الفصل 14
عالم القصص والروايات 📚:
🌺🌼🎀🌼🎀🌼🎀
🌼🎀🌼🎀🌼
🎀🌼🎀
🌼 @ahgeel 👌🌺
🍀روايــــ 📖 ــــــة.... 🍀
#ياما_تجرعت_المرارة_عشـانك💙
🌱 #بدايـة_الجزء_الـ④⓵🌱
🍒ـــــــــــــــــــــــــــــــــــــ🍒
اريام :يبه شيله ضايقني ماني قادره افتح
بدر تمسك بعلي وهو ساكت ولا نطق ابو عمر ماله حل الا انه يشيلها قرب وهو يحاول قدر مايقدر يماطل فيه الكل كانت انظارهم عليها وتشع بخوف وقلق بدا ابو عمر يشيل الشاش اللي بعيونها وبعد مافكه حطت اريام يدينها على عيونها :يبه في قطن بعيوني
ابو عمر بضيق :لا يبه
اريام : ليش اسود طيب انتم مطفين النور
ابو عمر بالقوه نطق: يبه اريام عيونك شوي تعبانه وبتشفى بس انتي خليني ألف لك الشاش
اريام : كيف تعبانه يبه
ابو عمر بتردد: هي يبه هي انك بتجلسين فتره ماتشوفين لين نصلح لك عمليه وترجع ان شاء الله
عم السكوت بعد كلمة ابو عمر والكل يناظرونها وهي لما سمعت كلام ابوها غمضت بقوه ورجعت فتحت ورجعت غمضت وهي تفرك عيونها بقوه ورجعت تفتح ولا فيه امل صرخت وهي تقول :لا لا لا يبه تكفى لا لا ابغى اشوف يبه لا مستحيل
وانهارت تصيح وتبكي وهي تضرب وجهها بدر ماتحمل وطلع وهو حالته كسيفه اما علي وابو عمر اللي يحاولون يهدونها وهي تصارخ اعطاها ابو عمر مهدئ ونامت بعد وهي تبكي علي مسك ابو عمر استند على علي وهو يطلع برا علي كان سانده وهو متقطع قلبه على الوضع اللي صاير جلس ابو عمر على الكراسي وهو يستجمع نفسه بعد مده قام وراح للدكاتره المختصين علي ضاق ودخل لامه وحصلها ساكته وتناظر اريام اللي حالتها كسيفه اخذ ريم وطلع
٠٠٠
اما بدر اللي ماقدر يتمالك نفسه وطلع من المستشفى كان يلف مثل المجنون بسيارته وهو بيموت من الندم وتأنيب الضمير مايدري وين يروح بنفسه والا يشكي لمين راح للبيت دخل اول ماشاف نجلا راح لها نجلا ما كانت احسن حال منه
بدر:نجلا
رفعت راسها نجلا : الله يسامحك على اللي سويته ي بدر
بدر: والله ما كنت اقصد انعمت عيوني من العصبيه والله مو بيدي والله
نجلا ماردت وهي تمسح دموعها انكسر خاطرها على بدر اللي فعلا حاس بالذنب وقالت: الله يكون بعونها ويصبرها ويشفيها
جلس بدر منهد حيله جنبها وهو يفكر بعواقب اللي سواه ومتحسر اما نجلا وعبيد كانوا ساكتين وعبيد أكله الندم أكثر من بدر عشانه هو اللي قاله بطريقه غلط
٠٠٠
عند علي دخل بيته وهو كاره عمره توجه لغرفته ورمى نفسه على السرير بتعب وهو يدعي بقلبه لاريام حس بريم جلست جنبه وهي تمسح على ظهره :انت بخير ياعلي
علي: ماني بخير ماني بخير احس اني فتيلة ذا الشعله ليتني ماطلعت ولا رحت لبيت ابوي ولاشفت اللي شفته
ريم: لا تقول كذا مقدر ومكتوب كل ذا
سكت علي وكل شي صار من بداية ذا الامر يمر عليه واحد واحد
٠٠٠
بعد اسبوعين من كل هالاحداث اريام طلعت من المستشفى وبدت تتقبل وضعها شوي شوي وهي حاسه بذنبها وغلطتها وحاسه انه عقاب من ربي وبدت تتأقلم على انها ماتشوف كانت نجلا وامها ونوره ورهام وكلهم في خدمتها ولا تطلب شي الا ينفذ بالحال وابو عمر اللي كل يوم يبحث عن حالتها مع الدكاتره المختصين وكل واحد يدلي بمعلومه شكل وكل يوم تدرس حالتها من جديد
نجلا كانت طول الوقت مع اريام واحيان تنام عندها كانت حاسه بالقهر على اختها وتحاول تكون لها عيونها وام عمر نفس الحاله ونوره بعد اما بدر اللي كان يأكل نفسه اكل من القهر كان طول الاسبوعين في بيت علي وابوه زعلان عليه هو وعلي ولا يدري وش يسوي كل يوم يروح يطل عليها اذا صار ابوه مو فيه ويرجع
اما علي كان متاثر بس حاله احسن من قبل ونفس وضع بدر بالضبط وفواز اللي يراقب الاوضاع بهدوء تام وهو في راسه شي
وعند طراد اللي كل يوم يودي امه لام عمر وتظل عندها لاخر الليل وابوه مع ابو عمر وهو بين علي وبدر اللي يحس انهم بيتجننون
وعند راكان اللي كان يضرب اخماس واسداس وقلبه اكله على اريام واللي صار فيها من ورا عنادها لو ماهددته ماكان جاء ولا شافهم علي ولا صار كل ذا طول ماهو يقابل اريام ماكان خايف الا من علي وبدر اللي على كثر ماهم حبيبين اذا راقوا لكن اذا احد داس لهم على طرف ياكلونه اكل وعند الجد حاكم اللي مو مستوعب كمية المصايب وكل يوم يرتفع عليه الضغط والسكر
٠٠٠٠٠
في بيت ابو عمر كانت نجلا عند اريام وكانت تأكلها تكلمت اريام بحزن:نجلا
نجلا:هلا
اريام:ليه علي وبدر مايجون باقي زعلانين علي والله ماسويت شي والله
نجلا :لا ي اريام يجون والله يجون ويسألون ولو تشوفين شكثر ندمانين وزعلانين ماتعرفينهم لكن ابوي زعلان عليهم ومايبي يشوفهم عشان كذا مايجون الا اذا راح ابوي واحيان تكونين نايمه واحيان عندك ضيوف
اريام: يعني باقي يحبوني مو زعلانين علي
نجلا : شوفي ي اريام ماينلامون اذا عصبوا وضاقوا في النهايه هم ليه صلحوا كل ذا الهليله عشانك مو عشان غيرك هم يحبونك ولا ودهم تضرين نفسك ولو بشك ابره وانتي قهرتيهم واستغليتي طيبتهم
اريام ببكي:ي ليتني مت ولا طحت من عيونهم ..
