ياما تجرعت المراره عشانك - الفصل 38 - بقلم أديم الراشد - مكتملة | روايتك

عالم القصص والروايات 📚: 🌺🌼🎀🌼🎀:🎀 🌼🎀🌼🎀🌼 🎀🌼🎀 🌼 @ahgeel 👌🌺 🍀روايــــ 📖 ــــــة.... 🍀 #ياما_تجرعت_المرارة_عشـانك💙 🌱 #بدايـة_الجزء_الـ⑧③🌱 🍒ـــــــــــــــــــــــــــــــــــــ🍒 عند بدر وصل وراح لبيت ابوه وهو مشتاق لهم كثير دخل وفتح الباب وحصل كعادتهم جالسين يفطرون نزل شنطته وهو يناظرهم والكل وقف بصدمه وماعرفوه وبعدها تقدمت نجلا اللي صرخت : بددددددددددر بدر بدموع: ي عيونه ركضت نجلا وضمته وهي تبكي تعلقت فيه : اشتقت لك اشتقت لك حيل اشتقت لك ابو عمر وام عمر والكل اقبلوا يسلمون عليه ويضمونه وهم يبكون وبدر يبكي بدر وهو يبوس يدين امه وابوه: تكفون سامحوني تكفون والله اسف على كل شي والله اشتقت لكم والله مالي سند بدونكم ابو عمر وهو يبوس راس بدر ويرفعه يمسح دموعه: معذور ومسامح ي ابوي معذور ومسامح وحنا اشتقنا لك كثير كثير ضمه بدر وهو مشتاق لابوه وحنيته وكلامه وريحته وكل شي فيه ابتعد وهو يضم امه اللي ماكان لها الا صوت بكى بعد شوي هدوا ام عمر: تعى يامو تعى ي ابني تعى كول لقمه تسند طولك يبعتي حمى عليك شو ضعفان ورايح حيلك الله لا يوفقهن شو ساوو فيك الله يبعتلن داء السل ان شاء الله بدر وهو يبوس امه : الله يخليك لي شكثر مشتاق لك عبيد : بدير ما اشتقت لنا حنا بعد بدر وهو يضمه ويضم نجلا وراشد: والله والله اذا قلت مشتاق اكذب عليك انا ميت عليكم وربي نجلا : والله بيتنا من دونك وع والله قربوا كلهم يفطرون والكل متحمس لبدر اللي شكله متغير حيل والكل فرحان بطلعته ٠٠٠ عند طراد اللي عجز يتحمل وراح لعلي فتح الباب وطل براسه: علوش ادخل علي رفع راسه من الاوراق وهو يبتسم : لك يبعت لك الهناء على هالراس المتيس على قول امي تعال وجع وش مسوي عشان تستاذن طراد دخل : يعني مانك زعلان علي : على ايش طراد: على الكلام اللي قلته قبل شوي علي: قسم انك حمار زله وانتهت وبعدين هو الحق طراد: في ذمتك لا تزعل علي : ابو بريص ازعجتني قلت ما زعلت خلاااص طراد صرخ: ما قلت لك علي : شبلاااك وجع طراد : شيبت ي علي علي : وجع ي طراد خرشتني واذا شيبت وبعدين انا اخس منك كل يوم اصحى احصل خمس سته شعرات مشيبه طراد: ايه انت ماعليه تشيب ماعندك مشاكل علي : ليه طراد: يعني انت قد تزوجت بس انا لا باقي شيبت ما تزوجت علي : وش فرقت طراد: يعني خلاص علي: وش خلاص طراد حاول يشرح بس عجز علي : ايه عشان مايخرب البرستيج طراد:ايه هو ذا علي : والله انت ما انت بصاحي ٠٠٠ عند ريم وشيخه اللي باقي مستمرين فيه التفتيش ورا علي كانت شيخه جالسه وريم تفتش وكل ما حصلت شي اعطته شيخه شيخه: ي بنت الناس والله ان ما وراه شي بس انتي موسوسه انا كل يوم اناظر عيونه ما اشوف فيها نظره غريبه ريم: مدري احس شيخه: تعالي بس حامت كبدي من التفتيش ريم: يوه والله بطني يوجعني شكلها كذا بتشرف شيخه: ي