الفصل 8
الحلقـــــة الثــــــامنه
بيت أبو محمد:
البيت هدوء كالعادة محمد يذاكر بغرفته وريم ومنال بالصالة وسلطان يلعب بالحديقة وخالد العناد والكره راكب راسه ويكره يتكلم مع احد في البيت، بس عنده صديق مقرب له وايد واسمه *ناصر*..ومع الأيام راح نكشف هذي الصداقة وأثرها على حياه خالد وريــم!!!!! ...
في دار محمد:
محمد قاعد يذاكر والشرود مالي كل وقته، كل ما يفكر انه يذاكر له حرف تذكر جمله بدور يوم تقوله *انا ما توقعتك انت و رفيجك تتمصخرون علي، وأسلوبكم الجارح ما راح أنساه لكم العمر كله...*
يتمدد محمد على سريره واهو مهموم:آآآآآآآه يا بدور والله حرام عليج الي تقولينه انا اتمصخر عليج، مستحيل أسوي جذي....! (بعد تفكير طويل) يا ربي شنو الحل شنو أسوي والله ذنب هالبنت في رقبتي لازم تسامحني وتغفر لي غلطتي..
ااااااه منك يا مبارك من يوم الي صار ما شفتك ولا سألت عنك والله أحس قلبي قسى عليك ولا اقدر أسامحك....
*يقعد على طرف السرير وينزل راسه * شلون ما أسامحه وأنا اطلب السماح من بدور؟شلون ما اغفر له غلطته وأنا ابي من يغفر لي غلطتي..؟
بس اهو الغلطان مو انا مو اناااااااااااااا.......
يقوم محمد من مكانه يبي يطلع من غرفته بس أسبقته منال وطقت الباب:محمد انت قاعد....؟؟
محمد واهو واقف مكانه ويحس روحه بتطلع منه ااااااه:حيااج تفضلي
تدخل منال وتشوف الجو الكئيب الي مخيم على أركان الغرفة والهدوء العجيب الي فيها والبهذله والأوراق الي ملت الدار يمين وشمال......
منال بضيق:ليش يا محمد كل هذا، ليش تسوي في نفسك جذي، إن كنت محتار ومهموم تعال عندي والله أشيل همك على كفوفي وأقول مرتاحة..بس رجيتك لا تتعب حالك أكثر من جذي...
محمد ينزل راسه ودمعه حايره تنزل من محجر عيونه من غير سابق إنذار:ااااااااه يا منال ااااااااااااه.....
منال تقرب من أخوها وتمسح دمعته:سلامتك من الاه يالغالي...والله إني حاسة فيك وكان بخاطري أي لك من زمان بس شسوي ريمي تو يلا نامت وسلطان ذبحني بسوالفه،بس الحين ما عندي غيرك انت وبس تعال اقعد وقولي الي كنت بتقوله أمس..
محمد يمسك أيد منال قبل لا تقعد:لحظه منال..
منال بابتسامة:أمرني..
محمد:وين خالــــد..؟؟
فجأة تختفي ابتسامه منال من ويها:......
محمد:ليش سكتي وينه..؟؟اشوفج اهتميتي فينا كلنا الا اهو ليش.؟
منال تقعد على سرير أخوها:يا محمد خالد ما يعطيني مجال اشوف حياته ولا اتدخل فيها وانت عارف أخوك ماله داعي اشرح لك من الأول...!
محمد يقرب من أخته:لا تحاتين صدقيني خالد الي مو عاجبج الحين راح يتغير مع الأيام وشوفي..
ترفع منال عينها على أخوها:اميييين يارب،بس انت بعد لا تضيع الموضوع وتعال اقعد وقولي كل الي عندك....
يتنهد محمد بقوه : يا منال انا همي بدا من يوم ما عرفت هالبنت،وزاد يوم عن يوم بعد الي صار لها والسبب انا ومبارك...وماني عارف شنو أسوي والله محتار..
منال:محمد إذا سألتك وبكل صراحة تجاوبني....؟؟
محمد حس بالي بتقوله أخته:أي بجاوبج..
منال:هذا الي انت فيه شنو تسميه؟؟ عطف وإلا حب وإلا تأنيب ضمير؟ وإلا شنو بالضبط؟
محمد تاه فكره ومو عارف شنو يرد لان أخته أجمعت له أكثر من شعور بسؤال واحد.....
