طفلتي اليتيمه - *بارت57* *ليلة من فبراير* - بقلم لا اعلم فقط ناشره | روايتك

*ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ https://whatsapp.com/channel/0029Vb5nySH77qVOUYY2kt3M *البارت57* *ليلة_من_فبراير* ☆☆ ☆ ❤️ نهاوند ـ اخذت الصوندة وكمت اغسل الطرمة ظهرية والجو حار يشوي وعركانة ومكفشة والدشداشة مسحولة بالمي و من ذيالهه غركانه اخذتهه من الباله بس شوي طويلة عليه عفت نغم تغسل مواعين بالمطبخ واني علئ الطرمة.. اوف يالبزونة ميعجبهة اتوصخ غير بالطرمة شارع شطولة وشعرضة عايفتة وجاية هنا ماحس الا باب الخارجية انفتحت ودخل ياسر وصفن عليه واني هم صفنت عليه والصوندة بيدي وبقمة البهذلة حالي ردت ابجي من الفشلة صخااام .. من فشلتي اتربعت وكعدت بنص الطرمة وتبللت من فوك ليجوة وكالبة خلقتي اريد ابجي ـ هاي شدسوين نونة كومي ـ ياكوميي عزاا بعيني بلة شجابك هسسة ـ ههههههه الله اشلون استقبال حلوو ـ عفية يعني عفت ايام الله كله وماجيت الا اليوم املخ روحي هسة ـ ليش اشنو صاير ـ وتسأل اشنووصاير ـ زين ليش دتبجين يمعودة ـ من ضيمي… ثنئ رجليه وكعد يمي ـ ههههههههههههه هاي بمكان متكوليلي الحمد لله علئ سلامتك تكولين شجابك يعني اشلون متريديني اجي ـ والله العظيم طول هذيج الايام جنت امشط شعري واطبخ واتعب روحي وتالي متجي الا بهاليوم اللي لا طابخة بي ولا غاسلة ـ ههههههه اولا اني احب النواشف مو الا طبخ وثانيا يعني شكلج زوين ينطلع بي ـ كمت ابجي مثل الجهال .. وتقلدد عليه همين ـ كافي يمعودة لاتبجين والله حلوة ينطلع بيج ـ وتكلي ينطلع بيج لحكييني يمةة لاتقلد علييه يااسر ترة راح انجلط ـ يووو عليناا .. هااا اهااا اني هم تربعت وكعدت يمج بنص المي بعد شتريدين ـ ياا هاي شسوييت تتبللت كووم شوف شصار بيك ـ حتئ لا تبقين تبجين شوفي اني همين انلاصيت بالمي مثلج ـ انت بس طب لبيتك الله يخليك لان صرت مثل خركة المسح مبللة من فوك ليجوة ـ ههههههههههههه شكد جنت ضايج ودايخ من الطريق خليتيني اخرب ضحك علئ سوالفج ـ كافي حباب ادخل لبييتك يمعود ـ اوك اوك بس لاتعصبين راح ادخل واخذي راحتج.. قبل لا اكوم اجتي لحونة تركض وزحلكت بالمي ولزمتهه ووكعت اني وياهه بالطرمة ... الله الله ووولج كان تكسررتي ـ عمووووو اشتااقينالك ـ حبيبتي عمو والله اني همينا اشتاقيتلج وجبتلج حلويات التحبيهه كووما صبا ـ هاي شنو عمو ياسر هنااا نهاوند ـ اجتي صبا والحان كمزن بحضن ياسر يسلمن عليه اخذن الصوندة مني وكامن يلعبن بالمي هو ممنتبه عليه ديضحك وياهن استغليت الفرصة وكمت ارتب بكذلتي المكفشة اخذ مي من الكاع واصفط بيهه خرب حظي انوب الكفشة جنه صوف الطلي شجاني وما مشطت وترتبت اليوم باوعت خيالي بمي الكاشي عزة شنو هاي شلون طالعه اني والمجدية نفس الحال.. نغم ـ يا عزة عمو ياسر ليش كاعد بنص المي ـ غير حارة وتسمط واحد يبرد جسمو بهالمي البارد.. يلة خلي اغير ملابسي لان جبتلكم حلويات خاف تموع كمت فتحت الباب اريد ادخل وصاحتلي ـ ياسر ـ التفتت عليهه وكلتله ..