نجلا :اوووش هدي الموضوع انقضى على خير والح
مدلله انتي فكري بس كيف تنسينهم وتخلينهم يسامحونك
سكتت اريام وهي تفكر وش الحل اللي بيخليهم يسامحونها ماتدري انهم مسامحينها وقاضين
٠٠٠
عند علي كان في احد محلاته ويشرف على شغل العمال لكن قلبه مو معه صح هدت الاوضاع بس ابوه باقي زعلان عليه وعلى بدر كان متعمق بتفكيره ولا هو حاس بأحد دخل عليه طراد ورد السلام بس علي مو معه جاء له من وراء وصرخ في اذنه انفجع علي والتفت واول ماشاف طراد سحب عقاله ومحطه فيه
طراد:اآآه ي مال الضارب ي شيخ
علي:تستاهل وش ذا الواحد يرد السلام
طراد:رديت السلام لكن اللي اخذ عقلك يتهنى به
علي: اقول ابلع العافيه بس وقول وش صار معك في الورشه
طراد وهو يجلس: اول شي انا ما انسأل وش صار معي انا اروح بالشغله عاطله ارجعها ميه ميه
علي:اييييييه شفناك فوق وشفناك تحت
طراد :والله تشوف فوق تشوف تحت تشوف مقلوب ما خصني انا علي مني اتحداك تطلع عذروب في شغلي عذروب بس
علي :اقول لا تجني على نفسك لو بتكلم ليضمونك لداعش على المصايب اللي مسويها
طراد:نعم نعم وش سويت ان شاء الله
علي: مدري بس اعرف لك واحد عطيته رنج جديد يفتح النفس مشكلته بس ترتفع حرارته راح فيه ورجع لي اياه ددسن 2007 وفوق ذا لاعبين عليه
طراد تورط: والله عاد انا ماني خبير سيارات
علي:ي مسلم ريحنا قال ماني خبير سيارات مايبي لها قاري يقرا واضحه لو اعطيها نجلا سوتها فل
طراد:ورى ماعطيتها نجلا وريحتنا من الغثى حقك
علي :كنت احسب اني عطيتها ناس بكامل قواهم العقليه
طراد بشهقه :الله لا يكمل لك جميل ي قليل الخاتمه ي خاين عشرة٢٠ سنه ي عدو الجمايل ي ناكر المعروف
بدر من وراء :اوف اوف اوف من مزعلها ام زكي
علي:هههههههه شفت كيف
طراد:انت ابلع العافيه احسن لك عايله جحوديه من اليوم هذا ماعاد اقدم ولا خدمه ونشوف من يحن عليكم ويمسح دموعكم ويقدر مشاعركم
بدر: اخس ي سفير النوايا الحسنه اخس ي فاين اخس ي أمي وانا مدري اقول ارتاح اي تمسيح دموع واي حنيه لك اسبوعين بس تخوش علينا وتقلبها وهوايش ومحاضرات دينيه انقلبت مشاعري كومة حجر عقب ماكانت تشع بالخضره وطيبه ومشاعر الجياشه
طراد: خف علينا ي ارض الشام تشع بالخضره استريح ي ابو مشاعر ي كاظم الساهر وانا مدري
علي كان حاط يده على خده ويراقب : خلصنا انت وياه بدر مارحت للبيت
بدر: اي بيت
علي: بيت ابوي
بدر:لا دقيت على نجلا وقالت انها بخير بس تسأل عنا ليش ما نجي
علي:وش قالت لها
بدر:قالت الصدق وش تقول
علي :الله يعين
طراد وهو يشفط بالشاهي : اطلبو لي شي تراني جوعان
علي وبدر التفتوا له يناظرونه قمة البرود اللي هو فيه كان متكي ومزحلق على الكرسي وفي يده كاسة شاهي طالع فيهم طراد: هاه وش بكم خلصو علي اطلبو لي
اخذ بدر السماعه وطلب له شي يبلعه ويسد حلقه
٠٠
عند شيخه كانت لابسه بتروح لنجلا وجاء فواز
فواز:وين رايحه
شيخه:بروح لاريام
فواز:هي كيفها
شيخه: لا تسأل تحزن ما كأنها اريام ابدا متغيره كثير
فواز حب يعرف اذا هي تدري بسالفة راكان: ليه متغيره
شيخه فطنت بسرعه:هاه ايه عشان العمى اللي جاها
سكت فواز وبعدين قال: انا اوديك يلا
شيخه: زين اريح
طلعوا وتوجهوا بيت ابو عمر
٠٠٠
عند ابو عمر اللي رجع البيت وراح لاريام وحصل امها واخواتها عندها دخل :السلام عليكم كيف الحلوين اليوم
اريام : الحمدلله يبه
ابو عمر:لا غزال غزال والشر زال
ابتسمت اريام:يبه اطلبك شي
ابو عمر :امري يبه
اريام : مايامر عليك ظالم بس يبه الله يخليك سامح علي وبدر هم مالهم ذنب كل الموضوع اني غلطت واستاهل اللي صار لي واللي سووه نابع من خوفهم وغيرتهم علي الله يخليك سامحهم
ابو عمر سكت وهو ماوده يسامحهم ويخليهم يتعودون على ذا الشي
اريام:هاه يبه وش قلت دخيلك والله اشتقت لهم
