الفصل 1
*📚قصص||روايات||منوعة📚*
_*بإدارة 📚قصص||روايات||منوعة📚*_🧡
*❴📖❵التوقيت وما وراءه*
*❴🔢❵الـــبـــــــــــ❴الاول❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
*❴📚❵↵القناة:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*https://whatsapp.com/channel/0029VaNMcGuHFxP9VtPQOm2A*
*📚قصص||روايات||منوعة📚*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *يمان سعيد* 🧡
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
https://whatsapp.com/channel/0029VaNMcGuHFxP9VtPQOm2A
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
📚كتب ||روايات|| منوعة📚:
#التوقيت_وما_وراءه_11_11_1
الحلقة الأولى
@rwayate
* ملاحظة : الحالة التي تحكي عنها القصة هي حالة حقيقية يعاني منها 20 شخص فقط في العالم وتسمى هايبرثيميسيا أو متلازمة فرط الإستذكار التي يتذكر فيها الشخص كل تفاصيل حياته منذ الولادة وحتى الممات.
بيحكو إنه البشر لمّا يموتو بيمّر شريط ذاكرتهم قدام عيونهم من الولادة لوقت الوفاة بلحظة سريعة.. وبشوفو تفاصيل حياتهم يلي عاشوها كلها من أصغر لحظة لأكبرها متل فيلم سينمائي مدته أقل من جزء الثانية.. تفاصيل صعبة ومؤلمة وحلوة وتعيسة وسعيدة!.. لكن كل هالتفاصيل ما بكون إلها قيمة بلحظة ما الروح تطلع.. وما بيشعر الإنسان بقيمتها.. لأنه بعد ما تختفي مش ممكن تأثر فيه.. لو كان في إنسان على وجه الأرض عم بعيش هاللحظة كل يوم بحياته بشكل متكرر.. وبأدق أدق التفاصيل الصغيرة شو كان صار؟!.. أيوه ممكن.. وهالإنسان موجود حالياً.. هوه شخص من عشرين حالة في العالم عم بعيش هالحالة.. حالة بمشاعر صعبة صعب يوصفها أي كلام.. جنون مستمر ما في إله نهاية.. ولحتى ينتهي بقرر النهاية بإيده بلحظة الإستسلام.. بتقديم الزمن للحظة الموت.. لعيش الحالة مرة.. مرة أخيرة ووحيدة ليرتاح من وجع التكرار.. هالإنسان هوه أنا.. انحكم عليّه أعيش وجع التكرار.. وجع التفاصيل.. وجع الذكريات.. صُور ولحظات وأحداث وتواريخ وأرقام وكلمات وأصوات وأسماء وروائح ومشاهد عم تمرق قدام عيوني متل ما صارت بلحظتها كل دقيقة ألف مرة.. وقرار تقديم الزمن يلي إخترته بإيدي لأرتاح كان هوه الإنتحار!.. يوم الخميس الساعة 10:7 بالليل من شتا آخر الخريف بآخر السنة.. قررت أنهي حياتي بأسوء طريقة.. وما كان موت سهل بمكان سهل.. قفلت غرفتي وطلعت من الشقة يلي عشت فيها بالطابق يلي أرقامه بنفس عُمري.. كانوا الناس ببيوتهم والشوارع فاضية.. ولأني عارفة إنه ما في حدا بستخدم الأدراج من السكان قررت أطلعهم ببطئ لأوصل للأسطوح بالطابق الأخير.. فتحت باب الأدراج وبدأت أطلع.. ذكريات عُمري عم تنعاد من جديد مع لحظات الأسبوع الأخير بشكل متكرر.. ذكرى حلوة وذكرى بشعة.. الذكرى الحلوة كانت ترجع رجلي درجة لورا.. والذكرى