ها ـ الحمد لله علئ سلامتك ـ ههههههههههه بعد وووكت يمعودا ـ روح مو صوجك صوجي اني اتحمدلك بالسلامة ـ لا يمعودا لاتزعلين الله يسلمج تسلميين غالية دخلت وسديت الباب اشتاقيت لبيتي صارلي شهرين ماشايفو خليت جنطتي وراسا دخلت للحمام سبحت نهاوند ـ اول مادخل بيتة ركضت سديت الحنفية وعدل للحمام سبحت وتعدلت وطلعت اطبخت تشريب دجاج وتمن علئ السريع وكليت الدجاج بالدهن وخليته علئ التمن نغم ـ ولج اشو خلصتيهه براسنة تكلا بتيته وطماطة وهسة طابخة تمن وتشريب ـ الولد صارلة شهرين عايف بيته شتريدين اوكلة طماطة مكلاية ـ هم صدك خطية ـ يلة هاج اخذيلة الصينية خلي يتغدة .. راحت نغم شايلة الصينية وفتحلهه الباب واخذهه منهه وضل يسألهه عن الحان وصبا وشلون بقينة هنا لوحدنة خو ماخفنة و من هالحجي بقيت خاتلة ورة الباب واسمعله شكد اشتاقيت لصوته هسة رجع الحياة لهلبيت جان اظلم وكئيب هسة نور المكان وزارتنة الفرحه .. اشرت لنغم حتئ ترجع لان هاي متصدك تسولف تبقئ ساعه وساعتين تنسئ نفسهه رجعت نغم واخذت الحان وصبا سبحتهن ونامن من كفخهن هوئ المبردة وية العصر راحت نغم جابت الصينية وطلعن البنات يلعبن بالطرمة جنت بالمطبخ اشتغل وطلع ياسر من بيته شايل علاكة بيهه حلويات وانطاهه للجهال يعرف نقطة ضعفهن الحلويات بقئ يلعب وياهن لازم الحبل وية صبا ويفرون بي ولحونة تكمز بدن النسوان يجن للبيت يشوفن الباله خطية من شاف النسوان راسا طلع وعافنة اليوم بعت هواي الحمد لله حتئ هواي وجوه جديدة اجتي ماشايفتهه قبل اشترن ملابس ومواعين مكياجات الئ ان صار الليل يله سديت الباب بس ياسر بعدة مارجع اعتقد راح يم اميل او لمحلة ما اعرف… ـــــــــــــــــ اميل ـ هواي اتاخرت هالمرة ـ هية صارت مناسبة ورة مناسبة منهه شهر نيسان واحتفالاتو وعرس ابن عمتي بشهر الخامس صادف فبقيتو هناك ـ اي وشنو قررت يا ابو الكلفات ـ شقرر.. هو يبقئ الوضع علئ ماهو عليه ـ وتبقئ تحبهه؟ ـ عاد الكلب سالفتو سالفة يعني شأسويلة ابدلو بقندرا مثلا ـ خليهه تشيل يمعوووود نشوفلهه غير بيت تشيل بيي بس مو يمك ـ اميل شبيك هذني بس بنات والله خطية خليت خواتي بمكانهن اشلون يعيشن لوحدهن هيج ـ وانت مكلف بيهن ـ مو مكلف .. بس غيرتي ما تخليني اذبهن بغير بيت يعني منو يكول اصحاب البيت يصبرون علئ ايجار اذا اتاخر منو يكول اولادهم عدهم غيرة يجوز يتحرشون بيهن وهية جبيرتهن بعدهه صغيرة وقاصر.. ـ ويمك نفس الشي .. انت بديت تحبهة وهية همين نفس الشي ـ بس مستحيل أذيه.. اشنو ماتعرفني يعني ـ اعرفك .. بس اذا تبقئ كبالك راح تحبهه اكثر ـ دايس علئ كلبي منا وهيج ارجع لنشاطنة النهار كلة بالشغل وبس بالليل ارجع للبيت اتعشئ والف راسي وانام.. ـ زين مناوي تسوي ورقة ايجار تثبت هية مستأجرة منك ـ المختار مو سكت ؟ شكو دنفتح هالدفاتر علينا اليعجبة يصدك هية مستأجرة اهلا وسهلا والمايعجبة يطخ راسة باكبر حايط ـ براحتك .. بس العلية حجيت ونصحت مو كرها بيهه ولا عندي شي وياهه حتئ اكرهه بس يا اخي واحد يتجنب المشاكل عليمن هالمصايب تجيبهه لروحك ـ ماكو شي ان شالله انت بس لاتضل شكاك وقلقان هية تعمر .. ـ ان شالله ـــــــــــــــــــــــــــــــــــــــــــــــــــــــــــــــ نهاوند ـ مرة الايام عادية ماكو شي جديد اني وياسر نتعامل كأنو اخوان مو اكثر بس البكلب يبقئ بالكلب دائما نحاول نتجنب بعض يعني حتئ مننجمع بمكان واحد لا بطرمة ولا من اطلع للسوك قللت روحاتي لبيت خالة ام اميل خطية هية تجي تسير عليه وية نورا بس اشلي ابد متجي للبيت طخت بعقلي اخابر خاله ام عمر هواي اشتاقيتلهه طلعت التلفون القديم