الفصل 8
الجزء الثامن
خمنت (شما) انها بعد ما قامت اتعامل (وليد) شرات ما يعاملها.. و اطنشه..جافت هو الي قام يرمس معها..
حست (شما) بتغير معاملة (وليد) لهاا .
و ظنت الموقف الي صار حذال (منى ) و عمتها..يمكن ها واحد من الاسباب..
(شما)تبا تحافظ ع هاي المعامله..فكانت تسمع كلام (وليد) في كل شي..
كانت تجنب ترمس بالتلفون شرات ما يبا.. و ما ترمس معاه الا اذا رمسها.. حتى الطلعه من البيت ما كانت تطلع..الا اذا هو بغاا..
صحيح هي كانت تسمع مرات نغزات في كلامه..بس كانت تجنب انها اترد عليه..
مر شهرين ..و حياة (شما) مع (وليد) بهاي الصوره..كانت(شما) اتجوف مب هاي الحياة الي يعيشها كل الازواج..و كل الناس.. بس بالنسبه لبدايه حياتها مع (وليد) تحس براحه نفسيه..مب مثل قبل..
حتى (مهرا) كانت تلعب دور كبير في حياتهاا..حست هي الي اجرب (وليد) من (شما) بس من غير قصد..
فمثلا في مره كانت (شما) اتغسل الحوي في بيتهم الي في دبي..و كانت (مهرا) معها ..كانوا يلعبون بالصابون..
و يضحكون بصوت عالي..
وليد يالس عند بابا الصاله يقرا جريده..(شما) تدري انه احيانا كان يطالعها و يطالع بنته..
مهرا: بابا تعال العب معنا..
وليد(بعده يقرا الجريده) انزين بابا انزين..
(مهرا) كانت تلعب شويه و تزقر ابوها شويه..بس (وليد) كان امطنشهـا..
وليد: (يكلم شما) بسكم لعـب خلصتوا الماي.
شما :( اترمس مهرا) اتبين بابا يلعب معنا.
مهرا: بابا ما يطيع.
شما: الحين بطيع....
اجدمت شما منه و رشت الجريده بالماي..
اتروع (وليد) :يا الهبــــــله..
(شما) و (مهرا) يلسوا يضحكون ع ردة فعل (وليد)..
وليد: شو سويتي خرستي الجريده ماي ..
شما: عشان مره ثانيه ما اطنش بنتك..
وليد: انا مب فايج لج ولا لها ويا ها اللعب الي يلسين تلعبونه.
مهرا: (اتصرخ لشما) رشيه ماي ..ماما.
وليد: (يصرخ ع مهرا) مهـــــــراا..
شما (مستانسه) من عيونـي كم مهرا عندي..؟؟
اجدمت (شما) منه مره ثانيه ورشته بالماي.. (مهرا) و (شما) يضحكون ابصوت..عالي..يوم يجوفون (وليد) يتروع من الماي..
قام (وليد) من مكانه ..شلت (شما) ..(مهرا) و يلست تركض بها في الحوي ..و (وليد) يرشهم بالماي..
كانوا يصارخون..مستانسين من الماي الي ينزل لهم..
جنه مطر ينزل لهم..
(وليد) اجرب من (شما) و يلس يساسرها.
وليد: يا ليييتج كنتي غير جي..كانت حياتنا بتكون احلى .
شما: (تهمس) شو تقصد؟؟
طنشها (وليد) وسار داخل..
تمت (شما) واقفه اتفكر في كلام (وليد) الحين عرفت ان (وليد) بعده ماخذ عنها فكره سيئه..اتنهدت مب عارفه كيف تقنع هالانسان....
قامت اتبند الماي و (مهرا) اتصيح بعدها تبا تلعب...
**
توقعت (شما) بعد الكلام الي قاله (وليد) انه بيرجع شرات قبل ما يرمسها..بس بالعكس ..كان يرمسها و يضحك معاها احياناا..
بس كانت اتحس تصرفاته و معاملته لها كانت بحدود..
.. و في بيت عمها الكل كان يتزهب لعرس (منى) بعد يومين...
دشت (شما) لـ (منى) في الحجره..كانت (منى) اترتب ثيابهاا..في شنط.
شما: مستانسه منى.
منى: وايد شمووووووه..اخيرا بعرس..اوف ما بغيت..
شما: ليش ما اتسوين حفله ملجه ..و بعد كم شهر العرس..
منى: لا لا لا انا ما صدقت اني بملج و في نفس اليوم بعـرس ما اصبر ..ابا احس اني عروس..
شما: تضحك عنبوه اشفيج طايره..
منى: بذمتج شمووه مب حلو يوم اتعرسين.
شمافي خاطرها" انتي خليتي شي حلو في حياتي .."
شما: عـادي.
فتحت (شما) الكمبيوتر ..و يلست تفتح مواقع اغاني..
منى: شموو امسكي موبايلي..بسير اسبح..اذا اتصل خالد خبريه اني اسبح و بسوي له عقب..
شما: (متردده) لا لا ما يخصنــــي استحي.
منى: شو تستحين ها الحين نسيبج يودي لااه.
حطت الموبايل جريب من الكمبيوتر .. و سارت الحمام..
يلست (شما) تسمع اغاني..رن موبايل (منى)
استغربت (شما) من الرقم..
شما: هالرقم ما اعرفــــــه ..ما برد.
بس تم الموبايل يرن..
شما: الـــــوو
المتصل: مرحبا.
شما: اهلا..منو؟
المتصل: منى.
شما: لا منى مشغوله من انت؟؟
المتصل: اوكى قولي لها ادق لي..السموحه ..
