل راسه...
ومستحيل أنسى نظرات القسوة بعيونه لما حاولت ارفع وجهه بيدي..
ياليتني ما انتبهت ومسكت وجهه.. ياليتني..
هذا مو إنسان هذا ملاك... ماحد سوى اللي سواه صالح...
كلمة رجل قليله عليه...
دافع عن اخته ووقف معها ضد أبوه وأمه..
أبوه .. وأمه.... آآآآه يا أبوه وأمه...
لا...لالالا
لا لامستحيل... مستحيل أنا آخذ واحد أمه زي منيرة مستحيل..
يعني وشو يا أسيل ....بتوافقين على معاذ؟؟
وليش ما أوافق على معاذ.. واحد زي معاذ ماينرفض..
طب وصالح؟؟
أي صالح .. صالح ماجاب خبري ولادرى عن اللي بقلبي له..
لويحبني أوحتى يبادلني المحبة كان عالأقل وصلي لو كلمة بسيطة مع إخته رهف..
لكن الظاهر إني أنا اللي فكرت بتفاهه.. وقلت يمكن في شي اسمه حب..
,,قامت أسيل بكل ملل وسكرت الأنوار ونامت..
***
رونق الاحساس
02-04-2011, 03:18 AM
"بعد مرور أسبوع كامل....
"""""""""""""""""""""""
,,بغرفة عبدالرحمن..
عبدالرحمن:على خيرة الله أبكلم أبو متعب واقوله إن البنية وافقت.. ومتى مازارونا حياهم الله..
منى:يابوفيصل استنى شوي... أسأل عن الولد..
عبدالرحمن:يامنى من قبل ما أفاتحك إنتي وأسيل بالموضوع.. وانا لي فترة أسأل عن الولد.. ومن بعد ماعلمتكم كملت أنا وعمها تركي سؤال عنه.. ويعلم الله إن الولد كامل ومو ناقصه شي ..
منى:يعني لاتم الزواج بتسافرأسيل أسبانيا..
عبدالرحمن: واذا سافرت هذا نصيبها..أهم شي انها تسير سعيدة معاه..
منى:الله يقدم اللي فيه الخير..
عبدالرحمن:اللهم آمين... لاتخافين يامنى ياكثر اللي خطبوا أسيل ورفضتهم من غير ما أقولكم حتى .. لكن هالولد عشانه داخل مزاجي وواثق فيه وافقت عليه وشاورتكم..
:::
::::
,,الساعة 5,30 العصر,,
كان مشاري في سريره نايم لأنه يوم رجع من الجامعة تغدى وقعد مع أخوانه شوي وطلع فوق يرتاح...
,,
رهف وهي ماسكة كتف مشاري: مشـــــاري .... مشــــاري قووم..
,,فتح عيونه مشاري وهومفزوع والتفت لرهف:
وشفيــــــك..
رهف والخوف مالي قلبها: مشاري.. أبوي تحت بالشارع جالس بسيارته.. ودق علي الجوال فوق الست مرات مارديت آخر شي دق الباب وقال للشغالات يقولونلي أطلعله..
مشاري وهويحاول يصحصح:تطلعينله وين تطلعينله..
رهف:مادري.. بس الظاهر أنه معصب..
,,مشاري وهو يشيل اللحاف من عليه ويقوم من عالسرير:
أبغسل وجهي وأنزله تحت وأدخله المجلس..
رهف بخوف: لامشاري لاتدخله لا..
مشاري: أجل أخليه واقف برا في الشارع.. ماعليك أنتي اهدي..
أنابدخله وانتي بعدين ادخلي شوفي شيبي..
,,غسل مشاري ولبس ثوبه وطلع للشارع برا..
سلطان وهو يطلع من سيارته وهو معصب وماله خلق:
هلا هلا.. وين رهف..
مشاري وهو يسلم على عمه:
داخل .. بس ياعمي بوصالح مايسير تقعد كذا برا تعال إدخل داخل..
سلطان:لا لامايحتاج بس بغيت رهف كلمة وراجع من طريقي عندي مشوار...
مشاري:لا والله ماتجي عند الباب وماتدخل تشربلك فنجال قهوة .. حياك داخل حياك..
,,دخل سلطان وجلس بالمجلس وهو يحس نفسه على جمر..
سلطان:بالله يامشاري نادي رهف .. أنا مستعجل..
مشاري: ابشر..
,,راح مشاري لرهف اللي كانت جالسه بالمقلط ويدها على فمها وسرحانة بالأرض..
مشاري:رهف أبوك يبيك أدخلي المجلس عنده وقوي قلبك.. وزي ماقلتلك سلطان الحين مو ولي أمرك أنا ولي امرك وما أرضى بطاقتك تسير معاه..
رهف وعيونها مليانة دموع:مشاري.. خلاص تعوذ من ابليس خلني أطلع أجيب البطاقة واعطيهياه خلاص ماله داعي المشاكل..
مشاري:رهف ابوك على عيني وراسي وأنا موناوي عالمشاكل أبدآ... لكن طول الأيام اللي فاتت أبوك كان ظالمك وناوي يستمر بظلمه لك.. واذا سكت على الشي اللي يسويه فيك بكون شريك معه وأظلمك أنا بعد..
,,دنقت رهف وهي تتنفس بسرعة وبصعوبة.. وتوكلت على الله ودخلت عند أبوها..
,,,في المجلس...
,,يعد دقايق بسيطة من دخول رهف...
سلطان وعيونه حمر: اشلون يعني كنسلتيها وطلعتي وحدة ثانية مافهمت؟؟
رهف وهي ميته خوف:يعني هالبطاقة اللي معك ألغتيها.. وطلعت وحدة جديدة لي..
سلطان بكل عصبية:طب روحي جيبيها الحين... بسرعة..
رهف وهي تبلع ريقها:..لأ .. هالفلوس راتبي وحلالي وتعبي.. خلاص يبه أخذت بمافيه الكفاية...
سلطان وهويفز من عالكنبة ويقوم تجاه رهف: وشقلتي ماسمعت..
,,رهف خافت ورجعت على ورى وعيونها مليانة دموع..
سلطان:وشفيك ساكته تكلمي.. ماسمعتك زين..
أنا... أنا يارهف تقولينلي هالكلام.. لكن الظاهر إن الكف اللي في السيارة ماأدبك..
,,رفع إيده سلطان وكفخ رهف على وجهها... من قوة الكف طاحت رهف عالكنب
ورجع رفع إيده للكف الثاني..
ومادرى إلا ومشاري ماسك يده وواقف بينه وبين رهف...
