الفصل 25
الحلقه الخامسه والعشرون
الجو متوتر واشجان معصبه من الي سوته مها يا ترا هذي غيره والا حب .. اهي بنفسها مو فاهمه ليش سوت جذي .. جراح تم ساكت ومستغرب من الي سوته اشجان وتم يفكر فيها وكل شوي يرفع عينه عليها يشوفها واهي لافه ويها على الجام والعصبيه باينه عليها .. فكر جراح يسمعها اغنيه ومتأكد انها بتهدا شوي...
جراح:فواز افتح الدرج الي عندك وعطني الشريط الي داخل..
فواز : هاك...
اخذ جراح الشريط وكان حق عبدالمجيد ودخله في المسجل وشغل هالاغنيه:
[[ من يزعلها يزعلني انا .. ومن يضايقها يضايقني انا ]]
[[ والي يجرح قلبها في كلمتين .. صدقوا كنه جرح قلبي انا ]]
[[ الا .. الا هذي لا تزعلونها العزيزه عندي اتعرفونها .. اتركوها تاخذ الي هي تبيه الله لا يخليني من عيونها]]
[[ صوتها عندي انا مثل المطر .. وضحكها مثل الفراشه والزهر .. ]]
[[ ولا زعلت شيصير في هذي الحياة؟؟ لا فراش ولا زهور ولا مطر ]]
[[ من يزعلها يزعلني انا .. ومن يضايقها يضايقني انا ]]
[[ والي يجرح قلبها في كلمتين .. صدقوا كنه جرح قلبي انا ]]
أشجان انتبهت على الاغنيه وتمت تسمع كلماتها حرف حرف .. وتحس نفسها بتطير من الفرح وابتسمت وبخاطرها تضحك بصوت عالي .. وفي هذي اللحظه جراح كان يطالع لها واهي مو منتبهه عليه..
جراح بقلبه:عساني ما انحرم من هالابتسامه يارب...
فواز:جراح غير الاغنيه ليش تعيدها والله صكيت راسي فيها ....
جراح:اذا بغيرها يعني اشيل الشريط مره وحده...
فواز:لا يا خوي قلنا غيرها مو تغير الشريط كله...
جراح:لا خلاص طلع الشريط مره وحده...
اشجان تضحك ومستانسه على جراح، وكل ما تتذكر كلام مها تموت قهر:والله يا مها ما بخليج تحطين عينج عليه مره ثانيه ونشوف ....!!
بعد ما وصلوا البيت نزلت اشجان من السياره والتفتت علي جراح بتشوفه قبل لا تدخل ، اول ما التفتت تلاقت عيونها بعيونه نزلت راسها وادخلت البيت ...
جراح : يا ليت اعرف شنو الي زعلها اليوم...والله سويت كل الي يريحها بس فجأه تعصب وتزعل .. اكيد انا سويت شي يزعلها....وتذكر جراح حركتها يوم تمسك ايده واهي معصبه:اوووف معقوله الي فبالي...؟ يااااليت يكون هالزعل سببه الي فبالي ياليت ....اليوم بتصل عليها واشوف....
**
مها حطت جراح براسها وبدت تخطط من الحين ، وما حطت اعتبار حق اشجان ، واعرفت من شهد يوم وصفت لها شكله انه يقرب حق اشجان..بس مستغربه شلون طالع معاها وين اخوانها...
شهد:انتي شفيج ..؟
مها:اقول شهد.. هالولد اذا مو اخوها شلون طالعه معاه ، ويوم راحت مسكت ايده..؟
شهد:والله ما ادري بس الي انتي وصفتيه مو اخوها ... لان اخوها مو طويل حيل ولا عريض..اخوها ضعيف وأطول منها بشوي ...بس اهما ما شاءالله عندهم شاب واحد يلعب ملاكمه وجسمه حلو وطالع المركز الاول على الكويت .. وطويل حيل واكتوفه عريضه..مثل ما وصفتيه...
مها مو مقتنعه ولا تقدر تخمن انه خطيبها:زين ممكن يكون خطيبها واحنا ما ندري...؟
شهد:لا مستحيل لو خطيبها جان قالت لي...
مها:ياربي ماني قادره اقتنع... يعني لو مو اخوها ولا خطيبها شلون تمسك ايده واشجان ما عندها هالسوالف..
شهد:بس الي انا اعرفه انها تمون على عيال خالها واهم يعاملونها معامله فضيعه وخاصه غير عن الباقي .. يمكن يكون شي عادي.. بس انتي ليش مهتمه في الموضوع..؟؟
مها : هاااا...؟ لا مو مهتمه بس جذي عادي..مجرد اسأله...
شهد ترفع حاجبها:اهااا اوكي...
**
ام بشار:شرايكم اليوم نروح بيت ابو محمد ...؟
بشار كان يطالع التلفزيون والتفت عليهم: أي والله تصدقون من زمان ما رحت لهم...!
خوله:انا باجر عندي اختبار صعب ماقدر اروح...
ام بشار:بكيفج لا ترويحين بس انا ضروري اروح بشوف ريم تعبانه هاليومين...
بشار:يالله على ريم .. والله هالبنت حياتها تقطع القلب..!
ام بشار:خلاص انا بروح اتجهز والي بيروح يروح ..!
قامت ام بشار عنهم والتفت بشار على خوله وكلمها:خوخه ريم شفيها تعبانه ..؟
خوله:والله مادري ما قالت لي بس الي عرفته وفهمته منها .. خالد اهو السبب .!
بشار:لاحول ولاقوة الا بالله .. ما أدري هالخالد متى يعقل .. اخته كبرت وللحين ما يحترمها...
خوله:الله يعينها بصراحه...
بشار:زين تعالي خواطر شفيها من تزوجت اختفت ؟؟
خوله:الحبيبه ما يمديها ترجع من سفرها الا رجعت وسافرت مره ثانيه..
بشار مرتاح:الله يهنيها ان شاءالله ... خواطر تستاهل ومشاري حاطها بعيونه..الله يديم عليهم يارب...
خوله:امين... والفال لك ....!
بشار يخزها:الفال لج انتي اول..
خوله:ههههههههه انا تو الناس علي .. بس انت يا الحبيب عمرك وصل الثلاثين..
بشار:اقول يا حلوج وانتي ساكته..طسي عني ممكن..؟
خوله:براحتك ... يلا انا بقوم ادرس وانام واذا رجعتوا قولولي شنو يصير معاكم..
بشار:ياحبج للسوالف..زين روحي ذاكري احسن لج...
***
بدور:شلونج قلبي..؟
ريم قاعده على سريرها وحاطه راسها بين ريولها:زينه..
بدور تقرب لها وتقعد يمها:حبيبتي ريمي ليش تسوين بنفسج جذي...؟ عشان خاطري قومي معاي...
أرفعت راسها والدموع على خدها:بدور تركيني بروحي شوي..
بدور قلبها يعورها على حال ريم: والدموع بترجع لج ناصر..؟
ريم بنظره تقطع القلب:ناصر...؟ ااااه يا بدور لو دموعي ترجع ناصر لي ، جان بجيته العمر كله بجيته بكل لحظه وبكل ثانيه .. ! بس يا بدور وينه ..؟ ليش تركني ؟ ليش يعذبني معاه...؟ اذا بيموت بموت معاه .. لان انا خلاص مابي اعيش مابي مااااااابي..!
