الفصل 21
عالم القصص والروايات 📚:
🌺🌼🎀🌼🎀🌼🎀
🌼🎀🌼🎀🌼
🎀🌼🎀
🌼 @ahgeel 👌🌺
🍀روايــــ 📖 ــــــة.... 🍀
#ياما_تجرعت_المرارة_عشـانك💙
🌱 #بدايـة_الجزء_الـ⓵②🌱
🍒ـــــــــــــــــــــــــــــــــــــ🍒
سحب ابو عمر الثلاجه وطلع ام محمد اللي اول ما شافتها. ريم انهارت بكاء وصد علي مايبي يشوف صدت ريم وهي تمسك في علي وتبكي :لاا يمه لاااااااااا
صد ابو عمر وهو يمسح دموعه وقرب بيرجعها جوى ويسكر الباب
صرخت ريم وقربت منها باست راسها وهي ترجف وتبكي : ليه يمه ليه ليه تركتيني والله انا مالي غيرك والله ليش زعلتي ليش فارقتيني زعلانه ليش يمه انتي كنتي سندي وكنتي املي ليش
انهارت وبكت طاحت تحت وهي تبكي وترد (ليش يتمتيني ) رفعها علي اللي كان يضمها ويبي يهديها وهو يمسح دموعها طلعها برا وطلعوا للبيت وابو عمر طلع مع ام محمد للمغسله ودق على عياله يبلغون ابو مشعل ويجيبونه
٠٠٠
في بيت ابو عمر تجمعوا كل العايله وهم في حالة حزن مو طبيعيه والكل جالس بصمت وبكي نجلا وشيخه اللي كانوا يبكون على حال ريم سمعوا صوت علي برا تغطوا اللي ماهم محارمه ودخل علي وهو شايل ريم بين يدينه مثل الجثه نامت بالسياره من كثر البكي والانهيار تعدا الكل وطلع وطلعوا معه نجلا وشيخه دخل غرفته ونزلها على السرير ولحفها وصد بيطلع وحصل شيخه ونجلا قباله
شيخه :عظم الله اجرك
علي :اجرنا واجرك بنات خلوكم عند ريم حالتها مزريه ماهي متحمله تعبانه حيل ومنهاره انا بلحقهم للمقبره
نجلا :زين
علي كان بيمشي بس رجع لهم : وانتم بعد وقفوا بكى خلاص لا تشوفكم ريم حاولوا تغيرون جوها شوي
البنات : طيب
طلع علي وراح للمقبره وهو حزين على حال ريم مر طراد اول ماشاف طراد ضمه
طراد:عظم الله اجرك علي
علي :اجرنا واجرك
طراد:كيف زوجتك
علي :مو بخير ي طراد مو بخير
طراد:الله يكون بعونها الله يكون بعونها
طلعوا وراحوا للمقبره وبعد شوي وصل الاسعاف ونزل ابو عمر وراح علي وصلاح وطراد يشيلون جنازتها دخلوها المسجد وصلو عليها وبعدها طلعوا بها للمقبره ونزلها علي وصلاح ودفنوها واستقبلوا التعازي وطلعوا وراحوا بيت ابو عمر وابو مشعل معهم وهو يبكي امه وكان ابو عمر يدفه دخلوا المجلس وابتدت مراسم العزا وتوافدوا الناس طلع علي لريم بيشوف وشلونها وحصلها في حاله يرثى لها قرب لها وجلس : ريم ريم ي عيني مايصير كذا والله مايصير هذا طريق كلنا ماشين عليه منا بيصد عنه
ريم: بس راحت وهي زعلانه ي علي
علي بكذب وهو يبيها تهدا: لا ي ريم هي قالت لابوي قول لريم اني مسامحتها واني احبها
ريم ببتسامه من بين دموعها: صدق
علي :اي صدق واسألي ابوي اذا بغيتي
ريم :يعني مسامحتني
علي :ايه
هدت ريم شوي ونزل علي تحت لان ابوه ناداه واستمروا على هذا الحال ثلاث ايام العزا وريم كل يوم حالتها تصير اسوى وعلي معها في كل حالاتها وكانو مقيمين عند ابو عمر فتره وابو مشعل معهم
٠
٠
في ثالث ايام العزا اتجه بدر للمطبخ بياخذ القهوه وسمع نجلا وشيخه عند الباب تبع المطبخ الخلفي ويسولفون تقدم وهو مبتسم
بدر: سلام عليكم
فزت شيخه ونست انه زوجها وكانت بتنحاش بس مسكتها نجلا :وش بك ي خبله تراه زوجك
شيخه تفشلت :هههه نسيت
بدر : بسيطه كيفك شيوخ
شيخه:تمام وانت
بدر : الحمدلله نجيل عطيني القهوه سريع بوديها
قامت نجلا وقرب بدر وجلس جنب شيخه وشيخه تجمدت
بدر: كيف ريم
شيخه: الله يكون بعونها مو بخير
بدر: ما احد يلومها الله يلوم اللي يلومها الموضوع صعب عليها والله صعب
شيخه : الله لايذوق مسلم الحزن
التفت بدر عليها وحط يده على كتفها : انتي خليك معها
شيخه تزلزت من ثقل يده على كتفها واعجبتها حنيته ابتسمت له :لا توصي ريم عيوني
بدر ابتسم لها وجات نجلا :بدر خذ
اخذ بدر الصينيه وراح وجلست نجلا :وش عنده بدير اشوفكم خقيتوا بسرعه
شيخه: لا خقينا ولا شي بس جالسين نتكلم عن ريم
نجلا :عيني بعينك اشوف وربي انكم خاقين ومنتهين
شيخه :يعني بستحي منك مالت عليك
نجلا : اتمنى يعني
٠٠
عند علي كان واقف هو وطراد يشربون مويه
طراد: كيف ريم
علي : ماشي حالها
طراد : مسكينه الله لا يحطني مكانها
علي : قضاء وقدر
ابو طراد : طراد يلا ي ابوي مشينا خل الناس يرتاحون
ابو عمر: مرتاحين ي ابو طراد
طراد :يلا اشوفك بكره بتداوم
علي : مدري ع حسب ريم
طراد : زين فمان الله
راحوا الناس كلهم وطلع علي لغرفته وفتح الباب وحصل ريم منسدحه وهي ماسكه طرحة جدتها وتبكي قرب منها : ريم
ريم قامت وهي تناظره : وحشتني ي علي
علي ضمها وهو يمسح عليها: الله يجمعكم فالجنه ي حياتي انتي خلاص تعبتي نفسك ي عيني
ريم : كيف بعيش من دونها كيف
علي : انا معك ي ريم معك لا تخافين
قربت ريم وضمته: لاتروح وتتركني مثل امي وابوي وجدتي علي انا مالي غيرك تكفى
علي :الله يخليني اذا خليتك انتي روحي روحي ومحد يترك روحه
سكنت ريم في حضن علي وهي تبكي وهو يواسيها وصعبه عليه دموعهابعد شوي نامت ريم وغفى علي ..
