الفصل 16
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵موعد.مع.خاطفي.tt* ♥️🙈
*❴🔢❵☟الـــبـــــــــــ❴6️⃣1️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
الجزء السادس عشر
#موعد_ مع _خاطفي
ماكان قادر يعرف طعم النوم.. إلا وقت قصير ويصحى ويلاقي حاله ب ذات الحفرة المعتمة
بالوقت يلي عم يجبرها تاكل.. ماكان يقدر ياكل لقمة حتى
وطوال يومه عم يحرق بدخانه ويشرب قهوته
أما تاج ..
عم تحترق بالنار .. ناطرة الحكم النهائي إلها
وبيوم جديد.. كان نايم بغرفته لما سمع صوت عم ينده بصوت بعيد كتير، صوت موجوع ومبحوح
فتح عيونه ليستمر هالصوت
.. : شاهين.. شاهين..
سرا صوتها بخياله ليسمع جملة سمعها منها قبل بكم يوم
(في كلام مامنقدر نحكيه، بس منبكيه ياشاهين)
قعد مكانه بقلق، صار يتلفت حوليه ليبحث عن مصدر هالصوت وماشافها
اتنهد بتعب، ماعم ينتهي هالأمر..
اتوجه للحمام ليسترخي بالماء الدافئ، طلع وهو عم ينشف شعره
وكالعادة شغل سيجارة ونزل لتحت بتململ
اتطلع باتجاه السلّم يلي بيأدي للغرفة السفلية بصمت
ورمى جسده على الكنبة بعد ماحضّر القهوة، يلي صارت بأيامه الأخيرة غذاءه الوحيد مع الدخان
فتح موبايله ليشوف اتصالات كتيرة من هارون..اتجاهلها تماماً
الشمس ماطلعت منيح، لكن ملامح الحديقة بدأت تظهر خلال ضوء خفيف
تسطح عالكنبة بملامح شاحبة.. ميتة
الظلام المستكن تحت عيونه.. لحيته المبعثرة بتحكي عن أيام الاهمال يلي مر فيها
بالفعل الحزن بيعطي ملامح الكبر اكتر من تقدم سنين العمر
حط ايده على عيونه وبقي غرقان بأفكاره
لايمتى رح يبقوا على هالحال؟ ماعم يحس بأي شي!! مو قادر يرتاح بعذابها، عم يتعذب اكتر ولا عم تطفا ناره
تركته يطفي ناره وحده بدون ماتساعده.. الشي يلي خلاه يحرقها ويحترق معها بزيادة
بعد مرور الوقت.. أشرقت الشمس بكل أنحاء الصالة
نزل على السلم ببطئ، خطوات مترددة وفي كلمات عم تتردد براسه
صرخاتها لما استنجدت فيه بعد ماخطفتها ليسا.. خوفها عليه لما شافت إصابته.. إصرارها على البقاء بقربه
نفض الذكريات من راسه ومسكه بألم
فتح الباب بهدوء
دخل على الغرفة ليشوفها متمددة عالأرض بعد ماتركها قبل بليلة بدون مايقيدها
متسطحة عالبطانية يلي عطاها ياها قبل بيوم ، بعد ماحس أنها رح تكون ليلة عاصفة
حط مجموعة ألبسه على الكرسي
وفتح شفافه ليصحيها لكن ماقدر.. نزل لعندها على أطراف اقدامه
اتطلع على ملامحها ، المنهكة.. الشاحبة، ماكانت بتشبه تاج يلي عرفها
آثار دموع بطرف عينها من قبل بليلة، شعرها المبعثر ملابسها المتسخة بأرضية هالمكان الشبه المهجور
رفع ايده وقربها من وجها، حس بثقل رهيب بحركته
وتراجع باللحظة الأخير قبل مايلمس بشرتها
غمض عيونه بألم ووقف مكانه
أخد نفس عميق، حاول يستجمع قوته.. ونده فيها
شاهين: يلا اصحي..
فتحت عيونها بتعب،تنهدت لما شافت أقدامه،رفعت نظرها ببطئ إله
شاهين: قومي لشوف
حاولت تقوم من مكانها و بصعوبة لقدرت تقعد، عظام جسدها عم توجعها بسبب هالمكان السيئ
حكالها بسخرية: ارتحتي اكتر من نومة الكرسي؟
تاج بحروف غرقانة: شاهين..
