الفصل 22
عالم القصص والروايات 📚:
🌺🌼🎀🌼🎀:🎀
🌼🎀🌼🎀🌼
🎀🌼🎀
🌼 @ahgeel 👌🌺
🍀روايــــ 📖 ــــــة.... 🍀
#ياما_تجرعت_المرارة_عشـانك💙
🌱 #بدايـة_الجزء_الــ②②🌱
🍒ـــــــــــــــــــــــــــــــــــــ🍒
عند علي وطراد اللي كانوا منزلين شماغهم ومشمرين اكمامهم وداخلين في جو الشغل بكل حماس دق الجوال وقطع عليهم حماسهم طراد راح وحسبه جواله ورد : الو
ريم ما دققت بالصوت : علي حبيبي فيك شي ليش طلعت من البيت كذا
طراد انلخم ورفع جواله واستوعب انه جوال علي وصرخ وانتبهوا له الكل :الله يشلك يا علي
علي : وش بك وش صار
طراد رمى عليه الجوال وهبده هبده وهو يعض اصبعه :ياخي غير نغمة جوالك ولعنه
علي فهم انه رد على جواله بس مافهم ليش كذا منحرج اخذ الجوال ورد :الو
ريم : وش فيك ليش تصيح
علي : وش قلتي انتي
ريم : قلت علي حبيبي فيك شي ليش طلعت من البيت كذا
علي :هههههه الله يصلح طراد
ريم: وش دخل طراد
علي : طراد رد على باله جواله وهو اللي كلمك
صرخت ريم:لااااااا علي غير جوالك
علي :ههههههه سليمه حصل خير المهم كيفك
ريم : فشله
علي :وش عليك تراك متصله علي
ريم : يوه المهم وش فيك طلعت ماصحيتني ولا افطرت
علي : كان عندي شغل وطلعت بدري وماحبيت ازعجك
ريم :الله يسامحك كان خليتني اصلح لك فطور انت امس ما تعشيت
علي : معليش حصل خير
ريم : زين متى راجع
علي : مدري احتمال اتأخر
ريم : بعد يلا مو مشكله
علي :مع السلامه
ريم :مع السلامه
راح علي لطراد اللي كان متفشل وصار يكره جوال علي على كثر ما اخطى فيه صح ريم ماقالت شي كبير بس هو صار جوال علي يعور قلبه بعد صوت نجلا
علي :طراد وش فيك
طراد: شوف غير جوالك لبسه كڤر غير نغمة بس فكني والله جبت لي ازمه
علي : ههههه بسيطه روق هذا تحفيز لك عشان تتزوج
طراد :وانا ناقص
رجعو يكملون شغلهم وطراد اللي ينعاد صوت نجلا في اذنه اكثر من مره وهو يحاول يركز
٠٠٠
عند نجلا وشيخه
شيخه: وش رايكم ناخذ ريم بعد اكيد طفشانه
عبيد: ماودك نمر للبلاد كلها وناخذها
نجلا :عبيييد
شيخه:عبيدوه لا تخليني افرشك هنا
نجلا :استنوا ادق عليها ... دقت
ريم :هلا نجلا
نجلا : كيفك وش تسوين
ريم:تمام وانتي
نجلا :تمام وش تسوين
ريم :جالسه
نجلا :طيب اسمعي انا وشيخه نازلين نتسوق ونفطر مع عبيد تروحين معنا
ريم: هاه مدري ودي والله خليني اقول لعلي وارد لكم
نجلا :زين يلا استعجلي
شيخه:وش تقول
نجلا :بتقول لعلي وتشوف
٠٠٠
عند علي اللي حط جواله بجيبه عشان ما يغلط طراد بعد قطع عليه شغله اتصال ريم
علي :هلا حبيبي
ريم :معليش ازعجتك بس شيخه ونجلا طالعين يتسوقون ويفطرون عادي اروح معهم
علي :رايحين مع مين
ريم:عبيد
علي :زين اجل روحي وانتبهوا
ريم :زين باي
علي :باي
طراد : وش فيه
علي : ابد ريم بتطلع مع نجلا وشيخه يفطرون
طراد ضرب قلبه:لحالهم
علي :لا مع عبيد
طراد :اها
سكت طراد اللي كل ما انشغل عنها ترجع طلع في عقله وقلبه