وواقف مشاري بكل قوة وعيونه ينط منها الشرار ويطالع بعيون سلطان بكل استحقار ووده إنه يرجع الكف كفين لسلطان...
نفض سلطان يده من قبضة مشاري.. ورجع على ورى...وقال:
قومي انقلعي جيبي اللي قلتلك عليه..
,,ماتت رهف خوف وماحبت المشاكل تكبر بين أبوها ومشاري وفزت عشان تروح تجيب البطاقة...
,,مد مشاري يده ومسك يد رهف ووقفها جنبه وقال:
شوف ياعم ياسلطان أنا لاني بمجنون ولاديوث تدخل بيتي وتمد إيدك على زوجتي وتاخذ فلوسها وأنا قاعد ساكت... مرة ثانية قسمآ بالله إيدك تمدها داخل بيتي على كائنن من كان... قسمآ بالله لأكسرها لك...
سلطان :هين يابنت ××××× .. أنا.. أنا أبوك توقفين ضدي وتجحديني ياناكرة الجميل..
مشاري:أنت أب أنت.. إنت مجرم.. تاخذ فلوس بنتك وتضربها وترجع تقولها أنا أبوك..
سلطان: هين يارهف هين.. مستقوية مع ذا البزر اللي معك... لكن هذا وجهي ليطلقك ويرميك وشوفي من يلمك من الشوارع..
مشاري: أعلى مافخيلك إركبه.. ولاجت رهف عند بابك ذيك الساع اطردها...
سلطان:مومشكلة بيجي هاليوم يامشاري.. واطردها... ماله داعي تعلمني شسوي..
وانتي ياجاحدة لاني أبوك ولا أعرفك... وان دخلتي بيتي كسرت رجولك.. وان دقيتي عالتليفون ماتلومين إلا نفسك... وبناتي وولدي صالح مالك علاقة فيهم..
وخلي هالبزر ينفعك.. وعيشي طول عمرك من غير أهل.. يامشردة...
,,,طلع سلطان بكل عصبية من البيت وركب سيارته وراح..
وترك رهف في حالة صدمة شديدة ورعب وخوف ... انهارت رهف وجلست عالكنب وراسها بين ايدينها وقعدت تبكي وهي ترتجف..
مشاري: رهــــف ماعليك منه أنا مادري اشلون كنتي ساكتة له طول الأيام اللي فاتت وهوينهبك وياخذ فلوسك.. أب مثل هالأب ماينبكى عليه..
رهف:مشاري.. مشاري.. ليه سويت كذا ليه... أبوي تبرا مني تبرا مني.. ومنعني من خواتي ومن صالح.. عشان فلوس ..
مشاري:هذا انتي قلتيها بنفسك تبرا منك عشان فلوس.. بالله عليك هذا أب.. رهف أنا لومالحقت عليه ومسكت يده كان ناوي يذبحك إنتي ماشفتي وجهك..لازم ينحط له حد لازم..
رهف:ولو.. ولــــــو... هذا أبوي..
,,كانت رهف تعبانة واكتفت بهالكلمتين الأخيرتين واستمرت تبكي .. وهي مو مستوعبة الوضع..
,,مشاري يوم شاف بكى وتوتر رهف زاد وبان عليها إنها تعبانة...
مشاري وهو يشد رهف من تحت ايدينها: خلاص يابنت الحلال خلاص.. تعوذي من ابليس وقومي غسلي وجهك ونامي لك ساعة وارتاحي.. من قومتنا الصبح مانمتي..
رهف: مشاري طلبتك يرحم والديك.. ودني بيت أهلي وخلني أعطيه خلاص أنامابي شي والله مابي شي.. مابي فلوس تفرق بيني وبين أهلي..
يا مشاري إذا سألوني أهلك والناس عن أهلي ليه مقاطعيني شقولهم؟؟
مشاري:أولآ إذا هذولي أهل مايحبونك إلا بالفلوس والمادة.. والله البعد عنهم أحسن..
ثانيآ وشعلينا من كلام الناس يعني تعيشين مهانة ومن غير كرامة عشان كلام الناس..
انتي الحين اهدي وهدي أعصابك.. وقومي غرفتنا فوق قبل مايحسون أهلي بشي وارتاحي.. وانشالله موبصاير إلا كل خير...
***
****
*****
(في بيت أبوصالح,,)
سلطان وهو معصب:قلتلك يامنيرة دقي عليهم واعتذري وقولي ماعندنا بنات للزواج لكنك عندتي وركبتي راسك انتي والتافه ولدك وزوجتوها وهذي النتيجة..
منيرة:وانا اشدراني ان بنتك بتجحدك وتسي هالسوايا..
سلطان:آآه.. أنابموت من القهر بمووووت..
أنا على آخر عمري يجي بزر مثل مشاري ويوقف بوجهي ويعصي بنتي علي..
منيرة:والله الشرهه مو عليه الشرهه على بنتك اللي مانفعت فيها التربية..
سلطان:آآه ياراسي.. وين أبر السكر؟؟
منيرة:بالثلاجة فوق.... روحي يا أفنان جيبي...
ويقاطعها سلطان:لالا ... أنا بطلع فوق وآخذهم وانسدح شوي.. رفعت سكري الله لايسامحها لاهي ولارجلها..
,,بعد ماطلع سلطان لغرفته فوق..
أثير:يمـــــه... الحين أبوي ليش معصب.. هذي فلوس رهف وحلالها.. هي حرة وبعدين خلاص سنين وهويشفط راتبها من حقها البنت تقول خلاص وتشوف مصلحتها..
أبرار:انتي ولاكلمة شغالة محاميه للست رهف.. أصلآ الرسول قال(أنت ومالك لأبيك)... [إخس ياللي تقول أحاديث]
يعني لو أبوي ياخذ كل فلوسها وكل ملابسها وذهبها أغراضها من حقه لأنه أبوها اللي رباها وتعب عليها.. بعدين صدق عقرب رمل.. وهي عندنا كانت ساكته ومسويه نفسها مسكينة ويوم راحت لبيت زوجها .. طلعلها لسان وخذت البطاقة بعدين هي أصلآ ماتحتاج راتبها زوجها مليونير مغرقها فلوس.. وبدل ماتعطينا حنا أهلها وتفيدنا من زوجها راحت خذت بطاقتها اللي ينزل فيها كم ريال.. صدق إنها حسودة..
أثير:اشفيك انهبلتي.. زوجها مليونير ولافقير ومنتف مايجوز أبدآ ناخذ ولاريال من غير رضاها..وبعدين أبوي أصلآ مايحتاج فلوسها..راتبه يعيشنا وزيادة..