زينها قدام الحمل ريم: والله كلهم قرف بس تعالي نتقهوى شيخه : ي بنت وين نجلاا ماجات ريم : تجي الحين شيخه: قسم بالله سلخنا ذا البرد ريم: تعالي  نجلس هنا عند الدفايه ٠٠٠ عند نجلا اللي كانت واقفه وراء بدر وهي تشوفه جالس يحلق يضبط شكله بدر التفت وبعينه انكسار: شخبار شيخه وش صار لها بعد ما انسجنت نجلا نزلت راسها : مرره زعلانه ي بدر مرره تغيرت مره على رغم حملها الا انها صارت نحيفه صارت عصبيه وحساسه ما تعرفها ابد ابد مقهوره منك بشكل يحزن طول الاشهر اللي فاتت وهي نفسيتها زباله بدر : من يلومها نجلا جلست وهي تحكي لبدر حال شيخه اللي ما سره ابد وعرف انها عند علي وهذا شي صعب عليه مهمته انه يراضيها قامت نجلا وتركته وهي خايفه من ردة فعل شيخه بدر كان جالس ويناظر بفراغ : ي رب ساعدني ساعدني لبس بدر وتروش وتنظف ونزل عشان يروح يسلم على طراد اللي ما تركه ابد بس حصل قباله عمر ونوره وعيالهم وسلموا عليه وهم فرحانين جلسوا يتقهوون وبدر ماسك حياة بنت عمر ويلعبها عمر: عقبال ما نشوف ولدك ان شاء الله بدر بضيق : ان شاء الله ابو عمر: متى بتروح لهم بدر : كنت بروح نوره: الله يستر من شيخه ابو عمر: من حقها تزعل شيخه والا احد يتركها ويسوي سواته بدر : كل ابن ادم خطاء وربي بأذن الله معي سكتوا الكل لما حسوا بضيق بدر وقام بدر واستاذن بيروح ٠ ٠ عند طراد اللي كان طول الوقت يتحلطم وزعلان من البرد ومن الشيبه علي: خلاص خلاص فقعت قلبي بردان خذ الجاكيت والبسه زعلان من الشيبه قصها وريحنا تبي تتزوج روح لابوي وقوله طراد: ياخي انت ليش كذا ليش انا انسان نفسيتي تعبانه حس فيني علي : وانا نفستي دمار لاتزيدني برد وبردان قهر ومقهور وكل شي فيني طراد: تصدق يبي لنا صحن كبده حار وشاهي مع ذا البرد ي سلام علي : قسم طس لمكتبك وسوي اللي تبي خلني اقضي من ذا الشغل طراد: تتوقع لو قصيت الشيبه يطلع غيرها كثير علي : يوووووووووه قام طراد وهو يقول : خلاص سد حلقك وجع .. طلع طراد بعد ما نرفز علي وطلعه من طوره مر وهو يفكر بذا الشيبه ومعه الجاكيت حس احد ين اديه التفت وشبه على الرجال بس تاكد لما سمع صوته وصرخ : بدددددر بدر ابتسم وهو يقبل لطراد بهروله وضمه: اي بدر طراد ضمه وهو يضحك: الحمدلله على السلامه الحمدلله متى طلعت بدر : الله يسلمك توني وصلت قبل ساعتين طراد: انا اسف نسيت انك تطلع اليوم اسف بدر:معليك انت ماقصرت كفيت وفيت طراد رجع ضمه: قسم بالله طلتك لها وحشه عاد توني بطلب كبده حظك بطل ابتسم بدر وهو يقول : علي فيه طراد ميل فمه: فيه بس ما اتوقع انه بيسامحك متحامل عليك حيل بدر : والله ما الومه حذرني مليون مره بس انا ما طعت معه حق يزعل ويتحامل لكن بدخل وبجرب اراضيه طراد : براحتك تقدم بدر بخوف ودق الباب ودخل بهدوء علي وهو منزل راسه : طراد قسم بالله لتنصفق هيا انقلع بدر : ماني طراد ي علوش ضرب الصوت بقلب علي صوت اللي له مده ما