الفصل 3
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *موعد.مع.خاطفي.tt* ♥️
*❴🔢❵☟الـــبـــــــــــ❴3️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
شاهين: أي غصب.. هنن ماخبروني أنه لازم تموتي..بيكفي تاكلي وقت حاجتك
تاج: مين؟ بس خبرني مين؟ أو أي شي بترجاك..رح جن من التفكير
اتطلعت بعيونه بنظرة استعطاف وعيونها مدمعة.. بقيت ناطرة منه اجابته وماكانت متوقعة منه حرف
شاهين: لو كنتي فعلاً بتعرفي وضع الناس يلي متلي .. كنتي عرفتي أنه مابيصير نعطي أي معلومة.. وأنا بالفعل ماعندي أي معلومة ألك
وما خابت توقعاتها
جبرها تاكل وكانت بكل لقمة تغص بعدت عنه ورجعت لمكانها وهيك كانت باقي ساعات يومها
كان يطلع ويدخل يروح ويجي يستقبل مكالمات وهكذا.. وغاب عنها ساعتين ورجع معه العشا.. وبعدها تعبت كتير من التفكير والضغط يلي براسها ونامت
..
مرّ اليوم و يلي بعده بطريقة مشابهة جداً وبدأت تتكرر اسئلتها بشكل مضاعف وهالشي زعجه
مع أنه باين عليه انسان مابيتحمل بس ماكانت تقدر تسكت ،الخوف خلاها متوترة
قبل بيوم رفضت الأكل إذا ماخبرها أي معلومة.. وهو تعب منها ومن عنادها وتركها بلا أكل.. لأنه مستحيل يرضخ لأمر حدا
ولما جهز الفطور بيوم جديد فكلها ايدها لتجي تاكل
تاج: قلتلك مابدي.. خليني موت من الجوع واخلص
شاهين: كيف يلي خبرني اخطفك ماخبرني أنه عمرك عشر سنين؟
تاج بِـ فخر : أنا ثلاثينية
جاوبها باستهزاء : لا واضح
تاج: طيب ليش كل شوي بتجيب سيرتهن وماعم تخبرني مين هنن
شاهين: مابعرفهن.. ولا شفتهن بحياتي.. المعاملة كلها تمت عن طريق اتصال.. والمبلغ اتحول ل حسابي بالبنك.. شو بدك تعرفي اكتر؟ سكتي ولا عاد تسمعيني صوتك.. وحتى أكل ماتاكلي بيكون أفضل
تاج بِتمرّد: بدي احكي.. مارح اسكت.. بدي اعرف لايمتى خبروك لازم ابقى عندك؟ وأديش الفدية يلي رح يطلبوها.. من حقي أعرف
بيتطلع فيها بسخرية: بتحبي اطلبلك محامي كمان؟
بيهز راسه وبيرجع بيسحب الطاولة ليبدا ياكل
وقفت على رجليها وهي عم توجه اسئلتها وكلماتها الغاضبة بالوقت يلي ماعاد يخاطبها أبداً ومشغول بوجبته
تاج بغيظ: عم حاكيك رد عليي.. لك اتطلع فيني
بتتلفت حوليها لتشوف كاسة المي يلي بجنب السرير بتسحبها بقوة وبترميها لتتناثر أشلاء الزجاج بصوتها القوي يلي مرافق صرختها المفاجأة
رفع نظره باتجاهها مصدوم.. لحظات لاستوعب شو عملت.. أخدت انفاسها وهي عم تطلع فيه بالوقت يلي اتحول لون وجهه للأحمر.. ونظرته بتدل على غضب قادم منه