ابو عمر:ابشري الحين اتصل عليهم واقولهم يجون
ابتسمت نجلا وامها والكل وهي تدعي ان الله يتمم ولا يغير
٠
٠
عند الشباب اللي انضم لهم عمر بعد فتره كان طراد متكي وطايحين في البيتزا وناسين انفسهم قطع عليهم صوت جوال بدر
اخذ بدر الجوال ورد :هلا يبه وش فيه
ابو عمر:مافيه شي يعني ما اتصل الا فيه شي
بدر بضيق :لا يبه بس انت اخر فتره ماتتصل عشان كذا
ابو عمر: على كلٍ الموضوع هو تجي انت وعلي البيت اريام تبي تشوفكم وتسامح منكم لكن اللي بيجي بأدبه وخاطر زين والا يفارق
بدر :ابشر الحين نجي
سكر ابو عمر وحذف بدر الجوال :يالله ابوي حتى فمان الله مايقولها ولا يخليك تقولها
علي: اي وربي تغبني ذا الحركه
طراد بنص عيين:توك تعرف انها تغبن مسوي طالع منها اصلا ي حبيبي تسكيرة الخط في الوجه مثل الادمان عندكم اذا ما سويتوها تموتون اصلا تحسون بالنقص اذا ماسويتوها ..
بدر وعلي وعمر كانوا يناظرونه وعيونهم طايره
عمر:وش بك علينا اليوم بس جالس وتحذف حكي
بدر:مو كفايه مبلعينك لين طلعت النعمه عليك
علي:جحود جحود
طراد: على شحم بس قال ايش قال جحود انتم اشكروا الله وصلوا ركعتين اني متنازل وقاعد عندكم ومعكم
اخذ علي الصوص وكبه على طراد وبدر كب البيبسي
وعمر كملها وكتفه و بالفلفل الرومي مسح به وجهه وطراد بس يصارخ ويتحلف ويتوعد ولا قصر هو الثاني كب عليهم سطل البويه وانقلبت الجلسه لمصارعه وبعد شوي تذكر بدر وقال لعلي وفزوا الاثنين وراحو بيتروشون ويروحون لاريام اما طراد اللي رجع وهو يقطر بويه وبيبسي والصوص ويدعي عليهم دعاء جماعي
٠٠٠
وصل علي وبدر البيت دخل بدر القسم اللي جالس فيه طول الفتره اللي قضاها عند علي وعلي راح لغرفته اول مادخل انفجعت ريم من شكله:علي وش ذا
علي وهو متوجه للحمام :خليني اخذ دوش وبعدين اقولك
دخل علي يأخذ دش وريم تجهز له ملابسه وهي مستغربه
وش ذا اللي صاير فيه بعد ربع ساعه طلع علي وهو يضحك على اشكالهم ريم تناظره مستغربه وش ذا انهبل : وش فيك وليش كل ذا
علي قعد يقولها كل شي وريم تضحك على طراد اللي في اصعب الاوقات لازم يتحشر وينتقم وقالها علي انهم بيروحون لاريام وهي بتروح
ريم: غريبه وش ارضى عمي
علي وهو يحط يدينها على كتفها: والله مدري بس اتوقع ان اريام حست بغلطها وتبي تصلح شي
٠٠٠
اما بدر اللي كان يلبس بعد ما اخذ له دش طرت مهره عليه :ايه ي مهره وين الدينا قسم بالله لها فقده ..انتبه لنفسه:وش فقدته ي مسلم اركد بس وفكر بشيخه الحين
كان بدر يناقض نفسه بين مهره وشيخه مهره اللي نسخه منه بالتفكير والمبادئ. وشيخه اللي عكسه تماما حس انه مهره حركت في قلبه شي بس ماطول شعوره لانه تجاهله وهو يفكر باريام
٠٠٠٠
طلعوا كلهم وتوجهوا لبيت ابو عمر واول ما دخلوا حصلوهن فالصاله حتى اريام ردوا السلام ودخلوا وشافوا اريام توقف سلموا على امهم وابوهم وتوجهو لاريام اللي كانت ملامحها تدل انها بتبكي قرب علي وهو يمسكها من كتوفها لكن اريام بكت وهي تحاول تضمه ضمها علي وهي بادرة بالبكى وهي تترجاه يسامحها تكلم علي بصعوبه وهو اكثر شي يكرهه الدموع :الله يسامحك ويسامحنا خلاص وقفي بكي لا تتعبين نفسك
اريام حاولت تسكت بس رجعت انهارت لما حست ببدر اللي ضمها بدر اللي تقدم وضمها وهو عيونه ترفرف دموع بس حابس نفسه ابتعدوا وجلسوا وهم يسولفون ويضيعون الوقت وبينسون الزعل اللي صار
٠٠٠
٠
اما عند طراد اللي رجع لبيتهم وقابله ابوه
ابو طراد: وش فيك ي ولد وش ذا
طراد : من عيال صديقك اللي مايستحون
ابو طراد:عيال صديقي مين
طراد:علي وعمر وبدر
ابو طراد: يقالك زعلان عليهم يوم تقول عيال صديقي
طراد: يبه رجااء خليني زعلان
ابو طراد هو يضحك:روح روح ازعل لين تشبع