من بكره الصبح صحى علي على وجع برقبته ان
تبه انه نام وهو جالس ناظر ريم اللي نايمه بحضنه ووجهها مورم من البكى تنهد وهو يمسج رقبته جلس وهو يمسح شعرها همس بأذنها :ريمي حبيبي
ريم فتحت وهي تحس انها في حلم وكل اللي صار كابوس ناظرت علي وجلس وحضنته :علي قول انه حلم تكفى
تنهد علي :ليتني اقدر ي عيني بس مو حلم قومي قومي تعوذي من ابليس وخلينا نصلي الفجر اللي راح علينا وندعي لجدتك لا تبكين ي عيوني
ريم بكت غصب عليها حضنها علي : ريم حبيبي تكفين خلاص تكفين والله تعذبين قلبي والله
طالعته ريم بعيون مليانه دموع وكلامها يتقطع بشهقاتها : والله ماني قادره انساها واسكت
علي : لا تنسينها بس ادعي لا لا تبكين لا تعذبينها اذا تحبينها ادعي بس البكى ما يفيد ...تعالي تعالي نغسل وجهك وتروقين وتصلين يلا
قامت معه وهي تمسح دموعها مثل طفله
٠٠
اما بدر اللي صحى بس صحى وهو تعبان وحرارته مرتفعه من الدخله والطلعه بالمكيف عجز لا يقوم ولا حتى يجلس رجع ينام بتعب وهو متكسر
٠٠٠
عند شيخه اللي صحت وفتحت الجوال على طول استغربت ان بدر ما صبح عليها غريبه هو مانسى وحتى هو في عزا وش عنده اليوم: يمكن تعبان من العزا ونايم
قامت وراحت تبدل وتنزل تحت للفطور
٠٠٠
اما عند طراد اللي صحى وتفكيره مع نجلا اللي غصب عليه اسرته وصار يدقق على مكالمات علي او بدر لها او على رسايلهم
نزل وهو ساكت وتعبان ولا له خلق حتى يتكلم منهد حيله من التفكير فيها طلع وهو حتى ما افطر وراح لشركه وهي قافله معه فعلا دخل الشركه وتوجه لمكتبه وجلس دخل عليه السكرتير : استاذ طراد فيه معام....
قاطعه طراد : تكفى ي مقرن مالي خلق شي اطلع وخليني لحالي
طلع مقرن ومعه اوراقه :اليوم الاستاذ طراد قافله معه
محمد :ليش غريبه اجل اللي ماتت تقرب له
مقرن :لا بس مدري وش فيه
٠٠٠
اما علي اللي خلص هو وريم ونزل معها تحت يفطرون
ابو عمر : ي هلا بالريم
ريم :هلابك عمي
ابو عمر: لا اليوم بخير
ريم :اي
ابو عمر : علي وين دوامك ي ابوك
علي : اليوم ما بداوم بجلس مع ريم شوي
ابو عمر : زين الله يعطيك العافيه
جلس علي وابتدا يمد لريم كل شي قبالها ويغصبها تأكل نزلت نجلا :ريم حبيبتي صحيتي
ريم :ايه
نجلا :فطور العافيه ي روحي
علي بمزح عشان يغير جو ريم : ارتاحي بس ريم روحي انا لحالي
نجلا :ههههه لا ي عيني انا اعرفها من ٦سنين وصاحبتها وروحها بعد والا ي ريم
علي :ريم انتي روحي والا روحها ومن روحك انا والا هي
ريم ناظرتهم بحيره وهي تبتسم : لا تحرجوني
علي :لا لا ضروري تكونين عادله وحقانيه اكيد فيه احد تفوق على الثاني
نجلا :لا تثق بنفسك حبيبي
ابو عمر: اتركو البنت بحالها باقي حتى روحها توقفون لها فيها
علي :لن ارضى ابدا الا لين تقول
ابو عمر:اجل انا بتيسر
علي ونجلا :الله معك يبه
علي : ريم قولي
نجلا :ريم قولي
ريم ناظرتهم : والله مقدر من دونكم كلكم
علي : اسمعيني نجلا بكره بتتزوج وتسحب عليك وانا لا
نجلا : مره ثقه ارتاح بس وش دراك ي ريم لو يتزوج عليك
علي :اعوذ بالله انطقي خير
ريم :علي كل شي بالنسبه لي
علي :ايوه كذا شفتي شفتي يلا يلا روحي دوري لك احد يضمد جراحك
نجلا :افااااااا ي ريم ي حوينة العشره بعتيني عشان ابو نص شعر
ريم ببتسامه :اكيد لا لو ما انتي ما كان علي كل شي بالنسبه لي
علي ونجلا :كيف
ريم : يعني خليني اقول لك دور كبير في تغيير نظرتي بعلي بعد ما كانت سودا
نجلا : شفت شفت ي ابو شعر شفت
علي : يعني ايش يعني بتذليني
نجلا : ما اذلك بس اعلمك من تكون
علي :نعم ... قام بيركض وراها بس تذكر يدها وجلس :رحمك ربي ان يدك مكسوره والا كان ذبحتك
نجلا : بسم الله علي وخر بس خل اروح اشوف بدوري
علي :هيهاي هيهاي باقي تشوفين بكره بدورك بيتزوج ويسحب عليك
نجلا :ليه قليل خاتمه زيك
علي : انا قليل خاتمه طيب يا نجلا كل شي ماخوذ حقه بس خلي يدك تطيب
طلعت نجلا وهي تضحك وعلي التفت لريم وهو يبوس يدها : انتي مو بس كل شي بالنسبه له انتي بيدك علي كله لو ابعدتي عنه مابيكون لولا الله ثم انتي ماكنت علي ال حاكم المعروف
ابتسمت ريم: الله لايحرمني منك
ابتعد علي :ولا منك
كملوا فطور وريم تحسنت نفسيتها شوي
٠٠
اما عند نجلا اللي دخلت على بدر اللي كان يرجف رجف
نجلا :بدر وش صار لك
بدر : بردان غطيني
ركضت نجلا وهي تسحب بطانيه ثانيه بيد وحده وحاولت تغطيه حطت يدها على جبينه وحسته ناااااااااار ارتعبت وركضت وطلت من الدرج : علي الحق بدر
فز علي وركض وهو خايف : وش فيه
نجلا :تعال
ركض علي ودخل الغرفه وهو يركض انتبه على بدر اللي يرجف رجف قرب منه :بدر وش فيك
بدر بصوت يرجف : بردان ي علي
شاف علي حرارته نار وسنده واخذه سريع للمستشفى وخفضوا حرارته وطلعوه ..