انتبه أنها مو قدرانه تصحى لكن تجاهل وكمّل: اصحي عنا شغل اليوم
عقدت حاجبيها مستغربة كلمته
تاج: شو رح تعمل؟
حكا متجاهل سؤالها: اللبس يلي عالكرسي بتلبسيه لبينما ارجع
تاج بقهر: ليش ماعم تجاوبني؟
مشي اتجاه الباب لترجع تنده بصوت مبحوح: شاهين عم حاكيك.. سمعني
التفت عليها وحكا بصوت مرتفع: اسمعك؟ هلأ بدك اسمعك؟ هلأ لفكرتي أنه صار لازم تحكي؟ بعد كلشي عشته!!! لك انتو متعودين تاخدوا دور الضحية.. مع أنكن اكتر البشر أذية.. ماغلطت لما سميتكن أفاعي
قرب منها ونزل لأمام عيونها : بس غلطانة.. كتير تأخر الوقت على الكلام..كنت ناطر تحكي حرف واحد.. وبقيتي ساكتة، هلأ ماعاد بدي اسمع شي
قام من مكانه بعد ماشاف دمعاتها المستسلمة
شاهين: ماتضيعي الوقت، بدي انزل لاقيكي جاهزة
قفل الباب وغادر المكان ليطلع على غرفته
قامت عم تسحب جسدها بتعب واضح ، رفعت الملابس عن الكرسي لتشوفها مابتناسب الجو البارد نهائياً
نزعت ملابسها بتعب ولبست البنطال الأسود، وفوقه بلوزة بيضا قماشها خفيف، بدون اكمام.. عبارة عن حبل على الاكتاف
ارتعش جسدها من البرد
غسلت وجها بالمغسلة يلي خلف الجدار ، مسحت التراب عن ايديها بالمي.. وبللت شعرها وحاولت تسحبه للخلف
اتطلعت على وجها خلال المرآة يلي كلها بقع سودا
اتنهدت بقهر للحال يلي وصلت نفسها إله
رجعت لمكانها وحطت البطانية فوقها وقعدت تنتظره
…
نزل شاهين وحامل بايديه حبل اكبر من يلي عند تاج، و اتوجه للمطبخ
أخد مي ونزل لعندها
فتح الباب ،رفعت عيونها لعنده لتشوف شو مخبيلها هاليوم
لمحت حبل بين ايديه
وبخطوات بطيئة قرب منها وعطاها المي
اخدتها منه بصمت وشربت،بعدها تركتها جنبها
شاهين بصوت ثابت: وقفي لشوف
وقفت أمامه وعيونه بعيونها.. نظرته مازالت نظرة كره ماعم يبدلها
راقبها من الاعلى للأسفل
سحب ايديها بقوة للأمام وبدأ يربطهن بطرف الحبل
سألته بقلق: شو رح تعمل؟ شاهين.. بيكفي لهون
التفت عليها بعيون غاضبة لترجع خطوة للخلف بخوف واضح
شاهين: أنا بس بقرر ايمتى بينتهي كلشي سامعة؟ اللعبة أنتي بدأتيا، بس النهاية عندي أنا
سحبها خلفه وطلعت من هالمكان بعد مرور ابشع أيام حياتها فيه عم تسحب خيبتها خلفها
وبدون مايخليها تشوف الخراب يلي حل بالصالة
طالعها مباشرةً على الحديقة بعد ماسحب من طرف الأرض صندوق
تباطئت خطواتها و غمضت عيونها بعد ماحست الألم اخترقهن بسبب إضاءة الشمس
شاهين: امشي.. ليش عم توقفي؟
كان ماسك طرف الحبل لبينما وصلوا على هالمكان.. يلي أول ما وصلت أله.. لفحتها فيه رياح الذكريات بقوة
ارتعش جسدها من البرودة يلي انتابتها
وبسبب لباسها الخفيف زادت رجفتها
ماكان عم يتطلع فيها وتاركها خلفه
شاهين: شايفة هي الشجرة؟ تتذكريها؟؟
لتصفعها الذكرى من جديد.. المكان يلي عبّر فيه عن حبه ألها..بدايات شعور الحب بينهن كان تحت ظل هي الشجرة
تخيلت المشهد وكأنه هي الحظة
وهالشعور ادمى قلبها
شاهين: بتعرفي؟ قررت اقطع هالشجرة، بس قلت قبل مااقطعها منستفاد منها بشغلة
سحبها من ايدها بقوة: قربي لشوف
سندها على جذع الشجرة ورفع الحبل على غصن متين، لترتفع ايديها للأعلى وتبقى واقفة أمامه
تاج بصوت خفيف: شاهين.. شاهين كرمال الله بيكفي .. شو لسا رح يصير فينا؟
رد باستهزاء: كنتي سألي حالك أول
بدون مايعيرها أي أهمية اكمل عمله
قرب منها كتير.. تقريباً صارت بحضنه.. وأول مااشتمت ريحته حست بدفا ارخى أطرافها المشدودة
دمعت عينها عالحضن اللي خسرته.. دمعت على الكسرة يلي تسببتها أله.. والقسوة يلي قابلها فيها
للأسف مو وحدها يلي خذلته.. وهو خذلها لكن قلبها مو قادر يسمحلا تخلي هالشعور داخله
شاهين: هه خلصنا
و أول مارجع خطوة عنها.. سرت قشعريرة بجسدهن بالوقت ذاته
بعد مرور ٦ أيام.. على غياب شاهين و تاج الحقيقيين يلي عرفوهن
على غياب الحب يلي خلق جواهن وعاش بينهن..
