الفصل 11
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *موعد.مع.خاطفي.tt* ♥️
*❴🔢❵☟الـــبـــــــــــ❴1️⃣1️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
صرخ بقوة من القهر يلي حس فيه.. القهر يلي كان بنبرتها لحظة استنجادها فيه ..لما شافهن عم يسحبوها أمام عيونه وماقدر يحرك ساكن.. وهو يلي وعدها ماتنصاب بأذى وهو بقربها
كره الدنيا وكره حاله وحس بعجز أصاب خلايا جسده بالكامل
...
بالسيارة كانت عم تحاول تفك حالها من بين ايديهن
تاج: انتو مين؟ وشو بدكن مني؟
..: اسكتي بدل ماسكتك بطريقتي..
… : لك لسا عم تحاكيها؟ خرسها وخلصنا من صوتها
تاج بعصبية: لك بعد عني لاتلمسني.. والله شاهين رح يحرقكن.. هو رح يوفي بوعده وبتشوفوا
بيضحكوا باستهزاء ومابتحس إلا منديل على أنفها عم يخنقها.. لحظات مقاومة قليلة وبتفقد وعيها بالكامل
…
كان متخبط لدرجة كبيرة.. ناسي ألمه كان في ألم أقوى غارز بوسط فؤاده
وبعد تفكير طويل.. سحب الموبايل من الأرضية.. وطلب رقمها بدون أي تردد
عارف رح ترد عليه مباشرةً .. أحساسه مابعمره خاب،متأكد أنها بانتظاره
بابتسامة انتصار ردت وصوت انثوي اشبه بِـ فحيح افعى
ليسا: ألو..
شاهين بأنفاس متسارعة: رجعيها.. رجعيها ليسا
بنبرة كاذبة بتجاوب: عن مين عم تحكي؟
صرخ بقوة وجاوبها: أنا وانتي منعرف كتير منيح مين.. رجعيها بدون ما تلمسي شعرة منها.. لأنو بتعرفي وقتها شو ممكن اعمل فيكي
بكامل ثقتها بتجاوب: مارح تعمل شي شاهين.. مارح تعمل أي شي بِـ ليسا.. رح رجعها.. بس مو هلأ
رد ومازال الغضب مسيطر عليه: بتخرسي.. وبتنفذي يلي عم قلك عليه.. احسن ما اجيكي وموتك بايدي.. بحرقك ليسا.. بحرقك وبرمي رمادك بالبحر
ضحكت ضحكتها الساخرة المستفزة.. ليبعد عن اذنه الموبايل بملامح قرفانة لحتى مايسمعها
ليسا: شاهين.. الموضوع بس أني اثبتلك شي واحد.. عطيني يومين لاثبتلك ورح رجعها
شاهين: ولا ساعة زيادة.. هلأ بتتصلي فيهن ليرجعوها مكان ما اخدوها
ليسا: على فكرة ماتوقعتك سريع لهالدرجة.. وذكي كمان لهالدرجة.. يعني رجالي حتى لسا ماوصلوا لعندي.. خليني شوفها وحاكيها كلمتين.. لشوفها بتناسبك أو لا.. وبعدها برجعلك ياها
شاهين: ليسا ياغبية.. هي البنت خاطفها أنا.. عم تفهمي شو عم احكي؟
بتزدرد غصتها وبتحكي بنبرة راجفة متناقضة مع الشرار يلي بعيونها: للأسف شاهين.. ليسا مو غبية.. ولهيك بتعرف أنه يلي عندك ورح تصير عندي.. مالها مجرد مخطوفة أو أنت عاطيها قيمة وناسي أنها مخطوفة
بعّد الموبايل عن اذنه، لياخد أنفاسه بهدوء قبل مايفرغ غضبه فيها.. ليصرخ بقوة تحت هالسما المظلمة
شاهين: ليسااا..
حاول يركز انفاسه وبيرجع الموبايل لاذنه
وبعد لحظات وهي مستمتعة بسماع صوت انفاسه
شاهين بهدوء مصطنع: شو بدك؟ شو بدك هلأ؟
ليسا: سؤالك غبي.. بعرفك اذكى من هيك.. بدي شوفك .. لأن شتقتلك كتير،وبس هيك
شاهين: بترجعيها للبنت وبعدها بشوفك
ليسا بغضب.. وكأنها عم تبخ سمها من تحت لسانها : ماحذرت.. بما أنك رافض تشوفني كل هي المدة.. هي أنسب طريقة لجيبك أنت لعندي.. لأرضي أنا.. والله لخليك تحفى ورايي يا شاهين
شاهين: ياوسخة.. مهما بعدت برجع بلاقيكي مو نضفانة بنوب
بتضحك ضحكتها يلي بتأكدله الوصف يلي وصفها فيه
شاهين: مو أنا يلي بنمسك من الأيد يلي بتوجعني
ليسا باستهزاء: له له له.. مين حكا أني عم امسكك من أيدك يا بيبي؟؟ أنا عم امسكك من قلبك.. يلي واهمك ب غرام مزيّف
شاهين بغضب: لك غرام شو؟عن أي غرام عم تحكي؟
ليسا : بعرف يابيبي.. أنت مو مغروم فيها بعرف.. بس حبيت اثبتلك هالشي ألك.. بدي اثبتلك أنه مو ليسا يلي بتنترك.. مو ليسا يلي أي بنت غيرها بيملي مكان هي كانت فيه
شاهين: لك الله يلعنك ليسا .. لك والله …
لحظتها سكت لما سمع صوت طنين بيعني انتهاء المكالمة من طرف ليسا
ليصرخ بقوة.. ويوقع بالأرض وهو عم يضرب قبض ايده بالثلوج… يلي على شدة برودها ماقدرت تطفي النار يلي فيه
..
وقت قليل وكانت ليسا بلباسها الجلد اللامع الأسود.. عم تمشي رايحة جاية بمستودع مهجور
وبأيدها عصى بتشبه السياط.. عم تسحب الحبل يلي فيه بكفها التاني وابتسامتها غامرة ملامحها القوية
دخل الشب وهو عم يسحبها من ايديها ومازالت مغمى عليها
اشارتله ليسا عالأرض بِـ عصاها
ليسا: أرميها هون
ماهر: حاضر معلمتي
ليسا: شو وينو أخوك؟
نزّل عيونه بالأرض ليجاوبها: انصاب..
