طفلتي اليتيمه - *بارت51* *ليلة من فبراير* - بقلم لا اعلم فقط ناشره | روايتك

*ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ https://whatsapp.com/channel/0029Vb5nySH77qVOUYY2kt3M *البارت51* *ليلة_من_فبراير* ☆☆ ☆ ❤️ نهاوند ـ يعني شنو ايزيدية مدفتهم ياسر ـ دين.. حاله حال الدين الاسلامي والمسيحي وباقي الاديان الموجودة ـ يعني انت مو مسلم! ـ لا ..اني أيزيدي ..مو مسلم ـ وكفت مستغربة من كلامة صافنة بوجهه ممستوعبة شلون مو مسلم خاف ديضحك عليه هالولد هو اسمة ياسر واختة اسمهه زينب زين شلون يكول مو مسلمين! باوعت عليه بنضرة استغراب… ـ نظراتج تخوف .. ليش هيج مستغربة ـ انت مو اسمك ياسر و اختك الي اتزوجت ذاك اليوم اسمهه زينب؟ ـ اي صح ـ لعد شلون مو مسلمين و هيج اسمائكم! ـ ههههههه.. ترا الاسماء مو حكر علئ دين معين .. يعني عادي هالاسماء كل الاديان يستعملوهه اسمي ياسر واخويا الجبير اسمو حيدر والثاني رسلان ـ حيدر همين ! ـ اي ههههه هالاسماء متداولة عندنا احنا الايزيدين.. وبعد اكو احمد وعلي وعمر وبكر وحسين ويوسف يعني اشكال الاسماء تلكين عدنا ـ هاا… صدك والله! ـ اي والله ـ شكد حلو اسمائكم مثلنة ـ ماكو فرق كلنا اخوة ـ شي اكيد اخوة طبعا.. زين ممكن اسألك؟ ـ اي تفضلي ـ يعني هالدين شوكت طلع وشوكت صار وشنــ .. بعدني ماكلمت كلامي وجاوبني ـ شوكت طلع! ترا احنا دينا صارلو اكثر من ستة الالف سنة يعني قبل الاديان الموجودة كلها احنة اقدم الاديان الموحدة علئ الارض ـ هاا هيجي.. معلومة اول مرة اعرفهه زين منو نبيكم ـ ماعدنة نبي بالدين مالتنة لان مثل ما كلتلج دينا توحيدي وقديم اقدم الديانات علئ الارض ـ صدك والله! يعني شلون ماعدكم نبي ـ دينا موحد لله منحتاج وسيط بينا وبين الله فـ لذلك ماعدنة نبي ـ اها ـ اي.. لذلك كلتلج الاسماء مو حكر علئ دين معين لان هيا بالاصل هالاسماء موجودا بدينا وانتقلت الكم ـ تدري والله مجنت اعرف اكو هيج دين ولا عندي معلومات عنة .. يعني بس اعرف اكو مسيح لان جانو جيرانة مسيحيين بس ما جنت اعرف اكو دين اسمة ايزيدي ـ اي حقج متعرفين شي عننا لان كل الحكومات الحكمت العراق من مئات السنين ترفض تخلي باقي الشعب يتعرف علينا حتئ ترفض ادرس الطلاب عن الاديان وثقافات الاديان المتنوعة الموجودة بالعراق.. وفقط دين واحد مسيطر علئ كتب المدارس لان الهم الاغلبية بهالوطن ـ تقصد الاسلام؟ ـ اي صح وللعلم اني ما اقصد الانتقاص من هالدين لا ابدا لكن العراق متروس ديانات مختلفا متنوعا وان كانت اقليا هالشي مو عيب … بس الغريب ليش ما يخلون منهج تعريفي للناس او الطلاب حتئ يتعرفون علئ باقي اديان الناس الموجودة بالعراق ؟ يعني كتب المدارس البرامج اليومية التطلع بالاذاعة والتلفزيون اغلبها عن الاسلام رغم احنا نتشارك الارض والوطن سوية لكن معزولين جدا ومحد يذكرنة فقط القلة القليلة تعرفنة اتصوري حتئ تقارير ما يسوون علينا مهمشين جدا واحنا ابلدنا ـ اي فعلا لان ابد ماسامعه بيكم ولا اعرف شي عنكم لو ما انت تحجي.. زين ..يعني ليش هيج ميخلون احد يعرفكم ـ اكو اسباب واضحة ومعروفة واكو غامضة الاسباب الواضحة ممكن يخافون لا بعض الناس تتأثر بأديان الاقليات وتنتمي الهه رغم احنة دينا مو تبشيري يعني مستحيل احد ينتمي لدينا حتئ لو حب هالشي ـ يعني شنو مو تبشيري .. ـ يعني مثلا المسلم ممكن يدخل بالدين المسيحي ويصير مسيحي والمسيحي كذلك اذا حب يدخل بدين الاسلام هذول اديان تبشيرية تتقبل الانظمام الهه لكن احنة دينة غير شكل الايزيدي لازم يكون من اب وام ايزيدين فقط واذا احد الطرفين مو ايزيدي ميعتبر ابنهم ايزيدي ـ اهااااا هيج دينكم ـ اي ـ زين انتو وين مكانكم بالعراق يعني اقصد وين تعيشون لان ابغداد ابد ماسامعه بيكم ـ احنا موجودين بكل مكان بس اكثر مكان متمركزين بي هو سنجار بشمال الموصل واكو بكردستان شوي ابغداد شوي هنا كركوك همين اكو عوائل بس كلش قليلة واغلبهه هاجرت او سافرت يعني مطشرين بكل مكان تقريبا ـ بس انت تعرف تحجي بغدادي مثلي ابد متخيلتك من الموصل ـ هههه وية البغدادي احجي بغدادي ووية غير محافظات انكلب مثلهم اعرف احجي هواي لهجات لان عشت حياتي كلهه اتنقل بين المحافظات يعني بين بغداد وكركوك وصلاح الدين حتئ للكوت رحت ديالئ و كردستان للسماوة وصلت وبقيت فترة بيهه بس كل المحافظات بقيت بيهه فترات متفاوته.. يعني مو فترات طويلة مثل كركوك وبغداد ـ شكد حلو مفتر الدنية كلهه ـ العراق حلو رغم الخراب البي بس يبقئ اجمل شي بعيوني.. ـ بس شعجب هالكد مسافر ـ اروح علمود شغلي وسياحه بنفس الوكت ـ عزة متتعب اني اجيت من بغداد لهنا اتكسرت بقيت يومين نايمة مابية اكوم ـ لا ما اتعب من السفر بالعكس استمتع بيه لان من صغري تربيت علئ ايد عمي الصغير جان ياخذني وياه لاي مكان يروحلة فـتعودت علئ السفر و لكيتهه فرصة اجمع بين شغلي والسياحه ـ ويقبلون اهلك انت صغير وتروح وية عمك؟ ـ اي ليش لا قابل وية غريب رايح غير عمي ـ وعمك جان يحبك يعني اقصد ميأذيك ـ لا ليش يأذيني .. بس يعني عادي مرات تصير شغلات ويرزلني عليهه او ينتر بية او حتئ يضربني علمودهه يعني حسب متطلبات التربة وتعتمد علئ وكاحتي همين ـ هههه يعني جنت وكح ـ اي والله ما انجرع من جنت صغير كلش وكح اتذكر مرة كتلني كتلة اطبع جف ايدو علئ جلدي ـ عزا ليش هيج كتلك ـ جنت صغير عمري 9 سنين وكلي اوكف هنا بالمحل لا تتحرك جان عندة محل بسوك القلعه هنا يمنة راح هوة يم صديقة بالمحل البصفنة واني عفت المحل ورحت اسخت بالقلعه بين المحلات وتالي تهت ومعرفت ارجع ادخل منا واطلع منا ومادري وين صار المحل خطية بين ما لكاني عمي جان ناشف دمة من الخوف عليه عاد بس شافني كأنو ماصدك لزمني وحط بية الحمس بالكتل من يومهه بعد ابد ما خالفت الو كلمة يكلي اوكف اوكف نام نام ما اكسرلو كلمة مستحيل ههههههههه ـ ياا هههه .. خطية ـ حقو سوك القلعه جبير واني طفل ما اندل والناس ما تنحزر زينهه من شينهه ـ سوك القلعه شنو ؟ يعني هية قلعه مثل هاي النشوفهه بافلام كارتون! ـ ههههه لا بناية كلش جبيرة واثريه يعني من زمان مبنية وكلش قديمة ويسموهه قلعه ـ الله مبينة حلوة ـ ان شالله الايام الجاية تروحين وتدخلين للسوك وتفترين بي وتتعرفين عليه.. واشوفج محل عمي الجنت اشتغل بي ومحلي .. ـ ها يعني هو نفسة محلك صار ـ لا مو محلي.. اني اخذت غير محل بس فتحت نفس بضاعه عمي همين صحيات وما شالله الله وفقني و صار عندي بمكان المحل محلين .. ـ ما شالله اكيد عندك هنا محل وبسنجار محل؟ ـ لا .. هنا عندي محل واحد والثاني ابغداد داخل شريك وية شخص بغدادي والي نص المحل ـ ما شالله الله يزيدك.. يعني زين عندك عم هنا مو وحيد مثل ماكالو بيت خالة ام اميل ؟ ـ عمي مو هنا ترك كركوك من زمان ـ وين راح؟ ـ المسكين غرك وماطلع بعد ـ عزااا غرك بالمييي خطية يعني مات ـ هههههههه لا مو قصدي غرك بالمي اقصد حب بنية واتزوجهه غرك بالحب وياهه وهية ماقبلت تجي لكركوك ولا قبلت تضل هناك بسنجار فـ اخذهه وسافرو ـ يعني اتزوج وهاجر وية زوجته خارج العراق ـ اي ـ ها .. همزين خطية عبالي صار بي شي ـ لا مابي شي بس زوجته رادت تسافر ماقبلت تبقئ بالعراق وهو لان يحبهه مارفضلهه هالطلب ـ شعجب ماقبلت تبقئ يم اهلهه ياريت لو عندي اهل مثل الاوادم مستحيل افاركهم والله ـ ماظل الهه احد هنا خطية.. وترا ماكو انسان يترك ارضا اذا ما كان متأذي وفاقد احباب بيهه ويريد يحافظ علئ البقية المتبقية منهم اغلب اهل البنية مهاجرين خارج العراق و هية جانت باقية علمود ابوهه الله يرحمو .. خطية ما طول هواي ورة زواجهم.. اشهر قليله واتوفئ فـ ما بقالهه احد هنا وراحت لحكت بأخواتهه واخوتهه الهاجرو ـ ها هيجي يعني ـ اي .. تعرفين الاوضاع مو زينا هنا وبسببهه هواي تركو العراق واستقرو بالخارج ـ اي والله هالحروب المرت علينة دمرتنة مابقتلنة احد اخذت كل النحبهم ـ الحروب تمر علئ بلد كامل بكل اديانة وطوائفة بس الابادة والعنصرية تمر علئ دين معين او طائفة معينة ورغم انو هية جزء من هالبلد وهالابادة وغيرهه من القتل خلت الناس تنجبر تهاجر وتترك ارضهه ووطنهه لان خايفه تبقئ ـ قتل وابادة! عن منو دتحجي؟ ـ عنا احنة ماضل احد من عدنة الا القليل بسبب القتل والابادة والتهجير التعرضنا الهه ـ يعني تقصد انتو بسبب القتل هيج قليلين ؟ ـ طبعا .. لان احنة شعب ولود تعرفين امهاتنة جانن يجيبن هواي اولاد بس للاسف اقلية صرنة بسبب القتل المر علينة ـ يا عزا خطية.. واني اكول ليش مسامعه بيكم ابد لان هسة كلت بالموصل شوي وبكردستان شوي يعني بكل مكان شوي منكم فـ اكيد متنعرفون ـ الابادة والعنصرية التعرضنة الهه خلتنة منختلط بأحد واذا اختلطنة نكون حذرين زيادة عن اللازم بتعاملنا ويا الناس لان اتعرضنا لهواي حملات قتل بسبب افكار خاطئة عننا وكل حكومة تجي تطلع عضلاتها علينا وتقتل بينا وبعوائلنة من الشايــب للطفل لذلك اعدادنة جدا قلت بهالسنين ـ عزة بعينهم.. زين ليش يقتلوكم شمسوين؟ ـ ما مسوين شي بدون ذنب والله .. احنة ناس مسالمين منحب المشاكل ولا الهوسات ولا نحب نحتك بأحد مثل ميكولون كافين خيرنة شرنا بس الصار من ابادة النا اما دوافعة سياسية او دوافع شخصية ـ مفتهمت يعني شلون شيريدون منكم ـ وما راح تفتهمين .. لان كل جيل يجي يطلع منة ناس متعصبين ومتزمتين ومتعنصرين يعتبرون دينهم هو فقط الصح وباقي الاديان الاخرئ مجرد كفار ولازم التخلص منهم ولان بدينهم يحللون دم الكافر قتلونا بحجة كفــرة ـ كفرة؟! ليش انتو المن تعبدون ـ الله.. كلتلج احنة دينا توحيدي وقديم منعبد شي ثاني وية ربنا نصوم ونصلي حسب تعاليم دينا وهذا معبدنا لالش التشوفي بهالصورة نحج الو كل سنة مثل انتو عدكم مكة احنة عدنا لالش وكلمة ايزيدي يعني اليعبد الله ـ لعد ليش يكولون كفرة ـ لان المتعصبين والمتطرفين ماعدهم احترام الاديان فطلعو علينا هواي اقاويل ولان دائما همة يريدون اي حجة للقتل فيكذبون ويصدكون كذبتهم.. لذلك يسوون حملات الابادة الجماعية علئ الاقليات الموجودة بالعراق و احنا الايزيدي من هالاقليات ـ حسبي الله عليهم ـ بس ميدرون بهالشي يخلونة نتمسك بدينة اكثر واكثر ونتشبث بي كلشي ممكن يتحصل بالقوة الا القناعه بالدين مستحيل احد يغير دينة تحت تهديد السلاح و القتل والعنف.. محد اله حق يقرر مصير اي شخص نيابة عنة ولا الة حق يتدخل بدينة هذا الشي بينة وبين الله فقط ـ اي فعلا محد اله حق يدتخل بهالشي هذا بينكم وبين ربكم ـ اكيد ـ الله يحفظكم ويحميكم يارب بالنسبة الي الدين اخلاق ومعاملة شيفيدني شخص متدين وياذيني ويحلف كذب مثل عمامي وزوجاتهم.. ـ الله يهديهم ويبعدهم عننا ـ امين.. ياريت اقرة عنكم وعن دينكم وعن الابادة والظلم التعرضتو الهه ـ اكو كتب تأريخية هواي يذكرون بيهه هالامور بس من تقرين راح تشوفين المصايب اكثر واكثر بعد .. ـ ياستار يارب الله يجفيكم شرهم ـ يلة كافي حجي ماحب اذكر هالمواضيع لان مؤلمة وتوجع الكلب ـ اسفة مو قصدي ـ لا عادي لاتهتمين .. تعالي اشوفج باقي البيت ـ ليش اكو بعد مكان مشفناه ـ اااي بيتي بعد ماشفتي .. لو متريدين تشوفي ؟ ـ لالا بالعكس ياريت امشي نشوفة ـ يلة امشو بس لاتنصدمين من الهوسة البيت ممرتب واغراضي مطشرة بكل مكان ـ بالعكس والله ليش هيجي تحجي اذا تحب اساعدك و انظفلك البيت مابيهه شي اني مثل اختك ـ لا اشكرج ميحتاج احب ارتب اغراضي علئ ايدي حتئ اعرف مكانهن.. ـ طلعنة من المطبخ علئ الطرمة ودخلنة بغرفة الاستقبال مالتة شوي جبيرة وبيهه تخم قنفات بسيط وناعم حلو مو كلش ضخم ولونة رصاصي اما الحايط لونة ابيض البردات لونهن رصاصي غامق مبين بيت ولد عايش وحدة الذوق الرجالي طاغي علئ المكان.. عندة بوفية بسيطة وعليهه تلفزيون وستلايت وانتبهت اكو صورة مرسوم بيهه طاوس علئ الحايط بس عبالك مو صورة لطير الطاووس عادية لا بيهه اختلاف جبير وبيهه امور مرسومة ماعرفت افهمهه.. نغم ـ نونة شوفي رسم هذا الطاوس شكد حلو وغريب ياسر ـ هذا الملك طاووس اكبر الملائكة واعظمهم بديننا نهاوند ـ يعني تقصد جبريل ـ لا مو جبريل .. هذا الملك طاووس .. الله خلقة من نوره الذاتي ومن الله خلق الانسان وطلب من الملائكة يسجدون للانسان رفض الملك طاووس هالامر وكال لربنا.. أمرتني ان ما اسجد لغيرك هو من طين واني من نور وانا وفي الك ومستحيل اسجد لغيرك لذلك الله كافئة وقربة اله ـ صفنت علئ هالكلام احس انعكد لساني بس مصدومة من الاسمعه.. من شافني هيج ابتسم وباوع عليه ـ اي شي يدور بخاطرج احجي لاتخافين ـ لـ لا مو قصة اخاف.. بس يعني انتو تحبون الملك طاووس؟ ـ اكيد ـ بس الملك طاووس حسب ما وصفته بكلامك.. يعني اقصد ـ لا تترددين احجي ـ يعني مواصفات الملك طاووس بدينا هو الشيطان يعني اقصد ماريد اجرحك اسفة بس يعني هو ماقبل يسجد لادم اسفة والله مو قصدي شوف اني اسحب كلامي لان اني ما افهم بالدين يعني فهمي بسيط وعلئ كدي ـ لا تضلين تتعذرين فاهمج بس ديننا يؤمن ان الشرر والخيرر هو مزروع بالانسان نفسة ما يحتاج ملاك او جان حتئ يسوي شرير الله مستحيل يأذي البشر ويسلط عليهم قوئ شريرة تسحبهم للنار .. والا ليش ربنا يحاسب الانسان اذا اكو قوئ اكبر من البشر تاخذة للطريق الخطأ وتخلي يخطأ؟ ترا الانسان بداخلة مزروع الشر والخير الماعندو ضمير يكون شرير وقاسي والعندو يكون طيب وما يأذي احد احنا ما نؤمن بوجود الشيطان لان ماكو شي اكبر من قوة الله ـ ما اعرف شنو اكلك بس هيج كلام اول مرة اسمعه بصراحه ـ لا عادي اني متعود علئ هيج اسئلة اصلا اكو اسئلة اقسئ وتنطرح علية باسلوب مزعج احيانا لكن اتعودت اجاوب بأبتسامة ماكو داعي للعصبية لان الدين تسامح واخلاق ـ اكيد اكيد وبالنهاية ديننا يكول لكم دبنكم ولي ديني احترم دينك مهما يكون يكفي انت عكست صورة جميلة وراقية عن هالدين ولو مو كلش فهمته بس عادي ان شالله الجايات اكثر ـ ان شالله.. تعالي اشوفج الباقي. بس لاتنصدمين من الهول لان هواي مخربط ـ مشينة خطوين لنهاية الاستقبال اكو باب يطلع علئ الهول هو نفس الكوليدور العدنة وقاسمة نص اله ونص النة.. ـ هذا مطبخي وكل اغراضي هنا والاستقبال انام بي ـ اباوع حاط كنتورة و اغراضة بالهول القاسمة بيناتنة كنتورة صغير بابين وراكنة بالركن بعيد عن الطباخ المطبخ هوسة .. بس الاستقبال شوي مرتب ممخربط خطية اغراضة مشمورة بكل مكان متت قهر عليه.. زين وين حمامك؟ ـ الحمام برة ما انتبهتي عليه ـ برة! يعني هذاك البناء حمام! .. ـ اي ـ شلون حمامك برة وبهالبرد راح تتمرض هيج .. ـ لا مو غيرتة ورتبته تعالي شوفي هذا الاستقبال وعلئ نفس الحايط حمام بنيت الباب الخارجية للحمام وفتحت باب ومدخل سويته مغاسل علئ الاستقبال وصار حمام داخلي مريح ـ ياااه هيجي ... متت خجل منة شمسوية بي خطية كالب خريطة بيته كلهه .... والله كلش خجلانة منك خربطت بيتك وبهذلتك وانت جنت كاعد ومستقر وفوكاهه ناطينة القسم الاكبر بالبيت النة ـ لا بهذلتيني شنو قابل شسويت .. وبعدين انتو اكثر مني اني نفر واحد يكفيني هالمكان بس انتو اربعه لازم يصير القسم الاكبر الكم ـ وكفتك مستحيل انساهه الي مني وبية ومحسوبين عود اهلي ماسووهه ـ المهم انتي وخواتج ترتاحون وتستقرون وياريت تنسين الماضي وتبدين صفحة جديدة حتئ تكدرين تعيشين ـ عينة بعيني ويحجي ويايه كلامة يخبل ينطيني قوة وامل جبير احسة يسندني بكلامة.. مجنت منتبهه عليه قبل بس بهالاسبوعين ركزت وياه نبرة صوتة رجولية تخبل يذكرني بكارتون كراندايزر نفس نبرة صوت دايسكي اباوع لوجهه مدور عيونة كبار شعرة اسود ملامحة متناسقة.. تصرفاته وحركاته رجولية بحنيته يذكرني بصباح من مرات جان يحن عليه ويهتم بيه .. بحياتي كلهه مشايفة رجال عندة غيرة حقيقة مثلة كل القابلتهم مو زلم حقيقيين عدهم خصلة وحدة حلوة والباقي اكاذيب.. اتعاركن خواتي بيناتهن وحسيت علئ نفسي صافنة عليه كلش ارتبكت و التفتت علئ خواتي .. انوب حتئ هوة صافن عليه مثل حالي أ.. أان شالله بس اكيد مو بيوم وليلة انسئ كل شي يحتاج وقت ـ احلئ لحضات مرت عليه