٦ أيام ماكانوا حتى قادرين يشوفوا ملامح بعض بوضوح بسبب العتم بهديك الغرفة
ماقدرت تصدق الحال يلي وصلّه.. القلق أرجف فؤادها
وجهه كتير تعبان.. عيونه.. حست لحظات ورح ينهار
وهو ماكان وضعه أفضل
شعور بالكره لذاته.. أول مالمح آثار دماء جافة بطرف جبهتا
بقعة زرقاء بطرف زندها بسبب قبضته ذات يوم..
و آثار اظافره على ايدها
انتفض قلبه رافض يلي شافته عينه.. صرخ وتمرد ونكر
لكن عقله كبّله بغضب جامح.. ومنعه يتحكم بشاهين
اشاح نظره عنها مباشرةً قبل مايحس بضعف ويقدر قلبه يسيطر عليه
اتنهد بتعب.. بقي مغمض عيونه لحظات وبعدها اتطلع فيها
بلباسها الخفيف.. جسدها الهذيل الراجف.. عيونها المتورمة بسبب ليلة مليئة بالبكاء
قرب منها اكتر وصار أمامها مباشرةً.. عم يتأمل ملامح وجها
رتجفت شفافها بقلق واضح بعيونها
رفع ايده ليمسح طرف شفافها المجروح.. ذكرى أليمة من أول يوم عرف فيه الحقيقة
بعد ما ازدرد ريقه حكا وهو عم يستجمع قواه: ياترى .. حتى شعور هديك اللحظة.. بهالمكان .. كان كذبة؟؟
انصدمت من كلمته لما فهمت قصده، اشاحت بوجهها بعيد عنه بعد ما الألم اعتصر فؤادها
ليرجع يسحب وجها باتجاهه: ليش ماعم تقدري تطلعي بعيوني ياترى؟
ردت بانهيار: عم اتطلع، ليكني عم اتطلع شاهين.. عيني بعينك أنت حرقت كلشي.. ماحدا بيقدر يكذب بشعوره فهام عليي.. كل لحظة عشتها معك كانت صادقة
كلامها يلي اشعل نيرانه من جديد، أعلن عن بداية لعذاب من نوع آخر
شاهين بغضب: كذابة.. انتي ستغليتي حبي إلك..
قاطعته: أنت يلي عم تكذب على حالك.. أنت يلي بدك تكون مشاعري كذبة لحتى تموتني وتخلص صح؟ كون صريح مع نفسك شاهين.. أنت مكذبني لأنك سمعت بكذبتي.. بس من جواتك متأكد أنه كل شعور حسيته ألك صادق.. كل حضن عشته معك.. كل لمسة.. كانو صادقين ، لك أنت فهمت شعوري قبل ماحتى أفهمه أنا
بعد ماسكتت رفع ايديه وزقفلها
شاهين باستهزاء: واو.. برافو .. تجربة أداء بتجنن نبلش تصوير؟ ولا صحي انتي كاتبة مو ممثلة.. بس بتعرفي؟ مابيفرقوا عن بعض، بتقدري تكوني ناجحة بالتنين
ردت بغضب مكتوم محاولة تدافع عن مابقي منها: مالي كذابة.. أنا بحبك شاهين هي الحقيقة الوحيدة يلي شو ماعملت فيني انت مافيك تنكرها أو تشوها
ارتفع صوتها اكتر: عم تسمعني؟؟ مافيك تنكر
صرخ فيها بغضب : لك سكتي.. سكتي.. مارح صدقك
تاج: براحتك.. أنت مابدك تصدق شي.. مابدك تشوف الحقيقة.. بس بدك تغضب وتصرخ ، مابدك شي عذر يخليك ترحمني
