الفصل 3
الشاب : عوض .... اسمي عوض .
احمد : عاشت الاسامي ......، وانا اسمي احمد .
عوض : والنعم فيك .
احمد : الله ينعم عليك .
واتحركت السياره باتجاه صناعية العين ، ونزل عوض من السياره ، ودخل الكراج
عشان ايدور على هندي ايصلح سيارة احمد ، ... بينما ظل احمد قاعد في السياره
ينتظر عوض، واثناء ما كان عوض داخل الكراج ، رن الموبايل ، وكان الموبايل
معلق على التابلوم وجريب من وجه احمد ، وبحركه لا اراديه شاف احمد الموبايل ،
وبعدين التفت يمين ، لكنه رجع مره ثانيه يطالع نفس الموبايل لان الرقم الطالع
فيه شد انتباهه ، ولما ركز عليه اكثر اكتشف ان ها الرقم هو نفس رقم سعاد
......
وبقى جامد في مكانه من الدهشه ، وعينه مامصدقه ابدا اللي قاعده اتشوفه ، رقم
سعاد يظهر على شاشة تلفون عوض ، ....وظل التلفون ايرن فتره ليما سكت ، وبعد
شوي رجع عوض ومعاه الهندي وركبوا السياره ، واتحركوا ، وظل احمد صامت لفتره ،
وبعد دقايق رن التلفون مره ثانيه ، واحمد قاعد يسرق النظر ويطالع الرقم ،
ويركز عليه ، مره ومرتين ، وساعتها اتأكد تماما انه رقم سعاد ، وبعد حوالي
خمس رنات او اكثر رفع عوض السماعه ودار بينه وبين المتصل حوار سمعه احمد وكان
عوض
ايقول :
عوض : الووو .
المتصل :.................
عوض : وعليكم السلام ، اشحالج .
المتصل : .........................
عوض : تسملين يا الغاليه ، متى وصلتي السكن .
المتصل : ...........................
عوض : وشو الجو عندكم في الشارجه .
المتصل : ........................ .
عوض : ايوااا انزين حبيبتي سيري الحينه ارتاحي ونامي انتي يايه من خط ، وباجر
باتصلج ، اوكيه حياتي ..
المتصل : ........................
عوض : ياالله باي .
المتصل .......................وسكر عوض الموبايل ، وظل احمد ساكت لفتره بسيطه الى ان قال :
احمد : ما شا الله انته متزوج .
عوض : هههه بعدني ما تخلبت عشان اتزوج ، ولاحتى خاطب .
احمد : ايوااا .
عوض : ههههه انته يمكن سمعتني اتكلم في التلفون مع وحده وعشان جذيه ظنيت اني
متزوج ،.... وانا بكلمك بصراحه .....مع اني شايفنك مطوع ، وما يجوز اقول ها
الكلام جدامك ، بس بصارحك عشان ما تظن فيني ظن سىء ، هذي مجرد علاقه عابره مع
هالبنت ، ولا تعتقد اني اركض وراء البنات في الاسواق ، لا ...انا عمري ما
سويتها ، وهاالبنت طرشها لي ربيعي بعد ما مل منها .....
قال احمد وهوه ما مقتنع : هيه بس مب حرام اتكلم بنت غريبه عنك في التلفون.
عوض : انا عارف ها لشي ، وادري انه مايجوز ، بس احنا معشر الرياييل ما ندري
ليش ننجذب للحريم ، مثل المغناطيس كلما انحاول نبعد عنهم يجذبونا لهم ، ....
هذي فطره موجوده في الريال مهما كان ، لازم يتأثر بالجنس الثاني مهما كانت
قدرته على التحمل... والرسول قال فيما معناه وانا ما مذكر الحديث بالضبط ((
ماتركت على امتي من الرجال من شر ، اكثر من النساء ))
احمد : كلامك صحيح .