بتزدرد ريقها وبتحاول الثبات ، ليرتجف جسدها و بيرتد للخلف أول مايقوم من مكانه دفعة وحدة، مابتلحق تشوف حركته وهو عم يسحب شي من خلف ضهره ، إلا وبتسمع صوت سلاحه وهو عم يجهزه للإطلاق وبيرفعه باتجاه وجها
بتفزع مكانها لينفتحوا عيونها وتمها بدون وعي وبتتراجع خطوة تانية للخلف
بيتخطى الطاولة يلي أمامه وبيمشي بهدوء ومازال موجه السلاح بوجها
حكالها بنبرة تهديد: إذا رح تضلك هيك.. مابتفرق معي وبعمل فيكي يلي بيحلالي.. مو وحدة متلك يلي بتتصرف أمامي هيك تصرف عم تفهمي؟
بيقرب منها السلاح ليلكزها على كتافها فيه
بتشهق بصوت مسموع لتحس بهبوط رهيب رافق جسدها ،بيختل توازنها و بتفقد السيطرة على جسدها
شافها عم تهوي أمام عيونه مرتطمة بالأرضية ومازالت الصدمة مسيطرة عليه
بيتطلع فيها بضيق : لا حول ولا قوة إلا بالله.. قومي من مكانك خلصيني.. حركات التمثيل هي مابتمرء عليي
لحظة ورا التانية بدون ماتجاوبه بحرف بينزل لعندها وبيهزها
شاهين: أنتِ !! ليش ماعم تردي؟ عم قلك وقفي هالمسرحية حالاً
بيتردد لحظات وبينطق باسمها بعدها : تاج!!
بيحس الوضع كان حقيقي .. لما ماكان في إجابة منها أبداً
بينحني فوقها اكتر ليسحبها لحضنه ويرفعها بين ايديه
نفس عميق أخدته لتكمل تمثليتها عليه .. كان الحل الأنسب بالنسبة ألها لحظتها ليشيل هالسلاح من أمامها
بس ماتوقعت يلي صار
ريحة عطره غلبتها .. وجودها بين أيديه ترك أثر غريب فيها.. بينزلها بهدوء على السرير و بيروح ليجيب مي
وبيمسح وجها فيها
شاهين: ياربي هالمجنونة رح تجنني عن قريب.. أنا شو يلي جبرني ارجع للشغل وانبلا فيكي بس أفهم!
قدرت تهرب من الشعور يلي تملكها ورجع الخوف يسيطر عليها.. كيف رح تقدر تعمل حالها صحيت من الاغماء؟ كيف رح تقدر تقنعه
بدأت بأنها تحرك عيونها بخفة وتصدر أنين من حنجرتها وبالفعل بدأت تحس بألم اعلى أيدها وراسها
وقتها تأكدت أنها بالغت بالتمثيل ورمت حالها بقوة على الأرض
لما شافها عم تستعيد وعيها تركها وبعد عنها
لحظات وبدأ يسمع آهاتها
تاج: ااخ يا راسي..أنت؟لك أنت شو عملت فيني؟ ضربتني؟
شاهين بتململ:عُدنا
بيتركها عم تحكي وبيطلع برا الغرفة ليريح راسه
بتضحك بصمت لما تشوفه غادر الغرفة حاسة بالانتصار لأنها قدرت تخدعه
بعدها سرحت بخيالها وهي عم تفكر بيلي صار
