الفصل 24
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵ موعد.مع.خاطفي.tt* ♥️🙈
*❴🔢❵☟الـــبـــــــــــ❴4️⃣2️⃣والأخير❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
الجزء٢٤ والاخير
الضياع.. كان الشعور الأقرب لقلوبهن
الفراق خلاهن يعيشوا ضياع مافيه لمسة نور من الأمل
مر على هالأوجاع أيام طويلة..
و تاج مازالت عم تدبل بروحها وجسدها، ومع كل الضغط يلي عم يحاول يعمله هارون بشاهين لحتى يرجعلها
وكل مايحن ويضعف، يرجع يصحى على حاله قبل مايوافق على رغبة هارون
…
فتح هارون باب الشقة ودخل لعنده، ليشوفه عم ينفث دخان لفافة التبغ
شد قبضة ايده بغضب واضح على ملامحه
هارون بعد مازفر نفسه: كم مرة قلتلك ماعاد لازم تشرب دخان شاهين
بدون أي ردة فعل بقي شاهين سارح بخياله، معها..
محاولات كتيرة من هارون ليستعيد وعي شاهين باءت بالفشل، لتخطر على باله فكرة
منع ضحكته إنها تخرب عليه هالخطة وحكا:أي صحي نسيت قلك، بتعرف هداك الشخص يلي حكيتلك إجا على بيت تاج!!
حرّك راسه باتجاه هارون، بنظرات غرقانة بين الفضول والحزن
هارون: يلي قلتلك بلبس ملابس أنيقة و رسمية، عم يتردد على بيتهن كتير
توجه لعنده شاهين واقف أمامه لينطق بنبرة خافي خلفها غضبه: مين بيكون؟
تقصد هارون مايخبره أنه دكتورها النفسي، متل مافهم من رجاله
وأجاب: مابعرف بصراحة، ممكن صديق قديم
فتح عيونه شاهين ليتطاير الشر منهن، وكأنه النار يلي شعلت بقلبه ظهرت بوضوح على ملامحه
حط ايده هارون على كتفه ليحس بانتفاض جسده من شدة العصبية
هارون: لك شبك أخي روّق
دفع شاهين ايده بعيد عنه ليطفي اللفافة ويشعل غيرها
وذكرى ترددت لخياله..مازالت كلمات تاج عن يسمعها لما خبرته أنها فكرت بيوم رح تحب كاتب أو قارئ
همس شاهين بغصة: ياترى معقول كاتب؟ صديقها؟
قرب هارون من خلفه بابتسامة مشاكسة: أيي بيكون بدو يلحق حاله،إذا هو صديق مُقرّب قديم وعرف بوضعها النفسي أكيد إجا يستغل الفرصة ويصلح يلي بينهن
مشي خطوتين شاهين ليجاوبه والغيظ واضح بنبرته: مستحيل.. تاج ماخبرتني أنه كان في حدا بحياتا سابقاً
كمّل هارون: معناها إعجاب من طرف واحد وهلأ سنحتله الفرصة ليتقرب منها
بحركة مباغتة اتوجه عليه شاهين ليقبض بايده اليسار على قميص هارون
وحكا بعصبية: هارون خراس.. ماعاد بدي اسمع حرف زيادة
حس النار عم تقيد جواته لما مارحم فيه هارون وكمّل: أنت هاد يلي بدك ياه صح؟ بدك تبعد عنها لتكمّل حياتها بشكل طبيعي، طيب لكن ليش رفضت هلأ وجود حدا تاني بقربها؟ معقول البنت تكمل حياتها بدون شخص مُقرّب
جاوبه بصوت أقوى: تاج من قبل ماتعرفني وبحياتا ماحبّت، بدك تقنعني بهالسرعة يدخل حدا لقلبها
دفعه بقوة بعيد عنه
هارون: لك أنت ليش ماعم تفهمني؟ عم نقول هو يلي عم يتقرب منها مو هي
بتر حروفه أول ماشاف شاهين رفع الطاولة يلي بمنتصف الغرفة وقلبها بكل ماعليها عالأرض لتنتشر ضوضاء بهالمكان اسكتتهن
حس بألم مكان الجرح ليترنح بخطواته متراجع للخلف
اخد انفاسه بصعوبة وحكا: مستحيل.. مستحيل يقدر حدا يحبها متلي.. وهي مستحيل تحب حدا من بعدي
قرب منه هارون بخطوات متسارعة وسحبه لسريره
هارون: تمام أخي خلص.. فهمت عليك أنت معك حق اهدا
بصعوبة خلاه يقعد على سريره وأول ماهدي حكا هارون: ليك يمكن الوقت مو مناسب، بس أنا لازم سافر بعد ساعتين
ماكان في أي إجابة من شاهين.. يلي رجع وغرق بخياله من جديد متمني يلتقيها، يسألها عن هالشخص، ويعاتبها إذا كان كلام هارون صحيح
…..
ساعات قليلة وببداية يوم جديد وصل هارون على بلده
طالع موبايله واتصل لما طلع بسيارته المركونة بمكان محدد
هارون: ألو صلاح، بعتلي موقع رفيقة البنت.. أي بس بسرعة
وبدون ما يضيع أي وقت توجه لعند أروى لما وصله الموقع
رتبت أروى بيتها وأمورها مستعدة لتروح عند تاج
أول مافتحت الباب انحجب عنها النظر بسبب شخص واقف قريب منها جداً
رفعت راسها للأعلى وشافت وجهه
طويل وكتافه عريضة وبطرف خده في أثر لجرح واضح، حاولت تتعرف على ملامحه اكتر لكن كانت مخفية تحت نظارته الشمسية
حكت بحروف متلعثمة: عفواً مين حضرتك!!
سحب النظارة عن عيونه لينطق: مرحبا.. نحن تقابلنا قبل بس ماكانت الفرصة مناسبة لنتعرف
حسّت بتوتر من ملامحه العابسة، والجرح يلي على طرف وجهه زاد قلقها
لكن لما ابتسم انتشرت راحة بين قسمات وجهه، تسللت لقلبها بشكل خفيف
لكن كلماته الأخيرة بدلّت الشعور: أنا هارون
فتحت عيونها بصدمة رافقتها نبضات قلبها المتسارعة
وأول مافتحت تمها لتشهق بقوة، خطى خطوتين للأمام حط ايده على تمها ليسكره بالكامل، وايد التانية خلف ظهرا
دخلها على البيت وسكر الباب خلفه
هارون: هسسس ولا حرف مارح أأذيكي
فجأة استعادت المشهد بذاكرتها بالكامل لما مات شاهين، دفعته بقوتها بعيد عنها لكن ولا كان عم يتأثر
هارون: لك أهدي، شبك شو صابك؟؟
لما ازاح ايده عن تمها صرخت: قاتل… أنت قاتل طلاع من هون ساعدوني
قبل ماتكمل كلمتها رجع كتم أنفاسها بالكامل وحملها بين ايديه من خصرها ودخلها عالغرفة
حاولت جاهدة تدفعه بعيد عنها أو تمنعه لكن قوتها كانت ضئيلة بجنب قوته
رماها عالكنبة وصرخ فيها
هارون: لك سكري تمك بقا..لعما خليني احكي هالكلمتين بعدين عملي يلي بدك ياه
قامت لعنده وقربت منه لتدفعه بكفوفها على صدره
أروى: طلاع من بيتي ، اقسم بالله بتصل بالشرطة ها.. شو بدك مني؟جاي تقتلني كمان؟
صرخ فيها بكلمات اسكتتها للحظات
هارون: لك ماقتلته.. ماقتلته هاد أخي وصديق عمري انتي جنيتي؟
اتطلعت فيه نظرات تايهة مصدومة ناطرة يلي رح يحكيه بعدها
أخد أنفاسه بصعوبة وكمّل: شاهين عايش
صدمة اهتز راسها أثرها لتنطق بحروف شبه مخفية: شو؟؟ أنت شو عم تخبص؟
هارون: أي.. شاهين ما مات، أنا عالجته وهو هلأ برا البلد
أروى: أنت كذاب.. مستحيل هاد الشي
أفكارها وتوقعاتها تداخلت بين بعضها لتحس راسها رح ينفجر
مسكت راسها بألم واضح
هارون: تمام بعرف كلكن فكرتوه مات ، وهاد يلي كان لازم يصير
قاطعته فوراً: اثبتلي صدق كلامك.. اثبتلي إنه يلي شافته عيوني وعيون تاج كذبة
طالع الموبايل من جيبته وعم يزفر الغضب، ليورجيها فيديو لشاهين بعد معافاته من إصابته، عم يتحرك بالغرفة لكن ايده مربوطة بعنقه والشاش محاوط صدره العاري
شهقت بصدمة أوقعتها على الكنبة
هارون بقلق: انتي منيحة؟
لحظات دامت غارقة بصمت مخيف،عم تكرر بالفيديو يلي أمامها
هزت راسها بالنفي، لكن قدر هارون يغلبها
بقي وقت طويل وهو عم يقنعها، ويشرحلها كلشي صار وبالتفصيل.. نزلت دموعها وهي عم تتخيل وضع تاج وكلشي عاشته
قاطعت كلماته وسألته: وهلأ حتى لو صدقتك؟ شو المطلوب مني؟
هارون: تساعديني حتى..