قرب منها ولزقها بجذع الشجرة: ومين قلك بدي ارحمك؟ مافي أي عذر ببررلك يلي عملتيه معي.. انتي ستغليتي شعوري ألك
صرخت بقهر: ماستغليتك.. استغلال شو؟ شاهين!! أنا ماقلتلك حبني.. أنا بس قلتلك خطفني
لما رجعت لذاكرته هالنقطة الأسوء لراسه ..رفع قبضة ايده بغضب فتحت عيونها بذعر لما نطقت حروفها بتلعثم محاولة تأنقذ حالها.. أو يمكن تأنقذ حبها أله
تاج: وين وعدك إلي؟
الكلمة يلي جمدت ايده.. وصارت حاجز بينها وبين وجها الحزين
اتطلع بعيونها مصدوم
كمّلت بصوت راجف: أنت وعدتني.. وين وعودك ألي؟ قلتلي مستحيل ااذيكي.. قلتلي رح تحميني حتى من حالك.. كيف ماقدرت تحميني من غضبك؟
تراجع خطوات للخلف وهو يتطلع بعيونها ليصرخ بغضب اخ بتحكي عن كمية الحزن يلي بداخله
استرجع الذكرى يلي خبرته عنها.. بحضنه كانت.. عم تبكي وتستنجد فيه.. وتطلب وعوده وحمايته
سمع صوته لما حكالها(بوعدك)
سقط جاثي على ركبتيه ورفع راسه للاعلى ليحاول يهدي أنفاسه
حاولت تفك قيدها بعد ماحسّت بألم رهيب بايديها بدون نتيجة
مرت دقائق لبينما قام وقف أمامها وشافها عم تحاول تحرك الحبل
رفع ايده عالغصن ونزّل الحبل من الاعلى
بدأت تحركهن لتخفف وجعهن
سألها بنبرة عتب: شو يلي عملتيه فينا؟ كيف قدرتي تعمليها؟ كيف عندك قلب تتحملي كل هالكذبة؟
ردت بندم: ماكنت بعرف هاد يلي رح يصير.. كلشي كان ببالي أنه رح ابقى مع الخاطف كم يوم وارجع،حط حالك مكاني شاهين.. كمان عملت ذات الشي أنت، كرمال حُبك لشغلك رجعت خطفتني مع أنه مالازمك مصاري ولا شي.. ليش ماعم تفكر فيني بنفس الطريقة؟
صرخ فيها: لك أنا خاطف.. خاااطف، عرفتيني على هاد الأساس ، أما انتي عرفتك على أساس أنك كاتبة، تخبيتي خلف صورة وكنتي شي تاني تماماً
اخدت نفسها وحكت: شاهين.. كنت عم أعمل شغلي.. وأنت كنت عم تعمل شغلك.. ماكانت كذبة صدقني.. ماكنت بعرف رح نعيش كل هاد.. كل القصة كان بدي اعرف شعور الانسان بهيك موقف واكتب بعدها روايتي
ضحك بسخرية ليقاطع كلامها: تكتبي …صح؟ كلشي عشناه كان كذبة بسبب الكتابة؟ بسبب رواياتك؟ بسبب ..
قاطعته لتقله: روح الكاتبة يلي جواتي.. يلي كانت عم تمشيني معها وتأمرني وأنا نفذ
صرخ فيها: وبدك ياني صدق هيك خُرافات؟؟ أي طبعاً منتظرة مني صدقك..لك من غبائي صرت فكر متلك.. وجبتلك كلشي بتحتاجيه قال شو لحتى رجعلك الشغف تبعك..
