الفصل 8
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *موعد.مع.خاطفي.tt*♥️
*❴🔢❵☟الـــبـــــــــــ❴8️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
شاهين: لاحول ولا قوة إلا بالله انتي مستحيلة يابنت.. مستحيل تفكيرك شو بيروح لبعيد
تاج: أي مو بايدي.. لاني
بيقاطعها وبيقلا: كاتبة.. لأنك كاتبة فهمناهااا
تاج: أي صح والكاتب بيقدر يسردلك مية سيناريو بسبب حادثة بسيطة ومن اتفه مايكون.. حتى مثلاً لو حمل سكين ليقطع فيه قطعة فاكهة بيفكر رح تصير جريمة قتل ممكن على ايديه
شاهين: الله يثبت علينا العقل والدين.. اكتر شي بتمناه تنتهي الأيام يلي رح نقضيها مع بعض على خير وما عقلي يضرب متل عقلك، إلا إذا مرضك بيعدي
بتنظرله بازدراء ليغمض عيونه بعد ماسحب بطانية من طرف الكنبة
تاج: لك رح تنام؟ ليك شاهين انتظرني نام أنا أول.. يعني والله بخاف هي أول مرة منجي لهون
وهو مغمض بيحكيلا: يلي نام بنص الغابة مو صعب عليه ينام بهيك بيت.. طفي الإنارة ونامي
سكت لحظات ومازالت واقفة عم تراقبه.. فتح طرف عينه وحكالها: تاج..مابدنا لعب ولاد صغار نومي خفيف و الباب مقفول تمام؟ بتنامي ومابتعملي أي حركة ومشاكل وإلا هلأ برجعك للغابة
من كلماته بتتذكر الغابة وبترتجف أوصالها للحظة
توجهت مباشرةً للكنبة التانية وسحبت بطانيتها وتسطحت
تاج من تحت البطانية: مابدي الغابة خلص رح نام مابدي أعمل شي بوعدك
بيضحك بصوت مكتوم عليها وبيرجع بيغمض عيونه
بعد مرور ساعة..
ماقدرت تنام.. أفكار كتيرة براسها لتنتهي أفكارها عند حديث معين تشاركته مع شاهين بهاليوم
تاج داخلها: لازم أهرب يعني؟ أي لازم أهرب.. أولاً هو حكاها بتمه المخطوفين كلن بحاولوا الهرب.. تانياً مارح لاقي أفضل من هالفرصة وأنا بمنطقة قريبة عالبلد تقريباً .. لازم أهرب مستحيل صدقه أنه رح يتركني بحالي.. احتمال إذا أمروه يقتلني.. أكيد رح يخلص عليي ومايرفلّه جفن.. قومي يا تالا.. قومي
فتحت عيونها فجأة لترفع البطانية عنها شافت الدنيا عتم بالكامل
قربت منه بهدوء وحذر وهي عم تحاول تكتم انفاسها
لتحس من انتظام انفاسه أنه غفيان
حكت لنفسها: كيف رح شوف طريقي طيب؟
مدت ايدها للطاولة يلي بجنبه لتسحب موبايله وترتسم البسمة على وجها، وترجع تختفي مباشرةً
تاج: بلا غباء مالقيت غير الموبايل؟
رجعته على الطاولة بطرف كاسة المي يلي شرب منها قبل ماينام
ومشيت بخطوات بطيئة وحذرة وقلبها عم تتسارع نبضاته
لتحس الإضاءة بلشت تزداد بسبب ضوء خفيف صادر من نافذة المطبخ يلي كان أمامها إنارة الشارع
الادرنالين ارتفع عندها بشدة لدرجة حست بضغط داخل آذانها
ابتلعت ريقها وتوجهت للحمام، بتتذكر شافت شباك صغير ممكن يساعدها عالهرب
سكرت الباب خلفها لحتى مايصدر أي صوت ضجيج ويصحى شاهين وشغلت الإضاءة
همست: لعما.. هي كيف بدي اطلع منها أنا؟ يعني ماني ناصحة بس مو لهالدرجة والله
استجمعت قوتها وتمنت الحظ يحالفها هالمرة، وفتحت النافذة
قفزت وبمرة وحدة قدرت توصل راسها ليطل خارج النافذة
شهقت بذعر ورجعت فوراً لتسقط مكانها
تاج: ياالله شو هاد؟ مستحيل أوصل للطرف التاني على قيد الحياة أكيد رح اتكسر تكسير
غادرت من الحمام وتوجهت عالمطبخ ك محاولة أخيرة للبحث عن طريقة الهرب
فتحت النافذة يلي كان تحتها تماماً الموقد
تاج: مو وقت التردد.. بسرعة ياتاج
وأول ماتحاول تقفز من جنب الموقد وتشوف الوضع خارج النافذة بتشوف صفائح من القرميد الأحمر على بعد قريب من النافذة وبعدها في مسافة لتقفزها للشارع، وهاد الشي ريحها لما انقسمت المسافة لقسمين
بين التردد والرجفة يلي متملكتها بتسمع صوت بيرعش جسدها بالكامل
صوت قزاز انكسر صادر من غرفة شاهين
شعرت راسها رح ينفجر أثر الضغط يلي حسته وبدون أي تردد بتقفز خارج النافذة لتأصدر صوت أثر سقوطها عالقرميد
..
