ياما تجرعت المراره عشانك - الفصل 18 - بقلم أديم الراشد - مكتملة | روايتك

عالم القصص والروايات 📚: 🌺🌼🎀🌼🎀🌼🎀 🌼🎀🌼🎀🌼 🎀🌼🎀 🌼 @ahgeel 👌🌺 🍀روايــــ 📖 ــــــة.... 🍀 #ياما_تجرعت_المرارة_عشـانك💙 🌱 #بدايـة_الجزء_الـ⑧⓵🌱 🍒ـــــــــــــــــــــــــــــــــــــ🍒 عند طراد اللي دخل من الباب وهو يضحك وابوه مطنقر واعمامه واقفين وليد ولد عمه: خير وش ذا الضحك والا انجنيت من اللي فزعت له فزعة مافزعتها لنا طراد:اقول على شحم ومايخصك ابو طراد اللي واصل حده منه:طراد طلع فوق ما بشوفك طراد:احسن من مقابل ذا الوجيه انطبع على خده كف قبالهم وانفجع طراد لكن تدارك وضعه وطلع فوق وهو مطنقر دخل وتعدى كل الحريم وهو مافكر ياخذ طريق طلع لغرفته بين صراخ الحريم اللي عبالهم انه شافهم وهو مادرى عنهم وكبرت السالفه عند اعمامه برا اللي اتهموه بكشف ستر حريمهم وبدى ابو طراد يفقد وعيه من تصرف طراد وحاول يهدي الوضع بس اخوانه اخذوا اهلهم وطلعوا طلع ابو طراد وهو معصب لطراد وام طراد تحاول تهديه بس الوضع نار رفس ابو طراد الباب ودخل حصل طراد واقف ومعه لابتوبه سحب الابتوب منه ورماه وضرب طراد كف وهو يصيح فيه:انا ربيتك كذا هاه ربيتك تكره اهلك وتكلم عليهم ربيتك تكشف ستر حريم عمامك وبناتهم طراد اللي كان جامد مثل الصخر ولا تكلم ضربه ابوه كف ثاني : دامك ما احترمت ضيوفي وكشفت سترهم ولا وقرت حرمة بيتي اطلع من بيتي ٠ عم الصمت على الغرفه وهدى صوت صراخ ام طراد المصدومه كسر الصمت طراد اللي سحب جواله وتعدا ابوه طلع وامه تصيح وراه طلع وصفق الباب وركب سيارته وحرك ٠٠ عند شيخه اللي كانت جالسه جنب جدها وتهذر عليه لين داخ ونام وقامت وراحت للمطبخ وجابت قهوتها وجسلت وهي تفكر كيف بيصير شكلها بملكتها وقامت تخطط ببيتهم وهي تحاول تستوعب كيف بيسوون الملكه فيه قطع عليها ريماس ريماس :هاااه دوختي جدي وارتحتي شيخه: ريماس تراني قاعده احاول احترمك بس انتي ماتسمعين الكلام لذلك انقلعي خليني اعديها على خير ريماس: من اللي يحترم انتي فواز من وراء بمزح :ههههه شيخه والاحترام اما اقول ارتاحي ريماس:الله يعين بدر فواز بمزح :شيخه نصيحه من اخوك كنسلي الملكه واقعدي في بيت ابوك بس بتفشلينا في بدر الرايق وتجين والله انتي وين وهو وين شيخه كبرت في نفسها اللي قالوه وصدت وطلعت استغربوا انها ماردت وسكتوا اما شيخه انجرحت فعلا ليش هي وش ناقصها ليش الكل يقول انها بتفشلهم مع بدر لذي الدرجه هي تفشل لذا الدرجه العيشه معها صعبه بدت تعيد احساباتها في مسألة بدر وهي تحس ان الكل متفشلين منها وانها نشبه وعله ٠٠ عند علي الله طلع لريم فوق بعد هستيريا ضحك فتح باب الغرفه بشويش ودخل وهو يمشي على اطراف اصابعه دخل غرفة الملابس واخذ له ملابس ودخل الحمام تروش عن الدم اللي كان عليه وطلع ولبس وكل اللي صار وهو يتحرك بشويش وهذا ابدا مو من اطباع علي الفوضوي بس عشان ريم انسدح جنبها بشويش وهو يحاول ما يصحيها بس تحركت وصحت على ثقله جنبها علي :اوف صحيتي ريم رفعت يده ودخلت بحضنه وكملت نوم وهي تعبانه ابتسم علي وشد عليها وهو يتنفس عطرها وجلس يراقب ملامحها الجميله لين غفى دون ما يحس على نفسه ٠٠ عند طراد اللي طلع من بيتهم مقهور والدنيا صاكه فيه تمنى لو يطلعون بوجهه اعمامه الحين ويدعسهم واحد واحد وقف بسيارته في مكان بعيد طفى السياره واستند براسه على الديركسون غمض عيونه بقوه لما تذكر كفوف ابوه له اليوم وهو اللي عمره ما ضربه عض على شفايفه بقهر وسحب جواله واتصل على علي رد علي بصوت كله نوم وهو يبعد عن ريم بشويش عشان ما تصحى ويحاول يسحب نفسه : دقيقه طراد بعد شوي ارتفع صوت علي اللي طلع برا الغرفه : هلا طراد بصوت ضايق : وينك علي انفجع من صوته وتأكد ان صاير معه شي: وش صار معك ليش صوتك كذا طراد : تعال في .... وتعرف وش فيني سكر طراد وانفجع علي زياده من المكان اللي طراد فيه اكيد صايره مصيبه وطراد ما يروح هناك الا فيه عله ركض بسرعه وتجاهل صوت عبد العزيز اللي يناديه وركض على سيارته وشخط لمكان طراد ٠٠٠ عند عبد العزيز اللي قاله جده يجيب له دواه من فوق ولا يقدر يدخل البيت وتصير سالفه بعد وعيال ابو عمر كلهم مو موجودين واحتار يخاف ينادي ويفهمونه غلط هو ملامهم لانه يدري ان راكان والجوهره طعنوهم طعنتين توجع راكان بغى يذبح علي لما افترت عليه الجوهره وهو مجرد افترا ولا فكر حتى يتحمد لعلي بالسلامه لانه زعلان منه ليش يدخل معها في مكان مغلق فما بالك بالجد واللي سواه راكان  وجوهره اللي بغت تضيع حياة علي حاول يدور احد ما حصل وراح جهة المطبخ وهو ينادي عبدالعزيز : ي ولد فزت اريام اللي كانت جالسه وعلى بالها راكان نفس صوته بس سرعان ما ميزت نبرة