قرب من الصندوق يلي عالأرض ،فتحه و رمى كلشي داخله عالأرض
لحظتها انصدمت من يلي شافته.. وبنظرات مشدوهة بقيت ثابتة
مجمع رواياتها كلهن يلي كتبتهن على مر هي السنين
شاهين: هدول السبب صح؟ يلي بسببهن قررتي تحرقيني وماتفكري بالشي يلي رح يصير فيني بسببهن؟ انطقي؟ هدول صح؟
نفت براسها وماقدرت تحكي.. عم تحاول تدافع عنهن وخوفها عليهن ملئ قلبها
فجأة انحنى وسحب كتاب
طالع من جيبته كبريت
لتحكي تاج بهذيان: شو عم تعمل شاهين؟؟ لا لا.. إياك شاهين.. إياك
شغّل الكبريت وقرب النار من الكتاب يلي بايده: يمكن هي النار يلي رح تطفي ناري
صرخت بقوة ملئت المكان: لاااا شاهين كرمال الله لا
رمى الكتاب فوق المجموعة الباقية وهو مبتسم ليتطلع فيها
قرب منها وهو عم يحكيلا: انتي فاشلة.. ماعاد رح تقدري تكتبي من بعد هدول الروايات.. وجيتي رميتي فشلك عليي لحتى تلاقي الحل.. كنتي مجرد اسم اتناقلوه لفترة.. وانطفيتي
نحيبها ارتفع ودموعها غرقت وجها فجأة دفعته بعيد عنها بغضب لتركد باتجاه النار
شاهين بصدمة: لك شو عم تعملي؟
ركد خلفها قبل ماتوصل ايديها للنار يلي بدون أي شعور ولا تردد كانت رح تحرق نفسها فيها لتطالع كتاب واحد عالأقل
سحبها بآخر لحظة وكانت رافضة عم تدفعه بقوة وغضب وبكاها عم يزيد
تاج: لا حرام عليك.. حرام عليك بيكفي ظلم.. أنا مو فاشلة.. أنا تدمرت حياتي انت حرقت حياتي كلها
بدأت تضربه بايديها المربوطة لما سحبها بقوة لحضنه حتى يمنعها تحرق ايديها بالنار لتنهار وتخور قواها بين ايديه
اختل توازنه بعد ماحس بدوار براسه
نزل عالأرض معها وهي بحضنه منهارة ببكاها لما اثبتلها شي كانت عم ترفضه.. فشلها بالكتابة
شاهين: خلص.. خلص سكتي
من بين بكاها نطقت: شاهين أنا مو فاشلة.. أنا مو كذابة.. ولا أنانية.. أنا بس كان بدي اكتب.. أنت الأناني.. ليش حرقتن؟ مو من حقك
ماقدر يسمع منها حرف..وجودها بحضنه حرك شعور كان عم يحاول يقتله بغضبه..
أنّب نفسه كتير لأنها قدرت تسيطر على جزء من شعوره من حضن واحد فقط
رجعته لنقطة الصفر… لبداياتهن، لما عشقه إلها اثبتله وجود قلب داخل أضلعه
لما تخبط بين شعور الحب والرفض معها.. لكن هالمرة، كان الشعور معكوس.. كان بكل ما أوتي من قوة، عم ينكر مشاعره ألها ويأكد لنفسه أنه قلبه مستحيل يسيطر عليه
مشاعر خلته ينهار اكتر..حتى الغضب ماكان عنده طاقة إله
سحبها بعد دقائق من مكانها
شاهين: امشي
رفضت بحركات منهكة وهي عم تناظر كتبها يلي تحولت لكومة سودا
تاج: تركني شاهين.. بيكفي تركني
ماقدرت تتخلص منه
سحبها بهدوء لداخل المزرعة ولحظتها شافت الصالة بالدمار يلي فيها
المكتب الكرسي كلشي كان خربان
ابتسمت بقهر وغصة.. اتدمر كلشي حلو عاشوه والذكرى تشوهت بعيونها
انتبه لحالتها وكمّل فيها لتحت
أول مادخلت الغرفة بدون أي مقاومة، سكر الباب عليها وغادر المكان
توجهت لزاويتها وهي ساحبة هالحبل خلفها، وقعدت مكانها والخيبة مجتاحة ملامحها
…
طلع لغرفته.. حالته صارت أسوء بعد ماسمعها.. صدى صوتها وهي تذكره بوعوده ألها ماعم يطلع من راسه
ذكرى اخترقت فؤاده المدبوح، قرب من الخزانة وطالع منها علبة الإسعافات الأولية