عيني بعينهه وبقيت اتأملهه ما ركزت بجمالهه قبل صح جنت اشوفهه حلوة .. بس هسة تمعنت بيهه اكثر وبين جمالهه الحقيقي ما شالله علئ هالعيون ورسم الملامح والوجه ماكدرت اشيل عيوني منهه عيونهه بيهه لمعه غريبة وتجذب الاعمئ وتجبرة يشوف هالعيون البريئة مثل ضحكة طفل عمرة سنة لايعرف ياذي ولا يغدر اتمنيت هاللحضات ابد متخلص .. بس الصغار قطعو علينة هاللحضات هية ارتبكت والتفتت واني اخذت الموضوع بشكل طبيعي حتئ لا ترتبك اكثر .. اكيد يحتاج وقت بس اهم شي عيشي حياتج صح ولاتفكرين بالسلبيات ولا بالماضي لانو راح تأثر هواي علئ نفسيتج ـ ان شالله يارب الحان ـ عفية عمو هذا البيت همين بي جني يهوف ـ باوعت علئ الطفلة وضحكت هههههههه اي البيت بي جني صغير وكح وحلو يخبل ـ عزا عمو ووينة ـ وولج انتي الجنية مالتنةةةة شووو مين اكلللج ياابطة من خدودج لوو من ايدج شووو خلييني ااضوك هاي الخدودد عم عم عم نهاوند ـ همزين الحان طفرت بالوكت المناسب متت خجل من نفسي و من نضراته الي عيونة تسحر يالله هسة اني ليش هيج مهتمة هالكد بي شلون فشله شنو راح يكول عني.. بس ما اكدر ما اهتملة لمني اني وخواتي من الشارع وستر علينة وهو حتئ اسامينة ميعرفهه.. قلة اصل مني اذا ما اهتم بي شالهه وباسهه للحونة وكعد يتشاقة ويضحك وية خواتي وكأنو هالشخص يعرفنة من زمان ولا عبالك صار كم يوم من عرفنة ودخلنة حياته .. ـ منو يحب الحلويات جبتلكم علاكة متروسة الكم اخذو واكلوه بالعافية ـ جايب علاكة بيه نساتل وجبس وجكليت وبطل عصير جبير وجيس صغير بي نفاخات.. كلش خجلت منة صرت بنص هدومي ميكفي اخذنة بيتة انوب يصرف علينة اخوية ياسر اني بس يصير عندي فلوس ادفعلك الايجار والله ماناسيتة علئ بالي.... نطة العلاكة لخواتي التهن بيهه .. وتقدم عليه خطوة راسا دنكت راسي متت خجل منة ـ اني بحياتي مافكرت اقسم بيتي وأجرة لان ما محتاج بس علمودج انتي وخواتج الصغار سويت هالشي وبطيب خاطر مني خصوصا لحونة من اول ما شفتهه دخلت كلبي بيوم الشفتهه بالشارع جانت دترجف من البرد ووجهه الابيض صاير احمر خطية كلبي انمرد عليهه ما اكدر انسئ هاللحظة ابد ولا اكدر اشيلهه من راسي بقيت اباوع عليهه وكلبي يوجعني لان الطفلة بكد جهال اخوتي والما اقبلة علئ اهلي ما اقلبة علئ الغريب ـ ركضت عليه الحان وحضنته من رجلة لان فهمت كلامة.. هو طويل وهي صغيرة مالكت غير رجله تحضنهه ـ حبيبتي .. مو اكلج طفلة تخبل وبريئة بالضبط مثل برائة عيونج ـ تخربطت من حجة هالكلمة ..ها.. ـ لا.. أ اقصد سويت هالشي لان شفتكم تاذيتو هواي وخواتج اطفال صغار بريئات خطية .. يــ يعني الاقصدة لا تفكرين بفلوس و لاتخلين بالج يم الايجار ابد ـ اي فاهمتك.. واعرف قصدك والله بس هذا حقك وان شالله يصير عندي باقرب وقت واسددلك الايجار ـ صدكيني باجر تتمكنين والله يفرجهه عليج بقاء الحال من المحال وذاك الوكت نتحاسب عود ـ شكد ما اشكركم ما اوفيكم انت وبيت خالة ام اميل ـ والله اذا تريدين تشكريني فعندج طريقة وحدة بس تشكريني بيهه ـ استغربت من كلامة هذا شيقصد.. ابتعدت شوي عنة ولزمت خواتي وباوعتله بأستغراب.. وشنو هية الطريقة! ـ قبل كم شهر رحت لبيت صديقي ابغداد واكلت يمهم شكــــل دوولمـــة سلك خرافية اتصوري طعمهة بعده بحلكي ياريت من تسوين دولمة بغدادية تذكريني لووو بماعون مالت جاي صغير هيج هالكدة همين انعم الله ـ ارتاحيت وابتسمت من حجايته الحمد لله مو غير شي راسا تفكيري راح علئ اشياء وصخة .. يمعوووود اذا علئ الدولمة تهوون باجر اسويهة الك تدلل غالي والطلب رخيص بس اجيب المواد والفهه واحضرهة والجدرية كلهه الك الف عافية ـ بس يكون دوولمة بغدادية مثل الاكلتهه هناك حامضة ولاجعه تخبل لان هنا الاغلبية يسووهه باللبن هية همين طيبة بس الاكلتهه ابغداد حبيتهه اكثر ـ صار بس اطلع للسوك اسويلكياهه ـ اني اجيبلج المسواك بس كتبيلي التحتاجي واجيبة الكم ـ لالااا المواد عليية اني بس اطلع اجيبهه احب اني اشتري المسواك بيدي ـ يابة براحتج . . ومثل مكلتلج لاتضلين تفكرين وتكولين شلون اشكركم ووكفتو ويايه ومن هالامور.. لو ما مرتاحلج انتي وخواتج مستحيل اخليكم ادخلون بيتي وبعدين اصلا اني عايش وحداني هنا يومية كاعد و اتصفن بوجه الحايط ومن اضوج اروح لاميل اخلص وكت يمة ولو مو دائما اروح الهم لان استحي منهم يعني هو متزوج وعندة عائلتة خطية ماريد احرجهم وازعجهم بس من اجيتو صار شوي نفس وحركة بالبيت وصارلي واهس ابقئ بيه ـ ابتسمت بوجهه بخجل الله يديم لمتكم وتبقون سوية ان شالله ـ اشكرج.. ـ أ .. يلة بنات دنروح ـ بعد وكت ابقو شعدكم رايحين ـ لا لازم اروح اكمل شغلي واطبخ .. اي شي تحتاجة كول الله عليك لا تخجل دك هالحايط الساندوج او دك الباب او دك تلفون بيكفك ميردك غير ايدك.. ـ اخت رجال متقصرين ـ ابتسمتلة من كال اخت رجال شكد يرفع معنوياتي هالرجال ياربي .. يلة باي اني اروح ـ باي ـ مشيت خطوتين ورجعت اركض .. ها صدك لا تطبخ اليوم اني ادزلك اكل ـ ههه تمام انتضر ـ يلة اني اروح ربي يخليك النة اخوية ـ اخت عزيزة وغالية ـ ابتسمتلة واخذت خواتي وطلعت دخلت للبيت ممصدكة بروحي شكد حلوة ابتسامتة وتعابير وجهه تخبـــل يمــــة يالله وجهه يضوي من يضحك شنو هذاا ملاك مو بشر هالولد ما اعرف شلون هيج اخذ كلبي بيوم وليلة .. جنت متعجبة بالاشوفهم