بدور ما استحملت دموع ريم قربت منها اكثر واحضنتها :تكفين بس لا تبجين .. ادعي ربج انه يشافيه ... قومي غسلي وتوضي وصلي ركعتين ادعي من ربج يرجعه لج سالم..!
محمد:انتي اهني وانا لي ساعه ادور عليج...
بدور : هلا حبيبي ..؟
محمد ما عجبه وضعهم:شفيكم ...؟
بدور:سلامتك قلبي ما في شي .. بس كنت اكلم ريم ..
محمد:وينها الحين..؟
بدور:بالحمام عزك الله.. تغسل ويها..
محمد:زين حبي الله يعافيج ... بس تطلع قولي لها عمتي ام بشار تحت .. نزلي معاها اوكي..
بدور: من عيوني..
محمد يبتسم لها : تسلملي عيونج يا الغاليه...اي صج قبل لا اطلع...
بدور:شنوو.؟
محمد يخزها:تراني مشتاق لج ..
بدور تضحك:زين تشتاق لك العافيه..
محمد يعض على شفايفه: اااخ منج.. خلصي واتفاهم معاج بالليل..!
بدور:هههههه زين روح لا تسمعك اختك الحين...
محمد:وينها اختي خليها تشوف مرتي شنو تسوي فيني..؟
بدور:يمه منك والله اني بريئه .. بس انت..
محمد:بس بس.. هالحجي ما ينفع ناطرج ناطرج...يلا لا تتأخرون..
بدور:ههههههههههههههه اوكي..
**
محروم
06-27-2020, 10:12 PM
ام بشار:شلونج يمه...؟
ريم:بخير عمتي ماشي الحال...
ام بشار: عسى دوم يارب..بس ويهج مو عاجبني..
بدور:تفضلي خالتي...!
ام بشار:يا حبيبتي ليش متعبه نفسج...؟
بدور:افاا عليج خالتي ما فيها تعب ضيافتج واجب علينا..
ام بشار:تسلمين يا بعد قلبي...
بهالوقت استأذن منهم سلطان لان بشار بيدخل الصاله...
بشار:السلام عليكم...
ريم وبدور:وعليكم السلام...
بشار من طاحت عينه على ريم تذكر منال لان صارت تشابهها وايد:شلونج ريم..؟
ريم بنبره حزن:بخير.. انت شلونك..؟
بشار قاعد ويطالعها بكل ضيق:الحمدلله على كل حال.. ريم تعالي ابيج شوي..
ريم:هلا..
وقف بشار وأشر لها:تعالي معاي شوي..بعد اذنكم...
ام بشار:اذنك معاك يا يمه...
وقفت ريم وراحت ورا بشار الصاله الثانيه:هلا...
بشار قعد وأشر لها تقعد يمه:ريم حبيبتي شنو فيج...؟ قوليلي..
ريم ما قدرت تمسك نفسها وصارت تبجي وايدها على ويها:......
بشار التفت عليها ومسك ادينها: رييييم...ليش هالبجي كله ...؟كلميني قوليلي شنو فيج...اليوم ما اطلع الا وانتي قايله كل الي عندج..
ريم ترفع عيونها عليه وادموعها على خدها:تعبانه يا بشار والله تعبانه...!!
بشار ماسك ادينها ويهدي عليها: افاا عليج يالغاليه تكلمي قولي الي متعبج انا بشار يا ريم.. لو كل الناس يضايقونج انا الي بساعدج وبوقف معاج...! بس رجيتج ما تبجين..
ريم:ااااه يا بشار ... والله كل يوم يعدي علي من غير ناصر احس عمري يضيع ايامي تموت مابي شي .. بس ابي احد يطمني عليه .. تعبت ثلاث سنين احاااتي والله تعبت...!
بشار حس فيها وتألم عشانها: يا ريم يا قلبي لو بيدنا شي جان سويناه من زمان.. ناصر راح وادعي ربج انه يرجع لج .. والله يشافيه...والله يالغاليه سألت عنه ربعي هناك ووصيتهم يسألون عنه في المستشفيات .. وان شاءالله بيلاقون خبر عنه... وتتطمنين عليه...
ريم تبجي:خالد عنده خبر عن ناصر بس ما يبي يقولي...الله يخليك كلم خالد بس يطمني ... الله يخليك..
بشار:خلاص فديتج لا تبجين وما ابي اشوف دموعج مره ثانيه..وراسج ايام وتكون اخبار ناصر عندج...كم ريم عندنا...اي ابي اشوف ابتسامتج ...!
ريم:الله كريم...
بشار:يلا يالغاليه قومي نرجع لهم .. واي شي بيصير بكلمج .. وانتي بعد اذا تبين شي اتصلي علي اوكي...!
ريم:ان شااءلله ...!
بشار:يلا يمه تأخرنا وخوله بروحها في البيت ...
ام بشار: يلا يا بنات حطوا بالكم على بعض وانتي يا بدور ما اوصيج على ريم...!
بدور:لا توصين حريص خالتي..ريم بعيوني الثنتين..!
ام بشار:والله ان قلبي مرتاح طول ماانتي معاها .. الله لا يحرمكم من بعض...
ريم:عمتي سلمي على خوله وفراس..
ام بشار:ان شاءالله يبلغ..يلا مع السلامه..
ريم:الله معاج عمتي..مع السلامه...
**
جراح ما قدر يصبر اكثر واتصل على اشجان ثلاث مرات ما ردت عليه ، وبدا يحاتيها اكثر..
أروى:مرحباااا...
جراح:هلا...؟
أروى:شفيك متضايق..؟
جراح:ولا شي.. بس بنام...!
أروى:اهاا..نوم العوافي .. اوكي اتركك الحين...!تصبح على خير..
جراح مستغرب منها وحس انها تبي تقول شي:وانتي من اهل الخير ... باي..
اروى:باي..
جراح مسدوح على فراشه ويتقلب ماهو قادر ينام الا بعد ما يكلم اشجان ، مسك تليفونه واتصل عليها المره العاشره واهو طفشان واخيرا وصل صوتها...
اشجان:الوو..
جراح: مرحبا..
اشجان من قبل لا ترد واهي ترجف:هلا جراح..
جراح:نايمه..؟
اشجان:لا..
جراح:ليش ما رديتي علي...؟
اشجان استحت تقوله انها كانت تتسبح : جهازي كان سايلنت وكنت اكلم رفيجتي ع النت.!
جراح : المهم شخبارج..؟
اشجان:تمام ماشي الحال..
جراح:انا بعد بخير...بما انج حتى ما تكلفين على عمرج تسألين!؟
أشجان استحت وحست انه موقفها باهت:اسفه..
جراح:وليش الاسف يالغاليه ما سويتي شي..وحتى لو تسوين شي كلمة اسف منج مابي اسمعها ابدا...!
أشجان تبتسم:ان شاءالله..
جراح:اخذتي علاجج...؟
اشجان:أي..
جراح:تعشيتي..؟
اشجان:لا
جراح قعد على حيله:ليش يا شوشو...؟
اشجان:بس ما اشتهي...!