مشى طراد وطلع لغرفته وبدا ينزل ملابسه وعلى كل قطعه دعوه اخذ له دوش وراح ينام وفجاءه وهو منسدح جلس يفكر بحال علي وبدر مع اختهم اريام وقال بنفسه: بما انها مازالت بنت ولا دنست نفسها وعلي حط مية يمين ما يتزوجها راكان ليه ما اتزوجها انا اكسب اجرها واجرهم وانا مرتاح ماعندي اللي يشغلني واكيد انها تأدبت وتابت بعد اللي جاها واذا على الجمال ماشاء الله عليهم كلهم والله ماهي شينه خليني افكر فيها شوي ....وغط بنومه وهو يفكر بذا الشي
٠٠٠
عند ابو عمر كان عمر هو اللي متصدر الجلسه ويسولف ويضحك والباقين يردون عليه الا علي كان جالس على الجوال ويراسل ريم اللي جالسه بالطرف اللي قدامه ويستهبل عليها وفجاءه دخل عليهم عمهم ابو ناصر وبناته ومن ضمنهم شيخه اللي كانت مندفعه ووقفت اول ماشافت بدر ورجعت من طريقها وشافها علي اللي فضح بها وهو يضحك ويطقطق
ابو عمر: ي عيال روحوا المجلس
ابو ناصر:ايه ترا ينتظركم فواز وناصر
علي : لا والله كيف اروح واخلي شخشوخة قلبي
شيخه وصلت معها منه ولا حست بنفسها الا هي تقول: جعل قلبك يوقف ي ابو نص شعر
الكل انفجروا ضحك عليها وبدر ابتسم وطلع من برا وهو يسمع مناقرهم اللي بدا والتفت لعلي وشافه يهز بكتوفه ويغني ويرقص
يقلد شيخه يوم شافها بدر تغني وترقص انفجر بدر لما تذكر الموقف ونجلا وريم وشيخه فحمت من القهر وعلي يضحك
رجع بدر وسحب علي معه وطلعوا للمجلس وهم يضحكون
راحوا يسلمون على اريام اللي جالسه وشيخه من الغبنه تهبد في ريم وريم المسكينه اللي حاطتها شيخه بقلب المدفع كل ما حقدت على علي كانت السوالف مقتصره على ابو عمر وابو ناصر
٠٠٠
عند العيال اللي من اول ما شافوا بعض وهم يطقطقون
بدر:الا تعال ي فواز متى راجع امريكا
فواز وهو يحط فنجاانه :بعد شهر وشوي ليه
علي: ي اخي يا شين الغربه انا بفهم وش تجلس تسوي ..
فواز:اسكت تكفى ترا صاير اطفش منها من الكليه للبيت وعلى ذا الوضع اللي يسد النفس
عمر :اجل تزوج وروح هناك دور لك ونيس ياخي والله عيشه تبكي
ناصر:جالس اقوله دام باقي لك سنتين بعد دور لك مره وانت ضامن وظيفتك اذا رجعت
علي :صادق
فواز:ان شاء الله ان شاء الله
عمر وهو يهبده:جالس تسكتنا هاه
ناصر :مو شي جديد
قاطعهم عبيد اللي دخل بالقهوه وحطها وصار يصبها لهم
ناصر:وش صاير في الدنيا اول مره يصب القهوه ولا فيه صياح
فواز :اي والله وش صاير
اشر بدر لهم يسكتون وغير الموضوع صب عبيد القهوه وبعدين طلع والتفت ناصر على بدر:وش فيك
بدر: ياخي خلوه بحاله تراه منصدم من بعد
اللي صار لاريام
فواز :وهو وش دخله
علي: تأثر من المواقف اللي صار خصوصا انه صار ينرعب من بعد غيبوبتي واللي صار فيها وعلى باله اريام بعد بتموت
فواز:لا عاد عبيد
عمر: صدق او لا تصدق وربي ماتوقعته
بدر:مسكين والله صوته مره منقطع
(عبيد كان حاس بالذنب لانه هو اللي قال لبدر وتسبب في عمى اريام وتغير ميه وثمانين درجه)
٠٠
عند شيخه اللي كانت تسابق ابوها وعمها بالحكي وتناقشهم في امور ماتدري عنها بس كذا زهقت
ابو عمر:انتي وراك محاشرتنا الحين قلو الحريم وراك عجزت اسولف بسالفه الا تلقطينها مني
شيخه:الله يسامحك ي عمي هذا وانا بسولف معك اعداك ابو نص شعر
ابو عمر:مين ابو نص شعر
نجلا: ههههههههه علي يبه
ابو ناصر :وليه ابو نص شعر
جلست نجلا تحكي لهم السالفه والكل منفجر من الضحك واريام كانت تحس لاول مره بالمتعه اللي بمناقر شيخه وعلي
ابو عمر:مالقيتي الا شعره اللي جالطنا عشانه
شيخه: ليه ان شاء الله تبغاه يعلم علي وانا اسكت
ابو ناصر: ايه لا تسكتين بس هدي حلقتي شعره مره وحده
ابو عمر اللي كان يضحك من قلبه عليها وعلى تفاعلها وفي خاطره( والله زين مااخترت ي بدر زين ما اخترت )
كملوا سوالف وشيخه ماسكه تحشير في عمها وابوها والكل يضحك عليها ٠
..
