الفصل 15
الحلــــقه الخامس عشــر ....
الحزن كان طاغي على حياه كل من عاش مع منال وحبها وتعلق فيــها..بشار انتهت حياته برحيل منال..ريم الامل الوحيد لها في الحياه فقدته...محمد انهار قلبه وقوته برحيل اخته..
الحياه ظلمت بعيون احباب منال..بس ما باليد حيله ، هذا امر الله وقدره عليها....
محمد كان قاعد بالديوان والناس تعزيه بأخته وابوه واخوانه قاعدين معاه,وليما الحين مصدوم من الي صار...بين يوم وليله تختفي اخته من هالبيت..لاحول ولاقوة الا بالله...
ابو محمد بحزن:يبا يا محمد روح شوف بشار وينه...؟ما شفته اليوم...له ثلاث ايام ما أيا العزا شفيه؟ روح تطمن عليه..
محمد يلتفت على ابوه بكل ضعف:يبا خله على راحته...اكيد قاعد في البيت..مابي ازعجه..
ابو محمد باصرار:محمد روح بيت عمتك دام الناس راحوا وروح تطمن على بشار ويبه معاك يكون احسن....
محمد:ان شاءالله يبا....قام محمد وطلع من الديوانيه وقابل ناصر ولد يرانهم بويها...
ناصر:السلام عليكم...
محمد:وعليكم السلام هلا ناصر حياك تفضل خالد داخل...ومشكور يا ناصر على وقفتك معانا..... ونزلت دمعه متهوره من عينه..جدام ناصر مسحها وطلع بسرعه...
دخل ناصر الديوان واهو متضايق على حال هالعيله المسكينه....وعلى ريم الي فقدت اقرب الناس لها..والي كانت تحميها من ذرة الهوا..اما الحين واااه من الحين...انتهى كل شي ...
وصل محمد بيت عمته ونزل من سيارته وتم واقف عند باب السياره يتخيل شكل بشار،شلون بيواجها ويكلمه ويقنعه..بشار وايد متأثر واكثر من ما نتوقع...توكل على الله ودخل البيت ...
محمد:السلام عليكم...
مريانا:وعليكم السلام بابا...
محمد:مريانا بشار موجود؟؟؟
مريانا تشوف الحزن كله بصوت محمد واهي ضايق خلقها لانها كانت تعرف منال:أي بابا موجود فوق هو غرفه...
محمد:زين وديني عنده...
مشى محمد مع الخدامه ليما وصل عند باب الغرفه وطبعا عمته والبنات مو موجدين..لانهم في بيت بو محمد...وما كان يبي يشوفهم اصلا...
محمد:خلاص مريانا روحي انتي ..مشكوره...
مريانا بإبتسامه:اوكي بابا...
طق محمد الباب اول مره ومحد رد عليه وطقه مره ثانيه ونفس الشي..قرر انه يدخل ويشوف بشار بنفسه....
دخل محمد بكل هدوء كانت الغرفه ظلمه ومافي غير ليت الابجوره شغال عند جنب السرير وبشار مسدوح على جنبه وايدينه ممده بعرض السرير وحالته تقطع القلب والجو بارد في الغرفه لان الدريشه مفتوحه والجو شتا...قرب محمد من بشار وقعد على طرف السرير...
محمد:بشار شلونك اليوم....؟
بشار ما يرد ولا يتحرك بس يسمع كلام محمد:.........
محمد بحنيه وتعب بنفس الوقت:بشار كلمني الله يخليك ..لي متى وانت على هالحال..اذا انت راضي بالعذاب حق نفسك...ترى منال ما ترضى بالي انت تسويه..في روحك...لا تعذبها بقبرها بدموعك..خلك ريال وواجه الحياه...هذا امر الله علينا ولازم نرضى بالواقع..والا انت تعترض على حكمه ربك...وبعدين انت فقدت زوجتك..بس انا فقدت امي واختي الي صارت لي اكثر من الام...بشار انا مجروح اكثر منك..يمكن انت الحب مات في قلبك..بس انا قطعه من روحي راحت..اختي يا بشار..بس لاحول ولاقوة الا بالله ما بيدي شي اسويه..ولو دموعي تردها والله لابجيها لاخر يوم بحياتي...بس صدقني انها ما بترد......خلاص ارجوك قوم كلمني...وتعال معاي...