سمعه وغايب عنه رفع راسه بصدمه ووقف وهو يهمس : بدر بدر: ايه ي اخوي ما حس علي بنفسه وطار لبدر بسرعه كبيره وهو مو في وعيه و ضمه وهو مشتاق لبدر حيل بدر كان يعني لعلي كثير كان في المرتبه الثانيه بعد طراد ضمه علي بقوه وهو رغم زعله منه الا انه فعلا اشتاق لبدر شد بدر على علي وهو ما توقع ردة الفعل هاذي كان بدر يبادل علي نفس الشوق واكثر كثير  شد بدر عليه وهو يشم ريحة اخوه اللي اشتاق له وعلي مثله كان الصمت سيد الموقف إلى ان ابتعد علي وهو يناظر بدر وبعد هدوء ضرب بدر كف وهو يقول : كيف طاوعك قلبك تسوي اللي سويته بدر سكت وهو يدري ومستعد لمثل هاذي الاسئله : علي اسمعني بجلس واحكي لك كل شي وابيك تساعدني ي علي انا ضايع انا ما اعترض ومعك حق لو ضربتني مره وثنتين وثلاث المهم ابيك تساعدني اشتقت لكم علي وحشتوني روحي مو معي معكم علي انا ادري اني غلطان بس اسمعني ألجم علي دموع بدر ما قدر يقاوم دموعه ماقدر يصد ويبعد غمض وراح جلس وهو يقول : تعال جلس بدر وهو منزل راسه وبدا يحكي لعلي كل شي وكيف صار وليه صار ويحكي له معاناته وشوقه وانه بعد ما تزوج شيخه حبها وكان مسافر يطلق مهره بس القدر وقف ضده علي استند على الطاوله وهو يحط يدينه على وجهه : ليتك سمعت كلامي ليتك بدر: علي ابي منك بس تساعدني تكفى مو عشاني عشان شيخه عشان ولدي اللي جاي بالطريق ما ترضى انه يعيش بعيد عني بدر بكلامه هذا ضغط على جرح علي وجاء من يده اللي توجعه وهو مو حاس كان نقطة ضعف علي الاطفال علي : زين ي بدر بعطيك فرصه واخليك تكلم شيخه لكن اذا ما سامحتك تطلع وتتركها ولا تعذبها كفايه الشهور اللي عانتها وتأكدت اني ما بسامحك لين تسامحك شيخه بدر: ابشر المهم اشوفها سكت علي وقام بجمود وهو يقول : قوم معي قام بدر وطلعوا وطراد مصدوم انهم طالعين مع بعض ومايدري شصاير بس ما تدخل ٠٠٠ عند ريم اللي كانت تتقطع من وجع بطنها شيخه: ريم اذا تعبانه خلي علي يجي يوديك ريم: بس هو مجرد الم هي باقي ما جات شيخه: خلاص عاد طيب انا بطني وجعني منك ريم سكتت وهي تروح للحمام انسدحت شيخه وهي تفكر في بدر : ي ربي مدري طلع  والا لا مدري شصار عليه ي رب تكفى تحميه ولا تحرمنا منه سمعت صوت الباب ينفتح وهي تقول : علي علي: نعم شيخه: شفيك راجع بدري شكل ريم دقت عليك روح شوفها علي: شفيها شيخه: مدري بطنها يوجعها من الصباح كل ذا صار وشيخه منسدحه وهي معطيه علي ظهرها وما تشوفه وبدر واقف جنبه وهو مصدوم من شيخه اللي باين ضعفها من ظهرها ناظر له علي وقال يكلمها وراح هو يشوف ريم لفت شيخه وهي تحس ان احد وراها:  شبلاك ما راح ..... انصدمت وتوسعت عيونها بصدمه وحطت يدها عل فمها (بدر اي هذا بدددر بببدر )بكت شيخه وهي مصدومه تقدم بدر بهدوء وهو يقول : وحشتيني ي شيخه ٠٠٠ عند ريم اللي طلعت وحصلت علي واقف قبال الحمام اقبل عليها وهو يضمها: ريم شفيك ريم: مدري علي بطني ذبحني ألم علي: يمكن