طفلتي اليتيمه - *بارت67* *ليلة من فبراير* - بقلم لا اعلم فقط ناشره | روايتك

*ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ https://whatsapp.com/channel/0029Vb5nySH77qVOUYY2kt3M *البارت67* *ليلة_من_فبراير* ☆☆ ☆ النِّسيانُ دَواءٌ، يَزولُ مَفعولُهُ لَيلاً فَـ تظاهر بأنّك بخير دائماً مهما عصفت بك الحياة، فالكتمان أجمل بكثير من شفقة الآخرين عليك. ❤️ نهاوند ـ صح كلام بركات اني عندي 3 خوات وكلبت الدنية علمودهن بينما ياسر بسببي خسر اهله وكل عشيرتة وناسة عمت عيني شكد انانية وما حاسة بروحي خلص اطلك منة حتئ ترجع علاقتة باهلة وناسة طبيعية مثل الاول كتبت لبركات .. اني قابلة اطلك منة بس احجو وياه الله يخليكم راسلو لان والله كلش مريض كطع الاكل والشرب علمودكم متدري شكد يحبك يابركات دائما يذكرك كدامي بالخير انت وخواتك واخوتك واني علئ حبة الكم حبيتكم بس راسله الله يخليك وكلة كلمة اطيب خاطرة واني عد وعدي وكلمتي راح اتركة وداعت خواتي وياسر الماعندي اغلئ منهم.. رسلت الرسالة وكعدت انتضر ردة مر اكثر من ساعتين وماكو جواب كل شوي اروح وارجع للابتوب بس ماكو رد.. ياسر ـ جنت متمدد بالفراش واجاني اتصال علئ التلفون باوعت هذا سالار ولو مابية حيل احجي بس عدلت كعدتي وحجيت وياه .. ياهلا بضلعي ـ لك انت خليت بيهه ضلع تجي للعراق ياناقص ومتمر عليه ـ حقك والله بس صارت ركض ركض ومافكرت امر لاحد ـ كول نسيتي وفضهه ـ يابة وداعتك مو هيج ـ لك غير غالي عليه وادورك لو ماغالي منو يتفطن بيك ـ ادري وداعتك بس شسوي ـ احجيلي شنو صار شبيك اشو صوت فد مرة متغير ـ حجيتلة الصار وياية وسولفنة عن وضعه ووضعي وعرف ليش اجيت للعراق .. بس مابيدة شي غير يهدائني ويهونهه عليه ووعدتة علئ المرة الجاية امر عليه ونبقه سوية فد اسبوع يلة قنع ونهيت المكالمة حسيت نفسي كلش جوعان والم براسي ماعرف من شنو من الجوع لو من النوم لو من الادوية .. سندت نفسي وارتجيت وكمت . . وكفت يم الباب شفت نونة لازمة الابتوب ومعاني وجهه حزينة جنهه تريد تبجي اكيد داخلة كوكل ادور عن علاج الي خطية والله هالبنية متأذية هواي علمودي نونة .. ـ كاعدة انتضر رد بركات وسمعت صوت ياسر رفعت راسي لكيتة واكف مرتجي علئ الباب .. شمرت الابتوب من ايدي ورحت اركضلة صلوااات ياربي ممصدكة عييني واكف كدامي عيون نونة ورحهه وكلبهه وعمرهه ـ تسلميلي غلا.. احس روحي كلش جوعان وراسي يوجعني ودايخ ـ اي مو تدلل يانضر عيني أمر وكول شنو مشتهي ـ ماعرف مابالي شي معين ـ زين تريد اسويلك دولمة ؟ عندي جدر مجمد بس اطلعه واستوة ـ لالا ماريد ـ زين اسويلك تشريب لحم ـ لا ممشتهي ـ زين اني طابخة بامية وتمن تريد اصبلك ـ لا ـ زين تريد سمج دجاج يعني اكو شي ابالك بس كلي شتريد وهسة اطلع اجيبة من السوك .. ضل حاير ويتصفن كلما اذكرة باكلة معينة احس نفس تلعب منهه وتكش روحه... زين شوف مسوية كبة تمن بالمجمدة تريد اكلي الك منهه ـ ماريد شي بي دهن ـ دنحجي وطلعن البنات من الغرفة من شافو واكف يم الباب ركضن عليه نغم ـ اييه يالله الحمد لله علئ سلامتك عمو ـ الله يسلمج حبيبتي نونة ـ جوعان وميريد اكل بي دهن ـ اسوي اندومي تاكل ويانة نونة ـ وج يا اندومي هو هذا هم اكل ـ لا ماريد عمو سوي الكم واكلو بالعافية الحان ـ زين خلي نصب عشة ونكعد كلنة متت جوع ياسر ـ ههه عشيهه لهاي الحلوة ام بطن ـ من ضحك وياهه عبالهه رجع بحيلة و بعافيته وراحت تركض عليه تريد تشاقة وياه مثل قبل شقاهم ادفر واتضرب لان يكول عليهه ام بطن ستوهه وصلت اله واندفع بالكاع ووكع حتئ حيل بعد ماعندة يتشاقة وية الحان بطخة منهه وكع كلنة ركضنة عليه وسندناه .. هيييي ثوولة هو هييج اليتشاقة ـ لاتحجين عليهه اني عثرت ووكعت ليش ترزلين بيهه الطفلة الحان ـ موو قصدي عمو بس والله دائما هيج نلعب سوية ـ عادي عمو عثرت لاتهتمين نونة ـ استند عليه ودخلتة للغرفة كعدتة علئ الفراش .. نغم ـ عمو ..