طالعت (شما) الموبايل.."معقوله ها خالد..الظاهر منى ما اتيوز ع سوالفهاا"
و قبل ما اتحط الموبايل ع الطاوله..دش (وليد) حجرة منى..
وليد: اترمسين منوو؟
شما: (وقفت )محـد ها موبايل منى
وليد(محرج) ادري موبايل منى ليش ترمسين فيه.
شما(ادافع عن عمرها) انا ما رمست..
قاطعها وليد :- وين منى.
شما: تسبح في الحمام.
وليد :- يعني داخل..
سكتت (شما) يوم جافت (وليد) يجرب منها..مسك ايدها و طلعها برع الحجره..و ساروا حجرتهم..
وليد: ما شا الله يالسه ع النت و ماسكه الموبايل..شو اشتقتي لايام زمان..
شما: وليد انت ليش دوم افكارك جي عني.
وليد: ليش شو تتوقعين ..اذا ع بالج ضحكت معاج شويه و سولفت شويه ع بالج خلاص طاح الحطب.
شما (اترد عليه) انت ليش امكبر السالفه.
غمضت عيونها..يوم سمعت صوت (وليد) عالي.
وليد: كنتي اترمسين منووووو ع الموبايل قلتلج.
شما( تصيح) :-منى قالت لي ارد ع خالد اذا دق هي بتسبح.
وليد: لا و الله..
شما: اسال منى..اذا مب مصدقني.
وليد: وشو كنتي اتسوين ع النت..؟
شما: اسمع اغاني ما فتحت مواقع ثانيه..و الله
وليد: ما عليه شمووه انا براويج..
وطلع برع الحجره..
(شما) تضايجت ..ما تقدر اتسوي شي الا و انجلب عليها (وليد)
قالت في خاطرها"متى برتاح من ها العذاب..انا لازم اخلي منى اترمس وليد..غير جي ما بتغير شي"
**
و في يوم العرس..(شما) اتزهب ثيابها و ثياب(مهرا) عشان اتروح الصالون مع (منى)
دش عليها (وليد) الحجره..
وليد: شو تسوين.
شما: ازهب ثيابي و ثياب مهرا بنسير الصالون مع منى.
وليد: بس زهبي ثياب مهرا انتي لا.
شما(مستغربه) ليش؟؟!!
وليد: ما اباج اتروحين العرس.
شما: عرس اختي ليش ما اروح ..
وليد: انتي تبين اتسيرين عرس اختج ولا عشان خالد.
شما: انت من صجك ترمس.
سمعوا (منى) ادق الباب ..
منى (من ورا الباب) :- يالـــــله شمووه وين وليد تاخرنا..
شما (تهمس) بسير .
وليد: (معاند) لا..
شل ثياب (مهرا) وطلع من الحجره..يلست (شما) ع الشبريه اتصيح..مهما (منى) سوت لها بتبقى غاليه عندها ..
و تبا تحضر عرسها..اصلا الناس شو بيقولون..عمها و عمتها ..شو بعلقون...
ما عندها تلفون ولا شي يخليها ادق لـ (منى) عشان تقنع (وليد) انها تحضر عرسهـا..
كانت (شما) يالسه ابروحها طوال الوقت..شما في خاطرها"اف ملل حتى وليد ما ياا طالع من الظهر ..اكيد ما برجع البيت الا اخر الليل..""
فكرت (شما) تلبس فستانها و تتعدل ابروحها و تخلي الدريول يوصلهاا..اكيد (وليد) ما بيعرف ..وبتروح العرس و بترجع و(وليد) ما يدري.
بعد ما لبست فستانها..قامت اتحط مكياج ..ع ويههـا
بها اللحظه انفتح باب حجرتها..
حست (شما) بلحظه خوف و ضعف..يوم جافت (وليد) يطالعها من فوق لـ تحت..
وليد: وين سايره.
(شما) ساكته..مب رايمه ترمس لانها خايفه من نظرات (وليد) اول مره اتجوفه جي محرج..اتذكرت هاي الملامح في ليلة عرسها..
وليد: (يجدم منها) وين سايره.
شما: (تهمس)العرس
وليد:و انا شو قلتلج.
شما: عموه بتزعل مني.
وليد: (يصرخ) عموه بتزعل ولا خاطرج اجوفين خالد..
شما: (تنزل دموع من عيونها) ما يهمني خالد.
وليد: جـــذابه..بدلي ملابسج..
شما: (معانده) لا ..بسير العرس.
اتفاجات (شما) يوم جافت (وليد) شرات المينون يطر فستانها..
شما (تصيح) لا تسوي جي مب فستاني..
بس (وليد) ما كان يسمعها..ردت (شما) ورا يوم جافت ان (وليد) وقف..
وليد: يالله روحي العرس الحين..
ويرها من ذراعها وفتح الباب عشان يطلعها برع..
شما(تترجاه و تصيح) وليد وليد.
اتوقعت (شما) ان (وليد) مول مب وعيه..
وليد(يصرخ) يالله اطلعي بها الفستان روحي العرس ..خلي خالد يجوفج الحين..
شما: (تصيح) يا المينون ..
يلست تضربه بصدره ..يمكن يحس بعمره..
هدها (وليد) ركضت (شما) ووقفت ورا الشبريه عشان تحمي عمرها من (وليد)..
شما(تصيح بصوت عالي) طلقنــــــي .
وليد: ليش مستعيله ..بطلقج بس يوم بخطب و بملج هذيج الساعه بوصل لج ورقه طلاقتج..و بعدين طولي خالد..اجوف.
يلست (شما) ع الارض اتصيح..من معاملة (وليد) و تجريحه في الكلام..حسبته انسان تغير بس للاسف ..عمره ما بتغير ..