عوض : وبعدين يا احمد ،احنا وايد اشياء انسويها ونحن متأكدين تماما انها غلط
وحرام بعد ، يعني مثلا .. كثير من الناس وانا منهم من يسمع الاغاني، وهم
متأكدين تماما انها حرام ، وبعدين احنا انشاهد التلفزيون بكل ما فيه من مشاهد
محرمه ... وما انقول الا الله ايعينا ويغفرلنا زلاتنا ويتجاوز عن اخطاءنا
.....
احمد : معاك حق اخوي عوض .
وبعد دقايق وصلوا لمكان سيارة احمد المعطله ، وقام الهندي باصلاحها بدقايق
بسيطه ، وبعد ما صلحها قال احمد لعوض :
احمد : مشكوور يا الطيب ما تقصر ، تعبتك واي وايد .
عوض : لا تعب ولا شي ، انته ضيفنا واكرامك واجب علينا .
التفت احمد اتجاه الهندي اللي صلح السياره وطلع محفظته عشان ايحاسب الهندي ،
وقاله :
احمد : رفيق كم حسابك .
الهندي : الحساب اندفع كامل ارباب .
احمد : كيف اندفع الحساب كله ، و انا ما عطيتك شي .
الهندي : هذا بابا عوض يعطني فلوس .وفي ها اللحظات انربط السان احمد وما عرف شو ايقول من المفاجأه ، يعني ما
يكفي ان عوض اخذ من وقته وتعب عمره ووداه وياباه ، والحين يدفع عنه حساب
تصليح سيارته :
والتفت احمد اتجاه عوض عشان يترجاه ياخذ فلوسه لكن عوض قال بسرعه :
عوض : لا تقول شي ولا تحاول تعطيني أي شي لانه واللي خلقني ما راح آخذ منك أي
فلس .
احمد : والله الصراحه ما عارف شو اقولك انته وايد احرجتني ، حتى ما محصل رد
اقولك اياه ، وما اعرف كيف اطلع من يزاك .
عوض : خيركم سابق .
احمد : اخ عوض بغيت اسألك سؤال بس بدون زعل .
عوض : اتفضل اسأل وما في زعل بين الاخوان .
احمد : انا ما اختلطت مع شباب العين ، بس بعض الربع من الشارجه والسموحه في
كلامي هذا ايقولون اني شباب العين راعين مشاكل وفوضى وضرايب .
عوض : ههههه يا احمد في كل مكان تلاقي هالفئه ، وها الفئه موجود عدنا فعلا
باعداد قليله .... لكن الاكثريه من شباب العين ناس طيبين وراعين واجب وكرم
ورجال مواقف ...
احمد : وانا اشهد و ها الشي شفته بعيني قبل لا اسمعه بأذني .
عوض : مدام جذيه .....ما تطلع اليوم من العين الا متعشي عندي وشارب من قهوتنا
، ولا تعتذر لان اعتذارك غير مقبول .
احمد : بعد شو بقول بعد كلامك ، بس ما نطول لان وراي خط الشارجه .
عوض : انزين بات عدنا .
احمد : لالا عندي دوام باجر في الكليه في الشارجه .
عوض : ما عليه ، الحقني بوصل الهندي وبنسير البيت نتعشي .
وبعد ما تعشي احمد وذاق حلاوة الكرم العيناوي ، ركب سيارته وودع عوض ، واتجه
ناحية طريق دبي الشارقه ....
ورفع سماعة التلفون وكان هدفه طبعا الاتصال بسعاد ، ولكن هالمره المكالمه
بتكون غير .....بسبب التطورات اللي حدثت ، .... ورن التلفون وبعد ثواني رفعت
سعاد خط الهاتف وقالت :
سعاد : الووو
احمد : السلام عليكم .
سعاد : عليكم السلام .
احمد : شخبارج .
سعاد : تسلم يا الغالي ، شخبارك انته .
احمد : تمام .
وسكت احمد فتره طويله ، لميا اتكلمت سعاد وقالت :
سعاد : شو فيك ساكت احمد .
احمد : ممكن سؤال .
سعاد : انته تامر .
احمد : انتي ليش قصيتي علي .
سعاد : انا قصيت عليك ؟؟ بشوه ...