رجع علي البيت وهو ساند بدر طلعه لغرفته ولحفه وهو يعطيه دواه : وانت ليش مشغل المكيف لما حسيت بالتعب
بدر :ما حسيت على نفسي
علي :زين سليمه هذا امي محضره لك شوربه تشربها وتريح وبتصير كويس
بدر : زين
طلع علي ورجع لريم ريم :وش فيه بدر
علي : لا تخافين مافيه
شي بس سخونه شوي من المكيف والطلعات والدخلات فيه
ريم : وكيفه
علي : معليه كويس
جلس علي على السرير وسحب ريم وجلسها : تعالي بقولك شي
ريم : وش فيه
علي :ارتاحي لا تخافين موضوع عادي بس حبيتك تعرفين فيه
ريم :وشو
علي قالها سالفة مشاعل وصلاح والصدفه اللي صارت تفاجأت ريم : مشاعل باقي حيه
علي :ايه
ريم : يالله الله لا يسامح مشعل الكلب
علي : فيها الخير حلفت الا تأخذ ابوها وتعتني فيه هي وصلاح
ريم :الله يجزاها خير خالي مره يحزن
علي :نصيبه
ريم :وام مشعل ومشعل وينهم ما جوا للعزا
علي : مشعل متورط في اشياء غير قانونيه مسجون له شهر وحاكمين عليه سنين وامه طلبت الطلاق ورمت ابو مشعل بعد ما طلقها وراحت وتركته ومحد يدري وين راحت
ريم :حسبي الله ونعم الوكيل اكيد انها هي اللي سوت بجدتي كذا ودهورت صحتها وقتلتها
علي : ماندري ي ريم تعوذي من ابليس وادحري الشيطان
ريم : اعوذ بالله بس الله لا يسامحها
علي : الله كفيل فيها
ريم : علي بروح لمشاعل ابي اشوفها بشوف خالي
علي : ي ريم اخاف انها تطلع مثل امها
ريم : ماعليك بس ابي اسلم واجي تكفى
علي : ابشري بعد العصر اوديك
ريم باسته وضمته وهي تدعي مايبعد عنها سمعوا دق على الباب ابتعد علي وهو يبتسم :مين
شيخه :انا
علي قام وفتح البااب :اوووف شيخه والادب وين صارت
شيخه :ماتنعطون وجه والله لكن اوريكم
قربت من ريم وهي تبوسها :كيف الحلو
ريم : الحمدلله بخير انتي كيفك
شيخه: ابد عايشين
نجلا جات :شيخه هنا
شيخه:ايه تشوفين البيت منور
نجلا :مررره
علي : وش عندك
شيخه: جيت بشوف ريم وبطلع سريع قبل فواز يذبحني
علي :وش عنده فواز
شيخه : يعني عشان بدر بالبيت حركات بزران
علي : الحمدلله والشكر وش بيسوي بدر بعدين بدر مسكين طايح بفراشه مريض
شيخه ضرب قلبها وسكتت وتداركت وقالت :عاد تعرفون فواز تنكه
ريم : ماعليك منه اجلسي بس
علي :بروح اكلمه
شيخه :لا لا تكفى خليني اروح مالي خلقه اصلا باقي خوالي بيجون ولازم اكون فيه بعزم اني عروسه مالت على ذا الملكه اللي قبلها ومصايب وبعدها مصايب
علي:هههههه استغفري
شيخه : استغفرالله بس خليني اروح يلا تبون شي
علي وريم :سلامتك
طلعت شيخه وسكرت الباب وجات بتعدي ومسكتها نجلا :ما بتمرين بدر
شيخه : وين امره مريضه انتي
نجلا :ليش وبعدين ترا زوجك مسكين طايح
شيخه: اقول طيري اا اهفك بس ي زيني جايه انقلعي بس
نجلا : شيخه ترا بدر سمع صوتك انك هنا وقال ناديها
شيخه :والله لو تموتين انتي واخوك باقي تجي امك وتشوفني وتشهر فيني
نجلا :يوه حرام عليك
شيخه :انقلعي من هنا بس
كانت بتروح بس وقفها صوت بدر وراها : افاااا ي شيوخ اقل شي كنتي جيتي جبر خاطر
شيخه تمنت الارض تنشق وتبلعها ولا تنحط في ذا الموقف تفشلت وسكتت وهي منزله راسها ابتسم بدر وهو يقول : تعالي ماباكلك تعبت وانا واقف
شيخه التفتت تناظر نجلا اللي نزلت وهي تضحك وتورطت :ا شسمه هذا ايه فواز تحت مستعجل وبنروح
بدر سحبها : تعالي خمس دقايق ما تقتل احد
تقدمت شيخه وهي تلعن حظها اللي زي الزفت (يا ليتني سمعت كلام فواز وانطقيت في بيتنا ليت وش جابني ماشاءالله بموت من حب ريم يعني مره مافيه اختراع اسمه جوال ادق عليها طوال عمري ملقوفه استاهل جزاي واقل استاهل ) جلس بدر على سريره وشيخه باقي واقفه
بدر ببتسامه تسحر : شيخه اجلسي حبيبي
شيخهه مسكتها جلطه ولاقدرت تتحرك ( وجع وش فيه ذا ي ربي مايعرف يسب والله لو سبني كان ارحم الحين وش ارد وش اسوي ) تقدمت وجلست بالكرسي المقابل له
بدر : اول شي انا اسف ماصبحت عليك اليوم كنت تعبان وللحين مافتحت الجوال ثاني شي كيفك اليوم كيف خاطرك
شيخه لا شعوريا قالت:هاه
بدر ضحك : شفيك شيخه
انتبهت شيخه (اعنبو داره وش ذا اللسان اللي عليه وربي وربي اذا جلس كذا بموت ماوصل عمري ٢٣ ): ا ايه انا الحمدلله وماعليك عادي انت كيفك وش فيك
ابتسم ببدر :انا بخير يوم شفتك شوي سخونه وعدت على خير
شيخه:بس ا.....قطع عليها اتصال فواز وفزت :يمه فواز
بدر : طيب ردي عليه وش فيك
شيخه(عشانك ماتدري انه متحامل علي ولا يبيني اطب بيتكم حتى ):اييه شكله يبيني انزل تبي شي
بدر: سلامتك بس ماعاد ابي زيارات مستعجله
شيخه لا شعوريا: خير طال عمرك وش رايك انام عندك
بدر : هههههه لا بعدين النوم .