بضحكة استهزاء: مو مشكلة.. كنت مفكرة شاهين مارح يخليكن توصلوا جثة حتى.. توقعتوا يوصلكن ألي أشلاء
ضحك ماهر ليقلا: له يا معلمتي؟ لك ماقدر أصلاً يلمس شعرة مننا
ليسا باستغراب: كيف ؟ كيف هيك صار؟
ماهر: مدري.. بس ماكان قادر يمشي على رجليه.. كان عم يعرج على رجل وحدة
انقبض قلبها بقوة والقلق بيوضح على عيونها.. لتتبدل نظرتها لغضب واضح وبتقرب منه لتسحبه من تلابيب معطفه
ليسا: أنت شو عم تحكي؟؟شو عملتوا فيه؟
ارتجفت أوصاله ليجاوبها: والله ماعملناله شي معلمتي.. ونحن عم نلاحقه اختفى.. وبعدها لما لقيناه كانت سيارته فايتة بشجرة كبيرة.. وشكله انصاب برجله.. بحلفلك هاد كل شي
بصراخ بيهز جدران هالمكان المتآكل : لك الله يلعنكن.. مافي يوم مشيتوا على كلمتي صح.. انقلع من خلقتي
على صوت صراخها بتتحرك تاج بألم
سمعت صوت حركتها والتفتت عليها مباشرةً
توجهت ليسا لعندها وبتنزل للأسفل لتجلسها بقعدتها.. كانت عيونها مربطة وايديها مربوطة للخلف
تاج بصوت متعب: وين أنا؟شو عم يصير ؟
ليسا بقرف: شو ياروحي.. خايفة؟
تاج باستغراب: مين انتي؟
ليسا: واضح أنك فضولية كتير يابيبي بس لا بدنا نروء.. أنا ماجبتك لتستجوبيني.. أنا يلي رح استجوبك.. مو كتير ها.. بس شوي
تاج: طيب شو بدك مني؟ ليش جبتيني لهون؟ شيلي هي عن عيوني بدي شوفك
ليسا: أي مو تكرم عيونك.. خليني شوفك كمان أنا عن قرب
سحبت الربطة عن عيونها بقوة لتفتحهن تاج بألم
سحبتها ليسا من فكها السفلي وهي عم تتأمل وجها
ليسا: ورجيني لشوف.. اممم لاا واضح أنك من عمر أمي
استغربت تاج كلماتها ومابتنكر خوفها.. يلي كان واضح من رجفتها
تاج: شاهين.. وينو شاهين؟
سكرلتا تمها بغضب واضح بكف ايدها
ليسا: خرسي.. وماتذكري اسمه على لسانك .. سامعتيني؟وإلا شايفة هي الحبلة؟ رح خليها تاكل من جسدك أكل
خبطتها بقوة على الأرضية لترتعش تاج من خوفها
تراجعت للخلف زاحفة لما ليسا وقفت على أقدامها وأطلقت ضحكة صاخبة
ليسا: مابلومك.. الكل بيخاف من ليسا
تركتها وحدها وطلعت والغضب مالي قلبها.. غضب الغيرة والكره.. والحقد.. من إمرأة كانت لعدة ليالي مع حبيب فؤادها شاهين
اتطلعت ب موبايلا لتشوف مكالمات كتيرة منه
اتصلت فيه وأخيراً
كان وصل على البيت يلي بالغابة وعم يحاول يتواصل مع أحد معارفه ليجبله سيارة
فتح المكالمة بسرعة وهو عم يصرخ: ليسا..
قاطعته بكلماتها السريعة: هسس استنا يابيبي .. لاتصرخ، بدي شوفك.. رح ابعتلك سيارة لتاخدك وهنيك منحكي، ليك أنا رح اجي لوحدي، لهيك ماتتهور عطيت أمر لرجالي إذا بعد ٣ ساعات مارجعت رح يخلصوا على الأمورة الملحوشة عندي
حاول يضبط أعصابه قدر المستطاع.. مر الوقت متل سنين، النار شاعلة جواته، بيعرف كتير منيح مين ليسا، والسواد يلي بقلبها
بيتذكر كتير منيح كيف كانت تعامل البنات يلي تخطفهن، وهاد الشي يلي خلاه قلقان على تاج اكتر
يلي ماكان حالها أفضل منه.. خوفها واضح عليها بشكل فظيع.. كلشي كان مختلف عن شاهين.. مختلف كلياً عن الأمان يلي عاشته معه
…
وأخيراً وصل للمكان المطلوب ونزل من السيارة وتوجه لهالمبنى المهجور
ليشوفها واقفة وموجهة وجهها للجدار.. ماسكة عصاها خلف ضهرها بحركتها المعتادة
ليسا: شاهين حبيبي..
التفتت لعنده وابتسامتها مملية وجهها
ماتمالك اعصابه لما اتوجه لعندها و شد بكفوف ايديه على عنقها
شاهين بصراخ: لك والله لموتك.. وادفنك بأرضك يا واطية.. شو لسا بدك مني ياحيّة؟ شو؟
ماكانت عم تقاوم نهائياً.. عارفة مارح يعملها،ونظرتها استفزته بزيادة وفجأة دفعها بقوته للخلف لتصطدم بالجدار
صدر منها نبرة ألم ماقدرت تكتمها
استعادت قوتها وبترتب ملابسها وبتقرب منه بجرأة لتمسك ايديه وتحطهن على خدودها
ليسا: بتعرف؟ مو مشكلة أن حطيت ايدك على رقبتي أو خدي.. لمستك لوحدها دوا بالنسبة الي
بتضمو بقوة لحضنها وهي عم تهمسله وتشم ريحته: يالله شو شتقتلك شاهين
دفعها من جديد بملامح القرف: ماتلمسيني ليسا.. ماتلمسيني قرفانك أنا..أنتي بتعرفي هالطريقة مابتنفع معي.. مو خايفة مني؟ خبريني مو خايفة؟
ليسا بنبرة مستفزة: هو للصراحة .. كتير خايفة.. حتى عم ارتجف.. بس مو متل الكتكوتة يلي عندي.. كانت عم ترجف اكتر بكتير مني.. ليش ياترى؟
سحبها من جديد من المانطو الجلد يلي لابستها: ليكي وليه.. إذا بتلمسيها والله مارح يكفيني موتك
ليسا: حيلك حيلك مو لهالدرجة، كل هاد لتقنعني أنك عشقانها؟ وعم تنيمها عندك بالبيت؟
شاهين: عشق شو وبيت شو؟ انتي جنيتي؟ هي البنت مخطوفة ليش ماعم تفهمي؟
ليسا: كذاب شاهين.. أنت خطفتها بس لتخليني غار وتنتقم مني.. أنا مراقبتك من زمان.. ولامرة بحياتك مااخدت وحدة مخطوفة على هداك البيت.. لا وعم تجبلها ملابس كمان.. عم تدلل زباينك زيادة عن اللزوم.. صاير خاطف خمس نجوم ها
غمزته لتستفزه بزيادة بس لحظتها اتخيل وضع تاج عندها
لهيك بيهدي اعصابه وبيسألها: شو بدك مني هلأ؟
ليسا: هيك أنت عيني
قربت لتلمس صدره بيمسك ايدها بقوة
شاهين بنبرة تهديد: أوعك..أوعك تلمسيني
ليسا: حاضر متل مابدك
بدأت تلف حوليه بحركة دائرية.. الحركة يلي ذكرته بالافعى يلي عنده.. ماغلط لما سماها على اسمها
ليسا: بترجعها لبيتها.. والمصاري يلي رح تربحهن بخطفها.. مو لازمينك على ما أظن صح؟
شاهين: احكي بالمختصر
ليسا: أوك بيبي هدينا شوي.. بدك ترجعلي شاهين..بدي ياك بقربي وتسامحني خلص..