منيرة: أقول ورى ماتقومون كل وحدة تمسك كشة الثانية وتتضاربون.. عشان خاطر رهف.. شوفوا خلاص اللي سار سار.. بس أهم شي أخوكم صالح لايدري..
لأنه لودرى.. ماندري شيسوي أخاف هم بعد مثل المرة اللي فاتت يوم انخطبت المسعده يهج ويخلي البيت.. خلاص فهمتوا لاحد يقوله..
أبرار: انشالله يمه..
,,أثير سكتت وهزت راسها وهي تقول لاحول ولاقوة إلا بالله..
***
****
*****
(في بيت أم عبدالرحمن...)
,,تحديدآ في غرفة رهف الساعة 1,30 الفجر..
كانت رهف نايمه على سريرها ومقفلة اللمبات والغرفة هادية.. ومو راضي يجيها النوم...كان كل شوي شريط الأحداث اللي سار معاها اليوم ينعاد قدام عيونها..
التفتت على مشاري لقته نايم ومعطيها ظهره...
رهف... ياربي نام وخلاني.. أحس بضياع.. معقول اللي سارلي اليوم حقيقة وواقع..
الله يصلحك يا أبوي وصل فيك الطمع إنه يعمي عيونك.. أنا بنتك تسوي فيني كذا..
يا الله فشلني ونقص من قدري قدام مشاري..
عشان فلوس يتبرى مني ويسبني.. ويحرمني من شوفة خواتي وصالح..
لا..لامستحيل أنا لو ماأشوف صالح أبنهبل.. بنجن من لي غيره..
من لي غيره؟؟ أنا أشلون أقول هالحكي.. عندي مشاري.. مشاري يسوى الدنيا ومافيها...
صحيح إني خفت وحسيت بالرعب.. بس أول مرة أحس إن لي سند من بعد ماتزوجت وأول مرة أحد يدافع عني بعد مادافع عني صالح..
والله إني ظالمة مشاري وقف وقفة رجال بوجه أبوي ومنعه إنه يظربني ويمد يده علي.. ورجعلي حلالي.. الله لايحرمني منك يامشاري..
,,,من جهة ثانية كان مشاري متمدد عالسرير... ويحاول ينام لكنه نفس حالة رهف مو راضي يجيه النوم ... واللي حصل اليوم مع سلطان قاعد يمر عليه ببطئ..
مشاري... ياربي أنا اشلون سويت كذا ياليتني بعدت وخليتها هي وأبوها بكيفهم انشالله يجلدها وشعلي منها.. شبيت النار بينها وبين أبوها عشان أدافع عن كرامتي ورجولتي.. على حسابها..
الحين إذا سافرت وطلقتها وين بتروح؟؟
وشبيصيرفيها مسكينية؟؟ [تنهد مشاري بقوة]
ياالله أنا شفيني كذا ساير مطيور وكل قرار آخذه أسوء من الثاني.. الحين أنا جنيت على هالضعيفة ودبست نفسي..
,,
,,,
,,,,
""يوم الخميس....
الساعة 9الليل..
,,باب غرفة أسيل يدق..
أسيل: مين؟؟
رهف: أنا رهف..
أسيل: ادخلي رهف..
رهف بعد مادخلت وسكرت الباب: اووه ماشالله وشهالزين وشهالحلا كله؟؟
أسيل: من جد رهف شكلي حلو؟؟
رهف: موحلو وبس إلا تاخذين العقل..
أسيل:تتوقعين أعجبه؟؟
رهف: موبس تعجبينه إلا يسجد سجود الشكرلاشافك..
أسيل وهي تضحك: ماكنك تبالغين...
رهف وهي تغمز: يعني نص ونص.. هههههه,,, وتحضن أسيل,,,, الله يوفقك حبيبتي..
أسيل وهي منزلة راسها: اللهم آمين..
,,سكتت أسيل وسرحت .. ياترى صالح يهمه موضوع زواجي.. وهل بيزعل لادرى إني تزوجت ولامارح يهمه الموضوع ومابيجيب خبري..
,,منى بعد مافتحت الباب...
أسيل يللاه يابنيتي أبوك وأخوك فيصل ومعاذ يستنونك بالمجلس الداخلي..
,,كانت أسيل تقوم وتمشي وتتوجه للمجلس بكل برود وكأنها منومة مغناطيسيآ..
ولافيها خوف ولا ارتباك وكأنها رايحة تدخل على واحد من أعمامها ولاهي شايلة هم أبدآ..
أسماء وهي تمسك رهف وتشاورها: رهف وشفي أسيل ؟؟
رهف: وشفيها مافيها شي..
أسماء: اشلون مافيها شي.. شايفة اشلون تمشي وداخلة المجلس ولاهو هامها الموضوع..
رهف:طب كويس الحمدالله.. أحسن شي الهدوء والنفسية المرتاحة أحسن من إنها تصيح أو تخاف أو ترتبك..
أسماء:بصراحة ماتوقعت إنه لما تسير شوفة أسيل بتسير بهالهدوء وهالثقل توقعتها تتدلع وتقلبها مناحة...
:::::
,,في المجلس..
أسيل: السلام عليكم..
معاذ: وعليكم السلام..
عبدالرحمن وهو يأشر للكنبة اللي قدام معاذ: أسيل تعالي اجلسي هنا..
,,مشت أسيل بكل ثقة وهدوء الين وصلت للكنبة وجلست وحطت رجل على رجل..
ورفعت نظرها ببرود وناظرت لمعاذ بجرأة .. كان معاذ وسيم جدآ حنطي اللون.. يغطي وجهه عارض خفيف.. وباين انه طويل..
,,نفس الشي كان معاذ يبادل أسيل النظرات وقزها من فوق لتحت.. وآخر شي ابتسملها..
لما ابتسم معاذ استحت أسيل وانتبهت لنفسها إنها زودتها ونزلت عيونها بالأرض..
,,,
,,,
بعد مرور ربع ساعة طلعت أسيل من المجلس وتوجهت على طول لغرفتها...
أسماء بعد مادخلت وصكت الباب: أسيلوه دريتي ملكتك حددوها..
أسيل وهي تفصخ حلقانها ببرود: لاااا.. بشرك الله بالخير
أسماء:أسيل وشفيك مسخنة..عادي عندك بعدين ماتلاحظين أهلك مستعجلين..
أسيل:هو اللي مستعجل..
أسماء:حتى ولوكان هو اللي مستعجل المفروض نتغلى شوي... بعدين تعالي هنا... إلا وشصار معك لما دخلتي..
أسيل: شالني وقعد يدور فيني وجلسني على حضنه..
أسماء: ههههههههه حلوة هذي.. أسيل وشصار معك.. تكلمي..
