الفصل 4
*📚قصص||روايات||منوعة📚*
_*بإدارة 📚قصص||روايات||منوعة📚*_🧡
*❴📖❵التوقيت وما وراءه*
*❴🔢❵الـــبـــــــــــ❴الرابع❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
*❴📚❵↵القناة:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*https://whatsapp.com/channel/0029VaNMcGuHFxP9VtPQOm2A*
*📚قصص||روايات||منوعة📚*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *يمان سعيد* 🧡
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
https://whatsapp.com/channel/0029VaNMcGuHFxP9VtPQOm2A
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
📚كتب ||روايات|| منوعة📚:
#التوقيت_وما_وراءه_11_11_قصص
#التوقيت_وما_وراءه_11_11 #التوقيت_وما_وراءه_11_11_4
الحلقة الرابعة
@rwayate
قمت من سريري وتركت التلفون عليه.. كانت ياسمين بترجف وأنا طلبت منها تبقى بالغرفة.. مانعت وحكت الكلام يلي سمعته بخوّف.. نحنا شو بصير معنا.. لا تتركيني هون.. مو قادرة أضل بالغرفة.. قلتلها طيب تعالي.. فتحنا الباب وطلعنا للصالة.. طلبت من ياسمين تشوف باب البيت إذا مقفول كويّس.. قالت مقفول.. والطابق فاضي ما في حد برا الشقة.. دخلنا على غرفة ماما شفناها نايمة.. قلت لياسمين متى نامت؟.. حكت من دقايق سمعت صوتها.. قرّبت منها وحسّيتها غافية تماماً.. وعلى الكومادينو دلة قهوة وفنجانين.. استغربت وتفقّدت الغرفة.. كل شي مستتب وهادي.. قلتلها إطلعي.. طلعنا وقفلنا الباب عليها.. أخدتها للغرفة وحكيتلها شو سمعتي بالزبط؟.. قالت كانت بتحكي مع وحدة وبتقلها انتحري وموتي وإنتي لازم تموتي.. وفجأة تغيّر صوتها وكأنها بتحكي مع واحد.. وبتقلّه استنيتك ساعتين لجيت ليه تأخرت.. البنات نايمين وأنا لوحدي من الظهر بستناك ويلي بدك ياه عملته!.. وبعدها صوتها انخفض كتير وصارت تحكي كلام ما قدرت أسمعه بس الأهم تقريباً ما سمعته!.. مين كان معها ومع مين كانت تحكي!.. قلتلها فنجانين قهوة على الكومادينو.. يبقى كلامك صحيح.. حكتلي صدقيني ما بتوهم.. مو انتي بتغضبي بس نقول انك عم تتوهّمي.. أنا سمعت أمي ومن ارتباكي كان بدي أسجّل صوتها لتتأكدي.. أنا لسة خايفة!.. حكيتلها بتتذكري أي وقت سمعتيها ؟!.. قالت من دقايق بس الوقت ما بركز أنا مو متلك ريحانة!.. حكيتلها أمي نايمة وواضح على وجهها إنها ما كانت صاحية من دقايق والقهوة ناشفة بالفنجان والدلة باردة.. انتي ما شفتيها من دقايق.. حكت شو يعني أنا بكذب!.. قلتلها ايوه بتكذبي.. شفتيها من ساعة إلا ربع تقريباً.. الساعة 11.. أو 11:11.. قالت اكيد انتي مجنونة.. قلتلك ما بنتبه على الوقت ولا بهتم بأي تفصيل متلك.. ليه عم تكذبيني.. قلتلها اخفضي صوتك.. مو عليه هالكلام.. وين كنتي بعد ما سمعتي الكلام؟.. لأني مصدقك انك سمعتيها بس ليه تأخرتي لحكيتيلي!.. ارتبكت وما