وقفت أمامه وبتبدل ملامحها لانثى بريئة.. وهي اللحظة يلي بيشبهها فيها للافعى لما بتخلع جلدها لتبدله بجلد آخر
شاهين: بعد عمايلك فيني كلها؟
ليسا: الماضي راح.. كنت مجبورة ليش ماعم تصدقني.. شاهين أنا بحبك
ابتسم بسخرية
ليسا: سماع شاهين.. لو بدك تقول عني خاينة وكذابة.. مافيك تنكر عشقي ألك
شاهين: لك شو نفع العشق إذا من وحدة حيّة متلك آه؟
ليسا: هي الحيّة ربيت على ايدين أبوك.. يعني لا تستشرف عليي وعيلتك كلها معروفة شاهين
سحبها بحركة مباغتة من شعرها بقوة ،شعرت وكأنه رح يقطعه من جذوره
ليسا بغضب: شاهين.. لك عم توجعني
شاهين : والله ولسا ماشفتي شي من الوجع
سحبها لطرف الجدار وسألها: وينها تاج؟ احكي فوراً بلا ما افسخ راسك بهالحيط
عم تحاول تتخلص من قبضته بعد ماشافت الشر بعيونه هي اكتر انسانة بتعرفه .. وبتعرف الغضب يلي بعيونه حالياً بيدل أنه قادر يعمل أي شي لو رح يندم عليه بعدين
ليسا: تركني.. مارح قلك شاهين.. حتى لو رح تموتني مارح قلك
شاهين بصراخ: لك ليش؟ شو بدك منها؟ شو عملتلك البنت احكي؟؟
ليسا: بيكفي تحكي عنها وتخاف عليها.. لك هي وسخة متلها متل البقية ليش عن تعطيها قيمة قلي ليش؟
ماتحمل كلامها ودفع براسها للجدار
حست الألم تسلل لكامل جسدها وصرخت بقوة
شاهين: بتبلعي لسانك احسن ما اسحبلك ياه ها.. ليكي ليسا.. أنا من زمان لغيت العنف من حياتي.. بس اقسم بالله اليوم بعوض كل هالوقت فيكي ها
ليسا والدموع جامدة بعيونها: أي مارح تستفاد شي حبيبي.. شاهين طريقتك هي رح تخسرك كتير .. تركني احسن ألك
شاهين: مو فارقة معي.. رح موتك بأرضك هلأ و تاج رح رجعها يعني رح رجعها
ومع كل الخوف يلي بقلبها قادرة تقاوم وتستفزه: يمكن تقدر ترجعها أي.. بس صدقني مو متل ما اخدتها منك
سألها بقلق واضح: شو قصدك؟
وبنظرة تَشفّي بتنطقها: أنت عارف تختار بشكل كتير منيح شاهين.. ومابقدر اضمن الشباب يلي عندي بعد ماقدمتلن هالتاج على طبق من فضة
صرخ بقوة حست فيها وكأنها انطرشت
شاهين: الله يلعنك ليسا..
وبقوة خبط راسها بالجدار لتحس بتنميل رهيب فيه، وتفقد نظرها تدريجياً ومن بعدها سقطت بين ايديه مغمى عليها
لحظة و رماها بقهر على الأرض وبدأ يفتشها ليحصل على موبايلا
وببصمة اصبعها قدر يفتحه مباشرةً، وبدأ البحث عن الموقع
وبين المحادثات حصل على محادثتها مع ماهر وشاف فيها الموقع
كانت حركته سريعة ومتوترة راجفة بذات الوقت
سحبها من أرضها بصعوبة بسبب ألم قدمه يلي عم يعرج عليه وحطها بسيارتها من الخلف بعد مااخد المفتاح من المانطو
شاهين: والله إذا بصيبها شي يا ليسا.. رح موتك بكل يوم باقي بحياتك مية موتة والله
بيشغل السيارة وبينطلق بعد ماكتب رسالة لماهر على أنه ليسا
(بتجهز البنت وبس وصل شاهين بتسلمه ياها.. الموضوع انحل وإياك تلمس شعرة منها أنت أو غيرك)
انطلق بسرعة رهيبة بس ماكانت أسرع من نبضات قلبه
بحياته ماحس بخوف متل مو حاسس بهي اللحظة.. مو بس لأنها مسؤوليته ك خاطف.. كان في شعور مختلف عن هي المسؤولية
كان عم يدافع عن قطعة منه.. من روحه.. عم يدافع بطريقة ولا بحياته دافع عن نفسه فيها
عم يدعي ل ربه مايصيبها اذى ، عم يدعي ويستغفر عن كل ذنب عمله بحياته.. شعوره أنه هاد عقاب كلشي عمله بحياته ماعم يطلع منه
اتملكه شعور الذنب.. القهر.. الكره لنفسه ولـ ليسا و حتى أبوه
رفع نظره للسما يلي أمامه.. ونطق بغصة واضحة: يارب.. ذنوبي كتيرة.. بس مو تاج.. هي انضف شي بحياتي كلها.. ياربي هي الأمل الوحيد لأني اصحى واتغير.. مابدي اخسر آخر أمل ألي
قطع منتصف الطريق ويمكن اكتر.. لما سمع صوت حركة من الخلف..سمع انينها
ليسا: امم.. وين أنا؟ شو صار؟
أخدت وقت طويل لقدرت تفتح عيونها وتحاول تشوف مين موجود حولها
لمحته.. وببطئ شديد استرجعت ذاكرتها
قعدت مكانها بصعوبة وحكت بهدوء و تعب: وين نحن؟ شو عم تعمل شاهين؟
ماكان في أي إجابة منه
حطت ايدها ع راسها: ااخ.. لك كيف؟ كيف بتعمل فيني أنا هيك؟أنت جنيت ؟ عرضتني للموت كرمالها؟
ردلها بنبرته الباردة: خرسي ليسا
ضربته بضعف على كتفه: مارح اسكت.. وقف السيارة هون وقفها
حاولت تسحبه بقوة لتمنعه يكمل طريقه بس ماكانت قادرة تأثر عليه بسبب الدوخة يلي براسها وعناده
ليسا: عم قلك وقف هون.. احكي وين آخدني؟
شاهين: مو شايفة الطريق؟ مابتعرفيه يعني؟