تاج لنفسها: أول مرة بعرف أنه الخاطف بيهتم بنفسه ولباسه وكمان ريحة عطره عشنا وشفنا
…
ليلتها رجع شاهين بعد ما غاب كم ساعة ومعه الأكل
وأول مادخل وعرفت شو حامل بالأكياس زفرت بغضب
تجاهلا تماماً وحط الأكل على الطاولة
تاج: أي؟رح نقضيها هيك يعني؟بس نام وفيق و ناكل؟
جاوبها بإزدراء: بتحبي آخدك عالنادي مثلاً؟
تاج: بقصد يعني مو طبيعي هيك.. الملل بيقتلني هيك.. ليك أنا كاتبة،ولازم امشي واطلع وشوف العالم لحرّك خيالي.. بترجاك أنت هيك عم تقتلني
اتطلع فيها لحظات ورجع لصمته
تاج: لايمتى طيب؟
شاهين: لبينما يتصلوا ويطلبوا اتخلص منك وارتاح
تاج بصدمة: ترتاح؟ لهون وصلت معكن؟ بدكن تقتلوني؟
شاهين: لا ارتاحي أنا خاطف مأجور وبتوقع ياكاتبة ياعظيمة بتعرفي الفرق بين القاتل المأجور والخاطف
ردتله: عم تستهزء من جديد؟
شاهين: لا بس يعني عم حاول حاكيكي بالطريقة يلي مخك بيستوعبها
سرحت فيه وحكتله : على فكرة.. أنت بتشبهن كتير
شاهين: مين؟
تاج: الأشرار يلي بِـ رواياتي.. أكدتلي أني أبدعت بوصف هالشخصيات.. لأنو بيشبهوك بكلشي
شاهين: منيح كتير.. إذا خلصتي تعالي كلي
بتاخد نظرة على الطاولة
تاج: لا لا.. مابحب المشاوي
بشاهين: أي بس ماعم أطلب رأيك.. تعالي خلصيني ناقص تتشرطي عليي كمان
بيقرب وبيفكلا أيدها
تاج: شو رأيك نعمل اتفاقية بما أنه مو معروف ايمتى رح نخلص من بعض؟
شاهين: اتفاقية شو؟
بيحاكيها وهو عم يفتح باقي العلب ويبدا ياكل
تاج: أنك لاعاد تقيّد أيدي ليك بوعدك مااتحرك.. بس والله أيدي وجعتني من التربيط
شاهين: مو مشكلة اليوم بربطلك الجهة التانية
تاج: جد؟ هاد الحل برأيك؟
شاهين: بتسمحيلي آكل بدون ازعاج لو مرة وحدة ؟
بتزدرد ريقها باحراج وبتبدا تاكل بهدوء
استغرب سكوتها وكان ملاحظ ماعم تاكل غير السلطة
بس ماحب يكسر شرودها لأن ارتاح من صوتها وكمّل أكله
كانت سارحة تماماً وللحظة رح يحسها بعالم تاني.. مد أيده ليشرب مي وقعت الكاسة فجأة لتهز راسها تاج بخوف
تاج بنبرة قوية: شو صار؟
شاهين: ماتكبري الموضوع وقعت المي ماصار انفجار
حكت بغضب: أنت..لك أنت.. بتعرف شو عملت؟
شاهين: سكبت المي على الطاولة!!
تاج: لا.. أنا كنت على وشك امسك الخيط .. ياربي لك كنت عم حاول شوف أي فكرة بخيالي لارجع انسج فكرة رواية براسي… وأول ما أوشكت أني انسج بخيالي حطمتني
شاهين بصدمة: اوشكتي؟ و حطمتك؟؟ ممكن بيكفي سخافات؟!
تاج: ياربي لسا بيقلي سخافات.. ايمتى رح تفهم أنه يلي أمامك..