راح اسويلك عشئ من ايدي حتئ لو بس تكعد ويانة مو الا تاكل اشتاقيت لكعداتنة سوية ـ صار عمو صار.. روحي سوي العشة وهسة اجي وياكم نونة. ـ هسة اني اسويلكم نغم ـ لالا ابقي يم عمو اني وصبا والحان نروح للمطبخ.. يلة. امشن بنات ـ ديري بالج لا تحتركون بالدهن بالنار انتبهن ـ كبرنة لاتخافين علينة بعد ـ طلعن البنات وسدن الباب وراهن.. شفت .. صارلك شكد مماكل وتالي من دفعه من الحان هيج توكع ـ غير لو اشتهي ـ بس كلي شنو تريد بالضبط .. ـ اريد اعيش بشكل طبيعي عندي زوجه وبيت وعندي اهل يتواصلون ويايه ماطالب شي صعب ـ بس انت تعرف اهلك صعبين هالشي مو جديد عليك ـ اي اعرفهم .. بس ماتخيلت لهاي الدرجة ينكروني متخيلت ينسون خوتنة ويتبرون مني كلت يزعلون سنة سنتين ويرجعون لطبيعتهم ويتقبلوني ـ لا تهتم كلهم هيج ـ لا مو كلهم هيج عندي صديقي من بحزاني همين اتزوج وحدة من خارج ديننة البنية جانت صبية اتعرف عليهه بجامعه بغداد حاول يخطبهه وما اتقبلو لا اهله ولا اهلهه فـ اتخرجو واتزوجو لوحدهم بدون اهلهم .. بس ورة سنة ونص كدر يرجع علاقتة بأهلة .. وعادي اتقبلو الامر واستقبلو ولو مو مثل قبل علاقتهم بس رجعوهه مو مثلي ـ اهلك واهل صديقك مو نفس الطبع.. ومو كل اصابعك سوية جر نفس واتنهد بحسرة ـ لا مو كلهم نفس الطبع ـ ياسر… ـ هـمم ـ اريد اسألك سؤالك وتجاوبني بصراحه.. تمدد علئ الفراش وخلة راسة علئ المخدة ـ كولي ـ انت ندمان علئ زواجنة ـ كل عقلج تسألين هالسؤال لو بية حيل اضحك جان ضحكت بس للاسف شسوي البنت الحبيتهه طلعت مافاهمتني ولا تعرفني ـ اذا صدك تحبني ليش متأذي هيج علئ اهلك ـ لاا نهاوند لاتخلطين الاوراق بهالحجي انتي زوجتي نصفي الثاني وحياتي وعائلتي التمنيت اكونهه بس هذول اهلي عزوتي سندي حزام ضهري عمام ولدي لاتخلطين بينج وبينهم ماكو وجه للمقارنة ـ زين اذا خيروك بيني وبين اهلك المن تختار ـ انتي مين تجيبين هالحجي منو هذا اليخيرينني بينكم وبين اهلي بعدة ما انخلق ترة ـ افرض اهلك خيروك بيني وبينهم المن تختار ـ محد يخيرني بينكم اثنينكم اختاركم وبنفس الميزان غلاتكم اني ماتزوجتج نزوه لو غاية اني ناضج من اتخذت هالقرار مو طفل واتحملت مسؤلية قراري لا تململت ولا حجيت لو عندج كلام ثاني ـ بقيت ساكتة ماجاوبتة ـ شبيج نونة فد يوم ببدر مني كلام ماعجج لو حملتج مسؤلية الصار ـ الشهادة الـ الله ابد ـ لعد ليش محسستني بالذنب ـ مادري .. بس حسيتك ندمان علئ زواجنة لان خسرت اهلك ـ عرفتج عمري 32 سنة واتزوجتج بعمر 34 لاطفل ولا مراهق كدامج غثيتيني بكلامج واني مابية حيل احجي الله يسامج ـ لعد ارجع لحياتك ارجع النة ارجع ياسر الجان يضحك للهوئ الطاير واتقبل الواقع وعيشة ـ ليش ماجنت عايش حياتي قبل هالوقت ماسافرنة ما طلعنة ماتونسنة ما اشتغلت بس هالفترة اتاذيت لان سمعت حيدر مريض ومو اي مرض جللطة مسوية. بي شلل هذا اخوية الجبير بمقام ابوية ورغداء بمقام امي وكل اخوتي وخواتي الهم مكانة بحياتي ما ممكن اسمع بيهم متاذين واكعد واسكت واعيش حياتي بشكل طبيعي وكأنو المريض غريب عني مو دمي ولحمي وحتئ الغريب شفتيني شلون وكفت وياه وعاملتة مو عاد ابن امي وابوية ـ صح ـ لا تقلقين حالتي طبيعية بس يحتاجلي وقت وارجع مثل ماجنت ـ حاولت الهي واضحكة بس ماكو فايدة يبتسم ويرد يصفن كاعدين ودكت الباب نغم .. تعالي دخلي نغم ـ يلة عمو حبيبي سويتلك عشئ يخبل كوم ويانة الله يخليك ـ عاشت ايدج عمو .. هسة اجي نونة ـ شنو سويتو؟ ـ مووكلتي عمو ميريد دهن شويت شرائح لحم بالاوفن ـ وين. تلحك تستوي بعدهه نية ـ لا شرائح لحم خفيفة سويتهه ياسر ـ عفية عمو معدلة لاتضلين تحجين عليهه اسكتي ... ـ لعد كوم اتعشئ من ايدهه اذا متريد احجي عليهه ـ يلة امشي ـ كعدنة علئ ميز الاكل خطية مسويات اشكال الاكل حتئ بيض سلك مسويات ماقبلن ياكلن البنات الا ياسر ياكل وهو مبين ما راغب الاكل اخذ شريحة لحم وضل يكص بيهه عود يوهمنة دياكل خواتي اكلن وكملن لان عدهن دراسه وراحن لغرفتهن وبقيت اني وياه ما اكلت شي ـ من تاكلون اني اشبع راح اروح اتمدد بالغرفة ـ افتح فيس انترنت لهي نفسك بشي ـ مابية حيل اريد اخذ الادوية وانام ـ راح للغرفة وشلت الاكل خلصت الشغل ورجعت للغرفة لكيته نايم اخذت الابتوب وفتحتة رحت لحساب بركات لكيت رساله منة بركات ـ احنة منشتري سمج بالشط اتركي حتئ يرجع لحضنة احنة اهلو وناسو شفتي شكد مايبتعد عنة يحن النة ويريدنة وهذا يدل انتي مجرد نزوة بحياتة ـ الله يسامحك بس اخوك مو طفل واني مو نزوة بحياتة اعرف بي يحبني و متمسك بية واني هم احبة .. ـ خصم الحجي نشوف اوراق طلاقكم يلة نتصل عليه ونحجي وياه واحذري تجيبيلة سيرة عن هالموضوع لان انتي التصلتي بينة وطلبتي مساعدتنة فـ احذري تستعملين هالكلام ضدنة وتالي تتمسكنينن يم ياسر ونطلع احنة الموخوش اوادم… خلي ابالج لادزينة عليج ولا عليه واذا حاولتي تشوهين صورتنة كدامو راج نتصرف وياج ـ هذا مو طبعي… مسحت المحادثة وسديت الابتوب بقيت ابجي الئ ان ارتاحيت كلت انتضر كم يوم واشوف بلكي يتحسن اذا ما اتحسن خلص نفترق وان شالله ميتأذة علية خلص شهر الرابع كله وبدينة بشهر الخامس وياسر نفس الحال ماتغير لان اميل كلة اخوك متأذي الجلطة مأثرةهواي عليه .. كلت خلص بعد ميفيد الانتصار خابرت نادين وكلتله اريدج تساعديني ـ اي ليش لا تكرمي بشو بدك ساعدك ـ اريد اطلك من ياسر ـ العمئ بقلبك ولك ليش بدك تطلقي ـ مو كلشي علئ ايدج وتعرفين بي ـ اي بس هاد مو عذر انتضري شوي ـ ماريد مناقشة بهالامر اخذت قراري وخلص بس اريد تدليني وين اروح اطلب الطلاق وشسوي لان كلشي ما اعرف ـ وليي يعني ما حتخبرري ـ اكيد يرفض وماراح يقبل ويجوز يمنعني اطلع اقدم طلب طلاك واهلة كالو انفصلو يلة نتقبلة ويرجع لحضنة عادي ماريد احرمة اكثر من اهلة الولد انسل سل صار جلد وعظم ـ بس مابدي تخرب علاقتنة بزوجك يعني زوجي وزوجك اصدقاء من ايام الكمب ـ حقج بس صدكيني مستحيل اجيب سيرتكم ـ اووووف يابنت هدي شوي فكري منيح ـ فكرت هواي خايفة يصير عليه شي واني كاعدة وايدي علئ خدي ـ اوك انا بدلك وين تروحي وشو تعملي ـ صار ثاني يوم الصبح بدلت وطلعت وعفتة نايم بالبيت اخذتني نادين وهي تحاول تنصحني اتراجع عن قراري قدمت طلب طلاك ومن سألوني عن البسبب بقيت اتلعثم نادين ـ أ... ما متوافئين يعني كل واحد تفيكرو شكل وبدن ينفصلو بهدوء ـ نطوني اوراق لازم امليهه واوقع وانطيتهم عنوان الشقة ورجعت الطريق كلة ابجي ممستوعبة السويته ـ ليش تبكي مو هذا قرارك ـ اي ـ تقدري تتراجعي عن قرارك لساتك ببداية الطريق ـ لا ماريد خليني اخلص الموضوع بسرعه حتئ يشوف اخو وصلت للبيت بس جنت كلش تعبانة نغم ـ هلو نونة حبيبتي وين جنتي ـ جان عندي مشوار ورجعت ـ سال عنج عمو ـ هسة اشوفة ـ ليش عيونج حمر ـ دخل بيهه تراب ـ تراب ببلوكمسبورغ! هسة لو بلعراق تعبر علية ـ اكلج لاتضلين تتفلزكين براسي ترة راسي راح ينفجر من الوجع ـ شنو صاير شبيج ـ ماصاير شي وخري عني عفتهه ودخلت لغرفتهم واجتي ورايه نغم ـ ليش اجيتي هنا مو كلتلج عمو سأل عنج ـ افتهمت ـ شبيج اليوم ابد مو طبيعية ـ شبية مخبلة كدامج شنو شايفتني مخبلة ـ لالا اسفة مو هيج قصدي ـ كمت من مكاني وطلعت من الغرفة ورحت لغرفتنة همين نايم لكيتة كلبي انمرد عليه وانفجرت بالبجي ـ نونة .. ـ ردت اكلة ياعيونهه بس سكتت لازم شوي اتماسك كدامة لان باجر يجي طلب الطلاك.. نعم ـ ليش تبجين حبيبتي شنو صاير ـ ماكو شي ـ شو مو علئ بعضج وين جنتي اشو من طلعتي ماكلتيلي ـ يعني شوكت اكلك وووانت وانت اربعة وعشرين ساعه نايم ـ نبرتهه متغيرة كلامهه جاف اسلوبهه غريب خجلت من نفسي من كلتلي اربعة وعشرين ساعه نايم حسيت نفسي عاجز كعدت علئ حيلي مستغرب منهه.. البيت ناقصة شي ـ كرهت نفسي من هيج حجيت وياه.. حاولت اسيطر علئ نفسي وما ابجي كدامة .. لا مناقصنة شي ـ اذا زهكتي مني باجر اطلع من البيت واشوفلي شغلة ـ اي احسن ـ صاير شي نونة ـ يعني الا يصير شي ماكو شي .. اطلع اسوي الغدة احسن رحت للمطبخ مثل العمية ماشوف طريقي من الدموع اريد افكر شنو اطبخ عقلي قافل حسيت المطبخ فارغ وبس اني بي تقرفصت يم الكاونتر وكعدت ابجي شلون هيج حجيت وياه شلون كدرت هيج اجاوبة عزاا بعيني شكد حقيررة اني اختنكت من نفسي اتمنيت اموت بهاللحظة خواتي هنا عايشات ومأمنة عليهن وعلئ مستقبلهن وياسر يرجع لاهلهه ويبدي حياة جديدة واني ما الي اي لزمة بعد يارب موتني وخلصني من هالاذية والعذاب شلون هيح صرت مثل رحمة ومنال لاعندي شعور ولا احساس الوحيد الوكف وياية بازمتي ماوكفت وياه بازمتة لو بيدي انتحر واخلص رحت لغرفة البنات ودزيت نغم تطبخ اي شي بالثلاجة ـ ميخالف هسة اروح اطبخ بس غير افهم شبيج ـ اريد انام كلش دايخة.. خلصت النهار كلة نوم مالي خلك اطلع باب الغرفة فتحت عيني وكت المغرب لكيت ياسر حاط سكملي يم الجرباية وكاعد يباوعلي رديت غمضت عيني ماريد اخلي عيني بعينة من الخجل ـ شنو صاير نونة انتي اليوم ابد مو طبيعية ـ ما بية شي ـ مستحيل لازم اكو شي من يوم العرفتج ماصارت بيج هيج حالة ـ انت مو دتمر بأزمة نفسية اني همين مثلك بشنو اختلف عنك يعني مووبشر مشايفني بشر ـ لا مو هيج قصدي بس اني معروفة ازمتي من شنو لكن انتي مدعرف شبيج.. شنو السبب الي يخليج تمرين بازمة نفسية ـ ما اكدر اشوفك هيج حالك وقررت اريحك مني ـ يعني شنو تريحيني منج؟ ـ باجر تعرف ـ نونة لاتخبليني شنو صاير ـ اريد انام راسي يوجعني .. عفتة ودرت وجهي علئ الناحية الثانية وغطيت راسي حسيت بعدة يمي تقريبا ربع ساعه يلة راح وسد الباب وراه كعدن يمي خواتي يريدن يفتهمن شبيه ماحجيت وياهن.. نغم ـ الله يخليج لاتبقين هيج احجي ـ ماكو شي صبا ـ شنو ماكووشي كل هذا وماكو شي غير نفتهم شبيج ليش تبقينة مثل العميات ـ كاافي عاد التهن بدراستجن وكاافي لغووة عوفني ولاتضلن تحجن يلة ووولن منا اريد اخمدد عافوني وراحن يدرسن من همة كاعدين انام ومن صار البيت هدوء مكدرت انام كعدت لكيت نغم نايمة بالكاع يمي خطية لاني نايمة بفراشهه بقيت مكابلة الشباك وابجي كلما اشوف السمة تكشف ينعصر كلبي لان راح يجي المبلغ ويجيب طلب الطلاك طلع الصبح ووبقيت بغرفة البنات تقريبا ساعه تسعه اندك الجرس بقيت واكفة ورة باب الغرفة انتضر ياسر يطلع وفعلا كم ثانية وطلع بس جان مبدل والهدوم صايرة واسعه عليه من كد مضعفان ـ ياسر ـ جنت مبدل اريد اطلع حسيت نونة متضايقة مني لان صار فترة كاعد بالبيت هم حقهه اغلب النسوان يضوجون من الرجال يبقئ بالبيت اندك الجرس وطلعت افتح الباب لكيت شخص كلي اني موضف حكومي وعندي تبليغ الك استغربت تبليغ شنو كل اموري القانونية مضبوطة اخذت الورقة وفتحتهه ليكتهه مكتوبة بطلب طلاق .. لا اخي اكيد متوهم يجوز هالورقة لغير عنوان ـ مستحيل نخطاء بهالشي اقرة العنوان علئ الورقة واتاكد ـ باوعت فعلا هو هذا عنوان شقتنة معرفت شحجي وياه وقعت ودخلت للبيت مستغرب من الشفتة رديت قريت الورقة كلهه ممصدك عيوني طلب طلاق من نهاوند فؤاد حمزة اتهسترت من هالطلب وراسا كعدت بمكاني مبية اوكف نهاووند نهاااوند ـ راسا قفلت الباب وبقيت بغرفة البنات ما اطلع ـ لج فهميييني شنوو هالورررقة ـ مكتوب بيهه الطلب ميحتاج ارجع احجي ـ متحملت كلامهه شمرت الورقة وكمت اركض دكيت باب الغرفة متقبل تفتح .. ااافتحي االبااب ـ ماا افتح ـ من شنو خايفة فد ييوم اذيتج سويتلج شيي بابا افتحيي اريد اتفاهم وياج ـ اني اخذت قراري يا يااسرر وومستحيل اتراجع بيي ـ لـــــــج ياااقراررررر انتيي معتوووهه صايرر لعقلج شييي غيرر اكوو سبب للطلااااق فهميني شنو السبب ـ ماريدك وخلص ـ فقدت عليهه وكمت ادفر بالباب اقسم بالله راح ااكسرررهه اذا متفتحيهه ـ اي احسن اكسرهه حتئ اخابر الشرطة ويتسعجلون بطلاكنة ـ انهاريت من كلامهه حيل ماضل عندي وكعت بالكاع من الصدمة لج نونة ضربتين بالراس توجع ـ وكفت ورة الباب وابجي اريد اطلع اسندة حسيتة وكع بس ماكدر اطلع حتئ لا اضعف واتراجع