احمد : انتي ما قلتي انج ما اتعرفين شباب ابدا .
سعاد : هيه انا فعلا ما اعرف حد ..
احمد : متأكده .
سعاد : طبعا ، انتي ليش تقول جذيه .احمد : بس انا عرفت انج اتكملين شباب . .
سعاد : اللي قالك جذاب... بس ... بس انته ما تعرف عني الا رقم تلفوني واسمي ،
وما تعرف عني أي شي ثاني ... فمنو قالك عني ؟؟
احمد : تقدرين تحلفين انج ما تعرفين حد ثاني .
سعاد : وليش احلف .
احمد : تقدرين تحلفين ولا لا .
سعاد : امم شو اقولك ... ما اقدر .
احمد : يعني اتعرفين حد ثاني .
سعاد : آآ يعني علاقات عابره بسيطه و.
احمد : وشوه ، يعني انا كنت لعبه عندج ..
سعاد : انته ليش مكبر السالفه ، هذا ماضي وانتهى .
قال احمد وهوه منفعل : بسألج ، انتي شو تبين مني .
سعاد : اووه لاتصرخ علي ، ماشي كنت ابي اسولف وياك واتسلى معاك .
احمد : وانتي من وين يبتي رقمي .
سعاد : يبته مكان ما يبته..
احمد : ياسعاد حرام اللي قاعده اتسوينه ، انتي بنت زينه وحرام اتضيعين كرامتج
ودينج واحترامج لنفسج واتكلمين أي شاب يعجبج او ما يعجبج .
سعاد : اسمع انته ايييييه ، انته مالك شغل فيني ، انا حره اسوي اللي ابيه ،
انته مب وصي عليه ، ... تبى اتكلمني اهلا وسهلا ، ما تبى على كيفك .. بس لا
تتدخل في خصوصياتي لو سمحت .
احمد : ولواستمرينا شو بتكون نهاية العلاقه .. الزواج ..
سعاد : ههههه انا اتزوج مطوع ، ها اللي قاصر بعد ، آخذ مطوع مثلك يحرمني
الطلعه ويحبسني مثل الخدامه ، ويتحكم فيني وما يخليني احط ذرة مكياج بويهي ،
هذا بعدك يا حبيبي.....
اتوقعت سعاد ان احمد بينفعل ويثور بعد كلماتها الساخره هذي ، لانها اتكلمت
عنه بكل استهزاء . وتحقير .......
لكنها اتفاجأت بهدوءه... وقال الها كلام بلهجه غريبه ما سمعتها من قبل حيث
قال....
احمد : يا سعاد ، انا لما عرفتج ، حسيت ان معدنج اصيل ، وعقلج كبير وبداخلج
خير كثير ، وشعرت انج انسانه عظيمه لكنج مسخره قدراتج لامور ما تناسبج
ابدا.... ...يا سعاد شيلي الغشاوه من على عيونج ، وارجعي لطريق ربج ، واحفظي
كرامتج وعزة نفسج وصوني عرضج من انياب الناس .
سعاد : لا غشاوه ولا شي ، انا بكامل عقلي وبعدين قولي انته الحين شو تبى .
احمد : انا اتحرى فيج الخير يا سعاد ، وعشان جذيه بدفع مهرج .
سعاد : بتدفع مهري !! ومنو قالي اني اباك ، يا بني آدم انته ما تفهم انا ما
ابي اتزوجك .احمد : لا تخافين بدفع مهرج بدون ما نتزوج .
سعاد : وفيه مهر بدون زواج .
احمد : ها المره بقدملج مهر ، لكن بدون ما نتزوج ،....... مهر لشي ثاني غير
الزواج و ما بتعرفينه الا يوم اتشوفينيه ، وساعتها انتي تحكمين... تقبلين
المهر او ترفضينه .. .
سعاد : وشو هاالشي اللي بتقدملي مهر لاجله ،.... والمهر عباره عن شوه ...