بيقاطعها لما يقلا: كاتبة.. خلصنا ..سكري تمك
تاج: تماماً كاتبة.. يعني بعيش وبتغذى على الأفكار والخيال.. وأنت سحبت كلشي مني
بتطلع فيه وهو ساكت بتحسه مافهم شو قصدها
تاج: طبعاً مارح تفهم الشعور يلي عم أوصفه لأنك عديم مشاعر
بيخبط على الطاولة لتتحرك بمكانها أثر خوفها
بيكز على اسنانه وبيحكيلا: قصري لسانك
بتبعد نظرهها عنه لحظات ليفاجئها بكسر الصمت يلي بينهن بعد لحظات
شاهين: الموضوع مو أنك تتغذي على الشي يلي بتعمليه.. الموضوع بيصير إدمان صح؟
تاج: عفواً؟
شاهين: إدمانك عالكتابة والتفكير مثلاً.. هالادمان هو يلي عمى عيوني وخلاني اخطفك
تاج بفرحة: يعني أنت خطفتني لأنك معجب بكتاباتي؟
بيجاوبها بتململ: على فكرة أنا بحياتي ماسمعت اسمك حتى كون معجب.. فتحيلي مخك شوي
بترتسم ملامح الخيبة على وجها ليكمّل كلامه: أنا من سنين وبشتغل خاطف.. وبصراحة اكتر ، حتى مصاري ماعاد يلزمني.. يعني مأمن كل احتياجاتي لسنين طويلة كمان.. بس ادماني على شغلي وحُبي أله جبرني دوّر على شي مصيبة متلك واخطفها
بتبقى سارحة فيه مصدومة من كلامه.. وقتها اتمنت لو بقي ساكت وماحكى يلي جواته وخلّى الفضول فيها يزيد
رجعت لمكانها بعد مارتبت المكان بأمر منه.. وتسطحت مكانها
بتغمض عيونها وبصعوبة عم تحاول تشغل حالها بشي ينسيها المصيبة يلي هي فيها.. وبدأت تسبح بخيالها
فجأة بتحس بلمسة ايده على كتفها.. كانت لمسة حنونة لبينما هزّها بقوة فجعها
تاج بعصبية: شو هاد؟ خوفتني
شاهين: بدي نام.. تفضلي روحي عالحمام لحتى ترجعي وتنامي انتي كمان
تاج: بالله جد؟
شاهين: لك خلصيني
بيسحبها بقوة من مكانها وبيطلعوا لبرا
تاج: ااخ لك .. ياربي رح أجمد.. المكان بارد كتير
شاهين: ركدي لكن لتوصلي أسرع
بعد وقت قصير رجعها على سريرها وربطلها ايدها وهي عم ترجف من البرد تحت البطانية
بيطفي الإضاءة ليسود الظلام بالمكان
تاج: شاهين؟ نمت؟
شاهين : لا .. شو بدك؟
تاج: كل يوم بصحى مابلاقيك.. فيك تجبلي شي من السوق إذا لسا مطولة عندك؟ بحاسبك عليه بس ترجعني بالسلامة لبيتي
بيخفي ضحكته والظلام بيساعده على هالشي ،ومابيعرف شو السبب يلي خلاه يرد عليها
شاهين: شو بدك؟
تاج: دفتر ملاحظات صغير وقلم
شاهين: ليكون مفكرة زمن الحمَام الزاجل لسا مستمر وبدك تتواصلي مع عيلتك؟
تاج: قولك بتظبط؟
حكالها بتعب: نامي نامي
كمّلت بترجّي: بترجاك.. بوعدك ما اطلب شي تاني
شاهين: أنتي عم تنسي أنك هون مخطوفة؟
تاج: طيب مو مشكلة كرمال السمعة بس
سألها باستغراب:لك سمعة شو؟
تاج: سمعة الشغل يلي ألك.. بالنهاية رح قول للناس أنك خاطف خمس نجوم وخلي الكل يتمنى ينخطف
شاهين: صبرك يارب… سكتي ولاعاد تسمعيني صوتك
تاج: هاه مشان هيك عم قلك جبلي الدفتر مشان اكتب وماتسمع صوتي
ختم حوارهن بعصبية: نامي.. خلص ناااامي رح جبلك بس نامي وريحيني
ابتسمت بصمت وغمضت عيونها لتنام أو يمكن تغرق بخيالها