منال:ادري انك محتار بس انا الي اشوفة إن اهتمامك في البنت كبير حيل وكل يوم يزيد ولو ماكان لها مكانه بقلبك ما سويت الي سويته، يعني بتقنعني إن لو زميله ثانيه صار معاها الي صار بيكون لك نفس الموقف...؟
محمد:لا ما اعتقد بس الصدفة الي جمعتني مع بدور و الزمالة الي كبرت بينا وحالتها المرضية خلتني أتعلق في هالبنت زود، أحس فيها طيبة قلب عجيبة، و أخلاق عالية واحترامها للغير يخلي الكل يحبها ويحترمها...بس بكل صراحة يا منال وبما انج أختي وصغيره مابي أدخلج معاي في هالموضوع ولا اتعب راسج فيه...
منال بنظره غريبه:: عشتو يا كبير..
محمد يبتسم:لا تخزين جذي ولا تغيرين الموضوع بخفة دمج أي انتي صغيره ونص..
منال:امممم تقدر تقول صغيره..!
محمد باستنكار:ليش عيوز عيل؟؟؟؟ اكيد صغيره....
منال:صغيره سن وكبيره قدر....!!!
محمد عافس حواجبه:ما فهمت شنو يعيني صغيره سن وكبيره قدر...؟؟؟؟؟؟؟؟؟؟
منال تتنهد وتمد ريولها في الارض حيل:يعني يا طويل العمر صج اني صغيره في عمري لكن الأوضاع الي رسمها لي ولكم القدر كبرني عشر سنين قدام...
محمد سرحان:..........
منال تلتفت على اخوها:وين سرحت...؟؟
محمد:سرحت بكلامج..!فعلا القدر يخلي من الصغير عووود...بس أحسن شي سواه القدر انه خلاج لي وعسى ربي لايحرمني منج...
منال بحسره والعبره خانقتها واكتمت كلامها في قلبها:خلاني لكم وانا من لي.....؟
***
محروم
06-27-2020, 08:41 PM
في المستشفى:
أبو فواز:طمني يا دكتور شنو صار معاهم...؟
الدكتور:الحمدلله حالتهم مستقره بس الولد تعبان أكثر من البنت...!
أبو فواز:شلون يا دكتور ؟ جراح شنو فيه بالضبط...؟
الدكتور:للأسف جراح شرب كميه كبيره من الماي والرئتين بدت تقل قوة ضخ الهواء فيها..ومع ذلك القلب دقاته سريعه ولازم نحاول السيطره على وضعه..
أبو فواز منهار من الي صار:لا حول ولا قوة الا بالله...أنزين دكتور بدخل أشوفهم الله يخليك...
الدكتور:مسموح لك تدخل بس لا تطول لان حالتهم ما استقرت ليما الحين...
أبو فواز:اكيد اكيد ما بطول...
دخل أبو فواز غرفة الملاحظة وأشجان وجراح اثنينهم في نفس الغرفة ويفصل بينهم ستار، وخلف هذا الستار جثث مرمية لا حول لها ولاقوه..
أبو فواز يقرب من جراح ويحرك الستار عن سرير أشجان وقلبه متقطع على الي صاير اشجان وجراح الصبح يلعبون ومستانسين والحين اثنينهم في نفس الدار يصارعون أقدارهم.... لا يا بو فواز شنو الي تقوله اشجان وجراح بيعيشون....بس ااااااه يا جراح شقول لأبوك اذا سألني عنك شقول لأمك المنهارة شقول للناس لو صار فيك شي ولد اختي وما حميته..؟؟؟ *يا رب عفوك و رضاك، يا رب اشفيهم وعافيهم، *
طلع أبو فواز من غرفة الملاحظة وباله مع بنته وولد اختة...والمصير مجهول والخوف على حالة جراح اكبر وأعمق من حاله أشجان، لان هذا الي الله كاتبه...
وان شاءالله بقدرة رب العالمين ينجون من الخطر اثنينهم..
أم راشد وأم فوز تموا في المزرعة واليهال معاهم، وقلوبهم تشتعل نار على اشجان وجراح...ومحد عارف شنو الي صار معاهم وراشد مع خاله في المستشفى...
راشد:خالي لازم نتصل على أمي وعمتي ونطمنهم.حرام تركناهم من غير خبر ..