الألم حق كل مرة ريم : لااا علي : بسم الله اجل ايش ريم : مدري علي سحبها وجلسها: اوديك المستشفى ريم : مدري علي : خلاص انتظري يروح بدر واوديك ريم التفتت بقوه على علي وهي تقول: ايش علي : بدر طلع وهذا هو جوا. عند شيخه ريم حطت يدها على فمها : كيف علي جلس يشرح لها كل شي وريم مصدومه وكلهم خايفين من ردة فعل شيخه ٠٠٠ عند بدر اللي كان يناظرها بشكلها اللي كان اجمل من اي منظر بهذلتها المعتاده شكل بطنها الجميل وجهها الشقي ملامحها اللي حن لها كثير صارت شيخه بعينه احسن من ملكات الجمال جمالها عادي صح بس جمال روحها يفوق كل شي تقدم وهي تبعد يدها  كانت بقمه صدمتها ما توقعت تشوفه ابد كان متغير ضعفان مهلوك باين التعب عليه عيونه حمرا ما حست فيه الا لما ضمها بقوه لدرجه انه اوجع عظامها عمرها ماضمها بدر كذا ابدا كانت ضمته هاذي فريده وهي تعني اشياء كثير . صوت شيخه ببكاها وهي مشتاقه له حيل بدر الي اول ما ضمها رجعت له روحه حس بأمان الدنيا فيها ضمها وهو مو قادر يوصف شوقه لها انهار وهو خايف من بعدها عنه خااايف حيل شيخه اللي استوعبت وتذكرت كل اللي صاااار دفته بعيد عنها وهي تبكي : ابعد عني ابعد م ا كفاك اللي سويته باقي جاي تكمل علي ماكفاك تكفى خلاص والله حرام والله مالي حيل والله ليش جيت وش تبي وش تبي بدر وقف بضيق : شيخه انا اسف والله اسف والله شيخه اسمعي مني شوي تكفين شوي والله ماكان قصدي اذيك تكفين شيخه اسمعيني شوي والله ماني جاي اضرك جاي اعتذر منك جاي ابيك تسامحيني شيخه بصراخ : اسامحك على ايش ايش بالضبط على ايش على كذبك وخداعك على مجاملاتك على كل ذا والا خيانك والا اهانتك والا بعدك والا زواجك على ايش بدر بضيق: معك حق باللي تقولي لكن وربي وربي ي شيخه اني ندمان شيخه اسمعي مني ولا تحكمين بلا سبب دخيلك شيخه وصوتها يقطع القلب : بلا سبب كل اللي سويته مو اسباب بدر انا مو هامني شي والله كثر ما همني انه منك ليش ما قلت لي ليش ليش من اول يوم حسيت اني مو مناسبه جلست وقلت ي شيخه هاذي الحقيقه ليش رضيت علي كل هذا ليش والله لو جيت وقلت لي ما اردك والله بوقف معك بساعدك واذا حبيت ابعد عنك ليش تعلقني وترميني وانا اللي عمري ما انحنيت لاحد ليش قهرتني واحرقت قلبي ليش يومك تورطت وبغيت تطلقها ما قلت لي بينا بينا ونحلها ولا احد يدري ولا تشمتهم فيني رضيت الحين لما كسرتني وخليتني ضعيفه رضيت الحين لما تركتني ساكته مقدر ارد على عذالي خليتني علكه بفم كل واحد يسوى واللي ما يسوى ما كبرت في خاطري الا انها منك وانا اللي حطيتك ولد عم زوج وحبيب وصديق ودرع لي من كل شر وطعنه لكن ما توقعتها منك بدر : شيخه تكفين هدي واسمعي وبعدها اللي تبينه يصير شيخه جلست وهي ماسكه بطنها وتبكي : مابي اسمع شي روح روح من هنا تكفى روح مابي اخسر ولدي روح تكفى بدر خاف عليها تنهار ويصير لطفل شي طلع بسرعه وهو مايبيها تتعب اكثر طلع علي