الفصل الثالث
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *دموع.تبتسم.tt* 🥹🩵
*❴🔢❵☟الـــبـــــــــــ❴3️⃣❵ــــــــــــارت☟*
➖➖➖➖➖➖➖➖➖
*
*
*❴📚❵↵*قصص وروايات عالمية📚💙*
الكاتبه /ميلام
➖➖➖➖➖➖➖➖➖
#الجزء الثالث.
حاول ابراهيم يقنع امو بس ماقبلت بمرام
وسكرت عليه الطريق من اولو
تاني يوم حكت معو مرام وقاللها انو لسا ماخبر امو
باليوم التاني رجع حكا ابراهيم مع امو وابوه وخواتو كلهن كانو موجودين
ابراهيم. طيب اعطيني سبب مقنع انو ليش مابدك ياها
ام محمد. هيك قلتلك الف مرة من القرايب مستحيل اخد
ام محمد كانت ماخدة لأبنها الاول بنت اخوها يعني بنت عمها لمرام
وصار مشاكل كتير لانو قرايب وتزاعلت هي واخوها ومابدها تعيد نفس التجربة لانو شافو كتير من كنتهم الاولى
ابراهيم. بابا احكيلك كلمة
ابو محمد. تسطفل منك لأمك بس اذا بدك رأيي لا تقرب من القرايب شفت كيف انذلينا بالمشاكل الي صارت معنا بسبب القرايب
وهلأ بدك تاخد من قرايبك بعد ما شفت بعينك كل شي
ابراهيم. بابا كل شي لحال هي غير وهي غير ماكل البنات متل بعض وانتو بتعرفوني منيح وبتعرفو اني غير عن كل اخوتي
ولو كلهن تخلو عنكم انا مستحيل اترككم لحظة
ام محمد. هاد الي بدي وصلك ياه لأنك انت غير حابة زوجك وحدة تهنيك وتسعدك مو من القرايب اول يوم تجي وتجيب المشاكل معها
حب مين مابدك بس ابعد عن القرايب لان انت الك مكانة خاصة بقلبي وغالي علي مابدي اخسرك اكيد فاهم علي انت
ابراهيم. يا امي مشان الله بشو احلفلك انو مرام غير بعدين هي لساتها صغيرة وبتصير متل مابدك
ام محمد. هي مرت اخوك جبناها كان عمرها 15 سنة بس ماخلصنا من المشاكل
ابراهيم. مابالضرورة كلهم يكونو متل بعض
بعدين هي اخي احمد تزوج البنت الي اختارها هوا
ام محمد. لأن احمد شاف مرت اخوك كيف لهيك ماقرب ع القرايب وراح حب بنت جيرانا وتزوجها وشوف كيف مبسوط معها
ابراهيم. وانا ماباخد غير مرام
ام محمد. مرام انساها واليوم انا وخواتك بنشوفلك بنت غيرها واكيد رح تعجبك
ابراهيم. لا والف لا والله لو ببقى بلا زواج ماباخد غيرها
ام محمد. تسطفل انك تبقى بلا زواج اهون علي من اني اخدلك من قرايبنا
ابراهيم. يا امي مشان الله ماظل الا خمس ايام يعني شو اعمل لحتى تقتنعي
ام محمد. اليوم بنشوفلك بنت غيرها لا تخاف مابتروح الا لتخطب
ابراهيم. عم بحاكيكي من الشرق بتحاكيني من الغرب
ام محمد. مرام لا مابقى تفتح موضوعها انا لحد هلأ عم بحكي حكي
الله يرضا عليك مابدي وجع راس
ابراهيم. لك بحبها بحبها ليش ماعم تفهميني
ام محمد. حب الي رح تكون مرتك وام اولادك بالمستقبل مو تحب وحدة من المستحيل اني اخدلك ياها
ابراهيم. هاد اخر كلام
ام محمد. اي اخر كلام
ابراهيم. طيب بس يكون بعلمك غير مرام ماباخد لو بظل عزابي
ام محمد. اي خليك عزابي الي ببيت اهلو ع مهلو
تركهم ابراهيم ومشي
نور. ماما والله حرام بحبها
ام محمد. انتي يا نور عم تحكي الحكي هاد مو انتي بزمانك قلتي مابقى نقرب ع القرايب ومن هالحكي
ولا ناوية كمان تخسري اخوكي التاني
نور. والله بعرف وفاهمة عليكي بس هو حبها شو نعمل يعني
ومرام رفيقتي ورح تصير منا وفينا اكيد
ام محمد. ماتتأملي كتير
ابو محمد. زوجي ياها وخلصنا اذا هوا هيك بدو
ام محمد. شو انا مجنونة لعيد التجربة