وخابرتهه سلمت عليهه خطية جانت كلش مشتاقتلي ـ بنت الحلال بذكرج تدرين شكد اني وكميلة نذكرج بخير بس كلت ماخابرهه خاف اضايقهه ـ لا عادي خاله ليش اتضايقني ـ هسة انتي شلون عايشة خواتج شلونهن ـ الحمد لله علئ الله انتو شلونكم ـ هالايام ان شالله زواج عمر ـ بالخير يارب ان شالله زواجه الدهر ـ يوم الـ الج حبيبتي بشريني شلون احوالكم ـ لا تخافين عليه ادبر نفسي والحمد لله شخبار اهل ابوية ـ يووو بعدج تحنين الهم ـ لا ايع بس فضول والله مو اكثر ـ جيداء طرحت قبل فترة وابو اسلام رجع لكندا علئ اساس يريد يرجع للعراق ومرتة ماقبلت كلتلة ارجع لوحدك وناصر كلش ذبلان علئ ابنة تشوفي بهالجم شهرر عبالك كبر عشر سنين ارشد همين مهموم علمود بناته وشكلة متغير ـ يعني مارجعوهه لجيداء ـ لا وين عزة عمهه ابو رجلهه دكلهم طبل هنا فضحهم بالمنطقة ـ مو كلت شعجب مديخابروني ويدزولي رسايل تهديد ـ لان ملتهين بمصيبتهم الثانية ـ خير شنو ـ تعرفين عم ابوج سهيل داز عليهم يريد حصته من البيت وهو الة نص البيت كلهم لو تتشرون حصتي لو ابيعهه للغريب وهذول لاعدهم فلوس يشترون حصتة ولا يريدون الغريب يدخل بنصهم وحايرين ـ اي حيل ـ لا لاتشمتين خاله ميصير الشماتة ـ الله لا يرضئ عليهم السوو بينة مو قليل ـ العفو عند المقدرة وهسة انتي عايشة بخير وية خواتج عوفيهم بحالهم ـ جان همة عافوني بحالي من جنت يمهم .. لو ابقئ اشمت بيهم والئ ان اموت.. بقينة نسولف اي وخالة عن جنتهه المستقبلية طلعت جا يحبهه عمر واخذهه .. الله يسعدهم شكد حلو ـ يوم الج ان شالله ـ الله كريم.. يلة خاله اترخص منج ـ لاتكطعين بية نونة دائما خلي نتخابر ـ ان شالله خاله يلة مع السلامة… مرة الايام وصار شهر الثامن وجمعت اتقريبا 400 الف دينار ماكدرت اجمع اكثر لان اشتريت كنتور صغير للملابس ووشوي شغلات ضرورية لخواتي اخذت والي كلت هالفلوس من يرجع انطيهيا ويعتبرهن ايجار البيت يحسبهن من يوم الكعدنة هنا .. تقريبا بشهر الثالث كعدنة هنا ويبقئ عليه الباقي دين… راجع للبيت بالليل اخذت الفاوس وطلعت يم الباب .. هلو ياسر ـ هلو نونة شنو بعدج كاعدة ـ مو ما اكدر اشوفك بالنهار كلت انتضرك ـ ليش خير صاير شي ـ لا .. بس هاي 400 الف مالت الايجار من شهر الثالث كدنة يمك والباقي دين ـ خليهن بعدين ـ الله يخليك اخذهن اني اصلا ماعرف انت شكد تريد ايجار ـ مو دكلج خليهه بعدين ـ ياسر لذا صدك تعتبرني اختك وتخاف عليه اخذهن.. خليني احس اني وخواتي مو عالة عليك ـ اوك .. راح اخذهن لانج ابد مو عالة عليه.. ـ اشكرك.. بس شكد بعد تطلبني يعني شكد الايجار ـ حاليا راسي يوجعني نونة خلينة بعدين نسولف .. ـ اوك .. يلة تصبح علئ خير… طول هالايام يطلع ياسر من الفجر ويرجع نص الليل .. حتئ لا نتشاوف مرات اكو شغل قوي وبيع خير من الله ومرات حتئ لو افتر علئ الناس مو كلش الرزق قوي جنت طالعه اشتري من المحل اليمنة ريوك النة وشفت ياسر راجع بس مبين عصبي وشكلة مو طبيعي عاقد حواجبة وعينة حمر وينفث هوئ بعصبية حتئ ما شافني اخذت الريوك ومشيت وراه ف تح باب البيت وركعهه بوجهي يمكن ماشافني او ماسمعني ما اعرف فتحت الباب ودخلت وية دخلتي ركع باب بيتة بوجهي همين ركع عجيب هاي شبي .. وكفت يم باب البيت صحتلة ياسر شبيك صاير شي بس ماجاوبني ابد.. دخلت لبيتنة خليت الريوك بالثلاجة