أبو فواز متسند على الطوف:آآآه يا راشد شقولهم ؟؟والله ماني قادر احط عيني في عين أمك وخالتك...
راشد:خالي طول بالك،وان شاء الله جراح وأشجان مافيهم الا العافيه..
أبو فواز مستغرب الصبر الي على راشد شلون قادر يستحمل وأخوه حالته صعبه..أكثر من اشجان بعد...
راشد:خالي انت خلك أهني وأنا بروح اطمنهم..
راح راشد واتصل على أمه:
أم راشد:هلا يا راشد طمني؟....
راشد:لا تحاتين يا يمه جراح بخير وأشجان بعد مافيهم الا العافيه وان شاء الله عن قريب يطلعون من المستشفى...
أم راشد تبجي:.......
راشد:لا يا يمه ما يصير الي تسوينه هذا.. ليش البجي..؟ اقو لج أنهم بخير ومافيهم شي..لا تكبرين الموضوع...
تاخذ السماعة أم فواز وتكلم ولد أخوها:يمه يا راشد شصاير أمك ليش تبجي طمني.؟
راشد:خالتي صدقيني مافيهم شي انتوا بس ادعوا لهم إن الله يقومهم بالسلامة..والله كريم إن شاء الله..
أم فواز بحزن:اللــه كــريم يا يمه الله كريــم إن شاء اللــه....
**
عند فواز وفجر الي كانوا ميتين خوف ومو عارفين شنو يسون لو عرف أبوهم بالي سوه في اشجان وجراح..
فجــر بخوف:فواز الحين شنو نسوى...؟
فواز معصب:ما نسوى شي خلاص سكتي..
فجــر:شنو اسكت انت تدري لو أبوي عرف أو حتى أمي شنو راح يسون..؟
فواز:وليش انتي أول مره تدرين إن اشجان ما تعلم احد بالي نسويه فيها..دايم نطقها ونخوفها واهي ما تعلم احد لأنها تخاف من عندي وعندج...
فجــر بخبث:أي والله صج...(تتذكر) بس فواااااز جراح...جراح أكيد بيعلمهم..
فواز مصدوم:امبييييه انا نسيت جراح، وهذي المشكلة جراح إذا أسألوه أكيد راح يعلم علينا مافيها روح وتعال..
فجــر تبجي:يا ربي مابي أبوي يهاوشني وإلا يطقني....
فواز يلتفت عليها:والله انتي ياهل قومي عني وفكيني من ويهج...
فجر بعصبيه:انا راح أقوم بس انا مالي شغل انت الي حذفتهم بالماي مو انا انت .......!!
تم فواز قاعد بروحه ويفكر بجذبه يديده يقدمها هديه لأبوه إذا أسأله عن الي صار...بس مالقى حل غير انه يسكت وينتظر الي ببصير....
*
*
محروم
06-27-2020, 08:41 PM
في بيت أبو فواز :
أبو فواز:يا أم راشد لا تحاتين صدقيني العيال بخير بس انتي ذكري ربج..
أم راشد تبجي:شلون اهدأ وولدي بالمستشفى،شنو أقول لأبوه باجر لو سألني عنه.؟
بقوله إني أهملت ولدك ليما غرق؟؟ أقوله ماني قد المسؤليه الي حملتني إياها..؟ *وترجع تبجي*
يقرب أبو فواز من أخته ويلمها بحضنه ويواسيها:بس يالغاليه لا تبجين، والي الله كاتبه لازم يصير وأنتي ايمانج بربج قوي...والحمد لله جراح ريال ما ينخاف عليه.. انتي بس شدي حيلج شوي وباجر من الصبح باخذج وتشوفينه...
ترفع راسها:وأبو راشد شنو أقوله....؟؟
ابو فواز:لا تحاتين انا بقوله انتي ما يهمج شي..
فواز وفجر يراقبون الوضع من بعيد والخوف بيوقف قلوبهم..بس ما ينخاف عليهم ذيابه كل مصيبة أهم وراها لابد يطلعون منها بالساهل بس هالمره خوفهم أكبر من كل مره...لان جراح احتمال يعلم عليهم إذا صحــى..
اليوم الثاني الصبح..في المستشفى..