حاولت تركز وبعدها شافت موبايلها بأيده .. قربت لتسحبه لكن منعها بقوته ودفعها للخلف
صرخ فيها ليقعدها: خلصنا بقا.. خلصنا ليسا.. بحرقك هلأ هون وبكمل طريقي عم تسمعي؟.. كنت بدي اتركك للكلاب تاكلك بس مو أنا يلي بتهون علي الأيام مو أنا.. انتي وبس.. انتي وأمثالك..كان المفروض من لما دخلتي هاللعبة تعرفي أنك خسرانة فيها
ليسا بقهر: ماتروح شاهين ماتروح.. مارح تقدر تخلصها .. صدقني بخليهن يموتوها قدام عيونك ومابعطيك ياها
مابيجاوبها وبيكمل طريقه .. ليوصلوا لوجهتن مع كل محاولاتها لتعيق مساره
وقبل ماينزل من السيارة فاجئته ليسا لما سحبت سلاحها من خلف الكرسي وحطته براسه
حكت بنبرة فحيح: لكن بتخسر روحك أنت إذا بتاخدها
ما انتظر ولا حتى ثانية،نزل بدون ما يعيرها أي اهتمام ومشي بطريقه عم يميل على قدمه بسبب والنار عن تشعل بعيونه
كان التراب عم يتطاير حوليهن بسبب الريح، والشمس حامية على عكس جو الغابة
ركدت خلفه و وقفت أمامه ، سحبت على السلاح للخلف حتى تجهزه للاطلاق
ليسا بصراخ: عم قلك بموتك.. والله بموتك وما بيرفلي جفن وأنت بتعرفني بعملها.. مو أنا يلي بتتركني وبتهجرني وبتروح لغيري.. مو أنا ياشاهين يلي بتبدّل بوحدة متل هي.. أنا ولا حدا بيعوض مكاني
ارتجف جسدها من العصبية حتى العروق برقبتها ظهرت
ابتسم بسخرية وقرب منها اكتر ليلامس سلاحها صدره
وبصوت ماحدا سامعه غيرها وعم يشد على حروفه: أكيد ماحدا بيعوض مكانك.. لأنك حيّة .. لأنك سامّة.. لأنك اقرف انسانة بشوفها بحياتي
بتدفعه بالسلاح للخلف: لك سكوت.. سكوت.. بيكفي تكذب على حالك.. الأيام والحب يلي عشناه بيشهدوا على قوة حبنا وغرامنا لاتنكر
شاهين بعصبية مكتومة: لك انتي مصدقة يلي كان بينا حب؟ انتي كنتي جاسوسة مو اكتر.. أبي حطك عندي لتغسلي مخي.. لتغيري فيني يلي ماقدر هو يغره.. حطك لتجرعيني السم بغرامك هاد.. وتخليني بلا قلب وبلا ضمير.. أنتو حرقتوني وأنا عايش.. النار يلي أكلت بجسد أبي.. بدي خليها تاكلك من جوا ليسا.. بدي خليها تاكلك لما خليكي تشوفي بعينك تاج وهي بحضني
القهر عم ياكله وهو شايفها أمام عيونه ، بس عم يحاول يضبط أعصابه بس لبينما يحصل على تاج ويأمن عليها
بعدها عن طريقه لتصرخ فيه : مو بس أنت رح موتها قدام عيونك.. وإذا بدك كمان بعذبها.. وقف عندك شاهين لا تمشيي
صرخت بأعلى صوتها باسمه ليوصل الصوت لداخل المبنى المتهالك
كانت تاج قاعده على ركبها مربطين ايديها للخلف ومغطيين عيونها .. عم ترتجف من خوفها.. وعيونها عم تدمع بدون شعور
ولما سمعت لفظ اسمه من مكان ما.. انتفض جسدها بالكامل..ولما سمعت صوته أله وهو عم يصرخ باسمها حست بشعور كل حروف أبجديتها مابتقدر توصفه
بنبرة رجولية قوية صرخ: تااج.. تاج وينك..
لحظتها حست وكأنها كانت جسد بلا روح.. وارتدت الروح ألها بصوته
ارتخت أطرافها المشدودة و المتوترة كل هالوقت
ليسا: مارح خليك تشوفها.. وقف والله لموتها قدام عيونك
عم تلاحقه وهو مازال عم يسحب قدمه بصعوبة
ليوقف ويلتفت عليها
شاهين: إذا بتأذيها يا ليسا.. أو بتكوني آذيتيها.. صدقيني دمك مارح يشفي غليلي منك، وانتي بتعرفيني عزّ المعرفة، إذا قلت فعلت
ولأول مرة بيشوف ملامحها تبدلت هيك.. وكأنها صادقة هي المرة.. اتضخمت حنجرتها بشكل بسيط وكأن الغصة ماعاد تقدر تمشي من حلقها نهائياً
لمعوا عيونها تحت الشمس الساطعة ودموعها تساقطوا وكأنها عم تنعي آخر ذرة قوة داخلها
جمد مكانه لحظتها مو مصدق يلي عم يشوفه.. اصعب واقوى إمرأة عرفها بحياته واقفة عم تبكي أمامه
قربت منه كتير ولامست صدره بكف ايدها
بنبرة مكسورة و راجية بتهمسله: لاتروح شاهين.. لاتروح لعندها.. مافيني بترجاك.. مافيني شوفك بقربها.. ارحمني بس
شاهين بكره واضح بعيونه: انتي مارحمتيني ولا رحمتي حالك.. ناطرة هالشي مني؟ قلتلك طلعي من حياتي وكل واحد فينا مشي بطريق.. مع كلشي عملتيه فيني ولا أذيتك ، بس صدقيني عملتك هي ولا ممكن أغفرلك ياها
#موعد_مع_خاطفي
قاطعته بحروفها المتلعثمة: هجرك ألي شو بتسميه؟ هاد أكبر أذى عيشتني ياه بكل حياتي.. لك شاهين أنا بعشقك.. بعشقك والله.. ليش ماعم تصدقني؟ ليش ماعم تستوعب أني كنت مجبورة نفّذ كلام أبوك.. لازم ابقى حوليك واحكيلوا كلشي عم تعمله.. لازم لحتى شوفك بأمان وماحدا يأذيك