عن قراري ابوس ايدك طلكني الله يخليك ارحم نفسك وارحمني من هالاذية الله يخليك ياسر اسمع كلامي وطلكني ـ كل السويتة علمودج وتالي بهالسهولة تبيعني ـ والله العظيم مابعتك والله ياخذ صحتي وعافيتي لو هيج فكرت ابوس ايدك ياسر الله يخليك خلينة نتطلك بهدوء وتبقئ انت اعز انسان بحياتي ماشفت مثلك ولا راح اشوف ـ انطيني سبب مقنع ـ ماعندي ـ لعد تحلمين اطلكج ـ احنة مو بالعراق هنا المرة الهه حقوق واذا كالت ياطلاك تتطلك حتئ لو الرجال ماراضي ـ هاي تاليتهه تلوين ذراعي ـ ماعشت ولاجنت اذا هيج افكر ـ عفت كلشي ورة ضهري واختاريتج تركت اهلي وحياتي وبيتي ومكاني وشغلي وبعت الاكو والماكوو علمودج سندتج وجنت الج ستر وغطئ ما ارتاحيت الا من طلعتلج لبر الامان مو احملج منية بكلامي ولا اطلب مقابل منج بس علئ الاقل خليني افهم ليش متريدني شنو السويته وخلاج تقررين هالقرار شنو البدر مني ـ ماراح يتركني اذا ماصدمة مسحت دموعي واتقربت من الباب لـ لان.. اريد طفل صارلنة اربع سنين متزوجين وماصار طفل ومن حقي يصير عندي طفل ـ هالكلام ذبحني مو بس جرحني احسهه طعنت برجولتي ماجاوبتهه وراسا طلعت من البيت لان حسيت اختنكت منة .. بقيت هايم بالشوارع افتر نوبة ابجي ونوبة اكذب السمعتة منهه ممعقولة هيج صارت مشاعرهه صخرة تجاهي.. معقولة اكو شخص ثاني بحياتهه لا ياسر شكاعد تحجي هاي مو اخلاقهه عاشرتهه وعرفت معدنهه شنو وبعدين الئ قبل يومين هية مثل الزبد وياية لو لاكية شخص ثاني جان اتغيرت من زمان مو بهاليومين .. رحت يم بيت صديقي جاد زوج نادين سألت زوجته عن نونة تعرف شبيهه ليش متغيرة بس اضاهر هي هم متعرف شي اختنكت اكثر وخابرت اميل وبقيت احجي وياه اميل ـ لاتصير انسان سلبي فكر بالايجابيات ـ لك يا ايجابيات اكلك طلبت الطلاق وهيج حجت ويايه ـ وانت علئ شنو كاعد تبجي صدك جذب الخلقهه ماخلق غيرهه بينت انسانة مادية استفادت منك وهسة اتخلت عنك ـ لاتحجي عليهه نهاوند مو هيج ـ لعد فسر ليش طلبت الطلاق منك ـ كلتلك تريد اطفال ـ لو بنت اصول جان اتحملتك لان انت اتحملت هواي لخاطرهه بس للاسف طلع اختيارك غلط ـ لا تحجي عليهه صح ذبحتني بهالكلمة وحيلي كلة راح بس بعدني ممصدك هيج تحجي بوجهي كل هالسنين بكلمة وحدة ماضوجتني هسة تجي هيج تكول ما اكدر اصدك ما اكدر ـ يابة دروح كلشي واضح كدامك وانت مصمم تغشم روحك.. ـ ماحبيت كلام اميل هو دائما حجية قاسي لان يعتبر نفسة انسان واقعي فـ نهيت المكالمة وياه بقيت برة البيت مارجعت بذاك اليوم ضليت افتر بالشوارع اريد يهداء راسي من التفكير من صارت ساعه 12.. نص الليل اتصلت عليه نغم .. الو ـ عمو وينك ـ قفلو الباب ماراح ارجع للبيت ـ ليش عمو شنو صاير ـ سألي نونة هية تكلج ـ ارجع عمو صار الليل وماكو شي مينحل بالتفاهم ـ لاتخافين امان هنا ما عليه شي .. ديري بالج علئ خواتج يلة روحي محتاج اضل وحدي .. بقيت كاعد بالساحة اتأمل شريط حياتي نونة ـ حاولن خواتي يعرفن شنو صاير بس ماحجيت.. من صار نص الليل كلت لنغم تتصل عليه بس لاتكول اني كلتلهه .. بس عرفت ميقبل يرجع صار ثاني واني نفس حالي بس ابجي ولازكة بالفراش ماريد اطلع من الغرفة نفس الكئابة العند ياسر انتقلت الي بس لازم اروح و امشي بالاجرائات.. من نهاية شهر الخامس طلبت الطلاك بس جنت اراجع اتصل عليه والموضف يتصل ويدز ابلاغات بس ميقيل يجاوب دزيتلة رساله كلتلة ابقئ لاتجاوب لان راح اطلك حتئ لو متجي راسا خابرني من دزيتلة المسج ـ لهل درجة وصلتي ـ صار ايام نتصل عليك وانت متحضر شسويلك بعد ـ ووولج انتي صدك تحجين صددك متريديني بعد عفت البيت وطلعت كلت خلي تهدئ اكيد راح تغير قرارهه ما اكدر اصدك نونة ما اكدر اصدك بعد متريديني ـ يبجي واني ابجي خلينة نفظهه يا ياسر وكافي عناد ابوس ايدك انت شخص مثقف وماكو داعي للمماطلة ـ يعني بعد ماشوف عيونج الحلوة واصطبح بيهه ـ الله يخليك .. مو وكت هالحجي باجر انتضرك بالمحكمة ـ راح اجي باجر بس من اشوفج