فجأة
قاطعها أصوات غريبة من برا.. بعدها تذكرت أنها بغابة وطبيعي تسمع هيك أصوات
بتهمس: كيف ؟ غابة؟ وحيوانات؟ أكيد يعني حيوانات مفترسة!! بس هو معه سلاح يعني بيقدر يحمينا.. بس! معقول يفوت دب علينا
بتوقف مكانها بدون ماتقدر تتقدم بسبب ربطة ايدها
تاج بهمس: شاهين؟
بيقرب صوت عواء الذئاب بزيادة ليرتعش جسدها بالكامل
بتزدرد ريقها وبتصرخ: شاهين
بيفزع مكانه وبتسمع صوت سلاحه الحديدي وكأنه عم يجهز لأي مداهمة
شاهين: شو صار؟
بيشغل الإضاءة فوراً بيلاقي وجها أصفر من الخوف
شاهين بقلق: شو صار؟ فيكي شي؟
تاج بصوت راجف:في .. في ذئب .. في حيوانات برا
بدأ الغضب يتسلل لقلبه وهو عم يحاول ينظم أنفاسه قبل مايفقد السيطرة
بتنتبه لنظراته وقبل مايعصب بتكمّل بنبرة استعطاف: بترجاك ياشاهين.. بترجاك تخيل حالك مربوط بهيك مكان مخيف.. فكر شوي أنا مافيني أأذيك ولا أهرب.. ليش لتعمل هيك؟ متل ماأنا وثقت بكلامك لما قلتلي مارح تقتلني وأنت وثاق مارح أعمل شي.. بس فكلي أيدي.. ماعم اتحمل كون مربوطة ويفوت علينا شي حيوان مفترس وماأقدر اهرب.. يعني
بيقاطعها بعصبية: لك خلص.. خلص سكتي.. ابلعيه للسانك بلعيه
قرّب ليفكلها ايدها وهو عم يتمتم بكلمات مُبهمة
اخدت نفس عميق وارتسمت بسمة على وجها
مع أنه الإضاءة خفيفة بس انتبه لهالبسمة الملفتة.. يلي لو كان شاهين صريح شوي مع نفسه.. رح يعترف أنه بسمتها شفعتلها
بيلتفت لمكانه وهو عم يقلها بنبرة تهديد: ياويلك تكرري حركتك هي.. بحلفلك مو بس بربط ايدك .. بسكر تمك وبكتم نفسك كمان إذا حابة
تاج: خلص بوعدك ماعاد صحيك بصراخ.. بس سؤال أخير
بيزفر نفسه بتعب: خير؟
تاج: يعني.. في احتمال الحيوان يلي عم يصيح برا.. يهجم علينا؟
بتطلع حوليها تاج عهالغرفة يلي البرد والريح خلاها تتئاكل
شاهين: ماتقلقي..مارح يكسروا الباب ويفوتوا.. بعدين معي سلاح بلحق انقذك
تاج بابتسامة : شكراً ألك
بترجع لتتسطح وقتها بتفكر بيلي حكته.. عم تشكره؟؟؟ عم تشكر خاطفها؟
تاج بهمس: أنا عنجد غبية .. فقدت عقلي أكيد.. لك كيف عم أوثق فيه أنه يقدر يحميني؟
بعد وقت طويل من التفكير بتغفى وهي ضامة البطانية بقوة بسبب البرد
…
ساعات قليلة وبيصحى شاهين عند الفجر بيجهز حاله ليمشي بس قبل مايطلع بينتبه عليها مو طبيعية
بيقرب منيح ليلاحظ من لون وجها أنها بردانة
شاهين بهمس : هي آخرة الناس يلي مقضينها بالبيت جنب الدفاية.. حتى تحت البطانية مو قدرانة تدفى
بيسحب بطانيته وبيرميها فوقها بشكل عشوائي وبيطلع من الغرفة
بعد مرور ساعتين بيرجع.. توقعها صحيت بس هالمرة كانت غاطة بنوم عميق
بيرمي الدفتر الصغير والقلم جنبها على السرير وبيرجع لمكانه
همس بانزعاج: لا آخدة راحتها مظبوط.. أكل وشرب ونوم.. وطول الليل نق نق نق براسي
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```