عبدالعزيز الضخمه مقارنة بنبرة راكان نجلا راحت جهة الباب :نعم عبدالعزيز: كيفك ي نجلا نجلا بدون نفس وهي اصلا ماكنت تهضمه وبعد فعل اخوانه شنت عليه زياده: وش بغيت عبدالعزيز بضيق: جدي يبي دواه من فوق .. نجلا طنشته وراحت تجيب الدوا وحطته بكيس وعطته الخدامه تعطيه اخذه عبدالعزيز ا للي تمنى انها هي تمده له بس باين كرهها له ودى عبدالعزيز الدوا لجده واستأذن انه بيمشي لان عنده شغل ومستعجل وبيروح لدمام حاول جده الرفض بس عبدالعزيز اصر وطلع وهو ضايق ٠٠٠ عند طراد اللي كان جالس جنب سيارته في ظلام  ومخلي بس نور السياره شغال عشان يعرفه علي سمع صوت علي ينادي علي:طراد طراد قام طراد :انا هنا جاء علي ركض :وش بك وش فيه وش صار طراد صد وجلس على كبوت السياره وقال لعلي كل شي وعلي بدوره اللي طنقر وعصب وشب في الدنيا وطراد كان ساكت علي بصراخ :وابوك ليه ان شاءالله يضربك ويطردك عشانهم طراد : يقال اني ماوقرت حرمة بيته وكشفت ستر الحريم علي : الله الله ي الستر انا اوصخ من كذا ماشفت جالس في حضني وينتف في دقني (مثل شامي 😁) طراد : دخيلك ي علي فكني قسم اني بموت من القهر علي : لا تضيق ي اخوي تعال عندي في بيتي البيت بيتك طراد : ادري ي علي بس مقهور علي :ماعليه ماعليه ابوك ما يستغني عنك يومين وبيجي يعتذر منك طراد صد وطلع زقاره وشعلها وهو ضايق اخذ علي زقاره بعد وجلس جنب طراد ٠٠ عند شيخه اللي دخلت غرفتها وبكت على طول حاولت تداري دموعها بس ما فاد اتخذت قرار انها تتغير وتوريهم انها انسانه ينعاش معها وانه مو الله يعين بدر الا ي حظ بدر مسحت دموعها وقامت تاخذ شور وتستعد للتغيير الجديد ٠٠ في بيت ابو عمر كانت ام عمر وساره يطبخون في المطبخ ويسولفون ساره ماكانت تدري عن اللي سواه راكان ومنحرجه منه ليش ماجاء ولا تطمن على اريام اما ام عمر كانت تحاول تخفي غيضها من راكان وواضح ان امه ماتدري اما نجلا اللي اخذت اريام وطلعوا فوق ولا جلسوا مع الجوهره اللي تاكل بنفسها غيره ٠٠٠ طراد اللي رمى الزقاره وقام وقام معه علي علي :وش بتسوي الحين طراد: ولا شي بدور لي فندق اجلس فيه علي :نعم وش فندقه لا ي ابوي بتجي معي الحين لبيتي طراد : ي علي لا تضغط علي مابي انا ابي ارتاح لحالي ولا بضايق احد علي:وش تضايق احد انا صرت احد ي طراد انا لو صاير فيني كذا بتخليني اروح لفندق طراد:لا بس علي :لا بس ولا هم يحزنون واذا تبي على قولك تظل لحالك وتفكر اليوم انا مابنام ببيتي ابوي مصر ننام كلنا في البيت عشان جدي انت خذ المفاتيح وروح وكل شي لك فكر واستكن لين تشبع وكل شي عندك طراد حاول يعترض بس علي حلف عليه ولا رضى بأي عذر ركبوا السياره وتوجهوا لبيت علي دخل علي :ادخل ي طرادً طراد: والله لو تخليني اروح فندق احسن علي :اقول انكتم وادخل دخل طراد وجلس بالصاله وعلي راح ياخذ بعض الاغراض لريم عشان بيباتون هناك يومين وجمع الاغراض اللي يحتاجها  وجاء علي : شوف طراد البيت بيتك وانت اصلا تدل الاماكن كل شي عندك وهاذي ورقه بأسماء المطاعم اللي قريبه وارقامهم اذا جعت واذا حبيت تطبخ كل شي موجود وهاذي غرف الضيوف طب وتخير اللي تبيه منها وجهزت لك ملابس وحطيتها بالمدخل كل شي ممكن تحتاجه طراد: ماتقصر والله مايحتاج علي : المهم روق ولا تشيل هم الشغله ناكته ومالها طعم ابوك مستحيل يفرط بك عشان اعمامك اللي بايعينه اصلا طراد: ان شاء الله علي: انا بخليك وخذ راحتك واذا دقيت عليك رد علي وانا بطلع يستنوني للعشاء طيب طراد :طيب طلع علي وترك طراد اللي رمى نفسه وانسدح وهو ضايق ٠٠ عند شيخه اللي نزلت للعشاء وهي بقمة ترتيبها واناقتها الهاديه بلبس بيت جميل مو مثل عادتها الفوضويه كان شكلها مرتب وجميل ردت السلام وجلست بهدوء والكل مستغرب من ترتيبها وتصرفها الهادي بالعاده تدخل وهي تصارخ وتهاوش وبيجامتها حايسه وبفرده وفريده سكتوا كلهم مستغربين ولا حبوا يناقرونها لانهم معتقدين انه هدوء ما قبل العاصفه ..بعد العشاء قامت شيخه وطلعت مثل مادخلت بدون صوت ابو ناصر: وش فيها شيخه ناصر:مدري ام ناصر :لا انا فواز:ولا انا ريماس :وانا مدري فوزيه :يمكن حست على حالها وانها بتتزوج وعقلت ابو ناصر: لا لا اكيد فيها شي انا بطلع اشوفها طلع ابو ناصر وحصل شيخه جالسه واطقطق بجوالها جاء وجلس جنبها :شيخه يبه وش فيك شيخه ببتسامه: وش فيني يبه ابو ناصر:احد مزعلك احد مضايقك فيك شي شيخه:لا ابو ناصر: مريضه شيخه:لا ابو ناصر: فيك شي شيخه:لا يبه ابو ناصر:اكيد وش فيك هاديه شيخه :عادي يبه ابو ناصر:والله مدري يبه بس اذا فيك شي قولي شيخه:تطمن مافيني شي طلع ابو ناصر وهو مستغرب فعلا من حالتها اما شيخه انسدحت وهي تقول :باقي بدري على استغرابكم واوريكم كيف الله