ابتسم بسخرية ورفع عيونه على المرآة وهو عم يتأمل وجهه ، شاف وحش كاسر.. لما اتذكر الندب والجروح يلي خلّفها على جسدها
صرخ بقهر: لك بيكفي؟؟
رمى العلبة على المرآة لتنكسر وتتشوه صورته المعكوسة
كأنه عم يخاطب الشبح يلي دمره
بحث عن سلاحه وحطه على خصره
توجه لجنب المرآة واخد علبة الاسعافات ونزل لتحت
…
بقي ساعات طويلة لوحده ، وبعد ماحلّ الظلام
شغّل لفافة من علبة سجائره ونزل لعندها
فتح الباب بهدوء بعد ما شغّل الإضاءة ليشوفها قاعدة بزاويتها ضامة ركبتيها لجسدها ومنزلة راسها عليهن
شاهين: نايمة؟
رفعت راسها بتعب، ليقرب منها بخطوات غير متزنة
نزل لجنبها وقعد أمامها
رفع عنقه ليظهر اثر جرحه القديم
شاهين بصوت خفيف: تتذكريه؟ عم يلتئم بشكل سريع لاحظتي؟قلتيلي كنت رح خليكي تصيري قاتلة يومها..بس بالحقيقة غرزتي السكين بكامل قوتك.. جوا صدري ،هاد مو قتل؟
سحب قطعة قطن من العلبة يلي بحضنه وسكب فوقها معقم
شاهين: هيك عملتي يومها صح؟
قرب منها اكتر وتراجعت بجسدها للخلف بخوف
شعر بنخذة داخل قلبه.. مجرد مايرفع ايده باتجاها صارت ترتعش خوف
غمض عيونه بألم.. ورجع فتحهن
مسح على طرف جبهتا وطرف شفافها
بقي يحاول ينضف أثر الدم الجاف
حكت بكلمات مشابهة لكلماته: ماعاد ينفع التعقيم
مااستجاب لكلمتها، تسرّب القليل من المعقم على طرف خدها..ليمسحه بهدوء بطرف اصبعه
غمضت عيونها تحت تأثير لمسته الغير متوقعة، لتقرب ايده لشفافها.. لمسها بشوق عاصف بقلبه
اتنهد بتعب وسقطت القطنة من ايده
رفع راسها لما لمس عنقها.. ومسح بابهامه على أثر اصابعه
لينزل ايده لطرف ايدها.. والبقعة الزرقاء يلي منظرها وجع قلبه لحظتها
شعر وكأن الدمعة العالقة بطرف عينه، المتمردة المُصرّة على السقوط..رح تكسر كلشي كره حسسها فيه.. وتخلي الأسوار يلي بناها بينهن من جديد.. تنهار
تراجع من قربها فوراً وقام من مكانه هارب منها ومن شعوره إلها
عم يهمس لذاته حتى مايضعف اكتر : مافي شي انتهى.. مارح وقف هون
ليهتز كيانه بصوت واحد منها: شاهين.. ليش عم تهرب مني؟ليش ماعم تمنع حالك؟
بقي ساكت بارملها ضهره
تاج بإصرار ونبرة ندم: شاهين اتطلع بعيوني.. تعال قرب مني
وقفت مكانها وتوجهت لعنده
حاولت ترفع ايدها لتلمسه لكنه اشاح بعيد عنها ونزلت ايديها مخذولة
لكنها قاومت وكمّلت: اتطلع بعيوني،هلأ شوف الحقيقة.. معقول مابحبك؟ معقول كرهتني؟
دمعتها نزلت لتحاول تقاومها بصعوبة
شاهين: روحي من هون.. رجعي مكانك
مسكته من ايده بايديها التنتين المربوطين
تاج: مابقدر.. بس بجنبك عم كون أنا.. شاهين كنت عم دور على شغفي.. بس اكتشفت أنه ماعاد مهم..اكتشفت أنه شغفي هو الحب.. حُبك انت شاهين.. رجعني حس بوجودي.. هربت من كلشي وتناسيت كلشي، حتى قراري أني انخطف نسيته وفقدت الذاكرة.. ماعشت معك كذبة.. عشت معك بخيالي حقيقة القدر رسملي ياها.. اختارك أنت لأنو معك وبس رح عيش هاد الشعور
رفعت ايديها وضمت وجهه ومسحت على لحيته
تاج: مابنكر كان شي مجنون.. بس شاهين أنا ماكنت طبيعية ، انسانة بقيت لتلت سنين ضايعة.. تايهة ، بغيبوبة عايشة، الاوكسجين يلي عم اتنفسه كان اصطناعي..