لما سمع صوت شيخه ارتفع ركض لها وهو يرفعها :شيخه شفيك وش سوا لك بدر وش سوى شيخه وهي تبكي : ليش جبته ليش علي : شيخه وربي مابغيت اجيبه بس شفت الندم في عيونه حلف لي ما يأذيك بس يبي يعتذر لك ويبيك تسامحينه عشان ولده اللي ببطنك ي شيخه خليته يجي شيخه مسكت بطنها : علي بطني ي علي انفجع علي وخاف عليها وصرخ لريم تجيب عبايتها لبست ريم وجابت عباية شيخه وجات له ركض لبسوها العبايه وطاروا للمستشفى وعلي خايف يصير لشيخه شي ٠٠٠ اما بدر اللي طلع وهو ضايق وتعبان تعباان حيل ركب سيارته واتجه لطراد وهو الوحيد اللي صار ملجأ لبدر وصل بدر الشركه وطلع لمكتب طراد وهو متلثم ولابس نظارات عشان محد يشوفه دخل المكتب وحصل طراد جالس على جواله رفع طراد راسه واستغرب من ذا بس سبقه بدر وقال: انا بدر طراد عرف ان فيه شي مو زين وفز وهو يمشي باتجاهه : وش فيك ليش كذا بدر جلس بتعب وهو يتنحنح : شيخه زعلانه حيل زعلانه تعبت ي طراد طراد جلس جنبه : وش اللي صار بالضبط بدر جلس وهو يحكي كل شي صار لطراد احتار طراد حيره اتعبته حيل : بدر معليش لا تلوم شيخه مو قليل اللي صار فيها ابد مو قليل انت ماسويت شي هين وينسى بسهوله وانت ما قصرت في التجريح ي بدر وانت طعنت الشخص الغلط بنفس الوقت شيخه عمرها عمرها ما التفتت لاحد ولا قدرت احد ولا عمرها عزت احد غير علي ونجلا وريم وانت جيت وبعدت كل هذول وصرت محلهم صرت الاول في قلبها وفي كل شي لو انها من احد غيرك ما فكرت فيه بس المشكله انها منك معليش حاول مره اثنين وثلاثه لا تخليها تضيع منك ي بدر لا ترجع تضيع ي اخوي هاذي ردة فعل طبيعيه لانها اول مره تقابلك بعد اللي صار ومهما قالت قليل مو سهل انك تحرك قلبها تقبل كل شي بس لا تخليها اتركها تعاتب وتضرب وتصرخ من حقها بدر سند راسه وهو مو قادر يمسك نفسه اكثر غمض هو ما يقدر يبعد شكل شيخه عن باله وهي منهاره تبكي طراد ما عرف وش يقول وش يواسي كان ساكت وهو يشوف بدر المحروق ولا يقدر يسوي له شي ٠٠٠ عند علي اللي كان واقف هو وريم برا ويستنون الدكتوره تشوف شيخه اللي كانت حالتها تكسر القلب والخاطر طلعت الدكتوره وهزأتهم على حالتهم النفسيه وقالت لهم انو لولا ستر الله كانت بتسقط انصدم علي من الحاله اللي وصلت لها شيخه وخاف كثير ان يصير لها شي دخلوا يشوفونها وكانت حالتها سيئه جدا جلس علي وهو يناظرها ومايدري وش يسوي تأزمت الامور لدرجه انها كانت بتسقط .. عند بدر اللي قرر انه يدق على علي ويتطمن على شيخه بدر: علي علي : نعم شتبي بدر: كيف شيخه علي : ماقصرت اليوم كملت الناقص اللي بقى بدر: علي والله ماعملت شي كنت بشرح لها بس هي انهارت علي : بدر وخر عن شيخه لا تخلي الامور تتعقد كذا اقل شي الين تقوم بالسلامه وتولد بدر: بس علي : لا بس ولا شي ابعد ابعد ابعد شيخه اليوم كانت بتسقط بسبب شوفتك ابعد ولا تخسرها طفلها مثل ما خسرتها نفسك سكر علي وبدر للحين مصدوم