,,, جلست أسيل بكل ملل وبرود عالسرير وقابلتها أسماء ..
أسيل: ماصار شي هو ساكت وانا ساكته ومتنح فيني طول الوقت..
أسماء:يعني ماقالك شي؟؟
أسيل:بس قالي شخبارك وبعدين رجع سكت..
أسماء باستغراب:ماسولف معاك ولاسألك عن دراستك؟؟
أسيل: ولاشي.. بس مبتسم.. وقال على خيرة الله ... الله يجمع بينا بخير..
أسماء:ترى ملكتك بعد شهر يا أسيل..
أسيل: نعم... بعد شهر..
,,وتنط أسيل وتطلع برا الغرفة تقعد تنادي بصوت عالي..
يمــــــــــه... يمـــــه..
منى وهي في الصالة اللي تحت ترفع راسها للصالة اللي فوق: أسيــــــل.. وشفيك؟؟
أسيل وهي شوي وتبكي:يمه تعالي أبيك؟؟
,,وتطلع منى بسرعه عند أسيل وتدخل عندها غرفتها..
منى:أسيل وشفيك يابنيتي بسم الله عليك؟؟
أسيل:يمه صدق حددتوا ملكتي بعد شهر..
منى:يا أسيل يابنيتي بعد ما اتفقوا أبوك وأبو الولد على كل شي الولد قال إنه يبي الملكة تتم بسرعه عشان بعد عيد الأضحى يتم الزواج..
أسيل: نعـــم وتبون تزوجوني بعيد الأضحى بعد..
,,شوي ولا الجدة لطيفة داخلة الغرفة..
لطيفة: مبروك ياعروس مبروك..
أسيل:لا ياجدة لامبروك ولا شي خلاص قولولهم لافي زواج ولا ملكة خير انشالله والله السيارة وهي سيارة ماتنباع بهالسرعة..
,,مشت لطيفة بهدوء وجلست جنب أسيل وحطت يد أسيل بين إيدينها.. وهدتها واقنعتها إن الولد يبي يستعجل بالملكة والزواج لأنه مايبي يباشر عمله بأسبانيا ويسافر إلا وهي معه وماوده يسافر على بداية دوامه.. وده يسافر قبل عشان شهر العسل..
لكن أسيل اقتنعت بصعوبة وقالتلها إنها ماتبي تسوي ملكة كبيرة لا تبيها مختصرة ... الين يجي وقت الزواج ويحلها ألف حلال..
***
,,بعد مرور أسبوعين..
(في مدرسة رهف..)
كانت رهف جالسه على مكتبها بغرفة المدرسات ومهمومة وسرحانة..
خلود بعد ماجلست عالكرسي:آآآه ياربي انهد حيلي من هالحصص.. رهف ليه قاعدة لحالك ليه ماتروحين تتقهوين مع المدرسات..
رهف:عندي شغل بخلصه بالأول..
خلود:لا والله يارهف علي هالحكي... رهف انتي من يوم مابدى هالترم وانتي متغيره ماكنتي كذا أبدآ يوم تداومين وعشرة لا... ودايمآ مهمومة وسرحانة.. وشفيك..
رهف:ياقلبي ياخلود مافيني إلا كل خير.. بس يمكن أرق..
خلود:حللتي.. ترى يمكنك حامل ولا تدرين..
رهف وهي تضحك ضحكة ألم: لا لا ماظنيت..
,,,ويقطع حكيهم صوت مسج وصل لرهف..
فتحت رهف المسج ولا لقته من أخوها صالح كاتب فيه..
رهف أنا في المحاضرة الحين ولاني قادر أركز لأن بالي مشغول فيك..
بس أقدر أجيك اليوم أزورك ببيتك بعد المغرب؟؟
,, ابتسمت رهف وارتاحت إن أخوها صالح ماعاداها زي باقي أهلها وعلى طول أرسلتله..
حبيبي صالح غيابك طول هالأيام خوفني..
حياك الله بأي وقت..
رونق الاحساس
02-04-2011, 03:18 AM
(في جامعة الملك سعود..)
طارق:إلا صح عزام للحين أمك ماجت؟؟
عزام بألم:لا والله ياطارق كل ماكلمتها تقول لسه مارح تجي هالأيام..
مشاري:الظاهر إنها ميبجاية...
عزام وهو مفزوع: لا يامشاري لاتفاول.. انشالله إنها هالشهر بتجي...
مشاري:لا يابن الحلال ما فاول انشالله إنها تجي وتقرعينك ..
عزام وهو يقوم: خلاص أجل بخليكم لأن محاضرتي بدت.. وبطلع منها وبرجع البيت على طول يمكن ما أشوفكم...
مشاري وطارق: يللاه مع السلامة...
طارق بعد ماراح عزام: ياخي ياليتها ماتجي..
مشاري: منهي؟؟
طارق: أم عزام... كل ماجت تسوي مشاكل وتقلب حياة عزام فوق تحت وتحوس الولد وترجع تسافر وماتسافر إلا وعزام نفسيته تعبانة وواصل حده..
مشاري:مسكين.. أنا مادري اشلون هالأباء يجيبون عيال ويتطلقون ويرمون عيالهم وينسونهم.. صراحة حتى كلمة أب وأم مايستاهلونها..
طارق:قل الله لايبلينا يابن الحلال.. خلاص ترى محاضرتنا بدت يللاه نروح نحضر..
***
****
*****
(في بيت أم عبدالرحمن..)
,,بالمجلس..
رهف ودموعها على خدها: إنت من اللي قالك؟؟
صالح:مسكتني أثير وقالتلي وحلفتني اني ما اقول لأحد إنها هي اللي علمتني..
رهف:صالح خلاص لاتتضايق اللي صارصار..
صالح:اشلون اللي صار صار.. رهف ليه يوم ابوي سوى هذا كله مادقيتي علي..
رهف:ليه أكبر السالفة خلاص..
صالح:اشلون خلاص كان عالأقل وقفت معاك ومع مشاري... كان عالأقل ماقدر يمد يده عليك يارهف..
هذا اشفيه انجن انهبل؟؟ وصلت فيه انه يضربك ببيت زوجك...
رهف :خلاص يا صالح مهما صارهذا أبونا..
صالح:لاتقولين أبونا هذا مو أب هذا هم وعذاب لنا في حياتنا... رهف منتي شايفة اشلون مفشلنا وفاظحنا وموطي راسنا بين الناس... بمشاكله وهواشاته وطقاقه مع خلق الله وفتنته بين الناس وتشويهه لسمعة بنات العوايل.. رهف أبوي ماحد سلم من شره.. حتى إحنا عياله ماسلمنا من شره.. شوفي اشسوى فيك؟؟
,, وبعد هالكلام ماقدر يمسك نفسه صالح وجلس يبكي وينزل دموعه على خده بصمت وبحرقه..