صرخ بصوته الجهوري ليخرسها: بيكفي كذب.. مارح صدقك..لو شو ماحكيتي مستحيل صدقك..لك يا وسخة أمي ماتت بسببك..بسببك انتي
قرّب و سحبها من ملابسها
بتعلى شهقاتها لتجاوبه: ماكنت بعرف إذا حدا عرف مكانها رح يخلصوا عليها، ماكنت بتوقع ألها أعداء.. ماكنت متوقعة تموت
شاهين: عدو أبي بيكون عدوّي ، وهو قتل أبي وكمّل على أمي بسببك.. أنتي يلي دليتيهن على مكانها
ليسا: لا بحلفلك ماكنت عارفة رح يعرفوا طريقها بسببي، كلشي كان بدي ياه منها ماتخبرك عن حقيقتي
شاهين: انتي غبية شي؟ رحتي لتقنعي أمي ماتخبرني حقيقتك وأنا من الأساس كنت كاشفك.. تصرفاتك الغبية ظهرتلي كلشي وعرفت حقيقتك حتى أمي خبرتها أني كشفتك
تذكر رسالة أمه يلي قرأها بعد موتها بيوم واحد
شاهين: وبغبائك رحتي لعندها تطلبي منها تخبي عني بس انتي خليتيهن يقتلوها .. انتي السبب ومستحيل سامحك ليسا، هي كانت عم تتعالج من مرضها كنت خايف أخسرها وانتي قتلتيني قبل ماتقتليها
ولتحاول تهرب من عتابه ولومه صرخت فيه: ليش عم تعاقبني ألي بس؟ ليش ماعاقبت صاحبك هارون؟ ليش لسا بتثق فيه لحد اليوم؟
شاهين: لأنو هارون أشرف و أوفا منك.. انتي مابتعرفي شي عن الوفا أصلاً
دفعها بعيد عنه وحررها من قبضته
مسحت دموعها ب كفوف ايديها لتقدر تشوفه اوضح
ليسا: إياك يا شاهين.. إياك تثق فيه
ابتسم بسخرية: بدك تقنعيني أنك خايفة عليي من هارون؟ ليش عم تغيري الموضوع هلأ؟ وينها تاج؟بدي ياها هلأ (وبينده بقوة): تاج..
من جديد سمعت صوته عم يندهلا.. استعادت قوتها وحاولت توقف بصعوبة على رجليها
استندت على الشخص يلي خلفها وهو عم يهددها ماتتحرك.. دفعته بعيد عنها وتوجهت للأمام وهي لاحقة الصوت
ركدت لعنده ليسا وسحبته وبترد بتحط السلاح أمامه
ليسا بنبرة ثابتة: سمعني شاهين، أنت عم تخدع حالك.. عم تتسلى معها مو اكتر.. ليك مو أنت يلي بتفوت بهيك لعبة وسخة صح؟ بعرفك مو هيك.. بلاها هالعلاقة.. ماتعمل هيك فيني والله مابتحمل شوفك مع حدا غيري
شاهين: اتسلى؟ من كل عقلك مفكرتيني عم اتسلى ليسا؟
ليسا: لك بيكفي بقا تضحك على حالك وتقلي خاطفها وبس.. بيكفي تقلي مجرد عملية وعم تنفذها..
مجرد تاخدها ع بيت أمك هاد بيعني قصص تانية شاهين كنت مراقبتك قدام عيوني.. وأنا مابسمحلك تأذي حالك وتفوت بعلاقات بس لتعوض الفراغ يلي أنا تركته
ضحك بقوة فجأة.. ضحكته الساحرة يلي بتخطف قلبها على طول.. الضحكة يلي مع ظروفها الصعبة بهي اللحظة شغفت قلبها بالكامل وماقدرت تخفي بسمتها
شاهين باستخفاف: من كل عقلك عم تحكي؟ أنا عوض مكانك بِـ تاج؟ " لك هي تاج هي " أنا عوضت مكانك بالافعى يلي ربيتها.. الافعى يلي كل ما بحملها.. بتلف ع ايدي متل ماكنتي تلفي شرّك عليي.. كل مابحط وجها أمامي واتطلع بعيونها مابشوف ألا عيونك ليسا.. تاج مو بمكانك انتي.. تاج بمكان تاني..بمكان خلق من جديد بسببها هي وبس
حط ايده على صدره و خبط على قلبه: هاد الانسان يلي أمامك.. يوم كنتي عايشة معه ماكان بيملك قلب.. ومن وقت دخلت تاج ع حياته انولد قلبه داخله.. هاد مكانها ل تاج ليسا هاد
احْمَر وجها بالكامل واختفت البسمة والحقد ظهر بكل ملامحها
شاهين بنبرة استفزازية: تاج أخدت مكانها يلي ماكان حدا قبلها فيه.. لأنها هي الوحيدة يلي بتستاهله.. معك حق ليسا.. صح كان ألك عيون اقوى من عيوني.. بعيدة كل هالبعد عني.. وعرفتي شعوري تجاه تاج ..لا تكذبي على حالك.. انتي بتعرفي كتير منيح.. أني عشقانها لهالبنت.. مغروم فيها حد النخاع
صرخت بقوة : لك سكوت سكوت
غمضت عيونها وحطت ايديها على آذانها
ليسا : مابدي اسمع كذبك.. أنت عم تحكي هيك بس لتوجعني
وبصوت اعلى من صوتها بيجاوبها: لا ليسا.. أنا بحبها ل تاج.. عم تسمعي بحبها.. ورح آخدها من هون وقدام عيونك والله.. ومارح اسمحلك تأذي شعرة من راسها
وعلى أثر أصواتهن وصلت تاج وصرخت باعلى صوتها باسمه
تاج: شاهيييين…
مسكها الشب ووقعت فوراً عالأرض يلي كلها تراب وحجار صغيرة وهي عم تتلفت حوليها
التفت لخلفه شاهين ليبحث عنها وشافها من بعيد عند بوابة المبنى
الفرحة حضنت قلبه وشقت البسمة على وجهه
شاهين: تااج.. أنا هون
بينما كانت تاج عم تنده باسمه وتكرر وتستنجد فيه صرخت ليسا بصوت اعلى والنار عم تشعل فيها