عرفت شو ترد.. حاولت تروح لسريرها لتنام.. رجّعتها وشدّيت إيدها.. وقلتلها عأساس تنامي بالصالة لتحضري فيلم.. تركتيني نايمة ودخلتي جوا.. شرشف الكنب مرتّب.. وريموت التلفزيون بمكانه.. بس فكرك اذا فتحتيه وخفضتي صوته بتكوني عملتي هيك للتمويه؟.. احكيلي وين رحتي.. لأنك كنتي سهرانة بالليلة يلي طلعت فيها لفوق وتكرر هالشي هلأ!!.. بصوت واطي قالتلي فعلاً إنتي بتخوّفي.. معقول قديشك مركزة!.. انتي كان لازم تدرسي تحقيق جنائي حبيبتي.. بلبقلك أكتر من علم النفس يا اختي.. ما عندي كلام احكيه بس اعرفي انه أمك مو منيحه.. قلتلها اعطيني نسخة المفتاح التاني يلي معك.. قالت لأ انتي عنجد انجنيتي!.. نسخة شو!!!.. عشان هيك طلبتي مني أتفقد البيت اذا مقفول!.. اتطمني المفتاح مع امك وحتى أنا ما بعرف وينه.. صارت تقفله وتخبيه لحتى ما تطلعي وتنتحري مرة تانية لأنه المرة الجايه الله اعلم شو بطلع معك.. اتركيني انام تعبانة وعندي جامعة.. قلتلها ماشي.. نامي.. بس ما رح أنسى يلي صار اليوم.. قبل لتنامي روحي اقفلي التلفزيون يلي شغلّتيه عالفاضي!.. اتطلعت فيّه بعصبية وطلعت من الغرفة وأنا بدأت أفكّر.. ياسمين وين بتروح؟.. وطريقة كلامها وتهربها بالليلة يلي قررت انتحر فيها بس سألتها ليه سهرانة كانت غريبة.. رن تلفوني.. استغربت لأنه كان رقم غريب.. رديت عليه.. كان الشرطي.. قليّ تم الكشف على الكاميرات اليوم.. وصعب نصبر للصبح لتسمعي هالكلام.. قلتله تفضل سيدي خبّرني.. قال شفنا الشخص يلي طلّع جثة إبن البواب من الخزان وحطّها بالأصنصير وكبس الطابق.. انفعلت واندهشت وطلبت منه يحكي.. قال واحد متوسط الطول.. لابس لبس أسود طويل.. ملاّية سودة!.. لا وجهه مبيّن ولا حتى إيديه.. وحتى جنسه مش معروف.. بس من حركة رجليه يبدو إنه بنت!.. الشب كان مقتول.. ونتيجة الطب الشرعي بتأكد إنه مقتول من يومين.. بدنا نسألك إنتي فعلاً بتعاني من شي نفسي؟!.. قلتله صح.. بس أنا ما قتلت.. صدقّني مو أنا.. قال بنعرف.. انتي بريئة.. تم الكشف على الكاميرات التانية.. بالوقت يلي كانت الجثة بتنسحب انتي كنتي واقفة جنب الباب يلي دخل فيه هالشخص لنفس المكان!.. حكيتله مو فاهمة.. فعلاً انا كنت جنب بيت الجيران بطابق 30.. بس شو معنى كلامك!.. حكالي البيت يلي كنتي واقفة عند بابه.. صاحب اللبس الأسود دخله!.. هوه موجود فيه!.. حكيتله متى دخله وانا كنت واقفة وما تحركت وصار الموضوع وطلعو الجيران وفتح الأصنصير وطلعو الجيران واجيتو انتو بعدها.. متى!.. حكا مشي من وراكي.. وما شفتيه!.. سكتت وما عرفت أرد.. قلتله سيدي أنا لازم أجي أشوف بنفسي.. بس صعب حالياً الوقت تأخر.. صحيح هالبيت شفت فيه شي غريب وكلام الجيران رعبني وما قدرت أتكلم.. حتى أمي ما سمعتني.. صدقني مو وهم!.. في شي صار!.. قال بعرف.. عدم ملاحظتك شدت انتباهنا..