اما عند الجد حاكم اللي درى باللي صار جاء مسرع واصر على عبدالعزيز يوديه وهو زعلان على راكان انه ماجاء (وهو مايدري ان كل ذا بسبب راكان ) وصلوا ودخلو وحصلو الكل متجمعين دخل الجد وبصوته الجهوري: السلام عليكم
فزوا كلهم وبدوا يسلمون عليه واحد واحد والجد عتبان وزعلان عليهم كلهم
الجد :اجل انا ادري من الغريب مستكثرين تدقو علي وتقولون لي
ابو عمر: ي يبه الله يخليك لنا والله انا متحاملين على انفسنا وبالقوه فقنا ما لحقنا نقول لاحد
علي وبدر كانوا ساكتين ولا نطقوا وحاسين انهم مذنبين
الجد :خلك انت تقول مصدوم وين عيالك مادقوا ولا تكلموا بالذات انت.. وهو يأشر على علي ..ورا ماقلت لي العتب عليك انت
علي كان يناظره وساكت وجده مازال يهاوشه
ابو ناصر : ي يبه قلنا لك محد انتبه من الفجعه
الجد:اسبوعين ما انتبه اسبوعين
علي بقل حيله: الاسبوعين ذي اللي تتكلم عنها وانا اطلع من شي ادخل بشي العتب مو بس علي
الجد بعصبيه: الا عليك ونص انا ماعلي من احد كثرك
علي عصب ليش جالس يهاوشه قدام اللي يسوى واللي مايسوى: لا تعاتبني انا العتب عليك اللي المفروض تدق وتسأل مو عشان جالس بالمزرعه يصير لازم نودي الاخبار لين عندك راس مالها رقم وتدقه
ابو عمر: علي اقصر صوتك
الجد :الله الله صرت ترفع صوتك علي
علي: عجزت فيكم ما تصير مشكله الا في راسي ماتصير مصيبه الا انا اول واحد تحطونه بوجه المدفع وفوق ذا ملام وعتاب انا ماعندي شغل غير ارضي فلان واداري علنتان
ابو ناصر: علي قضينا
طلع علي واخذ ريم معه وهو لو جلس ممكن تصير مشكله كبيره
اما الجد اللي جلس وهو زعلان ومنحمس ماكان وده يصارخ على علي لكن العتب عليه لانه دايم يبلغه بالاخبار لما جاء اهم خبر يسكت (الجد مايدري بالمصيبه اللي صارت والا ما كان عاتب علي ، ومع ذلك يعجبه شخصية علي اللي مايسكت على حقه ولا على اهانته ويرد ويسكت الكبير والصغير )
حاولوا يدارون الوضع لين هدا وصاروا يضيعون الموضوع
عمر بهمس لناصر:والله ي علي كاش على جدي بشكل
ناصر :والله ما الومه جدي كل شي يصير يحطه براس علي وبعدين جدي عارف علي لا يقدر ولا يحترم اذا عصب واصلا زين انه يحترم وهو مروق
عمر وهو يضحك: ي شيخ محد مهجد جدي الا علي وجدي ما يقدر لزعله خمس دقايق وبيقول دقوا عليه خلوه يجي
ناصر:صادق جنونهم تطابق بعض
الجد : ي بدر دق على علي خله يرجع مايصير يروح وانتم متجمعين
عمر وناصر ضحكوا والتفت جدهم :خير وش عندكم تضحكون
ناصر:ولا شي نضحك على غيث وعبود (ولد عمر وولد نوره)
دق بدر على علي:نعم
بدر: اسمع جدي يقول ارجع
علي: ماني براجع وخله يشبع من العتب والملام لحاله ..
بدر حاول يتدارك الوضع:تعال ولا تكبر السالفه
علي :ي شيخ وخروا عني
قفل بدر: رفض يجي ي جدي
ابو عمر:مدري لا متى العناد ذا
كلهم سكتوا وهم عارفين علي وجدهم على كثر مشاكلهم مستحيل يزعلون من بعض
٠
عند علي اللي اتجه لبيته وهو مطنقر لو احد يكلمه ممكن يذبحه
ريم بتردد:ليش عصبت كذا
علي وهو يحاول يسكت ما يعصب عليها: ريم الله يخليك تسكتين مالي نيه ازعلك واصرخ عليك
ريم بعناد : وش دخلني انا وبعدين لا تعصب علي من دون سبب
علي :لا حول ولا قوة الا بالله من كلمك اصلا او عصب عليك
وقف عند البيت وهو ينزل ونزلت ريم وفتح الباب وانتظرها تدخل ودخل بعدها وتعداها وراح للغرفه وهو ينزل ثوبه جات ريم ووقفت قباله وهي تناظره ناظرها بعد ما نزل ثوبه: ريم وش في راسك ناويه تخلينا نتهاوش
ريم : ومن قالك بنتهاوش
علي: زين وش بك شايله شرك ولاحقتني
ريم مسكته من يده وسحبته وجلسته على الكرسي وهو مايدري وش نهايتها
ووقفت وهي تكلمه: اسمع تهاوشت مع جدك وعصبت و ووو اشياء كثيره خلاص تجلس بينك وبين جدك لا تعصب ع