بشار كان يسمع كل حرف من محمد ودموعه تنزل على خده وتشربها المخده بكل شراها ومن غير ملل..ثلاث ايام من وفاة منال وبشار ما جفت دموعه ... تألم من كلام محمد وحس بالجرح يقطع قلبه..التفت على محمد وقعد بكل صعوبه وسند راسه على السرير..
محمد يتأمل العذاب بملامح بشار:ليش يا بشار..؟كلنا تعذبنا بفراقها بس لازم نتصبر..لازم ننسى...
بشار بصوت متألم:ننـــســى؟؟؟؟
محمد:أي ننسى...ننسى انها ماتت..نحاول نعيش بذكراها الطيبه...اهي ماتت وراحت من هالدنيا ويمكن يكون خير لها .. ومرار لنا..بس هذا قدر ومكتوب...
بشار:محمد...!؟؟
محمد:امرني...
بشار:منال ماتت وانتهى كل شي..بس طلبتك لا تقولي انساها..ولحد يتكلم بطاريها جدامي ,يكفيني الي انا فيه..منال حبيبتي تعرف شنو يعني حبيبتي حتى لو انت اخوها انا اقولها لك انا حبيتها من عمر وتعذبت بحبها سنين ..ويوم يصير الحلم حقيقه تختفي من عيني...ولا يكون لها اثر بحياتي..وفوق كل هذا ماتت محترقه..تعذبت قبل لا تموت..بس اكيد ربي راح يرحمها..
اهي كانت بحاجتي...بس راحت وخلتني انا الي بحاجتها العمر كله....ويمد ايده على ادراج الكمدينه الي يمه ويطلع صور منال:شوف يا محمد ابتسامتها وضحكتها وزعلها كل شي كنت اصوره لما نطلع وكانت تتضايق مني..وتستانس بس انا كنت اقول لها خليني اصورج واحتفظ في هالصور..كانت تقولي..ليش تحتفظ بالصور وانا عندك العمر كله..(يبجــي) قالت العمر كله..بس وين العمر واهي راحت من بدايته واوله...ااااااه يا محمد عذابي راح يذبحني...والله راح يذبحني...
محمد يبجي على كلام بشار.. بس الدموع ما تنفع وقعد يحاول فيه ليما قدر عليه وطلعه من البيت وخذاه معاه بيتهم..بكل صعوبه....لكن بعد شرط من بشار انه يروح ويدخل غرفه منال ويقعد فيها بروحه...
؛
؛
محروم
06-27-2020, 09:10 PM
دخل ناصر بيتهم وقعد على الكرسي في الصاله وما كان في احد وشوي تدخل عليه ريم...الي من توفت اختها ماراحت بيتهم ولا تعرف شنو الي صاير...ادخلت بكل هدوء حتى ناصر ماحس عليها ليما وقفت جدامه واهي منزله راسها...
يلتفت لها ناصر واهو خايف عليها شكلها فيها شي:ريم شفيييييج حبيبتي...
ريم والدمعه بعينها وصوتها المتقطع: ابي ماما منال.. من زمان ما شفتها...
ناصر انكسر قلبه عليها خذاها بحضنه ولمها:حبيبتي ماما مسافره انتي خليج عندنا وانا اوديج حق ماما زين حبيبتي...
ترفع ريم راسها وتشوف دموع ناصر:وانت ليش تبجي...؟
ناصر يمسح دموعه:ولا شي حبيبتي عيوني يحرقوني..
ترجع ريم لوضعها وتنزل راسها:بس انا بشوف ماما ... كلكم ما تخلوني اروح بيتنا..بروح بيتنا..