البشعة كان تقدّم رجلي خطوة للدرج لقدام.. ومع الحسبة الطويلة لعُمري.. اتضحلي بالنهاية إنه كميّة البشاعة كانت أكتر من الذكريات الحلوة.. وصلت الأسطوح.. فتحت بابه الحديد بصعوبة.. انا في الطابق الخمسين بأعلى برج في هالحي المشهور بالمدينة!.. كانت هالمرة هيّه تاني مرة بكل حياتي بطلع الأسطوح.. المرة الأولى بعمر التسع سنين والمرة التانية وأنا بالتسعة وعشرين من عُمري!.. تذكرت السبب وشفت اللحظة متل ما كانت عم تنعاد قبالي.. كنت لابسة فستان فيروزي صيفي ورابطة على شعري قماشة بلون نيلي.. شادّة على إيد كبيرة وبرغم المكان المخيف يلي واقفة فيه.. إلا إني حاسّة بأمان.. وصوت لسه بأذني وريحة لسه بين أنفي!.. بقرّب مني وبهمسلي بصوت ناعم وبوجه مبتسم وبقول.. يا ريحانة أبوكي.. طلعتك هون لأحكيلك كلام بيني وبينك.. وتكوني معي أنا وإنتي وبس.. بحضنّي وبدخّلني جواته وبقرّبني كتير لآخر الحفّة على نص الأسطوح.. بيحكيلي لا تخافي في سياج.. واتطلعي لتحت.. بزغلل عيوني وبحكيله خايفة يا بابا.. بقلي شو شايفة؟.. بحكيله ناس عم يمشو وسيارات بس كتير بعاد.. بغمّض عيوني وبيحكيلي فتحيهم.. بقلّه خايفة وبرجع بطلب مني أفتحهم.. بفتّح عيوني.. بهمسلّي وبقلّي.. شايفة الناس قديش صغار.. وشايفة انتي قديش كبيرة.. ما بدي ياكِ تخافي منهم لأنه كل البشر عندهم نقاط ضعف وقد ما كبرو وتغيّرو مصيرهم ينشافو بنفس هالحجم.. وخليكي كبيرة بعين نفسك.. ولا تسمحي للبشر يأثّرو فيكِ!.. اتطلعت على نفس المكان يلي كنت واقفة فيه مع بابا وقرّبت منه.. دخلت رجلي بالسياج وبدأت أطلع للحفّة.. إيدي ماسكة بعصا حديد وجسمي برجف.. وصوت بابا لسه براسي.. بدي ياكِ قويّة.. ولمّا يكون ربك القوي معك ما حدا من الناس ممكن يأذيكي!!.. صرّخت بصوت عالي.. بس كلّهم أذوني!!.. أنا تعبت.. شفت نفسي صغيرة وبقرّب من السياج وبحكيله أنا مو خايفة منهم!.. بدخل رجلي بالسياج وبحاول أوقع بمسكني وبشدّني لورا وببوسني وبحضنّي بسرعة وبنزلنّي.. بتطلّع وراي.. شايفته بسكّر الباب.. ببكي ورجلي لسه بتحف بالسياج ونصي برا.. بغمض وبهمس بحرقة وبقول.. يا ريتني وقعت من هديك اللحظة.. كنت مفكّرني مو خايفة بس أنا كنت كتير خايفة ويلي عملته كان متعمّد مش لأثبتلك عدم خوفي!.. أنا من هديك اللحظة كنت عم أتعذب وأخبي عليك!.. متت وتركتني أعيش الموت كل ليلة!.. وينك؟!.. سامعني؟!.. ليه صوتك أختفى!.. إرجع!.. وفجأة بسمع صوت همس من ورا خزانات الماء بيحكي.. أنا هون.. بتطلّع بكون نص الباب مفتوح!.. معقول الهوا؟!.. أنا ما كنت بتخيّل بابا طلع منه!؟.. بحكي مين هون؟.. الصوت بختفي.. بشتد الهوا والهدوء.. قرار الإنتحار ما اختفى من جواتي.. وأنا لسه مقررة أحطّم كل جزء بجسمي لأرتاح!.. بدخّل رجلي التانية بالسياج.. وبصير بالكامل برا على حفة البُرج!..