ورحت خابرتة بس ميقبل يجاوب عليه .. مالحيت عليه هو بعدين يهدئ ويحجيلي شنو صار بس بقيت قلقة ليش هيج عاملني خاف مل مني ويريدني اطلع من بيتة حقة والله لا ايجار مثل البشر ولا هو ماخذ راحتة احسن شي ادورلي علئ بيت صغير اكعد بي خطية صار كم شهر مضايقته هم حقة يريد بيتة ... ولو شلت هم وين اشيل ووين اروح وخاف يطلع بيت مسكون مثل هذاك الاجرناه جنت بالمطبخ اسوي العشة لخواتي وطلع ياسر تقريبا ورة نص ساعه من رجعته لمحت طلع يركض من البيت .. عجيب هذا شبي اجئ عصبي وطلع يركض .. صار ثاني يوم تقريبا بالعشرة ونص كعدت من النوم دكيت باب ياسر ماكو ماحبيت اخابرة وافرض نفسي عليه تريكنة اني وخواتي واتصلت علئ بيت خاله ام اميل لان صارلهه اسبوع تقريبا ماجاية عليه كلت اطمن عليهه وهمين بلكي تعرف شبي ياسر ليش هيج مكلوبة حالته .. خابرت علئ تلفونهه مرتين بس بالمرتين تنطيني رفض استغربت ليش ترفض المكالمة معقولة زعلانة مني هي همين.. عزااا والله مسويت شي ليش الكل زعلانين ومحاجوني باوعت صارت ساعه 11 الصبح يعني مو نايمة خاله هالوكت .. يلة بنات غسلن وجهجن والبسن دنروح لبيت خاله ام اميل نغم ـ هسة؟ ـ اي هسة ـ الدنية صبح ومابية حيل اتحرك ـ اريد اشوف شنو صاير ـ ليش شكو ـ لو ادري شكو ليش اروح كافي حجي وكوومي ـ مابية حيل اطلع والله راسي يوجعني والجو حار عوفيني اني وخواتي وروحي انتي ـ شلون اعوفكم لوحدكم ـ قابل شكو علينة نقفل الباب ونكعد ـ اوك .. اخطف رجلي يمهم وارجع ما اتاخر والباب ابد لاتفتحيهه لاحد حتئ لو نسوان يريدين يشترن باله ممنوع تنتفح ـ لا ما افتح هسة نروح فوك نتفرج علئ التلفزيون ـ اوك .. لبست علئ السريع وطلعت اركض من البيت دكيت الباب طلعتلي نورا .. تبجي ووجهه تعبان عزا شنو صاير ياستار شبيج ليش تبجين خاله وين ـ هلو نونة تعالي دخلي الشمس حارة ـ دخلنة للبيت واني احجي وياهه اتصلت عليج متردين واتصل علئ خاله تنطيني رفض عفية شنو صاير زعلانين مني بشي ـ خالتج مريضة اخذوهه للمستشفئ البارحه بالليل ـ عزاااا واني اكووول ليش صارلهة اسبوع مااكو شنو شبيهه الف سلامه عليهه ـ البارحه صارت مشكلة كلش كبيرة بين اشلي واميل وهذا لزم اخته وضربهه عاد هية متحملت ووكعت من ورة المشكلة وانوب لا ايد ولا رجل تحرك واخذوهه ركض للمستشفئ ـ علئ شنو اتعاركو شنو صاير ـ شنو معقولة متدرين بالصار ـ لا.. شنو صار؟ ـ ياسر ماحجالج ـ ليش هو اني اشوفه لياسر يطلع من الفجر يرجع لنص الليل شنو صاير فهمني نورا ـ خاله قبل اسبوع عرفت اشلي تحب ياسر ـ واذا عرفت تحبة قابل شمسوية خطية ـ شنو شمسوية جرت وراهة مصايب يابو مصايب ـ مو لهل درجة ترة هية بس حبته مسويت شي وياه ليش تحجون عليهه ـ لا انتي اضاهر صدك ياسر كلشي ماحاجيلج ـ مو كلتلج يطلع الفجر يرجع نص الليل ومن اخابرة يكلي عندي شغل ـ اسمعي لعد ـــــــــــــــــــــــــــــــــــــــــــــــــــــــــــــــ فلاش باگ……… قبل اسبوع ياسر ـ جنت بالمحل مالتي ويمي الشلة كلهم عدا اميل رايح يجيب غدة النة.. اجتني رسالة علئ التلفون كلت هاي اكيد من الشركة فـ مافتحتهة .. بقينة نسولف اني والشلة ونضحك شوي وبدة رقم غريب يدك مسكولات عليه واول ما افتح خط واجاوبة يسدو بوجهي رديت اتصلت علئ هالرقم يدك و ماكو جواب .. عجيب منو هذا ابتعدت عن اصدقائي وفتحت