الفصل 16
@riwait_221
📖 رواية أنتي حمول الوقت وأنا سندها .
(البارت السادس عشر )
.
وفي بيت ابو سند
كانوا مجتمعين على الغداء ماعدا العيال
ام سند بقلق : تاخروا صح؟؟
ابو سند بغضب : في قلعة وادرين ترا ماخربهم الا دلعك الزايد لهم خليهم عساهم ماجو وش تبين فيهم خليك في بناتك وبس
قام وتركهم والتفت ام سند بخوف: الله يسامحه بس
ساره: ماعليك يمه تلقينهم ضايقين عشان اليوم تاخروا واكيد بيروحون بيت عمي
ثريا: ايه اكيد
مزون: خلونا نرتاح شوي
ام سند بغضب: سكري فمتس ازين لتس
وقفت مزون وطلعت من المكان والبنات يهدون امهم المتوتره
_______.
وفي قهوة سعد
كان ينتظر مقبل يطل عليه يبيه يجي باسرع وقت وده يقول وده يفاتحه بالموضوع صار يحس مابينه وبين هيا الا شعره وهي كلمة مقبل
ترك بيالته ووقف وهو يناظر مع الدريشه لكن استغرب جيت الشرطه لمحله لكن عرف سليمان ( واحد من جماعتهم يشتغل فالشرطه)
طلع لهم ووقف واتجهه سليمان : سعد
سعد : امرني
سليمان : انا جايك من الشرطه مقبل عندنا وطلبني اناديك بسرعه
سعد : وشو مقبل ليه؟وش عنده؟ وش مسوي؟
سليمان: سوا سواة ما طمن ياسعد
سعد : اعوذ بالله انطق يا رجال اكلت قلبي
سليمان: تهاوش مع واحد بالسوق وضربه ضربه قويه على راسه والرجال فالمستشفى ماندري يعيش ولا يموت
انفجع سعد : وشووو وش تقول انت؟؟
سليمان: ماهوب وقت مزح يا سعدد جب ابو مقبل والحقنا قبل يصير شي ماهوب فالحسبان
سعد : طيب طيب
راح سليمان وركض سعد لبيت ابو مقبل وهو مايدري كيف بيقوله
_______.
وفي بيت ابو مقبل
كانو جالسين يشربون الشاهي بعد الغدا
ام مقبل : ليتك ما ارسلت مقبل الا بعد الغداء
ابو مقبل : ماعليه بيجي وبيتغداء
هيا: الله يعينه على الشموس
ابو مقبل : ماعليه الرجال تحمل
ام مقبل : الله يحفظه لعيني ولا يوريني فيه مكروه
ابو مقبل : كل هالدعاء عشان ارسلته يجيب سجاد اجل لو رايح يحارب وش بتسوين
ام مقبل : فال الله ولا فالك الله لا يوريني فيه مكروه
ابو مقبل وهيا: امين امين
وفي لحظة صمتهم دق الباب ووقفت هيا: اكيد مقبل
راحت وهي تفتح: وينك تاخرت
كان سعد ورا الباب وكان فالوضع الطبيعي بيستانس بس حالياً مايبي شي الا ان مقبل ينجى من سواته صد ووهو يقول ؛ نبي ابو مقبل يا هيا
شهقت هيا ورجعت بفشله: طيب
ركضت لابوها وهي متفشله من سعد وتحس وجهها يفور من الحراره : يبه رجال يبيك
كانت عارفته بس ماتبي تقول سعد
ابو مقبل : خير ان شاء الله
وقف وطلع وناظر سعد براحه: هلا يا سعد اذا تدور مقبل ارسلته لسوق
@riwait_221
#أنتي_حمول_الوقت_وأنا_سندها
___.
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