الفصل 5
@riwait_221
{ رواية انتي حمول الوقت وانا سندها }
(البارت الخامس )
وفي بيت ابو فزاع
ماكانت خزاري تدري وش السالفه وتجهز كعادتها لين دخل فزاع وهو يقول : خزاري بنت
لفت بهمس : بسم لله وش فيك
فزاع : للحين ما لبستي
خزاري : لبسي هذا هو وش فيه
فزاع :مافيه شي لكن وانا اخوتس انتي الليله بتصيرين عروس
شهقت خزاري برعب : وشلون عروس
فزاع : سمعت جدتي تقول ان اليوم عمي بيخطب رسمي يعني لازم تكونين كاشخه
ارتبكت خزاري بس ضحكت بحب: يا بعد الدنيا يا فزاع ياعلي ما انحرم منك ياللي معوضني عن كل شي
ضحك فزاع: افا عليك انا لك عون يلا يلا برتب الصينيه وانتي بسرعه اجهزي
راحت خزاري وجلس فزاع يرتب وهو مبتسم يحب اخته ويبي يكون لها كل شي ام وابو واخو واخت وكل شي
التفت على اصواتهم وطلع وهو مبتسم على صوت ابوه للي يرحب : ياهلا يالله حيهم
ابو سند : تحيى وتدوم وانا اخوك، مسيتي بالخير يا يمه
ام شايع :مسيت بالرضا والسرور
اقبلو كلهم يسلمون عليها وهدى صوت المجلس وقعدوا والتفتت ام شايع تقول: لازم نناديكم ولا ماتجون اللهم ياكافي
ابو سند: ولله يا يمه اشغال وانتي عارفه
ام شايع : ايه اشغال لكن ماتقطعون
ابو سند : ابشري ابشري مالتس الا طيبة الخاطر
ابو فزاع: كانك بتطيب خاطرها تنام عندنا الليله وبكره جمعه مافيه اشغال
ام شايع: اييه ولا مايطيب خاطري
ابو سند: تم تم
بهمس في زواية المجلس قالت ساره بضحك: خزارييوه جايين بنخطبتس
ضحكت خزاري بحيا : ماجبتي شي جديد
مزون : ويومتس عارفه وشوله رازه وجهتس وجالسه
خزاري بفشله: وين اروح
ثريا ضربت مزون بشويش: ماعليتس منها اجلسي
قامت خزاري بفشله وراح للمطبخ
ثريا: خير انتي لسانتس متبري منتس
ساره: تبيني اقوم امعط شوشتها
صدت مزون اللي ماتشوف انها غلطت وقامت ساره ولحقت خزاري : خزاري وش بتس رحتي
خزاري : مزون صادقه مايصير اجلس
ساره: سوي نفستس مادريتي واجلسي وش فيها
دفتها بخفه وضحكة: خلي سند يقر عينه
ضحكت خزاري بحرج: يا ثقل دمتس
ساره بضحك: خزاري في ذمتس تحبين سند
خزاري بصد: وش ذا الحكي
ساره: مافيها شي دامه بيصير رجلتس ودام كلٍ يدري انتي له وهو لتس
خزاري : مافضيت احب
ساره : بس بتحبينه لايغرك كلامهم عنه ولا يغرك ملامحه تراه اجودي
ضحكت خزاري بخوف : الله العالم
ساره: واالله مكذب عليتس
سكتوا اول ماجو البنات وكملوا سوالف عاديه
___.
وفي مجلس ابو فزاع
قال ابو سند بعد ما التفت لسند : اقول وانا اخوك
ابو فزاع: سم
@riwait_221
#أنتي_حمول_الوقت_وأنا_سندها
___.
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