ابغداد واكول حلوين ووسيمين طلع اكو الاضرب منهم هنا نغم ـ شكد حباب بفضلة صار عدنة هالبيت ـ اي والله بفضلة والله لو ماعيب من الولد هسة اهلهللل واخبص الدنية من فرحتي نغم ـ عزة شيحجون علينة يمعودة كعدي وسكتي ـ ههههههه.. اباوع علئ البيت وممصدكة بس لا يطلع حلم واكعد منة والكة نفسي بعدني يم منال شنو اريد من ربي بعد مطبخ كامل كلشي بي من الاوفن للثلاجة للسنك للطباخ هول وغرفة كاملة البيت دافي وسكف فوكانة و اني وخواتي سوية ممفترقين الف الحمد لله والشكرر ربي نغم ـ واخيراا صار عدنة تلفزيون مثل باقي البشر نتفررج علئ كيفنة محد يطردنة منه ـ لج متشوفيني ممصدكة وخايفة لايطلع حلم واكعد منة نغم ـ هسة اعضج حتئ تصدكين هذا مو حلم ـ والله ممصدكة تدرين احس بنفسي مثل افلام الكارتون مال فلة .. انهزمت من مرة ابوهه لان تريد تقتلهه وتالي لكت بيت الاقزام السبعه وعاشت بي ـ ههههههه.. بس هذا البيت نظيف مو مثل بيت الاقزام جان وصخ ـ اي والله صدك نظيف رغم هو ولد ولوحدة عايش بس نظيف ينكرط .. ولج انظف من بيت منال الوصخة بألف مرة ـ اييع يمعودة لاتذكرينه بيهه هالخايسة ـ اي والله العياذ بالله من سيرتهه الحان ـ اني جوعانة ـ انتي داائما جوعانة كلما شفتيني صحتي جوعانة .. ـ يعني شون ابطل اجوع ـ ههههه لا هسة اكوم اسويلكم غدة يخبل يلوك لهحلوك الحلوة ـ خلي اروح قبلج اشوف شنو بالثلاجة متت جوع ـ عيب ولج اكل الولد هذا لاتصيرين مفجوعة.. راحت قبلي لحونة للثلاجة واني رحت اشوف شنو عندي اطبخ ـ ااالله شوفي نهاوند شوفي ـ عفت المسواك من ايدي و باوعت للثلاجة ماشالله متروسة ترس مثل ثلاجة بيت ام مهند وبيت حكيمة همين هيج متروسة نغم ـ هاي مغارة علي بابا انفتحت وج هاي الثلاجة مثل الثلاجة الي نشوفهه بالتلفزيون مليانة اكل من فوك ليجوة الحان ـ شنوو هذا اريد اضووكهه نغم ـ ولج لا تفشلينة هذا انناس يالمعزاية ـ ولجن خزيتني اكعددن بنات عيييب الولد حاط اكلة بيهة ديرن بالجن تمدن ايدجن عليهن الحان ـ يعني ماراح ناكل منه ـ عيب اخجلي يالحونة مكيفي احتلينة بيتة انوب حتئ ثلاجته هسة اسويلجن من الاكل العدنة الحان ـ ما ما ما ماااا اريد من هااااي الانناس ـ لج حيووانة اانلصميي فشلتيينة راح يسمعج الولدد .. ـ بس شوي اضووك بس شوي نونةة ـ قززرقط اسكتي صوتج نصي ليش تهوسين صبا ـ هسة شيصير لو ناخذ شوي ـ والله العظيم بس يصير عندي اشتريلكم لاتسوون هيج عيب لاتفشلوني كدام العالم دنحجي واندك الباب عرفت هذا ياسر خرب حظجن سمعنة الولددد شلوون فشلة يالله رحت ركض و فتحتلة الباب.. ـ جنت ارتب اغراضي وسمعت صوت لحونة تتعارك علئ الانناس متت ضحك علئ هالطفلة شكد محبوبة ولسانهه يخببل احلئ شي من تعارك خواتهه علمود بطنهه تموت ضحك اتمنيتهه يمي وابقئ ابوس بخدودهه .. بس صوتهه جان عالي ووصل ليمي مكدرت ابقئ كاعد اسمعهه تتوسل بنهاوند راسا طلعت ودكيت باب المطبخ عليهم .. هلو نونة ـ هلو ياسر هلو بيك ـ نونة ليش متخلين البنات ياكلون انناس ترة اني ما اكل هالاكل صدكيني هو اني ااصلا جايبة الكم ـ لـ لا ـ صدكيني اني ما احبة واصلا مو صداقة وية الفواكه فـ خليهن ياكلن اليعجبهن ـ لالا والله شوف مو هيج يقصدن انت سمعت غلط ـ احلفج بالله يا نهاوند خلي خواتج ياخذن اي شي يريدنة من الثلاجة لاتحرميهن من شي ترة اني مو صداقة وية هالاكل وبدال ما يتلف وينذب خليهن ياكلنة ـ صرت بنص هدومي من الفشلة دنكت راسي ومكدرت ارفعه ـ مو قصدي اسمعكم ولا اتصنت عليكم بس تعرفين يعني احنة بيت واحد وصوت الطفلة اجئ باذني ـ مــ مو اني ـ لا تخجلين .. اني حلفتج تخليهن ياكلن لا تمنعيهن من شي خطية بعدهن صغار ويريدن كلشي .. وياعمي عود من يصير عندج والله يسهلج رجعيلياه ـ اشكرك اخ ياسر ماقصرت ـ يابة قابل شمسوي ترا والله اني هذا طبعي مابقي شي بالثلاجة كلة اخذة لبيت اميل لان ما اكلة ولا احب اكل لوحدي وحتئ من اروح لاهلي بسنجار همين نفس الشي اسوي وية اهلي واطفال اخوتي وخواتي احمل الهم كلشي بالسوك يلة ادخل عليهم ـ كل هذا ودكول شمسوي ـ حسيتهه خجلت .. وماحبيت اخليهه بهيج موقف .. يلة اخذو راحتكم اروح اكمل شغلي ومثل مكلتلج الثلاجة ثلاجتكم لاتخجلون.. ـ تريد اساعدك بشي ـ لا سلامتج ماعندي شي .. ـ ها يلة براحتك.. راح ياسر ودخل لبيته وسديت الباب التفتت علئ خواتي اريد اموتهن كتل بس خجلانة لاهمين يسمعني واتفاشل وياه باوعت عليهن بنضرة غضب ماطايقة اشوفهن اجني يمي وكعدن تلاثتهن سوية خطية يكسرن الخاطر كلبي انكسر عليهن من هيج شفتهن نضرات عيونهن كسرت خاطري .. ماطلبن شي غير اكل مماكلاتة صار فترة طويلة من جانت امي عايشة اكلنة وراهه نسينة هالفواكه .. اشرت بعيني لنغم يعني روحي اخذي الانناس وانطي لخواتج راحن يركضن اخذن الانناس وراحن كلهن يتفرجن فوك بالغرفة.. بقيت وحدي بالمطبخ شفت شنو عندي مسواك سويت تبسي ناشف مطبك علئ دجاج وتمن ابيض .. كملت التبسي ودخلتة الاوفن شوي ياخذ طعم الشوي.. ثرمت زلاطة لهانة وخس وطماطة وليمون و خليت المواعين بالصينية سويت صينية كاملة ودزيتلة الغدة بيد نغم .. اخذيهه دكي الباب وانطيهيا ـ اي ـ اسمعي لا تدخلين جوة بالهول من الباب انطيه ـ اوك جيبي ـ ديري بالج توكعيهه ـ شبيج نونة ترة كبرت .. ـ ههه فدوة للحلوة الكبرت يلة انتبهي حبي.. بقيت واكفة انتضرهه