بعد مرور 3 ايام ابراهيم فتح الموضوع مع امو وكانت رافضة تماما حتى ماناقشتو
فقد الامل ابراهيم من انو يخطب قبل ماتخلص اجازتو
قبل مايرجع بيوم راح لعند بيت خالو وصارتلو فرصة انو يقعد مع مرام وكانت ستو موجودة
مرام. كأنك اجلت فكرة الخطبة
ابراهيم. اي بصراحة حسيت حالي متسرع بتعرفي ليش
مرام. ليش
ابراهيم. لانو لو خطبنا هلأ كنت رح قضي كل فترة الخطبة بالعسكرية ومارح يصحلي شوفك لان مابقا اجي اجازات
لهيك اجلتها لبعد التسرح انتي شو رأيك ؟
مرام. اي حكيك مزبوط وماتخاف انا مستحيل اقبل بغيرك
ابراهيم. طيب اعطيني ايدك
مرام. مافهمت عليك
سحب ايدي وطال من جيبتو محبس ولبسني ياه
مرام. شو هاد
ابراهيم. هلأ صرتي خطيبتي
مرام. هههههه مجنون
ابراهيم. ههههههه ماتشلحيه من ايدك
مرام. وشو بقول للعالم ازا شافوه وباركولي وسألوني مين العريس
ابراهيم. قوليلهم بعد شهرين وعشرين يوم بتعرفو مين هوا
مرام.اممممم اي بصير
ابراهيم. مابدك تشربيني قهوة لحتى يجو اخوتك
مرام. اي تكرم عينك
ابراهيم. الله يكرمك
دخلت ع المطبخ لأعملو قهوة وقرب من ستي وقعد جنبها
وحكالها انو سبب تأجيل الخطبة انو امو مانها موافقة وقالتلو انو لا يهكل هم بس تشوفها رح تحكي معها وانو ابراهيم ومرام مارح يكونو غير لبعض
المسا في بيت ابراهيم
ام محمد. ابراهيم تعا بدي احكي معك
ابراهيم. بشو
ام محمد. من ايمتا انت بترفضلي طلب
ابراهيم. ماعاش الي بدو يرفضلك طلب
لك انتي بتأمري ما بتطلبي
ام محمد. انت بس شاطر بالحكي بس وقت الجد ع الفاضي
ابراهيم. له يا غالية والله طلباتك اوامر قوليلي شو بدك
ام محمد. يعني اطلب واكيد مابتخجلني
ابراهيم. والله من عيوني شو ماكان طلبك
ام محمد. بدي تنسى مرام وتوافق انو شوفلك بنت غيرها تنسيك ياها
سكت شوي ابراهيم واتطلع بأمو
ام محمد. شو تراجعت ؟
ابراهيم. ماكنت متوقع انو الموضوع بخص مرام
توقعت بدك مني شي جبلك ياه او
ام محمد. يعني تراجعت عن كلامك
ابراهيم. يا امي موضوع مرام منتهي بالنسبة الي لأن مارح اخد غيرها
ام محمد. مرام مستحيل تصير كنة الي
ابراهيم. ع كل حال انا هلأ اجلت الموضوع لأتسرح بيفرجها الله
ام محمد. يكون بعلمك حتى لو تسرحت مرام مستحيييل
ابراهيم. طيب خلص خلينا نسكر ع الموضوع
راح ابراهيم ع غرفتو وهوا متضايق ومحتار كيف يقنع امو
بحياتو مارفضلها طلب او زعلها او سمعها كلمة مو حلوة ابراهيم شخصية نادرة جدا ومافي متلو اتنين
حنون وبحب كل الناس وبحب اهلو كتير
مميز بكل شي حساس جدا حلوووو كتير
اجتماعي وهادي ورومنسي لأبعد الحدود
كتير بنات حاولو انو يكسبو قلبو بس ماكان بدو الا مرام لأن حبها بصدق
خلصت اجازتو لأبراهيم وراح
تاني يوم راحت امو واخواتو لعند بيت اهلها لمرام
مرام واخواتو لأبراهيم طلعو ع الجنينة
وبالبيت كان عندهم عمها ابو قاسم ومرتو
تفاجئو كلهم بحكي امهم الي هي ستها لمرام
حتى ام محمد ماكانت متوقعة هيك حكي
ستها ام خليل. ام محمد
جميلة. نعم يمى
ام خليل. الله يرضا عليكي بس ليش مابدك تزوجي ابراهيم لمرام
اتفاجئو الكل بحكي ام خليل وام محمد ماعرفت ترد
ام محمد. والله يا يمى ابراهيم هلأ شال فكرة الزواج من راسو
ام خليل. بس الشب بدو ياها للبنت
ام محمد. ليش مين حكالك هالحكي مرام يعني !!