يعين بدر ٠٠ عند علي اللي رجع للبيت وحصلهم مجتمعين على العشاء وينتظرونه :السلام عليكم الكل :وعليكم السلام علي: أكلوا معليكم انا بغسل واجي الجد :معليك بننتظرك .. راح علي ركض وغسل واتذكر ريم وراح دق الباب :نجلا نجلا بصراخ وهي جالسه نعم علي : اسمعي ريم صحت للعشاء ابتسمت ريم :ايه ي علي صحيت علي :زين بالعافيه راح علي وجلس على العشاء مع اهله وسأل علي:وين عبدالعزيز الجد:راح عنده شغل التفت علي على بدر وعبيد وشافهم ضايقين واستغرب التفت على عمر وحصله عادي اشر لعمر براسه وش فيهم رد عمر رفع كتوفه بمعنى مدري سكت وكمل عشاء ٠ ٠ عند عبد العزيز اللي توجه للدمام وهو ضايق دق على راكان راكان :هلا عزيز عبد العزيز : هلا راكان :وش في صوتك عبدالعزيز :ولا شي بس انت وينك راكان :انا بالرياض عبدالعزيز:'ليش ماقلت لي راكان:ليش عبد العزيز :ارسلي موقعك جايك قفل عبدالعزيز وهو معصب ومو ناوي يعديها على خير ابدا ارسل له راكان موقعه وتوجه له وهو في راسه شر ٠٠٠ عند طراد اللي قام وتروش ورجع انسدح بالصاله وهو ماله خلق شي ابدا وكل ما غمض عيونه تذكر صوت الكفوف اللي اكلها من ابوه قام وهو يحوس بعمره وعجز ينام ٠٠٠ عند ام طراد اللي كانت تبكي من يوم طلع طراد وابو طراد اللي جالس بزعل وهو مايدري كيف ضرب ولده والوحيد وكيف تجرا يطرده من بيته كييدف ام طراد ببكى: تضرب ولدك وتطرده عشان اخوانك اللي بايعينك وحاسدين طراد على الضحكه ابو طراد : اسكتي اسكتي مابي اسمع صوت احد اسكتي طلع ابو طراد وجلس بالحوش وهو متضايق وقلقان على طراد ومايدري كيف يتطمن عليه ما كان يبيه يتعود على قطع الارحام وعلى الطيش عشان كذا ضربه ٠٠ في بيت ابو عمر كلهم اجتمعوا بعد العشاء حريم ورجال وكانت السوالف مقتصره على ابو عمر والجد والباقين مستمعين كانت الجوهره تراقب علي بكل تصرفاته ونجلا تراقب الجوهره وصيته تراقب الكل وريم كانت تعبانه وماهي مركزه على الجوهره ابدا علي بهمس لبدر :وش فيكم ضايقين بدر: اسكت قسم بالله اني بنفجر علي :ايه بدر بنفس الهمس :تخيل عبدالعزيز قش قشه وقال بيروح لدمام عنده شغل وابوي مطنقر وحاط الحق كله علي وهزأني انا وعبيد تهزئ علي :ليش وش دخلكم بدر: ابوي شايف ان عبدالعزيز سافر عشان احنا ما نكلمه الا برسميه وقالبين وجيهنا عليه ويادوب نلتفت فيه حتى علي :تمزح بدر :وربي ي رجل معصب تعصيب مو طبيعي ويقول نحنا نبي نقطع رحمنا ونشب العداوه وقال بعد لو راكان يجي الحين قلطه بصدر المجلس وحشمه وكرمه وانه مايبينا نتعود على هذا الشي وضروري ندمح الخطأ علي عصب وصرخ: وهذا خطاء يندمح الكل التفتوا عليه ودق بدر وسكت علي ابو عمر:خير ي علي وش صاير بدر : مافيه شي يبه كنت اقوله عن سعيد ولد جارنا وتفحيطه علي بهمس :وشهو له تكذب بدر:لا تنسى ان جدي موجود ولا يدري بسوالف راكان علي: كمل وش بعد بدر : المهم يقول كفايه مطنشين صيته وبالقوه تسلمون وان الشرهه ان رجعت ترجع علي انا الكبير والا انت ماعليك شهره على قول ابوي مجنون وطايش وذنبه على جنبه علي: ي سلام كل هذا بدر:اقصر صوتك المهم انه محملني كامل المسؤوليه علي :وانت وش دخلك ولعنته هو الثاني الله واكبر باقي بس نحج فيه على ارقابنا بدر:ههههه عاد ماعلينا راح بخيره وشره وانا ماشوف له ذنب الذنب على اخوانه بس اني ماعاد اثق فيه نظراته ماش علي :والله اني معاد اهضمهم كلهم ودي لو اجمعهم واشب فيهم لو ماعمتي ساره المسكينه والا وربي ما يطب خدي خده بدر:عاد حصل سكر الموضوع علي : انا مدري متى ربي بيتوب علينا من ذا العيشه بدر:خلصنا ارتفع صوت الجد حاكم : انا استاذن بنام جاته الردود مختلفه وراح ينام وقام ابو عمر ينام وام عمر وساره وصيته الجوهره اللي قامت بالخفى وراحت اتخبت بغرفة علي واتخبت في مكان تقدر تشوف فيه علي وريم طلعت نجلا واريام ينامون وعمر اخذ زوجته وعياله وراح ينام في غرفته وبدر طلع لاصحابه بيسهر معاهم وعبيد بعد طلع وعلي وريم طلعوا لغرفتهم ولا يدرون ان الجوهره فيها وتراقبهم دخل علي وهو حاط يدينه على كتف ريم وريم قباله ريم لفت عليه :والله لو رحنا ننام ببيتنا كان احسن علي :ليش ريم : يعني في مثل ظروفي احتاج بيتي علي :وش اسوي هذا اصرار ابوي ولا اقدر اتكلم بعد اللي صار اليوم ريم : وش صار علي: خليني ابدل ملابسي واجي احكي لك كل شي ريم : زين وانا ابدل بعد دخلت ريم للحمام وعلي راح يغسل وجهه ويدينه ورجوله وفرش اسنانه طلعت ريم وهي لابسه بيجامتها وقربت لعلي ووقفت قباله باقي مابدلت علي :لا باقي ساعديني اغير الشاش على جرحي وبعدين بتساعديني البس ريم :بس يدك صارت كويسه وتقدر تلبس لوحدك علي :ادري بس انا ابيك انتي تلبسيني ريم بدلع عشان يعفيها :يوه علي والله تعبانه انت شفت مالي حيل افرش اسناني وتبيني البسك علي :اي عادي غيرت له الشاش وساعدته في تغيير ملابسه كملت وجلست على السرير .. ريم:وش اسوي فيك رفعت ضغطي علي ضحك وهو ينسدح ويسحبها في حضنه :تعال بس خليني اضمك اشتقت لك ريم :وانا بعد اشتقت لك بس قولي وش صار اليوم ؟ ابتسم علي ولف عليها :تعالي اقولك وش صار اليوم قربت ريم ودخلت بحضنه وهي مستانسه وابتدأ علي يشرح لها كل شي صار معه اليوم وقال ان طراد في بيتهم بس ماقال لها السبب قال متهاوش مع ابوه وبس ريم اللي ضحكت على مزحهم اللي انقلب جد :علي صاحين انتم احد يمقلب بذا الطريقه علي:ههههه ترا سوينا اقوى من كذا يعتبر تافه ريم:نعم ي ويلي عليكم علي: اوه اسالي شيخه وش سويت فيها طلعت عيونها ريم:والله ذا الشي خه صامده في وجهك علي : تعجبني ترد الصاع صاعين ريم:الله يسعدها قسم انها مجنونه مضارباتها في الجامعه على مسمع الكل علي: مطنوخه مثلي ريم:الا راعية مشاكل مثلك ٠ ٠ عند راكان اللي قام اول ما سمع الباب فتح واول مافتح رفسه عبد العزيز في بطنه وطاح راكان ودفه ودخل وصفق الباب قام راكان بعد ما استوعب اللي صار والتفت على عبدالعزيز :وش تسوي ي مجنون رجع عبدالعزيز ودفه وقف راكان وصارت بينهم هوشه طاح راكان وصار عبدالعزيز فوقه وهو ماسكه من ثوبه ويصرخ:وش سويت انت وش سويت راكان:ماسويت شي عبدالعزيز :كل اللي سويته وتقول ما سويت شي ضيعت مني نجلا وصغرتني قدام الكل صاروا ماعاد يبون يشوفون وجهي الكل تغير والسبب انت واختك محد صار يأمن فينا والسبب انت نجلا كارهتني ولا ترد السلام والسبب انت علي وبدر وعبيد حتى عبيد صاروا متكاثرين القعده معي ويدقون الكلام بوجهي ماخفت من الله يوم تسوي كذا دفه راكان وقام وقعد :انا ماسويت شي كل الغلط على اريام هي اللي نادتني عبدالعزيز:اريام مره ناقصه عقل تقوم تنجن زيها تجاريها ليش اصلا من البدايه مشيت في ذا الدرب راكان :كل السالفه اني حبيتها كثير انا حاولت اكلمها ألحيت عليها كثير لين كلمتها وصرت اقابلها عبد العزيز وهو يضرب الطاوله : انت اللي اغويتها وسحبتها اسمعني ي راكان تصلح كل اللي كسرته ما راح اجلس اعاني من تعب فقد نجلا سكت راكان وطلع عبدالعزيز وتركه وتوجه لدمام وهو شايل على اخوه بالحيل ٠٠٠ عند بدر اللي كان منسدح وتفكيره يروح ويجي مع شيخه ومهره وقام ونزل بيشرب مويه وهو طالع شاف وحده تطلع من غرفة علي رجع ع ورى على باله ريم بس هذا مو شكل ريم شافها تدخل غرفة الضيوف واستغرب وشك انها الجوهره :وش عندها هاذي هنا وش جابها في غرفة علي الله يستر لا تكون مسويه لها كاينه كمل ونزل في المطبخ وحصل عبيد داخل من باب المطبخ بدر :عبيد من وين جاي عبيد:من عند الشباب بدر:الساعه ٤ توك تجي ابوي يدري عبيد بخوف:لا ما يدري تكفى لا تقوله احنا في اجازه ونبي نستانس الله يسعدك بدر بدر: كيف سويت كذا انت تدري ان ابوي حالف ما احد يتعدى ٣ كلنا حتى عمر نرجع قبل ٣ وانت جاي ٤ عبيد: اخذنا الوقت ي بدر تكفى اخر مره بدر: اطلع لغرفتك وان شاء الله اشوفك تعيدها طلع عبيد وبدر شرب مويه وتكى ع البراد:وجع بزران اخر شي انا ما تجرا اجلس لين ٤ وهذا جاي ولا بعد مدور له مدخل طلع لغرفته وجلس يستنى الفجر عشان يصلي وينام وهو يفكر بالجوهره اللي طلعت من غرفة علي ٠٠ ومن بكره الصبح صحت شيخه من بدري وجهزت ونزلت تحت للفطور وهي متخذه الصمت اسلوب لها سلمت ودخلت وجلست وبدت تفطر ناصر: ماشاء الله وش ذا العقل لو ادري مزوجك من زمان شيخه سكتت وكملت فطورها فواز: غريبه حاضرين معك غلط اليوم شيخه مستمره في التطنيش ناصر : ي هويه تراني امس بت عندكم وحصلتك نايمه بدري غريبه شيخه كانت فعلا مصره على السكوت حاولوا ناصر وفواز يغيرون جوها بس مره ماقدروا والكل مستغرب من حالتها .. .. وعند بدر اللي صحى وجهز وطلع ومر على غرفة نجلا وحصلها نايمه جاء عند راسها بدر بشويش :نجلا نجلا ماردت بدر:نجلا نجلا فزت :بدر وش صار وش فيك بدر: بسم الله عليك مافيه شي بس تأخرتي في النومه وفقدتك ماصلحتي لي فطور ولا قهوه من يديك الحلوه نجلا مدت يدها له: قومني اشوف راحت علي نومه بدر قومها :اسف يعني ازعجتك بس تعودت نجلا :لا ما عليك اصلا انا مابرضى تاكل من يد غيري عطني خمس دقايق بس البس وانزل بدر :يلا استناك نزل بدر وقامت نجلا تلبس ٠٠٠ علي اللي صحى على صوت عبيد يقوله ان جده يقول ينزل يفطر معه قام وتروش ولبس ومر ريم اللي بعدها نايمه ولحفها وباسها ونزل قابل بدر بطريقه بدر :صباح الخير ي معلم علي:صباح النور ي عريس بدر: هاه كيف يدك علي:لا كويسه ماعادت توجعني الحمدلله بدر:زين زين ألا علي بسألك عن شي علي:عن شيخه اتأسف بدر:ههههه لا لا علي:قول بدر: امس الساعه ٤ انت بغرفتك علي:ايه وقد شبعت نوم .. بدر : وش تقول انت زوجتك معك علي: ايه اصلا ريم تعبانه ونامت من٢ بدر :تمزح علي : وربي وش فيك بدر استغرب :مدري اذا عندك خبر او لا علي :انطق بدر :لا بس امس استغربت وانا نازل اشرب مويه الساعه ٤ شفت الجوهره تطلع من غرفتكم ودخلت غرفتهم واستغربت قلت يمكن سهرانه مع البنات علي بصدمه :نعم بدر: هذا اللي شفته و ... ما كمل كلامه الا علي طار من قدامه وهو يصيح : يبه يببببه ابو عمر فز بفجعه :وش فيك بدر يحاول يتدارك: مافيه شي يبه علي :الا فيه شي وشي كبير بعد وينها وينها .. راح علي وهو يضرب على ابواب  غرف الضيوف :جوهره اطلعي بدر ركض ومسكه :علي تعوذ من ابليس علي دف بدر : اقول وخر الجد :علي وش فيه علي : وش اللي مافيه ما كنت اتوقع توصل فيها المواصيل انها تنتهك خصوصيتي طلعوا كل البيت على صوت علي اللي كان صراخه معبي الدنيا وصوته يرجف عصبيه وقهر وصدمه ابو عمر :وش فيه وش اللي انتهكوه التفت علي على الجوهر ه وكان جنبه شمعدان حذفه على الجوهر وطاح جنبها وانكسر هنا الكل فز  ووقفوا في وجه علي مسكه ابوه من كتفه :علي اعقل ولا تجن وقول وش فيه علي قال لهم كل شي شافه بدر وكمل بغيظ: شفت ماشاء الله طلعت بايته طول الليل وهي تراقبنا العمه ساره انصدمت وتقدمت للجوهره وهي رجولها مو شايلتها من الصدمه مسكت يد الجوهره وهي تتمنى ان كلامه غلط وانهم فهموا غلط : صدق اللي صار الجوهرة كانت تبكي ضربتها ساره كف وهي تصيح بصوت الام المقهوره :تكلمي الله ياخذكم تكلمي جوهره هزت راسها بأيه طاحت فيها امها ضرب وعلي مسك راسه بقهر وضرب الطاوله برجله الكل سكت من الصدمه وهم يسمعون صراخ ساره وبكي جوهره راح بدر ومسك عمته لانه حسها بتموت من القهر جلسها وهو يمسح وجهها بطرف شماغه نادى الخدامه تجيب مويه وهو يسمي عليها الجوهره كانت تبكي توجه لها جده وضربها كف وهو يقول :وش اللي باقي ماسويتيه وش اللي باقي ماسويتيه وبالقوه خلصوا الجوهره من يده علي اللي صرخ على ريم تجمع الاغراض وهو بيمشي ماعاد يتحمل القرف اللي صاير نجلا كانت مصدومه ما توقعت توصل فيها لذا المواصيل وام عمر والكل مصدوم دق الجد على عبدالعزيز اللي وصل الدمام وقاله وش صار ولازم يجي ياخذ اخته هاذي ويدبرها لانه ماعاد يتحملها ٠٠٠ اما طراد اللي كان نايم في الصاله وهو رامي نفسه بدون لحاف وبدون شي والمكيف موجه باتجاهه صحى وهو يحس نفسه مكسر وتعبان حاول يقوم بس ماقدر من الصداع التفت على المكان اللي مليان زقاير وكاسات شاهي وقرف حاول يقوم وجمع الاغراض الانه مستحي من علي اذا جاء وحصل البيت كذا جمعها وهو مايشوف بعد ما خلص جاء راجع للصاله فجاءه لاعت نفسه وركض على الحمام وهو بيموت من التعب اللي صكه فجاءه ويرجف غسل وجهه ورجع طاح بمكانه وهو منهد حيله ٠٠ عند علي اللي كان بسيارته وهو مو مستوعب اللي صار وريم مثله اخر شي توقعه انها تكون بغرفته وتراقبه ماهمه صح انه ما صار بالغرفه شيء بس همه انا انتهكت خصوصيته هو وزوجته .. ريم كانت ساكته وهي فعلا مصدومه التفت علي لها: انتي ما حسيتي ان احد معنا ريم: لا اصلا ما كنت مركزه وانت تدري ماشكيت ان معنا احد علي :اموت واعرف كيف جتها الجرأه تدخل او حتى كيف تخبت ما شفناها كيف ريم حطت يدها على راسها:انا ماني مستوعبه للحين سكت علي وهو محروق توجه لبيته بسرعة البرق ٠٠٠ عند عبدالعزيز اللي باقي ما برى جرحه من مصايبهم الاولى وقاله جده اللي صار وانجن عبد العزيز اللي ابتلاه ربي بااخوانه حاس بنفسه ومن كثر القهر اللي فيه انكتم ركض على الشباك وفتحه وحاول يلقط نفسه بس ماقدر سحب التيشرت اللي عليه وشقه وهو مقهور نزل بسرعته وطار للرياض ٠٠٠٠ في بيت ابو عمر كان بدر جالس وساند عمته اللي كانت تبكي وتتحسر على بنتها حن عليها بدر (هذا وانتي مادريتي باللي سواه ولدك راكان ) اما الجد ارتفع ضغطه واسعفه ابو عمر المصدوم محد كان فرحان من الموجودين غير صيته اللي فرحت وطارت فرح نجلا اللي انسحبت من الاجواء اللي تحت وهي تحاول تستوعب الجراءه اللي في جوهره دخلت غرفتها وسكرت الباب وجلست على اول كرسي قابلها مسحت وجهها وهي تفكر بأفعال الجوهره الغير مسؤوله ومعقوله قطع عليها صوت جوالها سحبت حصلته شيخه ردت : هلا شيخه:نجل كيفك نجلا :ماني بخير شيخه:وش صار نجلا قالت لها كل السالفه وقامت قيامة شيخه اللي حلفت كمية يمين ودين انها لتربي الجوهره الواطيه وانفطر قلبها من العصبيه والقهر وهي تتحسب عليها نجلا :انا بعرف وش ذا الجرأه شيخه:البلا انا تعترف كيف اصلا تسوي كذا كيف وهم كيف ما انتبهوا عليها نجلا :مدري بس امس ما كانوا في حاله ريم كانت تعبانه وعلي مشغول معها وشكلهم ما انتبهوا