طال صبري متى تحبني - الفصل 9 - بقلم كراميل - مكتملة | روايتك

يوم الثلاثة إلي اهو يوم عزيمة بيت بو يوسف عند بيت بو محمد، كانت فاطمة قاعده تدرس بغرفتها يوم دخلت عليها أم محمد........... أم محمد: ها فطووووم شخبار الدراسة وياج؟؟ فاطمة طالعت امها مستغربة لأن امها ما اتيي لها وايد غرفتها، وقالت: الحمد الله يمه أم محمد: انزين فاطمة.... ابيج تتصلين في منال وتعزمينها مع اختها مي الليلة على العشا فاطمة: انشاالله يمه....... بس ليش تبيني اعزهم يعني العزيمة لبيت بو يوسف ويمكن ابوي يتضايق لما يعرف إني عزمت منال ومي أم محمد: اصلا ابوج اهو إلي قال لي عزميهم فاطمة:ليش؟؟ أم محمد: لأن امس يوم يتصالحون ابوج وبو يوسف، طلب يوسف يد منال فاطمة باستغراب: صج و الله؟؟؟!!! أم محمد: اي بس ما ابيج تقولين لمنال إن اهو يبي يخطبها، بس نخليهم يجوفون ويكلمون بعض بدون ما تدري فاطمة: ليش بدون ما تدري؟؟؟ أم محمد: احسن علشان تتصرف منال على طبيعتها فاطمة:اوكي أم محمد: بس انه إلي ابي اعرفه من وين يوسف يعرف منال؟؟ فاطمة: اي اهو جاف منال مرة وحده يوم اتيي اخر مرة البيت وتبيت عندنا، كان اهو ياي ياخذ خواته وجافها أم محمد: انزين عيل اتصلي فيها و قولي لها ..... اي قبل لا انسى عزمي خالتج بعد خلها اتيي احسن علشان يتعرفون على أهل العروس هذا إذا خطبوها رسمي فاطمة: اوكي واتصلت فاطمة في مي وعزمتهم على العشا..................... و في الليل الساعة 8 كان الكل موجود في بيت بو محمد، البنات كانوا قاعدين في غرفة بروحهم، و الرياييل في الميلس، و ام محمد و ام يوسف وام منال في الميلس الثاني، وكان الكل فرحان و مستانس .......... كانوا البنات قاعدين يسولفون مع بعض............ مي: بصراحة وناسة جذي ياريت كل مرة تصير عزيمة فاطمة: اي فننن جذي، اشرايج مرة عزيمة عندنا و مرة عندكم ومرة عند هناء؟؟ مي: اي و الله هناء: انه موافقة سارة: انه اول وحده لازم تعزموني، ولا بتصير العزيمة بدوني و لاشي مريم+هناء+فاطمة+مي+ منال:هههههههههههههه مي: إلا بسألج فطوووم......... وين راح اخوي عماد من شوي كان اهني؟؟ فاطمة: يمكن راح مع محمود يلعبون بره منال: انه قلت له لا اتيي معانا بس اهو اصر إن ايي يقول يبي يلعب مع محمود من زمان ما جافه فاطمة: احسن إن يه معاكم علشان يقعد مع محمود و نفتك من حنته مي: اقول ساروونه..... ما عندي ايميلج،ممكن تكتبينه لي؟؟ سارة: اي اخذيه بروحي انه ابي ناس وايد عندي على الإيميل لأن اتملل اذا محد اون لاين وكتبت سارة الإيميل و عطته مي.. مي: وانتي بعد هناء عطيني ايميلج هناء: اوكي وكتبت هناء الإيميل و عطته مي... هناء تكلم منال: اقول منال انتي ما عندج ايميل؟؟ منال: امبله عندي بس ما ادخل عليه وايد، انه ما احب اقعد على الماسنجر بس ادخل اجوف الرسائل عندي و اطلع، بس اذا تبينه بعطيج اياه هناء: اي عطيني اياه احسن يمكن اكلمج مرة من المرات عليه وكتبت منال ايميلها و عطته هناء... مي: فطووووم عطيني ايميل اخوج محمد؟؟ فاطمة: و انتي ليش تبين ايميل اخوي؟؟ مي: بس جذي عندي ايميلاتكم كلكم ما عدا اخوج، وانه احب يكون لي معارف وايد، واحب اسوي مقالب في الأوادم يمكن اسوي مرة مقلب في اخوج هههههههه فاطمة: اوكي بعطيج بس لا تقولين له إني عطيتج ترى بيذبحني مي: افا عليج انه مستحيل اقول له من عطاني ايميله، بس يلا بسرعة كتبيه هناء: ليش مستعيلة تبين ايميله؟؟ مي مرتبكة: انه... لا مو مستعيلة و لاشي وكتبت فاطمة إيميل محمد و عطتها اياه......... ومن صوب ثاني كانت ام محمد و ام يوسف وام منال يسولفون ويضحكون مع بعض، وفي الميلس عند الرياييل كانوا قاعدين يسولفون ويتناقشون في سوالف الشغل وحتى بو محمد و بو يوسف اتفقوا انهم يوحدون شركتهم ويتعاونون مع بعض، و اما الشباب لما جافوا الشياب يتكلمون في سوالف الشغل طلعوا بره الحديقة يتمشون........... والساعة عشر اجتمع الكل على العشا ، و الكل كان يسولف و يضحك و فرحاااان... بو يوسف يتكلم مع بو محمد عن سوالف الشغل إلي ما تخلص، و ام محمد و ام يوسف و ام منال يتكلمون في سوالفهم إلي مالها اول من تالي، و محمود وعماد قاعدين مع بعض ياكلون و يضحكون( و عماد في نفس عمر محمود)....... و يوسف كان قاعد ياكل و عيونه على منال إلي ما تدري إن يطالعها و اهي كانت تسولف و تضحك مع هناء وفاطمة و مي، ويقول في خاطره: صج و الله انج حلوه يا منال وينج عني من زمان علشان تنسيني همومي......... وأما سارة كانت مجابلة يوسف على الطاولة تسولف مع مريم، و في شي ما تعرفونه عن سارة.... سارة معجبة في يوسف وتحبه ( حب مراهقة)، و كانت طول الوقت قاعده اطالع فيه و اتسوي حركات علشان تلفت انتباهه بس اهو ما يدري عنها، وسارة لاحظت نظراته لمنال و حست بالغيرة تحرق قلبها..... ومن صوب ثاني كانت فاطمة وهناء يسولفون و يخططون، شلون يخلون منال و يوسف يقعدون مع بعض ويتكلمون بروحهم........ و أما مي فكانت تتكلم و تضحك وعينها على محمد، إلي ما كان مهتم في أحد، وبس قاعد يفكر في حبيبة قلبه صفاء........ وكانت فاطمة و اهي تكلم هناء اطالع علي، و حست إن علي فيه شي، لأن كان هادئ و ساكت طول الوقت و لا تكلم......... وعقب العشا طلعت فاطمة و هناء و منال و مي بره الحديقة يلعبون شطرنج................ هناء: والله ما اقدر عليج يا منال صج ذكية، ما اقدر اغلبج مي: منال شاطرة في هاللعبة محد يقدر عليها منال: ههههههه يلا من تتحداني فاطمة: انه بلعب معاج، اتحداج تغلبيني ههههههه هناء: لا تسوين روحج عنتر، ترى بتغلبج بتغلبج فاطمة: ما عليه انه بلعب و بجوف انه ولا اهيه منال: يلا بنجوف هناء: و انتي مي ما تعرفين تلعبين؟؟ مي: لا انه ما اعرف و لا احب العب هاللعبة وقعدوا منال و فاطمة يلعبون، وفي هالوقت طافت صوبهم سارة و مريم و محمود و عماد ، وكانت سارة حاملة كرة سلة وقالت لهم: و الله صج انتوا مملين كل بس قاعدين و تسولفون و العابكم سخيفة فاطمة: و الله مو شغلج و اذا مو عاجبج لا تقعدين معانا سارة: ومن قال انه بقعد معاكم انه بروح ويه مريم ومحمود و عماد نلعب كرة سلة فاطمة: و انتي ما دورتي إلا هالحزة اطلعين قدراتج وتلعبين سلة سارة: والله مو شغلج فاطمة: انزين عيل قلبي ويهج مي: تعالوا بايي معاكم ، انه صح ما اعرف العب شطرنج بس محد يقدر علي في لعب السلة سارة: عيل تعالي وانه اتحداج مي: اوكي وراحوا مي ومريم وسارة يلعبون كرة سلة في صوب ثاني....... فاطمة: ما شاالله عليج يا منال محد يقدر يغلبج هناء: جفتي ما قتلج ما تقدرين عليها منال: انه ودي العب مع احد يتحداني و يعرف يلعب عدل ما اقدر اغلبه بسهولة هناء: صج تبين احد ما تغلبينه بسهولة؟؟ منال: اي اذا في بلعب معاه انه اتحداه طالعت هناء فاطمة وقالت: اخوي يوسف يعرف يلعب عدل محد يقدر عليه، بروح اناديه لج وقامت هناء بسرعة وراحت تنادي اخوها.... منال: وين راحت هناء لا تفشلني جدام اخوها فاطمة: ما عليج ترى اخوها وايد حبوب و ما بقول شي منال: لا بس يمكن ما يبي يلعب فاطمة: عادي اذا ما يبي يلعب ما بيي ورجعت هناء و معاها يوسف، و اهم في يتمشون رايحين لمنال و فاطمة قال يوسف: انه اشعرفني العب شطرنج، حتى قواعد اللعبة ما اعرفها هناء: ما عليك انت بس حرك أي شي وبتمشي اللعبة عادي، اللعبة سهلة ما يبي لها شي يوسف: انزين غششيني هناء: اوكي ، انت ما عليك و لا تحاتي وصل يوسف وهناء عند فاطمة و منال........... يوسف: ها من إلي تبي تتحداني، ترى محد يقدر يغلبني طالعته هناء و اهي تبي تضحك على كلامه وقالت: منال اهي إلي تتحداك، و بنجوف من إلي بيغلب انت و لا اهي فاطمة: يلا تعال العب، بنجوف اذا قدرت عليها منال وشكلها تشجعت من كلام فاطمة و هناء: يلا يوسف اذا قدرت تغلبني يعني تطلع صج بطل في الشطرنج يوسف: ههههههههههه عاد مب لهدرجة، بس ترى انه يمكن ناسي قواعد اللعبة لأن من زمان مالعبتها من قبل لا اسفر ادرس بره منال: اوكي ما عليه، بذكرك فيها وقعدت منال تشرح ليوسف قواعد اللعبة و اهو يحاول يركز و ما ينسى علشان يعرف يلعب و يطلع بطل جدامها، و بعدين ابتدوا اللعب و كانت هناء و فاطمة يساعدون يوسف ويغششونه، و عقب خمس دقايق قالت فاطمة: انه بروح اييب لكم عصير وبايي هناء: لحظة بايي معاج اساعدج وقامت هناء و فاطمة عنهم، قال لهم يوسف: تعالوا وين بتروحون و بتخلوني؟؟ منال: ليش تبيهم؟؟....... يعني خايف اغلبك؟؟ يوسف منحرج: لا بس انه.......... اصلا انه محد يقدر يغلبني وكان يوسف يقول في خاطره( وين رحتوا عني و خليتوني بروحي انه شلون الحين بلعب معاها ما اعرف شي) منال: ههههههه اوكي عيل العب بدون مساعدتهم يوسف: انه اصلا اعرف العب بدون ما يساعدوني منال: انزين عيل يلا راوني يوسف: اوكي ومن صوب ثاني كانت سارة و مي و مريم يلعبون كرة سلة.......... مي: جفتي ما قلت لج محد يقدر علي، صرت امدخلة الكرة في السلة 27 مرة و انتي بس 12 مرة سارة: انتي بس عطيني الكرة و براويج واخذت سارة الكرة و رمتها بس ما دخلت، و اخذت مي الكرة... مي: ها جفتي اصلا انتي ما تعرفين ادخلينها داخل سارة: انتي كل تاخذين الكرة عندج ما تعطيني اياها وايد، لو تعطيني جان دخلت الكرة اكثر منج مريم: انزين بس عاد لا تتهاوشون ، اكا انه ما دخلتها إلا 5 مرات و لا اقول شي مي: هههههههه انتي يا مريم على نياتج طيبة و ما تحبين لهواش مو مثل بعض الناس سارة: اشقصدج؟؟ مي: ههههههه ما اقصد شي محمود: يلا ما علينا من سوالفكم خلنا نكمل لعب عماد: اي يلا بسرعة ترى تمللنا سارة: انزين عطيني الكرة مي: لا ما بعطيج اياها سارة: قلت لج يلا عطيني الكرة مي: اذا تبينها تعالي لحقيني وقامت مي تركض و راها سارة، لين ما صادت سارة مي و طاحوا على الأرض و تلعوزت ثيابهم، و خذت سارة الكرة... مي: انزين الحين عطيني الكرة بعلمج شلون يرمونها عدل داخل السلة سارة: لا ما بعطيج، اكيد بتقصين علي و بتاخذينها و لا بتعطيني اياها مي: لا صدقيني بس ابي اعلمج سارة: عيل اول لحقيني واذا صدتيني بعطيج الكرة مي: انزين يعني و حده بوحده.... ما عليه اراويج وقامت سارة تركض و وراها مي ، يركضون مثل اليهال و يدورن في حديقة البيت ويركضون من مكان لمكان لين ما ضيعت مي سارة و اهي تركض ادورها، وتمت مي بروحها تركض ادور سارة لين ما حست روحها انها دعمت بشخص و طاحت على الأرض........ لما رفعت مي راسها جافت جدامها محمد إلي دعمت فيه و طاحت، وذيك الحزه حست مي إن ويها صار أحمر مثل الطماط من الفشلة، الحين شنو بقول عنها محمد، بقول هذي وحده ما كأن عمرها 20 سنة و قاعده تركض مثل اليهال وثيابها وصخة حالتها حالة...... بسرعة قامت مي من على الأرض و نظفت ثيابها.... محمد مستغرب: ها مي عسى ما شر؟؟ ما صار فيج شي؟؟ مي: لا ما فيني شي الحمد الله، و مسامحة ما جفتك جدامي محمد: لا عادي بس ليش تركضين جذي، يعني صاير شي؟؟ مي: لا بس هذي اختك سارة الله يغربل بليسها ما خذه الكرة ومو راضية تعطيني اياها، قالت لي اذا تبينها تعالي لحقيني محمد: هههههههههههههههههه حست مي بالفشيلة لأن محمد قعد يضحك عليها، يعني الحين اكيد بقول عنها ياهل و ما افتهم... محمد: انه اعرف اختي ما تيوز عن سوالفها ههههه مي: هههههه أي و الله عليها سوالف بس سارة وايد حلوة و حبوبة وقعدوا مي و محمد يسولفون............ ومن جهة ثانية كانت فاطمة و هناء يتمشون من عقب ما قاموا عن يوسف و منال، و اصلا اهم تعمدوا يخلونهم بروحهم و لا راحوا يسوون لهم عصير و لا شي علشان لا يقاطعونهم، و اهم يتمشون جافوا محمد قاعد يكلم مي.... هناء: ما لاحظتي شي على مي؟؟ فاطمة: مثل شنو؟؟ هناء: إن اهي اتحب اخوج محمد؟؟ فاطمة: اتحب اخوي؟؟؟!!!.......... شلون؟؟ هناء: ما جفتيها يوم اتقول تبي ايميله ، و بعد على العشا انه لاحظتها إن اهي كانت حاطة عيونها على محمد و الحين قاعده تكلمه فاطمة: اي صج انه ما انتبهت لهشي هناء: ادري انج ما بتنتبهين لهشي لأنج تفكرين في اخوي صح؟؟ فاطمة: اي تعالي بسألج.... اشفيه اخوج علي انه لاحظت على العشا انه ساكت و ما يتكلم؟؟ هناء: والله ما ادري عنه بس انه ملاحظة عليه هالشي من فتره، حتى في البيت كله ساكت فاطمة: انه متأكده إن فيه شي هناء: انزين خلنا من هالسالفة، بس الحين إلي ابي اعرفه يعني محمد يحب مي و لا شنو؟؟ فاطمة: ما اعتقد هالشي انه قلت لج من قبل إن يحب صفاء هناء: لكن انه حاسة إن مي اتحبه فاطمة: يمكن......... انزين ما قلتي لي شنو صار بينج و بين حبيب القلب؟؟ هههههههه هناء: ما بقولج .......سر ههههههههههه فاطمة: افا يعني اتخشين عني اسرارج و انه صديقتج إلي ما اخش عنج شي الله يسامحج هناء: ههههههه امزح معاج، و بقول لج كل شي وقعدت هناء و فاطمة يسولفون لين ما وصلوا لسارة و مريم إلي كانوا يلعبون سلة........ سارة: اخيرا تمللتوا من لعبتكم المملة فاطمة: والله مو شغلج سارة: عيل تعالوا لعبوا معانا فاطمة: ما نبي نلعب سارة: انزين وين منال ما اجوفها معاكم؟؟ هناء: منال قاعده تلعب مع يوسف شطرنج ومن سمعت سارة هالحجي حست بالغيرة و قررت انها اتسوي شي في بالها، و قالت لمريم: مريم اشرايج انغير المكان ، تمللت من اللعب اهني مريم: وين تبينا نلعب؟ سارة: تعالي معاي عماد: وين بتروحون و بتخلونا؟؟ مريم: تعالوا معانا سارة: اي احسن تعالوا وراحوا كلهم مع سارة إلي راحت صوب المكان إلي قاعدين فيه يوسف و منال ومن جافتهم مع بعض قاعدين يلعبون ويضحكون مندمجين مع بعض قررت انها تخرب بينهم..... وقاموا كلهم يلعبون بالكرة و كل واحد ياخذها من الثاني ، لين ما وصلت سارة جريب من يوسف ومنال خذت الكرة و رمتها على لعبة الشطرنج، وتنثر كلشي على الطاولة............. يوسف و منال تفاجأوا من الكرة إلي يتهم و اهم مو حاسين لها و طالعوا سارة إلي سوت روحها منحرجة و قالت: آسفة ما كان قصدي، كنت العب مع مريم والكرة يت صوبكم بالغلط منال: لا عادي ويوسف يقول في خاطره( زين ما سويتي يا سارة ، احسن خربتي اللعبة علشان لا تغلبني منال و اتفشل جدامها) قال يوسف لمنال: اوكي انه الحين بقوم بروح داخل و ما في وقت انعيد اللعبة مرة ثانية منال: اوكي، عيل مرة ثانية لين جفتك اتحداك تغلبني يوسف: هههههه انشاالله مرة ثانية وقام يوسف رايح داخل و اما منال قامت تتمشى ادور هناء و فاطمة ومي، و اما سارة ارتاحت لما جافت إن يوسف قام عن منال............ وذيك الليلة سهروا بيت بو محمد وبيت بو يوسف لساعة 1 في الليل و اهم مستانسين و فرحانين......... يوم الأربعا العصر راحت هناء غرفة اخوها يوسف ولقته منسدح على فراشه يطالع السقف و يفكر، و لما جاف هناء داخلة عليه اعتدل و قعد على طرف لفراش........... هناء: هلا بأخوي ....... هلا بالمعرس ههههههههه يوسف:هههههههه شنو بعد معرس و انه للحين ما خطبت هناء: انشاالله بتخطب جريب يوسف:الله يسمع منج هناء: انزين ما قلت لي اشرايك في منال انشاالله عجبتك؟؟ يوسف: بصراحة منال وايد حلوة و حبوبة هناء:يعني انقول مبروك يوسف:ههههههههه..... اول خل توافق هناء: انشاالله بتوافق يوسف: انزين انه الحين شلون بعرف رايها فيني؟؟ هناء:اممممم......... انه عندي حل يوسف:شنو؟؟ هناء: بتصل في فاطمة و بخليها تتصل في منال و تعرف منها رايها فيك...... ها اشرايك؟؟ يوسف: اوكي بس بشرط انها ما تعرف إن انه بخطبها هناء: اوكي وقامت هناء رايحة غرفتها واتصلت في فاطمة و قالت لها السالفة........... عقب ما اتصلت هناء في فاطمة راحت فاطمة ادورأمها علشان اتقول لها السالفة ولقت سارة قاعده بالصالة اطالع التلفزيون فسألتها...... فاطمة: سارة وين أمي دورتها فوق و مالقيتها؟؟ سارة: انتي ليش تبين أمي؟؟ فاطمة: مو شغلج في سالفة بيني و بينها سارة: و شنو هالسالفة؟؟!!..... لازم تقولين لي فاطمة: انتي مالج دخل فيها سارة: ليش انه مو بنتها علشان ما تقول لي فاطمة: هالسالفة مو مالت يهال سارة: و انه ابي اعرف فاطمة: اووووووه مللتني انه بس سألتج وين أمي طلعتي لي سالفة سارة: ابي اعرف شنو السالفة بعدين بقولج وين أمي فاطمة: مب لازم تقولين لي انه بدور أمي بروحي وراحت فاطمة ادور أمها و لقتها بالمطبخ، ويوم جافت سارة إن فاطمة تكلم أمها قررت إنها اتعرف السالفة و راحت وقفت عند باب المطبخ من بره بدون ما يجوفونها علشان تسمع السالفة إلي صايره و اهي ما تدري عنها........... فاطمة: الله يعطيج العافية يا يمه أم محمد: الله يعافيج فاطمة: انزين بقولج يمه عن سالفة يوسف و منال ومن سمعت سارة اسم يوسف استغربت اشفيه يوسف مع منال وكانت حاسة إن في شي بينهم من البارحة يوم اجوف نظراته لها......... ام محمد: خير انشاالله شنو صار عليهم؟؟ فاطمة: هناء سألت يوسف عن رايه في منال وقال إن معجب فيها وبس باقي إن منال اتوافق عليه و خلاص ومن سمعت سارة هالجملة حست بالقهر و الغيرة وعرفت إن يوسف يبي يخطب منال، و ما قدرت توقف و تسمع اكثر من جذي وبسرعة راحت غرفتها تركض و اهي تصيح....... ام محمد: اي انه بكلم ام منال الليلة و بجوف شنو رايها فاطمة: بس يوسف يبي يعرف راي منال فيه قبل لا يتقدم لها رسمي، انه اقول يعني لو اتصل فيها و اسولف معاها و اعرف منها رايها في يوسف يكون احسن، علشان اذا ما عجبها ما يحتاج يروح يتقدم لها ام محمد: اي و الله صح كلامج، عيل اتصلي فيها بس لا تبينين لها إن اهو يبي يخطبها فاطمة: اوكي وراحت فاطمة غرفتها واتصلت في منال............ منال من جافت الرقم استغربت لأن فاطمة ما تتصل فيها ودايما تتصل في مي يعني شلي يخليها تتصل فيها الحين؟؟.......... و ردت عليها.......... منال: الو....... هلا فطووووم فاطمة: هلا و غلا فيج... شخبارج؟؟ منال: الحمد الله فاطمة: انزين انه متصلة اسألج عن الزراعة لأني ابي ازرع ورد ومب عارفة شلون ازرعه؟؟ منال: اسهل شي انج تزرعين ورد بس اهم شي تتبعين التعليمات المكتوبة ويه البذور مالت الورد، و تخلين كل شي مناسب لزراعة الورد من درجة الحرارة و الضوء فاطمة: بعد ما يبي له شي؟؟ منال: لا بس هذا اهم شي وجوفي الوقت المناسب إلي لازم تسقين فيه الورد فاطمة: اوكي منال: بعد ما تبين تسألين عن شي؟؟ فاطمة: مشكورة حبيبتي بس انه متمللة يصير اسولف معاج و لا ما عندج وقت لي؟؟ منال: افا عليج...كل وقتي لج فاطمة: تسلمين لي......... انزين بسألج اشرايج في العزيمة البارحة انشاالله استانستوا؟؟ منال: اي بصراحة واااايد كانت حلوة و ياليت كل مرة تصير عزيمة جذي فاطمة: انشاالله كل مرة بنسوي.......... اي تعالي بسألج من غلب امس بالشطرنج انتي و لا يوسف؟؟ منال: هههههه تدرين إن شكل يوسف ما يعرف يلعب فاطمة: ههههههه صج و الله؟؟ يمكن ناسي اللعبة لأن يقول من زمان ما لعبها منال: يمكن، بس انه اشك في هالشي لأن قواعد اللعبة ما يعرفها اصلا فاطمة: هههههههه، انزين ومن غلب تالي؟؟ منال: اصلا ما كملنا اللعبة للنهاية لأن سارة و مريم و محمود و عماد يو صوبنا يلعبون و رموا الكرة بالغلط على الطاولة و تنثر كلشي وقامت فاطمة تضحك و تقول في خاطرها اشوه إن العبة اختربت علشان لا ينكشف يوسف على حقيقته مع إن منال شاكة فيه ما يعرف يلعب........... فاطمة: انزين بس اهم شي إن يوسف ما مللج يوم قمنا انه و هناء و خليناج بروحج معاه؟؟ منال: بالعكس يوسف كان وايد طيب و خلوق وحبوب وما عليه قاصر فاطمة: يعني يوسف عاجبنج؟؟ منال: شنو هالسؤال يا فاطمة؟؟ فاطمة: مسامحة بس فضوول اسأل........ اوكي عيل انه بخليج الحين منال: اوكي فاطمة: بااااااااي منال: بااااااااااااااي ومن عقب ما سكرت فاطمة التلفون من عند منال اتصلت في هناء و قالت لها كل شي قالته منال عن يوسف، وبعدين راحت حق امها و قالت لها إلي قررت انها تتصل في أم منال و وتخطب منال حق يوسف........... وأما هناء فراحت ليوسف و قالت له الكلام إلي قالته منال عنه، و هالكلام خلاه يفرح وايد و يصير عنده أمل إن يمكن منال اتحبه ويمكن توافق عليه و بتخليه ينسى منى............ وعقب جم يوم ردت أم منال على أم محمد الخبر إن منال اموافقه على يوسف، ويوم عرف يوسف بالخبر طار من الفرح وما صدق عمره وحس إن روحه ردت له مرة ثانية......... وبجذي حددوا يوم الملجة و الخطوبة، و الكل بدا يستعد لهالمناسبة.................... وكانت حفلة الخطوبة بتصير عقب اسبوع يوم لربعا ليلة الخميس، و خلال هالفترة كانت فاطمة وهناء و منال ومي و مريم دايما مع بعض ويطلعون يروحون المجمعات علشان يشترون لهم أغراض و ثياب حق الخطوبة، ما عدا سارة إلي كانت منقهرة و لا طلعت معاهم و كانت كل بروحها قاعده تفكر في يوسف و الكل مستغرب منها يعني ليش ما تجهز روحها و تطلع تشتري لها أغراض... بس خلوها على راحتها و لا قالوا لها شي، حتى إن اهي قررت ما تروح الخطوبة............. ويوم الخميس كان الكل مستعد ومجهز نفسه............. يات أم محمد لفاطمة وقالت لها: يلا فطوووم خلينا نروح الصالون ما في وقت فاطمة: اوكي يمه الحين بايي بس بخلي لي كريم أساس أم محمد: عيل ليش إحنا رايحين الصالون مدام بتتعدلين؟؟ فاطمة: لازم اتعدل شوي مو احنا في طريجنا لازم بجوفونا الناس، ما يصير يجوفوني مو حلوة ههههههه أم محمد: يلا خلصينا بسرعة اأنه بروح أجوف إختج سارة وبايي لج..... أبيج بارزه فاطمة : اوكي راحت أم محمد لغرفة سارة ولقتها اطالع التلفزيون و لا على بالها أم محمد: سارووو؟..... شنو قاعدة تسوين؟؟!! سارة: ما اجوفيني..... أطالع التلفزيون أم محمد: يلا قومي بنروح الصالون سارة: أي صالون أي خرابيط؟؟؟ أم محمد: ما تبين تسوين شعرج؟؟ وما تبين تتعدلين؟؟ سارة : لا..... أو لا انه راسي يعورني وثانيا مالي خلق أسوي شعري واتعدل أم محمد: الحين تروحين أعراس كل الناس و تسوين شعرج حالج حال أهل المعرس والعروس والحين عرس بنت خالتج ما تسوين شعرج؟؟؟ سارة: قلت لج يمه راسي يعورني ومالي خلق..... أصلا العرس كله على بعضه مب حابه أروحه بس شاسوي غصب عني بروحه أم محمد: إنتي تقولين هالكلام ما أصدق!! سارة: وليش ما أقوله؟؟ أم محمد: على الأقل مب تسريحة بس ستشوار سارة: انه بسويه في البيت أم محمد: على العموم على راحتج إلي تبينه سويه ومادام إهم يتكلمون يات فاطمة وقالت: يمة كاني جاهزة خلنا نروح أم محمد إطالعها بإستغراب : وين نروح العرس ولا الصالون؟ كل المكياج إلي حاطته وبتروحين للصالون عيل شنو خلتي لهم؟؟؟ هههههههههههههههه فاطمة: يمـــــــــــــــــــــــ ه وركبت أم محمد وفاطمة سيارتهم رايحين الصالون و تمت سارة قاعدة في البيت بروحها وقعدت تقول: أف انه مب طايقه منال بنت خالتي أخذت مني يوسف وقعدت تفكر في مقلب أو شي علشان تمنع أمها من الروحه للعرس و أخيرا حصلت شي، قامت سارة وراحت حجرة أمها وقامت ادور عن الفستان إلي بتلبسه أمها وأخذت المقص وسوت فتحه في الفستان بحيث إن إهي تبين مو من فعل فاعل وقالت : الحين أمي إذا شافت فستانها اليديد فيه هالفتحة مستحيل تروح........ وراحت بعدين اطالع التلفزيون فرحانه........ بعد أكثر من ساعتين رجعت أم محمد وفاطمة من الصالون كانت الساعة 8 ونص، دخلت فاطمة حجرتها تجهز نفسها ونفس الشي أم محمد أما سارة فكانت اطالع التلفزيون ولا على بالها وكأنها ضامنه إن إهم ما بيروحون العرس، بعد مدة جذي يمكن نص ساعة طلعت أم محمد من حجرتها وإهي لابسة فستانها و قالت لسارة : ها سارونه قولي لي شنو رايج فيني؟؟؟ تعجبت سارة لأن الفستان إلي لابسته أمها مو أهوه الفستان إلي خربته وقالت: إي إي يمه حلو بس إنتي متأكدة إن هذا الفستان أهو إلي راح تلبسينه؟؟!! أم محمد: إي هذا أهو ودخلت سارة حجرة أمها وراوتها الفستان إلي خربته وقالت عيل هذا الفستان؟ أم محمد: إي هذا الفستان إلي لبسته في خطوبة بنت إختي ندى بس الفستان صار ضيج علي مب عاجبني وكنت أبي أقطه إهني سارة تذكرت إن هذا الفستان أمها لبسته من قبل وقالت في نفسها: أوووو خسارة بس لو ذاكرة الحين..... راحت علي يعني لازم أروح الخطوبة علشان أغث نفسي ....... وقطع سلسلة أفكارها صوت إختها فاطمة تقول : ها يمه جوفيني مو طالعة أحلى من العروس؟؟ ههههههههه أم محمد: الله عليج يا فطوم قمر 14 هههههههههه فاطمة : إنتي بعد يمه طالعة حلوة وتبينين أصغر ههههههه أم محمد مستانسة: صج؟؟!! فاطمة: إي صج يمه وإهم يتكلمون إلتفتت أم محمد لسارة وقالت : سارة إشفيج شنو تنطرين روحي لبسي سارة : ما شريت لي ثياب أم محمد: بلا عيارة لبسي لج أي شي طلعت سارة من الحجرة تفكر في حل علشان ما تروح العرس و ما حصلت إلا غير إن إهي تروح العرس وترضى بالأمر الواقع .