ام خليل. لا مرام ولا بتعرف اصلا انو مابدك ياها
ابنك هوا الي قلي احكي معك واقنعك
ام محمد. مين قلك اني مابدي ياها لمرام
بس انتي بتعرفي كل شي صار معنا و
ام خليل. بس اسكتي الشب والبنت بحبو بعض لا توقفي بطريقهم
بعدين هي بنت اخوكي مو غريبة
ام محمد. بعرف اني مابلاقي احسن من مرام لأبني
ام خليل. لكن خلص اتوكلي ع الله
ام محمد. ان شاء الله
ام محمد اتضايقت لان الكل عرفو بالقصة وصارو الكل يسألو عن علاقة ابراهيم بمرام
والكل عرفو هلأ شو بدها تعمل
رجعت ع البيت
ام محمد. امي حطتني بموقق مخجل كتير
الله يسامحك يا ابراهيم
ابو محمد. ليش شو صار
ام محمد. انا مرام مابدي ياها لأبني من اليوم رح دورلو ع بنت واطلبلو ياها قبل ماتكبر القصة لأنو ابراهيم مخبر امي بالقصة وقاللها تحكي معي وتقنعني وامي ماحكت بيني وبينها حكت قدام اخوتي ونسوانهم وهني فكرو انو مابدي مرام مابيعرفو اني مابدي من القرايب بشكل عام
ابو محمد. خلص ارضي بالأمر الاواقع وخديلو ياها
ام محمد. لا مابدي واليوم رح دورلو ع بنت
ابو محمد. وكيف بدو يشوفها
ام محمد. بنحكي فيها وبنطلبها وبس يجي بيخطب وبشوفها
ابو محمد. يعني بدك تحطيه تحت الامر الواقع
ام محمد. هاد ابني الغالي المدلل وانا متأكدة اني بعرف بمصلحتو اكتر منو
بالليل اخوتها لمرام كلهم عرفو وكل قرايبهم كمان عرفو انو ابراهيم ومرام بحبو بعض
اهلها زعلو منها انو خبت عنهم وهي عرفت انو عمتها مابدها ياها ظلت طول الليل تبكي
بس ستها قالتلها انو عمتها ام محمد بالأخير قالت اي و وافقت
وهيك اتطمنت مرام انو ابراهيم لألها
تاني يوم ام محمد لقت عروس لأبراهيم هيي بنت جيرانهم وحكت لأبو محمد واخدو موعد من الجماعة المسا مشان يروحو يطلبوها
راحو ع بيت اماني العروس وطلبوها لأبراهيم
اهل العروس بيعرفو ابراهيم كتير منيح
وماكانو متوقعين انو يطلب بنتهم
ام محمد ما حكتلهم انو ابراهيم مو موافق وانو مامعو خبر
قالت انو الشب بالعسكرية ونحنا عم ندورلو ع عروس
اهل العروس فورا وافقو لأنو بيعرفوه لأبراهيم
اتفقو انو الخطبة بس يتسرح ابراهيم
ظل اسبوع ليتسرح ابراهيم وحكا مع مرام قبل يومين وقللها انو مابقا فينو يحكي معها لانو الموبايلات ممنوعة و واحد من الي معو خبر عنو انو معو موبايل اخدوه منو وعاقبوه
وقاللها انو هاد الموبايل لرفيقو ومابيقدر يستعملو
مرام ماكانت بتعرف بأيا يوم بالزبط بيتسرح لأن هوا مافينو يحدد
قبل مايجي ابراهيم بكم يوم طلع الخبر انو ام محمد خطبت لأبراهيم لأن راحت هي وابو محمد زيارة تانية لعند اهل العروس لتخبرهم انو ابراهيم كم يوم وبيجي ومين مايسألها انو طلبتلو تقول اي
نور ماكان فيها تحكي لمرام لأن امها نبهت عليها
لحتى وصل الخبر من الناس لمرام
عرفت مرام من الناس انو عمتها طلبتلو لأبراهيم
انصدمت بالحكي الي سمعتو وما سدئت
راحت ع غرفتها وقفلت الباب