لها .. شيخه:والله لو امسكها لطلع بروحها نجلا :وربي مفجوعه منها امس لو شفتيها كيف تاكل علي بعيونها ما تصدقين شيخه : ولعنتها كإن علي بيطالع فيها نجلا : يوه ي شيخه الدنيا مقلوبه تحت قلبه مو طبيعيه خايفه من عواقبها شيخه :بتعدي ماعليك نجلا :اخاف تخرب الملكه شيخه:اعوذ بالله منك تعوذي من الشيطان وافتحي فمك بخير نجلا :احلى شيخه:انكتمي وروحي شوفي وش بيصير وقولي لي. تعرفين جيتي صارت محظوره بسبب اخوك نجلا:تمونين يلا سكرت ونزلت نجلا وقابلت بدر بطريقها:وش صار بدر: مدري بس اتوقع قامت القيامه تركها وطلع لغرفة ابوه يجيب له اغراضه كملت نجلا ونزلت وراحت تحت ٠٠ اما عند علي اللي وصل بيتهم ودخل هو قبال ريم وحصل طراد نايم قال لريم تروح جوى بدون صوت عشان مايصحى على باله نايم ما توقع انه مريض دخلوا جوا بهدوء وجلس علي اللي موب عارف كيف يتصرف سمع ونين برا وفز وراح لصاله بسرعه سمع صوت طراد وهو يرجع (اكرمكم الله) وطايح ركض له وهو يسنتده:طراد وش صارلك طراد طراااد طراد اللي بدا يدوخ من السخونه والجوع والاستفراغ اللي هد حيله من الصبح علي خاف وصار يضرب خده مافتح كب على وجهه مويه ما صحى وخاف وصاح فيه :طراد طراد:امممم علي :وش فيك طراد: بموت علي اللي انفجع وحمله وركعالم القصص والروايات 📚: ض فيه لسياره وعلى المستشفى على طول ريم اللي كانت تراقبهم وهي مفجوعه وش صار له طراد راحت للصاله وحصلت الصاله معدومه صارت تنظف .. ٠٠ اما ابو طراد اللي انشغل على طراد ودق عليه وحصل جواله مغلق ودق على علي ومايرد ودق على ابو عمر ولا رد وانفجع طلع بدون شعور وركض لابو عمر بيشوف اذا هو عندهم او لا ٠٠ عند علي اللي وصل بطراد للمستشفى واخذوه الطوارئ بدوا يعالجونه وعلي توتر كان يركض معهم وين مايروحون هو خايف على طراد ولا يدري وش سبب طيحته هاذي ٠٠ عند ابو عمر كان الجد منسدح على الكنبه وعمر عند رجوله ويسمعون صوت بكى الجوهره اللي كل ماله يرتفع ابو عمر اللي كان يحاول يخفض ضغط ابوه وقدر والعمه ساره اللي دخلت الغرفه وسكرت عليها وهي مالها وجه ابدا تقابلهم بدر طلع فوق وهو فعلا ماله خلق الجو اللي تحت سمعوا باب البيت يدق ووقفت قلوبهم خافوا انه عبد العزيز وتصير مصيبه فزوا كلهم وراح عبيد يفتح الباب وارتاح لما شافه ابو طراد عبيد:هلا عمي ابو طراد بتوتر: هلا عبيد ابوك فيه عبيد:ايه ادخل ابو طراد:لا معليش خليه يجي هنا راح عبيد وقال لابوه ان ابو طراد يبيه برا وجلسوا الكل براحه وطلع ابو عمر :هلا ي ابو طراد ابو طراد:معليش ازعجتك بس ابي اسالك علي موجود ابو عمر: لا ابو طراد :لا تقول متى راح من عندكم ابو عمر انفجع: وش صاير توه راح قبل ساعتين او اكثر ابو طراد خاف ان طراد صار له شي وقعد على الدرج ابو عمر خاف :وش صاير ي ابو طراد ابو طراد بحسره قاله اللي صار معه زفر ابو عمر وهو قرفان من عيشته ومشاكله وانهد حيله خلاص صاح ابو عمر في ابو طراد :وانت انجنيت لما سويت كذا بولدك قول انجنيت هذا ولدك الوحيد تفرط فيه عشان مين عشان اخوانك اللي ما التفتوا فيك حاجوك قبال الله وخلقه عشان كم فلس وزياده قاطعينك ولا يردون السلام نسيت لما جرجروك في المحاكم  واخذوا ما وراك وقدامك وبعدين طراد شزينه اخلاق وعقل وش فيها اذا طلع عن طوره لما ضربته وانت ماعمرك نهرته ابو طراد: لا تلومني لا تلومني الحين دق على علي سوي شي قام ابو عمر يجيب جواله ودق بس علي ما رد وزاد الطين بله خافوا ابو عمر وابو طراد وكل منهم يخيل اشياء مو كويسه ٠٠ عند عبد العزيز اللي طوى الخط طوي بسرعته وهو شوي ويشق ثيابه من القهر الحين خلاص ماعاد في نجلا وش يصلحون عشان يصلحون كل يوم مصيبه والسبب اخوانه ثلاث ساعات طواها قهر وحسره ٠٠ عند علي اللي عدت عليه ٣ساعات وهو فوق راس طراد اللي للحين مسخن ويحاولون يخفضون حرارته حط يده على جيبه يدور جواله ومالقاه توقع انه رماه بالبيت تحرك وقرب من طراد وحط يده على جبينه وحصله للحين حار ابتعد وهو ينادي الممرضه تشوفه ٠٠ عند ابو عمر وابوطراد اللي انجن من القلق وقرر يروح بيت علي وابو عمر دخل لانه مايقدر يخلي البيت بذا الحاله دخل وحصلهم بوضعهم واسوء منه جلس جنب ابوه وهو يترقب جية عبد العزيز اللي بتقلب الدنيا ٠٠٠ عند شيخه كانت جالسه وهي متوتره من اللي صار ومعصبه حيل جلس فواز جنبها :شيوخ وش فيك ي بنت صايره عاقله شيخه: فواز تكفى خلصنا مالي خلق فواز:وش فيك احد مزعلك قامت شيخه وتركته وراحت لغرفتها ودقت على نجلا نجلا:هلا شيخه شيخه:وش صار نجلا :باقي ننتظر عبد العزيز شيخه: ودي كذا يكسر رقبتها ويذبحها ويفكنا منها نجلا :استغفر الله ي بنت شيخه.