يلي صار من بعد ما كنتي عند شقة هالشخص.. سمعتي صوت بالبيت التاني يلي هوه بيت الجيران ووقفتي تسمعي.. كنتي معطيه ظهرك للشقة يلي وقفتي عندها.. باب تماماً عند شقته.. ولمّا انفتح اني ما انتبهتي.. قلتله وكيف دخل وما انتبهت.. انا يادوب وقفت ثواني اسمعهم وحتى الجيران طلعو بسرعة.. حكا في دورية جاية تقتحم البيت.. حكيتله خبروني إنه الشقة مسكّرة.. قال ابقي سهرانة لأنك رح تدلي بأقوالك ولازم نعرف شو شفتي.. التلفون مو كافي.. الله معك.. زاد الخوف عندي واتخربطت.. ياسمين تأخرت.. فتحت الباب بهدوء.. لقيتها بتسمع أنا شو بحكي.. قالتلي أنا خايفة شو هاد الكلام يلي حكيتيه.. صارت تبكي.. هددتها وقلتلها لو ما قلتي هلأ وين كنتي.. رح اخبّر الشرطة بكل شي.. حكت أنا بحبه لعلي.. بالليلة هديك كنا سوا.. ونزلت معه على شقة فاضية.. أنا اسفه.. أنا سيئة وعديمة الترباية بعرف.. بس أنا ما دخلني بشي.. انصدمت وحكيتلها وشو صار؟!.. حكت كنا سوا وقليّ إنه لازم يصير بينا شي لأنه ماما ما رح تقتنع تزوجني لإبن بواب إلا بسبب.. وأنا وافقت!.. بالليلة هديك في حدا حاول يفتح علينا الباب تقريباً عند الساعة 11.. انتي كنتي فوق.. وانا ما كنت بالبيت فعلاً لأنك ما شفتيني بس طلعتي.. فهّمني إنه أبوه كشفه وهوه أكيد بحاول يفتح الباب لأنه شك فيه إنه ما راح على المينا وبده يبقى معي متخبّي بالشقة الفاضية وإنه مسؤول السكن هلأ نايم وما رح يراقب كاميرات الطوابق.. سألته كيف.. قلّي نوّمته.. تركته وفتحنا الباب وطلعنا.. وطلعت للبيت.. وهوه قليّ رح ينزل على غرفة المسؤول ليشطب الفيديو يلي تسجّل من هالوقت حتى ما يشوفونا.. كنت مرتبكة ودوّرت عليكي ما لقيتك بالبيت.. انبسطت بس قلقت وبعتله رسائل ريحانة مو بالبيت وخلصت وشطبتهم ما رد عليه.. واختفى تاني يوم لوقت ما عرفت إنه مات.. انا عنجد كنت بحبه وهاد كل شي صار صدقيني.. حكيتلها أي شقة كنتو فيها ؟!.. حكت يلي فوقنا.. حطّيت إيدي على تمي مصدومة وخايفة.. وقلتلها نفس الشقة يلي دخلتها!.. يلي جنب الجيران هدول بطابق 30!.. حكت صح وما فيها غير كنبة.. قلتلها وساعة!.. حكت ما انتبهت انه كان فيها ساعة.. ضربتها على وجهها وحكيتلها بترخصي نفسك لهالدرجة!.. حكتلي لا تقولي لماما ريحانة ولا للشرطة.. ما بدي انفضح.. نص السكان عرفو باللي صاير معك.. ما بدي انفضح.. قلتلها الشرطة لازم تعرف هالحكي.. وتعرف السبب يلي خلّا علي يحذف الفيديوهات.. لأنه يلي صار إنه بس نزل يحذف الفيديو المسجّل.. شافني طالعة على الأسطوح.. وطبعاً اني قلتيله أني حاولت أنتحر بالمهدئات صحيح؟.. قالت ايوه بعرف.. حكيتلها لهيك توقّع ليه انا طالعة ولحقني.. قالت مستحيل يكون طلع لفوق ليقتلك ريحانة.. تذكري صوت الشخص يلي حاول يدفعك كيف كان!.. انتي ما بتنسي.. تذكري ارجوكي.. مو علي يلي عمل هيك.. هوه طلع ينقذك وأنا متأكدة وبعدها شاف يلي دفعك وانقتل.. طلبت منها تهدى.. وحكيتلها ماما فعلاً كانت تهلوس ولا كان كلام منك لتغطي على يلي عملتيه!.. قالت انا ما بطلع ماما مجنونة عشان نفسي!.. انا مو هيك ريحانة.. أنا سمعتها بقسملك.. حكيتلها هلأ ما بدي أسمع صوتك.. التزمي الصمت والغرفة كمان.. لأنه الموضوع كِبر.. ولازم بنفسي اتصرف قبل لتنفضحي وماما تصفى بمستشفى المجانين.. طلّعت من جيبتها مفتاح