رهف وهي تمسح دموعه:خلاص ياصالح خلاص تعوذ من ابليس..
انا ما أبيك تعانده بسببي لأني مابي الكره اللي بقلبه لي يكبر...لأني أعرفه قاسي وبعدين ياصالح بعد كذا شهر في مناسبة عند أهل زوجي وأكيد بيعزمونه أخاف يتلفظ عليهم ويفشلهم بسبب زعله مني..
صالح:مناسبة... لمين؟؟
رهف:بنت عبدالرحمن الكبيرة بتتزوج..
صالح لا إراديآ: أسيـــــل؟؟
رهف: إيه..أسيل..
,,انصدم صالح وحس الدنيا سودا بعينه... وماقدر يمسك دموعه ورجع يبكي..ويقول بنفسه:
صدق إني غبي يوم فكرت إنه وحدة مثل أسيل تفكر فيني...
,, شوي ولا مشاري يدخل المجلس..
مشاري: السلام عليكم..
صالح يدنق راسه ويمسح دموعه بهدوء ويقوم يسلم: وعليكم السلام هلا والله..
,,لاحظ مشاري ملامح الألم والدموع اللي بعيون صالح ورهف..
وقعد يسولف مع صالح ويلطف الجو ويمزح معاه..
وطول الوقت كانت رهف تنظر لمشاري بكل حب وشافت بعينها اشلون معاملة مشاري تغيرت مع صالح واشلون هوقاعد يبذل جهد مع صالح عشان يحسن نفسيته شوي..
وحاول فيه إنه يتعشى معهم لكن صالح رفض بشده...
ورجع بيته ودخل غرفته وسكر الباب على نفسه.. ورمى نفسه على سريره وهو يحس نفسه مهزوم وعاجز وفاقد الأمل انه اسيل تسير من نصيبه ويلوم نفسه إنه في يوم من الأيام فكر إن أسيل تحبه وتسير زوجته..
***
***
,,,في غرفة رهف الساعة 12 الليل..
كانت رهف واقفة عند الدولاب تطلع لمشاري ثوب جديد وشماغ وتعطرهم له عشان أول مايقوم بكرة الصبح يلبسهم ويروح لجامعته..
دخل مشاري الغرفة وأول ماحست رهف فيه التفتت له وابتسمت له..
ابتسم مشاري لرهف وغير ثيابه استعدادآ للنوم.. ولما خلص جلس عالسرير..
جت رهف وجلست جنبه وقالت:
متى محاضرتك بكرة؟؟
مشاري:أول محاضرة تبدا عشر..
رهف:خلاص إفتح جوالك عشان وأنا في المدرسة أدق عليك وأصحيك..
مشاري:رهف ارتاحي أبوقت الجوال وأصحى..
رهف:حتى ولو لازم اتطمن انك قمت لمحاضرتك أخاف تغيب زي الأسبوع اللي فات لما كانت محاضرتك عشر وقلتلي إنك بتوقت جوالك لكنه لما رن المنبه سكرته ورجعت نمت..
مشاري:كله منك انتي دلعتيني.. أول إذا دق الجوال كنت أقوم على طول الحين ما أقوم إلا إذا انتي قومتيني..
رهف:وانا من لي غيرك .. إذا أنت مادلعته من أدلع..[وتمسك رهف يد مشاري وترفعها وتحطها على خدها وتغمض عيونها..]
,,مشاري حس بشعور غريب بقلبه مو عارف له تفسير ولا إراديآ قرب منها بهدوء وباسها..
رهف:مشاري ماتتخيل قد ايش انا أحبك وارتاح معك واحس بالأمان وإذا قعدت معاك أحس اني ملكت الدنيا ومافيها الله لايحرمني منك..
,,ويدنق مشاري راسه وهو حاس قلبه يعوره بشكل فظيع ويرجع يطالع برهف ويبتسم ويقول:
وانتي بعد الله لايحرمني منك..
***
****
*****
(في بيت أبوصالح...)
..بغرفة أبرار...الساعة 2 الفجر..
ناصر:تكفين يا أبرار والله موقادر أصبر زيادة.. مشتاقلك موت..
أبرار:حتى أنا مشتاقتلك موت..بس خلها بعدين..
ناصر:بعدين متى؟؟
أبرار:ناصر خلها إلين أروح الكلية عشان آخذ ملازم واسامي كتب وأقابلك..
ناصر:يعني بتطلعينلي بعد مايخلص الدوام..؟؟
أبرار:شسوي مافي إلا كذا لأني لو أدخل الكليه مارح أقدر أطلع مرة ثانية إلا لما يفتح باب الخروج مرة وحدة..
ناصر:أبرار وبعدين أنا بس بشوفك كل مرة خمس دقايق بس..
طب شوفي أنا عندي حل.. أول ماتوصلين الكلية لاتوقفين عند الباب الرئيسي اوقفي عند أي بوابة ثانية وأنا بكون واقف استناك اركبي معي بسرعة وآخذك نص ساعة نسولف فيها واشوفك وارجعك كليتك..
أبرار بخوف: خلاص أشوف..
,,سكرت أبرار السماعة وهي سرحانة وتقطع هالسرحان أثير..
أثير:أبرار وشيبي منك يوم قلتي له خلاص أشوف..
أبرار:هااه... لا ولا شي...
أثير بعصبية:لا يكون يبي يقابلك مرة ثانية يا أبرار؟؟
أبرار:هااه.. لا لا من قاله..
أثير: أجل وشيبي منك؟؟
أبرار: بس يسأل عن دراستي..
أثير: لا يا شيخة... بس عالعموم انتبهي يا أبرار المرة اللي فاتت الله ستر عليك المرة هذي ماتدرين شيصير انتبهي....
,,ابرار سكتت وقالت بنفسها..
مستحيل ناصر يأذيني ناصر يأذي نفسه ولا يمس شعره مني..
***
****
*****
,,
,,
بعد مرور قرابة الشهرين...
"""""""""""""""""""""""
(في المقهــــى...)
مشاري: خلاص عاد استح على وجهك خلق الله كلهم قاموا يطالعونك..
طارق: عزااام.. امسح دموعك كنك بزر فشلتنا..
عزام بقهر: أبعرف شي واحد ليه تسوي فيني كذا ليه؟؟
مشاري:خلاص يابن الحلال هذي ظروفها والغايب عذره معه..