٠٠
عند البنات اخذوا ريم وراحوا دخلوا وابتدوا يتسوقون ويضحكون واخذوا راحتهم واستانسوا وقفوا بتعب
ريم:انا خلاص انتهيت
نجلا :تعالوا نفطر
شيخه: يلا
دخلوا وطلبوا وجلسوا يفطرون
ريم: تدرون ان اليوم صارت لي نفس حركة نجلا
نجلا :ليييه
ريم: دقيت على علي ورد طراد
شيخه: خير لعبه هي
ريم :وربي قسم تفشلت
نجلا :اوف اذا كذا نبي نجلس نتأكد
شيخه : اسمعوا بس ترا رمضان قرب وش بنسوي
نجلا :وش بنسوي ننتظر
ريم:شيخه ما اتفقتي انتي وبدر على تاريخ زواجكم
شيخه: بعد العيد اكيد ما تكلمنا
نجلا :يلعن ام الوناسه ي شيخه
٠٠
عند ابو عمر دخلوا عليه فواز وابو ناصر
ابو عمر : هلا ادخلوا ادخلوا
ابو ناصر: اسفين ازعجناك
ابو عمر: افا والله ما من ازعاج تشرفون وشلونك ي فواز
فواز: الحمدلله انت كيفك
ابو عمر: تمام حي الله من جاني وش تشربون
ابو ناصر: ابد سلامتك حنا جايين نكلمك بموضوع
ابو عمر: امرو
فواز: عمي انا هالاسبوع راجع امريكا وحبيت اتمم واتزوج اريام ونبدا نسافر عشان يمدينا نأمن كل شي
ابو عمر:هالاسبوع
فواز: ايه ولا نبي طقطقه وعرس نتملك واسلمكم مهرها مابي احرجها نخليه سكيتي واذا اتم الله نعمته ورجع بصرها سوينا عرس كبير
ابو عمر: والله ي ابوي مدري لكن خلني اكلم اريام واشوف
فواز: ي ليت ي عمي نستعجل
ابو عمر : قوم معي نروح البيت وهناك نتفاهم
قاموا كلهم واتجهوا لبيت ابو عمر
٠٠
عند اريام اللي توها صحت وجالسه تفطر هي وامها دخل عليهم ابو عمر:السلام عليكم
ام عمر: عليكم السلام وش صار ابن عمي شو ياللي جابك
ابو عمر: خير لا تخافين اجلسي اريام يبه شلونك
اريام : الحمدلله
ابو عمر :جيت ابي اكلمكم في موضوع مايستحمل التأجيل
ام عمر :شو صاير ..
ابو عمر :يبه ي اريام انتي وافقتي على فواز وانتي تعرفين انه بيرجع لامريكا وحجز لك موعد مع اكبر الاطباء هناك خلاص الاسبوع الجاي وعشان كذا طلب مني فواز اني اكلمك في موضوع الزواج يبي يملك عليك ويسلمك مهرك ونطلع لامريكا عشان مافيه و
قت ولا حب يحرجك ويسوي زواج كبير وخلاه بعد ما تستعيدين نظرك بأذن الله
اريام بعد تفكير : موافقه يبه ماعندي اي اعتراض ولا ابي مهر ابي مهري يرجع نظري
ابو عمر: لا يبه المهر حق من حقوقك
اريام : اجل مابي الا ٥٠٠٠ بس
ابو عمر حاول يقنعها بالمهر الكامل بس رفضت
ام عمر بكت : بدى تروح بنتي هيك
ابو عمر: يوه ي ام عمر انا بروح معها واشرف عليها ماهي رايحه تضيع
اريام: يمه تكفين لا تبكين
ابو عمر : اجل يبه اليوم بكلم اخوانك ونملك الليله ماعندنا وقت
اريام :زين
ابو عمر :ومن بكره تجهزين عشان نسافر
اريام: ابشر
طلع ابو عمر وبكت اريام على حظها كيف تتزوج وهي كذا وبدون حتى عرس بكت وبكت امها معها بحرقه اما ابو عمر اللي دق على عياله كلهم وقال يجون الحين كلهم ضروري
رجع لابو ناصر وفواز اللي كانو على الجمر
ابو عمر: ابو ناصر
ابو ناصر : سم