أما عند شاهين، صحي مفزوع أثر صوت الكاسة يلي وقعت جنبه
ما كان قادر يعرف شو مصدر الصوت سحب موبايله مباشرةً وشغل الإضاءة وشاف اشلاء الكاسة على الأرضية
وجه الموبايل لمكان تاج ومالقيها مكانها ولحظتها بيتحرك بسرعة من مكانه وبيندهلا
شاهين بصوت جهوري : تاج!!
الغضب اتملكه أكيد لو موجودة وسمعت هالصوت كانت حضرت أمامه
سارع خطواته يبحث عنها بالبيت لما اكتشف نافذة المطبخ مفتوحة
أطل برأسه لينصدم فيها واقفة تحت على حافة القرميد ومترددة بالقفز
رجع براسه للخلف و شد قبضة ايده ليتحول وجهه للون الأحمر من الغضب
رفع كف ايده وبيعض على اصبعه ليمنع حاله أنه يصرخ فيها محاول يكتم غيظه
رجع و أطل عليها ونده بصوت خفيف يادوب مسموع لتاج
شاهين وهو صارر على اسنانه: تاج.. لك تاج
كانت عم تقبض كف ايدها وترجع ترخيه من التوتر و أول ماسمعت صوته ارتجفت واتطلعت خلفها بسرعة
شاهين بنبرة تهديد واضحة: إذا مابترجعي حالاً.. اقسم بالله برصاصة وحدة بخلص عليكي
سحب المسدس من طرف خصره و وجهه عليها
شهقت وانفتحت عيونها بصدمة
عرف حركتها التالية وهي الصرخة لهيك بيرفع المسدس لطرف تمه ليأمرها بالسكوت
هزت راسها ورفعت ايديها التنتين للأعلى مستسلمة
بنبرة هادية حكت: خلص أنا بستسلم
غمض عيونه لما شعر بكمية غبائها بعد كلمتها التافهة الأخيرة
شاهين: كيف؟ لك كيف هلأ بدك ترجعي؟ يا الله عالغباء
رجعت تتلفت حوليها لتتأكد من المصيبة يلي وقعت فيها
ناظرته بقلق واضح بعيونها الحزينة: شاهين.. بترجاك ساعدني ليك إذا بنزل لتحت رح موت
مازال مصدوم فيها كيف عم تستنجد فيه مع أنه لو كانت بين ايديه حالاً رح يخنقها ويكتم على أنفاسها وهو متأكد من احساسه
شاهين بغضب مكتوم: ساعدك قلتيلي؟ بدك ساعدك؟ والله لموتك بين ايديي
كانت واضحة ملامحها أثر سقوط بقعة الضوء عليها بشكل واضح، وكان عم يشكر ربه الوقت متأخر وكل الناس نايمة ببيوتها
انتبه لرجفة تمها يلي بدأ يتحول للازرق بسبب البرد وأنفها الأحمر.. ضمت نفسها بايديها ومازالت عم ترتجف
تاج: رح موت من البرد كمان
لمح لمعة عيونها يلي بتحكي كمية البرد يلي حاسسته والخوف
حاول يكتم غيظه وحكالها: استني عندك.. ياويلك إذا بتطالعي أي صوت أو بتنزلي لوحدك
تاج بنفاد صبر: لك يابني آدم عم قلك مستحيل أنزل والله بتكسّر
شاهين: ريتك فكرتي قبل ماتنزلي
دخل لجوا البيت وتوجه على الباب لينزل من المبنى.. كانو بالطابق الأول
وصل لخلف العمارة مكان تاج والشارع كان خالي تماماً حتى القطط مختفية بسبب البرد
تاج:شاهين وينك تأخرت
شاهين: ياربي هالبنت كيف بتفكر؟ لسا عم تستنجد فيني بكل غباء!!