فلوس ... ذهب او ....... كيف بتقدملي مهر وانتي مابتتزوجني ؟؟ قولي كيف ؟؟
احمد : المهر بيكون اغلى من هذا كله ، اغلى من كنوز الارض كلها ، لكنه مهر
بدون زواج.....بدون زواج ... بدون زواج ...... مع السلامه يا سعاد اتمنالج
التوفيق بحياتج .. في امان الله وحفظه ..
سعاد : لحظه لا تسكر قبل لا تفهمني كلامك الاخير ، شو تقصد بمهر بدون زواج ،
قول ....
لكن احمد قفل الخط بويها ، ولما اتصلت مره ثانيه حصلت التلفون مغلق وظل مغلق
رغم تكرار محاولاتها الاتصال فيه ، ولما يأست من الاتصال ظلت اتفكر ، شو يقصد
احمد بمهر بدون زواج ... شو طبيعة هالمهر ... وليش بيقدمه دام انه ما يريد
يتزوجني ... سؤال ماله جواب الا عند احمد ....
وما كانت سعاد تدري ، ان احمد في هالوقت اتخذ قرار خطير ، وخطير للغايه ،
قرار يصعب على أي انسان اتخاذه ، قرار بيغير حياته بالكامل .... اويمكن ايحط
حد لاستمرارها....
مهر بدون زواج - الجزء الثالث والاخير
دخلت اشواق على سعاد بغرفتها ، ولاحظت اشواق ان سعاد قاعده سرحانه واتفكر ،
لدرجه انها ما حست بدخول اشواق لغرفتها .. وهذا اللي خلى اشواق اتقول :
اشواق : ياجماعه اللي هنيه وينكم .
لحظتها بس انتبهت سعاد لوجود اشواق والتفتت الها وقالت :
سعاد : اشواق متى ييتي .
اشواق : صارلي دقيقه وانا داشه .
سعاد : اتصدقين ما حسيت فيج .
اشواق : هههه ، اكيد حد ماخذ عقلج ..
سعاد : شو قصدج .
اشواق : ههه انتي اكيد قاعده تترين تلفون من الشيخ احمد هههه .
سعاد : احمد اتصل قبل شويه .
اشواق : اووو بها السرعه ، .... وشلي صار بينكم وبشوه افتالج .
سعاد : اسكتي...... اتضاربت وياه .
اشواق : اتضاربتوا ! ليش عاد .سعاد : اتصدقين عرف اني اكلم شباب .
اشواق : مستحيل ، هوه ما يعرف عنج الا اسمج ورقمج .
سعاد : وها الشي اللي بينني ، كيف عرف ، مع انه كان مقتنع بالعكس .
اشواق : شي غريب ... وشو استوى بعدين .
سعاد : قال لي شو نهاية ها العلاقه .. الزواج .
اشواق : هههه ما اتخيلج ماخذه مطوع هههه .
سعاد : ههه انا قلتله هذا بعدك ، سعاد تاخذ مطوع هههه.
اشواق : هههه ... بس علاقتك ما طولت وايد من امس المغرب لين اليوم فاليل ،
يعني تقريبا اكثر من يوم بشوي .
سعاد : هيه صح ، ما استمرت اكثر عن يوم واحد بس ، اقصر تجربه مريت فيها ....
اشواق : يا الله اتسليتي وياه في عطلة نهاية الاسبوع ههههه .
سعاد : ههههه صدقج كانت تسليه حلوه ..... اممم لكن .
اشواق : لكن شوه بعد .
سعاد : قبل لا يسكر المكالمه ونفترق ، قال لي كلام غريب وبلهجه عجيبه .
اشواق : شو قال .
سعاد : قال بيدفع لي مهر .
اشواق : مهر ... يبى يتزوجك يعني .
سعاد : لا هذا مهر بدون زواج .
اشواق : مهر بدون زواج !!! .... ابي افهمها هذي كيف مهر بدون زواج ؟
سعاد : اتصدقين انا لحد الآن ماعرفه شو يقصد .
اشواق : وانتي ليش ماسألتيه شو يقصد .