تفشلت شيخه اللي انتبهت لنفسها وطلعت ركض نزلت لفواز وركبت وهي بتموت تعب
فواز:وعليكم السلام
شيخه : سلام عليكم
فواز: كل ذا تشوفين ريم
شيخه: يوه يعني ما اجلس اخذ بخاطر البنت مسكينه
فواز : زين زين
حرك فواز وشيخه بنفسها ( الحمدلله والشكر ي نفسيه واذا جلست وبدر فيه بدر زوجي وجعوه انت بتموت وانت تدري ان بدر بالبيت اجل لو تدري اني تكيت عنده بغرفته لحالنا وش بتسوي )
...(فواز كان معترض اعتراض تام على فكرة الزيارات بعد الملكه تكلم ايوه اما يزوها مستحيل واذا حصل وزار ضروري يكون معهم احد )
٠٠٠
عند بدر اللي انسدح وهو مبسوط (ايوه كذا عرفت وش يعقلك ي شيخه اجل اذا جاك الواحد بالكلام
الحلوا تسكتين ولا تنطقين ابشري اجل اذا ماغيرت ذا الحال ما اكون بدر )
اما عند علي اللي كان جالس يراجع بعض اشغاله ومشغول بالجوال مكالمه مع فلان ومكالمه مع علان واوراق مع هذا ورسايل مع هذا ومجاملات وريم كانت منسدحه بجنبه وراسها بحضنه وتراقبه في كل شي (سبحان الله مهما قوى ومهما اظهر العصبيه والصرامه ومهما خافو منه يبقى جواه انسان حساس وخواف يخاف من الفقد جواه غير غير فعلا اللي ما يعرفه مايحبه ويكرهه ) اما علي على كثر انشغاله وتحركاته كان حريص ومنتبه على ريم بكل حركه وعيونه وقلبه معها سكر الخط : زهقتي
ريم : شوي بس
علي :معلي خليني انهي ذا الصفقه والاتفاقيه وبعدها لك اللي تبينه
ريم تعدلت وجلست : علي و رايك نروح كذا مكان بعيد مافيه ولا مخلوق ابي ابعد عن الناس
علي ترك اللي في يده : وين هالمكان
ريم : مدري دور لنا مكان كذا بعيد مكان فاضي
علي ابتسم : غريبه وش ذا الرغبه
ريم :كذا نفسي ابعد شوي وارتاح شوي واغير نفسيتي
علي :على خشمي عطيني اسبوع كذا افضي نفسي وبعدها لو تبين المريخ نروح
ريم باست خده : الله عوضني فيك عن كل شي
علي ضمها : انتي ي ريم ماضي وحاضري ومستقبلي سنين علي كلها بين يديك
٠٠٠
اما عند طراد طلع من الشركه وهو مو عارف وين يروح ابتعد شوي ووقف عند مقهى قريب نزل وطلب قهوه وجلس يتقهوى وهو يحاول يحصل حل لذي البلوه على قوله صب له فنجان وهو يفكر وش ممكن يسوي عدت الدقيقه والساعه والساعتين وهو للحين يفكر تعب وقام ورجع لشركه وقرر يشغل باله بالشغل ولا يفكر فيها ابدا دخل وطلب يدخل له كل الاوراق والاجتماعات والاتفاقيات وابتدا يحوس فيها وهو يحاول يطلع نجلا من عقله
٠٠٠
وعند شيخه اللي دخلت البيت وقلبها يدق دق (اوه ي ربي وش ذا الرجال معطيه ربي حلاوة لسان مدري كيف بكمل معه اااخ ي بدر ما انت بهين وربي ) انسدحت وهي تفكر في بدر اللي تو مالهم اسبوع من ملكتهم وكل ذا الدلع والكلام اجل وش بيسوي بعدين ..
٠٠٠٠
بعد اسبوعين كل هالزحمه والاحداث والربكه كلٍ كان مشغول بنفسه عند علي صحى من الصبح وهو يبلس سريع سريع ويحاول يخلص قبل تصحى ريم وطلع وهو شبه يركض ركب سيارته واتجه للمطار وخلص بعض الاشغال ورجع للبيت وطل عليها حصلها للحين نايمه ارتاح وتحرك بشويش وهو يحاول مايصحيها فتح دولاب صغير وهو يدور صوره لريم صغيره عشان الجواز حاول فتش فتش وبالاخير حصلها زفر براحه واخذها وحطها ببوكه وطلع بشويش بعد ما بدل وراح للمطبخ وهو فيه حماس مو طبيعي وقف وهو يفكر وش ممكن يصلح فطور وابتسم وتوجه لثلاجه وحاول يصلح شي بس انه فاشل حاول بس ماعرف الا يسوي بيض ونواشف جهزها بالطاوله وصلح شاهي وسخن الخبز وهو يركض بين الطاوله والمطبخ تذكر البيض وركض له قبل ينحرق حاول صلح عجه بالبيض بعد ما اختربت عشرين مره عليه وزفر بتعب وهو ماصدق انه انجز قبل تصحى ريم التفت للمطبخ اللي كانت حالته يرثى لها حاول يجمع بعض الكركبه وينظفها تماما وقدر اتجه للغرفه وطل وحصلها بعدها نايمه ناظر الساعه كانت٨ ونص ابتسم وتقدم لغرفة الملابس واخذ له ملابس ودخل يتروش وينظف من قرف البيت طلع ولبس وجاء لمها بعد ما شيك على السفره وتأكد انها على احسن مايكون
وقف واتجه لها وظل يتاملها
فتحت ريم عيونها :علي وش صار
علي وهو يبتسم :اول شي صباح الخير وثاني شيء ماصار شي ..
ريم : وين موديني ماسكني
علي: تعالي بتشوفين بس هاااه لا تعيبين طلع من قلبي وربي
ريم ضحكت بصوت كله نوم :هههه وشو
علي :غمضي عيونك يلا ولا تغشين وتفتحين
ريم غمضت وهي ماتدري وش مسوي حست فيه يجلسها على كرسي وتمسكت :وش فيه
علي :ماعليك لا تخافين ارتاحي
ريم جلست وقال علي :فتحي
فتحت ريم وتفاجأت فعلا من السفره صح انها بسيطه لكن اسعدتها وقفت وهي تدقق في كل شي ولفت على علي وضمته :ليه تعبت نفسك
علي :عادي مو تعب وش فيها اذا صلحت الفطور ولو مره اصلا شي ماينذكر
ريم :حتى ولو ..