إيدي قابضة عالحديدة وبخطوة افلات وحدة بثواني معدودة بكون عالأرض.. بغمّض عيوني وشريط الذاكرة بيرجع ينعاد قدام عيوني.. مرة سريعة ومرة تانية أسرع ومرة تالتة بسرعة أكبر!.. بشّد على الحديدة خايفة وفجأة بحس بإيد بتلمس جسمي وبتحاول تدفعني لقدام!.. بتعلق رجلي بالسياج الحديد وإيدي بتبقى متمسّكة بالحديدة.. ما قدرت ألف جسمي وأشوف مين بدفعني من شدة التوتر.. وبصوت غريب بسمع واحد بقلي إنتي لازم تموتي!.. قبل لتقتلي نفسك أنا رح أقتلك.. بحكيله لأ لأ.. بشوف ذكريات حلوة فجأة بتمر قدام عيوني.. بترجعني لورا وبتخليني أتمسّك بالحياة.. عم بصرّخ بقوة وبمنعه يدفعني.. وأنا ماسكة الحديدة وشادة عليها بشوف إيدي.. وبإيدي نفسها كان في ساعة.. مضى ساعة وأنا لوحدي والوقت يلي انتبهتله وأنا بشدة خوفي كان الوقت 11:11 .. كنت بآمن طول عمري بأشياء غريبة بتصير بهالوقت بطريقة مش مفهومة وقت أنتبه فجأة على الساعة واحكي شي خاص فيني بقلبي.. وبالفعل كل مرة كانت تصير أشياء غريبة بحدوث هالوقت بالذات ويتحقق أحياناً يلي قلته جواتي.. إما بصدفة أو لسبب أنا كنت بجهّله.. قبل لينتهي هالوقت وتبدا دقيقة جديدة سمعت صوت باب الأسطوح بفتح بقوّة.. وصوت رجلين بتركض لعندي.. وإيد قوية بتشدني لورا وبتسحبني!.. بوقع على الأرض وبتضل رجلي معلقة بالسياج بس بعيدة عن الحفّة!.. بفتح عيوني بشوف قبالي الناطور أبو علي!.. بطلب مني ما أخاف متل ما قلّي بابا وبقرّب من السياج وبفك رجلي متل ما عملّي بابا تماماً بنفس التفاصيل وبحذافيرها.. وكأنه هالحدث رجع تكرر!.. قلتله انت كيف جيت وليش؟.. وكيف عرفت اني هون؟!.. حكالي الله جابني.. لو ما اجيت كنتي رميتي نفسك!!.. أنا طلعت لهون لأشوف خزان الماي للسكان يلي عايشين بالطابق التلاتين بسبب مشكلة!.. وما بعرف لو ما صارت هالمشكلة معهم كان شو صار!.. قلتله في حد هون معنا.. حكالي مين؟.. اتطلع حواليه وقلي هدوء وما في حدا !!.. حكيتله روح وشوف!.. هز براسه وقال ما بقوم ولا بتحرّك إلا لمّا أرجعك لعند أمك!.. شدّني من إيدي وبقيت أحكيله صدقني في حدا هون!.. نزلنا أول طابق وأنا لسه بتلفت لورا.. طلعني بالأصنصير ونزلني لطابقنا.. دق الجرس فتحتله أختي ياسمين.. استغربت ليه لهلأ ما نامت وكيف فتحت بسرعة وشو كانت بتعمل لحتى ما تأخرت بفتح الباب!.. شفت أبو علي بغمزها.. وكأنه بقلها لا تخلي أمك تعرف.. حسيتها عرفت شو كنت بعمل.. وحطّت إيدها على تمها خايفة وقالتله شكراً وقفلت الباب