انتي حمول الوقت وانا سندها - الفصل 12 - بقلم أديم الراشد | روايتك

@riwait_221 📖 رواية أنتي حمول الوقت وأنا سندها . (البارت الثاني عشر ) هيا: ايه انا مقبل : وش فيتس؟ وش جابك هالحزه ؟ فيك شي هيا : لا لا بس ضايق صدري وقلت اسولف معك قعد مقبل وهو متعود كل فتره يجتمع هو وهيا فالمقلط وكل واحد يسولف لثاني : تعالي تعالي افجري راسي بسوالفك كان يمزح وهو يموت في سوالفها جت هيا وجلست : تحملني اخر ايام عزوبيتك وبعدها بتصير تسمع سوالف ام العيال مقبل : متى على الله بس ابتسمت هيا : اييييه دامك جبت الطاري بقولك شي مقبل : اول شي انتي لللي جبتي الطاري وثاني شي كنت حاس انتس بتسولفين في هالسالفه هيا: يحق لي اساعد اخوي واخطب له اللي تناسبه ولا مايحق لي؟ مقبل: يحق لتس وانتي اخت مقبل هيا: يا عل عمره طويل يارب مقبل : قولي من سعيدة الحظ اللي بتشرحينها هيا بهدوء وهي تراقب كل حركه وردة فعل منه : عزوف جمدت ملامح مقبل وطول وهو ساكت وبعدين قال بهدوء: عزووووف هيا بترقب : اييه عزوف بنت وسيعة صدر ومملوحه وشايله مسؤوليه وتقدر تعتمد عليها في حياتك مقبل : صح كل شي قلتيه صح ، بس انا ما ادور هالشي انقلب وجهه هيا : وش تدور اجل ؟ مقبل : هيا عزوف ماعليها قصور لكن ما اشوفها الانسانه اللي بتزوجها! عزوف كل يوم اقابلها وحافظها زيين وحافظ كل شي بتسويه تبين اقولك؟ بتجي الصبح مدرعمه وبتقول بصوت عالي : صبحتوا بالخييييير  وبتضحك بصوت عالي وتخبط كتفتس وتكسره وتنفض شيلتها عن الغبار وبتربع وبتقول : صبي قهوه يا بنت وبعدها بيجي فرقنا وبتقوم وتلاسنه وتهاوش معه وبعدها وبعدها ترجع لبيتهم وهي تركض لانها تاخرت بالسوالف وبتمر السوق وتاخذ اغراضها وهي كل محل تكاسره لين تطلع عيونه وبعدها ترجع للبيت تركض وتنسى نفسها عشان سعد باختصار ياهيا اقولك انا مابي وحده تشيلني واعتمد عليها لا انا ابي اشيلها انا وتعتمد علي وانا اسندها انا ما اقدر اخذ عزوف واكسر قلبها واظلمها الله يرزقها باللي احسن مني واللي يتمناها لكن انا اشوفها مثل سعد الفرق بس فالاسامي انصدمت هيا ماتوقعت كل اسباب الرفض هاذي ماعاد عرفت ترد وكان قلبها يعورها على عزوف وبنفس الوقت ماتبي تظلمها وتظلم اخوها وقفت بهدوء وطلعت وسكت مقبل اللي رجع ينسدح وهو ماوده انه كدر خاطرها بس مايقدر يقنعها غير كذا _______. في بيت ابو سند في المقلط اللي ينامون فيه سند ومجاهد كانوا منسدحين بينامون بس قال مجاهد : غريبه خواتك مختفيات اليوم سند : والله مدري اشوفهم ساكتين حتى على العشاء مجاهد: غريبه صح!؟ سند : صح مجاهد : بروح اناديهم سند : يارجال لا تروح وثمٍ يشوفك ابوي ويهاوش الوقت متاخر @riwait_221 #أنتي_حمول_الوقت_وأنا_سندها ___. ابيكم تفاعل قوي #ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت 👇👇👇👇👇👇