جراح: هالكلام ما يمشي عندي..قومي اكلي شي قبل لا تنامين..!
أشجان قلبها ومشاعرها كل يوم تتغير اتجاه جراح بس اهي ما تبي هالتغير وخايفه منه: ان شااءلله...
جراح:ياحلوج وانتي مطيعه...! [حب جراح انه يذكرها بعصبيتها اليوم الصبح] أي صج ذكرت خلصتي دراسة الامتحان...؟
اشجان:الحمدلله
جراح زهق من ردودها البسيطه:اشجان..!
اشجان:هلا...؟
جراح:ممكن سؤال..؟
اشجان:تفضل..
جراح:اليوم الصبح ليش كنتي معصبه انا سويت شي زعلج...؟
اشجان تذكرت مها ونظراتها حق جراح وماتت قهر:لا انت ما سويت شي....خلاص لا تذكرني بشي سويته وانتهى...
جراح:بس اذا انا كنت غلطان مستحيل اسامح نفسي..وعلى الاقل اعتذر اذا بدر مني شي غلط بحقج..!
أشجان:لا ما في شي خلاص...
جراح حب يجر الحجي منها:زين اهي رفيجتج حيل...؟
اشجان افتحت عيونها:منووووو...؟
جراح:الي سلمتج الاوراق..!
اشجان:وليش تسأل عنها ان شااءلله...؟
جراح استانس من ردت فعلها وتأكد من الي بقلبه واشجان تغار:بس جذي مجرد سؤال..
اشجان بعصبيه:اهاااا..خير ان شاءاالله..
جراح:غرتي منها....؟
اشجان انصعقت من هالكلمه وما كانت متوقعه من جراح يقولها لها:نعم...؟
جراح:ردي علي...غرتي منها...؟
اشجان بخجل ودقات قلبها تزيد اكثر:لا شكوو وعلى شنو اغار..؟
جراح:اشجان خلي قلبج يتكلم حرام تعذبينه معاج أكثر..
أشجان لا شعوري نزلت دمعتها على خدها:.......
جراح:لا تزعلين من كلامي .. بس انتي تسوين شي والي اشوفه شي...صح يا اشجان...زين علميني من شنو خايفه تكلمي ليش رافضتني...؟
اشجان وباين انها كانت تبجي:جرااح...
جراح:عيون جراح...بس مابي اسمع صوتج والبجيه فيه...عشان خاطري...
اشجان: انت قلت كل الي عندك .. عادي اقول الي عندي ...
جراح ميت في برائتها:عادي ونص وبسمعج لاخر لحظه بدنيتي قولي يالغاليه اسمعج..
اشجان تجمع قوتها عشان تعترف حق جراح قبل لا مها تخطفه منها:جراح لا تزعل من كلامي او تفكر فيني خطا..جراح انا اليوم مت قهر من شفت مها تخزك والكلام الي قالته عنك واهي ماتدري انك تصير لي وهالبنت خبيثه واذا حطت شي في راسها تسويه يعني تسويه..
جراح يسمع واهو مستانس يحس انه بيطير من الفرح وهذي بداية الحب في طريجه:ومن شنو خايفه زين..؟
اشجان مستحيه تقوله:.....
جراح فهم عليها واستغل الفرصه:اشجان انتي تؤمنين بالحياه...؟
اشجان:اكيد...
جراح:خلاص عيل وصلنا خير...
اشجان:شنو...؟
جراح:ابيج نؤمنين وتحطين فبالج شي واحد...قلبج الي بين ضلوعج لو بيوم سلمتيه حق جراح مستحيل راح يتعذب ومستحل جراح بيتركه او بيطالع لقلوب ثانيه...اشجان انا حسيت بحبج من غير لا تتكملين..يمكن ابالغ ان قلت دقات قلبج وصلت لي الرساله الي كنتي خايفه تقولينها او مستحيه تقولينها.... بس صدقيني اذا في انسان بالكون عينه زايغه وقلبه يشيل قلبين فأنا مستحيل اكون مثلهم.. تدرين قلبي<بدا بالجرأه شوي شوي...والله اني كل ما أقعد مع الشباب اسمع قصص الحب الي يمرون فيها واسمع سوالف الحب العابره والجذبيه ولعب الشباب .. وكانوا دايم يسألوني جراح مافي احد بقلبك ...؟ او ما تكلم بنت وتحبها...؟ والله يا اشجان وانا ماني مجبور احلف لج بس كنت ارد عليهم بإبتسامه واقولهم بلى احب بس الي احبها ما انخلق منها اثنين بالكون ولا بنت من الي تحاجونهم توصل ربع الي عندي...كنت اتكلم وكأني واثق من قلبج وواثق من حبج لي...مع اني للحين مو واثق من شي...بس واثق من حبي الكبير لج...!
اشجان مشاعرها كل دقيقه وثانيه تزيد صوب جراح بس اهي خايفه .. بعمرها ما فكرت انها تحب او تعيش قصه حب..مجرد تفكير بهالموضوع يتعبها :...
جراح:وين سرحتي ..؟
اشجان:معاك..
جراح مسدوح على فراشه وعينه بالسقف:معاي والا مع كلامي...؟
اشجان:تفهمها واهي طايره:بالاثنين...!
تموا جراح واشجان يتكلمون ع التلفون تغريبا ساعتين من الساعه 10 ليما ال12 وجراح قال كل الي عنده مع التحفظ من طرف اشجان...كانت تضحك مره ومره تبتسم ومره تطير مع كلامه وتعيش عالم ثاني...
جراح:زين حبيبي انا أخرتج عن النومه وباجر وراج امتحان...!
أِشجان قلبها يدق من تسمع كلام جراح:تدري اصلا بعدني ما خلصت مذاكره...بقعد ادرس وانام الفير...
جراح مصدوم:وليش ما قلتي لي انج مو خالصه دراسه عشان اتركج تدرسين شوي..
اشجان:عادي انا متعوده ع السهر..
جراح:بس انا ما ابي عصفورتي تتعود على هالشغلات..مافي سهر ولا في ارهاق من اليوم وطالع..ووجباتج الثلاث بإنتظام تاخذينهم والعلاج بعد...
اشجان تضحك:وكل هذا تبيني اسويه؟
محروم
06-27-2020, 10:12 PM
جراح: بلا دلع وبتسوين كل هالشغلات غصبا عنج..
اشجان بزعل: بس مو بكيفي مو كل شي اقدر اسويه..
جراح:انتي من صجج شوشو...؟ وشنو الي ما تقدرين تسوينه..؟ في احد مايقدر ياكل وجباته الثلاث وياخذ علاجه وينام مبجر...
اشجان تمت ساكته لانها فعلا ما تقدر تاكل كل هالوجبات لانها تعبانه:.......
جراح:عصفورتي يا شيطونه لا تسكتين ولا تزعلين مني...يا قلبي انتي كل هذا عشان صحتج...
زين سمعيني ...قومي نامي الحين وقعدي الساعه 4 الفير كملي دراستج...
اشجان:لا اذا نمت ماقعدت...
جراح:انتي نامي وانا بقعدج...!