تاج:جبروني كمّل حياتي يلي كتير تمنيت لو تنتهي.. أخدت أدوية مهدئة بدون استشارة طبية بس لنام وانسى.. ماقدرت أهرب ولا بأي طريقة ولا حتى لاقي الحل
كان عم يحاول يبعد عنها لكنها متمسكة فيه بقوة،وضعف جسده ماقدر يقاومها
تاج: لأول مرة بحياتي بعيش شعور خاص فيني إلي.. كنت قبلك حتى لما ينتابني شعور الحزن تظهر شخصيات رواياتي بخيالي وحس بحزنهن مو حزني.. لما ابكي فوراً يجي ببالي اني بدي أوصف شعور البطلة بشكل مشابه لشعوري وخليهن يعيشوا أصعب مواقف حياتي لاوصفهن بِدقّة، هيك تعودت اكتب، وهاد الشي يلي دفعني لفكر أعمل هيك لعبة.. شاهين أنا كنت عم عيش حب صناعي يومياً مع أبطال خياليين.. ولما أول مرة بعيش معك حب حقيقي وصادق.. كان مغلّف بكذبة على شكل فقاعة أنا اخترتها.. خبرني كيف رح يكون عندي الجرأة المس هي الفقاعة؟ واكشف كذبتي واخسرك؟ واخسر حالي
نزلوا ايديها عنه وعيونهن بقيت عالقة ببعض
تاج: بس لاني حبيتك شاهين.. حبيتك بكل صدق ، والأيام يلي راحوا كنت عم اتحمل غضبك ونارك الشاعلة لأني بعرف أنه كان غلطي.. ذنب كبير بس ياشاهين.. مابستاهل كل هاد أنا، بترجاك بيكفي هيك.. ذنبي مارح اغفره أنا .. بس ماتحرقنا اكتر
بقي لحظات عم يسمع كلامها.. ويحاول يتقبله.. حاول بكل قوته.. ركز معها وهو مهدي أعصابه
تناقض رهيب داخله
لكن في شي عم يمنعه
شاهين: رجعي لمكانك
التفت بعيد عنها لتتنهد بتعب.. لحظتها عرفت أنه لسا بكير كتير لاخماد ناره
رجعت لزاويتها وقعدت مكانها ، نزل لعندها وبنهاية الحبل ربط أقدامها
تاج: ماتعملا بترجاك
بعد ماانتهى.. لمحت عيونه لتحكي برجفة:شاهين!!
انصدمت لما شافت دموع عيونه.. حست بشعور سيئ جداً وقتها
تأكدت عمق جرحها فيه.. وصعوبة شفائه
قربت منه وحكت بحروف متلعثمة: لا شاهين لا.. بترجاك لا مو هيك
أدركت أنه كامل ثباتها وقوتها الأيام الماضية.. كان بسبب قوته هو، ولما شافت انهياره لحظتها .. حست كامل مابداخلها انهار
صرخت فيه: والله مابستاهل.. حرام عليك تعمل هالشي بحالك أنا مابستاهل شاهين .. رحام حالك
وقف بوسط الغرفة لينطق بخيبة وغصة واضحة بنبرته: لأول مرة بعطي بِصدق هيك.. بحب بكل اندفاع.. بوثق بكامل قدرتي العقلية..وقعت بعشق مع أني بعرف العشق نار، جنيت فيكي.. كنت متمني بس لو كان بإمكاني تغيير الماضي الخاص فيني بس ليناسبك.. يناسب حياتك، بس لحتى أقدر وقف جنبك وانتي فخورة فيني
همست بقهر:..ماتحكي هيك بترجاك
كمّل متجاهل طلبها: صرت أهتم لاهتماماتك يلي بحياتي ماكنت بعرف عنها أي شي.. أنا كمان صار همي داوي وجعك رجّع شغفك.. بدي شوف فرحتك بس
ابتسم باستهزاء
شاهين:تحولت لانسان غبي بعشقي هاد.. لهيك اكبر غباء انه الانسان يعشق، لو ما انغرمت فيكي كنت عرفت الحقيقة، في كتير أمور كشفتك بس أنا يلي كنت اعمى.. عشقي إلك عماني
ماعاد تقدر تتحمل اكتر.." رَجُلها " القوي..يلي كان عندها ثقة مستحيل يهزه شي.. واقف أمامها عم تتساقط عنه كل قوته وجبروته.. عم تنهار من عيونه دمعات ماكانت بتصدق أنه بيملكها
هالموقف وجع قلبها من الأعماق.. مستحيل تنساه طوال حياتها
ضميرها عم يوجعها اكتر من كل لحظة مرّت
شاهين بذات النبرة: ماعاد بدي كون شاهين القديم، غيرت من حالي.. لما أغضب قول لا.. اهدا ياشاهين.. أنت بتبالغ البنت ماغلطت..لك حتى لما تدخلتي بحياتي الشخصية.. وعرفتي رسالة أمي منعت حالي عنك من خوفي ااذيكي وانتي مالك ذنب بشخصيتي السيئة هي.. بالوقت يلي مابعرف عنك شي عرفتي عني كلشي.. كلشيي
لحظات ارتاح من كلماته الثقيلة، واكمل: خذلانك ألي منعني أقدر اتطلع بحالي بالمراية..أنا اللي ماكان حدا يقدر يوقف أمامي ويتطلع بعيوني
سحب نفسه بصعوبة لتتحرك مكانها بقلق
تاج: شاهين؟؟ أنت مو منيح..اهدا بترجاك
رفع ايده بوجها ليمنعها : ابقي مكانك.. ماتتحركي
مسح دموعه وكامل وجهه واخد نفس عميق
بكلمة وحدة.. رجع أضاء الأمل بوجهها.. لما نده باسمها بعد مرور هالأيام كلها بدون مايندهلا فيه
شاهين: تاج..