راح أبو فواز و أخته و مرته يتطمنون على حال عيالهم....وأم راشد دموعها كانت تسبق دقات قلبها وخطواتها ليما وصلت باب غرفه جراح...طبعا فرقوهم لان جراح دخل العناية المركزة وأشجان في الجناح حالتها مستقره..
أم راشد أشهقت يوم شافت جراح وحطت أيدها على قلبها:شفيييييييه...؟؟
أبو فواز مرتبك:لا تخافين هدي اعصابج مجرد ضيق تنفس.....!
أم راشد تقرب من أخوها وتحط عينها بعينه:جراح راح يموت صح....؟
أبو فواز يفتح عيونه :ذكري ربج يا دلال شنو هالكلام الي تقولينه...؟؟
ام راشد(دلال) تبجي وتأشر على ولدها:شوف الاجهزه والوايرات الي تارسه المكان شوفها ، شوفها يا خوي شوفها..جراح لو مات انا أموت من بعده جراح ولدي يا ناس ولدي....
أبو فواز يهدي على أخته: تكفين ذكري ربج ما يصير الي تسوينه خليج قويه...
أم راشد:لا اله إلا الله...بس قولي شنو فيه...
أبو فواز متألم لحال أخته:بصراحة يا أم راشد جراح عنده الرئتين تعبانه شوي بس لا تحاتين صدقيني الدكتور طمني وبشرني خير...
أم راشد حاطه أيدها على حلجها وتبجي:يا حبيبي يا جراح... وتحضن أخوها تبي تحس بالأمان تبي ترتاح تبي تطمن إن الدنيا بخير وان ولدها لابد بيرجع لها....
أبو فواز يهدي على أخته ويطمنها...وأم فواز برودها اتجاه بنتها وقسوتها الي مالها سبب تزيد من بعد اشجان عنها و نفورها ,بس اشجان محتاجه أمها محتاجه حنانها وعطفها...بس للأسف ام فواز تعامل هالطفله بكل قسوة، إذا غلطوا فجر وفواز اشجان الي تتعاقب واذا زعلت اشجان محد يواسيها غير ابوها وجراح طبعا صديقها الوحيد الي قدر يجاريها ويحسسها بالامان برغم طفولتهم البريئه ...
***
راشد:الحمدلله على سلامتك يا يبا تو ما نورت ألديره..
أبو راشد:الله يسلمك يالغالي شخبارك وشخبار أمك وإخوانك...وينهم ليش محد معاك..؟
اختبص راشد وتوتر:بخير يبا بخير...يلا نروح الحين ونتكلم في الطريج..
أبو راشد مو مرتاح لكلام راشد وحس انه فيه شي...
في الطبيب....
وصل أبو راشد ودقات قلبه وخوفه تسبق خطواته وأنفاسه لغرفه جراح..
أبو راشد:طمنوني شنو فيه جراح شصاااار......؟؟؟
أبو فواز:الحمدلله على سلامتك يا بو راشد..وطول بالك يا ريال مافيه إلا العافية..
ما يصير الي تسونه لاتفاولون على الولد..
أبو راشد ماسك جتف أبو فواز:أرجوك طمني شنو الي صار...؟
أبو فواز يهدي على ولد عمه:والله مافيه إلا كل خير..صدقني الدكتور طمني وباجر إن شاءا لله بيطلع من العناية بس طول بالك..حتى بنتي بالغرفه الي يمه..يعني اثنينه بنفس المصيبه بس لازم نذكر الله...
أبو راشد:لا اله الا الله..بس منو الي سوى فيهم جذي...؟
أبو فواز:مو وقته هالكلام نرجع البيت ونعرف كل شي...
**
محروم
06-27-2020, 08:42 PM
عند بشار وبالتحديد نادي الفروسية...
كنت على ظهر الفرس أتدرب بس بالي مع الي سحرتني بجمالها وكلامها ونظراتها ودلالها وكل شي فيها...حلوه وصغيره وكبيره بعقلها الله يخليها لاخوانها ...لا شنو لاخوانها ولي انا بعد(يضحك على نفسه)هههههه وربي إني استخفيت بس شسوي مو بيدي أموت من الحب أفضل من إني أموت من النكد والحزن...وما في احلى من الحب...ومو أي أحب .. انا حبيت لي دانه الله سخرها لي بس ليش عذبت نفسي بحبها من الحين واهي بعدها صغيره وأكيد تبي تكمل دراستها وتربيه إخوانها..