اشجان مستحيه منه : لا لا ... شنو يعني انا انام وانت تتم قاعد...؟
جراح بهمس: كل شي عشان حبي يهون..
اشجان ماتت من كلامه:لا انا اقعد خلاص لا تتعب حالك...!
جراح:حبي لا تزيدين الحجي..دخلي فراشج ونامي والساعه 4 ضبط انتي قاعده اوكي...!
اشجان استسلمت له:اوكي..
جراح:يلا حبيبتي تصبحين على خير..
اشجان:وانت من اهل الخير..
سكرت اشجان التليفون واخذت نفس عميق ، وكل كلمه قالها جراح سكنت بقلبها قبل عقلها سحرها بكلامه وصوته وحنيته .. يحس بزعلها وبفرحا وبحزنها .. وكأنه عايش بقلبها وعارف كل شي :آآآآآه ياجرااااح احس اني ماقدر استغني عنك وخايفه من المجهول الي ينتظرنا...
نامت اشجان بعد محاولاتها الصعبه من طرد هاجس جراح عنها..
وعدت الساعات وصارت الساعه 4 واتصل جراح ومن اول رنتين ردت عليه بصوت ناعس وكله نوم : الووو
جراح:فديت الي نومهم خفيف ويقعدون من اول رنه...صباح الخير
اشجان بعد ما استوعبت انه صوت جراح عدلت قعدتها وصحصحت وكأنه قاعد قبالها : هلا جراح..صباح النور
جراح:هلا فيج يا روح جراح...يلا قلبي قومي صححي واكلي لج لقمه وقومي درسي وذاكري..!
اشجان:جراح انت ما نمت..؟
جراح: وعصفورتي منو يقعدها...؟اذا جراح نام...؟
اشجان بعتب:جراح انت قاعد من امس الصبح لييش تتعب حالك..؟
جراح:تركي هالكلام هذا كله وقومي غسلي الحين وعشر دقايق الريوق بيكون عندج اوكي..
اشجان مصدومه:ريوووووق شنووو؟؟؟
جراح:شجونه .. بما انج قعدتي انا بخليج واروح انام ساعتين ارتاح فيهم وانتي ما عليج غير انج تنزلين الصاله وتعالي صوب الباب الي بين بيتنا وبيتكم طلبت لج ريوق وتركته لج عند الباب...امانه تتريقين وتروحين تدرسين لا تدرسين من غير ريوق اوكي...؟
اشجان ماهي عارفه شلون ترد عليه:جراااح
جراح:لبيه
اشجان:مشكووور والله تعبتك معاي..
جراح:اذا راحتج تكون بتعبي انا مستعد اتحمل كل التعب..بس اشوفج مرتاحه...يلا غلاتي اتركج الحين ..باي...
اشجان:باااي
قامت اشجان وغسلت ويها وانزلت شوي شوي صوب الباب واخذت الريوق الي طالبه لها جراح واصعدت دارها تريقت وذاكرت الي تبقى لها من الامتحان.... وعلى الساعه 5 ونص نامت لها ساعتين لان دوامها الساعه 8....
**
صحت اشجان حق الدوام وبسرعه بسرعه تجهزت واطلعت بتروح مع فواز وانصدمت من الي شافته...جراح كان واقف عند باب بيتهم ويسوي نفسه يسقي زرع الحديقه الي جدام الباب..
فواز:صباح الخير جراح..
جراح بإبتسامه عريضه:صباح النور هلا والله...
أشجان بقلبها:متى نام ومتى قعد ياربي عليك يا جراح...
جراح:شلونج شجونه صباح الورد..
اشجان مستحيه منه:هلا صباح النور .. انا بخير عساك بخير..
جراح بقلبه:دام صباحي فيه طلتج اكيد اني بخير.....اي الحمدلله بخير...وبصوت واطي واهو يخزها: احس بيغمى علي من النعاس...
أشجان بتموت ضحك:مجنون...!
فواز:يلا نمشي قبل لا تتأخرين...!
اركبوا السياره واشجان قلبها يعورها على جراح من امس مو نايم واهو الي قعدها تكمل مذاكره والحين قاعد من الصبح شعنده ..؟ تجرأت اشجان اطرش له مسج...
جراح ما صدق اول ما تحركوا وراحت اشجان دخل بسرعه البيت وحذف نفسه على السرير:ااااااااه يا حلو هالصبح حتى واهو تعب....قلب الصوب الثاني وقبل لا يغمض عيونه سمع صوت التليفون والواضح انه مسج من النغمه..فتح الرساله وإبتسم من شاف اسم اشجان وزادت ابتسامته من قرا المكتوب[[ يالله صباح خير .. ليش ما نمت وانت من امس سهران...؟ والله ضيقت صدري عليك ]]
جراح:فديت الي يخافون علي يااانااااااااس احبهاااااا...
اشجان تلقت المسج منه[[ يالله صباح الشجون والورد والخير والراحه...تبين اكثر من جذي..؟ وراسج وغلاتج يا شجونتي كل التعب يروح من أشوفج...وكل يوم بنتظرج قبل لا تروحين..يعني لا يضيق صدرج يالغاليه.. ]] ضحكت اشجان وحست كل يوم عن الثاني مشاعرها تجذبها لجراح من دون تفكير بالي ياي او بالعقبات الي في طريجهم ... !
بعدها اشجان في افكارها وسرحانها وصل لها مسج ثاني وكان من جراح بعد...وعباره عن ابيات شعر...!\
الصبح : ما هو طلعت الشمس للكون!! ..
والـيــوم مـــا هـــو يـــوم لـــو مـــر دونـــك
تـدري لـو ان الامـر بيـدي (وش يكـون)؟
تعـلـن صـبـاح الـنـاس : طـلـة عـيـونـك ..
يعـنـي بخـلـي هالـزمـن شـبـة مـجـنـون ..
يـشـبـه جـنـونـه يـــا حبـيـبـي جـنـونـك ..
ان جيـت صـار الكـون (شاكـر وممـنـون )
وان غبـت نسمـات الصبـح يحتـرونـك ...
خـــل الـخـلايـق كـلـهــم بــــس يــــدرون
انــك فــي قلـبـي (مــا قــدروا يبعـدونـك)
تبـقـى وقلـبـي بـاقــي ٍ مـعــك مـرهــون ..
أعــــرف عـيـونــي (بـالـرضــا) يـرهـنـونــك
مـــا تشـغـلـك عـنــي تـفـاهـات وظـنــون ..
ولا يـــغـــرك لــــــو بـــغــــوا يـعـشـقــونــك .
اغرب شعـور .. انـك لهالقلـب مضمـون ..
وانـا ارتبـك لـمـا تـقـل لــي : شلـونـك ؟؟
حـبـك فـنـون جـنــون وجـنـونـك فـنــون
أنــــــا أعـــرفـــك والــبــشــر يـجـهـلــونــك
وشـلـون قلـبـي يـقــدر يـخــون وشـلــون؟؟
وشـلــون اخـونــك والمـشـاعـر يـبـونــك؟؟
مـلـعــون مــــن فــكــر يـخـلـيـك مـلـعــون.
ومـجـنــون مــــن وده يـــــودع عـيــونــك
..