اتطلعت فيه ناطرة باقي جملته يلي ماعم يعرف كيف يحكيها
هارون بكلمات متلعثمة: لحتى نقنع تاج تسافر لعنده وتشوفه
ردت بصدمة: شو؟؟؟
قعد جنبها واتطلع بعيونها: أنا من فترة وحاطط مراقبة عند باب بيتها، وبعرف بوضعها كامل.. كلشي بحياتها شايفه أنا، بس شاهين رافض يرجعلا.. خايف عليها من شر الماضي يلي كان عايشه، وبنفس الوقت خطر كبير على حياته يجي على هالبلد
تركها لوقت ناطر منها الجواب لكن كان وجها الأصفر بيعبر عن وقوعها بمأزق مو عارفة تقرر بسببه
وبالنهاية حكت: أنا مافيني آخد هيك قرار لوحدي
اتطلع بعيونها متساءل
أروى: لازم هالكلام يعرفه أخوها طارق..
كان صعب عليها تصدق كلامه الغير منطقي، وتكذب يلي شافته عيونها هداك اليوم
صعب عليها ترجع توقع صديقتها بايد هيك عالم بعد ما خلصوها منهن بصعوبة
…
ماقدر يمانع رغبة أروى، لما اتصلت ب طارق وطلبت منه يجي، بدون ماتخبره شي عن هارون
ماكانت عارفة إذا هالقرار صح أو غلط، أو إذا كان خيانة لصديقتها، لكن مالقيت غير هالحل
فتحت الباب لتستقبله بوجه خائف
سألها طارق بقلق: كيفك؟ انتي منيحة؟
هزت راسها وابتعدت عن طريقه حتى يدخل على بيتها
طارق: كنت رايح عند تاج بس لما اتصلتي..
انقطعت كلماته أول ماشاف شب قاعد على الكنبة
بكل راحة ،مبتسم وكأنه بانتظاره
الابتسامة استفزته ليتطلع بعيون أروى
طارق: مين هاد؟
هارون: أنا هارون..
وجّه نظره عليه بغضب ، مشي لعنده بسرعة وسحبه من تلابيب قميصه
صرخ فيه طارق: ياحقير شو عم تعمل هون؟ شو بدك لسا مننا؟ قلتلنا نطلع من حياتكن وطلعنا
ركدت أروى وعم تحاول تمنعه عنه بالوقت يلي كان هارون بارد وساكت نهائياً، تارك طارق يفرغ كل غضبه فيه
دفعه بقوة طارق ليرتمى على الكنبة
هارون بنبرة مستفزة: خلصت؟ فينا نحكي هلأ؟
النار ولعت فيه بزيادة: لك أنت لازم تكون بالسجن.. أنت قتلت تنين مو بس واحد، واحد صار تحت التراب والتانية عم تموت كل يوم مية موتة.. مارح سامحك بيلي عملته باختي، أنت لازم تتعاقب وتدخل السجن
هارون: معك حق.. بخصوص أختك، أما شاهين، لأ .. شاهين عايش وما مات
أخدت صدمته وقت و أروى عم تحاول تسانده… ورجع شرحله هارون بالتفصيل كلشي صار
لينطق طارق رافض يصدق يلي سمعه: وأنت من كل عقلك بدي اسمحلك ترجع تاخد مني اختي؟ بالفعل أنا اليوم احترمته لشاهين.. وإذا كان كلامك صحيح مع إني بشك يكون صح.. بس خوف شاهين على حياة اختي بمكانه.. لهيك مستحيل اسمحلك تقابلها.. عم تفهم؟ وإلا وقتها بحلفلك روح عالشرطة، ويلي بدك تعمله فيني عمله
أروى: طارق بترجاك اهدا شوي..
طارق: مافيني اهدا، هاد المجرم لازم يتعاقب لو بدي ادفع التمن عمري
…
بالتوقيت ذاته..كانت تاج عم تتقلب بسريرها بخوف واضح على الرغم من أنها نايمة
حروف متلاشية مبهمة عم تمتم فيها بالوقت يلي جسدها عم يتصبب عرق
صرخت باعلى صوتها أول مافتحت عيونها باسمه طالبة منه مايتركها
رجفة رافقت كامل جسدها لتركض خارج غرفتها قاصدة مكان معين، رغم ضعفها وقلة حيلتها باحثة بصندوق قديم في مفاتيح احتياطية بايدي راجفة
دموعها عم تمنعها تشوف بوضوح لكنها سحبت عدة مفاتيح وتوجهت على غرفة مكتبها
بحركة متوترة وراجفة حصلت بالنهاية على المفتاح
وأول ماانفتح الباب أصدر صوت صرير ، آلم راسها بشدة
قربت خطوتين للأمام وهي عم تراقب هالتفاصيل، يلي أصبحت وكأنها جبل على صدرها
خطوة تتليها التانية لتزداد رجفتها وغضبها، نظراتها يلي كلها قهر
وكلشي توقع عينها عليه ترميه على الأرض بِكره لبينما لمحت (اللوح)
ناظرته بقرف وحسرة: أنت سبب كلشي سيئ بحياتي.. أنت دمرتني
وبقوة دفعته على الأرضية لينقسم لقطتعين صادر منه صوت زعزع المكان
ارتمت بزاوية الغرفة ساندة جسدها على الجدار عم تحاول تاخد أنفاسها بصعوبة واضحة بعد كل الجهد يلي بزلته
تكومت على نفسها ونزلت راسها على ايديها
…
طلع هارون من بيت أروى و راسه منحني
حاول بكل ماعنده يقنعن لكن رفض طارق كان عنيف
وطلب من أروى قبل مايغادر تخبره إذا صار شي جديد واجبرها تاخد رقمه
…
وقت قليل و وصلوا طارق وأروى لعندها
فتحت الباب بالمفتاح يلي معها ودخلت
بعد كم خطوة استغربوا أنه باب المكتب مفتوح
طارق باستغراب: كيف هيك؟ مو المفتاح معك؟
دخلت أروى بخطوات متثاقلة
أروى: أي معي بس..