عزام ودموعه تطيح من عيونه غصبن عنه:
ظروفها.. ظروفها..فوق الشهرين وانا متحمس ارتب هالبيت واشتري بهالأثاث وغرف النوم.. ومستنيها على جمر وآخر شي تسافر لجدة عشان تسلم على إختها وتخليني..
طارق:عزام يمكن أمك بعد ماتقعد بجدة يومين بترجع عندك هنا الرياض..
عزام: أنا قلت زيك بالأول... بس بعدين هي قالت ماعندها وقت لأنها تبي تقعد مع إختها بجدة وفي مؤتمر هناك تبي تحضره وبعدها تسافرلأمريكا على طول..
طارق: وانت ماتبي تشوفك؟؟
عزام:قالتلي تعال جدة..
مشاري باستغراب:وبتروحلها؟؟
عزام وهويمسح دموعه:أكيد بروحلها... بكرة رحلتي الساعة 12 الليل..
مشاري:خلاص ياعزام أنا بوديك
عزام:لاوالله ماحد يوديني.. مابي أتعب أحد.. سليم بيوديني..
[ويتنهد عزام بقوة] يللاه الحين أخليكم برجع بيتي أحس نفسي دايخ تصبحون على خير..
الكل: وانت من اهله..
طارق بعد ماطلع عزام من المقهى:آآآه.. آآه لو انها أمي مسكتها ودبجتها لين قالت آمين..
مشاري:الله يعينه مسكين شهور وهو يشيل ويحط عشانها هي وبزارينها وآخر شي تكسر بخاطره بهالطريقة..
طارق:لا وشوف اللعينه.. توعده وتعشمه وأخر شي تروح جدة وتخليه.. ياليته مايروحلها بكرة.. وهذا وجهي يامشاري إذا مارجع من عندها وهو كاره نفسه ماكون أنا طارق..
مشاري:الله يستر... ماتوقعت إنه ضعيف لهالدرجة.. عمري ماشفته مكسور زي هالمرة.. يبكي مثل الأطفال..
طارق:عشان إذا قلتلك يا مشاري إن عزام ضعيف ويبيله معاملة خاصة ماتقولي لا..
***
****
*****
(في الإستراحة...)
,,كان جالس لحاله على آخر الثيـل ولام رجوله على صدره بيدينه ومنزل راسه ويناظر بكل كآبة ويأس ...
سعد:صالح وشفيك؟؟
صالح وهو يفز من سرحانه: هااه لا مافيني شي..
سعد: مافيك شي ياخي لك فترة تجي الإستراحة وتقعد نفس قعدتك هذي لآخر الليل وتطلع؟؟
صالح:سعد خلاص قلتلك مافيني شي..
سعد:صالح انت متهاوش مع أبوك؟؟
صالح: لأ..
سعد:شوف ياصالح أنا مارح أضايقك وأضغط عليك أكثر من كذا بس صدقني مهما سار لك ومهما طحت بمشاكل وتأزمت نفسيتك.. هالشي اللي انت قاعد تسويه مايفيدك أبدآ.. تعوذ من ابليس وارجع بيتكم وروح تروش وصلي لك كم ركعة وحط حملك على الله وصدقني بترتاح..ولايضيق صدرك لأن الله ماكتبلك بشي سواء عجبك ولاماعجبك إلا خيرة..
,,دنق صالح راسه وهو خانقته العبرة..
سعد:خلاص ياصالح قوم يللاه..
,,حس صالح إن كلام سعد صح وقام من جلسته بصعوبة ونفض ثوبه ومشى خطوتين لكنه رجع التفت وقال:
سعد سامحني إذا على صوتي عليك..
سعد: ولايهمك.. أجل وشفايدة الصداقة؟؟
***
****
*****
(في مدرسة رهف...)
خلود: الله الله ياست رهف وشهالنفسية الحلوة وشهالحركات؟؟
رهف: أي حركات؟؟
خلود:أي حركات.. يعنني ماتدرين.. حسبي الله على عدوك ..كرمتي بناتك في الطابور الصبح وخيستي نفسية بناتي علي.. حتى هم يبون يتكرمون..
رهف: هههههههه كل هالهواش عشاني كرمت بناتي ؟؟
خلود:ماشالله عليك يارهف بظرف شهر تغيرتي وسرتي مثل القمر..
رهف:تكفين خلود قولي ماشالله..
خلود:ماشالله... ماشالله لاتخافين عيني باردة ما أحسد أحد..
بس أول الترم كنتي دايمآ تعبانة ومهدود حيلك بس الحين ماشالله خدودك موردة ونفسيتك مرة حلوة... الله يجعله دوم يارهف..
,, سكتت رهف وناظرت من شباك غرفة المعلمات وجلست تفكر وتقول بنفسها:
أكيد بتسير نفسيتي حلوة من يصدق إن مشاري تغيرت معاملته معي وسار يحبني ويعاملني بكل احترام..
من يصدق بعد الخوف والحرمان من الشعور بالإستقرار سرت أحس نفسي مالكة الدنيا ومافيها..
من يصدق بعد ماكان دايمآ يهاوشني أربعة وعشرين ساعة ويهزئني سار يقولي الله لايحرمني منك يارهف..
[وتتنهد رهف وتبتسم وهي مبسوطة] حتى هو الله لايحرمني منه..
,, وفجأه..
خلود: رهـــــــــــــف.. اشفيك انجنيتي لمين قاعدة تتبسمين؟؟
رهف:بسم الله.. خلود خوفتيني..
خلود: خوفتك أنا من رايي تقومين لحصتك والله أزين..
رهف: ليه أذن؟؟
خلود وهي منهبلة: نعـــــــــــــم؟؟
رهف وهي تضحك: حسبي الله عليك ياخلود خرعتيني سرت مادري شقول..
أقصد صفرت؟؟
خلود:الله يرحم حالك لها خمس دقايق مصفرة قومي يللاه..
***
****
*****
(في بيت أم عبدالرحمن...)
,,تحديدآ بغرفة رهف..
,,,الساعة 8 الليل..
أسيل:ياربي ياربي ماعمري طلبت منك تروحين معي مكان إلا وتنشفين ريقي..
رهف: تكفين أسيل قسم بالله أحس بصداع ومغص فظيع..ومالي نفس أطلع ولا مكان..
أسيل:رهف حبيبتي إحنا محنا رايحين نفرفر بسوق .. بس بنروح محلين للكوش مدحوهم صديقاتي نشوفهم.. إذا عجبنا شي اخترنا وإذا ماعجبنا شي رجعنا البيت..
بعدين لاتخافين السواق اللي بيودينا مو فيصل ولا أبوي يعني لاتقولينلي استحي..