مرام. لااااا ياربي لااا ياريت متت وماسمعت هالخبر ليش هيك حظي ليش عم يصير معي هيك
انا مابدي اخسرو لأبراهيم والله بموت ومابتحمل
لك شوووو اعمل
رجعلي شوية امل وقت صرت واسي حالي وقول مستحيل ياخد غيري ابراهيم بحبني الي اي بحبني
اتسرح ابراهيم وكان راجع ع درعا رن التلفون رحت ركد رديت وطلع هوا
مرام. الو .. ابراهيم
ابراهيم. اي كيفك حبيبتي مرام. الحمدلله كيفك انت
ابراهيم. الحمدلله شو مافي مبروك
عرفت انو تسرح بس ماعرفت افرح ولا ابكي مابدي ياه يرجع مابدي اخسرو
ابراهيم. الووو لك وين رحتي
مرام. معك ان شاء الله الف مبروك .. وينك انت هلأ
ابراهيم. ع الطريق بدي ساعة وبوصل
مرام. ان شاء الله توصل بالسلامة .. يعني رجعولك موبايلك
ابراهيم. الله يسلمك.. اي رجعوه
مرام. اممم
ابراهيم. شبك
مرام. ولشي
ابراهيم. اكيد هلأ فرحانة كتير لانو رح تصيري تشوفيني بكل وقت بدك ياه
مرام. اي اكيد
ابراهيم. مابقى بحياتي روح ع اللاذقية
مرام. ليش
ابراهيم. شو ليش مابكفي اني بعدت عنك هالسنتين وقضيتهن باللاذقية لهيك ماعدت حبيتها
مرام. ههههه وين بدك تروح بس توصل
ابراهيم. اول شي ع البيت
مرام. ليش مو لعندي هي المرة
ابراهيم. لان هي المرة غير
مرام. كيف غير
ابراهيم. لك قصدي انتي لازم تجي وتباركيلي ولا مابدك تجي
مرام. اممم اكيد بجي بس مابعرف ايمتى اهلي بياخدوني لعندكم
ع كلا انت اتصل فيني بعد ماتوصل بساعة
ابراهيم. اكيد حبيبتي
وصل ابراهيم ع بيتهم واستقبلوه احلى استقبال وبيتهم مافضي من الناس كلها راحت تباركلو حتى اهلي وستي كلهن راحو وخلوني بالبيت
طول الوقت كان تفكيري بأبراهيم وخايفة من الي رح تعملو عمتي وماكنت متطمنة ابدا
بالليل في بيت ابراهيم
ام محمد. ابراهيم وين رايح
ابراهيم. عندي مشوار صغير
ام محمد. لا اليوم مافي طلعة من البيت والله مابعطي فرحتي لحدا انك رجعتلنا بخير وسلامة
ابراهيم. مابطول نص ساعة
ام محمد. طيب بدي احكي معك بموضوع انا وابوك
ابراهيم كان حابب يشوف مرام ويشاركها فرحتو بهاد اليوم بس حب يعرف شو هوا الموضوع الي يدها تحاكيه فيه امو
ابراهيم. وهي قعدت تفضلي
ام محمد. وين كنت بدك تروح
ابراهيم. بدي اسهر مع الشباب
ام محمد. بعرف انك رايح تشوف مرام لأنو ما اجت اليوم مع اهلها مو هيك
ابراهيم. يمكن.. بس شو في احكولي
ام محمد. نحنا خطبنالك
ابراهيم. هههههه بس ماتكونو زوجتوني كمان
ام محمد. هلأ مو وقت مزحك عم نقلك طلبنالك بنت ابو موسى اماني بنت متل القمر مابتشكي من شي
ابراهيم. شو عم بتحكي
ام محمد. معقول مامعك خبر او مافي حدا خبرك مع العلم انو كل قرايبنا بيعرفو اخوالك وخالاتك كلهن بيعرفو
ابراهيم. لك شو عم تحكي يا امي صحيح هالحكي بابا
ابو محمد. اي صحيح حددنا موعد مع الجماعة تروح تشوفهم بعد بكرا
ابراهيم. لك كيف هيك بتعملو طيب مرام بتعرف بهاد التخبيص
ام محمد. بتعرف وماحكت شي
ابراهيم. ياربي دخيلك كيف هيك بتتصرفو بدون علمي