تلاشت كلماتها بعد ماشافوا الدمار يلي حل بالمكان..
وكأن تاج حاولت قدر المستطاع تعبّر عن الدمار يلي بداخلها
و أول مالمحوها بزاوية الغرفة صرخ طارق :لا تاج شو عم تعملي؟؟
شهقت أروى بفزع: وقفي أوعك تأذي حالك
كانت واقفة أمام مجموعة كبيرة من الأوراق البيضا المرمية عالأرض، وتحتها كان في الكمبيوتر المحمول الخاص فيها
وبايدها ورقة عم تولع فيها النار بشكل بطيئ،ناوية تحرق فيها باقي الأوراق
اتطلعت فيهن بوجه مُخيف وكأنها من غير عالم
وبسرعة سحب طارق الورقة من ايدها قبل ماترميها فوق كومة الورق يلي جمعتهن
سحبتها أروى لحضنا: اهدي ياعمري بترجاكِ اهدي
همست تاج بقلة حيلة: ماعاد في إلهن لزوم.. أنا انتهيت من يوم تركني شاهين.. كل يوم عم شوفه بنومي.. أروى كل مرة بيقلي أنا جنبك.. وصدقيني شاهين مابيكذب، يعني هو جنبي.. طيب وينه شاهين قوليلي وينه؟ جيبولي ياه..إذا جنبي ليش أنا مو مرتاحة؟؟
نزلت دمعاتها ليغص الوجع داخل قلب طارق وتطلع بعيونه أروى نظرات فهمت معناها كتير منيح
….
أخدت وقت أروى لبينما هدتها وسطحتا بسريرها وتوجهت لعند طارق
أروى: شو؟ مافكرت؟
طارق:…
أروى: طارق السكوت رح يدمر البنت بزيادة، أنت عارف لو تأخرنا كمان كم دقيقة شو كان صار؟ تاج فقدت وعيها تماماً لو مشعلة الحريق وبقيت مكانها شو كان صار بالبنت؟ بيكفي بترجاك نحن مارح نخسرها أمام عيوننا والحل بين ايدينا .. هاد ظلم
مسك راسه طارق لما نزلت دمعاته: أنا ماعاد عارف شي يا أروى.. ساعديني بترجاكِ قوليلي شو أعمل؟؟ خايف عليها ، حاسس متل حد السكين بكف ايدي، من الطرفين بيجرح.. وقلبي مابيتحمل فراقها
حطت ايدها على كتفه وربتت عليه
أروى: الشي يلي عرفته عن علاقتهن، بيأكد أنهن بيحبو بعض بشكل جنوني طارق، وهنن مو صغار وأكيد بيعرفوا مصلحتن.. بعدين حكا هداك الشب إنه شاهين ترك كل هالشغل وطلع من البلد ليبلش من الصفر
طارق: وإذا..
قاطعته فوراً لتحكي بنبرة أقوى: مافي وإذا ، اليوم رح تقرر وهلأ.. ياأما تتركها تموت قدام عيونك، أو تسلمها لقدرها، تاج ماعم تتحسن ولا بدها تتحسن، بالعكس كل يوم عن يوم عم تتعب اكتر طارق
اتنهد بتعب وبعدها نطق حروف كانت جداً ثقيلة على قلبه، لكن مجبور
طارق: اتصلي فيه وخبريه بموافقتنا
….
بعد مرور ساعات قليلة،
فتحت تاج موبايلا لتشوف الساعة
٨:٣٥ م
تنهدت بتعب ورجعت الموبايل لمكانه لتسمع صوت الجرس
كانت عارفة أروى موجودة ورح تفتح، وتوقعت دخول أروى لتحكيلا وصل الطبيب
بقيت قاعدة على السرير منزلة راسها على ايديها
سمعت طرقات على الباب
تاج: تفضل..
أطلت أروى براسها ولما شافتها قاعدة افسحت الطريق لهارون
سمعت تاج خطوات بطيئة بالغرفة، وتسكر الباب بعدها
انتظرت كتير لتسمع صوت أروى ولكن ماسمعته
قلبها انقبض وحست بشعور سيئ.. رفعت راسها ببطئ لتلمح الشخص يلي ماتمنت بحياتها تشوفه
الصدمة شلّت أطرافها للوهلة الأولى، لكن ذاكرتها ماكانت قادرة توقف
حس هارون بخوف بحياته ماحسه بمواجهة أي شخص
ماكان خوفه من يلي رح تعمله فيه.. كان خوفه ترجعه لنقطة الصفر، لعذاب الضمير يلي اكل منه كل هالفترة قبل مايتأكد من حالة شاهين واستقراره الصحي
لحظة ورا التانية عم يشوف عيونها كيف عم تمتلئ بالحقد والكره والغضب، نيران ارتسمت داخلها
شهقة خفيفة صدرت منها مع رجفة هزت كامل جسدها رجعتها للدنيا، وكأنها صحيت من كابوس وشافت أمامها الانسان يلي قتل حبيبها و دمر حياتها، وقتلها وتركها تكمل أيامها جسد بروح ميتة
قرب منها خطوات مترددة، ماكان قادر يقطع هالصمت،
لينصدم من حركتها السريعة لما قفزت من سريرها دفعة وحدة واندفعت عليه
مسكت بعنقه بقوة وصرخاتها ماعاد توقف، لدرجة غمض عيونه من قوتها
دفعته بقوة على باب غرفتها وهي عم تتهمه وتحرق فيه بأقوى الكلمات والاتهامات
كل قوتها حطتها بايديها لتقدر تخنقه
تاج بقهر وصوت مرتفع: ياحقير.. ياوسخ قتلته قدام عيوني ومارفلك جفن، لك قتلت أخوك يلي وثق فيك، وكان إذا برملك ضهره بيكون مأمن على حياته بين ايديك.. اخدت روحه من بين ايدي والله رح آخد روحك أنت كمان، والله مارح خليك تعيش ياهارون، جيت برجليك لعندي
حس باختناق وبدأ جسده يتعب أثر امتناع الاوكسجين عنه ليسحب ايديها عنقه بقوة
هارون: لك تاج.. تاج سمعيني بس لك اهدي جنيتي!!رح تموتيني وتدخلي السجن..