بالمفتاح.. دخلتني على غرفتي.. شافت طرف بيجامتي ممزوع وقماشتو مفروطة.. حكتلي هاد مزع.. سياج الأسطوح!.. كنتي بتحاولي تنتحري!!.. حكيتلها كنت!.. وبطّلت وكان بدي أرجع بس في حدا كان رح يقتلني.. أنا هلأ بدي أرجع أطلع فوق وأعرف مين!!.. مين يلي كان لاحقني وبده يموّتني!!.. قالتلي أنا غضيت نظر عن علب الأدوية يلي لقيتها بخزانتك وقلت حرام تعبانة وعم تاخد مهدئات بس الكمية الهائلة يلي لقيتها كانت بتوضحلي إنك كنتي عم تحاولي تنتحري!.. هالمرة ما رح أسكت.. حكيتلتها رح تقولي لأمك؟!.. قالتلي طبعاً رح أقلها لأنه مو معقول وحدة عرسها بعد يومين وتكون ناوية تقتل نفسها !!.. صرت أبكي.. قرّبت مني وحكتلي ريحانة أنا عارفة شو فيكي.. عارفة هالمرض شو يعني.. لعنة ذاكرة أبدية بعرف!!.. معقول تقتلي نفسك وما تحققي الحلم يلي كان عم يستناه أبوكي منك؟.. إنتي مو ناسيته لليوم بس نيالك عالأقل شفتيه وشبعتي منه بس أنا ما كنت واعية بس غاب عن الدنيا.. ما حضني متل ما حضنك وما دللني متل ما دللك ومع هيك عايشة وناسية.. قمت وفتحت الباب.. وقلتلها بدي أطلع أشوفه.. حكتلي ما في حدا إفهمي إنه هاد قرينك يلي بيحكي معك!.. هوه طلب منك تقتلي نفسك وتهيألك انه شخص بحاول يرميكي!.. والشعور بتمسكك بالحياة هوه يلي منعك مو حدا!.. قلتلها يعني أنا مجنونة وقريني عم يمشيني متل ما بدو؟.. صرّخت ياسمين صوت عالي.. ماما قومي من نومك!.. باللحظة يلي انفتح باب غرفة ماما.. سمعنا حركة واضحة برا.. اندق الباب.. حطّت ماما شالها على راسها وفتحت الباب.. كان أبو علي.. حكتله ماما خير شو في الساعة 12 ونص بعد نص الليل جايينا ؟!.. قال بدي أحكي مع ريحانة شوي.. قرّبت منه وماما مستغربة.. قلي بهدوء.. ما شفتي الشخص يلي كان معك عالأسطوح كيف كان شكله؟.. قلتله هلأ صدقتني إنه كان في معنا حدا!.. بدي أشوفه بدي أعرف ليه كان يساعدني عالموت.. قرّبت مني أمي وقالتلي شو كنتي عم تعملي عالأسطوح بهالوقت؟!.. سكتت .. صرّخت بوجهي.. طلبت من أبو علي يقلها.. قلها كانت بتحاول تنتحر!.. شدّتني من إيدي بقسوة وحكتلي بدك تفضحيني مع الجماعة.. عرسك بعد يومين يا قليلة الترباية.. بتتزوجي وبعدها بتموتي متل ما بدك بس لا تفضحيني.. لا تفضحيني!!!.. ياسمين قالتلها ماما شو هالأسلوب ليه هيك بتحكي معها.. مو خايفة عليها.. إعرفي إنها مو أول مرة.. ريحانة بتمر بحالة نفسية صعبة ومو هيك بتنحل الأمور.. بكت أمي وقالت أنا تعبت معها.. وهلأ عم ننفضح..