اريد أسالج سؤال واتمنئ تجاوبين بصدق ـ اكيد كول ـ لا مو هسة .. باجر من اشوفج ـ ان شالله .. انتضرك تجي بالسلامة دير بالك علئ روحك ـ بعدج تخافين علية؟! ـ باي .. سديت التلفون وبقيت ابجي صارلي كم يوم ماشفتة بقيت سهرانة انتضر شوكت يطلع الصبح حتئ اكحل عيني بشوفته لبست علئ السريع وطلعت اركض عيني علئ الرايح والراد شفتة جاي من بعيد كلبي رف عليه بس بقيت واكفة بمكاني .. حالتة كلش تعبانة لحيتة ممزينهه وعيونة حمرة وكف كدامي بس مووياسر الاولي لا هذا غيرة .. مبين منايم ـ مو كلتلج ضربتين بالراس توجع منا انتي ومناك اهلي ـ وين جنت هالايام كلهه ـ اكيد ماجنت يم بنية ـ ابتسمت ابتسامة خفيفة .. اعرف وواثقة بيك ـ جنت يم الولد اصدقائي بقيت يمهم بالشقة.. ـ زين تسوي ـ نونة ـ باوعت عليه وانتضرة يحجي ـ صارحيني رحمة لامج ازدهار اكو شخص ثاني بحياتج ـ عشت ويايه كل هالسنين وماعرفتني ـ كلش زين اعرفج بس من كلتيلي اريد طفل انجنيت وكل موازيني اختلت ـ مستحيل احد ياخذ مكانك ومستحيل اباوع لوجه رجال لان مالكيت ولا راح الكة بشهامتك وغيرتك علينة ـ لعد مين تريدين تجيببن اطفال وليش دتطلبين الطلاك ـ لان ماريد اعيش وياك گ زوجه اريد نبقئ اصدقاء مثل قبل ـ كلامج مو منطقي ـ لان مدعرف احجي اصلا مدجمع ولا كلمة بس الاعرفة اريد اطلك اذا تحبني صدك احترم قراري وتعال وقع ـ ما مقتنع بكلامج واحس اكو شي جبير وراه ـ بقيت ساكتة ـ صح احبج وممتندم علئ اي شي سويتة الج بس يانونة مو اني الاجبر مرة تعيش وياية غصبا عنهه ـ دنكت راسي وحبست دمعتي لان بس ابجي مستحيل يوقع ـ الله يسعدج بحياتج واتمنالج التوفيق بس ان شالله متتزوجين واذا تزوجتي ان شالله ميصير عندج اطفال ـ كوة لزمت نفسي ان شالله ـ اعتبريهه انانية اي اني اناني بحبج بس ماكدر اجبرج علئ شي ـ ماححيت ولا كلمة رحنة اثنينة كملنة اجرائات الطلاق ووقعنة وطلعنة سوية يم الباب وانهاريت بالبجي ـ ليش تبجين مو هذا الردتي ـ ماحجيت وياه بقيت اتمشئ وهو يمشي وراية واني كدامة جنت محتاكة اشم هوئ بس عرفت ماراح يتركني الا من ارجع للبيت راسا صعدت ورجعت اول ماوصلت للبيت ركضت علئ حساب بركات نغممم نغمممم ـ ها ها اجيت ـ تعالي هاي الاواق صوريهه ودزيهه لبركات ـ شنو يا اوراق عزااا بعينج هاي شسوووويتي ـ كااافي حجيييي دزززي هالاورااق ماعنديي وقت ـ غير افتهم ـ بعدييين. تفتهمين دزززي صورت الاوراق ودزيتهه لبركات وراسلته الله يخلييك هســة اتصل علييه ترة نفسيتة تعبانة ومدمر هذا رقمة وهذا الفيس مالتة وهذا ايميلة وووينك بركات ـ اوك .. زين سوتي وخليتي يرجع لاحظان اهلو وهذا هو الصح هسة اتصل عليه واخلي البقية يحجون وياه .. بس هاا خو ماكلتيلو علئ كلامنة ـ ابد والله ولا جبت طاريكم ـ جيد .. ـ عفت الابتوب وكعدت ابجي نغم ـ فهميني ليش اطلكتو ليش هيج سويتي ـ اهله هيج رادو وشفتي شلون متاذي علئ اهله ما اكدر اشوفة يذوب كدامي مثل الشمعه واضل كاعدة وساكته الحان ـ يعني بعد ميجي عمو لهنا صبا ـ لا ميصير بعد يجي صار غريب عن نونة نغم ـ احنة هم جنة غريبات عنة وكعدنة ابيتة اصلا احتلينة بيتة مطبخ وغرفة واجهزة كهربائية بيت كامل مكمل ومأثث نطانياه وهو ميعرف شي عننا وكفتة متنسي لان بس الناقص اصل ينساهه نونة. ـ منو كلج ناسية وكفتة ـ وانتي شلون تاخدين هيج قرار دائما متسرعه بقراراتج جان علئ الاقل حجيتي ويانه او كليتلة هيح اهلك طلبو مني ليش تخلي يتخيل انتي ناقصة وغدارة ـ بركات هيج طلب مني واذا مو بهالطريقة ياسر مستحيل يطلك والله نغم صدكيني هيج احسن نبقئ اصدقاء اني وياه وبنفس الوكت كاسب اهله ومرجع علاقتة بيهم ياسر ــــــ رجعت امشي بالطريق مثل الطفل التايه كلشي بية ياذيني حتئ كلبي رحت للساحه وبقيت كاعد بيهه ماعرف شسوي بروحي حسيت نفسي محطم ابجي علئ شنو اهلي الخسرتهم لو زوجتي وعائلتي العافوني اشوف الناس شلون عايشين مرة كدامي عائلة اب وام وطفلين اتخيلت اني ونونة بمكانهم وهالطفلين