الرسايل شفت نفس الرقم مراسلني ـ كل هاي السنين واني كدامك لاشفتني ولا عبرتني من طفولتي اتعلقت بيك وحبيتك من جنت انت واميل تطلعون وعلئ البايسكلات تفترون بالمنطقة من جنت العب كبي نو وية بنات المنطقة واني عيني عليك شفت بيك مواصفات الرجال الاريدة اتأنق واتشيك والبس احلئ الملابس وانت مثل الاعمئ لا معبرني ولا شايفني اطبخ اطيب الطبخات وادزهه بيد اميل حتئ تاكلهه في سبيل بس اسمع كلمة اعجاب منك وانت ابد الحايط يحس بية وانت ماتحس مليت ومللتني من نفسي كل سفراتنة سوية كل طلعاتنة سوية ربيت كدامك بكل مراحلي اتمنيت منك نضرة صغيرة تنطيني امل انت منتبهلي و بيوم من الايام تكون الي .. بس ابد ولا سويتهه شعجب بهذا نوروز جنت منطلق اليشوفك يكول هاي اول سفرة بحياتة طالعهه ولا عبالك خلصنة سنين عمرنة واحنة نطلع بعيد نوروز والكرسميس وغير سفرات وجانت عادي فرحتك عادية مو مثل هالسنة من شفتك تركض وراهه وعينك عليهه وتراقبهه عرفت بيك تحبهه شنو البيهه يميزهه عني شنو البيهه ومابية بشنووو تتفوق عليه ليش حبيتهه وماحبيتني ليش ماشفت دموعي ولا تهتم الهه وبس دموعهه التخليك تتاذة روح الله ينتقم منك اكررهك بكد ماحبيتك اكررهك واكره الساعه البيهه تعلقت بيك اتمنئ متتهنون ولا تنجمعون سوية حتئ تعرفون بحركة كلبي وتحسون بيهه… ـ بقيت صافن علئ هالكلمات ومصدوم من الاقراه بين المخمن هاي اشلي بين الماريد اصدك لان اذا صدك اشلي يعني صداقتي اني واميل علئ المحك تصير.. دزيت مسج .. منو حضرتج؟ ـ كل هالشرح وما اعرفتني ! الاعرفة انت ذكي مو غبي ـ بدون تجاوز و كولي منو انتي وشنو معنئ هالكلام؟؟ ـ اني اشلي .. يعني منو الجانت تحبك من طفولتهه وتشوفك انت واميل تاخذون البايسكلات وتطلعون تفترون بالشوارع اكو غيري مثلا؟ ـ انصدمت من اتاكدت هاي اشلي و راسا خابرتهه ... اشلي ـ الو ـ ياريت تمسحين الرسايل وراح اعتبر نفسي ماوصلني شي ولا قريت شي العشرة البيني وبين اميل ماريدهه تخرب لاي سبب تبقين اختي حالج حال نورا ولينا امسحي كلشي وارجعي لعقلج يابنت الناس ـ شنو حضرتك تؤمرني؟ ترة بكيفي تلفوني واسوي اليعجبني احذف رسايل او ارسل مو انت التتأمر عليه ـ مدكليلي شجاج شبيج اشنو صارلج بحياتي ماشفتج غير اختي الصغيرة ابد ما اجا ابالي انتي هيج تفكيرج من ناحيتي وبعدين يابنت الناس اني ما اتأمر عليج ولا هذا طبعي بس اذا اميل شاف هالرسايل راح ياذيج تعرفين طبعو ما يحتاج احجي وراح تخرب علاقتنة اني وياه وهذا الامر ماريدو ولا اريد احد يعرف بهالموضوع اابد ـ متخيلت كلبك هيج حجر وقاسي ـ مو قصة حجر بس ما اشوفج غير اخت .. ـ الله يطلع حركة كللبي بيك وبهذيج الحية ام راسين ـ منو تقصدين؟ ـ كلش زين تـــعرف منو اقصد صارلهه شكم شهر كلبت الدنية كلب الله ينتقم منكم الله ينتقم منكم.. ـ راسا طبكت التلفون بوجهي .. بقيت مصدوم ولازم تلفوني عيني علئ الشارع لايجي اميل ويحس بشي.. ما اعرف اكوللو او لا بس اذا احجي اكيد راح ياذي اختو لان اميل عصبي وبالمقابل راح تزعزع علاقتنة وهذا الامر ماريدو بدون تردد حذفت كلشي من تلفوني الرسايل والرقم والاتصالات.. قررت ما احجي شي لاميل افضل .. اجئ اميل واتغدينة سوية وكأنو شيئا لم يكن.. مر اسبوع وماكو اي خبر اطمنت اشلي صرفت نضر وعقلت لان اميل طبيعي ويايه.. جنة متواعدين نطلع احنة