ابو علي استغرب وأنا كنت مُصرة أسمع باقي كلامه.. قلتله كمّل.. قال الجار يلي قلتلك عنده مشكلة بتوصيل الماي للخزان.. طلع على الأسطوح بنفسه لأنه ما في شغيلة ومصلحين بيجو بهالوقت ومرته بدها ماي ضروري.. شاف خيال شخص عم بتحرّك من ورا الخزانات.. فكرّه أنا وبعدين استوعب إنه تركني تحت ومش ممكن أوصل قبله بسرعة.. سأل مين في ما حد جاوب.. وبسبب أعداد الخزانات الكتيرة على الأسطوح يلي عاملين شكل المتاهة ما قدر يشوف كويّس واختفى بلمح البصر بعد ما سمع زقزقة صوت الباب الحديد.. اتوقع إنه حرامي لهيك صار يصرخ.. استغرب كيف حرامي يطلع على أسطوح بطابق خمسين وليش!.. هاد يلي استغربه وأنا استغربته ويلي استغربته أكتر من بعد ما رنّلي وقلي إطلع.. دوّرت معه ما لقيت حدا.. وبصراحة أنا ما كنت مصدق كلامك بسبب حالتك النفسية يلي لاحظتها عليكي بزياراتي لبيتكم لتلبية طلبات أمك لهيك فكرتك عم تتخيّلي!!.. قلتله يعني بكون راح!.. حكا الباب الخارجي مسكّر بالمفتاح وتأكدت بنفسي إنه مو مفتوح!.. يعني ما في حدا طلع من البُرج أبداً وهالشي مستحيل لأنه منفذ واحد وانتو بتعرفو بهالوقت بتسكّر الباب نهائياً بمفتاح خاص ووحيد بملكه أنا لسلامة السكان!.. اتطلعت عليّه أمي بخوف وقرّبت مني وحكتلي فهميني شو كان عم يعملّك وانتي بتحاولي تنتحري؟.. حكيتلها كان عم بساعدني لأموت.. كان بده أموت!.. وقلي بصوتو لازم تموتي.. معقول في حدا بتمنى الموت لإلي أكتر ما بتمناه لنفسي؟!.. مين؟!.. حكت أمي لأبو علي.. إذا الباب مسكّر يبقى ما طلع من هون.. وأنا بقول ومتأكدة إنه عايش معنا بالبُرج.. ضحك أبو علي بتوتر وقال يا ستّي هالبُرج خمسين طابق وفيه مية شقة!.. كيف بدنا نعرف مين يلي لحق بنتك من بينهم وبأي شقة دخل!.. قالت بدنا نعرف لأنه بنتي ما الها أعداء.. دخلت على غرفتي وصرت بفكّر.. لحظة الموت بلحظة الحياة انجمعو سوا.. والفاصل الوحيد يلي كان بينهم توقيت 11:11 .. دوّنت هالحدث بذاكرتي مع تاريخه وانحفظ متل كل التدوينات المحفوظة براسي متل الكمبيوتر تماماً.. وصرت برجع بالتواريخ لورا على نفس تاريخ اليوم متل تقويم رقمي بهاتف ذكي.. وكنت بقمة الصدمة.. أنا كنت مع شخص كان بحياتي وإختفى وتركني وحيدة.. ومن سنين ما شفته بس متل هالوقت كنت عم بفكّر فيه ومشتاقيتله ومن سنتين ونص بنفس التاريخ وصلتني رسالة منه.. هوه!.. معقول رجع وحاول يقتلني!.. مسكت التلفون وصرت ببحث على إسمه من جديد.. قرّبت ياسمين وقالتلي الساعة تنتين ونص.. ما تضلّي تفكّري إطفي الضو ونامي.. بكرا عندي جامعة وبدي أرتاح هالكم ساعة لأقدر أتحمل اليوم.. إنسي يلي صار واحمدي الله إنه كتبلك عُمر جديد وما متّي هالموته!.. لفّيت راسي عليها وحكيتلها أنا مو طبيعية.. قامت عن سريرها وقرّبت مني وحكتلي ريحانة حبيبتي أنا بعرف إنك مريضة.. ما تفهميني غلط هاد مو جنون هاد مرض نادر وممكن يتعالج.. ضربت على راسي وقلتلها ما بتعالج أنا قرأت عنه كتير.. حكت بس نحنا