محروم
06-27-2020, 10:13 PM
ابتسمت اشجان... اقصد تبدلت الاحزان الي بقلبها وحل محلها الافراح حل محلها جراح وقلبه الكبير وحبه العميق الي تخلل حياتها وقلبها...ماهي قادره تفكر بشي غير انها تحب جراح وجراح يحبها وغير هالكلام ما تبي تسمع .. بس في شي قابض على قلبها الله يستر منه...
***
بالسعوديه تحديدا عند الروح الموجوعه والقلب الحزين .. ناصر الي فقد الامل بالحياه .. فقد الصبر .. فقد كل شي حلو كان يملكه .. فقد ريم من ثلاث سنين وااااه يا عذاب ريم على قلب ناصر ويا عذاب التفكير والهوجاس الي يطري عليه بطيف ريم وايام ريم...
ناصر ما عاد ناصر الاولي...الجسم نحيل والشعر ما تبقى منه شي يذكر .. والعيون ذبلانه .. يمكن الشي الوحيد الي حي وما تغير في ناصر ... قلبه...ّ! قلبه الوحيد الي بقى على حنيته وطيبته وعشقه المجنون لريم...في هاللحظه طرت عليه ريم واهي صغيره...تذكرها لما خافت من خالد وراحت تركض عند ناصر وتمت حاضنته من ريوله وعينها على خالد :ناصر لا تروح...
ناصر لا تروح ..
ناصر لا تروح..
ناصر لا تروح..
ناصر بتنهيده خرقت قلبه:اااااااااه يا رييييييم ااااااااه من صغرج وانتي تقولين لا تروووح وكأنج عارفه اني بخليج....نزلت دمعه حاره على خد ناصر وما تجرأت ايده تمسح الدمعه دامها نزلت على ذكرى ريم وطاري حبيبته من الصغر....!
ودعـتـهـا واخـفـيـت عـنـهـا دمــوعــي ii"
" خـايـف تـحـس بحسـرتـي iiوالتيـاعـي
ودعـتـهـا والـقـلـب مــنــي جــزوعــي ii"
" جــزعٍ مــن الفـرقـا قلـيـل iiالمسـاعـي
حيـث الـفـراق لـمـن تـولـع يلـوعـي ii"
" لـوعـات فـرقـاه مـاوراهــا iiاجتـمـاعـي
فـي لحظـة التوديـع هديـت روعــي ii"
" بيـنـي وبـيـن النـفـس قـمـة iiصـراعـي
اخفيـت مـا حسـيـت بـيـن الضلـوعـي "
" خـايـف علـيـهـا لا تـحــس iiبضـيـاعـي
قـالـت فـمـان الله وانـطــر رجـوعــي ii"
" واشـرت بالتـوديـع حــال iiاستمـاعـي
ساكـت ولا رديــت مـاهـي طبـوعـي ii"
" مـن عبرتـي تـفـرض عـلـي iiامتنـاعـي
حان الرحيل وحـان وقـت الفجوعـي "
" واقـفـت وأنــا عيـنـي عليـهـا iiتـراعــي
بيـن الرجـا واليـأس صبـري يمـوعـي ii"
" على الوداع اشلون قلبي iiاستطاعي
من عقبها اسهـر مسنـدي راس كوعـي "
" لأنــام خـالـي الـبـال تمـيـت iiواعــي
تومي بي الحسـرات مـن غيـر طوعـي "
" هــذا الـغــلا مـاهــو غـــرام iiصـنـاعـي
اقـنـب كـمـا ذيـــبٍ تـقـفـاه جـوعــي ii"
" لامـن ذكـرت فـراق حـلـو iiالطبـاعـي
اللـي لاجلـه هـان عـنـدي خضـوعـي "
" والله مانـسـى دمـعـتـه فـــي iiوداعـــي
لشاعر الراحل : طلال الرشيد
**
شهد:شجونه عندج محاظرات والا خلصتي؟؟
اشجان:لا خلصت تعبت اليوم من الصبح والحين المغرب جد هلكت...
شهد:أي والله تعب..زين ما طلعت نتيجه اختبار اول امس...؟
اشجان بنونر:اوووف سكتي ... والله كنت ميته خوف..بس الحمدلله اطلعت النتجيه نجحت فيه...!
شهد:أي الحمدلله...انا بعد قدمت زين بس النتيجه ما طلعت وحدي خايفه...!
اشجان:لا تخافين يا بنت الحلال ان شاءالله خير..
شهد:صج شجونه منو راح ياخذج...؟
اشجان:اووف نسيت ما اتصلت على فواز يا ويلي لو كان مشغول..والله بيعصب...
شهد:ههههههه يا بنت الحلال ليش ما تسوقين وتفتكين..وليسن عندج يعني ما في عذر...
اشجان:لا لا اخاااف ..
شهد:عيل تجملي ما ياج...
اشجان:بس بس كاهو بيرد علي الحين...
فواز:الووو...
اشجان:قوه فواز...
فواز:هلا ... بس لا تقولين انج بالكليه...؟
اشجان بخوف:أي
فواز:يا شجونه تكفين اتصلي على غيري والله ماقدر اطلع وبعيد عنج حيل ..
اشجان بزعل:يعني منو ياخذني اتصل على التكسي...؟
فواز يكلم اشجان ودخل جراح عليه المكتب واشر له انه يوقف:شجونه تركي عنج تكسي ما تكسي الحين انا اتصرف خليج جاهزه اوكي..
اشجان:لا تتاخر...انتظرك..باي..
فواز:باي...
جراح:شفييك خوفتني...
فواز:جراح والي يعافيك عندك شغل الحين...؟
جراح:لا البضاعه وسلمتها المحلات الي في استراليا ووصلني بريد بالاستلام والحين برجع البيت..
فواز: زين انا ما اقدر اروح ايب اشجان من الكليه والشغل مثل منت شايف ما اقدر اقوم الحين واتركه لازم اخلصه...
جراح قاطعه:خلاص لا تحاتي انا بروح لها ...
فواز:تسلم يا جراح بس لا تتأخر عليها تراها تخاااف وتقلب الدنيا مناحه وبجي..
جراح يضحك:افا عليك دقايق بس..يلا سلاام..
فواز:الله معاك..
محروم
06-27-2020, 10:14 PM
شهد:يلا شجونه انا بروح السايق وصل...!
اشجان: الله معاج...باي
شهد:زين تعالي اوصلج...؟
اشجان:لا لا اخوي الحين راح أيي مابي اتعبج معاي...وبيتكم بعيد عن بيتنا...يلا روحي لا تتأخرين...
شهد:اوكي قلبي باي...! وبس ترجعين اتصلي علي...ابيج بموضوع ضروري...
اشجان:اوكي..
راحت شهد وتمت أشجان تنتظر فواز وكانت بتتصل عليه بس قاطعتها مها: اوووه اشجان بعدج اهني...؟
اشجان رافعه حاجبها وتحاول انها تكون طبيعيه:أي بعدني الحين بروح...
مها:يا بختج انا شكلي بنطق اهني وايد محد فاضي..ولاعة جبدي من الانتظار..؟
اشجان:ليش تنتظرين خلاص تعالي معاي اخوي الحين بيوصل...وبيتكم قريب ما هو بعيد انا اقطج بدربي...