استغفر الله بس وربي لو تطيح بيدي لخنقها نجلا :او... انقطع صوتها على صوت الصراخ اللي تحت رمت الجوال وراحت ركض طلت من فوق وحصلت عبدالعزيز يصرخ ويضرب باب غرفة الجوهره بيكسره وهي تترجاه ورا الباب كسر الباب ومحد قدر يوقفه سحبها من شعرها سحب وهو يضربها حذف عليها عبايتها وجرها معه جر وهو يصيح : يمممممممه يلااااااا ابو عمر: عبد العزيز اترك اختك ولا تغلط عبد العزيز بصراخ: وخر عني ي خالي وخر انا اللي بليت نفسي ولا ربيت انا ابو عمر: مايصير ي عبدالعزيز اتركها عمر وهو يحاول يسحبه :عبد العزيز تعوذ من ابليس والموضوع بسيط وينحل عبد العزيز بصراخ : محد له دخل وخروا عني طلعت ساره لابسه عباتها وحاولوا يوقفونها بس ماقدروا طلعوا وسكن البيت بعد صراخ وبكى وانصفق باب. البيت وراهم وعم الهدوء القاتل ٠٠ سحب عبد العزيز الجوهره ورماها بالسياره وركب هو وامه وهو لو احد كلمه ممكن يقتله كانت الجوهره تبكي التفت لها وسحبها من شعرهاا وضرب راسها بالمرتبه: انكتمي لا اسمع حسك انكتمي سكتت الجوهره اللي خايفه من عبدالعزيز وش بيسوي فيها عبدالعزيز اللي كان يمشي بجنون وهو يتجاوز السيارات بشكل مميت ٠٠٠ عند راكان اللي كان يفكر كيف يصلح اللي كسره كيف يرجع يمتلك اريام كيف تذكر موقف عبدالعزيز وانكسر خاطره تمنى لو يقدر يسوي شي وهو ماكسر حياته بس الا كسر حياة اخوه معه قام وهو يحوس ويحوس مايدري وين يروح التفت واتجه لجواله فتح وجرب يدق رقمها بس ما ردت وسكره ورماه ٠٠٠ عند ريم اللي كانت جالسه تبخر البيت بعد التنظيف وهي دايخه من التعب :اوف الله يصلحك ي طراد سمعت صوت ا لباب واستغربت :غريبه شكله علي ناسي مفتاحه مع الربشه راحت للباب :مين ابو طراد:انا ابو طراد ريم : امر ابو طراد:علي موجود ريم:لا والله طلع ابو طراد بحزن :وين راح ريم :راح يودي طراد للمستشفى تعبان شوي انفجع ابو طراد وخاف على ولده ارتجف قلبه وصوته :اي مستفشى ريم:والله مدري راح ابو طراد ركض وهو تايه ولا يدري اي مستشفى ركض وهو يدور في المستشفيات القريبه ٠٠٠ عند علي اللي نزلت حرارة طراد بعد معاناه واخذه ورجع للبيت وهم في السياره التفت علي على طراد:طراد حبيبي انت طيب يوجعك شي هز راسه طراد بشويش ب (لا ) وهو ضايق عشان ابوه  صد لما احرقت دموعه خده وهو مو متعود على القسوه من ابوه وقف علي :طراد ي حبيبي لا تبكي وش صار طراد : ما بي بس مقهور كيف هنت على ابوي كبرت بخاطري والله علي ضمه :ماعليش بتدعي ان شاء الله بتعدي صد طراد وحرك علي تحت المطر اللي ابتدا يرشرش ويقوى ٠٠ في بيت ابو عمر اللي عمه الهدوء والصمت وطلع كل منهم لغرفته بعد اللي صار وجلس الجد وابو عمر في الصاله وحاول الجد يرجع للمزرعه بس رفض ابو عمر وحلفه انه يجلس اللي صار صار عند نجلا اللي رجعت تكلم شيخه وهي مفجوعه : شيخه لو تشوفين اللي صار ما تتخيلين شيخه :احسن جزاها واقل من جزاها نجلا : قولي استغفر الله شيخه: استغفر الله بس حارقه قلبي نجلا : اتركيها وفكينا من شرها شيخه :المهم تعالي عندنا نجلا: مقدر دام جدي فيه شيخه: وش بك تسولفين معه اوتعطينه وجه نجلا :مو كذا بس تعرفين ابوي شيخه: ريم هاذي وين غاطسه نجلا : ي بنت تعبانه وشكلها مصدومه ومنجلطه الحين شيخه: اصبري بدخلها في مكالمه معنا نجلا : يلا دخلت شيخه ريم في مكالمه جماعيه وجاهم صوت ريم شيخه: وجع وينك غاطسه ريم:اول شي سلام ثاني شي انا لو اغيب عشره سنين ما انلام من اللي صار معي شيخه: شفتي الوقاحه ريم: انا مرعوبه خلاص شيخه: ليه. ريم: ي اختي اش هالجرأه نعم انا وربي للحين صوت صراخ علي في اذني وانجن ي بنات انجن لو تشوفون وجهه ترتعبون ولا قدرت حتى اكلمه نجلا :الله لا يلومه تخيلي بس اني اكتشف بالصبح ان بنت عمتي معي في غرفتي انا وزوجتي نعم وبعدين علي من غير شي محروق منهم شيخه:اما عيال عمتي ساره المفروض يصيرون عيال صيته مره زابطين وصخين زيها نجلا : من جد ريم: تتوقعون صيته تحضر الملكه نجلا :اكيد ما تفوتها شيخه:لا تكفون فكوني منها ابيها تعدي على خير مابيها تخرب نجلا : وش بنسوي شيخه :كدري ي بنات تكفون لا تحضر نجلا :من جد ان حضرت بتسوي كاينه خصوصا انها ما تحبك ومعترضه على زواجكم شيخه:بلعنتها اعترضت والا ماتت انا ابي اعيش ملكتي بسلام تكفون ريم :خلوها علي شيخه ونجلا :كيف ريم:ماعليكم ماتبونها تحضر الملكه ما تحضر شيخه:وش بتسوين ريم: مالك شغل واهتمي بشغلك يلا سلام علي شكله جاء انقطع اتصالها نجلا :وش بتسوي هاذي شيخه:مدري بس اتوقع بتسوي شي حلو نجلا : يلا سلام بقوم احط لبدر اكل مسكين تنكد عليه وهو عاد مستحيل ما ياكل ويجلس جوعان كذا شيخه بجكاره:ايه اهتمي فيه ريتو يطلع على قبري نجلا :يوه انقلعي بس .. عند علي اللي وصل البيت والمطر كان قوي نزل وهو مسرع شوي وسحب