عيونها عالقة بعيونه..ناطرة كلمته التالية بلهفة
لينطق بعدها بغصة أذابت فؤادها:ليش عملتي هيك فينا؟؟
نزلت راسها بندم واضح مع دموعها الغزيرة
رفع ايده على راسه ، حس بدوار رهيب وكأنه الأرض من تحته اهتزت
حرك أقدامه ليثبت وقفته لكن خارت قواه.. فقد السيطرة على كامل جسده.. هبوط رهيب حسه بقلبه
ليسقط بجسده على الأرض بقوة مغمى عليه
شهقت بفزع لما شافته وسمعت صوت ارتطام جسده بالأرض، ادمى قلبها
قامت بحركة وهي عم تصرخ باسمه
تاج ببكا : شاهين.. شاهييين
ومن أول خطوة وقعت بسبب أقدامها المربوطة
صرخت بغضب: لك لا لااا.. ياربي
بتزحف لعنده بلهفة وخوف قاتل
تاج بنبرة راجفة: شاهين سامعني؟
أول ماوصلت لجسده سحبت راسه بصعوبة وحطته بحضنها
تاج: حبيبي.. شاهين!! رد عليي بترجاك.. ماتعملها فيني رد عليي ..
عم تمسح على وجهه تحاول تفتح عيونه بدون أي نتيجة
سحبته لصدرها وصرخت بقوة: شاهيييين
نزلت دموعها وارتفع صوت نحيبها
تأملت وجهه النائم بهدوء.. الشاحب
ارتجفت أوصالها شعور العجز قتل ماتبقى منها،ماقدرت تسمحله يتركها..كان لازم تعمل شي
نزلت راسه بهدوء عالأرض
وفكت أقدامها وبعد محاولات كتيرة قدرت تعملها
عم تفكر تلاقي أي طريقة لتساعده
وتذكرت الموبايل
فتشت جيابه لتشوف سلاحه ، تجاهلته وسحبت الموبايل
فكرت تتصل بأروى.. لكنها تراجعت، مابدها تخرب علاقتها فيه اكتر.. ولا بدها تورط أروى معها
فتحت وأول شي شافته اسم ((هارون))
بأيدي راجفة اتصلت مباشرةً بدون أي تردد
نبضات قلبها كأنها عم تسمعها بآذانها
وعلى الرغم من البرد حست جسدها عم يتعرق من شدة الحرارة
ثواني وأجاها صوته
هارون بقلق: شاهين؟؟ لك انت وينك؟ عم اتصلك مابترد
لما سكت سمع أنفاس انثى
تاج نطقت بشفافها الراجفة: أنااا..أنا تاج
رد بصدمة: شو عم يعمل موبايل شاهين معك؟ شاهين وينو؟؟
نزلت دموعها لتكمل: أنت لازم تجي تساعده.. هو مابعرف شو صار معه
صرخ فيها بغضب: شو صار فيه؟ احكي
قام من مكانه ساحب أغراضه و مفتاح سيارته
تاج: مابعرف مابعرف.. كنا عم نحكي وفجأة اغمى عليه.. هو تعبان كتير، جيب الدكتور معك ضروري
هارون: لك دكتور شو.. سمعي وليه، إذا بتكوني عاملة فيه شي ياويلك
كتمت غيظها وغضبها منه لترد بحروف مقتضبة: نحن بالغرفة يلي تحت الأرض بالمزرعة
هارون: اا..
قبل مايحكي حرف سكرت الموبايل وحطته بجنبها
رجعت قربت منه: شاهين؟؟سامعني.. بترجاك رد عليي
مسكت ايديه: حرك ايدك.. لو سمحت ماتعذبني اكتر مابتحمل بدونك
نزلت لعنده وتسطحت قربه بقي وجهه أمامها هادئ تماماً
مسحت على ملامحه بهدوء ودموعها ماعم توقف.. استسلمت نهائياً وبقيت عم تنتظر يلي مخبيه القدر ألهن
عم ترتسم أمام عيونها ذكرياتهن بالكامل
#غداً_نلتقي💙 ناطرة رأيكن بأجزاء اليوم حبايبي
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```