ناصر:ليش ريمي انتي هني مو مستانسه مع سحر..؟ اهي تحبج..وانا احبج ..وامي وابوي..ليش تبجين بعد..خلاص انا زعلان..<<<ويسوي نفسه زعلانه ويلف عنها..
تقوم ريم من حضنه واهي تبجي وراحت تركض صوب الباب ...التفت لها ناصر وراح وراها..
ناصر:ريم تعالي وين بتروحين ريم...
وتم يلحقها ليما مسكها عند باب الشارع كانت بتطلع:وين تبين تروحين..
ريم تحاول تفلت من ايده واهي تصارخ:ابي ماااااماااااا...مابيكم.....ابي مااااامااااا....
اخذها ناصر على صدره ولمها بكل قوته ويحاول يهدي عليها ... واخذها داخل عند امه...
ناصر:يمه والي يعافيج خلي ريم عندج لا تطلع بره..تو كانت بتروح بيتهم..
ام ناصر:شلووون؟؟؟
ناصر:يمه خلي بالج منها البنت تبي اختها..وحالها يقطع القلب...
ام ناصر تطالع ريم الي ماسكه بطرف دشداشه ناصر ودموعها على خدها:تعالي حبيبتي..
ريم:مابي ابي منال...
ام ناصر:خلاص انا اوديج بس تعالي عندي الحين خل اقولج قصه عشان ننام..يلا حبيبتي...
راحت ريم عند ام ناصر وعينها على ناصر خايفه يروح ويتركها: لا تروح ناصر ابيك تاخذني بعد شوي عند ماما..
ناصر يبتسم ابتسامه جرح والم على حال ريم:ياليتني انا امج وابوج واهلج كلهم بس رحميني من هالنظرات والوعود ...خلاص حبيبتي اوديج وراح اقعد معاج...ويقعد ناصر مجبور عشان خاطر ريم...
:
:
بشار يتأمل الغرفه بعد الدمار الي اهي فيه بعد ما ابتلعتها النيران من كل جانب تم يطالع فيها ويحس روح منال معاه في هالمكان .. التفت على محمد الي كان واقف عند الباب لاحول ولا قوة له...
بشار:شلون احترقت الغرفه...
محمد:اللتماس كهربا من الثلاجه الصغيره...
بشار:كم الساعه صار الحريق...؟
محمد:تغريبا 5 الصبح...
بشار بألم:منو دخل عليها...
محمد مجروح من هالذكرى وبشار يزيد عليه:انا...
يلتفت عليه بشار:ياليتني انا الي احترقت ولا هي...ياليت هالنيران كلت قلبي وحياتي ولا لمست منال...ياما وعدتها اني احميها..بس ماقدرت..وطاح على ركبته ويطق الارض بإيده:اااااه يا حسرتي عليج يا منال...محمد ارجوك اتركني شوي...
محمد:على امرك..بس لا تعذب روحك صدقني مافي شي راح يتغير...
طلع محمد وتم بشار يناجي الكآبه والوحده والعذاب بهالمكان...يسترجع ذكرياته مع منال وروحها الي ما تفارق كيانه لو لحظه .. يحسها عايشه معاه كل دقيقه..بس ما يشوفها..ما يقدر يكلمها...
منال: حبيبي انا خايفه واحس اني بفارق ريم...
بشار:منال شنو هالكلام حبيبتي .. لا تفاولين بالشر..انتي لج طولة العمر وريم بتم معاج..محد بيحرمج منها...
منال:بس انا خايفه...
بشار:تخافين وانا معاج...؟
منال:محد محسسني بالراحه غيرك..بس قلبي ناغزني...
يصحى بشار من هالذكرى واهو مغمض عيونه:والله لو ادري انه خوفج بمحله وان الموت بياخذج مني ما تركتج لحظه..ياليت اقدر اخلي الزمن يرجع..واعيش معاج كل لحظه وماابعد لو على موتي....