ام محمد. هاد الصح وانا بدي مصلحتك
وابوها للبنت كتير منيح انت بتعرفو ولو تشوف اديش فرح بس عرف انو انت العريس
ومن وقت رحت انت وهني كل مايجي عريس للبنت يرفضوه مشانك
ابراهيم. ومين قللكم اني بدي ياها
مستحيل لا تحاولو ولا تفكرو تضغطو علي بهي الطريقة
ام محمد. بعد بكرا موعدنا عند الجماعة مشان نحدد يوم الخطبة
ابراهيم. خليكم عم تحلمو اقسم بالله انكم نزعتو عليي فرحتي بالتسريح ياريت ظليت هنيك ياريت ماشفتوني
ام محمد. لك لا تحكي هيك شو الله ماخلق غير مرام
ابراهيم. مرام الي عم تفهمو مرام الي هي وووبس
ابومحمد. خلص نحنا صرنا حاكين مع الجماعة ماتعمللنا ياها قصة
طلع ابراهيم من البيت وظل يمشي ماعارف حالو وين رايح ولا شو يعمل ما الو عين حتى يشوف مرام
راح لقدام بيتهم وكان متردد يدخل او لا
كان كتير مشتاقلها لهيك دق الباب فتحلو عصام وقعدو بالصالة مرام كانت بغرفتها سمعت صوت ابراهيم قامت تلبس لتطلع لعندو
دخلت لعندها امها
ام عصام. ممنوع تطلعي برات غرفتك
مرام. شوو بس ليش .. كنت بدي اعمللهم قهوة
ام عصام. قلت ممنوع يعني ممنوع
مرام. بس
ام عصام. الشب مو الك ليش لتتعلقي فيه
كلمة امي هي رنت بأدني ( الشب مو الك ليش لتتعلقي فيه )
مرام. كيف يعني مو الي ابراهيم الي انا بحبو والله بحبو لا مستحيل خليه يكون لغيري
هوا مابيقبل اصلا واكيد جايي ليشوفني
والله رح طق بدي شوفو كتير اشتقتلو ليش يحرموني منو ليش ياربي
ظل قاعد ابراهيم حوالي نص ساعة يستنا فيني لأطلع
نادت عليي ستي قلت اجا الفرج ركدت لعند الباب لأطلع سمعت امي عم تقوللها مرام نايمة بطنها عم يوجعها
بس سمعت هيك صرت ابكي وبعد خمس دقايق راح ابراهيم
ظليت طول الليل ابكي مانمت
تاني يوم امي حكت معي وقالتلي ممنوع شوفو لأبراهيم او احكي معو واذا شفتو بالصدفة روح من المكان الي هوا فيه
ماحدا بيعرف غلات ابراهيم بقلبي عم يحاولو يحرموني منو ويبعدوني عنو قد مابيقدرو
بس ابراهيم بحبني وانا متأكدة من هالشي
بعد الظهر اجا ابراهيم عأساس بدو اخي
دخل ع الصالة وانا كنت بالمطبخ بس سمعت صوتو طلعت كانت قاعدة امي وستي معو
اتطلعت فيه صارو عيونو يلمعو بس شافني
مرام. كيفك ابراهيم الحمدلله ع سلامتك
ابراهيم. الله يسلمك كيفك انتي
مرام. الحمدلله
اتطلع فيني امي وزورتني بأنو فوت ع غرفتي
رحت ع غرفتي وصرت ابكي
وهوا عرف شو السبب راح ع بيتهم وحكا مع امو لكن بلا فائدة والضغط عليه عم بزيد
بالليل اجو اهلها ل اماني ع بيت ابراهيم ليسلمو عليه بس شافهم انصدم وبالأخص انو ابوها قالو كيفك عمي
لوقتا حس انو الموضوع جد
قعدو وصار ابوها يحكي مع ابراهيم
ابو اماني. وشو ناوي تشتغل هلأ بما انك تسرحت
ابراهيم. مافي شي معين
ابو اماني. بما انو رح نصير نسايب انا بشغلك معي بمحلي انت بتستلمو من اولو لأخرو وانت مبدع بكل شي فورا بتتعلم المصلحة