التفت لطراد بصدمه بدر: طراد شيخه كانت بتسقط بسببي طراد طاح الكاس اللي بيده: ايش بدر: علي يقول كذا وقال بعد ابعد عن شيخه لين تولد طراد جلس جنب بدر وهو يقول : استنى اتاكد انا اخذ جواله ودق على علي اللي رد : هلا طراد طراد: علي شصاير لشيخه علي : بعد ما طلع بدر انهارت وكان ت بتسقط لكن الحمدلله اللي لحقنا عليها وهذا هي منومه في المستشفى وحالتها سيئه طراد : لا اله الا الله وش السوات الحين علي : السوات ان بدر يبعد قبل يقضي عليها وعلى ولده اقل شي لين تولد وبعدها براحته طراد: زين زين طمنا عنها كل شوي علي : ابشر سكر طراد والتفت لبدر: سمعت ضروري تأجل الموضوع لين كل واحد منكم يستعيد روحه وترجعون ترتبون من جديد بدر وقف : الله يعين طلع بدر وهو متحطم عمره ما حس انه ضعيف كذا شيخه اللي كان مستهتر بها جابت راسه ارض وهي ما حست ولا فكرت فيه توجه لبيته بعد ما ارسل لنجلا انه بيروح لبيته ٠٠٠ عند شيخه اللي صحت بتعب وهي تتلفت شافت علي وريم جالسين واول ما حسوا عليها فزوا لها علي : شيخه عيوني انتي بخير ريم: شيخه ي روحي فيك شي شيخه: بطني يوجعني علي : بسم الله عليك مافيك شي ان شاء الله انتي بخير شيخه: علي ولدي طيب صح علي : ولدك بخير وصحه لا تخافين المهم انتي قومي بخير شيخه غمضت وهي تشد على يد علي : ليش بطني يوجعني كذا علي: مجرد ألم بسيط ويطلع قطع عليهم دخول العايله الكريمه كلها الجد : شيوخه وش صار لك وش فيك ابو عمر: علي شفيها شيخه شيخه سبقت علي وغيرت السالفه: تعبت فجاءه عمي سكت ابو عمر لما حس ان بدر السبب لانهم قالوا له  نفسيتها دمار ام ناصر : شيخه يمه وش يوجعك شيخه رغم الحطام اللي فيها الا انها كانت صامده وقدرت. تخفي تعبها وكانت هاذي احسن صفه تتصف بها شيخه وعلي انهم رغم كل اللي فيهم مايبين عليهم شيخه: انا بخير يمه نجلا بهمس لريم : شصاير ريم : تعالي اقولك برا راحت ريم لعلي وقالت له انهم بيروحون دورة المياه وطلعوا ريم حكت لنجلا كل شي نجلا: ي ويلي عليهم الاثنين كلهم متعذبين وفوق هذا يكابرون ريم: نجلا حطي نفسك مكان شيخه وش بتصلحين نجلا : شيخه معها حق بس بدر ندمان والله ي ريم لو تشوفين كيف صاير تنفجعين ريم: علي كلم بدر وقاله يبعد عنها اقل شي لين تولد نجلا : ايوه كذا احسن ريم: نجلا تكفين تعالي معي بنروح للعياده احس بطني فيه مغص مو طبيعي نجلا : شبلاك انتي بعد ريم : مدري اتجهو للعيادات وقالت لهم ريم مشكلتها وطلبوا منها تحاليل وفحوصات وقالوا بعد ساعتين تطلع ارجعي لنا نجلا : ريم ليش فحوصات ريم: مدري نجلا : طيب خبي يدك لا يشوفها علي والله ليقوم القيامه ويتوتر وهو خلقه مو ناقص ريم : ايه ماعليك منتبهه رجعوا للغرفه وجلسوا وهم يسمعون سوالف جدهم ونصايحه اللي يقولها ويبي يغير الجو اخذ يد شيخه وهو يحاول يلعبها وينسيها ويغير جوها وفعلا قدر انه اقل شي يضحكها بعد شوي انتهت الزياره وراحوا الكل الا