رهف:خلاص... خلاص.. بس بستأذن من مشاري واشوف شيقول؟؟
أسيل: بسرعة.. يللاه دقي عليه..
,, دقت رهف على مشاري وبعد رنتين على طول رد..
مشاري:هلا رهف..
رهف ابتسمت لاإراديآ وقالت: أهلين مشاري وينك برا مع أصحابك؟؟
مشاري:لا والله بالمغسلة أجيب ثيابي..
رهف:طب بعدها بتروح مكان؟؟
مشاري:لا والله مابروح مكان لأني برجع البيت بذاكر عندي امتحان بكرة..
رهف:طب تسمحلي أروح مع أسيل بتروح تختارلها كوشة وتبيني معاها..
مشاري:مومشكلة روحي..
رهف:طب تبيني أجهز لك شي قبل ما أطلع؟؟
مشاري:سلامتك..
رهف وهي مبتسمة:الله يسلمك.... مع السلامة..
,,سكرت رهف الخط ونزلت راسها وتنهدت وقالت بنفسها:
الحمدالله.. بعد ماكان يرد علي بقرف ويهاوش صار إذا رديقولي هلا والله ويكلمني بلطف.. من جد الحمدالله..
,,ويقطع تفكيرها صوت أسيل:
ها وشقالك؟؟
رهف بعد ما انتبهت:هااه.. لاماقال شي وافق..
أسيل:هيـــــــه .. الحمدالله أجل قومي البسي عباتك ويللاه معاي..
رهف: طيب..
,, وجت تبي تقوم رهف من عالسرير وفجأة حست الدنيا تلف وتدور فيها ورجعت طاحت عالسرير...
أسيل بخوف: رهف بسم الله عليك... رهــــــــــف وشفيك؟؟
رهف وهي تتنفس بسرعة وتبلع ريقها بصعوبة: أسيل جيبي... جيبيلي موية..
,,وتنط أسيل للثلاجة وتجيب موية وتجلس جنب رهف وتحاول تسندها وتقومها..
أسيل وهي شوي وتصيح: رهف.. رهف..يللاه جبت الموية قومي اشربي..
,,تفتح رهف عيونها بصعوبة ويالله يالله قدرت تفتح فمها وتشرب شوي..
أسيل:رهف.. أنادي جدتي؟؟
رهف:هااه... لا لاتنادين أحد... إرهاق بسيط وانشالله بسير أحسن..
,,وترجع رهف راسها لورى وتعدل لها أسيل المخدة وهي تنظر لرهف بكل خوف..
رفعت رهف يدها ومسكت خد أسيل وابتسمت:
أسيل خلاص مافيني شي بس دوخة بسيطة..
أسيل: رهف بس لونك مخطوف وعيونك بالغصب قاعدة تفتحينها.. خلني أدق على عمي مشاري طيب..
رهف:لا يا أسيل تكفين لاتشغلينه وتشغلين نفسك هوعنده امتحان بكرة ومابي أشغله عن مذاكرته وانتي بعد روحي مشوارك أمدى منى تستناك تحت..
أسيل بعد مالاحظت تحسن رهف:أكيد انتي احسن الحين؟؟
رهف: أكيد روحي مشوارك وانتي متطمنه..
::
راحت أسيل مع أمها وتركت رهف بالغرفة متمدده عالسرير..
عدلت رهف جلستها وحطت راسها بين ايدينها وجلست تهمز براسها بيدينها الثنتين عشان شوي يخف الألم..
نزلت رجولها من عالسرير وقررت تروح الحمام وتاخذلها شور دافي يمكن تتحسن شوي..
:::
::::
بعد ثلث ساعة تقريبآ طلعت رهف من الحمام ودخلت غرفة التبديل ولبستلها بجامة سماوية وقعدت تنشف شعرها بالمنشفة..
,,بعد ثواني بسيطة...
دخل مشاري الغرفة وجلس عالسرير ورمى ثيابه اللي جابها من الغسال جنبه وهو ماسك الجوال...
مشاري: والله انه اهبل ولاهوبصاحي.. ولوأنا بداله ما أتعنى لأم زي هذي..
طارق:تصدق إنها سافهته وللحين ماشافها... وكل مادق عليها تقوله أنا الحين مشغولة أشوفك بعدين..
مشاري:والله انه مقلق عمره عالفاضي.. يحمد ربه إنه عايش لحاله حر طليق..
أجل لوكان مكاني شبيسوي بعمره..
طارق:عاد تدري إن عزام يحسدك على حياتك وانك متزوج وسعيد مستقر..
مشاري: هاهاهااا.. ضحكتني..
وشيحسدني عليه ياحسرة.. أي حياة وأي سعادة وأي استقرار..
بالله التوريطة والسجن اللي أنا فيه تسميه سعادة واستقرار..
طارق: لاتنسى إنك إنت الغلطان.....ياخي أول مرة أشوف واحد يتزوج وحدة وهو مايبيها ياخي ليش ماقلت لأ من أول..
مشاري: والله ياطارق إني عارف إني غلطان وأول زواجي كنت أكابر وأقول لأ أبيها واتعذر بالمشاكل والمهاوشات اللي بيني وبينها إنها هي سبب عدم تقبلي لها..
لكن الحين مابينا إلاكل خير والأمور بينا مستقره وهاديه.. وموقادر أتقبلها..
طارق:يعني إشناوي عليه؟؟
مشاري:أنا ظلمت نفسي بمافيه الكفاية.. أبستنى أخلص هالترم اللي باقيلي وأتخرج..
وبعدين أقدم على دراسات عليا برا.. وأسافر وأرسلها ورقة طلاقها..
طارق:بس يامشاري من كلامك لي قبل إن البنت ماصدر منها إلا كل خير.. وتحبك وتدور رضاك... ليه ماتحاول تتأقلم معاها..
مشاري:شوف ياطارق يعلم الله انك أول انسان افتحله قلبي وأفضفضله.. لأني من جد محتاج إني أفضفض واتكلم ولا أبنفجر..
البنت كويسه وخلوقه وماعليها كلام بس سبحان الله ماني قادر أقتنع إنها هي اللي بتعيش معي طول عمري..
طارق:بس مادري أحس تصرفك إنك تسافر وترسلها ورقتها بينهيها..
مشاري وهو يتنهد: مادري مادري ياطارق حتى أنا عندي نفس الإحساس.. البلشة إني أنا الملقوف تدخلت بينها وبين أبوها في سالفة ومشكلة سارت بينهم وتبرا منها وحلف إنها ماعد تدخل بيته..