ابراهيم ماعرف شو يحكي وماحب يخجل اهلو
وهني رايحين ابو محمد قال لأبو اماني انو بكرا بدهم يزوروهم وابراهيم كان سامع الحكي
بس راحو
ابراهيم. ليش هيك عملتو
ام محمد. نحنا ماعملنا شي رب العالمين هوا الي عم بمشيك بهاد الطريق لأن يمكن هالشي هاد يكون خير لألك
وشفت ابوها للبنت كيف شاريك وعم يقول انو صرنا نسايب
ابراهيم. بس ااانا مابدي غير مرام
ام محمد. لو الك نصيب بمرام بتاخدها لهيك قول الله يبعتلها الافضل منك
دار حديث طويل بين ابراهيم واهله وصار في زعل بينهم
وتاني يوم ماحكو مع بعض ولا كلمة
راح ابراهيم ع بيت خاله وستو كانت نايمة كان بدو يطلب منها انو يشوف مرام بس ماشافها رجع ع بيتهم كان متضايق كتير دخل ع غرفتو سند حالو ع باب الغرفة وهوا ماعارف شو يعمل ولا شو يقول ويله اهله ويله مرام البنت الي بحبها والي قلبو اختارها
معد حاول يحكي مع اهلو لأن بلا نتيجية حاول يفكر بطريقة تانية يرضي الطرفين مالقا ومامعو وقت اليوم بدهن يروحو ع الجماعة
وابوه وامو زعلانين منو وماعم يحكو معو
ظل ابراهيم بغرفتو للمسا وافكار تاخدو وتجيبو
ام محمد. نور روحي قولي لأخوكي نحنا جاهزين وعم نستناه
دقت الباب عليه نور ودخلت عمل حالو نايم
نور. ابراهيم.. ابراهيم.. اهلي عم يستنوك
ابراهيم. قوليلهم ماني رايح
نور. ماما بقول ابراهيم مابدو يروح
ابو محمد. هاد الي كنت حاسب حسابو هيك بدكم تخجلونا قدام العالم انتي وابنك
دخلت ام محمد لعند ابراهيم كان حاطط الوسادة فوق راسو ومابدو يسمع شي
ام محمد. كنت بتوقع من الكل يا ابراهيم انهم مايسمعو كلمتي الا منك انت الوحيد الي غلاتك بتزيد عن كل اخوتك
كتير علي اني بدي افرح فيك واختارلك البنت الصح الي مايجيك من وراها مشاكل
صارت تبكي وهي تحاكيه لأن ضاقت كتير بكناينها الاولانيات هي بدها مصلحتو وحبت انو تاخدلو بنت غريبة لتريح راسها من المشاكل ومابعمرها حرمتو من شي كان مدلل كتير بس هل اختيارها صحيح لأبراهيم
قام ابراهيم بس شافها تبكي مسحلها دموعها وباسها
ابراهيم. اديش انا حقير مو هيك عم خليكي تبكي بسببي
خلص الي بدك ياه بصير بس بترجاكي ماتبكي
بعمرك مابكيتي وكنت انا السبب
وهلأ لو بتقوليلي موت رح بموت حالي
ام محمد. تبكي بعيد الشر عنك ياعمري ياريت الموت الي ولا الك
والله بدي مصلحتك
ابراهيم. يا امي مصلحتي مو مع هالبنت
دمعو عيونو ترك امو قاعدة ع التخت وراح فتح الخزانة وطال قميص شلح الي كان لابسو وعم يلبس واحد تاني
ابراهيم. هي رح روح معكن
ام محمد. يعني برضاك
ابراهيم. لا والله مو برضايي وغصبن عني
لبس ابراهيم قميصو ومشط شعرو
ابراهيم. انا جاهز.. ان شاء الله تكوني غيرتي رأيك لأن والله مابدي ياها لو شو ماتكون
واذا بدي اخدها رح باخدها بس لأرضيكي انتي فاهمي عليي مارح باخدها لسعادتي انا
ام محمد. والله بس تخطبها رح تحبها انت رد عليي ومارح تندم
ابراهيم. انا معكم اعملو شو مابدكم.