:
:
:
محروم
06-27-2020, 09:10 PM
الحياه عند اشجان مازالت في غموض.. والقضيه وقفت لانها ماتكلمت ولا تبي تتكلم ولا تبي تعترف منو الشخص الي كان بيخطفها...بس قعدت هالسنه ما كملت دراستها..وتابعت دراستها السنه الي بعدها...
أِشجان:مرحبــــا...
ابو فواز وام فواز:مرحبتين هلا وغلا...
اشجان:يمه بروح انام بلييز لحد يقعدني انا اقعد براحتي وادرس باليل اوكي..
ابو فواز:بس اذا تاخرتي انا بقعدج اوكي..
اشجان: لا لا يبا انا اقعد بروحي والله احس اني هلكانه...من الدوام..
ابو فواز:خلاص روحي نامي .. نوم العوافي...
اشجان بابتسامه:الله يعافيك يا حياتي..
اصعدت اشجان غرفتها واحذفت نفسها على السرير ونامت...تحس براحه اهي تتصنعها حق نفسها عشان تقدر تعيش...احلى مافيها وعلى رغم حزنها انها تحاول تخفيه قد ما تقدر..حتى لو كانت تحس فيه بداخلها فهي قاعده تحاول تنساه قد ما تقدر.....
سراب تلعب بالحديقه وصار هوا عالي والشير تحرك بطريقه قويه قامت تصارخ وادخلت داخل تنادي ابوها:بااااا باااااااا......
ابو فواز فز على صوت سراب على باله اشجان وكان بيصعد فوق بس انتبه حق سراب واهي داخله من باب الحديقه تصارخ وقف مصدوم منها وسألها بسرعه:شفيييييييج؟؟
سراب تاخذ نفس قوي:هواا عالي برا...
ابو فواز عاقد حاجبه:شنو يعني...؟؟
سراب:كنت بطير... خوفني...
ابو فواز وام فواز الي كانت تسمع الكلام من بعيد ماتوا من الضحك:ههههههههههههههههههههههههه وين تطيرين يا قلبي...وفي احد يخاف من الهوا..صج انتي عجيبه..
سراب معصبه:لا تضحكون...خلاص بروح حق اشجان اعلمها عليكم..وراحت تركض...
ابو فواز:اختج نايمه تعالي....
بس ماسمعت لهم وراحت تركض عند اختها ولقتها نايمه وحاولت تقعدها بس اشجان ما ترد عليها،ارفعت البطانيه وادخلت نامت...<<<هروب معتاد عليه..
:
:
بعد مرور سنه على وفاة منال..ريم اعرفت بالخبر واكرهت ناصر لانه جذب عليها وقال لها اختج مسافره..وصارت عندها حاله فضيعه كله تبجي وما تقعد في البيت دايم في بيت عمتها ام بشار...
ومحمد انقطع فتره عن بدور ، بس ما نساها طبعا.. وملجوا بس من غير حفله وهذا الشي بطلب من بدور....ماتبي حفله ملجه ومنال توها متوفيه...حتى العرس كانت ماتبي تسويه..بس محمد رفض هالشي..لان هذي ليلتها الوحيده لازم تفرح فيها.....ومنال اكيد بتفرح لفرحهم...
بشار الي يشوف حاله يقول منال اليوم توفت ... مثل ماهو سنه لا غيرت ولا بدلت شي من حاله..ووجود ريم عندهم يعذبه زياده..كان يداريها وحاطها بعيونه..وكل طلباتها اوامر...
كانت ليل نهار تبجي تبي منال..بس ام بشار كانت تحاول فيها وبشار ياخذها ويمشيها برا البيت عشان تغير جو..وماكانت ترضى تروح بيتهم عشان منال مو فيه....
:
:
خواطر:بشار ممكن اطلبك طلب..
بشار بملل:شنو...؟
خواطر واهي واقفه عند باب الغرفه:نبي ناخذ ريم ونطلع البحر اليوم..والله الجو حلو..ومن زمان ما طلعنا...
بشار عفس حواجبه:البحر؟؟؟ لا مالي خلق..