شماغه من ورا جهة طراد وفتح الباب وهو يغطي عليه بشماغه عشان المطر سند طراد وهو يداريه عشان المطر وصل للباب وهو يحوط طراد بشماغه عشان مايحس بالمطر ولا يضره دق الباب وفتحت ريم اللي راحت بسرعه دخل علي ودخل طراد وسنده لين وصله غرفة الضيوف وساعده يبدل ملابسه اللي كلها ريحة مرض وزقاير ساعده ينسدح ولحفه واتجه لريم ريم:علي كيف طراد علي: خفت حرارته بس مانه بذاك الطيب سوي له تكفين شوربه وجنبها شي حار كذا يشربه عشان دواه وخليني اروح اغير سريع واجي طيب ريم : طيب بس اسمع علي: وشو ريم:جاء ابو طراد هنا وقلت له انك طلعت بطراد للمستشفى علي : اوه زين زين انتي استعجلي بس راح علي وغسل ولبس وجاء سريع سريع وريم بدت تصلح لطراد حاجه ياكلها راح علي لجواله ورفع وحصل ابو طراد محرق الجوال اتصالات ودق عليه :هلا عمي ابو طراد: علي وينك ي ابوي ادق من اليوم وين طراد وش صار له وش تعبه ليه تعب علي : هو بخير ي عمي وهذا هو عندي في بيتي تعال اذا حبيت ابو طراد : يالله انا جاي سكر ابو طراد وتوجه بسرعه لبيت علي رجع علي لطراد وجلس جنبه: طراد تسمعني طراد :امم علي : وش تعبت منه وش صار ليش كذا تعبت منه طراد: بنام ي علي بنام علي :ابشر بس استنى تشرب دواك وبعدها تنام قام علي واخذ الشوربه من ريم ورجع لطراد سنده يجلس وجلس قباله يشربه الشوربه واعطاه دواه وبعدها طلع وسكر النور وراح لريم وحصلها جالسه وانسدح وحط راسه على رجولها اخذ يدينها وحطها على عيونه ريم : اشفيك علي : ولا شي ابي اكون معك وبس بدون مشاكل وقلق وحساد ريم نزلت وباست جبينه: كل شي بيعدي ويصير كويس انت ارتاح بس سكت علي وهو يفكر في ذا البلاوي ٠٠ عند عبد العزيز اللي توجه لشقة راكان وسحب الجوهره وهو يدق على راكان فتح ر اكان واول مافتح رمى عبدالعزيز الجوهره عليه عبدالعزيز :خذ تربيتك الفاشله الله لايسامحك لا انت ولا هي راكان مسك الجوهره : وش صاير لك انت وش صار لعقلك انجنيت خلاص عبد العزيز : كيف ما انجن وانتم اخواني كيف كيف راكان سحب امه وهو يسلم عليها اول ماسلم بكت وهي منهاره ضرب عبدالعزيز الباب برجله ودخل ورفس الجوهره بطريقه وهو وده يذبحها راكان: يمه وش فيك وش صار ساره : ي خسارة تربيتي ي راكان خاف راكان انها تكون عرفت باللي سواه :ليش يمه ساره: اختك بتذبحني اختك فضحتني التفت راكان لجوهره: وش مسويه يمه عبد العزيز : ي زين برودك بس اختك بلا بلااا راكان :لا تجننوني قولوا لي عبد العزيز تقدم ووقف قبال وجهه وعينه بعينه : اختك داخله بغرفة علي وتراقبه هو وزوجته وشافها بدر طالعه من غرفتهم راكان انشلت رجوله :نعم عبدالعزيز :اللي سمعته مستكثر اللي صار هاه ما استغربت دامها تربيتك راكان دف عبد العزيز وتوجه للجوهره بغضب:صدق اللي صار تكلمي صدق الجوهره بكت وهي تقول : غصب علي ي راكان غصب علي احبه رفعها راكان وهو يصرخ بصوته كله مسكها من كتوفها ورفعها فوق وضربها بالارض وهو يصرخ: وتعيد اللي تقوله بعد وتعترف بقلة حياها بعد وتعترف نزل راكان فيها ضرب وهو يعيد كلامها وساره مسكره اذانها وتبكي من بكي بنتها اللي ما بقى شي ماسوته عبد العزيز جلس وهو مغمض ومقهور ولا فيه حيل ابد .. ٠٠ عند علي كان للحين منسدح على رجول ريم ومغمض سمع صوت الباب وقام وهو يسحب نفسه فتح حصل ابو طراد واقف وجهه مرعوب وخايف سلم عليه ودخله وحن على شكله ابو طراد: وين طراد علي :نام يبي يرتاح بعد التعب ابو طراد: وش فيه علي : شوي سخونه مو محرزه ابو طراد: وي نايم علي :تعال اوريك وين وداه للغرفه ودخل ابو طراد وقرب من طراد اللي نايم وهو باين عليه الضيق جلس عند راسه وهو يناديه بشويش : طراد يبه قوم انا اسف ماكان قصدي ازعلك طلعت من طوري علي كان واقف متكتف وهو يشوف حال ابو طراد اللي يحزن فتح طراد : يبه ابو طراد: يالبيه فز طراد وجلس ابو طراد : انا اسف يبه ماكان قصدي والله بس ما حبيتك تعود على هجران اعمامك طراد : ليش ي يبه عمامي مافكروا فينا يبه مافكروا ابو طراد ضم طراد :انا اسف يبه طراد ابتعد : ي يبه انا ما همني ليه ضربتني انت ليش اصلا تستقبلهم وانت تدري ما هم صافين نيه كيف تبي تحن وتستقبلهم وهم اللي ما خلو شي ماصلحوه فيك وهم اللي اخذوا كل شي منك وتركوك حاير بولد وامه ولا معك ريال تسد جوعهم تركوك تعاني جوع وهم وفقر رموك في ديره ماتعرف فيها احد ما حنوا على دمهم ولا شفقوا على طفل صغير وام مريضه ما رحموك وتركوك تعاني بمرض امي وخوف وفقر خلوك من دون عزوه واليوم لما ربي انعم عليك رجعوا وبيرجعون يعيدون حركتهم ويرمونك يبه هذولا مو اهل هذولا اعداء .. 🍒ــــــــــــــــــــــــــــــــــــ🍒 #الـى_هنا_ينتهي_الجزء_الـ⑧⓵ 🎀 @ahgeel 👌👈 🌺 🌼🎀🌼 🎀 🌼🎀🌼🎀 🌺🎀🌼🎀🌼🎀🌼