بس مالي شغل الجمال الي شافته عيني والأخلاق والزين مستحيل يروح لغيري لو تموت....
بس انا ليش أتم ساكت صار لي أسبوع ما أدري عنها خل أطرش لها مسج يمكن تلتف لي شوي وتحس بحبي لها....انا بطرش والي فيها فيها ماني قادر استحمل...
منال بغرفتها تنوم ريم وتذاك دروسها وتنبته لصوت التليفون يعلن عن وصول أول بداية الحب ونهايته من بعد هالايام...
فتحت الرسالة وكانت صدمتي ما تنوصف بشار الي أرسل لي...
ذكرتك والدروب اللي تعانق خطوتك بسكات
انــا مـازلـت أسـافـر بـيــن نـظـراتـك وكلـمـاتـك
وانـطـفــآ جــمــر الــســلام وذابــــت الـشـمـعــات
ذكـرتــك واستـفـزيـت مــــن شــــوق بـسـمـاتـك
انــــت فــــي راحــــة وأنــــا أقــولـــك هـيــهــات
انـــا لاجـيــت ابـرتــاح تـطـاردنـي بـنـظـراتـك.
مازلت بحيرتي وخوفي وتوتري من الي قريته،أحس الدنيا تلعب فيني أحس تبي تنتغم مني،تبي تبعدني عن ريم وعن إخواني..ليش هالا حساس ما ادري،وبعد انت يا بشار لا أرجوك هني وينتهي كل شي....أحسن شي خل أرد عليه....
؛؛؛
يفز بشار على صوت ألمسج وما كان متوقع منها إنها ترسل له...وانصدم من قرى المكتوب
أنا. قلّب
عجزّ لا.. / يفهمهـ / .. إنسان..
يعطِيّ..
الناس.. گل الحُبّ ويآخذ منهم..
| الحرمان | ..!!كل علامات التعجب والاستغراب صارت فوق راسي ولا فهمت الي قالته بس ليش تقول جذي..؟
معقولة أنها تقصد وإلا بس مجرد كلام وإنقال.....
منال تستلم:
منال ممكن سؤال وتردين علي بكل صراحة....
ليش تقولين هالكلام وليش الحرمان؟ ارجوج فهميني...
منال تضحك واهي مهمومة:هههههه يا حليلك يا بشار شنو تبيني أقولك وبعدين لا ما راح أرد عليه عشان ما ياخذ ويعطي معاي في الكلام خل اسكر الموبايل واروح انام احسن لي....
قبل لا اسكر اليتات سمعت الباب ينطق فتحته وشفت محمد واقف ورا الباب وخوفني شكله:محمد شفييييييك......؟؟
محمد يتكلم بكل حزن وضيقه:بدوور...
منال خافت:شفيهااااااا...؟؟؟ تكلم....
يدخل محمد الغرفه ويقعد عند ريم ويوجه الكلام لمنال:ما أدري وينها...
منال مستغربه ومو فاهمه شي:محمد شنو تقول يعني شنو ما تدري وينها...
محمد يتنهد بقوة:رحت لها اليوم المستشفى بس ما لقيتها وسألت عنها قالوا لي إنها طالعه من أمس...وكل ما اتصل فيها ما ترد.....*امبيه توهقت معاها انا مو قايل لها اني اكلمها...*
منال تخزه بخبث:أوكي حبيبي دامك تكلمها معقوله ماتعرف عنوان بيتهم روح واسأل عنها....
محمد منحرج من أخته:منال تكفين لا تتمصخرين علي مو وقته،حسي فيني شوي...
أسكتت منال وحست بضيقة أخوها وجديه الموضوع:اسفه يا خوي بس اذا تبني أساعدك اقدر بشي واحد بس...
محمد بلهفه:قولي شنو ....؟ وشلون تقدرين تساعديني...؟
منال:سمعني يمكن اهي متضايقة منك وزعلانه وماتبي تواجهك..عطني رقمها وخلني اتصل من تليفوني يمكن ترد..
محمد:أي والله فكره تكفين حاولي...
أخذت الرقم من محمد وقعدت اتصل عليها أكثر من عشر مرات بس للأسف ما ترد علي...وهذا الشي الوحيد الي اقدر أسويه...