علي قال بيبات في المستشفى عشان اذا احتاجو شيء وريم ونجلا نزلوا مع عبيد عشان ياخذون التحليل ٠٠٠ عند بدر اللي كان يحوس ببيته اللي على حاله قبل ٦ شهور التفت وحصل اكياس مرميه  على جنب واغلبها اكل وعصيرات وخرابيط قرب منها وهو مسكر خشمه من الريحه قرب وحصل بينها ورقه وكانت ورقه تحليل شيخه اللي تثبت حملها جلس جنبها وهو يقرا والورقه مره واثنين وثلاث وعشر غمض وهو يتمنى انه كان اول واحد يدري بذا الخبر واول انسان فرح فيه وانه ما راح وظل جنب شيخه وانه ماعرف مهره وسنينها قام وهو يتنهد وابتدا يجمع ويرتب المكان ٠٠٠ عند نجلا وريم اللي كانوا عند الدكتوره وجاتهم الدكتوره وهي تبتسم: مين ريم ريم: انا الدكتوره : مبروك ي ستي دا انتي حامل بقى لك شهر ومش حاسه ع نفسك ريم ونجلا ناظروا بعض وبعدها ناظروا الدكتوره ريم: وربك تتكلمين جد الدكتوره:هههههه ايوه ي ستي ليه دي اول مره بتحملي فيها ريم بكت وضمت نجلا وهم فرحانات بالخبر وفرحتهم عظيمه نجلا : الحمدلله الحمدلله ي رب .. الدكتوره ابتدت توصف لريم ادويه وفيتامينات وبعض النصايح والاشياء الضروريه وريم من الفرحه كانت بس تبكي ونجلا تسمع لدكتوره بعد ما طلعوا وراحوا السياره قالت ريم لنجلا ما تقول لاحد لين علي يعرف وبعدين يقولون ٠ ٠ عند علي اللي كان طول الوقت جالس يهذر فوق راس شيخه ويتفلسف ويسولف وهي تعدلت نفسيتها علي : ان شاء الله اذا طلعتي ابسوي لك احلى كبسه يحبها قلبك شيخه: وشو علي : اييه كبسه كذا من لحم مشوي وحركات شيخه: علي يرحم امك ابي ولدي انا مابي اتسمم واموته علي : وجع في عينك وجع جبتي لي الحاله النفسيه بولدك ذا تراه راس ماله بزر كأنه اسطوانة غاز مثل ولا لوح مثل بدر وبس يعني لو راح العوض فالجنه احسن على الاقل طير ولا برميل شيخه قرصته وهي تضربه :وجع ي قليل الخاتمه انا اسطوانة غاز انا انا يلي ما تستحي انا حسبي الله عليك سبع التحاسيب ي ابو نص شعر علي : ااااي وجع ي دبا وانا ما كذبت صااادق شيخه : قوم ضف وجهك بس قال أيش قال صادق علي : مالت عليك وعلى ولدك معك اصلا يحصلكم علي يطبخ لكم شيخه : اترك الطبخ على جنب واسمع الحكي اللي عليه الكلام علي : اخس ياللي عليه الكلام ليتك تنطقين حرفين عدل عشان تقولين كلام عليه الكلام شيخه: استغفر الله ي رب وش الذنب اللي سويته عشان يصير ا خوي علي : خلاص قولي يلا شيخه: بكره ترا بطلع من المستشفى علي : نعععم شيخه: ايه انت تعرفني ما احب ذا المستشفيات وبعدين انا بخير علي : لا لا مافيه انا بخير ماني بخير بتنثبرين هنا وانا معك لين نتأكد انك كويسه وخلاص لا تناقشين شيخه: تكفى علي والله انا بخير بس طلعت حره فيني علي جلس بأعتدال وهو يقول : شيخه انا ابي اعرف رايك اتجاه بدر جد بترجعين له شيخه : اكذب عليك ان قلت اني ببعد عنه علي : شيخه انا ما اقول كذا عشان اخوي لا بس والله شفت الندم بعيونه والله شفته منهار شيخه عمري