ما حاولنا.. خلينا نبدأ سوا.. حكيتلها أنا مو طبيعية مو عشان هالمرض بس.. قالت شو بتقصدي؟!.. قلتلها أنا كل ما بتمنى أمنية بوقت معيّن بتتحقق.. ضحكت وقالت هاد شي جديد بسمعه!.. يلا قوليلي شو طالع معك كمان؟!.. حكيتلها ياسمين لا تضحكي الموضوع جدّي!.. مرضي صار مكشوف لإلكم وانكشف لعيلتنا الحقيرة كمان!.. بس ولا حدا منكم بيعرف قصة التوقيت.. شفتها بتتثاوب ومو قادرة تتحمّل وقالت توقيت شو حبيبتي؟!.. شو رأيك تنامي وترتاحي وبكرا بنحكي.. قلتلتها ما رح أرتاح.. إسمعيني.. أنا صار بدي أعيش من بعد ما اقتنعت إنه في ناس بتمنّو موتي!.. وصار بدي أعرف مين يلي عمل معي هيك.. وكمان لحتى أعرف سر التوقيت يلي بتتحقق فيه كل الأمنيات.. أنا ليه بصير معي هيك؟.. معقول أنا خلقت بنت مختلفة لهالدرجة ومميزة عن كل البشر لسبب أنا ما بعرفه ؟!.. حطّت إيدها على خدّي وقالت.. أنا مبسوطة إنك بدأتي تحذفي من راسك فكرة الإنتحار.. ما بتعرفي قديش كنت خايفة عليكي.. أنا ما فيني بلاكي ريحانة.. إنتي الوحيدة يلي بتفهميني.. أكتر من أمي كمان!.. ما تروحي وتتركيني لأنه ما عندي ثقة بالناس وإنتي كل الناس بالنسبة لإلي.. قلتلها بوعدك ما أكررها.. صار بدي أعيش لأكتر من سبب.. قالتلي احكيلي قصة التوقيت بس بشكل سريع لأني كتير نعسانة!.. حكيتلها إنتي ليه كنتي سهرانة لهالوقت؟!.. شفتها ارتبكت وقالت كنت بشتغل على مشروع وانا نمت ساعتين بالصالة.. الظاهر انتي ما شفتيني وهربتي قبل لألمحك.. قلتلها باللحظة يلي كان بدفعني هداك الشخص وبحاول يحرف رجلي عن السياج لأوقع.. لمحت إيدي على الساعة وأنا متشبثة بحديدة.. كان الوقت 11:11.. اتمنيت بقلبي أمنية وقلت بدي يجي حدا بسرعة هون لينقذني بس لأقدر أشوف مين يلي بحاول يقتلني.. قبل لتنتهي الدقيقة كان أبو علي جنبي وبحاول ينقذني!.. استغربت ياسمين وحكت شغلة الأمنية ممكن تكون صدفة بس أبو علي قال إنه فكرك عم تتوهمي بسبب مرضك ولمّا كنتي عم تحاولي ترمي نفسك ما كان حدا جنبك!..
فهميني كيف الشخص اختفى بسرعة؟!.. وكيف أبو علي ما شافه!.. كيف قدر يعرف إنه أبو علي جاي للأسطوح بالرغم إنه صعب حدا يجي بهالوقت لفوق!.. ومعروف ما حدا بطلع بالأيام إلا لسبب قوي!!!.. صفنت فيها وقلتلها معك حق!.. لأنه إيده انسحبت من ظهري قبل ليفتح أبو علي الباب.. هوه كيف حس إنه في حدا جاي وهرب.. أنا حتى ما سمعت صوت رجليه عم يهرب لورا الخزانات!.. أنا مشوّشة.. قالت لو ما قال أبو علي إنه صاحب الخزان حس بوجود حدا وسمع صوت كان قلنا إنك كنتي عم تتوهمّي!!.. حكيتلها ولا شي توقعتوه مني إنه وهم كان وهم!.. كل شي كان حقيقي وحتى التوقيت مو صدفة.. بهالوقت بالذات كل ما كانت تصدف عيني عليه واتمنى امنية كانت تتحقق.. قالتلي معقول قديشك كتومة!.. أختي وبتنامي جنبي بنفس الغرفة وما بعرف هالشي!!.. ليه ما بتحكيلي!!.. قلتلها لأنك ما صدقتيني مرة.. ومن يومها بطلت أحكيلك شي.. قالت أي مرة مو متذكرة.. حكيتلها