ابو عمر : البنت وافقت وتقول مهرها بس ٥٠٠٠ ويرجع لها نظرها ماتبي غيره
ابوناصر: بس المهر لازم
ابو عمر: هذا قولها وماتبي واذا تبون اليوم بنملك وبكره نحجز ونسافر وتراي ي فواز بروح معكم اسبوعين
فواز بفرح :اللي تبيه ي عمي يصير وحاضر وتم
ابو عمر: الله يطرح البركه فيك
جلس ابو عمر وهو متأثر من انه يسلم وحده من بناته عروس بعرس على الساكت وحالتها كذا دخل عمر وبدر :السلام عليكم
الكل : وعليكم السلام
سلموا وجلسوا عمر: خير يبه امر
ابو عمر: انتظروا علي
جلسوا وهم ساكتين جاء علي :السلام عليكم اسف تاخرت
دخل وسلم عليهم : امر يبه
بدر: وش فيه يبه
قام ابو عمر وقف بنص المجلس : اسمعوني زين وافهموا وش اقول
عمر: يبه خوفتني
ابو عمر : مافيه شي ارتاحوا
شرح لهم كل الموضوع كله وسط صدمتهم وذهولهم
ابو عمر: الحين كل واحد يبدي رايه
عمر قام توجه لفواز وضمه :الله يجزاك خير ويوفقك انت سويت شي تنحني له روس
فواز: افا عليك هذا الواجب
بدر قام : والله ي فواز انا مدري وش اقول انت فعلت سكتنا كلنا محد يقدر يعترض اللي سويته شي كبير وتستاهل
علي ما سوى شي غير انه تقدم لفواز وضمه :الله يسعدك ويعطيك لين يرضيك ما طلع معي غير هذا
فواز : لا تقول شي الله يقدرني واسوي اللي بيدي
ابو عمر تقدم لفواز ::والله والله مانطلع من جزاك
جلس ابو عمر وفواز يدبرون امر السفر والعلاج والاطباء ورجعوا العيال كل واحد لشغله وكل منهم مصدوم من فواز
٠٠٠
عند البنات تسوقوا ورجعوا وهم مبسوطين وكل وحده راحت لبيتهم
عند نجلا اللي دخلت وحصلت امها واريام جالسين
نجلا :سلاام
الكل:وعليكم السلام
نجلا :وش فيكم
ام عمر : اريام بدها تتزوج اليوم وتسافر بكره
نجلا :اااييييييش
ام عمر: مثل ماسمعتي
نجلا :كيف كيف
ام عمر شرحت لنجلا كل شي وجلست نجلا بصدمه :كيف كذا
ام عمر ببكى: من شان العلاج
نجلا :كذا ع الساكت
اريام :استاهل اللي صار
قامت نجلا وهي مو مستوعبه دخلت غرفتها وبكت على اريام اللي زواجها كأنه عزا ما استوعبت اصلا وش صار سمعت امها تناديها ونزلت :نعم يمه
ام عمر:غسلي وشك يامو واعي ساعديني بدنا نرتب ونحضر ضيافه مابيصير هيك
نجلا :طيب
نزلت نجلا وجات نوره وانصدمت بعد وبكت هي بعد وبعد تهزئ من ابو عمر ابتدوا يرتبون ويحضرون
٠٠
عند علي اللي توجه لبيته وهو مصدوم فتح الباب ودخل واجهته ريم ولا تكلم غير انه ضمها حيل وهو ساكت كان فعلا محتاج لها موقف فواز كان مثل الصفعه له هو فكر في اختهم وهو ضحى عشانها وهم ابد مشغولين بالسفرات والروحات والجيه ريم استغربت موقف علي وقالت :علي وش فيك
ابتعد علي عنها وجلس : عمري ما توقعت احد ياخذ مكاني عند خواتي
ريم :ليش هذا الكلام وش صار
علي تنهد وحكى لها كل اللي صار وهو مصدوم
ريم جلست : كيف كذا
علي :مثل ماقلت لك فواز ضحى واخذ اريام وهو مستعد يعالجها فكر فيها امن لها كل شي وحنا ولا شي مع ان نحنا السبب بعماها ..