خواطر:الله يخليك..عشان خاطري...بلييز...
بشار:لا يعني لا خلاص روحي...
وفي هاللحظه يدخلون الغرفه ريم وخوله وفراس:بشااااااااار...
بشار فز بخوف:خييييييير شفييييكم؟؟؟
الكل:نبي نروح البحر قوم ودنا...يلا يلا يلا...
بشار بعصبيه:انتوا بالعين راديوا...؟؟ الله يغربل بليسكم..انزين طلعوا برا الحين..وبعد شوي اخذكم...
الكل طلع بس ريم تمت واقفه مكانها...تطالع بشار ولا تحركت...
بشار:شنو فيج ريمي .؟ تبين شي...؟؟
ريم:أي...
بشار:شنو حبيبتي..تعالي قربي...
قربت منه ريم وبعيونها خوف وكلام وايد:.....
بشار:شنو تبين قلبي قولي...؟
ريم:بس ما تعصب...
بشار مستغرب من كلامها:لا ماعصب وانا احبج ماعصب عليج...
ريم: لا توديني بيتنا مره ثانيه........وتنزل راسها....
يمسك راسها بشار ويرفعه عليه:ليش حبيبتي شنو صار..؟
ريم بخوف: لاني اخاف من خالد...
بشار انغزه قلبه من صوتها:ليش حبيبتي سوى لج شي؟؟
ريم:لا....
بشار:عيل شنو فيج...؟
ريم:اهو ما يحبني وكله يطالعني ويخوفني..انا احبك..واحب فراس..وخواطر وخوله ..وعمتي..
بشار يتذكر قسوة خالد معاها بس معقوله ماحن قلبه عليها بعد وفاة اخته..وطول هالفتره اهي غايبه عنه..يرجع ويعاملها نفس المعامله..:لا حبيبتي لا تخافين من خالد..اهو يحبج اكيد..بس اهو زعلان شوي...وانتي يالدبه لا تصيرين حساسه وتزعلين من كل شي...ويلا قومي غيري ملابسج الحين راح اخذكم البحر..يلا بسررررررررعه...
اطلعت ريم واهي تضحك ومرتاحه من بشار وراحت تبشر باقي العيال انهم بيطلعون البحر.
محروم
06-27-2020, 09:11 PM
محمد:قوه بشار شلونك...؟؟
بشار:الله يقويك..بخير الحمدلله..انت شخبارك...؟؟
محمد:بخير وماني بخير..انت وينك؟؟
بشار:بالبحر مع اليهال...
محمد: هذي اخرتك..تطلع مع اليهال...
بشار:والله لولا عيون ريم ما طلعتهم....
محمد:ااااه على ريوم اهي الي متعبتني والله ولهت عليها..وابي اشوفها..
بشار:حياك تعال البحر..عندنا..
محمد:خلاص شوي وراح أي عندكم..بس لا تقول لها اني راح أي اوكي...
بشار:اوكي لا تتاخر...احنا قريب من الابراج..اوكي..
محمد:اوكي..بس حط بالك على ريوم..
بشار:بعيوني...يلا ننتظرك...
:
:
ابو فواز:يلا انا طالع تبون شي..؟؟
ام فواز:وين بتروح؟؟
ابو فواز:الديوانيه عند الربع...
ام فواز:الله معاك بس لا تتاخر...
ابو فواز:لا تحاتين ماني متاخر...صج تذكرت اشجان بعدها نايمه؟؟
ام فواز:أي والله بعدها حتى الوقت تأخر..مادري متى تقعد وتدرس وترجع تنام بالليل..
ابو فواز يبتسم:ياحليلها اكيد تعبانه...بس ولا يهمج الحين اروح اقعدها...قبل لا اطلع والله فقدتها..
ام فواز:أي والله تسوي علي فضل لو قعدتها مافيني حيل اقعدها...وعساك ما تفقد غالي..