قبل 9 سنين.. اربعة وعشرين خمسة الساعة 8:42 دقيقة.. بس كنا بمطعم النيروز عم نتعشى.. كنتي وقتها لابسة فستان أخضر منقط أبيض قبته مربّعه وأنا كنت لابسة تيشيرت أسود مخطط رصاصي مع الكندرة يلي اشتريتها على ذوق امك وطلعت ديقة وما قبلت أبدّلها بحجة أتعلّم أقول إذا ديقة أو لأ بس أقيسها.. وقتها قلتلك إني شفت واحد شبه بابا بالزبط وملامحه بتشبهني كتير وكنت بتمنى اروح احكي معه لنتواصل.. بس يومها خفت من ماما بالرغم اني كنت بالعشرين من عمري.. اتطلعت فيّه مذهولة وقالتلي لهاليوم مو ناسية؟!.. أنا وقتها كان عمري 12 سنة وطبيعي طفلة ما تصدق أي كلام!.. بس ما توقعت تخفي عني كل احداث حياتك بسبب حدث بالنسبة لإلي محذوف من ذاكرتي وانتهى بوقته!!.. قلت ولا بنسى حدث.. حتى يوم ولادتك متذكريته بتفاصيله.. قالتلي يبقى لسه هالشخص بذاكرتك؟.. حكيتلها بتصدقيني لو قلتلك اني ببحث عن كل الناس يلي بإسم كنيته كل ليلة على الفيسبوك؟.. قالت مذهولة كيف عرفتي كنيته!!.. قلتلها الشب يلي كان لابس قميص خمري معه ناداه بإسم كنيته وأنا ضليت أبحث عنه لليوم.. قالت وشو بدك فيه ريحانة؟.. حكيتلها بدي افركش خطبتي عشانه وبدي أروح لنفس المطعم واتمنى يتكرر هالحدث متل كل الأمنيات يلي تحققت وما عرفتو عنها.. بدي أحكيله شي صار بهداك اليوم وبأيام تانية بتتعلق ببابا.. قالتلي وشو علاقته!!.. هوه ما بعرفك ولا انتي!.. حكيتلها حسيته بابا.. ما بتصدقي لو بقلك إنه أحاسيسي ممكن تطلع صح وإنه هالشخص بفكر فيني.. انا شفته لمحني واستغرب ليه كنت بتطلع عليه بهالطريقة.. حكت شخص شافك لثواني بده يضل يفكر فيكي بعد تسع سنين متل ما عم تعملي انتي هلأ؟!!.. هاد عنجد جنون!.. احكيلي شو بدك تحكيله.. قلتلها يلي ما قدرت احكيه لليوم.. قالت قوليلي انا اختك!.. حكيتلها أنا بحاجة إنسان غريب ما بربطني فيه أي علاقة يساعدني ومتأكدة رح يوقف جنبي بعد ما يعرف إني دوّرت عليه كل هالسنين بسبب شبهو القوي لبابا الله يرحمه.. شفت ياسمين خافت وحسّت إنه الموضوع فعلاً قوي.. وحكتلي ريحانة؟.. إنتي مخبّية علينا شي بخص بابا ؟.. سكتت واتطلعت فيها بدون لأتكلم.. قالتلي أنا كتير بشوف حلم بخوّفني بخُص بابا.. عم بشوفه جنب ناس محاوطينه بطريقة مخيفة ورايحين جايين وهوه بنصهم.. وبمُر حدا بالنص بعترض طريق رؤيتي وبعد ما يمرق بختفي بابا وما بشوفه بين الناس.. كتير تكرر هالحلم وكنت بخاف احكيلك ياه لأني بعرف إنك رح تخافي بسبب حبك القوي لإلو.. وبتذكر إني حكيته لماما مرة وحكتلي ضلي ادعيله أكيد بحاجة دعاءنا.. وإنه روحه جنبنا وحاسس فينا.. طلبت منها نزور قبره بس دائماً كانت بترفض بحجة إنك رح تتأثري لو رحنا على المقبرة بس ضل الحلم يتكرر وأنا ساكته والأغرب إني شفته مبارح!.. اتطلعت فيّه بخوف وقالتلي ريحانة.. بابا مات موته طبيعيه بسكتة قلبية متل ما بنعرف أو لأ ؟.. حكيتلها بصوت واطي وبهمس.. بابا مات قتل الساعة 11:11 دقيقة.
يتبع..
Mahmoud Salloum