ليسا: شاهين أوعك تتحرك عم قلك.. والله بقوصك ومابتفرق معي.. أنت هلأ بكلامك هاد طلعت من قلبي سامع.. أنت طلعت
ماكان سامعها وسارح بِـ تاج عم يحاول يتطمن أنها بخير.. ولحظة يلي أدرك فيها الموقف بدأ يعرج على رجله ويتوجه لعندها باعلى سرعة بيقدر عليها
شاهين:ياحقير تركها.. إذا بتأذيها لموتك بايديي
سبقته من جديد ليسا ووقفت قدامه لتقله: لآخر مرة عم نبهك مو أنا يلي بخسر الحرب شاهين
وهي موجهة السلاح أمامه النار بتشعل فيه
#سارة_العلي
#موعد_مع_خاطفي
وبيصرخ فيها بعد مايمسك ايدها: لك خلصنا بقا، إذا بدك تقتليني يلا قتلي وخلصيني.. خلصيني ضربي أو تركيني روح يلا
بينما عم يشد ايدها اكتر لصدره وهي عم تحاول تسحبها ضغطت على سلاحها وانطلقت الرصاصة لتخترق جسده مباشرةً
شهقت بقوة من صدمتها بيلي عملته
حس بشعلة نار حرقت طرف زنده وعيون ليسا مفتوحة على آخرها متوجهة لعيونه
صدر صوت ألم خفيف من حنجرته ليحط ايده مكان الجرح فوراً وينتبه على الدم
انصدم من يلي عملته.. عيونه ماعم تقدر تصدق.. من جديد خيبت أمله.. ماكان عنده أي ثقة فيها.. بس ماكان متوقع تقدر تعمل فيه هيك شي بيوم
ماقطع شروده فيها إلا صوت تاج الخائف
تاج بنبرة باكية: شاهييين.. شاهييين رد عليي أنت بخير؟.. أنا ماعم شوف شي
حاولت من جديد توقف على رجليها وتركد.. بينما الشب تركها و وقف مصدوم من يلي عملته معلمته بالانسان يلي بتعشقه والكل بيعرف هي المعلومة
بعّد شاهين جسد ليسا الراسخ أمامه بلا روح بعد آخر نظرة ألها كانت كفيلة تقتلها وكأنها أقوى من الرصاصة يلي خترقت طرف جلده..
شاهين بهمس: حسابك مو هلأ يا ليسا، رح دفعك التمن غالي صدقيني
مشي بخطوات عرجا باتجاه تاج
شاهين بنبرة عالية: تاج.. ماتخافي أنا جيت لآخدك
لاحظ ركدتها يلي مو ثابتة وكان خايف أنها توقع وهي مو شايفة شي..ليسرع خطواته اكتر
شاهين: وقفي تاج خلص وقفي ماتركدي أنا جاية لعندك
ماكانت تسمعله وهو مو مصدق يوصل ليمسكها قبل ماتتهاوى على الأرض
مو باقي غير خطوتين تلاتة بتفصلهن لما انلوت رجلها وقبل ماتسقط على الأرض سحبها لحضنه
سكر عيونه بقوة وانكمشت ملامحه بسبب الألم يلي حسه بطرف ايده بسبب الإصابة
التفتت ليسا لتشوف اصعب شي ممكن تشوفه بحياتها.. وكان أصعب من الموت حتى
شدها لحضنه ونزلوا عالأرض سوا
كانت عم تاخد انفاسها بصعوبة وعم ترتجف
سطحها بحضنه وسحب عن عيونها الربطة
اتطلعت بوجهه وهو عم يمسحلها دموعها بكف ايده..
ماكانت عم تنطق غير باسمه.. ودموعها تتساقط وغصتها تظهر حروفها مبعثرة
شاهين: تمام.. تمام ياروحي.. ليكني بجنبك ماتخافي
بتجلس قعدتها وبيسحب سكين مطوي من طرف حذائه وبيقطعلها الربطة عن ايديها
وأول ماتتحرر صدمته بحركتها لما بتعانقه بقوة.. وبتبدا تبكي بقهر اكبر
ضمها بايد وحدة وهو عم يمسح على شعرها
شاهين بحنية: أهدي.. أنا معك خلص ماعاد في شي سيئ.. قوليلي أنتي منيحة؟
بيبعدها شوي ليتفحص وجهها وكامل جسدها
شاهين: أذوكي شي؟ حدا مد ايده عليكي؟ احكي؟
بتهز راسها بالنفي
تاج: لا لا ماتخاف.. ماصرلي شي.. بسس
اتطلع بعيونها يلي وجهتن للأرض
شاهين بخوف: بس شو؟
#سارة_العلي💙
#موعد_مع_خاطفي
تاج: كنت خايفة.. خفت كتير شاهين
سحبها من جديد لحضنه بقوة لما يغمض عيونه بقهر لأنه يلي عاشته بسببه
وبهالاثناء ماقدرت ليسا تشهد على اكتر من هيك..رفعت سلاحها واطلقت بالسما وانغمست تاج بحضنه بقوة اكبر من خوفها
التفت عليها شاهين ونطق بحروف ثابتة: ليسا، خدي وسخك وامشي من هون، وإلا صدقيني روحك هلأ باخدها (بيكمل بصراخ) انقلعييي
انسحبت بخطوات متسارعة لسيارتها وانطلقت باعلى سرعة فيها ليتناثر التراب بكل مكان
تاج: مين هي؟ شو بدهن مني؟
شاهين بارتباك: أنا … كان كله بسببي
تحركت حركة لتلمس جرحه بالغلط.. كانت الإصابة سطحية مقصودة من ليسا، ماكان بدها غير ينجرح مجرد جرح بسيط .. كل يلي ببالها بس توجعه
سمعت انين خفيف منه لتبعد تاج وتتفحصه
تاج بقلق: انت مصاب؟ جاوبني
شافت أثر دم على ايدها
وبصوت راجف : شو هاد؟ وين انصبت؟ شو عملت فيك هالبنت.. شاهين نحن لازم نروح عالمشفى
قام على رجليه وسحبها من مكانها
شاهين: خلينا نمشي وبلا جنان
تاج: بترجاك بس خليني شوف الجرح
لمح الشب عم يتقدم باتجاهن.. وبأمر من معلمته أجا ليقدم المساعدة
شاهين بغضب: إياك تقرب..