الشلة ضايجين نريد نونس نفسنه و اميل ويانة نروح لمطعم ومناك نروح للمشاتل نشتري شتلات او سنداين صغار…… ام اميل ـ اشلي وويـــنج ـ اي ماما اجيت ـ تعالي يابنتي اكوي القميص لاخوج خطية نورة مريضة واخوج يريد يطلع متواعد ـ ويينة ياقميص ـ هذا يالعمية هيانة كدامج ولج يلة علئ السريع راح اتاخر عليهم .. ـ اووك هسة اكوي بس انتضر لاتستعجل ترة احركة من انخبص اميل ـ غير احرك ملابسك همين .. ـ نينيي ـ ههههه يلة هبلة فضيهه اكلج وين فرشة الشعر مالتج اريد امشط ـ علئ المراية تلكاهه لو بالمجرات ـ دخلت غرفة اشلي ودورتهه ماكو افتحت المجرات ولكيتهه وكمت امشط دقايق ورن تلفون اشلي… اخذتة وفتحته لكيت رساله من بنت خالتي عايشة بالخارج اهو سوالف بنات مالي خلكهن .. دة اطلع من الرسايل وشفت مكتوب اسم ياسر انصدمت .. شيسوي اسم ياسر بتلفون اشلي فتحت المسج وقريت الرسايل بيناتهم طفرت عيوني من راسي حسيت ياسر مستغفلني رغم ماكاتبلهه شي بس ماتقبلت السواه طلعت اركض من غرفتهه للهول وعيوني تطافر شرارة خليت التلفون بوجهه وكلتله شنو هذا؟ ام اميل ـ شنو شبيك يا ابني ـ لااا تسألوووني شنو صااير مستحيييل ماا تعررفون انتي وونورااا ولييينااا اااحجــــييي ولـــج اشليي لاتخلييني ااتخبل علييييج شنوو هذاا نورا ـ علئ كيفك لا تتعصب بس فهمنة شنو بالتلفون .. ولج احجي اشلي شنو التلفون اميل ـ هذا المسج شنووو معناااه نورة ـ متحجي اشلي بقت واكفة ومصدومة اشتميت ريحة حرك ركضت علئ الاوتي وشلتة من القميص وفصلته من الكهرباء بقئ يسألهه اميل وهية ساكته الئ ضربهه راشدي اميل ـ اااااحجيي عاااااد لا تضليين ساااكتةة ام اميل ـ لاا تضرربهـــة تعرررف اختك مااا تتغلط لاتمدد ايدك عليهه شلوون بوجودي تضرربهه بعدني مامتت وهيج تعاملهه شلون اذا انام جوة التراااب شسوي ـ ااامي اااقري شووفي شكااتبة بنتج لياااسر فضحتني كداام صديق عمري تعاااتبة ليش مااا يحبهه وووين صاااير هالشي وووين الخجل والمستحةة وبعدين شلووون تفكر بياااسر شلوون نورا ـ خالة مجانت متصورة اشلي دازة رساله لياسر عبالهه بس حب وهاي هية ورغم هذا جانت طول الاسبوع تحجي وياهه وتاخذهه للكنيسة وتعلك شموع الهه .. اشلي همين ماسكتت لاميل هية صاحبة لسان وبقت ترادد بأخوهه ورد ضربهه اميل وطلع اتعارك وية ياسر بالكراج مالتنة وتلازمو اثنينهم البارحه يكلة شلون تطعني بضهري ومتحجيلي طلعت خاله تباعدهم عن بعض وراح ياسر ما اعرف وين ورجع اميل ورد ضرب اشلي عاد خاله ماتحملت وراست وكعت واخذوهه للمستشفئ ـ عزا كل هذا صاير ـ اي والله .. بالي يم خاله ما ادري شصار بيهه ـ هسة اخابرهم ـ تلفون خالة عند اشلي لاتحاولين خلي اني اخابر اصبري ـ خابرتهم نور وكلولهه خالة نايمة بالانعاش ضاربتهه جلطة بالراس وكدامهه يومين لو تصحئ لو تتوفئ متت بجي اني ونور عليه نسيت خواتي وحدهن بالبيت وبقيت كاعدة يم نور ـــــــــــــــــــــــــــــــــــــــــــــــــــــــــــــــ ياسر ـ صار الجنت خايف منو عرفت اميل راح يحملني هالذنب وتلازمنة اثنينة ماعرفت اشنو اكلو واشلون ابرر نفسي كدامو صح تلازمنة لان ماحب احد يمد ايدو علية وحاولت ابرر نفسي كدامو بس ماكو فايدة اجتي خاله وباعدتنة وعفتهم ورجعت للبيت ورة نص ساعه خابروني الولد كلولي ام اميل بالمستشفئ طلعت اركض بالتراكسود