محمد:ااااااه والله عندي إحساس انه صار معاها شي...
التفت عليه وكأني تذكرت شي:محمد....
يرد عليها بكل برود:نعم....؟
منال:مبارك...؟
حسيت بكهربا سرت بجسمي من اذكرت اسم مبارك وأحس لساني انشل وماني قادر أقول كلمه:شفيــــه..
منال بعتب: ليش ناسي رفيجك طول هالفتره..؟ واهو اقرب إنسان لك...لا تخسر رفيج عمرك عشان ضحكه وسالفة اطلعت من غير قصد...
نزلت راسي وأنا اسمع الكلام وأحس دموعي تنهال من عيوني وماني قادر أسوي شي أحس اني مكبوت والضغط ذبحني بدور من جهة ومبارك من جهة بس شسوي شسوي...
منال:محمد لا تبجي يا خوي فديتك لا تبجي ما بي أشوف دموعك انا أبيك تكون السند لي ابي أتعلم القوه منك واني ما انزل دموعي في هال دنيا إلا على الي يستاهل وهذي الدنيا لازم نتعلم منها حرام الي تسويه في عمرك والله حرام...
رفعت راسي وحطيت عيني في عينها بخاطري احد يلمني بحضنه مثل ما كانت أمي تسوي معاي إذا احتجت لها بخاطري ابجي وأنام على صدرها..حسوا فيني فقدت رفيجي وحبيبتي أي حبيبتي والله حبيبتي...وأنا الفظ أخر كلماتي حسيت بذراع منال تلمني على صدرها وتمسح على راسي وكأنها حست بالي انا فيه حست اني محتاجها محتاج لحنان أمي لا تستغربون هالكلام والله الي فقد أمه حياته صعبه الله لا يواريكم يوم مثل هالايام الي انا عايشها...
صحيت اليوم الثاني واستغربت المكان الي انا فيه التفت يمين ويسار وأخيرا استوعبت اني نايم بسرير منال فزيت بسرعه بس ما لقيت احد بالدار لا منال ولا ريم طالعت الساعة:يووووه الساعة 8 وربع الصبح تأخرت على الدوام...
قمت بسرعه وأخذت شاور سريع وطلعت من الحمام وأنا أنشف شعري من الماي وانتبهت على ورقه موجوده بين تليفوني وبوكي...فتحتها وكانت من منال..
*صباح الخير يالغالي نوم العوافي،إذا قعدت وصحصحت اتصل على رفيجك مبارك ولا تقسي قلبك عليه أكثر من جذي...ولا تستغرب من كلامي لأني أشوفه أكثر من مره يوقف عند باب البيت ويروح أكيد يبيك بس مو عارف شنو يقول لك..أرجوك إذا تحبني وتعزني روح له وتراضوا وبدور انا الي راح ايب لك إخبارها لا تحاتي...
وقبل لا اروح احب اقولك اني اموووووووت فيك وياخي حبني كثر ماتحب بدور هههههه اضحك معاك....
مع السلامه*
؛؛
أشجان صحت وحالتها استقرت الحمد لله وجراح مازال بالعناية المركزة لان الرئتين تعبانين عنده ويحتاج علاج ورعاية أكثر..
دخل راشد وعلي يتطمنون على حالته اشجان بعد ما كانوا عند أخوهم بس أشجان كانت بروحها بالغرفة محد معاها....
راشد+علي:السلام عليكم ..
أشجان ترفع راسها:وعليكم السلام.... خالي راشد وينك..
راشد مستغرب من كلمتها...خالي راشد..!!!!!!!!!
علي يضحك ويطق جتف راشد: من قدك صرت خالها وانت ولد خالها....
قربت من أشجان ولا رديت على الخبل عليوي:حبيبتي انا موجود ما رحت مكان بس انا ولد خالج مو خالج..قلت الكلمه واحس إنها كبرتني عشرين سنه جدام.. بس ردت فعلها سكتتني وما قدرت أرد عليها...
أشجان:بس انت كبير يعني نفس خالي يعني انت خالي...
علي يضحك:خلاص خالج خالج وانا شنو ..؟
أشجان:انت لا انت صغير بس خالي راشد كبير....