بيرفع السكين بوجهه وبيسحب تاج لخلفه
بيرفع ايديه الشب معلن استسلامه
ماهر: معلم بس كنت بدي أعطيك هي الربطة.. وعقملك جرحك على طلب معلمتي ليسا
شاهين: إياك عم قلك ..الله ياخدك أنت ومعلمتك.. قلها جروحها ماعاد تأثر فيني
بيمزق طرف قميصه وبيطلب من تاج تساعده
ارتجفت ايديها وغمضت عيونها: شاهين مافيني اتطلع عالدم
بابتسامة بجاوبها ليخفف عنها خوفها: شو مو كاتبة مشهد اكشن برواياتك قبل هالمرة؟؟
فتحت عيونها لتشوف ضحكته يلي اسعدت قلبها وريحته
تاج: مااغلظك.. بتعتبر هي متل هي؟
شاهين: انتي يلي حسستيني الخيال هو واقع شو منعمل ، يلا شديها معي
مسكتها معه وقلبها عم يوجعها بقوة بسبب هالمنظر
وبيستوقفهن ماهر: معلمتي طلبت مني وصلكن.. عالغابة بس..
شاهين: عطيني المفتاح لشوف، وقول لمعلمتك الدم كتر برقبتها وماعاد رح سامحها عليه
ماهر بارتباك: بس يامعلم
رجع رفع السكين بوجهه: عم قلك عطيني
وأول ماقرب منه ماهر بيتلقى جرح من سكين شاهين بطرف كتفه اليمين ليرفع عيونه بصدمة
ماهر بألم: معلم.. !!!
شاهين: ماخلق يلي بيلمس شي بيخصني..هاد مجرد جرح، تأكد يوم بترجع بتقرب مني ياماهر روحك رح تكون طالعة
تاج ببكا: شاهين أنت شو عم تعمل .. ليش هيك عملت أنا ماحدا أذاني
سحب مفتاح السيارة
شاهين: بتقول لمعلمتك تبعت كلابها ياخدو السيارة بكرا من الغابة عند بيتي
ماحدا كان بيتوقع شو ممكن يعمل فيهن لولا وجود تاج بقربه
#سارة_العلي💙
#موعد_مع_خاطفي
ستغربت تاج طلبه لما بيقرب منها وبيغمرها بايده التانية
تاج بتوتر: لك.. شو هاد ؟ شو عم تعمل؟
ابعدته عنها ليتطلع فيها
شاهين: مو شايفة رجلي طيب؟ صرت أعرج وماعندي عكاز.. وكمان ايدي منصابة.. يعني عالأقل ساعدنيي لأني خلصتك منهن
خفت ضحكتها لما ابعدت وجها عنه وقربت منه ليرجع يضمها ويمشوا باتجاه السيارة مع بعض
تاج: بعرف سوق إذا بدك
شاهين: لا لا بقدر سوق على مهلي
ساعدته يطلع مكانه بتحاول تقرب لتلمس الجرح بخوف
شاهين: ماتقلقي، الجرح بسيط مو مأثر لازم نمشي بسرعة
تاج: بس لازم نعقمه أول مانوصل
…
بقيو ساكتين لمدة قصيرة.. عم تعيد أفكارها، ويلي عاشته بالساعات الأخيرة
تلتفت عليه بين اللحظة والتانية وترجع تناظر أمامها
لاحظ شاهين الكلام يلي مو قادرة تحكيه..وماكان عنده الجرأة يسألها
مازال مو مستوعب يلي صار، كيف خطفوها أمام عيونه وماقدر ينقذها.. كيف رح يقدر يحميها إذا تكررت هالحادثة
مازال مو مستوعب اعترافه بالحب لانسانة خاطفها.. اعترافه بوجود قلب داخل صدره بيملك مشاعر فياضة لانسانة ماكانت معه من سنين!!.. كانت من أيام معدودة فقط
مو قادر يفهم كيف قدرت تاج ببساطة.. تنسيه كل وجعه من "حواء"
اتنهدت بعمق.. لبينما وصلوا للغابة
نزل من السيارة ولحقته تاج
وأول مادخلت الغرفة حاولت ترجع تطلب منه تشوف الجرح
مسك ايدها واتطلع بعيونها بثبات: مو وقته
تاج: كيف يعني؟ لازم يتعقم شاهين أو يشوفك دكتور.. ليك بعرف يلي متلك إلا يكون عندهن طبيب خاص مابيفسد عليه للشرطة
شاهين: استغفر الله بس
اعدت على السرير ناطرة منه يقعد جنبها لتعقمله ياه
شاهين: تاج.. مارح نبقى
بتسأله باستغراب: كيف؟
شاهين: مارح نبقى هون.. المكان مو آمن
هزت راسها واستجابت لرغبته بصمت
استغرب سكوتها على غير العادة لكن بررلها بسبب الصدمة يلي عاشتها
شاهين: رح نجمع يلي بيلزمنا من هون ونمشي
أخد صندوق الافعى أول شي وحطه بالسيارة وبعدها باقي الأغراض
ركبوا جنب بعض بسيارة تانية أحضرها صديقه هارون وترك سيارة ليسا
شاهين: جاهزة؟
تاج: لشو؟
شاهين: ممكن مغامرة جديدة أو أيام مملة جديدة
ابتسمت وكأنها مجبورة وبتميل براسها للنافذة
شغل السيارة ومشي
قرر يتركها ترتاح شوي بعدها بيحاكيها
…
أول ما انطلق بطريقه عمل مكالمة
شاهين: ألو.. أي هارون كيفك؟.. تمام خلصت كل الأمور؟ المكان جاهز؟ أي رح ابقى فيه فترة منيحة لهيك مابدي يكون شي ناقص.. طيب أخي يعطيك العافية.. ليسا؟ ماتقلق قدرت أخلص منها حالياً.. سلام
بعد مرور ساعة.. لاحظ مالها غفيانة، لكن الصمت يلي فيها قتله مو متعود عليها هيك
#سارة_العلي
#موعد_مع_خاطفي
وقرر كسر هالصمت
شاهين: تاج؟ انتي منيحة؟ إذا فيكي شي بس نوصل بجبلك دكتور
اتطلعت فيه لتجاوبه: أنا منيحة شاهين مافيني شي، بس أنت يلي محتاج دكتور.. ايدك و رجلك
ابتسم ابتسامة جانبية ليجاوبها: طبيبتي معي مو مشكلة
كان متغير معها.. ابتسامته يلي ماعم تفارقه، في شي غريب صاير فيه وماعم تفهمه
تاج: مارح أقدر ساعدك الموضوع بده مختص
شاهين: ماتقلقي مكان مو رايحين بتلاقي كل مستلزماتنا خبرتهن يجهزوا كلشي
تاج : مين؟
شاهين: ماتفكري كتير كله رح يتعدل
رجعت سرحت بخيالها وفكرة أجت بباله خلته يحس بخوف، لاحظ جفاها ونظرتها القوية.. وكلماتها القليلة
اتشجع وسألها : تاج.. شو عملوا معك؟ حدا اذكي؟ لمسك؟ ليسا حاكتك شي؟
بتهز راسها وبتجاوب: ماحدا لمسني صدقني خلص ماعاد تحكي بالموضوع عنجد أنا منيحة وحابة اتناسى يلي صار
شاهين: لكن شبك؟ شو يلي مدايقك.. صدقيني أنا مارح مررلن ياها ، وهي ليسا أنا بعرف شغلي معها اتأكدي من هالشي، ودبرتلها قصة رح تخليها تندم على يلي عملته معك..