واعطتني ياه وقالتلي انتي اذكى بنت شفتها بحياتي.. طلّعينا من هالورطة ريحانة أبوس أديكي!.. حضنتها وشعرت بدقات قلبها القوية الخايفة.. ووقتها حسّيت انه الموضوع اتطوّر وانه عيلتي الصغيرة يلي طول عمري خفت افقدها صارت على الهاوية.. وبرغم وجود كرم كرجل جنبنا بس ما كان بدي ياه يتدّخل لأني كنت مقررة إني ما بدي ياه من البداية ووجوده بحياته كان غلطة.. قامت ماما من النوم ويلي قالته صعقني.. حكت انتو كنتو تشربو قهوة بغرفتي؟.. قالت ياسمين لأ.. وأنا قلتلها لأ.. حكت مين حاطط فنجانين قهوة جنبي!.. وانا من أي ساعة نايمة؟.. استغربت ياسمين وأنا ما عرفت شو أرد.. قلتلها أنا كنت بشرب واخدتلك واحد فكرتك مو نايمة.. شربته وبعدها أجى تلفون من الشرطة وقمت ونسيتهم.. وانتي نايمة من المغرب ماما!.. حكت شو بدهم الشرطة؟.. قلتلها تقريباً عرفو القاتل وين متخبي ورح يجو بعد شوي.. انفعلت وقالت بدي هلأ احكي معهم!.. حكيتلها لأ صعب.. طلبو مني ما اتكلم أبداً.. أنا نفسيتي صفر ماما ومو قادرة أتخيّل أي شي تاني يصير!.. اتركي الموضوع ينتهي بهدوء لأنه بكرا بدي أكون جاهزة للعرس!.. بعتت رسالة لصاحباتي أمل وربى ولمى وأكّدت عليهم عالموعد وكان استغرابهم لسه قوي!.. بس بسبب شخصيتي ما كان في شي مستبعد.. بس ضروري أعيد نفس اليوم بنفس التفاصيل مع أي حد.. ووجودهم جسر لأوصل لمبتغاي لأني على قناعة إنه حتى هالشخصيات صعب يفهمو الكلام يلي لازم أقوله.. بقيت أفكر لوقت ما انطرق جرسنا.. فتحت أمي والشرطة طلبتني.. حكتلهم أمي بدي أروح معكم أشوف مين لقيتو!.. قال نحنا هون من نص ساعة وفتحنا الشقة.. قرّبت منه وقلتله مين لقيتو!..
حكا ولا حدا.. فاضية تماماً.. نفضناها نفض!.. قالت أمي مستحيل يعني تبخّر؟!.. حكيتله بدك تعرف شو شفت؟.. قال نحنا جايين لهالسبب.. حكيتله شفت بنت بتحاول تنتحر بحبل معلق بالسقف.. كانت حالتها متل حالتي.. انت مش حاسس إنه الموضوع غريب؟.. قال شو معنى كلامك الشقة مسكونة؟.. طلع فجأة أبو علي من الباب وقال لا تصدقهم سيدي البنت مجنونة وبتتهيأ أحداث وأشخاص.. والدها عايش ومفكّرة إنه مات لليوم!.. أكيد بتكون مضطربة وقتلت ابني الوحيد!.. شفت ماما انصدمت والشرطي وياسمين.. وامي انفعلت وحكتله انت عم تخبّص.. قلّها انتي قلتي إنه زوجك عايش وبنتك بتتوهّم.. فيكي تنكري؟!.. ارتبكت أمي وقالت للشرطي ما قلت هالشي.. هالزلمة كذاب.. زوجي مات من عشرين سنة!.. حكالها ممكن تفرجينا شهادة الوفاة؟.. قال الأوراق بقيت بالبيت القديم زمان بس فيك تعرف من خلال سجلات الحكومة المدنية.. طلبت من الشرطي أنزل بنفسي للشقة.. قال تم إغلاقها وممنوع تأجيرها.. رح تضل تحت المراقبة.. صاحبة البُرج السكني رح تشرّف لعنا بعد أسبوع.. لأنها بأمريكا حالياً وتواصلنا معها من خلال مسؤول شؤون السكان.. ووقتها رح نعرف قصة الشقة وسبب الشي الغريب يلي صار.. سألوني مين عندي أعداء.. جاوبت ما في.. كان بدي أقول سبب وجود علي فوق بس خفت على سمعة أختي.. ووقعت بين نارين.. لو قلت رح أفضح أختي ولو خبّيت رح يضل أبو علي مفكّرني أني قتلت إبنه والشرطة ما رح تعرف السبب يلي خلّا علي يطلع الأسطوح بالليل أبداً.. ولأنهم خبّروني إنه في مقاطع محذوفة بنفس التاريخ وهالشي زاد غرابتهم.. تذكرت كلام ياسمين بس قالتلي ما فيني