يعني البنت الحين ماصارلها أحد غيري.. وأنا موقادر أفكر إشلون أطلع نفسي من هالورطة..
طارق:الله يعينك يامشاري.. صراحة ماتوقعت إن زواجك متعسك لهالدرجة..
مشاري:شسوي لكن لازم في حل..
طارق: المهم.. تجي عندي تذاكر معي؟؟
مشاري:لايا طارق .. أخاف زي المرة اللي فاتت نقعد نسولف ونضحك ويروح الوقت.. أبجلس هنا بغرفتي أذاكر.. وأشوفك بكرة قبل الإمتحان..
طارق:أوكي يللاه مع السلامة..
,, أنهى مشاري المكالمة وجلس يحك راسه بيدينه بملل وبعدين التفت على ثيابه وقال بنفسه:
يووه خلني أقوم أعلقهم داخل..
::::
::::
,,شال مشاري ثيابه ومشى لغرفة التبديل وهو يغني لكنه إنصدم صدمة كبيرة لما دخل الغرفة...
,,كانت رهف جالسة على رجولها عالأرض وحاطة منشفتها على فمها ووجهها كله دموع ومنهارة تبكي...
مشاري وهو يبلع ريقه: رهــــــــــــــف!!!
,, ضغطت رهف بالمنشفة على فمها عشان تكتم صرخاتها وبكاءها ورجعت تبكي وهي تهز نفسها على قدام وورى ...
مشاري وهو يتنفس بسرعة: رهـــ.... رهف.. إنتي مارحتي مع أسيل؟؟؟
,,رفعت رهف راسها وطالعت بعيون مشاري بكل ألم وقالت:
ليـــــش... ليـــــــــــــش يامشاري ... ليـــــــــــــش...
مشاري وهو مومستوعب الوضع اللي هو فيه:
رهف...رهف خلني أفهمك..
وتقاطعه رهف وهي حاطه إيدينها على أذانيها وميته بكي:
لا...لاااا... لاتقول شي.. مابي أسمع شي مابي أسمع شي كفاية اللي سمعته كفااااااية..
مشاري:رهف صدقيني الأمور بتنحل ... أنا ... أنا بحلها بهدوء مارح تتأذين..
رهف: أتاذى.. أتأذى أكثر من الأذيه اللي أنا فيها..
وبعدين أي أمور اللي تنحل.. أي أمور..
طلاقي منك.. ولا بيتي اللي بينخرب....
ولا سمعتي اللي بتتشوه..إنه ولد الناس طلقها وراح يسافر..
ولا مشكلتي مع أبوي.. اللي إنت كنت سببها ودقيت صدرك وقلت مارح أسمح لأحد يمس شعره منك يارهف وانت أول واحد ضربت وأهنت..
إنت خفت على كرامتك ووقفت بوجه أبوي وتمشكلت معاه عشان تثبتله إنك رجل مو بزر على حسابي..
أبوي تبرا مني وحلف إذا طبيت بيته بيكسر رجلي عشان تشبع رجولتك وغرورك يامشاري..
,, وتقوم رهف وتمشي خطوتين وتناظر لمشاري ووجهها كله دموع وتقول:
أسألك بالله إذا طلقتني وين أروح وين أرووووح..
وش ذنبي.. وش ذنبي بهذا كله... وش ذنبي إني حبيتك وسلمتك نفسي..
أبعرف إنت شالقرار الصح اللي أخذته بحياتك؟؟
قررت تتزوجني...بس عشان أمك ترضى عليك وتقول ولدي مشاري رجال... وانت ماتبيني..
تمسكت فيني وخليتني معك وصرفت علي وطول الوقت تقول دامك على ذمتي ماتطلعين ولاريال من جيبك...بس عشان الناس يقولون انك رجال...وهم بعد وانت ماتبيني..
ووقفت بوجه أبوي ....[وتنزل رهف راسها وتشاهق]بس عشان تشبع رجولتك..
مشاري بتوتر: رهـــــــــــف.. خلاص..
رهف: وش اللي خلاص.. وش اللي خلاص..
دامك ماتبي الزواج ليه تزوجت..
دامك ماتحبني ليه تمسكت فيني..
دامك مو متأقلم ومو متقبل ليه استمريت ليـــــه؟؟
ليه ماأخذت قرار من أول ليـــه؟؟
,,مشاري وهو يحس نفسه أول مرة يتهزأ ومو قادر يصبر أكثر من كذا:
رهف ما أبي ولا كلمة زيادة..
رهف: إيه .. طبعآ كلام الحق مايعجبك.. كلام الحق هز ثقتك الزايدة بنفسك..
لكن لأ...لأ ..أنا اللي مابيك ... أنا اللي مابيك..
طلقنــــــــــي.. أنا مابي أكون على ذمة واحد موصاحب قرار..
طلقنـــــــــــــــــي...
مشاري بعصبية: رهف لاتجبريني أجي أمد يدي عليك..
,,, رهف كش جسمها وخافت انه مشاري يرجع يضربها وهي مافيها حيل أبدآ لكن للأسف رهف ماقدرت تمسك نفسها من الصدمة أكثر من كذا وأغمى عليها وطاحت عالأرض بقوة...
,,تسمر مشاري مكانه وطارت عيونه وخاف خوف شديد وهو موعارف يسوي شي..
قرب مشاري من رهف وجلس جنبها عالأرض وهو خايف جدآ وحط يدينه على وجهها ويحاول يقومها..
مشاري:رهف... رهف..رهف ردي علي وشفيك..
,,فز مشاري وراح غرفة النوم وطلع من الثلاجة موية ورجع عند رهف وجلس يرش عليها ويحاول إنها تقوم لكن بدون فايدة..
آخر شي أخذ عباتها ولفها فيها وشالها بين إيدينه ونزل عشان يوديها الطوارئ..
,,,
,,لما نزل مشاري للصالة وهوشايل بين ايدينه رهف ووجهه مصدوم ومهموم وتعبان ..
لطيفة بخوف:بسم الله الرحمن الرحيم من ذي يا ولدي؟؟
مشاري وعيونه مليانه دموع: يمه رهف أغمى عليها وموراضية تقوم..
لطيفة:بسم الله عليها ليه وشفيها..
مشاري وهو يكمل طريقه:مادري .. مادري..
فيصل: مشاري خلني أشيلها عنك وجهك تعبان..
مشاري: لا لا...
فيصل: خلاص أنا اللي بسوق فيكم وانت خلك شايلها ..
مشاري بعصبية: قلت لأ هذي زوجتي وأنا بوديها..
,,,
وينطلق مشاري برهف للمستشفى ويدخلونها الطوارئ على طول