5...
الهروب… لما يبقى الأمل شكله جريمة
فكرة الهروب ما جتش فجأة.
اتزرعت يوم ما فدول مات،
وسقيتها كل ليلة دموع مكتومة.
أحمد كان بيعدّ الأيام من غير ما يعرف ليه.
يمكن علشان يفضل فاكر إن الزمن لسه ماشي…
مش واقف جوّه الدار.
يوسف بقى عصبي أكتر،
أي كلمة تشعل نار.
مش علشان شرير…
علشان الغضب ما لاقيش طريق تاني.
عزرا كان أهدى من اللازم،
الهدوء اللي يخوّف.
كان بيسمع،
وبيخزّن…
زي واحد مستني لحظة.
ليل،
والدار نايمة.
المطر بينزل خفيف.
أحمد همس:
“دي فرصتنا.”
القلب بيدق عالي،
والخوف سابق الرجليهم.
وصلوا للسور.
عالي.
مليان سلك.
بس الحرية كانت على الناحية التانية.
يوسف طلع الأول.
إيده اتجرحت.
الدم نزل،
بس ما صرخش.
عزرا حاول،
رجله زلّت.
وقع.
الصوت صحّى المكان.
الأنوار ولعت.
صوت الحاج رشدي.
صوت أم نوال.
“إمسكوهم!”
أحمد وقف مكانه.
لو جري…
عزرا هيضيع.
رجع.
شاله.
أم نوال ضربته.
مرة… واتنين… وتلاتة.
يوسف نجح يعدّي السور.
وقف على الناحية التانية.
بص ورا.
شاف أحمد واقع،
وعزرا بيعيّط بصوت مكتوم.
لو رجع… هيضيع.
لو كمل… هيسيبهم.
اختار.
وجري.
الباب اتقفل.
الهروب فشل.
غير واحد بس…
يوسف.
أحمد اتحبس في أوضة ضلمة.
عزرا اتعاقب.
والدار رجعت أقسى.
بس من اليوم ده،
ما بقاش في براءة.
بقى في حاجة اسمها كراهية.