علي :هيا شوفي لا تقلبين دراما وتعالي نفطر
جلست ريم وهي مبسوطه بشكل ما احد يتخيله مدت يدها بتأكل وهي تحمد الله على النعمة اللي هي فيها صح ماتت جدتها بس عوضها الله بعلي ..
٠٠٠
اما عند بدر اللي كان يدق على شيخه ولا ترد وفجاءه وصل صوتها وهي تسب وتلعن وسكت بيفهم وش فيها شيخه اللي كانت بعز نومها وغاطسه بسابع نومه وازعجها الجوال وردت على بالها نجلا ونست اصلا بدر
شيخه:وجع وجع وجع ماتعرفين تسكرين ماتعرفين تختارين وقت تدقين فيه ضروري تنكدين علي كم مره انا قايله لك اذا مارديت مره لا عاد تعيدي.........
فاجأها الصوت الرجولي اللي تكلم ببحته المميزه: شيخه حبيبي بسم الله عليك وش فيك
فزت شيخه وطاحت من السرير وتمسكت بالطاوله اللي بجنب السرير وهي تستوعب من ذا وفجاءه تذكرت بدر والملكه والاسلوب اللي يبكي سمعت صوته من جديد وهو يقول : شيخه معي انتي بخير
شيخه : ايه ايه معك اسفه على بالي نجلا
بدر :حصل خير لكن روقي ما احبك تع
صبين وتزعلين حلاتك شيوخ حبيبتي
شيخه طاحت على ورى وهي مو متعوده على ذا كله تعودت على التصفيق المضاربات معاملاتها مع اخوانها اللي كلها طقطقه واستهبال ولا شعوري تنهدت تنهيده طويله
بدر: وش فيك
شيخه :ولا شي
بدر : زين اجل اخليك تقومين الحين تاخذين لك دوش سريع وتروقين وتفطرين وارجع اكلمك من جديد
شيخه :طيب
سكر بدر وهو ملاحظ الركود اللي في شيخه ويدري انه يأثر عليها ويتعمد انه يتكلم كذا لف على مكتبه ولمح ستاند صغير للبطاقات اشتراه من دبي سحبه وتذكر مهره اللي فعلا استوطنت بقلبه ولا عاد قدر ينساها مهما تصرف مع شيخه يبقى قلبه مع مهره
اما شيخه اللي قفلت من بدر وهي شوي وتصيح قامت وهي تسب نفسها سحبت نفسها سحب واخذت حمام ورجعت انسدحت وهي تفكر وش بتسوي معه كيف تتصرف مايصير تجلس كذا متنحه وقررت تسبقه وتتصل عليه وترد له بعض اهتمامه سحبت جوالها ورجعت تدق بس حصلته مشغول ودقت وحصلته بعد مشغول استغربت مين يكلم تركته وانتظرت ساعه ساعتين ثلاث وبدر ما دق ونامت ماحست بنفسها
اما بدر اللي ماقدر يقاوم ودق على مهره ومنها كلام وسوالف عاديه وهو منجذب تماما لها ونسى شيخه مع نبرة مهره اللي تقتل وتذوب الصخر
٠٠٠٠
عند طراد اللي ما عرف للهرب طريق ولا قدر يهرب من نجلا وحبها اللي كل ماله يزيد ويكبر ولا قدر يتحاشاه او يبعد عنه وينشغل عنه لدرجة انه صار يتحاشى ولا يناظر وجهه علي واذا دقت يحاول ينشغل عنهم ولا يسمع كلامهم تحرك وقام من سريره وهو كل ما تحرك والتفت طرت عليه نجلا تجهز بيروح لدوام اللي الكل انتبه انه شاد حيله فيه اخر فتره لدرجة ان علي صار يروح ولا يحصل شغله يسويها واستغرب دايم يسحب طراد لشغل تسحيب الكل لاحظ انشغاله الدايم اللي مو من عاداته جهز ولبس وهو يراقب ملامحه بالمرايه :لين متى ي طراد لين متى
نزل وتوجه لشركه ودخل والكل تعود على حالته الجديده اللي صارت عباره عن شغل بشغل ولاهو طراد المرح اللي كان يغير جو الشركه اذا صار فيه جلس على مكتبه وابتدا روتينه الممل
٠٠
اما العمه ساره اللي مازالت تصارع القهر والحسره على عيالها واهلها وهي تشوف عبد العزيز في عيونه الحسره على اهله اللي ماعاد له وجه يروح ويزورهم وراكان اللي طول الوقت عصبي ويهاوش ولا كأنه السبب الاول في اللي صار والجوهره اللي صارت حبيسة غرفه وصار عبدالعزيز يحاول يزوجها بأي طريقه
٠٠٠
اما الجد حاكم اللي فقد ساره كثير وانشغل باله عليها هي الحنونه اللي كانت قايمه فيه اخذ جواله ودق عليها بس جوالها مغلق قفل ودق على ابو عمر جاه صوت ابو عمر :هلا بالغالي هلا يبه
الجد هلابك يبه وشلونك
ابو عمر:تمام انت كيفك كيف صحتك
الجد:ماني بخير ي عبدالرحمن
ابو عمر:افا يبه وش فيك
الجد : اختك ساره مدري وينها فيه صارت معاد تنشاف والله اني فاقدها تكفى ي عبد الرحمن دورها تكفى ساره مدري وينها عيالها مافيهم خير لا يكون سوو شي
ابو عمر: يبه تكفى لا تضيق مالك الا طيبة الخاطر انت بس هدي وانا اجيب لك خبر اليوم
الجد :تكفى ي عبد الرحمن
ابو عمر :ابشر يبه ابشر
سكر ابو عمر وهو ضايق من زعل ابوه على ساره يحبها والله بس وش يسوي وش يسوي
٠٠
اما نجلا اللي كانت مطنشه الدنيا ومكمله حياتها ولا درت عن هوا طراد كانت جالسه بالحوش وهي تتمرجح وتفكر اذا اريام متفقه مع راكان او لا ناظرت بيدها وهي تدعي على راكان من قلبها
٠٠٠
اما علي اللي طلع وتوجه للمديريه العامه للجوازات وبفتره قصيره طلع جواز ريم وراح لشركه دخل وتوجه لمكتب طراد وهو مستغرب حاله الغريب دخل : سلاام ابو بريص
رفع راسه طراد وتحرك قلبه بسرعه :هلا علوش ادخل
علي :قدام ادخل الحين بتقول وش ذا الحال هاه ابي اعرف وش ذا التغيير .