يادوب اخذت فلوس وياية وصلت للمستشفئ لكيت الولد كاعدين يمنة .. بدون تفكير رحت اركضلة من شافني حضني وبقئ يبجي شنو شبيهه خاله شصاير ـ جلطة بالدماغ ـ سكتت معرفت شلون اواسي حسيت الصار بيهه بسببي اكيد عرفت بالسالفة وماتحملت كعدت يمة ننتضر الطبيب .. منو وياهه جوة اميل ـ اشلي ـ دقايق واجتي لينا هية وزوجهه ودخلت خطية تركض لينا ـ اااحجي شبيـــهه اااامي شنووو صارر ماجان بيهه شي عفتهه مثل الوورردة ليش انضرربت جلطةة براااسهه فهمووني ميلاد ـ هدئي اعصابج لينا مو هيج هسة يفهمنة اميل شبيهه عمتي شنوو صاير يمعود احجي ـ خلاف بسيط وهية انفعلت ووكعت ياسر ـ ركضت لينا علئ اميل ولزمتة من ياختة واحنة اصدقائة كلنة ابتعدنة عنهم وطلعنة برة لان مشاكل عائلية هاي بس صوتهه جان عالي لينا ـ ووولك يااا خلااف الي يخليهه تووكع بجللطة بدماااغهه فهمنيي اميل ـ اخذ مرتك عني ترة ماطايق روحي ميلاد ـ امشي يمعودة اكعدي هنا لاتسويلنا مشاكل .. لينا ـ والله اااذا اااعرف ااامي بسببكم انضربت جلــطةة الا اخبللكمممم ـ تكمز وتعيط لينا وزوجهه يجر بيهه خطية حقهم كلهم متعلقين بامهم نومتهه بالمشفئ جديدة عليهم خصوصا خاله ابد متحب مستشفيات ولا تقبل توصل الهه حتئ اذا تتمرض مرضة قوية .. شوي وطلعت اشلي من يم امهه تبجي ووكلنة ركضنة للطبيب نسألة كال حالتهه ممستقرة ابد واستعدو لكل شي خطية رشلي ولينا انهارن من البجي راحو الولد اصدقائنة ووبقيت وية اميل ماكدرت اعوفة ميلاد رجع علمود بناته وبقت اشلي ولينا بالمشفئ ماقبلن يرجعن احس مالي عين اباوع بوجه اشلي او اميل .. ما اعتقد لينا تدري بالصار لان تسئلهم شنوو صاير ومحد يحجيلهه لينا ـ لا عاد لهنا وكافي انتو اثنينكم لا تستغفلوني لاتشوفوني بعيدة عنكم يعني تضمون عليه هسسة اريد اعررف شنوو صايرر لاميي شلون انضرربت جلطـــة فهمووني اشلي ـ اني السبب ـ واخيرا احد نطق منكم ااحجي شنوو صاير شسويتي بامي ياسر ـ اشلي اخذت لينا وراحت شوي بعيد تحجيلهه .. حسيت صرت بنص هدومي من الفشلة ورد اميل راح وكف وياهم عفتهم وطلعت برة المستشفئ وكفت اشتم هوئ الله.. مر نص ساعه تقريبا وطلع اميل .. ـ تعال جوة ليش كاعد هنا ـ لا خليني هنا ا خذو راحتكم انتو اجئ وكعد يمي.. بعدك شايل بكلبك علية ـ مو شايل بس حسيت انطعنت من اقرب الناس ـ ماجان قصدي اضم عليك بس ماحبيت تنحط بهيج موقف يعني شلون تقبله اجي واكلك اختك هيج رسايل دزت شنو راح يكون شكلك كدامي من احجي هيج ما تقبلتهه علئ نفسي فما اتقبلهه عليك حـضني وضل يبجي علئ امة خطية .. ـ غير اذا تموت بسببنة للموت ماسامح نفسي ـ الاعمار بيد الله لا هيج تحجي ـ اني ماتحكمت باعصابي وتعاركت وضربت وهية متقبل اضرب خواتي هواي اتاذت بسببي ـ ماريد الومك.. بس جان المفروض تتحكم بردة فعلك ـ خلييك بمكاني تتقبلهةة ـ لو صاير اني بمكانك احلهه بهدوء وتفاهم الضرب مييجب نتيجة بالعكس نتائجة سلبية دائما ـ صار الصار بعد .. يكون تخلص هاليومين وتمر علئ خير…. ـ بقينة كاعدين برة والبنات جوة طلع الفجر ونفس الحالة ماكو تحسن بحاله ام اميل .. رحت جبتلهم ريوك بس محد قبل ياكل منهم.. اكلو شوي سندو نفسكم لاتضلون هيج لينا ـ منو اله نفس ياكل يمة سودة. عليه بحياتهه منايمة مستشفئ وهسة نايمة ومتدري بروحهه ـ خطية اتكابلن ويبجن البنات كوة. قنعت