أول ما افلتته رفعت ايدها وبكل وجعها نزلت فيها على وجهه بكره وحقد مالين قلبها
تاج: بدي انتقمله، وريح روحه ونضف هالدنيا منك يا واطي، شاهين مات أنت اخدتلي شاهين وماتركتني عايشة معه بسلام، أنت قتلت أخوك
ضربات متتالة أصدرتها وهي عم تلومه وتتهمه بأبشع الاتهامات ومازال عم يحاول يتلقى منها كامل غضبها بس لحتى تهدا
ولكن كانت قوتها عم تنشحن وتزيد،hekaea_tna #موعد_مع_خاطفي #الجزء200
ولما ضغطت عليه كتير بكلامها القاسي صرخ فيها هارون: أنا ما قتلت أخي.. سامعة؟ ماقتلت شاهين فهمي
سقطت ايديها مكانهن لتبقى أسيرة هالكلمات، ثابتة بأرضها أنفاسها متخابطة، تمنت لو تقدر توقف أنفاسها لترجع تسمع كلماته بوضوح اكتر
ردد هارون: كنت مضطر لأني أصيبه لكن شاهين اليوم عايش تاج، وما مات صدقيني
هبوط رهيب حست فيه بجسدها لتضم ايديها على آذانها وتصرخ بقوة هزت اركان البيت
تاج: لااا مستحيل.. مستحيل أنت كذاب شاهين مات
مازال عم يكرر كلماته وإنه شاهين عايش حاول يقرب منها لأن تأكد بعد صراخها هاد رح تفقد وعيها
دخلت أروى بسرعة لتحاول تهديها ضمتها من خلفها بقوة
أروى: تاج خلص ياعمري بترجاكِ اهدي
تاج ببكاء وضعف واضح: قوليله إنه مات، قوليله كيف هو قتله وتركه عم ينزف بين ايديي لبينما مات أروى خليني ريح روح شاهين وموته بترجاكِ
دفعت تاج أروى عنها ورجعت تسدد ضربات على هارون لما فجأة قاطعها ورفع الموبايل بوجها وشغّل فيديو لشاهين
هدوء مخيف سيطر عليها، دمعات سخنة حرقت خدودها
أنفاسها صارت ثقيلة جداً وبصعوبة تصدرها، حضنت الموبايل بين ايديها بملامح فاقدة أي شعور، وحنجرة خانتها لتمتنع عن الكلام بأي حرف
حاولت كتير تحرك شفافها لتنطق اسمه لكن فشلت بكل محاولاتها،وبقيت شفافها راجفة
رفعت أصابعها وحاولت تلمسه لكن هالشاشة كانت حاجز قابض على قلبها بقوة، صوته سرى بعروق جسدها متل الدم
ادرجة حست بحضوره وريحته ملئت المكان فجأة
لينتفض جسدها أثر رهبة الشوق يلي ملئ قلبها، لما ماعاد تقدر تتنفس نهائياً وحست بتقل رهيب بكامل جسدها وكأنها ماعادت قادرة تسيطر على نفسها نهائياً
مالت للخلف لتستند على أروى يلي مسكتها بقوة
همست تاج بحروف متقطعة: يعني ماتركني!! وينو.. شاهين؟؟
قرب منها هارون ومسك ايديها: شاهين.. عايش ياتاج.. ماتركك ولا رح يتركك، صدقيني وسمعيني كوني قوية شوي
ابتسامة رتسمت على أطراف شفافها لما انغلقت عيونها ببطئ وهي عم تردد(أنا مو قوية) لتسقط بين ايدي أروى وهارون
….
بعد دقائق، صحيت وهي عم تصرخ باسمه، عانت من نوبة عصبية جديدة صبت كامل غضبها على هارون لتفرغ يلي فيها
يلي قدر وبصعوبة يضبط أعصابه معها
وكل محاولاتها لتهدا أو توقف تفكير ولا تصدق كلام هارون، فشلت
وبالنهاية ماهديت غير لما اتطلعت بعيونه ونطقت: بدك سامحك على فعلك معي هارون؟
اتنهد بتعب وحكا: أكيد..تاج
حكت بنبرة ذات مغذى: خدني لعنده هلأ.. وبسرعة بدي شوفه، أنا ماعم صدقك، شاهين بين ايديي مات بعد ماودعني، أنت كذاب وهاد الفيديو قديم،
خليني شوفه.. المسه بس لأقدر صدق إني بالحقيقة.. مالي بحلم من أحلامي
بحياته ماتوقع الشفقة تدخل على قلبه بهي الطريقة
ضعفها وقلة حيلتها وصدمتها القوية
هارون: بس ياتاج، شاهين رافض الفكرة حالياً،هو خايف عليكي من وجوده بحياتك
قاطعته بنبرة قوية: يخاف عليي من غيابه، من فراقه مو من وجوده.. ليك سماع، عم قلك إذا بدك سامحك على أيام الوجع يلي عشتها، بدك تاخدني شوفه
فكّر لوقت قصير ومع أنها منعته حتى يفكّر، وبعدها أجرا اتصالاته ليقدر يأمنلها أقرب رحلة بعد ضغط كبير عليه
اجتمعوا كلهن بالغرفة بعد ماوصل طارق يلي كان عم يتأمل وجها
التعب آكل من ملامحها بقسوة،وجود جسدها بينهن لكن غياب روحها لمكان ماحدا بيعرفه غيرها أكدله أنه اتخذ القرار الصح، لكن مابينكر ألمه وخوفه عليها
كانت الرحلة بعد كم ساعة، فجأة حست وكأنهن أسوء من كل أيام هالفراق
طالت الساعات وكأنها عمر كامل
ماقدر طارق يبقى مكانه لهيك قرر يسافر بالرحلة يلي بعدها مباشرةً مع أروى بعد مانطلقت رحلة تاج
…
عالقة مابين الخيال والحقيقة، الحلم و الوجود
الزمن أصبح مخالف للواقع، والدقيقة تحولت لسنين طويلة عم تنقش بملامحها مرور العمر
(وصلنا)
كلمة من هارون خلت جسدها يتأهب للقادم
نزلت من سيارة أمام عمارة قديمة
طلعت خلفه بأقدام راجفة لتوقف بالنهاية فاقدة القدرة لتكمّل
التفت هارون لما ماعاد سمع صوت حركتها
اتنهد بقلق، مسكها من اعلى ايدها وساعدها لتطلع آخر كم درجة
همسلا: جاهزة؟
هزت راسها بالرفض لكنها تقدمت لما سقطت دمعة من طرف عيونها
وقفها بمكان جانبي وطرق على الباب
انتفض جسده شاهين بدون مايقدر يعرف السبب، ولا يفهم الشعور يلي انتابه
اتحرك من مكانه متوجه بخطوات بطيئة اتجاه الباب
حامل خلف ضهره العاري سلاحه
طرقات متتالية دفعته ليفتح الباب بقوة رافع سلاحه بوجهه
رفع ايديه هارون: شبك اهدا لك أنا هارون
نزل سلاحه شاهين وحكا بنرفزة: لك شو هالغباء وين مفتاحك ليش؟؟
هوا جسدها على الجدار ليمسكها بسرعة هارون بطرف ايده
شاهين بتعجب: شو صاير؟ مين معك؟
لحظة وظهرت أمامه حوريته.. ليالي طويلة وطيفها مرافقه لكن هالمرة شعور مختلف لما ظهرت أمامه
اتخبط بين الكذب والصدق.. ماعاد قادر يتأكد من يلي عم تشوفه عيونه غاص قلبه بعمق مشاعر ماقدر يحسها من قبل
رفعت عيونها ببطئ شديد، من أطراف أقدامه للاعلى
لابس بنطلون بيجامته الأسود، بعدها وقع نظرها على صدره العاري، لتلمح الوشم.. التاج
واللاصق الكبير الطبي، يلي خافي تحته جرحه
قربت بخطوات مترنحة لترفع عيونها بصعوبة بالغة
ولحظتها ثبتت مكانها
ماكانت قادرة تحدد هل هو؟ولا حدا بيشبهه..ياترى عايش فعلاً ولا عم تتخيل وجوده
فتحت تمها لتنطق لكن حروفها انخرست..تلاشت
همس شاهين بشوق رهيب: تاج!
رفعت ايدها ، لتلامس خياله مستعدة أنه يختفي بعد أول لمسة متل ماكانت متعودة بأيام فراقه
اللمسة الأولى.. حطت ايدها على الوشم، لتحس بحرارة جسد حقيقي أمامها
غمضت عيونها للحظات لكن مااختفى احساسها بلمسته!