بيغمض عيونه وبياخد نفسه ليهدا بعدها بيرفع راسه لعندها
حكا بهمس وهو صارر على اسنانه: أول شي بتخففي صوتك .. قربي لشوف وقعدي عالحافة
تاج بصدمة: شو؟
عقد حاجبيه بقوة لترجع تحكي بصوت منخفض جداً
تاج: شوو؟ماتقلي أنك ناطرني نط من هون؟
شاهين: بالله جد؟ لكن حابة اطلبلك النجدة لينزلوكي؟
تاج: لك عالأقل جيب سلّم لانزل .. شاهين عم قلك مابقدر
بيسحب نفسه بقوة وبيزفره
شاهين: بلا طول كلام ويلا نزلي رح احملك أنا
بيفتحلا ايديه وكأنه مستعد لنزولها
تاج: أنت واعي؟ ولا لساتك نايم وغرقان بالأحلام؟ ليك إذا ماتكسرت أنا كون متأكد أنك رح تفقد الذاكرة أثر وقوعي فوق راسك
نزّل ايديه والتفت حول نفسه وهو عم يستغفر ربه
شاهين: يا الله على أي ذنب بعتلي هي الانسانة لكفّر عنه؟ كنت ماارتكبته من الأساس أنا
التفت عليها وبنظرة قوية كلها تهديد: عم قول نزلي
ردت بخوف: تمام تمام.. لحظة بس
جلست متل ماخبرها على الحافة وبتستعد
وهو كمان استعد وفتح ايديه وجهز قوته كلها ليستلمها
و فجأة تراجعت
تاج بصوت راجف وحركة رفض براسها: لا شاهين لا والله مارح أقدر
انتبه لنبرتها الباكية وتأكد أنها عم تخفي دموعها بالغصب
مع هيك أبعد قلقه عليها من تفكيره وحكالها بصوت ثابت
شاهين: ليكي والله إذا مابتنزلي لاجيكي من فوق ونزلك بالغصب وبدل ماتوقعي لعندي برميكي لتحت.. يلا لشوف.. واحد.. تنين..
بتحاول من جديد و بترجع بتتردد
تاج: بالله عليك ماتأذيني.. شاهين ليك أنا مابفهم بعترفلك.. وتصرفت غلط.. وماكان لازم خون الوعد يلي قطعته معك و أهرب.. بترجاك ما تعصب عليي اتفقنا؟
نبرتها وكلماتها المرتبكة لامست داخله بدون مايقدر يسيطر على نفسه.. بس بقوته الخاصة منع هالشعور يظهر عليه وبقي مثبت نظره عليها
شاهين: نزلي وبعدها منتفاهم
تاج: طيب بتوعدني ما يصير فيني شي إذا رميت حالي؟
سرح فيها لحظات.. ماعم يقدر يفهمها.. خايفة منه؟ ولا خايفة من وضعها وبدها تأمن فيه؟ واعية لتصرفاتها وكلماتها ولا مجرد مختلة رح تجننه معها!؟
هز راسه بالموافقة وهمسلها: بوعدك تاج
بتغمض عيونها بقوة وبتهمس: يا الله
وسحبت حالها للأمام لتهوي بهالمسافة القصيرة يلي شعرت فيها وكأنها سقطت من اعلى برج
حست وكأن قلبها سبقها للأسفل بعد مااخترق صدرها وغادر جسدها
غمضت عيونها بقوة أكبر وانكتمت انفاسها للحظة لتحس بجسدها بكل قوة ارتطم بحضنه
وقتها بس لما حست بحالها بين ايديه اخدت نفسها عميق وكأنها عادت للحياة
تمسكت فيه بكل مابقي عندها من قوة..ضمته من عنقه وشدت بقبضتها على بلوزته
حس برجفتها ونبضات قلبها المتسارعة
تاج بهمس: ما متت أنا عايشة..ما متت..ما متت
كتم ضحكته يلي مابيعرف كيف اجته بهيك ظرف ليقول: لا اله إلا الله محسستني أنها رمت نفسها من اعلى قمة شي جبل
فتحت عيونها لما سمعت صوته وتأكدت لحظتها أنها بالفعل على قيد الحياة وأنه مافي أي ألم بجسدها معناها ماتأذت
لكنها مازالت متمسكة فيه بقوة
مشي فيها بصمت وهو متوجه لبوابة العمارة وصعد الدرج وهي بحضنه
ماعم يعرف كيف رح يفرغ غضبه فيها وهي بهالحالة..
يلي استغربه اكتر أنها ماكانت وحدها يلي ماسكته بقوة.. وهو كان ماسكها بقوة اكبر
برر لنفسه أنه قوته هي بسبب غضبه منها مو اكتر.. ونكر أي شعور بالخوف عليها لحظتها.. نكر دقات قلبه المتسارعة لما شافها كيف هوت من الاعلى.. و نكر كمان كيف خطفها لحضنه ولما حصل عليها آمنة بين ايديه رجع قدر يلتقط انفاسه براحة تامة
وصل للبيت وأغلق الباب بطرف رجله
شاهين: شرفي نزلي
شدت من جديد بقبضتها وكأنها رافضة تنزل
شاهين: شو عم نلعب نحن؟ عم قلك نزلي
ازدردت ريقها لتحاول تستجمع قوتها وتحكي
تاج: مابدي..