دكت الباب وطلع ياسر نغم ـ عمو هذا الغدة الك بالعافية ـ الله يعافيج وعاشت ااايدج عمو حبيبتي .. ـ لا مو اني هاي نونة طبخته ـ يابة وعاشت ايد الطبخه همين لمحت نهاوند تباوع علئ نغم من باب المطبخ من شافتني راسا ختلت ورة الباب.. ـ عزة شلون فشلةة شافني اباوعله من ورة الباب خرب حظي هسة شيكول علية ـ شلت الخبزة من الماعون وكفخت بوجهي ريحة الاكل مو طبيعية شكد طيبة… اويليي شنو هالرريحة مال الاكل الله الله تبسي دجاج وبالفرن اووف شلون عرفتو احب التبسي صار زمان مماكلة .. ـ بالعافية عمو عود من تكمل جيبهن عفية نهاوند. ـ باوعت عليهه وخزرتهه ولج ياعوبة مو هيج ياسر ـ ههههههه صار نغم ـ يعني اقصد احنة نغسلهن ـ لا اني اعرف اغسل مواعين مارجع شي وصخ .. نغم تحجي ويايه واني عيني علئ نهاوند بس شافتني ختلت ورة الباب وبعد ماطلعت ما اعرف ليش الفضول ماخذني علئ هالبنية .. اقتنص الفرصة حتئ اشوفهه والمحهه لو احجي وياهه.. نغم ـ عمو تحتاج شي بعد ـ لا سلامتكم حبيبتي شكرا.. ـ العفو عمو .. اروح اتغدة ـ ههههه بالعافية راحت الطفلة وسديت الباب دخلت الصينية للبيت وكعدت حسيت بنفسي صدك جوعان الاكل ريحته وشكلة تشهي والتبسي مبين متعوب عليه باوعت علئ الزلاطة حاطة بيهه لهانة وخس ضحكت بعدهه متعرف شي عن دينا ومتعرف شنو المحرمات عدنا.. شلت ماعون الزلاطة وخليتة علئ جهه ورحت للمطبخ مالتي جبت شوي طرشي وكعدت اكل التمن والتبسي صفنت علئ نفسي مستغرب بوقت قياسي وبدون تردد قسمت بيتي وخليته يصير بيتين وتحملت مسؤليتهن هية وخواتهه بدون حتئ ما اعرفهن زين ليش هالكد مهتم بهالبنية اني من دين وهية من دين ثاني لا ديني يسمح بهذا الاهتمام ولا حتئ دينهه يسمحلهه بهالشي طول هالفترة لازكة براسي لززك ماكدر اذا ما افكر بيهه واتخيلهه كدامي.. يجوز بسبب الضروف الغريبة التلاكينة بيهه هيج معششة براسي يجوز تعاطفت وية ضروفهه.. ما ادري بس اكيد الايام الجاية كفيلة تحل كل شي واعرف حقيقة مشاعري تجاهه وان شالله تكون مشاعري مو حقيقية لان هيج علاقة مستحيل اتم.. سمعت صوت خواتهة الصغار يضحكن ويلعبن .. حسيت هالبيت صار بي روح ونفس جانت ايامي كلهه تتشابه وروتينية ولون واحد بس هسة غير شكل اكو ضحكة وهوسة ولعب اطفال بالبيت احس الدنية صارت ملونة ومو روتينية وممله كل هالاشارات تكلي لاتفكر وخليهه علئ الله هية مجرد بنية عابرة مرت بحياتي باجر ان شالله تستقر احوالهه وتروح لحال سبيلهه ويرجع كلشي لوضعه الطبيعي.. ويكفيني شرف اكون جزء من استقرار هالبنات اليتيمات .. بالتفكير بيهة انتبهت علئ نفسي ناسف المواعين نسف ماضل شي بالصينية حتئ الخبزة ماكلهه بحياتي ما اكلت هيج كمية جبيرة دائما ماعوني يرجع بي شوي اكل اشو اليوم المواعين فارغة هههههه بس والله طبخهه طيب عاشت ايدهه خلصت اكلي ورحت غسلت المواعين بس استحيفت اذب الزلاطة بالزبل خطية همة ياكلون اللهانة والخس وهذا مسواكهه ليش اذبه .. اخذت الصينية ودكيت الباب عليهم نهاوند ـ من دزيت الاكل لياسر صبيت غدة لخواتي وكعدنة نتغدة بس خلصن الوكت خواتي يضحكن ويلعبن .. بعدنة ماخلصنة ودك علينة الباب ياسر عرفت هو ورحت فتحتله الباب .. ـ عاشت ايدج الاكل كلــش طيب ـ صدك والله الف االف عافية .. شفت الزلاطة مماكلهه.. اظاهر الزلاطة ماعجبتك ـ لالا مو هيج بس اللهانة والخس ما ناكلهه احنا ـ يااا يعني متحبههن مادري بيك متاكلههن ـ هه اي منحبهه ومناكلهه ابد ـ استغربت منة اشو يحجي بصيغة الجمع.. منو تقصد بـ أحنة.. اكو احد وياك بالبيت؟ ـ اقصد احنا الايزيديين ما ناكل اللهانة ولا الخس نحرمهه بديننا فـ كلت حرامات اذبة لان انتو تاكلو عادي فـ ليش ينذب .. ـ صدك والله؟ زين ليش حرام شبيهن ـ يعني امور فلسفية ودينية يطول شرحهه ـ يا اسفة خليتك واكف وبيدك الصينية .. اخذت الصينية منة وخليتهه علئ السنك يحتاج تكتبيلي بورقة وقلم شنو الحرام بدينكم ومتاكلو حتئ ما اجيبة ـ ﻻ شنو هالحجي ليش اقيدكم ـ لالا بالعكس منو كلك اتقيد عادي تمون ـ ابستمت الهه وكلتلهه الله كريم.. راح اطلع شوي وارجع محتاجة شي ـ لاسلامتك ـ لاتفتحين الباب لاحد مثل ما اتفقنة ـ اي ان شاالله.. راح ياسر ودخلت قفلت باب البيت خلصت تنضيف المطبخ وصعدت ارتب ملابسنة واغراضنة يحتاجلنة كنتور صغير يلم هدومنة لان مطشرة يلة تدبر ان شالله اهم شي البيت اتدبر انتبهت علئ تلفوني مخلص شحن وطافي خليته علئ الشحن ورجعت ارتب الاغراض ..خلصت واجيت للتلفون فتحته شفت هواي ارقام متصله عليه ومراسلتني كلبت بيهن اكو ارقام غريبة مابيهه اسماء بس اتفاجئت موجود اسم ريتال بينهم بلة هاي شذكرهه بيه هسة؟ و ليش اتصلت عليه شتريد .. عفتهه وكمت اكلب بالرسايل هاي الارقام الغريبة دازتلي تهديد مشيت بالرسايل بالسرة اقراهن ـ اني ام محمد .. نهاوند فدوة اروحلج الله يخليج ارجعي واني اشهد وياج علئ منال واكلهم شكد تاذيتي واتعذبتي علئ ايد هالحية ورجلهه وحق ابني وحيدي محمد الماعندي اغلئ منه انيي اشهد وياج وماخليهم ياذوج ولا يجيسوج بشي انتي وخواتج بس ارجعي واني اوكف بوجه اكبر واحد وماخلي يأذييج ااابد بس ارجعي لخاطر الله وج بنتي انخرب بيتهه وعمهه ابو زوجهه قافل ميقبل يرجعهه الله يخليج تعالي وخلي عمهه يشوفج انتي وخواتج بلكي يقتنع يرجع بنتي لابنة نهاوند الله يخليج ياعمة شاكين بجيداء حامل تعرفين هية بعدهه عروس ورجعوهه علينة اتحطمت حياتهه وهية بعدهه باول شبابهه واول حياتهه تقبلين هالطفل يتربئ مثلج بدون ام واب وانتي جربتي هالشعور تقبلين طفل ماله ذنب يعاني هيج معاناه الله يخليج نهاوند انتي همين انظلمتي واكيد متقبلين بالظلم لغيرج .. ـ شفت الرساله مارديت عليهه زين يعني تعرفين يالحية اني وخواتي عانينة بسببكم وعود هاي كل عقلهه دازتلي هيج رساله تتصور اضحي بحياتي وحياة خواتي علمود جيداء العوبة الضربتني واذتني وسمعتني اشكال حجي هية وامهه.. ولو خطية ابنهه بس اكيد ماراح يتأذة مثلنة لان خوات جيداء وامهه وابوهه موجودين ويحبوهه اوي.. شسويلهه ياروح مابعدج روح طبهم مرض لعد ما حسبو من اذونة هيج راح يصير بيهم.. رحت للرساله الثانية ولكيتهه همين من ام محمد اهووووو لزكة هاي ـ نونة شنو تريدين ضمان اني جاهزة شترريدين واللله العظيم اااني جاهزةة بس اررجعي عندي خمسسس بنات نهاوند وين اوولي بيهن صارت علينة سمعه مو حلوة بين الناس وراح تطلع علئ جلد بناتي شنو ذنب بناتي يتاذن منال هية الاذتكم لازم تأذيهه بس الهه ليش اتاذينة احنة همين بس ارجعي واني وانتي وبناتي كلهن نتكابل عليهه ونخليهه تعرف الله حق بس اارجعي الله يخليج وشوفي شنو راح اسوي بيهه ـ ضحكت من هالجرايد الكاتبتهه ام محمد ماجاوبتهه بس سجلت اسمهه علئ الرقم بالتلفون .. طول هالفترة جنت يمهه ما فكرت تاخذ رقمي وتسئل عني بس هسة صرت مطلوبة ويدورون ارقامي ويتصلون عليه اوي خلي تولي .. رحت علئ الرسالة الوراهه همين من رقم مجهول قريت اولهه وتيبست بمكاني ـ وج ليش يابنتي هيج تسووين هية هاي اخر تربيتي بييج ليش هيج سويتي كسرتي وجهنة بين الناس ليش ولج احنة بيت حجي حمزة الكل يحلف براسنة بالشرف والعفة تالي تنهزمين وية صديقج يااا مصخمة الوجه يااا ادبسزز ربيتج خمس سنين ماطمررت بيج الترربية لج ياقليلة الادب بناتي بكندااا ربيتهن بنص الحرية والديمقراطية والمصاليخ بالشارع يمشون ماااسوون سوايتج معقولة هيج طلعتي ادبسزز وفلتانة فد مرةة وانتي هنا بنص عمامج لعد لو ماخذج بكندا جان شسويتي انتي ااتربيتي ابيت حجي حمزةة المفروض تصيرين مثال للعفة والشرف تالي هيج تطلعــــين ااااخ ياااابنت الكلبب يكون الزمج واشرب من دمج يا بنت اخوية الناااااار ولا العااار يانهااوند يابنت فؤااد ولااااازم اغسل عاارج بيييدي ـ ضحكت علئ نفسي من عرفت هذا عمي عماد ابو اسلام والله عبالي ابوية فؤاد دزلي رساله من كبرة .. خرب شلون عقل عندي بعدني متأثرة ابيت الاشباح الكعدنة بي يو بسم الله الرحمن الرحيم رديت قريت الرسايل الوراهه همين من عمي عماد عماد ـ عندي عرف جبير بالدولة وراح اجيبج من جوة الكاع وين تروحين من شمال العراق لجنوبة راح افلس بيت بيت وادور عليج بكل بغداد طول بعرض وراح اعمم صورج علئ السيطرات كلهةة يعني تصير صورج بكل سيطرات العراق واليدليني عليج انطي مكأفئة جبيرة يعني اوصلج اوصلج وووين ماتكونين اني عماد وتعرفين منو عماد لا ارشد ولا ناصر مثلي ارجعي بكرامتج احسن ما اجيبج سحل من شعرج انتي وخواتج واخليج فرجة ومضحكة لليسوة والميسوة ـ والله يا الله كاعد يرزلني يحملني الذنب علئ العيشة المرفهه الجنت عايشتهة فوك الهم والحمل تعلاوة والله.. بقيت اكلب برسايل التهديد مالتة اقراهن وميخلصن خلص كلبي من كلامة شنو هذا عبالة جنت عايشة بجنة واحسن عيشة اكيد هالحقيرة منال محشية براسة.. زين ام محمد مو تكول ارجعي واني اسندج اشو ماحجت شي لعمي عماد كلهم كذابين ومابيهم خير مكدرت اتحمل رسايله عماد اكثر رغم خفت وانرعبت من كلامة بس مكدرت اسكت راسا دزيتلة رساله كلش طويلة شرحت بيهه كل الصار بية من راح وسافر وعافني هو وعائلتة بالسكته بدون حتئ ميودعوني لان اصلا محاسبيني بنتهم حجيت كل الكلام الجان مكتوم بكلبي وما اكدر احجي وجه لوجه لان اخاف من ضربهم وقسوتهم دزيت الرساله اله بس مانرسلت كلهه نصهه راحت جنت كلش مرتبكة وخايفة وايدي ترجف من الحجي رديت كتبت الباقي من الحجي مرة ثانية ودزيته ورأسا شمرت التلفون كلبي يرجف ومرتبكة.. شفت خواتي غفن ونامن واني انزويت لوحدي بالغرفة كمت اتخيل عمي لكاني ودخل بهالبيت وسحلني اني وخواتي يمةة عزة بعيني عزة بعيني الله لايكولهه يارب .. ااش اهدئي وين يلكاني عماد قابل عندة مصباح علاء الدين ويجيبني .. بس هو جان بكندا يمكن صدك عندة عرف بالدولة ويلكانة الله يستر يارب الله يستر رجعت اكلب بالرسايل هواي ارقام مجهولة مراسلتني اغلبهه من عمامي ناصر وارشد زين اذا هو يكول عندي عرف بالدولة واكدر كلشي اعرف عنج ليش ماعرف اني اتزوجت صباح غصبا عني ونطوني لان ابوه يطلبهم بالفايز وليش ماعرف عمامي شمرونة بالشارع اني وخواتي وليش ماعرف ابو صباح شلون جان ويايه .. خلي يولي هالكذاب كادر بس عليه يطلع عظلاتة.. احاول اطمن نفسي باي طريقة كانت حتئ كلبي شوي يرتاح كاعدة افكر بعماد واجاني اتصال منة عوذة.. جبنة سيرة البزون وتكامزت كدامنة لو جايبة سيرة فلوس متجيني بهالسرعه لغيت الاتصال ورحت كملت الرسايل اريد اشوف ريتال شبيهه ريتال ـ شلونج نهاوند شخبارج مشتاقتلج ـ من قريت رسالتهه حنيت الهه وردت اراسلهه بس ماعرف ليش ماسويتهه هية كلش حبابة جانت وياية وما انسئ وكفاتهه بس انكلبت عليه من صباح قتل ابوهه.. كلش دخت وضجت من