اطفالنة يا الله شيصير لو رازقني بطفل شوي واتصل عليه رقم بركات مصدكت عيوني هذا بركات .. راسا فتحت الخط الوو ـ ها ياسر اشلونك ـ بركات! .. شلونكم اخباركم حيدر شلون صارر شعجب ذكرتوني شعجب حنيت واتصلت ـ بعد .. الدم البينا ومايهون علينة ـ شعجب ـ يعني شلون تريد اسد التلفون ـ لا بس طمني شلونة حيدر ـ كلش تعبان بس ان شالله يصير احسن افتح كاميرا حتئ نحجي وياك ـ مو هسة ماشايل الابتوب وياية ـ زين.. خواتك هنا ابيت حيدر يمكن منا لساعتين يروحن اذا تحب شوفلك مكان واحجي وياهن ـ يعني شنو شوفلك مكان؟ استغربت من كلامة احسة يعرف اني ونونة انفصلنة ـ هسة انت لا ادقق بالحجي يعني شوف لابتوبك وين وافتح كاميرا ويانه او روح لاي صالة يمك واتصل علينة ـ همم .. اوك .. رحت لاقرب صاله انترنت وحاسبات اتصلت علئ اهلي وفتحت كاميرا وياهم الغريب جانو كلهم متقبليني ويحجون وياية صح اكو شوي غيض بكلبهم بس استغربت ليش اليوم بالتحديد اتقبلوني واتصلو عليه وليش مأ سألوني عن مكاني يعني شافوني بقاعه فاتح كاميرا معقولة همة حجو وية نونة حتئ تعوفني سكتت ردت اشوف بلكي يحجون شي وافهم منهم رغداء ـ ليش هيج اشصاير بيك ولخاطر منو هيج تتاذة ـ ترة حالتي هاي علمودكم ـ اي نورة جانت تحجيلنة ـ وماهزكم المريت بي ـ السويتو جبير ما ينغفر ـ لعد شنو الخلاكم تتصلون عليه اليوم ـ مو كلك بركات الدم مايهون ـ وشعجب قبل هان عليكم هالدم ـ لان الدنية فانية وماتسوة الزعل بعد ـ ما اقتنعت بكلامهم حجيت وية خواتي واخوتي بس كل كلامهم يلومون بية تعبت نفسيتي اكثر ومابقئ عندي حيل اسمع حجيهم وملامتهم غلقت النت من يمي ورحت لبيت اصدقائي ارتاح ثاني يوم مريت علئ بيت صديقي جاد حتئ يدز زوجته لبيت نونة تجيبلي ملابسي واغراضي بقيت عايش وية اصدقائي الشباب كم يوم بهالفترة كدرت اشتغل وأجر شقئ لوحدي واستقل وية المساعدات الاحصلهه لان ماريد اعتمد علئ احد عظم البشر ثكيل الوحدة تعبتني يمكن لان تعودت علئ نفس وياية بالبيت واتعودت ع زوجه وعائلة وهوسة ممتخيل حياتي بدون نونة الاكل تركته وعشت علئ المي وين يلة اتفطن بالاكل لو بيدي ابقئ نايم بالبيت بس ما اكدر جانت نونة والبنات يهونن عليه غياب اهلي بس هسة منو يهون عليه غيابهم اثنينهم هملت نفسي وصحتي كوة احلق لحيتي بس علمود الشغل لان ذبيت نفسي علئ الشغل ذب كمت اشتغل من الصبح لليل حتئ انسئ الصار ويايه ورغم هذا جنت اتابع اخبار نونة اول باول ويومية اروح بالليل اوكف كبال العمارة حتئ لو ماشوف نونة المهم اكون قريب منهه اروحلهم بحجة اريد اشوف البنات جانت نغم هية والبنات ينزلون ويسلمن وبيدهم جدر صغير نونة طابخته تسوي كل الاكللت الاحبهه بس ما اشتهي اكله جنة نكعد شوي نسولف بالساحه و المح نونة واكفة اباب البلكونة تباوعلي الئ ان بدت تحن عليه وتطلع توكف بالبلكونة وتراوني طولهه جنت اعوفهن واكوم علئ حيلي اناضرهه و اكحل عيني بشوفتهه ولو بقة فراكهه غصة بالكلب بس االحياة مشت غصبا عني ومجبور امشيهه واتعايش وياهه بهالفترة نسيت اتابع اخبار العراق ارجع من شغلي اخابر علئ اخوتي وخواتي وانام وراهه ما افتهم شي من يومي غير الشغل اتعب نفسي بيه حتئ مافكر بشي الئ ان كلولي صايرة مجزرة بتكريت ومستشهد بيهه 1700 طالب علئ ايد قوات مسلحة ارهابية … حسيت الاوضاع مو صحيحه بالعراق وهذا بداية ظلام دامس راسا اتصلت علئ اهلي .. اطلعو من العراق شتنتضرون بركات ـ حيدر مايقبل يعوف بيتو وبعدين وين نروح واحنة بحدنة عشيرة شكبرهه ـ وين ترووح شنو حالكم حال الناس اطلبو لجووء الاوضاع خطرة ـ ماعلينة شي صح اكو هجمات ارهابية بس الجيش صدهه وصح سوريا انتكست بس الحدود لازمينو شبابنة ـ يمعووود ياشباااب انت وووين تحجي ليش محسسني العراق عندة قوة عسكرية مثل الاتحاد الاوربي انت وين ناايم لو اكو جيش مثل متكول ليش هالطلااب استشهدوو ـ لا هذولاك خطية غير شكل ناطيهم الامان وغادريهم بس احنة مو ثكنة عسكرة احنة بيوت