شاهين بصدمة:بالله جد؟
تاج: شاهين مافيني انزل.. بترجاك مابدي
شاهين: وليش يعني؟
تاج: إذا نزلت بدك تهددني بالمسدس.. أو يمكن بالفعل تصوب علي شي طلقة منه.. أو ممكن.. تصفعني مرة تانية
لما ذكرته بالموضوع دايقته كتير ، ويمكن مو منها .. من حاله
لهيك دخل على غرفة الجلوس ونزلها بهدوء على الكنبة وشغل الإضاءة
بقي لحظات ساكت وهي ساكنة مكانها
راح و أجا أمامها كتير وبالنهاية وقف
كان البرد مسيطر عليها بس هو النار يلي جواته بسبب غضبه مانعة البرد عنه
شاهين بكلمات متباعدة: أنا شو قلتلك؟ قلتلك لا تجني صح؟ قلتلك لا تعمليا.. بس أنت شو عملتي؟ أول ما سنحتلك الفرصة ركدتي لتهربي وبكل غباء .. أنا متأكد حتى مافكرتي دقيقة وحدة بالخطة
انتظر منها ترد كـ عادتها بس كانت ساكتة وعم تطلع فيه
شاهين: لك ماعاد تصبري؟ قلتلك باقي كم يوم.. قلتلك مارح أاذيكي طول مالك قاعدة وماعم تتغابي.. بتروحي بتعملي بحالك هيك؟ شو هالغباء؟ انتي مفكرة أنك تهربي بهيك وقت وبهيك منطقة أأمن عليكي من أنك تكوني معي بهاد البيت؟لك إذا مفكرة بالغابة في حيوانات هون كمان حيوانات بشرية أشرس منهن كمان..
لما مابيلاقي منها إجابة بيقرب منها وبيسحبها بقوة لأمامه
المسافة انعدمت بينهن.. وأنفاسه القوية لفحت وجها
عيونها معلقة بعيونه.. وملامح بسمة ماكان منتبهلا ارتسمت على وجهها من العدم
شاهين: إذا ماصحيتي وبطلتي هالتصرفات المعتوهة.. رح اضطر اتعامل معك بطريقة سيئة جداً.. رح اتعامل معك بوجهي يلي ماشفتيه لحد اليوم
ظهرت بسمتها بشكل أوضح لتتحول ضحكة ظهرت بعيونها كمان
انصدم وقتها وماعرف سبب هالضحكة
بقي سارح فيها.. غريق بملامح وجهها القريبة منه.. ريحة شعرها يلي كان متناثر على أطراف اكتافها
حمرة خدودها من البرد ظهرت بوضوح أمامه لتزيد رعشة قلبه وانختمت برسمة شفافها الضاحكة
رافعة عيونها عليه بقوة لتلامس رموشها أطراف حاجبيها كان مشهد ولا بحياته شاهده.. جذب قوي حسه داخله ليقربها منه اكتر
بعد مرور لحظات تبادل معها نظراتهن
صحي وترك ايدها وبعد عنها خطوة للخلف
شاهين بارتباك: شو يلي عم يضحكك؟
جاوبته بعفوية وتسرّع: بعرف رح تقول مجنونة بس رح احكيها.. ماعم صدق شاهين..ماعم صدق كمية الغرابة يلي عم عيشها يلي خلتني حس بأمان بحضن خاطفي
سكت وبقي عم يتأملها.. لحظات طويلة ماقدر يعدها بس بقيت هي مبتسمة.. شوي شوي ارتفع صوت ضحكتها اكتر لحتى تعبت من الضحك
قربت منه من جديد ورفعت ايديها التنين
تاج: خلص فيك تشبك اصفادك بايديي.. أكيد ماعاد عندك ثقة فيني.. أما أنا ف كلي ثقة فيك.. أنه رح ضل آمنة من هون لتطلق سراحي
وقتها بس تأكد من يلي عم يصير..
لحظتها بس اقسم أنه الوضع ماعاد مجرد جنون
هو متأكد من نبض عم يسري بشرايينه.. هو متأكد من هالاحساس يلي ولا بعمره راوده
قاطعت شروده وحكت: شو؟ وين سرحت عم تفكر؟
استرجع قوته بسرعة رهيبة و رفض جميع أفكاره ومشاعره :صح عم فكر.. امشي قدامي لشوف
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```