ام محمد. الله يرضا عليك رضا قلبي وربي
راح ابراهيم مع اهلو ع بيت اماني وحاول مايفكر بمرام كل ماتخطر ع بالو يغمض عيونو ويحاول مايفكر فيها
لأن لو فكر فيها كان رح يترك اهلو عند الجماعة ويروح لعندها
حددو موعد للخطبة قريب كتير بعد 3 ايام بكون يوم الجمعة
رجعو ع البيت وماسألوه شو رأيو لأنهن بيعرفو
ابراهيم. اذا حنيتي علي وبتتمنيلي السعادة قوليلي وبنعتذر من الجماعة قبل ماحدا يعرف
ام محمد......
دخل ع غرفتو وصار يفكر بمرام شو رح يصير فيها بس تعرف شو رح تقول عنو
صار راسو يوجعو اخد حبوب مسكن ونام
تاني يوم مرام عم تفكر فيه
مرام. ليش هيك ماعم يسأل ولا معو خبر ولاكأني موجودة ولا عم يتصل صح هوا قلي ماباخد غيرك بس حاسستو رح يروح مني
بس لا اكيد ماعم يصيرلو من الناس الي عم بتروح تباركلو
المسا ام محمد عزمت كل قرايبهم ع خطبة ابراهيم ومنهم اهلها لمرام
نور. شو رح يصير بمرام بس تعرف
ام محمد. شو رح يصير يعني بتنسا والله بيعوضها بأحسن كمان من ابراهيم
ابراهيم سمع هي الكلمة واتضايق كتير تركهم ومشي
ابراهيم. انا السبب انا الي وافقت
طلعت مابفرق عن هالشباب الي بيكذبو ع البنات
طيب شو اعمل يعني اهلي وحبيبتي بس لسا معي فرصة
بس متأكد اهلي مارح يوافقو ع مرام
توقعت تجي امي مبارح وتقلي خلص اذا مابدك ياها بلاها وخد البنت الي بتتمناها اخ ياريت لو صار هالشي
مرام بس عرفت جنت وصارت تبكي وتصرخ وتشلخ بحالها ماتحملت فكرة انو ابراهيم يكون لغيرها
قد مابكيت وصيحت ذبلت فجأة وهديت لأن تعبت كتير قفلت ع حالها باب الغرفة وطالت كل الرسائل والهدايا الي من ابراهيم وصارت تتفرج عليهن
وابراهيم كمان ماكان وضعو منيح كان عم يتهرب من حالو
يوم خطبتو لأبراهيم حكا الصبح مع امو وقاللها لأخر مرة رح قلك اني بحبها لمرام بس ماردت عليه
اجو بنات عمي لعندي وقالولي انو لازم روح ع الخطبة وكنت مرضانة كتير من الزعل والبكي وراسي من يومين ماوقف وجع ودوخة
ماقبلت روح كيف بدي روح وانا يلي كان لازم كون العروس كيف بدي روح وانا يلي لازم كون لابسة الفستان وهي حفلت خطبتي وهاد حبيبي وفرحة عمري وسنين الحب يلي عشتها
بالخطبة كل الناس صارو يسألو وين مرام من بعد ما الكل عرفو بقصتنا ولأن انا الي شعبية كتير ومحبوبة من الكل
بعد ما خلصت الخطبة اجت ايات لعندي وصارت تحكيلي شو الي صار وانو الكل سأل عني وتقلي مالازم اعمل بحالي هيك ولازم كون قوية
مرام. اصلا انا ماني ع الدنيا انا ميتة...
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```