أسكتت أشجان وأرجعت اطالعني ولمحت الدمعة بعينها:حبيبتي شنو فيج...؟
قطع قلبي منظرها لميتها على صدري وحسيت بحراره دموعها تغلغلت فيني...
ردت علي واهي تشهق من البجي: الله يخليك خالي لا يموت جراح اهو يحبني وما يخلي فواز يطقني الله يخليك انا ابي أشوفه اهو كله يقول انا ما راح أخليج ليش يبي يروح ويخليني..
صدمني كلامها وعلي تم واقف ويطالع فيني ودموعه على خده من كلامها,, اشجان خايفه على جراح وخوفها وطفولتها اهم الي يخلونها تقول هالكلام...
رفعت راسها عن صدري وكلمتها:شوشو حبيبي جراح زين ومافيه شي وإذا شافج تبجين راح يزعل منج..انتي تبين جراح يزعل..؟
ردت علي واهي تمسح دموعها:لا..
قلت:خلاص عيل لا تبجين ولا تقولين جذي جراح ما راح يموت واهو يحبج وايد وكله يقول اشجان حلوه وطيبه،يالا حبيبتي مسحي دموعج الحين ولا تخليني ازعل انا منج بعد..
قربت مني وباستني على خدي بكل برائه وعفويه:احبك خالي..
علي:وأنا ليش محد يحبني ولا يبوسني ولا يقولون لي خالي خلاص انا زعلت وما راح أرضى مالي شغل..
تضحك عليه اشجان وتسوي له بوسه بالهوا:هذي حقك...
وارجعت نزلت راسها مره ثانيه:بس فواز وفجر ما يحبون جراح وما يحبوني وكله يطقوني ، انا ما احبهم وبس يطلع جراح انا ابي أقوله اني أسفه لأني العب معاه وفواز يطقه..فواز ما يحب جراح ويبي يموته عشان انا ابجي.اهو دزه داخل الماي عشان يموت انا ما أحبه وما أحب فجر وما أحب ماما بعد...
انذهلت من الي قالت أحس أنها مو بوعيها شلون تقول جذي ليش ما تحب أمها ولا إخوانها حاولت افهم منها شي لكن صدمتتي بالي قالته اكبر من كل الكلام الي أبي أقوله,,طفله وتعاني من أمها وإخوانها عيل شنو نظرتها للعالم..بس ليش عمتي قاسيه معاها ..
علي:اشجان حبيبتي قولي حق بابا أحسن...
خافت اشجان من كلام علي وقامت تصارخ:لا الله يخليك لا تقول حق بابا بعدين فواز يطقني ويعلم ماما وأطقني انا ما ابي احد بس ابي جراح حرام يموت جراح يحبني وما يطقني نفسهم....
راشد يكلم علي:خلاص يا علي اسكت ومالك شغل انا بعلم أهلي بس لا تخوف البنت حرام كافي الي هي فيه..وبعدين صج وين عمتي عنها انا ما شفتها تزورها بس خالي رايح وراد وعمتي وعيالها ولا كأن في شي...شنو مو بنتهم هذي...
انا كنت لام اشجان بحضني وعلي راح عند جراح يتطمن عليه ودخل علي خالي أبو فواز وفهمته الموضوع كله وان فواز وفجر أهم السبب بس لا زم يحمي اشجان منهم لأنها خايفه وايد..ووعدني انه يتصرف ويلاقي حل لها لمشاكل...
**
بشار:مو معقولة ليش ما ردت علي ولا اهتمت للسؤال بس انا متأكد إنها تعني شي من الي قالته...انا حاس إنها تقصد عشان جذي ما ردت علي بس وراسج يا منال لازم اعرف كل شي..انا حبيتج خلاص ومستحيل أتخلى عنج..واليوم لازم أشوفها بأي طريقه كانت..
في بيت أبو محمد :
منال:كنت قاعده في الحديقة ومعاي ريوم وسلطان بعد الغدا الجو كان حلو وحبيت أغير جو معاهم شوي ومحمد بالجامعة كالعادة ما يخلص إلا العصر،لكن الي فاجأني وجود بشار في هاللحظات...
بشار:السلام عليكم ..
منال مصدومة:وعليكم السلام يا هلا....
الحمدلله اني لابسه ملفعي قبل لا اطلع هذا الولد عليه حركات ما اعرف من وين دخل وشلون وصل للحديقه...