رفعت عيونها الحايرة بعد مافتحتهن بصدمة، عاقدة حاجبيها رافضة الحقيقة.. تخبطت مشاعرها بقوة، حست بحرب بداخلها، صرخات داخلية لخبطة ماقدرت تعرف وصفها
ماكان عم يصدر من ثغرها غير الحروف الأولى من اسمه
جسدها تحول للون الأصفر وكأن الدم اتبخر من كامل جسدها
رفعت ايدها لوجهه وعيونه مازالت حايرة، خايفة..قلقان عليها شعوره شل حركته وبتر كلماته
أول ما أصابعها لامست أطراف لحيته نطقت بحروف مكتومة
(شاهين)
هوا جسدها للخلف ليرفع ايده بسرعة ويمسكها من ايدها وهو عم ينده باسمها
والتقطها هارون بحضنه
هارون بخوف:تاج انتي منيحة؟
نار حرقته لما شافها بحضن رفيقه، سحبها بعنف منه مع نظرة شلّت حركة هارون وتركته واقف مكانه مزدرد ريقه
حضنها شاهين بأيده وحكا بنبرة تهديد:حسابك بعدين على هالفعل
ودفع الباب بوجه هارون بطرف رجله متوجه فيها للداخل
هارون: ياربي شو هالانسان؟أكيد فقد تركيزه
…
سطحها على الكنبة بهدوء، اتأمل ملامحها وماقدر يتحمل اكتر سرقها بين ايديه بقوة ..بشوق فتك بقلبه الضعيف، شم ريحتها وكأن الروح ارتدتله فيها
نظراته عم تتأملها وكأنها اغلى مايملك.. ولأنها هيك بالفعل
غلبته مشاعره وتساقطت دمعات حاول كتير يمنعها، لكن الشعور كان بليغ
شاهين بلهفة: حبيبتي.. تاجي.. روحي انتي اصحي ياقلبي، اصحي فتحي عيونك مشتقلهن كتير.. حاكيني ردي عليي
تسارعت نبضاته، ارتجفت ايديه، رغبة جامحة ليخطفها داخل أضلاعه أو يغرق بحضنها
سند وجها المتجمد بكف ايده وهو عم يحاول يصحيها
قرب وجهه ونثر قبلاته على أطراف وجها حتى يستعيد حرارته، وترك أثر لقُبلات تانية داخل كفوف ايديها
صحيت ببطئ أثر حركاته، لتلمح وجهه قريب منها
ابتسمت بوهن مابين خيالها والواقع لما رفعت ايدها ولامست وجهه
بغصة خانقتها نطقت: حبيبي.. أنت عايش؟ احكي شي شاهين أنت حقيقي؟ سمعني صوتك
هز راسه ليغرق وجهه بطرف صدرها وتسمع نحيبه
شاهين: أي ياعيوني..أنا عايش وليكني بحضنك
ارتعش جسدها بقوة، لتصدر آه من أعماقها وارتفع صوتها بقوة
تاج: اااخ.. ياقلبي ماعاد اتحمل لأ
تنهيدات متكررة دفعته ليسحبها لحضنه بقوة ليحميها من هالوجع
يسرق منها الألم ويغرزه داخله.. وتبقى هي بخير
تاج: مابدي تكون كذبة شاهين.. بترجاك لأ كون حقيقة، أنا قلبي مات معك
رد عليها بقهر: بحلفلك اني حقيقة ياروحي، والله العظيم أنا بين ايديكي ليكني عايش.. أنا بدي عيش جوا قلبك مابدي ياه يموت.. طلبي شو مابدك مني بس اصحي واتطلعي فيني ماتغيبي تاج ركزي معي
رفعلا ايدها وخلاها تلمس مكان الجرح
شاهين: ليكي الرصاصة هون فاتت بس طالعوها وقدرت عيش وما متت.. اهدي بترجاكِ ياعمري خايف عليكي
قامت من مكانها وقعد هو أمامها، غمر وجهها بكفوفه وهي ذات الشي
مسحت دمعة كانت عالقة على أهدابه، قربت منه لتلامس بثغرها عيونه ، وتترك أثر قبلتها الخفيفة عليهن
رجعت لأمامه وجها غرقان بدموعها يلي ماكانت قادرة تمنعهن، هزت راسها بتأكيد :أي.. والله أنت شاهين.. والله أنت بين ايديي .. يعني حقيقة
نبرة سرت بعروقه دفعته ليشدها بكامل قوته لحضنه، ارجفت فؤاده بحركتها الأخيرة،اقسم من بعدها ماعاد رح يتخلى عنها ولا يفرقهن شي
لكن هالمرة ماكانت قوتها أقل، تمسكت فيه بقوة وتناست أنها عم تغرز أظافرها بجلده.. ولا هو قادر يمنع رغبتها القوية بقربه
كل ماتحس ارخى ايده تشد عليه بقوة، زادت رجفتها وحروفها كانت تايهة بس ماامتنعت عن الحكي
تاج: كنت عم موت ياشاهين، فكرة إني ابقى عايشة وأنت مو معي ، ابشع من أي مرض مُهلك عم يقتل خلايا جسدي، خيالك بأحلامي و واقعي مافارقني، كنت بس متمنية يجي اليوم يلي رح صير فيه عندك.. موت وأجيك ياحبيبي
حط ايده على شفافها: ماتحكي هيك عمري، هي انتي جيتي لعندي.. خلص كل هالفراق انتها
اتطلعت بعيونه من داخل حضنه: يعني بتوعدني؟ ماعاد تتركني شاهين؟ ماعاد تعيشني هاد الشعور السيئ يلي بيغرز بقلبي متل السكين؟
مسح على وجها: بوعدك ياروحي.. مستحيل يفرقنا شي
لحظة خلف التانية، بدأت تستعيد تركيزها ووعيها للي عم يصير، تبدلت نظراتها لتدفعه بقوة بدون ماتنتبه أنها آلمته مكان الجرح
صرخت فيه بعد لحظات من الصمت: أنت كذاب.. وعودك كذابة، ليك شو عملت فيني!! ماعاد أثق فيك.. خليتني موت وأنا مفكرتك ميت.. وأنت عايش وماعم تجي وتخفف من أيام عذابي السودا هي
حاول بصعوبة يمنعها يثبت حركتها لكن كل محاولاته فشلت
غضب جامح دفعها توقف أمامه وتصرخ فيه، تفرغ كل غضبها
تاج: أنت ماحبيتني بيوم، مستحيل.. لو حبيتني مابتقدر تخليني عيش هاد كله.. أنت بلا احساس وبلا ضمير ، فكرتك تغيرت بس مافي شي تغير
قرب منها بخطوات بطيئة لتهرب منه لغرفة بدون ماتعرف وين عم تقودها أقدامها
بدموع كملت صرخاتها: ماتقرب مني ولا تلمسني، لازم تعيش يلي عشته أنا، لازم تدوق المر يلي تجرعته بفراقك.. لازم تبكيني متل مابكيتك شاهين
عم تتراجع بخطوات للخلف وهي عم تطلع بعيونه، قلبه احترق عليها، بس بدو يسحبها لحضنه ليرجعلا الأمان يلي سرقه منها لكن عصبيتها وغضبها جبروها تمنعه بكل ما أوتيت من قوة
غمضت عيونها بقهر وصاحت فيه : أنا بكرهك
ثبتت مكانها لما وصل لعندها وبخطوة تانية منه اندفع جسدها للخلف وتهاوت على سريره وكان من فوقها
تمسكت فيه بقوة خوفاً أنها توقع عالأرض بدون ماتعرف أنه جسدها انتهى فوق السرير
غمضت عيونها بقوة لتلفحها أنفاسه، نطق بحروف أمطرتها عشق
شاهين: وأنا بحبك تاج.. بعشقك ياروحي، ريحيلي قلبك..واطمني هلأ بحضني
فتحت عيونها لتتأمل وجهه بقربه هاد، ابتلعت ريقها باحثة عن أي كلمة تكمّل فيها غضبها، لتكتشف أنه كامل عصبيتها اندثرت بلحظة وحدة
أعمق وجع داخلها بدا يشفا بين ايديه، لمسات دافية مسح فيها على وجهها
ليغمرها بغرامه ، ورجعلها عاشقها الجريئ، كانت قوته بتعادل أيام وليالي شوق عاشوها
غرقت معه بِحبها الخالص.. وكأنها قبلة الحياة يلي اعادتها لتحس بوجودها من جديد
بعد لحظات قصيرة، خاف عليها من جموح مشاعره وابتعد عنها ليرتمى بجسده بقربها آخد أنفاسه بصعوبة
حس بألم طرف الجرح لكن كتم وجعه حتى مايخليها تقلق
رفعت ايدها وحطتها فوق الجرح
همست تاج: عم يوجعك؟ طمني صرت بخير أكيد شاهين؟؟
غمرها بايده اليسار بقوة وطبع قبلة على جبهتا: أنا بخير ياقلبي، تأكدي أنه ماعاد فيني أي شي.. رح كون بخير بس تبقي جنبي رح تشفيني من كل وجع، وتسامحيني تاج، ماقدمتلك غير الوجع والخوف وال..