ريم :لا تقول كذا هو حب يساعد
علي :لا تدورين عذر ي ريم انا غلطان
ريم سكتت ماتدري وش تقول تكلم علي : قومي الحين اجهزي عشان بنروح بيت ابوي اليوم ملكتها وضروري تساعدين امي والبنات احتمال بكره تسافر
ريم : طيب
قامت ريم تحضر ملابسها وملابس علي وهي زعلانه على اريام
٠٠٠
فالليل تجهزوا كلهم وكان العايله كلهم مجتمعين حتى العمه ساره جات بس راكان والجوهره ما جو
عند الرجال كان المجلس مليان وقهوجين دايرين بالمكان
طراد بهمس لعلي :وش فيك ؟
علي :زعلان من نفسي ي طراد
طراد : قد قلت لك بس ما تسمع فرحت اليوم فرحت لما قطعك الندم
علي :خلاص تكفى
طراد:قوم افرد وجهك وبلاش هالنكد
عند بدر اللي كان هو بعد زعلان على نفسه كان برا ويكلم مهره
مهره :لا تسوي چذيه بنفسك انت مالك شغل كانت ردة فعل سريعه
بدر : ي مهره الموضوع مو كذا الموضوع اني مافكرت في اختي وانا السبب ولد عمي تعب عشانها واحنا ما فكرنا
مهره : شو تبى تسوي هذا قدر ربي انت لا تزعل عمرك
بدر : مدري مدري
مهره :بدر
بدر : ي عيونه
مهره :عشاني لا تشيل هم عشاني
بدر :انا على شانك ارمي نفسي بالنار يلا انا است
اذن تبين شي
مهره :سلامتك ودير بالك على عمرك
بدر :ابشري وانتي بعد انتبهي
سكر بدر ورجع للمجلس وهو يشوفه مقتصر بس على الشياب
٠
٠
عند البنات كانت نجلا طول الوقت تبكي
ريم : خلاص ي نجلا
نجلا : والله بيصعب علي فراقها
شيخه: ي بنتي اختك رايحه تتعالج ما تلعب وبترجع وبتشوفينها
نجلا :ادري بس
شيخه:بلا بس بلا قرف لا تنكدين عليها كفايه عليها هذا الزواج الميت
ام عمر: نجلا تعي يلا بدنا نضيف الناس
وابتدوا يضيفون والعمه ساره منحرجه ولا تكلمت مع احد
٠٠
عند الرجال بعد الضيافه ابتدوا يكتبون الكتاب وماكان في الا رجال العايله تقدموا عمر وناصر شهود وجلسوا كتب الشيخ الكتاب وقاموا ابو عمر وعياله وسلموا على فواز وباركوا واخذوا الدفتر ودخلوا لاريام عند اريام اللي كانت جالسه بالغرفه هي وامها واخواتها دخل ابو عمر
ابو عمر : اريام هذا الدفتر يبه اعطيني اصبعك ابصمك عليه
مدت اريام يدها وكانت ماسكه نفسها لا تبكي اخذ ابو عمر ابهامها وبصم لها واول مابصم بكت اريام وصدو اخوانها وامها بكت
ابو عمر بضيق :اريام يبه لا تضيقين
اريام : مابي اروح عنكم
ابو عمر: انا معك يبه معك
تقدموا اخوانها يسلمون عليها وهم كل واحد خجلان اريام لما حست بدر تمسكت فيه وارتفع صوتها وهي تبكي ونادت علي وعمر وعبيد ضمتهم وبكت:انا اسفه
علي بصوت متقطع : أحنا اللي أسفين أحنا ضريناك بس حصل خير ي اريام حصل خير الحمدلله انتي الحين بتروحين تتعالجين وتصيرين بخير
بدر :انا اسف ي اريام اسف ...