يروح ابو فواز ويدخل غرفة اشجان بكل هدوء ويضحك على شكل سراب انحاشت ونامت بحضن اختها...قرب من اشجان وحط ايده على كتفها وبدا يهزها شوي شوي ويناديها:بابا اشجان يلا قومي تأخرتي..على دراستج..صار ...... وقطع كلامه فزت اشجان من نومها كانت مرعبه...حتى ابوها خاف وابعد ايده بسرعه..فزت من نومها وعينها معلقه بعين ابوها وتتنفس بسرعه..ويوم انتبهت ان ابوها الي يقعدها ارجعت دقات قلبها بعد دقايق طبيعيه وخفت الخوفه عندها...ورجع نفسها طبيعي...
ابو فواز:اسم الله عليج يبا شفيج؟؟ حلمانه...؟؟
اشجان:لا يبا سلامتك مافيني شي...
ابو فواز : الله يسامحج خوفتيني عليج..يلا قومي صارت الساعه 9 قومي درسي واكلي لج لقمه..
اشجان:خلاص يبا الحين الحقك....
طلع ابو فواز من غرفة بنته واهو مو مرتاح لطبيعة بنته...:معقوله بعدها تخاف..؟ بس انا اابوها...والله خايف عليها وبتم طول عمري خايف عليها...
قابلته عند الدري ام فواز:شفيك سرحان..؟
ابو فواز:ولا شي..سلامتج..
ام فواز:ويهك اصفر توك مافيك شي...
ابو فواز:لا عادي..بس احس بمغص ببطني شوي ويروح...
ام فواز:روح الطبيب..
ابو فواز:لا لا ماله داعي..يلا فمان الله...
ام فواز:فمان الكريم الله معاك...
اشجان:ياربي لي متى وانا على هالحال..اخاف حتى من ابوي لا يقرب صوبي..
بس والله مو بيدي...اااااه ياربي..حسبي الله على من كان السبب.....اووه هذي سراب نايمه عندي..متى ادخلت وشلون ماحسيت فيها...قربت لها وباستها واطلعت من الغرفه بعد ما غسلت وغيرت ملابسها.....
:
:
محروم
06-27-2020, 09:12 PM
صفط محمد السياره ونزل عند الشاطئ مكان بشار واليهال..وشافهم يلعبون ومستانسين وصوتهم واصل اخر الدنيا...
محمد:مرحبــــاااااااا
التفت الكل عليه:مراااااحب حياك...
ارفعت ريم عيونها كانت مندمجه باللعب مع فراس وخوله وشافت محمد يطالع فيها..ارتسمت ابتسامه عريضه على ويها وراحت تركض صوبه وطاحت بحضنه:متى ايت..؟ وشلون عرفت مكانا..
محمد:ماعلم سر...انتي شلونج حبيبتي..
ريم:مشتاقتلك...واحبك واااااااااااااايد...
بشار:تحبين محمد وايد وانا شنو؟؟؟
ريم:انت بعد وايد..بس هذا اخوي حبيبي...
بشار:لا بديت اغار..طول اليوم انا اراعيج واحط بالي منج..والحين تبين محمد..
ريم تخز بشار:روح روح العب مع اخوانك وووع..ابي اخوي حبيبي...
بشار:افااااااااا يا خاينه...هههههههه الحين صاروا اخواني وووع على قولتج.....
محمد ميت ضحك عليهم:صج مجانين..
ريم:الله شنو يايب معاك...؟؟
محمد:يبت لج العااااااااب حق البحر..واغراض من الجميعه اعرفج تحبين هالسوالف ..
تقرب ريم من محمد وتبوسه على خده:مشكووووووور..يلا تعال العب معانا..
محمد:لا حبيبتي روحي انتي الحين وانا بلحقج..شوي بس بكلم بشار اوكي..
ريم:زين بس لا تطول...يلا بااااااااي..وراحت تركض صوب فراس وخوله تلعب معاهم ..
بشار:عسى ماشر..شفيك؟؟؟
محمد:ولا شي...بس...... ويقطع كلامه صوت التليفون يرن..