قاطعت كلماته بلمسة ايدها على شفافه: لا تكمّل شاهين.. أنت ماقدمتلي غير الحب، وبالحب حتى الوجع لازم نتحمله..صح كانت أيام عم تحرق فيني بلهيبها، بس صدقني وجودي بحضنك اليوم بيستاهل التمن.. أهم شي ماعاد نفترق بيوم
اتنهد بعمق ومسح على ايدها : أكيد ياقلبي ، مستحيل فارقك بيوم، مستحيل بكي عيونك أو حسسك بوجع داخل قلبك، خلص كلشي عشتيه لليوم بيكفي.. اخدتي وجع العمر كله بفترة قصيرة، وهلأ بوعدك مارح يبقى غير الفرح
ارتسمت ابتسامة فيها راحة رهيبة، مصدرها باختصار كان هو (شاهين) وجهه عيونه.. لمساته وكامل تفاصيله
كمّل كلماته بصوته الدافي: بدي تسامحيني على كل أذى تسببته الك بلحظة غضب.. هداك الشخص مات، صدقيني قتلته وماعاد في غير الانسان يلي خلق مع حبه إلك
ضمته بقوة متمسكة فيه وكأنه الحياة: سامحتك من زمان ياروحي..
لاعاد تحكي عن هالموضوع بترجاك، مافيني اتذكر إلا لحظاتنا الحلوة أنا
حكا بضحكة: أي اللحظات الحلوة يلي خططتلها مجنونتي
ضحكت معه لتخفي وجها داخل صدره بخجل
بعد لحظات حست شبح الفراق عم يحوم حولهن لتحكي بحروف خايفة بعد ماتحركت من حضنه: شاهين بترجاك..أنا عم اترجاك تترك هداك الشخص، إذا بدك ياني كمّل معك حياتي.. اتخلى عن انتقامك، لازم تقدم تضحيات كرمال يلي بتحبهن، هارون حكالي القصة كاملة.. وأنا مافيني اتحمل اخسرك كمان مرة والله بموت
شدها لحضنه بعد ماكان عم يتأمل وجها يلي مشتقله كتير
شاهين: خلص ياقلبي بوعدك ولا عاد تجيبي سيرة الموت نهائياً، أنتي بتستاهلي إني اترك الدنيا كلها مشانك، مستحيل فرّط فيكي أو أرجع عيشك هيك ظروف، خلص أنا رح ابدا بداية جديدة من اليوم معك.. بين ايديكي تاج
هالمرة غيرت مكانها لتسحبه لحضنها هي وتمسح على راسه بحنية: بحبك شاهين.. بحبك حب ماعم تقدر توصفه الكلمات، أنا أمامك عاجزة كلياً
ابتسم شاهين: أنتي عشقانة شرير.. أسوء انسان بهالكرة الأرضية
قاطعته تاج: لا ماتحكي هيك،أنا اكتر انسانة بعرف شو ممكن يعمل الماضي بالانسان، والناس يلي عايشة حوليه، كل مااكتب برواياتي شخصية سيئة احكي عن ماضيها المرير
أطلق ضحكة قوية وقعد مكانه لتقعد هي كمان
تاج بضحكة: شبك ليش ضحكت؟
غمر وجها بكف ايده: يالله شو شتقت لكلماتك هي.. شو اشتقت لحروفك المجنونة والحديث عن رواياتك ياكاتبتي العظيمة وسيدة التفاصيل
حست بخجل نزلت راسها ونطقت: بس كاتبتك خلص انتهت، أنا اليوم بس تاج
رفع راسها واتطلع بعيونها: لا.. كاتبتي مابتنتهي، بدك تكتبي حكايتنا بكل تفاصيلا، بكل فرحها ووجعها.. وبدك تضيفي عالنهاية شغلة ضرورية كمان
تاج بتعجب: شو هي؟
قرب منها لتسري ريحته داخل جسدها ويرتعش فؤادها وتغرق فيه
شاهين: بدك تكتبي قبل ماتنتهي الحكاية، الخاطف الشرير، قرب من الكاتبة وسرق منها قُبلة غرقتها بغرام مُميت..كأنها أوشكت على مفارقة الحياة بعدها
تاج بصدمة من قوة التعبير: اووفف!!
حط ايده على ثغرها وكمّل: بعدها عنه شوي وهمسلها وأنفاسه متقطعة عم ياخدها بصعوبة، "بتتزوجيني تاج" ؟؟؟
فتحت عيونها بدهشة وخفق قلبها بقوة ،حست رح يطلع من بين ضلوعها
جمدت ملامحها ليتطلع فيها ويضحك
شاهين: لك شبك ردي؟
تاج بحروف متلعثمة: مين؟ شو؟؟ حكا..
شاهين: أنا يلي عم احكي.. تتزوجيني تاج؟؟
ضحكة غرقت بدموعها لما ارتمت لحضنه وحكت بدون تردد: بتزوجك أي.. منتزوج ياخاطفي المجنون
ارتفع صوت ضحكاتهن الغارقة بدموع عيونها وشوقه
hekaea_tna #موعد_مع_خاطفي #الجزء206
وهي بين ايديه مازالت مستغربة كلماته الأخيرة لتشوف الإجابة على شكل (روايات) بطرف طاولة السرير
ضحكت بصمت وقتها لما كشفت سره ، وبغيابها كان عم يقرا كل رواياتها.. واليوم تعلّم أسلوب أبطالها ليطلب منها الزواج بالطريقة يلي كانت تحكي عنها برواياتها
….
بعد مرور زمن
بالبلد يلي صارت بلدهن التانية ، بعد ماقدروا يعيشوا فيه براحة أكبر وشاهين قدر يرجع بأوراق رسمية
مازال حُب بلدهن الأساسي بقلبهن، لكن الراحة والقرب يلي عاشوه بأيامهن الأخيرة اثبتتلهن أنه حُب المكان متعلق بالأشخاص يلي بترافقنا فيه
بمكتبة كبيرة إلها اسمها ومكانتها بهالبلد
كانت عم تمشي فتاة بين رفوف الكتب وايد حبيبها غامرة ايدها بقوة
بتشبه فتاة الروايات، في على ايديها وطرف خدها أثر غيوم البُهاق
لمست الرواية يلي أمامها ونطقت الحروف بتمعّن
ريمي :(موعد مع خاطفي) للكاتبة تاج
بابتسامة سببها الفرحة يلي معانقة أعمق شعور داخله حكا عزيز: رهيبة..
ريمي: ماعم صدّق أنه قدرنا نجي لنحضر حفل توقيعها هالكاتبة العظيمة..