تركها وطلع
عمر:مبروك اريام والله ينور بصيرتك
طلعوا كلهم بعد سلام وابتدوا الحريم يسلمون ويباركون
٠٠
عند الرجال ابتدوا كلهم يباركون وبعدها جلسوا يكملون قهوتهم وبدر طلع برا وهو ندمان على اللي سواه باخته وعلي كان ساكت ولا نطق بوسط كل هالزحمه وقف عبد العزيز : خالي
ابو عمر :سم يبه
عبد العزيز بقوة عاشق : انا طالبك ولا ابيك تردني
ابو عمر: ابشر ي ابوي قول وش فيك
عبد العزيز : انا طالب يد بنتك نجلا على سنة الله ورسوله
عم السكوت في المجلس وكل واحد نزل عليه الخبر مثل ضرب الحجر عند علي اللي رفع راسه بقوه وهو مصدوم مايمديه فاق من فواز جاء عبد العزيز وعبد العزيز عاد يبي ياخذ نجلا بقوة وجه بعد اللي سوه اخوانه بدر التفت بقوه مع كلمة عبد العزيز وهمس :ايش
عمر ترك ولده والتفت لعبد العزيز وعبيد ابتعد عن العامل وهو يناظر عبد العزيز
طراد اللي دارت فيه الدنيا بدقيقه وتزلزل في مكانه صارت الدنيا سودا عنده غمض بقوه وفتح يمكن كابوس بس ماهو كابوس وابو عمر اللي ما عرف كيف يواجه الموضوع من جهه راكان ومن جهه جوهره اللي حاقدين واكيد بيأذون نجلا والا عبد العزيز حبيب وده يعطيه عشان ترجع المياه لمجرها صحاهم من الصدمه صوت عبد العزيز اللي ارتفع من جديد : وش قلت يبه (تعمد يقولها عشان يدري وش تعني الكلمه ذي لابو عمر وكيف يحبهم)
ابو عمر ما عرف ينطق حاول يتكلم بس ماعرف لكن ارتفع صوت علي بين الكل :لا
الكل التفت على علي وتكلم عبدالعزيز :ليش
علي ماحب يسوي فضايح قدام الكل وكعادته اضطر انه يكذب : طراد طلبها مني اليوم وكنت بقول لابوي بس انشغلت
طراد اللي عجز يوقف من الصدمات كيف جت كلها مره وحده تسمرت رجوله عجز يوقف ناظر علي اللي يناظره ويحتري منه رد اول مره يكذب علي وتصيب كذبته وقف طراد وهو يرجف وعيونه بعيون علي والتفت لابو عمر وعبد العزيز وناظر بعدين لابوه والكل مصدوم
ابو عمر زادت حيرته ولا عرف يتكلم والكل يناظره وينتظر منه كلمه
٠٠٠
عند راكان اللي ماوقفت دموعه من يوم عرف بملكه اريام ويبكي مايعرف وش بيسوي كيف حبيبته تروح منه كيف وياخذها فواز اللي كان يعرف وش كثر يحبها كيف كان يدور بضياع في الشوارع وهو ضايع وده يموت وده يموت يدري ان فواز بيشيلها بعيونه وبيرجع لها نظرها ويحبها بس ليش ياخذها منه ليش
٠٠
عند مشاعل اللي كانت قايمه بأبوها على اكمل وجه وشايلته شيل مسحت فمه وقامت تودي الصحون للمطبخ قابلها صلاح
صلاح:كيف عمي اليوم ؟
مشاعل :الحمدلله احسن بس باقي يبكي على جدتي
صلاح :ماعرفتي ليش كذا صار فيه
مشاعل :كل ما اجيب الطاري يبكي سألت ريم وسكتت ماقالت لي ولا ادري احس مصيبه كبيره
صلاح : وامك واخوك ما تدرون وينه
مشاعل :مدري والله ي صلاح
صلاح: خير خليني بس اروح اشيك عليه والله يسهل
مشاعل : طيب
٠٠٠