طراد : يالله كم مره تسأل اقولك وربي وربي اني مافيني شي بس خلاص بنتبه لشغلي اقل شي خلاص ابي ابتدي انتبه لنفسي لشغلي
علي : وش اللي جد هااااااه
طراد: ما جد شي بس انت تتعب وانت ظروفك كلها ماش عشان كذا
علي : معليه ي طراد بعديها وخليك كذا لين متى مايرجع عقلك وتجي تقول
طراد : خلصنا تكفى
علي : على فكره من جد متغير وصرت اشك ان فيه شي كبير وراك
طراد : لا تخاف ما فيني شي
تركه علي واخذ جواله وطلع وهو معصب من طراد وحركاته ولا هو راضي يتكلم
رمى طراد القلم (وش تبيني اقول ي علي وش اقول انا بموت عشاني مقدر اقول بموت عشانك قدامي بموت عشان تذكرني بأختك اللي ما تفارقني اقولك حبيت اختك وتعلقت فيها وش اقول )... قطع عليه جواله رد بدون يشوف الرقم سمع صوت بنت صوت مألوف صوت هو يعرفه زين صوت عشقه صوت حبه صوت تمحور حياته وغير اطباعه رفع الجوال وهو مصدوم
نجلا:علووووش تكفى تكفى ي عيوني الله يسعدك تكفى تعال اليوم وخلينا نتجمع كلنا نحنا وبنات عمي ناصر ونطلع الملاهي ونفلها تكفى علوش والله زهقنا
طراد فقد تركيزه ورفع الجوال وهو بيتأكد اذا هو جواله او لا شاف خلفية الجوال ماهي خلفيته ابتسم بأسى وعرف انه جوال علي (دايم يتغالطون بالجوالات عشانها نفس بعض وهالصدفه من حظ طراد السيئ )عالم القصص والروايات 📚:
رجع الجوال وهو يسمع صوتها اللي كل حرف بدقة قلب تكسر ضلوعه
نجلا:علييييي
تكلم طراد وهو مايبي يتكلم يبي يسمع صوتها بس : معليش انا اسف انا طراد تغالطت انا وعلي بالجوال ورديت ما انتبهت
ماسمع غير انها شهقت وقفلت الخط غمض عيونه وهو وده يفتح ويحصل هذا واقع تدق نجلا عليه هو على طراد وتقوله يطلعها والله مايرفض والله قام بقل حيله وهو يحاول يغير جوه واتجه لمكتب علي ودخل شافه مشغول مع بعض الموظفين تقدم وعطاه جواله وقال انه غلط واخذ جواله وطلع وباقي صوت نجلا يدق بقلبه ويسبب له رجفه
٠
٠
عند نجلا اللي شهقت وسكرت وانفجعت (يمه وش ذا وش ذا لا ي ربي من قاله يرد اوووف ما احب كذا ي فشلتيً) قامت وهي تسب نفسها ودخلت وطلعت لغرفتها وقررت تروح لريم
٠٠
عند بدر اللي ما حس بنفسه ومرت الساعات وهو غاطس في سوالف مهره اللي تجذب بدر وهو ماوده يسكر شاف مكالمات شيخه وعوره قلبه رجع دق ماردت وسكر وهو خايف من اللي يسويه بنفسه وبشيخه
٠٠
عند ريم طلعت تنظف وتجمع الاغراض وخلصت وسمعت الجرس وتوجهت للباب :مين
نجلا:انا ي نحيسه
فتحت ريم :هلااا بالطش والرش
نجلا :هلاا بك كيفك وش مسويه
ريم :ولا شي انظف كيف طرينا عليك
نجلا وهي تنط بقهر :يوه اسكتي ما تدرين وش صار معي
ريم :ايش
نجلا :تعالي برتاح لين توصل شيخه دقيت عليها قلت لها تجي
ريم :زين خليني اصلح قهوه
ما طولت شيخه ووصلت وسلموا وجلسوا يتقهوون
نجلا:تخيلو وش صار
البنات :وشو
قالت لهم نجلا اللي صار وهي منجلطه
شيخه: وش عليك تفشلين انتي دقيتي على جوال اخوك مادقيتي عليه
نجلا:حتى تخيلي وانا مابقى ترجي ما ترجيته ولا عطيته فرصه
ريم :يمه ي خوفي انا بعد يصير فيني كذا بعدين
نجلا:يييمه
شيخه:انا بعد صرت اتفشل لين ادوخ
ريم :اما انتي صرتي تتفشلين ليه
شيخه قالت لهم كل اللي صار مع بدر ونجلا عيونها طالعه:الله يفشلك ي حوينة بدر فيك
شيخه:على شحم بس وش ي حوينته انسانه صاحيه من النوم وش اسوي له
ريم :يعني انا فالنص بس بدر صعبه احسه ينصدم من الاسلوب
شيخه:بكيفه وش اسوي
كملوا سوالف وضحك
٠٠٠
بعد الظهر عند علي اللي كان يدور طراد بالشركه ولا حصله وراح له البيت بعد ما تأكد انه فيه سلم على ابو طراد ودخل له الغرفه وحصله بينام خلاص
علي : قوم قوم
طراد جلس :علي بسم للله وشفيك
علي :لييين هنا وبس
طراد طاح قلبه وخاف يكون عرف انه يحب اخته ويدري ان علي غيور بشكل يخوف :وش فيك
علي :طراد اقسم بجلال الله لو ما تجلس وتتكلم مثل الخلق لازعل زعل ما تتخيله
طراد:وش اقول
علي :انت تعرف وش اللي بتقول
خاف طراد وارتجف: علي الله يهديك فهمني السالفه
تقدم علي وقف قبال طراد مباشره: انت على بالك انا ما اعرفك هاه على بالك اني انشغلت هنا وهناك نسيتك لا انا بالي معك ومنتبه لك واشوف التغيير الغير مقبول
طراد تنهد براحه: علي وش ذا الموضوع اللي نشبت فيه
علي :لاني ماتعودتك تخبي او اخبي عليك انت تدري بكل شي في حياتي وبتفاصيل دقيقه والحين اشوفك تصد وضايق انا زعلتك ضايقتك
طراد:ي علي مو ذا الموضوع والله
علي :وش الموضوع
طراد اضطر انه يكذب عشان يفتك من علي : ابد الموضوع مجرد صدمه
علي :من ايش
طراد: ابد حبيت
علي انصعق ما توقع ذا الموضوع طراد عمره ما التفت لذا الموضوع :كيف
طراد : كنت اضحك عليك وهذاني قبالك