محمد:الوو..هلا فيج قلبي...بخير الله يسلمج....انتي شلونج؟؟ الحمدلله...اي ... بس يا بدور ما يصير جذي..اوكي خلاص عطيني يومين افكر بالموضوع...اوكي مع السلامه..
بشار كان قريب من محمد وبسهوله يقدر يسمع المكالمه:محمد شفيك منت طبيعي..
محمد:بدور يا بشار..
بشار:شفيها..
محمد:ما تبي نسوي عرس.. وانا ماقدر ماسوي لها عرس..حرام هذي ليلتها لازم تفرح فيها..
بشار انغمت قلبه من هالسيره : زين براحتكم..
محمد:شنو براحتنا..تعال شوف لي حل...
بشار:مادري.ماعندي شي اقوله...
محمد:بشار لا تكون حياتك سلبيه..تعال عطني حل..اسوي العرس او لا..
بشار:وليش لا..سوه..وحاول تقنعها...
محمد:زين وانت ليش زعلان...؟؟
بشار:سلامتك..مافي شي...
محمد:انت وراك شي يلا تعال قولي..شعندك...
بشار:قبل سنه كنا انا ومنال نتكلم بنفس الموضوع اهي تبي العرس وانا مابي كنت مستعيل بس ابي اخذها..بس سبحان الله .. لا رغبتها ولا رغبتي تحققوا..شفت الدنيا شلون...؟!!
محمد:بس يا بشار لا تتذكر الي فات وحاول تعيش حياتك...لي متى راح تبقى على هالحال...
بشار:ليما اموت ان شاءالله والحق منال...
محمد:انت واحد مجنون..الله يخلف عليك....لا تجنني معاك...
بشار:يلا هانت..كلها اسبوع وتاركم..سنين مو سنه ولا سنتين...
محمد:وييييييييييين؟؟؟
بشار بضحكه خفيفه مالها داعي:بكمل دراستي بره وابعد عن الديره...
محمد:هذا هرووووووووب.....
بشار:سمه مثل ما تبي... براحتك...بس صدقني هذا افضل حل عندي...
محمد:بشار انت بعدك صغير..لا تظلم روحك وتعترض على حكمه ربك..انت جذي تعترض على موت منال..خلاص ترحم عليها ومليون بنت تتمناك...غير اختي...
بشار: انت مجنووووون..تبيني افكر بزوجه غير منال..؟؟ والله هذا اعتبره اخر يوم بعمري.وحرام اخذ لي وحده ما احبها ولا ابيها واعذبها معاي...خلني جذي مرتاح...
محمد:صدقني راح تلاقي الحب بعد الزواج...جرب منت خسران...
بشار:محمد سكر الموضوع انا منتهي منه..وبقولك شي قبل لا انسى...اذا سافرت احتمال ريم بترجع البيت تكفى حط بالك عليها تراها وصيت المرحومه.....
محمد:افاا عليك هذي اختي لا توصيني عليها..
بشار:انا خوفي كله من خالد..والا انت وسلطان ما ينخاف منكم...
محمد:بالعكس خالد تغير وايد بعد وفاة منال...وان شاءالله يتغير...بس اهو في شي هالايام
يسألني عن ريم دايم..ويقول رجعها البيت...بس يتكلم واهو معصب..لهجته تخوفني عليه..ما ادري شنو يبي وشنو يفكر فيه..
بشار:انا قلت لك..حط بالك عليها...وخلها عند عينك..موتتزوج وتنساها ترى مالها غيرك...
خلك السند لها بهالدنيا..منال كانت النور بحياة ريم والحضن الدافي والامان كله..بس الحين ريم تفتقد الامان...يعني خلك قريب منها...
محمد:لا توصي..بس الله يخليك فكر بموضوع السفر..وخلك عاقل..
بشار:الله كريم..يصير خير..
صارخت ريم بصوت عالي :محمــــــــــــــــــــد........؟؟؟؟؟؟؟!!!!!!
انتهــــــــت الحلـــــــقة...؟؟؟!!