عند ابو عمر اللي كان واقف بنص المجلس وهو يناظر فواز وطراد ولا يدري وش يرد فواز ولد اخته وهو مربيه ويحبه ولد اعز اصحابه اللي مات وهو يوصيه عليهم وطراد ولد بعد اعز اصحابه وطراد اخلاق وادب ويرمي نفسه للموت قبل مايطيح اي واحد من عايلتهم فيها طول عمره يده بيد العيله ولا عمره قصر وينتمي لهم ومعروف انه يغار ويخاف على بنات ابو عمر مثل خواته ووقف معهم يوم طيحت اريام ولا قصر ويا كم سوا وسوا ومافيه شك انه بيحفظ نجلا ويحارب الكل عشانها
اما علي اللي تحسر انه رمى طراد في وسط المصيبه ويدري ان طراد يكره ذا الشغله انه ينرمي قدام الامر الواقع ويا
كم هاوشه على رمية بدر على شيخه وخايف ان طراد يرفض ويفشله بس مايبي نجلا تتزوج عبدالعزيز ولا يبيها تروح لذيك العايله
وبدر اللي كان يراقب طراد وعلي وهو خايف ان علي رمى طراد زيه وخلاه يواجه مصير مايبغاه
عبد العزيز اللي احترق قلبه من اللي قاله علي واتجهت انظاره لطراد واحرقه حرق بأنظاره وهو يراقب خاله وش ممكن يسوي
وطراد اللي ما اعجبه اللي سواه علي ليش كذا يرميه ليش صح اني احبها وابيها بس ليش يعرضني للاحراج مستحيل مستحيل ابو عمر يرفض ولد اخته ويقبل فيني كانوا كلهم يراقبون ابو عمر اللي تكلم بعد صمت: انا والله محتار ولا ادري وش اقول كلكم اثنين محد يختار فيكم واتمنى ان عندي بنت رابعه وازوجكم الاثنين واكسبكم انساب لكن للاسف في مثل موقفي ذا يعز علي ارد واحد منكم لكن بخلي الخيار هذا لنجلا وهي تختار والله يكتب النصيب للي له نصيب
جلسوا كلهم بعد كلام ابو عمر وكل واحد في صدره حكي
٠٠
عند البنات كانوا متجمعين وتصوروا وصاروا يسولفون ويضحكون ويرقصون مايبون اريام تزعل وقدروا يطلعون اريام من جوها
ريم : نجلا غريبه الرجال مالهم حس
نجلا :اسكتي اخواني كلهم مصدومين وتعبانه نفسيتهم بالذات بدر وعلي
شيخه: ليه
نجلا :كبرت بأنفسهم ان فواز ساعدها وهم لا اللي المفروض يساعدونها وهم السبب
شيخه: بس هم ما سووها عمد كانت نتيجه غلط وغضب
ريم : والله لو شفتي علي كيف مقهور ماتصدقون
شيخه: اصلا مدري متى بدا الموضوع معقوله شهر ولا احد حس
نجلا :اتركي امي واريام عارفين من قبل ولا قالوا
ريم : والله صعبه
شيخه: لا ان شاء الله بتروح وتتعالج وترجع ونفرح فيها
نجلا وريم : ان شاء الله
عند اريام اللي كانت تصارع دموعها وخوفها وحسرتها ( يعني ماكان من حقي افرح زي اي بنت ماكان من حقي اعيش ذي اللحظه ليش ي ربي زواجي كأنه عزاي بس استاهل انا اللي سويت كذا بنفسي هذا هو راكان راح وتركني ولا فكر يعترض ولا فكر يجي يواسي ويحط اعذار ويهرب اااااه ي راكان ليتني ما حبيتك ليتني )
٠٠
عند الرجال جاء عبيد يناديهم للعشاء وقاموا وهم ساكتين وجلسوا طراد ماكان له نفس بس جلس كذا جبر خاطر وقام بعد شوي وطلع وهو ضايق و متوتر من اللي صار واللي بيصير ما تحمل ذي الفكره ابد حس احد وراه والتفت حصل علي واقف
علي بتردد :انا اسف طراد ماكان قصدي
طراد : لين متى ماهو قصدك
عليي:ادري رميت نجلا عليك بس تقدر ترفض