علي ضحك بتناحه : هههههه تستهبل ترا تكلم زين
طراد :ما امزح ي علي ما امزح
علي ماصدق بس شاف في عيونه لمعه غريبه :طراد تتكلم جد
طراد التفت لعلي بقهر:وش تشوف
علي :من هاذي من اللي جابت راسك
طراد : مدري ما اعرفها
علي :تضحك علي انت كيف ما تعرفها
طراد بكذب : تعرفت عليها بتويتر كلمتها وحبيتها والبنت ماعاد لها حس واختفت ولا اعرف عنها شي
علي : انا ماني قادر اصدقك لا مستحيل مستحيل
طراد :ليه الحب ماهو الا لكً
علي :لا بس انت وذا الشغلات وليش ماقلت لي
طراد: كنت احسبها عابره ماتنذكر لعب علي الشيطان
علي جلس بصدمه:مستحيل لا لا مستحيل
طراد ابتسم وجلس : اذا عندك حل انقذني
علي :كيف ماتعرف شي
طراد:معرف ابي انساها كيف
علي :مالك طب ي اخوي
طراد : هيا لا تنبش جروحي
سكت علي وطلع بصدمه وما توقع ولا واحد بالميه هذا كله مستحيل مستحيل طراد عمره كله ضد ذا الشغلات كيف يسوي كذا كيف يغلط
اما طراد اللي جلس وهو مو مرتاح لكذبه على علي ابدا بس مافي يده حيله نفسه يخطب نجلا ويتزوجها ويرتاح بس استصعبها يخطبها وهم في ذا الظروف وغير كذا اختها عميا ومستحيل يتزوجها الا بالسكيتي وهو مستحيل ياخذها سكيتي بيحتفل فيها وبيفرح بها قرر ينتظر لين تتشافى اريام ويخطب ويتزوج انسدح ونام وهو مشغول معها
٠٠٠
عند علي رجع لبيته وهو مصدوم تماما دخل وحصل شيخه ونجلا فيه وابتسم :اهلا
قاموا يسلمون عليه وبعد السلام والاخبار علي:غريبه الزياره اليوم
نجلا :ايه حبينا نغير جو
شيخه:ايه ونزور ريم
علي :حركات متغيره ي شيوخ وصايره ذربه
شيخه :افا عليك اعجبك
لاحظ علي ان ريم مطنشته ولا فكرت تجي وتسلم عليه ا
و حتى ترد عرف انها زعلانه ولا بيراضيها:افاااا الزين زعلان
ريم ساكته ما ردت
حاول يراضيها بس ماش قام وطلع للحوش وعباها فيري ومويه وسرعان ما سحب نجلا وشيخه وريم وهو يضحك وخرب شغل بدر اللي اشتغله على شيخه وعلمها الهدوء والذرابه علي رجعها شيخه الاوليه وابتدى مناقهرهم وهم يسحبون بعض تسحيب فالمويه وريم اللي نست الزعل من الوناسه وانقلبت الشغله ضحك وفله واخذو الجو تسحيب وصراخ ولعب على كيف كيفهم وبعد تعب طلعوا يتنظفون وطلب علي الغدا وتغدوا وهم مرهقين استاذنوا شيخه ونجلا بس حلف علي وقال تجلسون بس رفضوا وراحو ودخل علي وريم بيريحون قبل العصر
٠٠٠
عند ابو عمر اللي تعب لين حصل عنوان ساره وراح لهم دق الباب وفتح راكان اللي انصدم وتقدم بيسلم ووقفه ابو عمر:وين اختي
رجع راكان وهو مقدر زعل خاله :امي تصلي
دخل ابو عمر وجلس طلع عبد العزيز اللي اول ماشاف خاله اسرع له :خالي هلا والله
ابو عمر: افا ي عبد العزيز هذا سنع اجل كذا ما تحضرون حتى ملكة بدر
عبد العزيز بنكسار:انت تعرف البير وغطاه ي خالي ماودي اضيقكم واجي
ابو عمر :وش تقول مهما صار انتم عيال اختي والخال والد كيف كيف تطاوعك نفسك تقطعنا
عبدالعزيز :يعلم الله ي خالي انه ماهان علي ابدا بس مابي اجدد جروح واحرج نفسي
ضربه ابو عمر على كتفه:عبد العزيز لا تبني بينا حواجز انتم مثل عيالي علي وبدر وعمر وعبيد وراشد احبكم واخاف عليكم ما تهونون ابد ابد
عبد العزيز :وانت ابوي ي خالي
ساره:عبد الرحمن
ابو عمر: هلا ي ساره هلا يا اختي
ساره اقبلت بدموع وهي تسلم عليه : هلابك كيفك طيب مبروك ملكة بدر
عبد الرحمن بزعل : كان ودي تقولينها في يومها
ساره بكت:اسفه ي اخوي بس انت عارف
ابو عمر: لا تقولون عارف لا حنا اهل حنا عايله مايصير كذا
عبد العزيز :بس اللي صار ي خالي
ابو عمر: مابي احد يعيد لي وش صار كل شي صار وانتهى ايه عيالي ايه تأذوا ايه تعبوا بس عيالك يا ساره عيالي
ساره :والله ادري بس مالي وجه
ابو عمر: اجمعي اغراضك وبتروحين معي ابوي تعبان بدونك دق علي وصوته يبكي الصخر يبيكم ارجعوا له
ساره:واللي صار
ابو عمر:انسوا اللي صار مواضيع انحلت
رفضوا يروحون بس حلف ابو عمر انه اذا طلع من ذا الباب وهم ماهم معه ليموت ماشافوا وجهه (ابو عمر كان صديق لزوج ساره وغير هذا ساره يموت فيها اخته الحنونه الطيبه ولا يرضى عليهم ضرر وربى عيالها معها وهم يحبونه بس ابليس شاطر) بعد اصرار ابو عمر رجعت ساره وعيالها لبيت الجد وهم مكسوفين واستقبلهم الجد بالشوق والعتاب
٠٠٠
وكملوا ابطالنا روتينهم المعتاد دون اييي حدث يثير الاهتمام
٠٠
من بكره الصبح طلع علي من بدري وتوجه لشركه بيخلص كم شغله اللي بيده عشان بكره بيسافر هو وريم دخل الشركه وتوجه لقسم التصميم اعطاهم الرسم اللي بيمشون عليه في تصميم الديكورات لعدد من المباني والشركات المتعاقدين معها وشرح لهم كل شي وطلع لمكتب طراد ماحصله فيه اتصل بس مايرد وتوجه لمكتبه وكمل شغله ..