لى احد ماله دخل طيب وسواء انا او غيري وبعدين لا تعصب كذا وتزعل نفسك مو حلو عليك والله اخاف يصيبك شي من ورا ذا العصبيه والتهور روق ولا تزعل عمرك
علي كان يناظر وفي نفسه يقول ( وش بها ذي ناويه تقضي علي وتخرب ابو العصبيه والله ما اذكر ان احد كلمني وانا معصب وهي مو بس كلمتني الا تعاند وتتغزل ي ويل حالي لكن ارفع نفسك ي علي ولا تخق بسرعه)
ريم وهي تأشر بيدها:وين وصلت
علي :ولا شي
ريم : هيا خلاص فك العقده ي اخي والله مالي ذنب تعكر كذا وتزعل كفايه ٣اسابيع وانت طول الوقت منفس فيها
غمض علي عيونه وفتح :انا وش قلت لك اليوم ما اقولك لا تباغتيني وتندمين
ريم وهي تبتسم:باغتك في ايش
علي :لا تحديني ي ريم والا والله لطلع عيونك
ريم :هههههههه وش سويت انا عشان تقول كذا
علي :اول شي اذا كان وراي شغله او كنت بطلع او معصب وركزي معصب لا تطلعين بوجهي بحركاتك اللي تضرب بقلبي ضرب اركدي لين اروق وسوي اللي تبين
ريم:ههههه يالله الشرهه مو عليك على اللي يعطيك وجه ويبي يروق فيك
علي:علينا ي ريم علينا والله انها كلها جكاره فيني عشان بس تلخبطيني اعرفك انا
ريم:ههههه طيب عادي اتحركش فيك شوي والا ما يحق لي
علي : يحق وليه ما يحق بس هدي شوي عطيني اشاره انك ناويه تتحركشين على قولك لا تجيني كذا والله انخبص وتضرب عروقي ببعض
ريم ببتسامه وهي تقرص خذه :وهذا المطلوب
علي قام : اييوه كذا سقط الذنب عني اوريك كيف تتحركشين الحين والا مو من حقي
ضحكت ريم وهي تشوفه روق وهذا اللي تبيه يروق ويعدل مزاجه ماتحب تشوفه معصب
٠٠
على المغرب فضى بيت ابو عمر من الناس كل وطلعت اريام
بمساعدة امها فوق وقام بدر ع اساس يطلع ويروح لبيت علي بس وقفه صوت ابوه :بدر
بدر:سم يبه
ابو عمر:وينك رايح
بدر : بروح لبيت علي
ابو عمر:وش تبي عند علي
بدر انحرج: يعني انا اصلا ذا الفتره عنده وبرجع لاني تعبت بنام
ابو عمر: وبيت ابوك وين راح (كان بيبين له انه مسامحه بس بطريقه غير مباشره)
بدر ابتسم بضيق: الله يديم بيت ابوي بس ابوي زعلان علي عشان شي ماكان بيدي ولا بوعيي
سكت ابو عمر وصد بدر بيطلع بس ناداه ابوه وتقدم له وضمه وقال في اذنه: ماعمري زعلت عليك انت بالذات كنت انت الوحيد من عيالي اللي مايزعلني ومرضي وهادي لكن مابغيت اشوف منك اللي شفته ضربت اختك وخسرتها شي كبير
بدر :والله يبه ماتحملت عمري خصوصا اني ضايق منها من قبل وكملت عليها بذا السوات والناتج ان راكان حتى ما تكلف وجاء استسمح منا او اعتذر راح في اول موقف صادفه
ابتعد ابو عمر وهو يضرب كتف بدر:مانا بحاجة اعتذاره المهم اريام يرجع لها نظرها والباقي في ستين داهيه
بدر :صدقت يبه
ابو عمر: ارجع لغرفتك تراها خلا بدونك
بدر ابتسم وباس راس ابوه وتعداه وطلع لغرفته اللي اشتاق لها
دخل وانسدح على سريره طرت له مهره اللي مارضت تفارقه وحاول بدر يتجاهلها ويتجاهل التفكير فيها بس ما قدر شي من قلبه يحن لها فز وهو يحاول يبعدها عن تفكيره قطع عليه دخول نجلا :اووووووه اووووه بدير رجع نور بيتنا
بدر: بوجودك تعالي تعالي اجلسي وحشتيني مع اني ما اتوقع انك فقدتيني
قربت نجلا وجلست:يعني تقدر تقول اني فقدت القرقره على راسك كل مازهقت
بدر: آه الحمدلله اجل انا ارتحت
نجلا :هههههه اتحداك اصلا
بدر:يعني شوي بس
نجلا:ايوه كيف دبي ماسالتك بسبب اللي صار
بدر: ابد ما جديد هي هي
نجلا:استانست ان شاء الله
بدر:اووه تعرفت على واحد يقاله متعب ما قصر ابد الله يعطيه العافيه
نجلا:زين الحمدلله ..وش بتسوي بموضوعك انت وشيخه
بدر:مدري سالفة اريام لخبطت اشياء كثيره
نجلا :تهون تهون
بدر :على قولك ..