مها بخبث:اخاف اثقل عليج او اتعبج معاي..؟
اشجان: لا شدعوه...يلا دقايق وبيوصل.....!
تمت اشجان تنتظر ومها واقفه يمها ...اشهقت اشجان و تجمدت بمكانها يوم شافت جراح واقف لها برا السياره ويأشر لها:لااااا ليش جراح الي يا خذنا اليوم ليييييييييش...؟
جراح:قوه ..
اشجان بنفس خايسه:هلا...
جراح رافع حاجبه:شفيج...؟
اشجان:وين فواز..؟
جراح يبتسم:وليش انا مو كفو اني اوصلج البيت..
اشجان عصبت:فواز وين...؟
جراح:مشغول وما قدر يترك شغله وقالي اوصلج...انتبه جراح حق البنت الي واقفه ورا اشجان وتخز فيه استغرب من وجودها معاها الحين..
اشجان تنرفزت وحاولت تضبط نفسها: اوكي بس ترا بنوصل مها معانا البيت....
جراح:حياكم الله ...
اركبت اشجان جدام ومها بخطوات واثقه اقعدت ورا ومن وقاحتها عينها ما طاحت لحظه عن جراح...
جراح حاول يتجاهلها قد ما يقدر والتفت على اشجان:شخبار الدوام معاج هاليومين...؟
اشجان بنظره غضب وغيره:زين ماشي حاله...!
جراح كان بالطريج وانتبه على محل الأيسكريم الي تحبه اشجان من كانوا صغار:ها شجونه شرايج...؟وغمز لها ..
اشجان فيها ضحكه:شنووو..؟
جراح:نوقف هني وناخذ آيسكريم...؟
اشجان ما تبي أي شي غير انها توصل البيت وتتخلص من وجود مها الي طابقه على انفاسها:لا ما بي شي...!
جراح يخزها:مو بكيفج انا بخاطري اشتري .. وباخذ لج معاي واحد...
اشجان استحت وعن الفشايل اسألت مها:ها مها شخاطرج فيه...؟
مها تتصنع الحيا:سلامتج ولا شي...تسلمين..
اشجان:ما يصير يلا قولي ...
مها بصوت واطي:أي شي نفسج ما فرق...
جراح رفع حاجبه :اشجان انا نازل بتنزلين معاي والا تنتظرين...
اشجان بقلبها ياويلي منك شلون انزل واترك البنت بروحها:لا انت روح انا انتظرك..
جراح يغمز لها:طبعا كالعاده ما تغير طلبج صح.؟
اشجان تبتسم:صح...!
جراح:يلا دقايق..
مها حبت تقهر اشجان وتلعب بأعصابها:ما شااءلله اشجان هذا اخوج....؟
اشجان تكهربت من صوتها واسلوبها:ليش ما تدرين ان ما عندي غير اخو واحد واسمه فواز...؟
مها :امبييه عيل هذا منو...؟ وبعدين شكله مو غريب كأني شايفته...
اشجان بقهر اكيد مو غريب وانتي تخططين عليه انا اواريج:لا يا قلبي هذا ولد خالي جراح...
مها بإبتسامه خبيثه: اهـاااا.. الله يخليه لج...اقصد لكم...
اشجان تتأفف ولا يعه جبدها من وجود مها وتمت ساكته لين دخل جراح...
جراح:اسف تأخرت عليج....!
مها رافعه حاجبها لانها فهمت من كلمته ان يقصد اشجان الي تأخر عليها ..
اشجان: لا عادي ما تأخرت ولا شي بس مها شكلنا اخرناها على البيت ...!
جراح بصوت واطي:ما همني...
اشجان التفتت عليه واهي تبتسم:زين يلا نروح..
طبعا جراح الخبيث سمع مها يوم تقول تبي ايسكريم نفس اشجان بس جراح هيهات يلبي طلبها .. واشترا له ولأشجان نفس الشي ومها غير...!
استغل جراح الفرصه وشغل شريط عبدالمجيد عبدالله وحط اغنيه يا أغلى من روحي..
كاان مع كل كلمه و حرف ولحن يقول هذي اهداء مني لج...يا اشجان من القلب الي يحترق في كل لحظه حتى واهو معاج يعاني ... يعاني من حبج وصدج بعض الاحيان..الله يعيني ويصبرني على قلبي...وعليج يا اغلى الناس...!
~يـا اغلى من روحي علي .. يـا احلى شي واغلى شي..
ان قلت احبك شفتها هالكلمه في حقك شوي ...
قلبي الي من شوقه يجيك .. يغار من حبي عليك ...
ما يحبك الا يموت فيك ... ويحسك اقرب مني ليك ...
يا اغلى من روحي علـــي.....!!~
ما كملت الاغنيه ...قربت اشجان من الشريط وطلعته واهي تبتسم....ولفت ويها الصوب الثاني تطالع الشارع .. بس قلبها وكيانها ومشاعرها بالاتجاه الثاني عند جراح عند الماضي والحاضر والمستقبل المجهول ... عند بداية الحب الي اختارته بقلبها المتيم وعقلها المقيد بالخوف والاوهام....
دقايق وجراح عند بيت مها نزلت مها واشكرتهم على التوصيل واعتذرت ان سببت لهم أي احراج...اهي ما سببت احراج اهي حرقة اكبر واعضم قلب يملك الغيره ... اشجان صعبه غيرتها اذا حبت شي وتعلقت فيه مستحيل تتخلى عنه ... وما تحب تزعج هالشخص الي حبته حتى لو بغيرتها .... خذت وعد على نفسها تكون هالغيره بينها وبين نفسها ما تتعب جراح فيها ... ما تبي غير راحته ...!!
بس لحظه.....!! وراحتها اهي...؟؟ معقوله تكون مع جراح.....؟؟ نترك الايام تكشف لنا اكثر واكثر ...!
**
بشار: بشر يا بو عبدالعزيز ما في اخبار عن ناصر ...؟
ابو عبدالعزيز: والله يا بشار الاخبار ما تسر لا عدو ولا صديق...
بشار بخوف:تكلم فيه شي ....؟
ابو عبدالعزيز:ناصر حالته كل مالها والنازل ماقدر ابشرك وما اقول الا الله يرحم حاله ..الريال وصل اخر حالاته بالمرض...
بشار بضيقه صدر الله يعينج يا ريم:الله يستر يا بو عبدالعزيز .. تكفى يا ريال أي خبر او أي شي يصير بلغني اول بأول...
ابو عبدالعزيز: ان شاءالله بس لا تنسونه بالدعاء تراه بحاجه لكم ...
بشار:الله كريم ... يلا سلام...
ابو عبدالعزيز:فمان الله ...
**
ريم:الي ماخذ عقلج يتهنا فيه ...
اشجان حمر ويها:ومنو الي ماخذ عقلي غيرج انتي...!
ريم:أي ضحكي علي انا شنو ماخذه منج غير هالحجي المعسول..
اشجان بنظره حالمه:ريم..
ريم:عيونها...
اشجان:خايفه...!
ريم بخوف:بسم الله عليج يا قلبي من شنو خايفه..؟
اشجان:خايفه من قلبي...!