مدنية مستحيل يوصلون النة ـ نطيني هافال الحجي وياك تعبني.. يمعود وووينك تعال احجي ويااك هافال ـ محد يقبل يطلع من عدنة وين نعوف حلالنة ومالنة ارضنة لشلة ارهابيين ياخذوهم ـ ياحلال يامال انت صدك تحجيي كلشي يتعوض الا الروح الارض تبقئ الك بس ااطلعوو الاوضاع مو صحيحة حاس اكو شي راح يصير ـ ماكو شي لاتخاف شنو جديدة علينة هالمصايب اشو من يوم النخلقنا والعراق من مصيبة لمصيبة والحمد لله بعدنة عايشين ومقاومين ـ ابقوو بهذا عقلكمم لاتااخذون حجاااية احدد ولا تسمعوون من اااحدددد ماعررف شنو بعقووولكم ـ ولك اررضنة منو يدافع عنهه غيرناا اذا كلنة طلعنة وتهجرنا وعفنا حلالنة ومالنة يصير العراق بس للارهابيين وين المرجلة بهالشي ـ طيب علئ الاقل طلعووو النسوان والبناات ـ اي اي كلنة ندزهن هنة والبنات وخواتنة وبناتهم لكردتسان واحنة الزلم نبقئ هنا ماعلينا شي ـ وشمدريك ما كدرستان توكع بيدهم ـ لا كردستان ولا الموصل راح توكع بس هيج احترازات امنية من عدنا راح اندزهم و ان شالله خير .. ـ ااااووووووف ميفيد الحجي بيهم بقيت يومية اتابع اخبار العراق من سالار وقنوات الاخبارية العربية قنوات تاجج الموضوع وتخيلي صورة العراق انتهئ خلص ووكع بيد الارهاب وقنوات تهون الديصير وتصورلنة القوات العراقية مسيطرة علئ كل شي تاهت حسبتنة ومدعرف وين الصدك من الكذب بس متحملت ابقئ انتضر اكثر كلبي اكلني عليهم خلص نهاية الشهر اسافر للعراق اطمئن علئ اخوتي واشوف الاوضاع بعيني .. نونة ـ جنت تعبانة ومتخربطة طول فترة طلاكنة بس من اشوفة يجي للبنات ويكعد وياهن جوة بالساحه اطمئن عليه جنت اسوي اشكال الاكل وادزة بيد البنات حتأ ياكل بس نفس وضعه مرات ميقبل ياخذ الاكل يكول ما اكلة ويتلف فد مرة صار ضعيف هزيل صار مووبس ضعيف جان وجهه متفح ومنور هسة. انطفئ فد مرة صرنة بنص شهر السادس ماحاسبة لاشي لان بالي مو يم هالامور الئ ان كمت ما اشتهي ونفسي تلعب من اي اكلة ماهتميت لنفسي لان جنت اتابع الفيس واشوف العراق شيصير بي من مجازر وقتل وخصوصا من شفت فيديوات شهداء سبايكر احس روحي نسلبت من الدم الي بكل مكاان انوب حتئ المي كطعته اذا اريد اشرب شوي اتذكر دجلة شلون صار احمر من الدم البي ونوبة اكول يمكن صرت مثل ياسر حالتي النفسية تعبانة ومكتئبة وما اشتهي الئ ان اجتني نادين وشافت حالتي وكلتلي هاي اعراض حمل بس حمل ماصدكتهه بخت كعدت كل هالسنين ماعندي هسة حك الاطلك احبل ما اقتنعت بكلامي وكلتلي باجر نروح واحلل بقيت أأجل بالروحة وما اسمع كلامهه لان متاكدة مو حمل بس بنهاسة شهر السادس سحلتني سحل واخذتني حللت دم وبين عندي حمل ماصدكت واستهزئت بالحجي وبعدبن حولوني علئ السنور وبين الحمل بداية شهر الثالث بقيت صافنة ممصدكة نفسي كل هالسنين ماصار ليش هسة شكل عندي حمل نادين ـ لك مو كنتي عم تراجعي اطبا مشان الحبل ـ اي بس تركت الادوية من يوم الرجع ياسر من العراق يعني ادويتي ماخلصتهه ولاكملت كورس العلاج ـ كلشي بأيد الله ازا راد شي بيقول كن فيكون ـ رجعنة للبيت ممصدكة الخبر كلت لخواتي عن هالخبر نغم والحان فرحن بس صبا شفت علامات غريبة بوجهه مثل الغضبانة .. شبيج حبيبتي صبا ـ مابية شي ـ عافتني وراحت للغرفة نغم ـ خلي اخابر عمو ياسر وابشرة ـ لا انتضري اكيد هسة بالشغل خلي يرجع من شغله ـ لاا يابة. ياشغل غير يموتني اذا اضم عنة هيج سالفة وين التلفوون ياسر ـــــ جنت بالشقة الم ملابسي لان حجزت حتئ اروح للعراق ماكلت لنغم وللبنات ولا نطيتهم خبر كلت من اوصل العراق اخابرهم ماريد يقلقون عليه واني يمهم حتئ لا شي ياثر علئ قراري خلصت الملابس وسديت الجنطة وحضرت نفسي موعد طيارتي بعد اقل من 3 ساعات واتصلت عليه نغم .. الوو ـ هلوووو عموووو ارريد البشارة ـ شنو يابشارة ـ معلييية اريد البشارة يلة اكلك ـ يابة شتريدين اني حاضر ـ بكيفك انت كريم واني استاهل ـ هسة غير اعرف شنو البشارة ـ نونةة حامل عموو حاامل ـ حامل؟! وللحكاية بقية……… 🥀