ما حسيت بدر ضعيف كثر اليوم شيخه انا اعرف النظره اللي بعيونه مزبوط انا اقول عيدي التفكير في مسألة بدر شيخه نزلت راسها : من هنا لين اولد فيها فرج سكت علي ما حب يكثر عليها ويضايقها وشيخه سرحت بتفكيرها ٠٠٠ عند ريم ونجلا كانوا فرحانات لدرجه ان الكل شك ان فيهم شي نوره: شبلاك انتي وياها بس تتهامسون نجلا : شفينا مافينا شي رهام : حاسه فيكم شي ما ادري ليه ريم: لا ابد اسمعي وين حياة وحشتني رهام: عند عبيد هناك كملوا سواليف وريم تحاول تخبي فرحتها لين تقول لعلي ٠٠٠ مر اليوم مرور هادي كانوا اغلب ابطالنا كل واحد له مشكله شيخه اللي كانت تفكر ببدر وتحس ارتاحت بعد كلام علي حست انها خلاص سامحته بس تبي تبعد شوي اما علي اللي كان منسدح وهو يفكر بريم بحياته بشيخه والكل والموضوع المتصدر موضوع العقم كان يتقلب مثل المقروص وهو يحاول يحصل حل للكل اماا بدر اللي مابات ليله من شوقه لشيخه وهو يفكر كيف يراضيها ريم اللي كانت فرحتها ما توافق فرحة احد ودها تطير وتقول لعلي بس قررت تبلغه بطريقه حلوه وتفاجأه نجلا اللي كانت همها شيخه وبدر وما تدري شلون تصالحهم اما طراد اللي كان مجمع كل شي على راسه بدر وعلي ونجلا وشيخه وفوق ذا هم الزواج اللي واضح انه مطول والشيبه اللي جابت له الجلطه اما ابو عمر اللي ضايق على حال بدر ونفسه يتدخل بس مايبي يضغط على شيخه ٠٠٠ من بكره الصبح ابتدا يوم والكل يطمح انه يوم حلو وجميل عند علي ذبح عمره وهو يتشحذ في شيخه تاكل بس رافضه علي : شيخوه تبين تطلعين كلي شيخه: احلف علي: انتي شبلاك صايره بزره خلاص والله اذا اكلتي وما تعبتي عمرك اطلعك شيخه تحمست وبدت تاكل وخلصت وهي تقول : يلا قوم علي : لو تطاوعيني وتظلين شوي بعد شيخه:علي انت وعدتني علي : خلاص يلا قومي البسي وانا بصلح الاوراق ٠٠٠ عند بدر اللي صحى وجهز وهو ناوي يروح يشوف شيخه ويتطمن عليها وهو ناوي يسكت عشان ما تتدهور حالتها بس دق عليه طراد : بدير وينك بدر: رايح لشيخه طراد: وش قلنا امس بدر: بس بتطمن طراد: لا ارجع شيخه بخير وطيبه والحمدلله وهذا هي طلعت من المستشفى لا تروح ولا تفكر حتى اتركها لحالها بدر: بس طراد: لا بس ولا شي تعال لي في .... مجهز لك صحن كبده يشكي بدر ما عطاه طراد فرصه يعترض وسكر في وجهه غير بدر طريقه واتجه للمحل اللي قال عنه طراد ٠ وصل وحصل طراد جالس وشكله كذا يكلم نفسه بدر: سلام طراد: هلا بدر: من تكلم انت طراد: نفسي بدر:هههههه لا لا مو لذا الدرجه انجنيت خلاااص طراد: ي اخي انا شيبت تعرف اش يعني شيبت بدر: ي ليل انا شقول عن نفسي شوف كيف شعري طراد: انت ي ذا العايله عندكم انتماء في كل شي اي شي اقول فيه يقول شوف كيف فيني انا اشكي ما اتحدى بدر: خلاص اشكي اشكي طراد : بلا اشكي بلا هم المهم شوف اللي جاء مين . 🍒ــــــــــــــــــــــــــــــــــــ🍒 #الـى_هنا_ينتهي_الجزء_الـ⑧③ 🎀 @ahgeel 👌👈 🌺 🌼🎀🌼 🎀 🌼🎀🌼🎀 🌺🎀🌼🎀🌼🎀🌼