طراد اتجه له بغضب وضربه على صدره :اي رمي تتكلم عنه اي رمي انت ماتدري وش يصير احسن انت انقذت روحي بس حطيتني بموقف صعب كيف كنت برد كيف ولو رفضتني وش موقفي وش موقفي قبال ابوي الحين
علي : انا اسف ادري مالي داعي بس طلعت مني لاني مابي نجلا تاخذ عبدالعزيز وانت تدري ليه راكان اكيد بينتقم والجوهره وصيته بيستفردون فيها وعبد العزيز ماله كلمه على اخوانه واخاف يغدر مثلهم ونجلا لا ما تتحمل
طراد : انت يوم كذبت قلت اللي بقلبي صدق كنت ناوي اطلبك نجلا بس مو الحين كنت مأجلها لين ترجع اختك بالسلامه بس انت سبقت الاحداث ورميتنا في حيره كلنا
علي بصدمه: كيف
طراد : اللي سمعت انا كنت ابي نجلا وانت ما كذبت بس غلط تصرفك
علي مسك طراد من كتوفه : بربك تتكلم جد
طراد : اتكلم جد
علي :كيف ليش ليش ما قلت
طراد : توني فكرت وقررت وكنت بكلم امي وابوي واجي اكلمك
علي : ليتك استعجلت ليتك
طراد : ما تنفع الليت الحين
سكت علي اللي فرح من قلبه واستانس وراح ضم طراد بقوه :والله والله والله مدري وش اقول
طراد : لا تقول ادري وش بتقول
سكت ورجعوا دخلوا وسط نظرات عبد العزيز الحاقده ..
بعد العشاء ابتدوا يخفون الناس بعد ما سلمو على اريام ودعوها شيخه كانت طالعه وهي تدندن فوق لغرفة نجلا بتاخذ اغراضها ولما جات طالعه حست بأحد يسحبها انفجعت وجات بتصرخ بس سكر فمها وسحبها
بدر اللي طلع بعد ما تعب من اللي صار وكان ضايق ولا يدري وش يسوي دخل الغرفه وسمع صوت احد يغني وطل وشاف شيخه حس انه بحاجتها تغير جوه وتطمنه سحبها وهي كانت تضربه وتدفه بقوه ولا تدري انه بدر
بدر تركها بعد ما دخلها الغرفه وسكر الباب : يوه تركناك وش بك كذا
شيخه :بدر وش ذا تستهبل طيحت قلبي
بدر :اي بسم الله على قلبك
شيخه : اوووف منك
بدر : وش بك خلصنا هذا انا
شيخه: كان ناديتني زي الخلق
بدر : اسف ي ستي وش تبين بعد
شيخه : يمه قلبي يوجعني
بدر : محتاج قلبك لا يوجعك
شيخه جمدت وهي مفجوعه منه بلعت ريقها بالقوه : بدر وش تسوي
بدر : لا تخافين مابسوي لك شي بس تعبان محتاج لك احس اني ضايع
شيخه : ضايع من ايش
بدر ابتعد وجلس : من اللي سويته في اريام
شيخه: وش سويت
بدر : شيخه لا تستهبلين ادري تدرين ونجلا ما تخبي شي عنك
شيخه تفشلت وجلست جنبه : اللي انت سويته ممكن يسويه اي واحد بمكانك ومهما كان اريام غلطت وانت ماقصدت تعميها بس الحظ خالفك انت ماتدري وش الخيره في الموضوع ربي مايقدر شي الا له خيره يمكن ربي حب يوضح معدن راكان قبل تتورط فيه اريام ومهما كان اريام كانت من نصيب فواز وربي له حكمه ف
ي كل شي لا تشيل هم ولا تضيق وبكره بتفرح فيها وهي راجعه بنظرها
بدر : بس انا حرمتها نظرها
شيخه :لااا تقول كذا ربي اللي قدر وانت مجرد وسيله ربي حب يلقن اريام درس على خطائها وهي اخذته بمتياز قول لا اله الا الله ولا تخلي الشيطان يدخل بينكم
بدر :وانا فوق ذا ما فكرت اساعدها