التلفون لان خبصني عماد كل شوي يدك كلما يتصل روحي تروح من الخوف وايدي تكوم ترجف رغم اعرفة كذاب بس ماعرف ليش خايفة.. شبيج يولي قابل شمسوية حتئ لو يتهموني بشرفي الله يعرف الحقيقة وهو الي يخلصني اني وخواتي كافي خوف ورجف علئ شنو همة الغلطانين مو اني مهتميت الة .. طفيت التلفون وشمرتة بعيد وتمددت بمكاني ثواني وغفيت وماحسيت علئ نفسي بعد كعدت متكسرة من النوم شفت خواتي مو يمي نازلات جوة والشمس داخلة من الشباك شنو هاي شكد نمت يمكن ساعه ما ادري .. جريت التلفون شفتهه ساعه عشرة صفنت علئ روحي .. شلون بالعشرة والشمس هيج طالعه الحان ـ هلاااو نونة ـ هلو حبيبتي .. اكيد جوعانة وتريدين عشئ ـ يا عزة ياعشئ ههههه هسة صار الصبح شكددد صارلج نايمة من البارحه نكعد بيج متقبلين تكعدين ـ انصدمت من كالت صاير الصبح لا ممعقولة يا صبح هذا ولج ـ والله انتي نايمة من البارحه وهسة كعدتي ـ يعني هسة بالعشرة الصبح؟ ـ ااي والله ـ من عصر البارحه لليوم الصبح يلة كعدت ضحكت علئ روحي من عرفت هالكد نايمة مغطت جسمي وكمت من مكاني صار سنين منمت هيج نومة مرتاحه نزلت غسلت وجهي ورحت احضر الريوك لكيت خواتي ماكلات الاكل البثلاجة عزة بعينجن ماكلات اكل الولد ممبقيات شي .. نغم ـ هلو نونة صباح الخير ـ صباح النور .. ليش هيج نغم ليش خليتيهن يخلصن الثلاجة هيج ممبقيات شي للولد ـ مو انتي البارحة نايمة وهنة جاعن و يريدن عشة شكد كعدت بيج بس انتي ماقبلتي تكعدين عاد كابلنة الثلاجة وكعدنة ناكل وهسة همين كعدن جوعانات ـ خزيتني هو هيج الياكل ولجن ممبقيات شي بالثلاجة فرغتنهه ـ لا بقينة هواي والله شوفي ـ اااش كافي امشي روحي لمي الفرش من الغرفة خلي اسويلجن ريوك راحت نغم فوك وكعدت اسوي الريوك سويت بيض عيون الخواتي وحليب وجاي وخبز.. بس ما اعرف ياسر شنو ياكل وشنو يحب شنو يكره البارحة خليتلة لهانة وخس وما اكلهه يكول حرام.. سويتلة كيمر وجبن وبيضتين عيون وصبيتلة جاي وخليت علبة الحليب وياهه وخليتهن بالصينية خلي هوة ياكل ويخلي اليعجبة .. قبل لا اخلص ريوك خواتي تعاركن وصارت هوسة بالبيت خصوصا صبا والحان لازم يتعاركن من الصبح لليل .. نغومــة حبيبتي وينج ـ ها ها ـ تعالي حبابة اخذي هالريوك لياسر.. انطيهيا من الباب ورجعي ـ اوووكفي اااااريد اروح للحمام ـ ولج تعالي شبيج بس انطيهيا من الباب ـ ما اكدر ما اكدر اريد ادخل للحمام ـ امشي ولي هسة الجاي يبرد.. اخذت الصينية ورحت دكيت باب بيتة ياسر ـ جنت متحضر اريد اطلع للشغل واندكت الباب عرفت هاي نهاوند لو خواتهه ـ صباح الخير ـ صباح الورد هاي شنو اشو سويتيهه صددك ـ لعد عبالك اكذب عليك.. بس البارحه ما سويت عشئ لان نمت وهسة كعدت ـ نوم العوافي حقج اكيد تعبانة ـ تفضل هذا الريوك الف عافية ـ مشكورة .. بس لاتعبين نفسج ميحتاج اني متعود اعتمد علئ روحي ـ نطيتة صينية الاكل ووكفت بالباب.. لا شنو اتعب نفسي.. قابل شمسوية هو نفس الاكل واطلعلك شوي منة.. ـ ممتعود احد يسويلي الاكل صار سنين معتمد علئ نفسي بهيج امور ـ هسة صار عندك اخت مو صحيح ـ أ.. أي ..وونعم الاخت ـ خلص لعد.. خليني اني اقيم بكل شي ـ صدكيني نهاوند ميحتاج اني نفر واحد واي شي اكل عادي حتئ لو صمونة وجاي ما اهتم.. يعني من سنين هذا نظامي ـ انت كلتهه نفر واحد .. وهالنفر ميأثر بشي علية نفس الاكل الناكلة اجيبلك منة لا تمانع عفية و خليني بواهسي ـ براحتج .. بس ماريد اتعبج ـ لا يا تعب يمعود حالك من حال خواتي ـ ههه ..ابتسمتلهه ودخلت الصينية علئ الطبلة.. ـ اخليك تتريك خاف تتاخر عن شغلك.. ومن تخلص جيب الصينية لاتغسلهه ـ مشكورة متقصرين ـ ابتسمتله ورجعت للمطبخ.. شفت الطرمة بيهه وصخ بزازين وشوي تراب.. عفت خواتي يتريكن و طلعت اغسلهه ترست سطل مي وبالماسحه انظفهه الجو بعدة بارد رغم صرنة بشهر الثالث و نسمة الهوئ عذبة تررد الروح رغم بيهه برودة بس ذكرني هالجو ببغداد من جانت تغيم وتصير نسمة هوئ باردة وامي الله يرحمهه تركض تسويلنة حامض شلغم وحليب وكاكاو حتئ لا نبرد سرحت بذكرياتي واني اغسل هالطرمة تذكرت جيرانة بيت خاله ام حسين وبيتنة وحديقتنة وطرمتنة ولمتنة من جنة سوية ماكدرت اسيطر علئ دموعي اخذني الحنين لهلذكريات غسلت الطرمة وكملت التفت لكيت ياسر واكف يم الباب .. انت هنا من زمان! ـ ما حبيت اطلع لان جنتي اتنظفين خاف امشي واوصخ المكان ـ لا يمعود عادي تعال فوت لا تهتم ـ مو اختي زينب تتخبل اذا احد يدوس علئ الارض وهية تنظف يمكن تقتلة ـ يا هههه لا اكيد تتشاقة وياك ـ اعرف بيهه عصبيا ما تتحاجة بهيج امور فـ اتجنبها ـ الله يحفظهه الك يارب ـ يارب.. شفت وجهه احمر وعيونهه حمر هية بيضة وتضيع ملامحه بالبرد ماعرف جانت تبجي لو بسبب البرد هيج وجهه ليش جنتي تبجين؟ ـ ها .. لاماجنت ابجي ـ بس عيونج حمرة ومبينة حزينة صاير شي ـ بقيت ساكتة اتمنة افتحلة كلبي واحجيلة كل الصار بحياتي واكلة اني مطلقة ومسجونة بتهمة جريمة قتل وهيج صار ويايه .. عاف مكانة واجئ وكف يمي ـ اتمنيت امسح دموعهه بيدي واواسيهه احس اكو شي جبير صاير بحياتهه مو بس فقدان امهه وابوهه ومعاناتهم اكو شي اكبر صايرلهه هالحزن بوجهج ميتفسر انتي مو تعتبريني اخوج ـ اي ـ لعد ليش متحجيلي وتفضفضيلي احسج شايلة هم جبير فوك راسج ـ باوعت عليه ومتحملت راسا بجيت وللحكاية بقية….. 🥀