اميل ياكل ويوكل خواته .. صار الضهر وماكو خبر و الحر يكتل هنا كلت ارجع للبيت اسبح واغير ملابسي واجيبلهم غدة وياية .. اني اروح للبيت اسبح واجيبلكم غدة ابقئ يمهن هنا ـ لا ميحتاج هسة اني اجيبلهن ـ اكعد بمكانك وخليك يم خواتك اي تطور يصير خابرني ـ ادعيله وياك ياسر ـ بدون متحجي .. طبطبت علئ جتفة وطلعت وصلت للبيت ودخلت اسبح.. بدلت حتئ اطلعت مرة ثانية وفتحت الباب نغم ـ هلو عمو انت اجيت ـ هلو نغومة… اي و هسة راح ارجع ـ عفية عمو اشو نهاوند راحت وبعد مارجعت ـ كولي غيرهه وين راحت؟ ـ البيت خاله ام اميل ـ ها.. هسة امر عليهه واكله ترجعلكم ـ اي عفية عمو لان جعنة وبعدهه ممسوية. غدة ـ اوك ارجعي وقفلي الباب ولاتفتحي لاحد ـ اي .. ـ طلعت من البيت ورحت لبيت اميل دكيت الباب وطلعت نور ونهاوند سلمت عليهن وكلتله خواتج يردنج خطية يمكن يريدن غدة ـ يا عزة والله طار من بالي ممسوية غدة... بس بشرنة شلونهه خاله ـ ان اشالله بخير ادعولهه .. نور. ـ انت وين هسة رايح ـ اخذلهم غدة وراجعلهم ـ ماطابخه شي ـ ميحتاج منا اخذلهم من المطعم.. محتاجين شي ـ لا سلامتك .. يلة نور اني اروح اي شي يصير خابرني يالله عليج ـ ان شالله ـ تعالي ويانة ليش تبقين هنا لوحدج ـ لا نونة. خليني كلش مرضة ومبية اكوم ـ شنو شبيج الف سلامة ـ صارلي كم يوم ما اعرف شبية يمكن هبوط .. هواي استفرغ وميبقئ شي بمعدتي وراسي يوجعني ـ خاف حامل ـ الله يسمع منج حتئ خطية خاله كالت يمكن حامل بس مارحت حللت اخاف انصدم كثل ككل مرة بس البارحة هواي اتخربطت وكالت باجر تروحون تسوون تحليل وتالي خطية وكعت هالوكعه ـ ان شالله ترجع بالسلامة وتبشرينه بحملج .. ـ ان شالله يارب .. ـ رجعت للبيت سويتلهن غدة علئ السريع ولكيت نغم منضفة البيت هية وصبا سبحتهن وسبحت وكملت كعدت انتضر بلكي يجون ناس حتئ ابيع .. تقريبا صارت ساعه خمسة العصر اجوي كم وحدة يريدين يشترن ودك التلفون جاوبت طلعت نور تبحي كلتلي خاله توفت خطية جان صوتهه كوة ينسمع مم البجي شافني النسوان ابجي كلتلهم ام اميل اتوفت بيهم اليعرفهه وبيهم لا ترخصت منهم كلتلهم ماراح ابيع اليوم اريد اروح لبيت خاله وهنة همين خطية صدرن الموقف و راحن ماكالن شي .. بدلت الاسود اني و خواتي دخلنة للبيت لكيت هواي ناس ما اعرفهم اعتقد كرايبهم خطية بناتهه لابسات اسود وكاعدات اخذت من خاطر لينا حضنتني وبجت بس اشلي جانت جافة ويايه.. او يمكن اني هيج حسيت بيهه ماعرف كعدت يمهن اني ونغم وصبا ولحونة راحن وية بنات لينا برة كل شوي اتذكر وكفاتهه ويايه شلون دخلتنة لبيتهه بعز البرد ومن جهزتني بهواي اغراض من شلت وبعدين اقترحت علئ ياسر ياجرر نص بيتة النة وكفاتهه متنسي متت بجي عليهه حسيت فقدت امي ازدهار مرة ثانية صار الليل ورجعت للبيت جنت كلش تعبانة وراسي يوجعني من البجي راسا لفيت راسي ونمت كعدت ثاني يوم علئ صوت الجرس والباب يندك .. استغربت شعجب ياسر يدك الجرس عدلت نفسي ونزلت اريد افتح الباب بس لمحت هذول زلم هواي يمكن اربعه.. بقيت قافلته وحجيت من ورة الباب .. منو ـ انتي منو ـ عيني المن رايدين ـ هذا مو بيت ياسر ـ ها ..اي ـ انتي منو وشسوين هنا ابيتو افتحي باب خلي نحجي وياج ـ عزة هذول يخوفون.. انتو منو شتصيرون من ياسر ـ احنة اخوتااا انتيي منوو الخداماا لو اشنوو، وللحكاية بقية………… 🥀