ريم بهدوء:شجونه...تحبين...؟
اشجان بدت ترجف من هالكلمه ومن طاري جراح:ما ادري....!
ريم:شلون ما تدرين...؟
اشجان:يا ريم والله ما ادري .. انا خايفه..الحب مو سهل ولا الطريج الي امشي فيه سهل...يا ريم شعوري متخبط قلبي تعب والله اني تعبانه...
ريم:يا قلبي والله اني حاسه فيج...بس تبين رايي..
اشجان:ياليت...
ريم:اول شي قوليلي السالفه كلها عشان اقدر اساعدج...
اشجان:ههههههه أي يعني لازم اقول الي عندي ؟؟
ريم:ههههههههههه والله الي تبي المساعده لازم تتحجى...وبعدين يالدبه انا ريوم ما تخشين عني شي يلا قري وقولي كل الي عندج...
اشجان:اااااه ومحد مريحني بهالدنيا غير وجودج معاي...
تمت اشجان تقول السالفه حق ريم من البدايه لين اليوم وريم تسمع لها واهي تبستم لها...
وهذي كل السالفه يا ريم من البدايه...
ريم:شجونه هذا يموووت فيج مو بس يحبج...
اشجان قلبها محترق:ادري والله ادري بس يا ريم ...
ريم:شنو الي بس يا روح ريم تكلمي...
اشجان:ريم انا ما افكر بالزواج ابد ...
ريم:وليش يا اشجان ...؟ شنو هالتفكير الي عليج....؟ ليش ما تبين الزواج...؟
اشجان تبجي : ريم انا احببببه من صغري بس اذا تزوجته راح احرمه من وايد اشياء...
ريم بخوف:اشجان شنو هالكلام احس في لغز بحياتج ما اعرفه...!
اشجان بصوت متقطع:ريم انـا....
ريم:اشجان يا قلبي لا تسوين بنفسج جذي...خلاص لا تقولين شي ارتاحي وفكري عدل...واذا جراح شاريج لا تبيعينه واي شي عندج قوليه له واهو بيتفهم كل اوضاعج...
اشجان تتنهد بقوه:ااااااااه....
ريم:سلامتج يا قلبي من الااه..شوشو روحي ارتاحي فديتج...
اشجان تمسح دموعها: ان شاءالله..يلا ريوم باي..
ريم:باي...
قامت اشجان وانسدحت على فراشها واحضنت مخدتها وادموعها سيلان على خدها:انا شنو الي اسويه ...؟ انا اشجان العاقله الكبيره الي بحياتي ما مشيت بهالطريج .. حتى لو كان جراح ولد خالي ما يصير اكلمه من ورى اهلي واذا عرفوا راح يزعلون مني وبجذي انا بعت ثقتهم فيني...خلاص يا جراح انا اسفه اســفه ماقدر اكلمك بعد ابي ارتاااح والله تعباااانه....! لمت نفسها حيل وبجت من كل قلبها .. تحس نفسها ضايعه ما تدري شنو تسوي واهي الي كانت تساعد كل الي يحتاجها بس اليوم اهي بحاجه حق احد يساعدها وينصحها ... تبي ترتمي بحضن امها او اختها تشكي لهم..بس ما تقدر اشجان تكتم بقلبها وايد ماتبي احد ينزعج من الي اهي تشكي منه...
**
عدت الايام على جراح مثل السم الي يتغلل في جسد الانسان وينهش من صحته شوي شوي لين يقتله...الايام مره وقاسيه ومحيره بالنسبه له....اسبوعين لا حس ولا خبر حق اشجان ما ترد على مكالماته ولا مسجاته واحيانا يكون مقلق:يارب سترك ماني قد هالمحاتاه والمعاناة يا اشجان وينج يا نظر عيني عساج بخير ويرتاح قلبي من القلق والتفكير.....؟
أروى كانت بالمطبخ تحوس فيه من الملل والطفشه من عطلت من الدوام واهي مقابله البيت :ياربي ليش ما اتصل على شجونه وفجر أيون عندي اتونس معاهم شوي...
أروى:مرحباااا يالقاطعه...!
اشجان بصوت تعبان:هلا وغلا...
أروى :شجونه قومي بسرعه غيري ملابسج وتعالي انتي وفجر عندي بموت من الضيقه...
اشجان تذكرت جراح والوعد الي اخذته على نفسها ما تبي تشوفه ولا تسمع صوته:لا لا ماقدر بنام..
اروى:شنو تنامين تو الساعه 7 بالليل قومي بسرعه تعالي البيت فاضي محد موجود....
اشجان تفكر:امممممم خلاص اشوف وضعي...
اروى:وربي يا شجونه خمس دقايق لج وانتي عندي يلااااباااااااااي...
اشجان تضحك:بااااااي...
قامت اروى تنادي السايق وطرشته الجمعيه يشتري لها اغراض ... تدرون البنات ما يجتمعون الا وهالسوالف موجوده ...الشبسات والعصاير...وخلال ربع ساعه اشجان موجوده عندها بالبيت...
أروى:اووف واخيرا شرفتي...
اشجان:هلا يا قلبي...
أروى:وين فجر...؟
اشجان:تبي تروح مع امي السوق...
اروى:يا بختها والله بخاطري اروح السوق...
اشجان:وانتي كله تبين تطلعين من البيت وبس...؟ قعدي ارتاحي شوي...!
اروى:زين زين قومي تعالي غرفتي جهزت القعده هناك...
اشجان:يلا قومي...
أروى:شوفي حبيبتي هالفطاير والشبسات والكاكاوات اليوم بنسهر عليهم اهني...وابشرج من يومين شريت فلم اجنبي رومانسي فضيييع ...عشان تكمل السهره...وتغمز لها..
اشجان تضحك:وهذا كله تبينا نسهر عليه اليوم...؟
اروى:أي مالي شغل ...
قربت اشجان من الطاوله الصغيره الي عليها الاكل ونفسها مسدوده تحط أي شي بحلجها...
اروى تخزها: شفيج..؟
اشجان بنظره كلها ضياع والم: ولا شي...!
اروى رافعه حاجبها:أي صدقت ... مو انا هنديه وتمشي علي هالحركات مو جذي...؟
اشجان تحس دقات قلبها تزيد ورعشه تسري بجسدها ماتعرف شنو مصدرها او بالاصح تعرف بس تبي تتجاهل:وغلاج ما في شي..بس انا هالايام تعبانه شوي ...
اروى بإهتمام اكثر:شجونه صحتج تعبانه وهذا الشي واضح...شوفي ويهج اسود وجسمج ضعفان بزياده...
اشجان ودها تشكي وترتاح بس اسكتت واحبست دموعها في محاجرها:اروى حبيبتي سكري الموضوع صدقيني ما فيني شي...
اروى:زين وين قايمه...؟
اشجان:بروح اشرب ماي وارجع...
اروى:زين قعدي انا ايب لج...انتظريني دقيقه..
انزلت اروى واتركت اشجان الي ضايعه مع مشاعرها وتفكيرها االدايم في جراح وخوفها من ردت فعله بعد غيابها عنه طول هالفتره...