تاج: لا شاهين، مابدي توقع بمصايب جديدة بسببي
شاهين: أنتي يلي وقعتي بالمصيبة بسببي.. أنا من جوا مقهور تاج فهميني.. مابعرف كيف هيك أخدوكي وماقدرت أعمل شي
تاج: كان وضعك صعب.. وماكنت قادر تدافع عن نفسك حتى..وقلتلي هربي أنا ماقدرت
شاهين: أي بس من واجبي دافع عنك.. احميكي
وقف السيارة فجأة على طرف واتطلع بعيونها
شاهين: تاج..صار لازم ترجعي على بيتك.. خلص أنا مارح كفي بهالمهمة
اتطلعت بعيونه بصمت ناطر منها الإجابة
وبعد لحظات بتسأله: وإذا يلي طلب منك يخطفني، رجع وخطفني عن طريق عصابة تانية؟ وممكن يكونوا متل هي ليسا ويأذوني عنجد..شاهين أنا مأمنتلك.. صح هالشي جنون.. أنت خاطف وأنا مخطوفة بس ولايوم خفت وأنت موجود جنبي.. حتى لما خطفوني هدول كنت متأكدة رح تساعدني وتخلصني منهن
سألها السؤال يلي ماتوقعته، خلاها ساكتة لحظات بعدها
شاهين: ليش؟ليش لهالدرجة مأمنة ع حالك معي؟ أنا خطفتك ورميتك بالغابة وضربتك كمان
لما طال صمتها رجع ردد سؤاله: ليش؟
تاج: مابعرف شاهين.. لاتسألني لأنو عنجد ماعندي إجابة..هو شعور جواتي وبس
التفتت للأمام ليلمس طرف خدها باصابعه ،خلاها تطلع بعيونه
شاهين بهمس: شو هو هالشعور؟خبريني عنه..شو هو هالشعور يلي مخليكي مأمنة ع حالك بين ايدين خاطف مأجور.. مابيملك رحمة ولا شفقة ولا حتى ضمير
تاج بهدوء مشابه لهدوءه: سكوت
شاهين: بدي إجابة لحتى اسكت
تاج: مافي جواب.. باختصار أنت مو هيك..يعني مو هاد الشخص يلي خبرتني عنه هلأ..أنت متقصد تظهر بهي الشخصية بس صدقني جواتك مو هيك
#سارة_العلي💙
حست النار عم تولع من شدة الحرارة وحاولت ترجع لأساس موضوعهن لتهرب من تخابط المشاعر يلي جواتهن
تاج: ولهيك شاهين.. ماتتركني وتخليني انخطف من جديد.. أنا صح كنت واثقة رح تجي تخلصني، بس خفت كتير.. والله خفت يأذوني أو يقتلوني.. يقتلوا تاج قبل ماتوصل للي بدها ياه
شاهين باستغراب: وشو يلي بدها ياه تاج؟
تاج: أرجع لنفسي.. بدي ارجع قادرة اكتب شاهين، ارجع لشغفي ورواياتي وأبطالي
تعبها وقهرها بسبب فقدان شغف الكتابة عم يتوضحله يوم عن يوم اكتر ، والموضوع ماطلع بهالبساطة
ولهيك حاول يغير شوي من مزاجها وحكالها: طيب شو بدك احسن من هيك رواية؟
تاج: كيف؟
شاهين: ليكنا نحن.. بتصدقي الشي يلي عم يصير معك؟ بتصدقي أنك تنخطفي وتكوني أنتي وخاطفك بهالمكان.. وهالحوار عم يدور بينكن؟ لا مابتصدقي.. لهيك هو بيشبه الروايات كتير على ما أظن، وبحياتك ماكتبتي شي بهالجنون
تاج: بتقصد الروايات هنن خيال وبس؟
شاهين: هاد يلي بسمعه
تاج: الروايات واقع خيالي.. أو خيال واقعي.. بين هاد وهاد.. يابتغرق بخيالك بالرواية.. أو بتشوف واقعك بعيون كل شخصية فيها
جاوبها بابتسامة دافية: لكن اغرقي بخيالك على أرض واقعي تاج..
عيونه دوبتها نظرته عم تلامس وجها بالكامل وكأنها شعور ملموس
كان قريب منها وعم يتأمل ملامحها.. رسمة عينها ورموشها يلي متمني لو يقدر يرفع ايده ويداعبهن
خدها ومبسمها.. خصلات شعرها يلي ماقدر يقاومهن
رفع ايده ومسح عليهن بحنية اجبرتها لتغمض عيونها وتسرح بخيالها
شاهين: في تراب على شعراتك..
ارتبكت بزيادة لمح كيف لون وجها صار أحمر
تراجع لمكانه مع تنهيدة صدرت منه،وجهز حاله ليكمل طريقه
حكالها: بس نوصل رح ترتاحي بهالمكان اكتر..(بيلتفت عليها) بس بدك توعديني ماتحاولي تهربي هالمرة تمام؟
ابتسمت وهزت راسها بالموافقة
بعد ساعتين وصلوا لهالمكان..قدر ب جهاز تحكم صغير يفتح البوابة وبعد مادخلت السيارة قفله ب نفس الجهاز
شاهين: يلا نزلي
نزلت تاج بهالمكان الغريب.. وبدأت تتفحصه بهدوء
حديقة كبيرة مو واضحة منيح بسبب الظلام يلي حل عليهن لكن باينة أنها مزرعة عبارة عن طابقين
عَمَار مميز وفاخر و حلو.. رفعت راسها للسما وشافت النجوم والقمر بوسط هالسواد عم يلمعوا
وصل لجنبها وهو عم يراقبها بصمت
عنقها المرفوع.. خصلات شعرها المتبعثرة على كتافها ملامحها الهادية ..آثار الدم يلي بقي من الجرح بسبب الحادث يلي صار معهن
ازدرد ريقه وحكالها: تاج.. يلا ندخل قبل ماتبردي
مشيت خلفه بهدوء وفتحلا الباب الخشبي الكبير
شغّل الإضاءة لتتفاجئ من يلي ظهر أمامها
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```