سعاد : حاولت ، لكنه سكر بويهي ، ويوم حاولت اتصل فيه مره ثانيه اغلق التلفون
.
اشواق : ما عليج منه خليه ايولي ، اتلاقينه ايخربط يوم حس انج قصيتي عليه.
سعاد : ايجوز .
اشواق : المهم خلينا من سالفته الحينه .. وخلينا نتصل حق عارف مال راس الخيمه
ونتمصخر عليه شوي .
سعاد : على رايج ، وانا محتاجه اضحك شوي ، قبل دوام باجر .
اشواق : اوكيه دقيقه وبطلع التلفون .....
***********************************************
ومضت الايام ، وسعاد اتحاول تنسى سالفة احمد نهائيا ، واتحاول تشغل عمرها بايشي ، سواء اكان بالدراسه او بالسوالف مع الشباب ، لكن كان كلام احمد الاخير
ايتردد في تفكيرها ( مهر بدون زواج )
وبعد خمسة ايام حاولت تتصل باحمد ، في محاولة لاشباع الفضول عندها ، وقالت:
حتى لوسبني عادي ،على الاقل يمكن ايقولي معنى كلامه الاخير ، ولما اتصلت حصلت
التلفون مغلق ، وحاولت مره ثانيه ونفس الشي ، وقالت بحاول في يوم ثاني ،
وحاولت ونفس النتيجه ...
واستمرت على الوضع هذا شهر كامل ، دايما تلفونه مغلق ....
وبدت الاجازه الصيفيه للجامعة للعام الدارسي 2002 / 2003 ......
ومع بدايتها ، وانتهاء الدارسه واعبائها ومشاغلها ، زاد التفكير عند سعاد ،
سواء بسبب كلام احمد او بسبب الاغلاق الدايم لتلفونه .....
وفي النهاية قررت تتصل باخته هناء وتسألها بشكل غير مباشر عن احمد ...
ورفعت سماعة التلفون واتصلت بهناء وقالت :
سعاد : السلام عليكم .
هناء : وعليكم والسلام والرحمه .
سعاد : شخبارج هنوي .
هناء : بخير والحمدالله ، اشحالج انتي .
سعاد : تسملين حبيبتي ......آآ هنوي بشري شو تقاديرج ها الكورس .
هناء : اممم اربع مساقات يبت فيهم جيد ومساقين مقبول مرتفع .
سعاد : هاااه مو معقوله هنوي ، انا احيدج شاطره ، واتصفين الامتيازات صف كل
كورس ، واقل تقدير اتيبينه جيد جدا .. شو صارلج .
هناء : والله استوتلنا ظروف عائليه صعبه ، شغلت بالي شوي و بسببها ما قدرت
اذاكر ..
سعاد : ايواا .. الله ايعينج .
هناء : الحمدالله على كل حال .
سعاد : آآ هنوي بغيت منج خدمه .
هناء : آمري .
سعاد : ما يامر عليج عدو ... بغيت تسأليلي اخوج احمد عن بعض المراجع
الاسلامية .
سكتت هناء فتره ، وسعاد تنتظر ردها على احر من الجمر ... وبعد فتره مب بسيطه
قالت هناء بصوت حزين :
هناء : احمد مش موجود .
سعاد : ليش وين سار .
هناء : اممم ليش انتوا ما عرفتوا .
سعاد : لا .. ليش شو صاير احمد بلاه شي لا سمح الله .
هناء : ما ادري ..
سعاد : ما تدرين ؟؟ شو قصدج ...
هناء : والله ما ادري شو اقولج يا سعاد .
سعاد : يا هناء انتي مثل اختي ، واحمد اعتبره مثل اخوي .
هناء : يا سعاد احمد مختفي .
سعاد : شو اتقولين ... مختفي ... ياهل هوه عشان يختفي !!
هناء : انا اقولج الصدق يا سعاد .
سعاد : انزين وما دورتوا عليه يمكن صارله شي لا سمح الله .
هناء : طبعا دورنا عليه ، وما حصلنا الا سيارته كانت واقفه عند مغسلة
السيارات .