دخل جراح بالصدفه غرفة اخته وكان توه راجع من بره ووقف مصدوم:أشجــــــان...؟
التفتت اشجان على الصوت وطاح قلاص العصير من ايدها وبصوت مخنوق:ج جراح
...
جراح بخوف ولهفه وشوق:ويييينج....؟
اشجان ماقدرت تمسك نفسها نزلت دموعها غصبا عليها ...ما تمنت تشوفه واهي بهالحال من الالم والحزن الي سكنها من فراق جراح الي اهي اختارته:......
قرب لها جراح اكثر وحط ايده على طرف الطاوله : ليش تخوفيني عليج وتقطعين عني طول الفتره الي فاتت....؟ طمنيني انتي بخير...؟
اشجان ميته قهر بعد كل الي سوته فيه يسأل عن احوالها ردت عليه واهي منزله راسها ودموعها تسبق كل حرف تقوله:أنــاا بخـير لا تحاتي...
جراح بحركه عفويه مد ايده على دموعها ومسحها عن خدها: لا تبجين رجيتج وقفي دموعج عشان خاطري ...اشجان ليش مسويه في عمرج جذي...؟ اشجان .......!
ارفعت اشجان عينها عليه:لبيه...
جراح بتوسل:لبى قلبج وعيونج يا دنيتي اليوم ردي علي الله لا يحرمني منج ...!
اشجان تشاهق:اوكي...
طلع جراح قبل لا توصل اخته وتشوفه وتسوي له سالفه..
أروى:تفضلي قلبي...!
أشجان:مشكوره...
اروى:تبجيـــــــن....؟
اشجان:من قال ....؟
اروى:ويهج وعيونج الحمره...؟
اشجان تضيع السالفه:اروى تكفين قومي شغلي الفلم ترا حدي متشوقه اشوفه...!
اروى حست انها تغير السالفه:اوكي الحين اشغله...
**
دخل جراح غرفته وتسند على الباب:الحمدلله اني شفتها وتطمنت عليها بس حالتها مو عاجبتني ...ياترى شنو الي صاير معاها وليش قطعت عني كل هالفتره حتى بيتنا صارت ما اتيي ولا تطلع مع اهلها....اضن في شي صاير ....!بس كل شي بعرفه هذي اشجان عصفورتي ما تخبي عني شي...!ولازم اسوي أي شي عشان يسعدها..
**
محروم
06-27-2020, 10:14 PM
بعد ما ارجعت اشجان البيت وصل لها مسج من جراح [[ عصفورتي بتصل واذا ما رديتي بزعل عليج ]]
أشجان ردت عليه[[ حاظر راح ارد ]]
مجرد ما وصل المسج اتصل عليها جراح:الووو
اشجان:اهلين..
جراح:شجونه شلونج الحين والله ماني قادر ارتاح وانتي جذي...
اشجان تحاول تمسك نفسها وقلبها لا تضيع كل الي تحاول تسويه:انا بخير لا تحاتي..
جراح:زين ليش ما كنتي تردين علي..صاير شي..؟
اشجان بجديه اكثر:لا مو صاير شي..
جراح مو عاجبه صوتها وقلبه يقول فيه شي:تخبين علي...قولي الي عندج..!
اشجان:جراح بقولك الي عندي بس ما تزعل علي...!
جراح بهدوء:ماعاش الي يزعل عليج او يزعلج...لا تخوفيني تكلمي..
اشجان منزله راسها وتلعب بطرف بجامتها:جراح انا متعمده اسوي كل الي سويته...حاولت اقطع علاقتي فيك عشان ارتاح...لا تاخذ كلامي وتفهمه بطريقتك الخاصه..جراح الراحه الي انا اقصدها راحه البال..انت سيطرت على حياتي بس انا رجعت افكر بأهلي وثقتهم فيني ..صدقني لو عرفوا اني اكلمك او بينا أي علاقه بيزعلون مني ... وانا طول عمري شاريه ثقتهم وما ابي اخذلهم..انت فاهمني يا جراح ....؟
جراح برد قلبه وابتسم لها : اذا هذا الي مزعلج ومكدر خاطرج ... فأنتي ارتفعتي بعيني وبقلبي اكثر من قبل .. الي خايفه على نفسها من اقرب الناس لها شلون ما تخاف من الي ينخاف منهم وانتي فاهمه قصدي...ورب البيت اني مو زعلان وفهمتج وفهمت الي تبين توصلينه لي...بس انا بعد ماني قادر اتحمل اكثر...وبكلم ابوي وينهي الموضوع...
اشجان بصدمه:انت من صجك..؟
جراح:وليش مو من صجي...؟ انا ابي اخطبج انتي فاهمه..؟
اشجان:أي بس شلون....وانت عارف بالــ
جراح يقاطعها:اشجان الموضوع الي انتي شايله له هموم الدنيا انحلت مشكلته صحيح اني فاشل دراسيا وما عندي شهاده بس انتي شايفه وضعي مستور والحمدلله وبعدين في شي محد يعرف عنه غيري انا وابوي وانتي الثالثه اشجان انا عندي محل اثاث في استراليا والدخل ينزل على حسابي في الكويت يعني لا تحاتين او تفكرين بموضوع العيشه ...
اشجان:جراح انا عمر الفلوس ما همتني واخر اهتماماتي ... بس اهلي منو الي يقنعهم وانت عارف نظرتهم ودايم يقولون بناتنا ما ياخذون الا صاحب شهاده ومركز..
جراح:انتي وافقي ومالج دخل في اهلج انا الي بتصرف معاهم وابوي معاي...لان ابوي يعرف بموضوعي...
اشجان اشهقت:شنوووو....؟
جراح:شفيج...؟
اشجان:شلون يدري؟؟
جراح:شفيج عادي.... وشي طبيعي... يعني انا ما كلمتج ووعدتج بالزواج لعب...انا واثق من الي اقوله وواثق من خطوتي .... الا اذا انتي لج راي ثاني...هذا موضوع بروحه...
اشجان:انا مالي راي .. خلاص دام الموضوع عندك انت تصرف .. بس جراح لا تنتظر مني اني بتصل او شي صدقني ماني قادره...
جراح:ماراح نحتاج حق هالشي كلها ايام وبكلمج عادي ومن غير خوف او محاتاه من اهلج اوكي...؟
اشجان مرتاحه من كلامه وخايفه من الياي:ان شاءالله...!
**
اليوم كان ثقيل على ريم والعبره خانقتها ماتدري شنو سبب حزنها والم قلبها.:ياربي استر والله قلبي مو مرتاح واحس في شي صايـــر...!
اسمعت صوب باب الغرفه ينطق:منووو؟
خالد:انا خالد فتحي الباب..
فزت ريم من مكانها وافتحت الباب بسرعه لان صوت اخوها مو مريحها:هلا خالد تفضل...
رفع خالد راسه وحط عينه بعين اخته وماهو عارف شنو يقول..
ريم بخوف وتوتر:خاالد تكلم شصاير...؟
قرب لها خالد وحضنها واهو يبجي:.......
ريم بدت تبجي وقلبها حاس :خاااالد شفييييييك
خالد حاول يمسك نفسه:نـــــاآاآصر.........!!!!!
أنتهت الحلــــــــــــــــقه ...