بضحكة سألها: شو الوضع؟ بلاقيكي سرقتي مني الشغف!! شو نسيتي إني يلي حكيتلك عنها وعن حياتها
ضربته بطرف كتفه وحكت: لك أيي يعني عم تمنني أستاذ عزيز!! أنا حبيت شخصيتا لما شفت مقابلاتها وقرأت كل رواياتها، وصار عندي فضول لشوفها.. بس ياترى عنجد متل ماحكيت أنت؟ رح تكون بحالة سيئة؟
عزيز: هلأ منشوف.. يابيكون انقذها شخص ما، أو مازالت غارقة بلعنة الكتابة
كمّلوا طريقهن بين الكتب عم ياخدوا نظرة سريعة قبل بدء الحفل
بغرفة بالطابق السفلي كانت قاعدة تاج شابكة ايديها ببعض
انحنى شاهين وقعد أمامها: عمري.. شبك؟ مو أول مرة بتعملي حفل توقيع، بعدين هي روايتنا.. شو نسيتي؟ وأنا معك..
رفع ايده ليلامس بطنها بحنية: والبيبي كمان معنا
لامست ايده واتطلعت بعيونه
هزت راسها وحكت: معك حق، بس الغيبة كانت طويلة ، حاسة شعوري أصعب من أول مرة بحياتي بعمل فيها حفل توقيع
وقف أمامها وسحبها من مكانها ليضمها : اهدي ياروحي، وكله رح يكون بخير
استكانت بحضنه للحظات وبعدها بعدت عنه وهي عم تناظر صندوق بزاوية الغرفة
تاج بقلق: شاهين؟؟ شو هاد
اتطلع عليه بتعجب: شو بعرفني ياروحي!! بيكون كُتب
اتطلعت فيه: شاهين لاتقلي أنك عملتها وشتريت افعى
ضحك ليكمّل: يعني بس سؤال!! معقول اشتريها وجيبها معي لهون؟ بعدين خلص خبرتك ماعاد جيب غيرها، (كمّل بنبرة حزن)الافعى ليسا ماتت وأنا تركتها بالماضي وحتى حُبي للأفاعي بقي بالماضي تمام هيك.. وعدتك ماعاد جيب غيرها
ابتسمت براحة: أوك..
قاطعتهن طرقات على الباب ليدخلوا طارق و أروى وهارون
ركدت أروى وضمتها: ياعمري.. يالله شو متحمسة
تاج: بس أنا كتير متوترة
قرب منها طارق وضما: ماتقلقي ياروحي أنا واثق فيكي ورح تعمليها هالمرة كمان.. واسمك رح يرجع يعلى ويضوي بكل الوطن العربي
ضمته تاج بقوة: حبيبي.. ثقتك فيني يلي وصلتني لهون
أصدر شاهين صوت من حنجرته متصنع الغيرة: احم احم.. نحن هنا ها!!
هارون: لا أخي أنت بدك توقف على طرف يعني مهما كان بيضل أخوها
قربت تاج وضمت شاهين: خليك محضر خير أخ هارون،شاهين زوجي وحبيبي ورفيق دربي وماحدا بيقدر يغير هالشي، بس كمان أخي طارق هو آمن بموهبتي من البداية
أروى: هارون بحياتي مالتقيت بشخص بيحب المشاكل متلك
ضحكوا سوا لما حكا هارون: طيب شو بعمل يعني مو بأيدي، بنصحك أروى تطالعيني من هالغرفة قبل ما كمّل عليهن
فتحت الباب وقالته: لا لا اتفضل طلاع لفوق احسن ماتزيدا عالبنت
طلع خلفها وتاج وشاهين عم يراقبوهن بنظراتهن، ضمها شاهين من خلفها وغادر طارق ليتركهن وحدهن
همسلا شاهين بنوع من الغيرة: رح يجي الدكتور اليوم؟
ردتله وهي عارفة الموضوع بيدايقه: حبيبي.. انتهت جلساتي معه الحمدلله، واتحسن وضعي بس هالمرة كان لازم ادعيه للحفل، يعني من بعدها بأكدلك مستحيل نتقابل
غمر وجهه بطرف عنقها ليشتم ريحتها بتملّك غامر قلبه
وهمسلا: بعشقك لدرجة مابتحمّل شوف حدا قادر يكون قريب منك تاج.. حتى اسمك صعب عليي اسمعه من الناس.. ريحتك شعرك وقلبك وحبك.. كلشي فيكي
كمّلت تاج: إلك وبس.. زوجي حبيبي.. أنا كلّي إلك
…
دقائق قليلة وطلعت تاج رافعة ايدها عم تقدّم تحياتها للحضور ، كان العدد هائل والوضع مربك للكل
أشرقت الابتسامات بوجوه قُرّائها، والهمسات ارتفعت وهنن عم يلقوا عليها السلام والشوق
فرحة اعتلت فؤادها وطمنتها وريحتها لما شافت هاللهفة كلها
وكان من خلفها شاهين
خاطبتهن تاج بِحُب: اسعدتوا قلبي بحضوركن جميع، لطالما كان لوجودكن أثر كبير بحياتي وكتاباتي، بشكركن من كل قلبي لأنه ولا يوم خيبتوا ظني، وكنتو لحد يومنا هاد.. عم تنتظروني بحماسكن يلي شايفته بعيون كل حدا فيكن
ارتفعت الهمسات اكتر ليقدمولها خالص حبهن ومشاعرهن الصادقة بكلمات لطيفة بتشبه كلماتها يلي بتستخدمها برواياتها
وقف قربها لما قعدت خلف المكتب على كرسيها
وبدأ شخص ورا التانية يتقدموا ليوقعوا معها
كلمات دعم وحب كبير غمرها، وصلت لاعلى مراحل الفرح والفخر، استعادت الشي يلي كانت فاقدته طوال هالسنين بنظراتهن وكلماتهن
لدرجة في قارئات ماقدروا يتمالكوا نفسهن
وبعد ماتصوروا معها ضموها بقوة من اللهفة
كان عم يحاول شاهين بكامل قوته يتمالك الغيرة يلي اجتاحت قلبه
ودعم أخوها طارق وصديقة عمرها أروى، حتى هارون يلي صار متل أخ إلها.. دعمهن كان إله دور بوصولها لهاد اليوم لو بشكل بسيط
…
تقدموا شخصين ماسكين ايدين بعض رفعت عيونها عليهن لتعانق نظراتهن بضحكة مشرقة
تاج: ياأهلاً وسهلاً..
حكا عزيز وهو عم يقرا بداية الرواية : "إلى ماتبقى منك داخلي.. إلى الأيام التي لم تأتي.. إلى الذكريات التي تُخلّد.. لنبقى على قيد الحب نعيش "
ابتسمت تاج بفرحة واضحة
عزيز: كيفك استاذة تاج؟
تاج: بصراحة، اليوم أنا باعلى مراحل السعادة بوجود الكل
ريمي: على الرغم من بعض الأشخاص يلي خبروني أنك كنتي بحالة سيئة(اتطلعت ريمي بطرف عينها ب عزيز خافية ضحكتها المشاكسة واكملت)بس أنا شايفتك اليوم كتير مرتاحة ومبسوطة ماشاءالله
تساءلت تاج: صحيح الحمدلله، بس خبريني مين حكالك إني كنت بحالة سيئة!!؟
حكا عزيز : بصراحة أنا.. يعني نحن دارسين علم نفس، ومن شدة حبي للقراءة صرت أعرف الحالة يلي كان عايشها الكاتب أثناء كتابته للرواية أو الكتاب
اتقدم شاهين خطوة ليقدر يسمع بوضوح هالحديث
تاج: رائع.. برافو عليك، وهاد الشي يلي حسيته بروايتي؟
عزيز: صحيح، ماكنتي بحالتك ذاتها متل الروايات السابقة
اتطلعت تاج بعيون شاهين مبتسمة ورجعت ردت عليهن: معكن حق.. كانت صعبة علي عودتي للكتابة بعد سنين ، لازم اعترف
رفعت ايدها ومسكت بأيد شاهين وكمّلت: بس بوجود الانسان الأقرب لروحي.. أنا عملتها وليكني اليوم هون
عزيز: وكانت عودة قوية ورهيبة صدقاً، يعني غيابك ماكان عالفاضي وانتظارنا كمان.. منتمنالك استمرارية بهالقوة دائماً
شد شاهين على ايدها: زوجتي كاتبة عظيمة.. كونوا متأكدين رح تصدمكن اكتر بأبداعها القادم
اتطلعت فيهن ريمي بعيون غامرتها الفرحة: انتو رائعين.. الله يديمكن مع بعض.. بتسمحيلي اغمرك!!