نجلا:انا شفت انوار غرفتك مفتوحه قلت بشوف مين فيه دامه انت بروح انام بس اسمع روح لعبيد ترا من جد حاله يحزن حاول تطلعه من اللي هو فيه حاس بالذنب
بدر: ابشري يالحنونه روحي نامي واتركيه علي
طلعت نجلا وتركت بدر اللي قام وراح لعبيد
٠٠٠
عند عبيد اللي كان أكل نفسه من الخوف على اريام وحاس بالذنب ليته ما تدخل او تكلم دخل عليه بدر :عبود وش تسوي
عبيد:ولا شي
بدر:وش بك خاطرك شين
عبيد:كيف تبي خاطري يصفى وانا سبب كل اللي صار لاريام
٠بدر:سبب ايش بالضبط اصلا انت وش سويت
عبيد: انا اللي قلت لك وخليتك تتصرف ببشاعه معها
بدر: انت مالك دخل انا كنت بدري منك او من غيرك وكنت بسوي اللي سويته ومحد منا المذنب سبب كل اللي صار راكان اللي ماقدر واحترم ولعب بعقل اريام المسكينه وقهرنا كلنا واختفى وكل اللي صار سواء مني او من علي او اي واحد نابع من قهر وحسره على اخته بس محد فينا راضي على اللي صار واللي صار لاريام مقدره ربي لها سواء حصل بسبب او لا ونتيجه للي سوته واغضبت ربي قبلنا كلنا احنا بشر نعصب وننقهر ونغلط بس في النهايه كل شي بيصير مقدر ومكتوب
عبيد :بس اخاف ماعاد تشوف اريام
بدر :لا ان شاء الله وبعدين شوف ابوي معها وبيساعدها وبيرجع لها ربي بصرها ان شاء الله وبيكون هذا كله درس لنا كلنا انت بس توكل على ربك وربك كفيل بعبادهعالم القصص والروايات 📚:
وروق ترا الدنيا بخير
عبيد:ونعم بالله
بدر وقف :انا بروح الحين انام ومن بكره ابي اشوفك زي ماكنت قبل وابي اشوف الاخلاق الحلوه مابي الصمت هذا كفايه نكد كثير اللي صار لنا
عبيد: ابشر
طلع بدر وهو يحاول يقنع نفسه بالكلام اللي قاله لعبيد
٠٠٠
اما عند علي اللي كان هو ريم بالحوش ومسكرين كل الانوار وفارشين فرش وجايبين خداديات ومنسدحين تحت نور القمر اللي كان بليلة ١٥ واضح وجميل ريم اللي كانت منسدحه بحضن علي وهي تراقب ملامحه مع نور القمر وعلي كان يسولف لها
ريم:علي بسألك
علي: قولي حبيبي
ريم: كيف حبيتني ليش وصلت للمرحله هاذي وكيف طلع معك كل شي سويته عشاني
علي تفاجأ من سؤالها بس قال وهو يشد عليها وهو يناظر القمر: مدري لا تسألين العاشق كيف حب خليني اقول اني ما كنت حاس بالحب ذا كله واحنا صغار بس اللي كنت اعرفه انك كنتي تعنين لي بشكل ثاني عن باقي البنات كنتي تقريبا عادي عندي كصديقه احبها واتحمس العب معها كانت تعجبني سوالفك وحماسك وبعد وفاة امك وابوك صرتي تعنين لي اكثر واكثر لما تركتي الكل وتوجهتي لي بالرغم من جدتك وخالك وعياله وكثير تركتيهم كلهم وجيتي لي
ريم ابتسمت:تصدق ما اتذكر ذا الموقف ابددا اذكر يوم وفاتهم كان زي الحلم
علي : كنتي متعلقة فيني كثير وماتروحين الا معي
تنهد وهو يقول :لكن ماكملت معي وانصدمت لما كبرنا وتغطيتي عني والكره اللي مدري من وين جاء لك وصار الرعب ذا كله مني وصلنا للي وصلنا له
ريم : بس انت تغيرت حيل ماكنت زي لما كنا صغار سافرتوا ورجعتوا لكن ماعاد سمعت عنك الا العصبيه والهواش اللي يفجع الكل وشخصيتك اللي كان الكل يتكلمون عنها هذا غير مراكز الشرطه اللي كنت خبره فيها ولك صوله وجوله فيها
علي:ههههههههه وش اسوي انا انسان عصبي ودمي حار ما اتحمل بعمري اذا عصبت وبعدين حطي عندك اسباب اول شي انا كنت الملام الاول في البيت على اي مشكله تصير بالبيت كانوا اخواني اذا سوو مشكله او اي شي مو كويس في راسي على طول واعتبر فالبيت مصدر للمشاكل والبلاوي واكثر انسان ينجلد
هذا غير اني اصريت اترك الجامعه بعد الثانويه وما كمل دراستي وذا عامل خلا ابوي يحط حيله كله علي وخذي لك هوايش وخذي لك دق كلام وهذي لك جلد اذا استدعى الامر خلاص وزاد الطين بله لما طحت بالدخان هنا قامت الحرب في بيتنا وبعده بفتره طاح بدر فيه وحطوا التهم كلها علي مع ذا كله طبيعي بصير عصبي وحار ولا تنسين اني مابقيت ولا خليت مكان ما دخلته واخذت منه مجموعة معلومات لين قومت شركتي الخاصه ورزقني ربي .....التفت عليها وهو يشد اذنها :طبعا كل ذا عشان مين عشان الجامحه اللي طلعت شياطيني كلها ومشعل كان سبب اول لعصبيتي وكان خوفي انه ياخذك مني وزاد عصبيتي كرهك الغير مبررر لي
ريم: هههههه بما ان اوضاعنا تمام وبطلت انا اكرهك وبطل مشعل ينرفزك وصرت ماشاء الله عليك حمل بنفسك ضروري تفك العصبيه هاذي وتروق
علي:على يدك كل شي معتمد عليك
ريم: خلاص بتشوف كيف انسيك العصبيه
علي:ههههههههه ورينا ي شيخه
وبعد فتره من السوالف والهذره قاموا ينامون ..