شيخه : تساعدها بأيش قلي فواز شبه دكتور ويدرس دكتوراه وحب يساعد بنت عمه دامه في يده يساعدها وغير كذا انت تدري انه لو في يدك تساعد ما تقصر والامور هاذي ما يعرف بها الا مختصين بدر ركز وادعمها نفسيا احسن
سكت بدر وهو يراقب شيخه : عمري ما شفتك بذا العقل
شيخه :ههههه نخبيه للحاجات
ابتسم بدر وفعلا شيخه غيرت نفسيته كان ندمان انه جالس يخونها بس مايقدر مهره استوطنت قلبه والله
بدر: شيخه سامحيني
شيخه: على ايش
بدر: سامحيني وبس
شيخه ابتسمت ولا حست بنفسها : مسامح وانا ما ازعل عليك خليها في بالك
ابتعد بدر وهو فعلا ندمان شيخه ماتستاهل قامت شيخه : انا الحين بروح واخليك وبكره ابي اسمع صوتك احسن وابيك تكون مع اريام لين تسافر اقل شي خليها تروح وهي تدري ان خواطركم طيبه تجاهها يلا مع السلامه
بدر :مع السلامه
طلعت شيخه وانسدح بدر بارتياح وهو محتار بين مهره وشيخه
٠٠
عند نجلا اللي طلعت تنام وهي تعبانه ماتدري وش صاير تحت عشانها بدلت وارتمت على فراشها بتعب وهي ماهي مستوعبه ان اريام بتروح بكره جلست تفكر كيف بتكون حياتها وش بتسوي
٠٠
اما طراد اللي تحرك هو وابوه وامه وهو خايف من ردات فعلهم وطول الوقت ساكت وصلو البيت ونزلوا وتحرك طراد بيطلع ووقفه صوت ابوه: طراد
طراد مغصه بطنه: نعم يبه
ابو طراد :تعال هنا واشرح اللي صار
طراد: ماصار يبه انتي تدري
ابو طراد :تكلم
طراد (الله يسامحك ي علي ) : الموضوع اني كلمت علي قلت اني ناوي اتزوج اخته ابيه يجس النبض وبعدين نتقدم رسمي بعد صار اللي صار
ابو طراد :وترمينا كذا
طراد :ماكنت ادري وش بيصير
ام طراد :وش السالفه
شرح لها ابو طراد وفرحت كثير بس زعلت ان عبد العزيز بالنص طلع طراد وهو يبي يهرب من تسألات امه وابوه ودخل وهو تعبان من كل ذا الاحداث رمى نفسه على السرير وهو خايف من رد نجلا
٠٠
اما علي اللي نادى ريم برا وطلع لبيته وسط صمت استغربته ريم وتوقعت انه بسبب اريام وزواجها وسفرها سكتت ما حبت تضغط عليه وصلو البيت ودخلوا رمى علي المفتاح
علي : ريم انا بجلس شوي فالمكتب
ريم: فيك شي
علي : لا ولا شي تقدرين تنامين
تركها وراح المكتب وهو خايف صدق رمى نجلا على طراد وندم رمى شماغه وحاس بشعره شوي وفتح ازارير ثوبه وجلس وحط راسه على المكتب وهو يفكر باللي صار ذا كله وانه مايقدر يسافر مع ريم لين تنحل ذا الشغله
اما ريم اللي دخلت وتروشت وخلصت وانسدحت وهي تفكر في علي اللي متضايق حيل عجزت تنام فزت وراحت له فتحت باب المكتب بشويش وحصلته حاط راسه على المكتب ورافع راسه اول ما حس فيها تقدمت ريم وهي تشوف كيف عيونه حمرا من التعب
ريم :علي حبيبي شفيك
علي اللي ضمها وهو جالس وهي واقفه : مدري وش سويت ي ريم
ريم : وش فيك وش صار
علي : انا ضعت وضيعتهم معي
ريم : وش فيه قولي
سحبت ريم الكرسي وجلست قباله بعدت يدينه عن وجهه ومسكت وجهه وهي تناظره: وش صار قولي ..
🍒ــــــــــــــــــــــــــــــــــــ🍒
#الـى_هنا_ينتهي_الجزء_الـ②②
🎀 @ahgeel 👌👈 🌺
🌼🎀🌼
🎀 🌼🎀🌼🎀
🌺🎀🌼🎀🌼🎀🌼