سعاد : طيب والشرطه والمستشفيات والمطارات وو .
هناء : دورنا عليه في كل مكان ، ليما خبرتنا الشرطه بشي عنه .
سعاد : شو قالوا .
هناء : قالوا ان احمد ، طلع من حدود الامارات عن طريق باص للنقل الدولي ، وان
الباص نزل احمد في الدمام سعاد : انزين وبعدين ما سألتوا السلطات السعوديه عنه .
هناء : سألنا عنه ، ودوروه وما حصلوا أي اثر له لغاية اليوم ، وهم اكدوا انه
ماطلع من حدود السعوديه لانه ما غادر أي مركز حدودي من دخوله الها .
سعاد : شي غريب ... على العموم الله ايرجعه بالسلامه .
هناء : الله يسمع منج يا سعاد .
سعاد : انزين هنويه ما تامرينا بشي .
هناء : تسملين يا الغاليه .
سعاد : الله ايسلمج ، يا الله مع السلامه .
هناء : مع السلامه .
وسكرت سعاد عن هناء ، وبدل ما تشبع فضولها زادت حيرتها ، ولكن اخيرا قالت في
نفسها : وانا اشعليه منه ، انا ليش مصدعه راسي ، وشاغله بالي ، ايسير مكان
مايسير .... احسن حل اني انسى موضوعه نهائيا واريح راسي ... يعني انساه
نهائيا.....
وفعلا قررت سعاد انها ما تتصل نهائيا لا في احمد ولا في حد من اهله .......
مهما كانت الاسباب والظروف ..... ويصير اللي ايصير ................
**********************************************
في نفس هاليوم اللي ايصادف الخامس والعشرين من شهر سته من عام الفين وثلاثه
للميلاد ، وفي نفس الوقت اللي كانت تتكلم فيه سعاد مع هناء ....
كان احمد موجود بغرفه صغيره ، مع واحد من نفس جنسيته ، ومعاهم ثلاثة اجانب
مسلمين ..... وكانت ها الغرفه الصغيره والقديمه ، موجوده في مدينــة (
الرمادي ) التابعه لمحافظة ( الانبار ) اللي تقع بغرب العاصمه العراقية
المحتله ( بغداد ) ، وكان احمد وزميله ناصر من نفس الدوله والاجانب المسلمين
الثلاثه قد انضموا للمقاومة الاسلاميه بالعراق للجهاد ضد جنود الاحتلال من
حوالي شهر كامل.... ودار ها الحوار ما بين احمد وناصر :
ناصر : قولي يا احمد ، كيف قدرت توصل للعراق .
احمد : اول شي وقفت سيارتي عند المغسله ، وركبت في باص دولي على اساس ايوصلني
للدمام ، ومن الدمام وعن طريق بعض الاصدقاء اللي اعرفهم من زمان ، قدرت اتسلل
عبر الحدود السعوديه العراقيه ليما استقبلنا واحد من الاخوان هنيه . .
ناصر : اممم انا عاد طلعت من العين مع واحد من الربع ، وخليته ايوصلني لمطار
ابوظبي ، ومن مطار ابوظبي وصلت العاصمه السوريه دمشق ، وعن طريق الحدود
الشرقيه لسوريا وبمساعدة الربع هناك قدرت اتسلل للعراق ..
احمد : الحمدالله اللي سهل علينا ها الشي .... بس بسألك يا ناصر .
ناصر : اتفضل .
احمد : في سؤال محيرني لحد الآن.. منو اللي ينظم المقاومه الاسلامية في
العراق ويوجه المجاهدين عشان ايقومون بالعمليات العسكرية ضد الاحتلال .
ناصر : ما عندي اجابه لها السؤال ، وكل الاخوه هنيه ما يعرفون أي شي عن منظمي
المقاومه ، وحتى الوسيط اللي ما بينا وبين قياده المقاومه ما يعرف من ينظمها
، هذا عمل سري على اعلى مستوى ..... ومب مهم انعرف .
احمد : ليش ..