عند اريام اللي كانت صاحيه ولا نامت وتفكر في راكان اللي ابتعد وهرب في اول عثره لهم ولا فكر حتى يجي يتطمن عليها كرهته بشكل مو طبيعي على كثر ما حبته كانت تبكي حبها وتبكي نظرها وتبكي حسره على قهرها لاخوانها اللي مايستاهلون ووعدت نفسها تنسى راكان للابد وتشيله من بالها وتسعى لتصليح العلاقات بينها وبين اخوانها
٠٠٠
بعد اسبوعين من اخر الاحداث كل شي زي ماهو اريام تأقلمت خلاص على وضعها وصارت ماتحتاج مساعده ومع ذلك مبسوطه لانها تصافت مع اخوانها
اما نجلا كانت عادي عايشه حياتها بكل التفاصيل كعادتها
اما شيخه اللي كالعاده تسبق ولا تُسبق في كل شي واهم ماعليها راحتها
اما علي وريم اللي عايشين حياتهم بكل حب واريحيه
وبدر اللي يحاول يوازن عقله اللي يفكر بشيخه مع قلبه اللي متعلق بمهره ومازال يفشل بالموازنه
وطراد اللي كل يوم يشن حرب على علي وبدر بحجة انهم (حمير )بنظره وفالاخير يطلع خسران منها وابو عمر مازال يركض في علاج اريام والباقين راكدين
٠٠
عند بدر صحى من بدري وهو مقرر يروح لابوه ويكلمه في موضوع الملكه وانه بيملك سريع قبل لا يطلع له مصيبه تحوس كل شي جهز وطلع من غرفته وتوجه لغرفة اريام وهو حاب يتطمن عليها قبل يطلع دق الباب ودخل:اريام
اريام كانت جالسه: هلا بدر ادخل
بدر قرب وهو يبوس راسها:كيفك اليوم ان اشاء الله بخير
اريام: الحمدلله بخير
بدر :تبين شي من برا اجيب لك وانا طالع
اريام:لا سلامتك
قطعت نجلا اللي دخلت:ماشاء الله ماشاء الله طايحين هنا دلع وتبويس ونجلا تكرف تحت
بدر وهو يقوم: ومن قالك اكرفي هاه في خدامه تكرف بدالك
نجلا وهي تتخصر:تدري ان علي بيجي يتغدا هنا طيب واذا صار علي هنا الخدامه ما تحضر شي
بدر:انا عاجز في فهمه ذا الادمي وش ذا ادميه زيه
نجلا :يقرف مايحب ومايدري عن نظافتها
بدر:وانتي مثله بالضبط وخري عني بس وعوه عليكم ي الاثنين
نجلا وهي تتكي ع البا
ب: بوخر بوخر لكن بعلمك ترا شيخه بعد ما تحب الخدم وليتها مثلنا تقول ما احب وتسكت الا تصفقهم الخدم واللي يامر على الخدم
بدر: ي وجه الله فيكم مرض فيكم وسواس قهري ي ربي
طلع بدر وتوجه لابوه ونزلت نجلا تكمل شغلها
٠٠٠٠
عند علي كان فالشركه ومندمج بشغله قطع عليه اتصال ريم
رد علي:هلا ابوي انتي
ريم:هلابك
علي:وش في صوتك
ريم باستهبال:مافي صوتي اي شي كنت ساكت نامت عيوني شوي
علي كمل وهو يضحك:كنت احلم بي معك وانت تحكي واسمعك
ريم:هههههه المهم ي طيب كيف يومك
علي :ابد كرف كالعاده ومن صوبك
ريم:لا تسأل فجاءه بقدرة قادر صارت كل ملابسي قديمه ولا عرفت وش البس
علي:ههههه اووووه دخلنا في دوامة نجلا
ريم:ليييه
علي:ماذبحني طول السنين الا نجلا وملابسها اللي ماتختارها الا بعد اتفاقيات مشاورات بين جميع اعضاء البيت
ريم:ههههههههه والله ياخي ماعرفت
علي: زين انا عندي حل طلعي كل اللي حسيتيه عجبك وحطيه على جنب واذا جيت انا اشوف لك واحد
ريم: بس ولا واحد عجبني عشان اختار
علي: والحل
ريم:الحل انك تطلع الحين وتجي البيت واذا مالقينا شي كويس نطلع نشتري جديد
علي:اوف وليه ذا كله
ريم:والله انت عارف شوي بيتجمعون صاحبات اريام فالازم اجيب شي كويس
علي: يعني كذا
ريم وهي ماسكه معها طرب اليوم:يعني كذا من فير توديع بتروح الله واكبر كيف طاوعك قلبك
علي ضحك ووهو يجاريها ويكمل:يرضيك تتركني من جروح في جروح هذا يسمونه جفا خاف ربك
طراد من وراه:خاف ربك انت يا سامج ي مريض وعوه عليك جبت لي الطراش انت ورمانسيتك اللي تحوم الكبد قوم اطلع من هنا لا اشوف وجهك
علي انفجر ضحك:ههههههههه انت وش جابك هاه وش جابك وبعدين من سمح لك تدخل ما تدق الباب
طراد :اااه ي ربي ليتني ما جيت مالت عليك وعلى رومانسيتك النايمه اعنبوك ١٢سنه أكلت مخي ريم وريم وفالنهايه ذا الرومانسيه والاغاني اللي تحوم الكبد اه ي ربي اه طحت من عيني ي عدو الرومانسيه والحضاره طحت من عيني ي صديق الطفوله
علي كان منفجر ضحك وريم بعد تضحك على الخط وطراد يدري انه استهبال بس حب يفرفش الجو شوي
طراد:انا اعلن من الحين فض الشراكه بيني وبينك
علي قام وهو يجمع اغراضه ويضحك ومر من عند طراد وهو يضحك وقرب من اذنه ويغني : انت طيب هذا هو اللي يهم
طراد دفه:ماني طيب وانت هنا
ضحكوا وطلع علي وطراد قام يكمل شغله وهو يدعي ان ربي يديم سعادة علي
٠
عند بدر اللي وصل عن ابوه ودخل :سلام عليكم
ابو عمر وابو طراد:وعليكم السلام
تقدم بدر وهو يبوس راسهم : فاضي يبه
ابو عمر:قول ماعندنا شي
بدر:ايه انا جيت ابي اكلمك في موضوع زواجي
ابو طراد: اجل انا استاذن
بدر:لا ي عمي استريح الله يطول بعمرك
ابو طراد:معليه خلوني اروح
ابو عمر:اجلس ي ابن الحلال مانك بغريب .
🍒ــــــــــــــــــــــــــــــــــــ🍒
#الـى_هنا_ينتهي_الجزء_الـ④⓵
#نكمل_غدا_باذن_الله ........
#اللهـم_صلي_على_سيدنا_محمد_ﷺ_وعلى_آل_سيدنا_محمد
🎀 @ahgeel 👌👈 🌺
🌼🎀🌼
🎀 🌼🎀🌼🎀
🌺🎀🌼🎀🌼🎀🌼