الفصل 7
@riwait_221
{ رواية انتي حمول الوقت وانا سندها }
(البارت السابع )
قربوا يتعشون وام مقبل تعدد البنات اللي حطت عينها عليهم وابو مقبل يقبل ويرفض ومن بعده مقبل
_______.
وفي بيت ابو فزاع
بعد العشاء وبعد ما الكل هدا وفرشوا بينامون
عند البنات الكل كان حول ام شايع ويسمعون سوالفها الحلوه وقصصها
ساره: جده يعني صدق هالقصص صارت في وقتكم
ام شايع : اكيد صدق ولا وشوله اعلمتس بها
مزون : ههههههه فشلتها
ضربتها ام شايع بعصاها: اصه اصه يالملسونه
خزاري بضحك: طيب ياجده لازم يعني يتزوجون اكثر من مره
ام شايع: ماهوب لازم لكن الناس قبل تبي تزوج بناتها يبونهم يعيشون يتعلقون في رقبة اي احد يكفيهم شر البرد والجوع
ثريا: يالله حمدلله على النعمه
ام سند: اي والله الحمدلله على النعمه
ضحكت ساره: خزاري خايفه ان سند يتزوج عليها بدري ياحبيبتي على هالخوف
ضحكوا كلهم على خزاري اللي تفشلت لكن قلبت الموضوع ساره وهي تأشر لجدتها: وش اسمها ياجده قصيدتس اللي تغنينها دايم
ضحكت ام شايع وتصفق بحب وضحك تقصد على نفس الموضوع تمازح فيه خزاري : خزاري يا أم عين وعين من شافتس طلق الثنتين طلق عجوز وبنيه
مايبي غير الريميه
ضحكت ساره اللي ترقص وتلفح: وانا ياجده اقصدي في برقص
ام سند : اهجدي يابنت فضحتينا
ام شايع: خليها خليها انا ابيها توسع صدري هاذي شبيهتي
ضحكت ساره وهي تفل جديلتها: يلا فليت شعري
ضحكت ام شايع وغنت: ساره بنت ابوها .. ياسبعةٍ خطبوها .. واحد يعد الدرهم .. وواحد يقول لواحد ياليتي صبي ابوها ..
ضحكت ساره بحماس : وييين ياحظي هالسبعه
رمتها امها بالفنجال وتخبت ساره بضحك
مزون : وانا ياجده
ام شايع :ابشري .. مزون يابنت بنوت يا جعلها ماتموت لين ترعى الغنم ثم تبني البيوت
كشرت مزون : ليه ياجده بتخليني ارعى الغنم والبيوت امدحيني زين
ضحكت ام شايع: عشان لسانتس طويل يبي له تقصير
صدت مزون بتكشير
وقالت ثريا : وانا ما قلتي لي
ام شايع: عاد انتي عين السيح ابشري
اللي يبي "ثريا"، يرقى ..يسعى لين السماء الزرقا
يرقى يدور أبوها، يطلب ام رقبة عنقا .. ام الشامه وكحله سوداء ..وفي شوف بنيتنا الزينه .. يفرح قلبه وتسعد عينه ..
صفقوا كلهم ووضحكت ساره بحيا
وقالت ام شايع: يلا يلا باكر الجمعه نبي ننام بدري
هدوا الكل وناموا
_______.
ومن بكره
بدا اليوم من جديد وفي بيت ابو مقبل ما صدقت هيا انها تلم سفرة الفطور وانطلقت اخذت عباتها لفت على امها : يمه تكفين بروح لعزوف
ام مقبل : اقول اهجدي وين بتروحين هالحزه
هيا : ضاق صدري بروح لها شوي واجي ماني متاخره
ام مقبل : جمعه يا بنت الحلال جمعه
@riwait_221
#أنتي_حمول_الوقت_وأنا_سندها
___.
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