وقفت تاج مكانها، مشيت بخطوات بطيئة على الرغم ماكان الكعب بالارتفاع ذاته يلي معتادة عليه، بسبب الحمل ماعاد قدرت تخاطر وتلبس كعب مرتفع
لكنها مااستغنت عن ستايل ملابسها الأنيق.. واليوم كانت متأنقة بطقم رسمي باللون(الزيتي) والقميص كان باللون الأسود.. وكان عريض ليناسب حجم بطنها
ضمتها ريمي بحب واضح
تصوروا معها وبعدها كمّلت تاج توقيع
رفع طارق الكاميرا ليكمّل تصوير بعد ماانتهت تاج توقيع
وقفت خلف المكتب وحكت: بشكركن لحضوركن، بشكركن لدعمكن المستمر وإيمانكن فيني، ومحبتكن الصادقة..
وقوتكن يلي ما تزعزعت بيوم ودفعتكن لتنتظروني حتى يومنا هاد ، الحياة ممكن تكون قاسية كتير بس صدقوني بتكون عم تجهزنا لأيام حلوة، بتخلينا نكون مستعدين لنعيشها بقوة وصمود.. الأيام الصعبة بتعلمنا كيف ندور عالسعادة ونعيشها صح بكامل تفاصيلها، لهيك ولا بحياتكن تكونوا ناقمين على أيامكن السيئة
اخدت نفس عميق وهي عم تطلع بالعيون المتوجهة بتركيز عليها
تاج: كانت النهايات برواياتي سعيدة على طول، لأنه امنياتي دائماً كانت مشابهة للنهايات هي،لكن لهفة البدايات كانت مختلفة
(اتطلعت بعيون عاشقة لشاهين)
وكمّلت: مختلفة وقوية وصعب تخطيها، فينا نعيش لأجلها عمر بحاله، ونبقى بالاندفاع ذاته لما بيكون الشخص الصح هو يلي مرافقنا، أبطال روايتي الأخيرة كان حبهن سريع، أنا معهن هربت من المنطقية إلى اللا منطقية وبكامل رضا عم احكيها اليوم، قصتهن كانت غريبة جداً، بس خلصت الحكاية ونحن مكملين
توجه سؤال إلها من الحضور: بس النهاية كانت شبه مفتوحة، والخاطف المأجور رجعها لبيتها قبل مايحدد موعدهن التالي
ابتسمت تاج لتجاوب: تركت الموضوع لخيالكن وقلوبكن، انتو حددوا ياترى العشق يلي خلق بقلوبهن رح يجبره يعمل خطة ويحدد موعد تاني يجمعهن.. أو بتنتهي الرواية لعند هاد الحد
جاوبت فتاة من بينهن: أكيد مارح ينتهي، هيك حب عظيم أنا رسمتله نهاية خيالية رائعة، والبطل رح يعمل لعبة تخلي البطلة تبقى عشقانته لنهاية حياتها ويكملوا مع بعض
ابتسمت تاج: أي هيك تماماً، حبيت هالمرة كل شخص فيكن ينهيها بالطريقة يلي بيفضلها
سؤال تاني سمعته: يعني مافي جزء تاني للرواية؟؟
اتطلعت تاج بشاهين لما قربت وضمته، توجهت انظارها هي وياه لمكان معين، (هارون و أروى) يلي كانوا غارقين بنقاش حاد.. واتمنوا ماينتهي بمشكلة
ضحكت تاج مع شاهين وجاوبت بعد ماغمزت بعينها: وارد يكون في جزء تاني..
واليوم بدي اختمها مع حبيبي.. زوجي وأبو الطفل يلي جاي ينور حياتي.. ويكون عوض إلي ولحبيبي عن كلشي سيئ عشناه بهالحياة..شاهين اليوم عم يشهد على أول نجاح إلي بوجوده، أنا بوجوده اكتشفت إنه العلاج ممكن يكون على هيئة شخص، كل عمري اكتفيت بالحب يلي أنا بكتبه برواياتي، وبدي اعترف اليوم أنه هاد الشي سببلي اكبر مصيبة بحياتي، وافقدني شغفي لكن وجود هاد الانسان.. أعاد إلي كلشي، الشغف والحب والحياة.. شاهين
افسحت إله المجال لحتى يقرب منها ويضمها لقربه
شاهين: أولاً بدي خبرك قبل مااحكي شي، ماكان أول نجاح بشهده إلك هو هي الرواية، أول نجاح كان لما خلَقتي هالحب جواتي، وحصلتي على قلبي يا كاتبتي
شدت بايدها وقربت منه اكتر
سمعت همساتهن لما حكت بعض الفتيات إنهن بيشبهوا أبطال هالرواية، وكتمت ضحكتا
بغرام واضح علقت عيونه بعيونها وحكا
شاهين: الحياة بتمنحنا فرص كتيرة ، بس على طول الفرصة الأصعب هي يلي بتغير حياتنا وبتقلبها رأساً على عقب… وجود تاج بحياتي كان اكبر نعمة حرفياً، مافيني أوصفلكن أو احكي تفاصيل.. بس بكل ماتعنيه الكلمة من معنى، تاج النعمة بهي الحياة.. متل وكأني كنت عايش بعالم الظلام، ظهرت من عالم تاني مُشرق، بالحُب والحياة.. والكثير الكثير من الجنون.. ماخطفت بس قلبي، خطفت كلشي بملكه من احساس .. هيك فينا نحب ، هيك فينا نعيش .. بخطة مجنونة، منقدر نكفي حياة ماكنا نشوفها حتى بخيالنا
اتطلع بعيونها وهمسلا: بحبك تاج
الكل انتبه لحركة شفافه وكانت كلمته مسموعة بقلوبهن مو بآذانهن
غمرها لحضنه بقوة وارتفعت أصوات الفرح والتصفيق من حولهن
دمعت عيون أروى من الفرحة وعيون هارون بقيت عم تراقبها، وطارق ذات الشي عم يراقب اخته بسعادة وفخر متمني إلها هي السعادة تبقى مرافقتها العمر كله
…
انتهت ليلتهن بحضن بعض داخل بيتهن المشترك، بكامل تفاصيله يلي بتشبهن
غمضت عيونها وضمته بقوة.. ولحظتها استعاد راحته لما شدها بقوة لحضنه
ومن بعدها كانو مستعدين ليستقبلوا أيامهن الباقية..بحلوها و مرها
اتنهدت تاج براحة رهيبة، خلتها تنام بعمق باحضانه
………..
واليوم ماعاد فينا نقول #غداً_نلتقي💙 رح ودعكن وقول #خلصت_الحكاية💙
تركت هون بطلة وبطل أخدوا مو جزء من قلبي لأ،
*الـــــــــ͢ـོ͓ـــنهـــــــايـــــــོـ͓ـــ͢ــة*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```