اما طراد اللي صحى وهو مقرر يرجع زي اول ويبطل يلفت الانتباه له صحى بطاقته القديمه الحلوه لبس ونزل وهو يحاول يبتسم :صباااح الخيييير
امه وابوه :صباح النور
طراد : كيفكم اليوم
ابو طراد : الحمدلله اشوفك اليوم مروق عكس الايام اللي راحت
طراد: تقدر تقول خلصت اشغالي
ام طراد: الله يريح قلبك يمه
طراد :امين تبون شي
ابو طراد:اجلس بنفطر الحين
طراد:لا لا مالي نفس ابد بلحق اليوم ضروري اكون في قسم التصميم بكره بنبدا تصميم وشغل
ام طراد:موفق يمه
طلع طراد وهو يتنفس بعمق ويجدد يومه اخذ له قهوه فرنسيه وتوجه لشركه دخل وطلع لمكتب علي :سلام ي معلم
علي :اوه اوه خاطرك فل اليوم
طراد: نعم حاسدني
علي :ابدا جعله دايم بس وش السر
طراد: قلت لنفسي ماله داعي احزن على شي عابر ولا
علي :الا المهم دامك كذا روقت بقولك احتمال بكره اسافر
طراد:وين
علي :بأخذ ريم اغير جوها شوي
طراد:اوك تممت كل شي
علي :كله تمام باقي الحين نشيك ونطلع للمواقع ونتممها
طراد : ايه زين مشينا
نزلوا كلهم وبدوا يباشرون عملهم بروح حلوه وحماسيه ويدهم بيد العمال ما كأنهم مدراء
٠
٠
عند بدر اللي صحى واستعد لدوام وارسل لشيخه يصبح عليها بروح بارده وتوجه لرقم مهره واتصل عليها وابتدا يومه بصوت مهره كمل طريقه لدوامه وهو فرحان ومبسوط
٠٠٠
عند شيخه اللي كانت تنتظر مكالمة بدر وفاجأتها الرساله (صباح الخير كيفك اليوم ان شاء الله طيبه مقدر اكلمك اليوم مشغول حيل ). استغربت بس قالت احتمال مشغول شافت الرساله وبدت يومها بطئ نزلت تحت وحصلت امها وخواتها جالسين يسولفون تحت ويتقهوون
فوزيه : شيخه تعالي تقهوي
شيخه :جيت
ام ناصر :وش فيك
شيخه:ولا شي عادي
ريماس :باقي تستوعب ان اليوم بداء
شيخه طنشتها وسحبت القهوه وصبت لها وجلست تفكر وش ممكن مشغل بدر عنها وهي تسمع سوالف امها وخواتها
ريماس : يمه عمتي ساره ليش ما حضرت ملكة بدر وشيخه ...
ام ناصر :والله مدري غريبه
فوزيه : اكيد فيه سبب وقوي بعد
ام ناصر : الظاهر صاير مشكله بينهم هم وابو عمر
ريماس : مستحيل اصلا عمتي. ساره وعمي عمر مايزعلون مع بعض وعمي مربي عيالها معها وصاحب زوجها
فوزيه : انا اللي استغربت منه راكان اللي بعد ما انعمت اريام اختفى ولا له حس
ريماس :صراحه طاح من عيني حاجز البنت ويوم انعمت تركها وراح
ام ناصر: الله لا يبلانا بس
شيخه (لو تدرون وش صاير بتموتون ): وش عرفنا وش صاير بينهم
٠٠
فواز اللي توجه لابوه وهو ناوي يتزوج اريام بأسرع وقت ويسافر لانه خلاص اسبوع وتبدا دراسته
فواز: يبه فاضي
ابو ناصر ترك الجوال : تعال يبه وش فيه
فواز : يبه انت تعرف اني اسبوع وارجع لامريكا
ابو ناصر: ايه يبه
فواز:وتدري بعد اني طلبت يد اريام من عمي وابطلع فيها لامريكا واعالجها
ابو ناصر: الله يجزاك العافيه بس وش ورا ذا كله
فواز :يبه انا اقول تكلم عمي اليوم ابي اتزوج اريام بأسرع وقت واسافر مافيه وقت على ما استقر والموعد مع الدكاتره قريب
ابو ناصر اعتدل :انا يبه ما عندي مشكله بس نشوف عمك
فواز: قوم معي نروح له ونكلمه
ابو ناصر : اجل تسهلنا
قام ابو ناصر وفواز واتجهوا لابو عمر في المستشفى
٠٠٠
عند نجلا اللي زهقت وهي لوحدها وما عرفت وش تسوي راحت لامها وحصلتها تكلم راحت لاريام حصلتها نايمه دقت على شيخه : شيووووخ وش تسوين
شيخه: ابد جالسه مع امي واخواتي وش عندك انتي
نجلا :ابد زهقانه تعالي نطلع ونتمشى وناخذ عبيد معانا نروح نتسوق نروح نفطر
شيخه: حلو نروح ليه لا
نجلا : لو نقول لبدر عندك مانع
شيخه: اصلا بدر مشغول ويقول ما يقدر يكلم بالجوال تبغينه يطلعك
نجلا :اي شغل ذا غريبه
شيخه:مدري هو قال كذا
نجلا : زين اكلم عبيد وارد لك خبر زين
شيخه: طيب ..
راحت نجلا تدور عبيد في كل مكان اخر شي حصلته جالس يلعب سوني
نجلا : عبود
عبيد :وش تبين من الاخير
نجلا :تعال نطلع انا وانت وشيخه ونتمشى
عبيد :نعم مستحيل
نجلا :عبيد تكفى يلا قوم اسمع واشتري لك اللي تبي على حسابي
عبيد :اللي ابي
نجلا :اللي تبي
عبيد:تسمعون كلامي
نجلا :نسمعه
عبيد :زين موافق
نجلا :كفو عليه يلا قوم اجهز
قام عبيد وقامت نجلا واتصلت على شيخه وقالت لها تجهز
٠٠
عند ريم اللي صحت ما حصلت علي واستغربت منه ما صحاها بالعاده مايطلع من البيت لين يسلم عليها سحبت جوالها ودقت على علي...........
.
#يـــــــتبـــــــع...........
🍒ــــــــــــــــــــــــــــــــــــ🍒
#الـى_هنا_ينتهي_الجزء_الـ⓵②
#نكمل_غدا_باذن_الله
#اللهـم_صلي_على_سيدنا_محمد_ﷺ_وعلى_آل_سيدنا_محمد
🎀 @ahgeel 👌👈 🌺
🌼🎀🌼
🎀 🌼🎀🌼🎀
🌺🎀🌼🎀🌼🎀🌼