بلاكي إنتي كل الناس بالنسبة لإلي!.. شفت نظراتها المكسورة وسكتت وكنت بعرف رح أدفع ثمن صمتي.. طلعو الشرطة وأمي دخلت تنام بعد ما تربست الباب بقوّة.. دخلت ياسمين معي للغرفة وحضنتني.. وسألتني عن كلام أبو علي.. قلتلها يمكن التاني صار يهلوس!.. لا تفكري بشي إلا بجامعتك ودراستك وارتكيني أحل الموضوع.. نمت ووقفت مخّي عن التفكير لأني كنت عارفة انه يوم بكرا رح يكون عليّه طويل ومرهق.. قمت على إتصال من كرم بكلام حلو وأسئلة متكررة عن يلي صار.. فهّمته كل شي وقلّي رح يمرلي بعد ساعة لياخدني على الصالون.. وأكدّلي إنه التوقيت تغيّر وأمه خبّرت المعازيم بالتغيير.. سجّلت لأمي على ورقة ارقام الناس.. فتحت الباب شفت طاولة عليها أكل وورد.. ناديت أمي شفتها طلعت من المطبخ ومعها ملاعق.. سألتها مين جاب الورد.. حكت كل يلي على الطاولة جابه كرم.. قلتلها من شوي سكّرت الخط معه متى جابهم؟.. قالت وانتي نايمة حبيبتي.. من وجه الصبح.. شايفة قديش بحبك.. وفي كرت جوا الورد.. إقرأي شو كتبلك.. طلعت الكرت.. شفت كلام حلو.. ما بدي تفكّري بأي شي.. حياتنا رح تكون أحلى ما بنتخيّل.. بحبك ريحانتي!.. قالتلي أمي.. حتى الأكل مزيّن بالريحان.. باستني وقالتلي ان شاء الله جوازة الدهر وبتمنالك حياة سعيدة يا عمري!.. تركت الطاولة ودخلت على غرفتي وامي مصدومة من ردة فعلي.. كنت حزينة عليه وعلى حالي.. أنا كيف اتركه!.. هيك شخص سهل ينترك بقرار صغير؟!.. دخلت أمي لعندي.. وسألتني شو فيني؟.. قلتلها ما بدي ياه.. اندهشت ولفّت وجهي بإيدها بعصبية لوجهها وقالتلي.. بشو قصّر معك لحتى ترفضيه؟.. شو عملّك فهميني!!.. قلتلها ولا شي بس أنا ما بدي أتزوّج.. هاد كان إختيارك واحد أجا من الباب هوه وأهله وأنا ما بعرفه ولا بعرفني وحبّني وتعلّق فيني.. كيف اقبل فيه.. صرّخت عليّه وحكتلي صرلك سنة بتعرفيه هلأ بدك ترفضيه عشان مين!.. في حد تاني إحكيلي!!!.. قلتلها لأ ما في.. بس أنا حياتي مخربطة وحاسة كل شي عم يصير هلأ إله علاقة بالماضي!.. وعم بحس فعلياً إنه روح بابا مو مرتاحة.. حكتلي إنسي الماضي.. إنسي أبوكي.. إنسي كل شي!.. صرت أبكي وقلتلها ما تحكيلي أنسى.. هالكملة محذوفة من حياتي.. أنا ما فيّه أنسى.. أنا دارسة علم نفس وعارفة مرضي!.. إقتنعي إني صعب أنسى.. قالتلي الشب مو مقصر معك لدرجة إنه ناوي يفتحلك عيادة!.. تخيّلي!.. الصبح لسه بقلي رح أعمللها كل شي بتتخيّله.. هاد جزاته؟!.. بدك تفركشي العرس لحتى يقولو هوه تركها.. إعرفي إنه الناس ما إلها إلا الظاهر.. ما بدنا ننفضح!.. صرّخت عليها وقلتلها لسه همّك الناس.. إفهمي إني عم بموت من جوا!.. انتي حتى موضوع العرس هامك أكتر من إنهم يشوفوني مجرمة.. صارت تبكي وقالتلي وإنتي ما بتعرفي شو فينا وشو بنحس وقديش خايفين عليكي بس إنتي أنانية!.. شايفة يلي فيكي ومو شايفة يلي فينا.. حتى أبوكي مو مرتاح!.. اتطلعت فيها بهدوء وقلتلها انتي كيف عرفتي؟.. ارتبكت وحكت بحلم فيه.. حكيتلها أنا سمعتك.. سمعتك هون وما كنت وقتها نايمة وسمعت كلامك مع أبو علي.. قلتيله إني مفكرة بابا لليوم إنه ميّت!.. بالرغم إني متأكدة إنه مات!.. فهميني هلأ شو قصدك!.. حكتلي أبوكي مو ميّت.. انصدمت وطلبت منها تفهّمني.. قالت مو ميّت.. لأنه يلي مات مو أبوكي!
يتبع..
Mahmoud Salloum