بشار:شخبارج منال وشخبار ريوم والشباب..؟
منال بتوتر:بخير الله يسلمك انت شخبارك...؟
بشار بنظرات عتب:بخير ....
خزيته وكأن عنده كلام بيقوله:بشار تبي محمد...؟
جاوبني بعد صمت ثواني:لا....
استغربت من ردت فعله:عيل منو تبي....؟
التفت علي وجاوبني بسرعه:ابيج انتي.
.
صدمني بكلمته يعني شنو ابيج انتي قلت وأنا أوقف:بشار مابيني وبينك كلام استأذن الحين...
فاجأني بحركته السريعة وأيده الي قبضت علي أيدي بكل صلابة:منال صبري شوي..
رديت بكل عصبيه:بشار مو من حقك..أرجوك ابعد عني..
وخر أيده بكل استسلام وقال هالكلمتين:انا اسف فمان الله...
طلع من البيت واهو مكسور الخاطر مهموم من الي سويته وردت فعلي عليه،ماهان علي منظر بشار واهو زعلان ومتضايق.بس شسوي مابي ينجرف ورى الحب وينسى ظروفي ينسى اني مستحيل بيوم أفكر بالزواج وابعد عن ريم....ااااه من ريم مسكت ريم وحضنتها بكل قوتي مابي غيرها ابي الله يحميها لي ويخليها ولا يواريها الحزن بيوم..وأنا مستعدة أكون لها ألام والأب وكل الي تحتاجه...
وصل محمد الساعة 3 العصر وكنت انتظره عشان نتكلم في الموضوع..
محمد:مرحبا...
منال:هلا وغلا مرحبتين...
محمد بتعب:هلا فيج ليش مو نايمة العصر اليوم..؟
منال:شلون أنام وأنا انتظرك..
محمد بقلبه:دام تنتظرني لازم اقعد معاها شوي..:أمريني يا قلبي ....
منال:ما يا مر عليك ظالم... بس طمني شنو صار...؟
محمد واهو يحذف الكتب على الكنبة:ااااه تقولين الأرض انشقت وابلعتهم لا بدور ولا مبارك دورت عليهم وما لقيت اتصلت ولا احد يرد...شسوي مابيدي شي أسويه...
منال واهي تواسي أخوها:محمد فديتك لاتقول شنو بيدي أسوي لا تضعف من البداية قوم وروح حق مبارك في بيتهم صدقني ينتظرك وبدور لابد أي اليوم الي ترجع فيه وقول منال ماقالت...
محمد:يا ليت يا منال يا ليت.........
منال:لا تخلي همومك تنسيك شلون تتصرف تذكر إن مبارك رفيجك الوحيد الي تعزه وتغليه تذكر هالشي..ولازم تروح له البيت لازم....
تركته بعد ما قلت الي عندي ورجعت غرفتي وبالي مشغول مع بشار والي حصل بينا مابي أعذبه ولا أضايقه وأنا اعزه واحترمه بس ما اعتقد اني الانسانه الي اقدر أريحه واهنيه...
***
بشار : كنت قاعد في غرفتي مهموم أتذكر الي حصل حتى ماعطتني مجال اتكلم ولا اقول الي عندي أرفضتني من البداية ،تجاهلت وجودي من أول الطريج ليش يا منال ليش تسوين جذي......؟؟؟وأنا مابين أمواج الغضب والاستنكار تعلن نبضات دماغي الاستسلام للنوم والتعب بس فززني صوت التليفون يوم شفته...الرسائل الوارده2...
فتحتهم وأنا مالي مزاج افتح عيوني بس الي شفته خلاني أوقف على حيلي مو بس افتح عيوني....
م€‘ ليتك وهم .. وأعاملك مثل الأوهامم€‘
الرسالة الثانية:بشار سامحني على الي سويته اليوم بس والله مو بيدي
واتمنى انك تفهم قصدي في المسج الاول....
استغربت من الكلام شنو وهم وشنو الي افهمه والله بديت اتمسك فيها أكثر ليش كل ما أحس برفضها اتمسك فيها أكثر،في شي مانعني أفكر في غيرها،اهي خذت كل تفكيري وحياتي ... بس كل شي مع الأيام يلين ويتغير والحين ماراح ارد عليها...وأكيد كل شي مبهم راح يوضح عن قريب....
انتهت الحلقة...