ياما تجرعت المراره عشانك - الفصل 10 - بقلم أديم الراشد - مكتملة | روايتك

عالم القصص والروايات 📚: 🌺🌼🎀🌼🎀🌼🎀 🌼🎀🌼🎀🌼 🎀🌼🎀 🌼 @ahgeel 👌🌺 🍀روايــــ 📖 ــــــة.... 🍀 #ياما_تجرعت_المرارة_عشـانك💙 🌱 #بدايـة_الجزء_العاشر🌱 🍒ـــــــــــــــــــــــــــــــــــــ🍒 على الساعه ٥ العصر صحت ريم وسوت لهم شي ياكلونه وحضرت وراحت تصحي علي بعد ما اخذت دش ينعشها ريم:علي يلا علي ما تحرك ولا فكر ريم:علي يلا مالي خلق صياح وعلي ما درا عنها صرخت بصوتها كله: عللليييي فز علي وهو يخبط بالسرير:وش وش فيه وش صاير ريم:ولا شي بس ابغاك تصحى خبطها علي بالمخده:مريضه انتي احد يصحي كذا رييم: وش اسوي ما صحيت لي ساعه اصحي علي:وش بك تصحيني ريم:قوم اكل معايا يلا وبسك نوم علي :يوه مالي خلق والله ريم :يلا عاد لمتى بتنام علي قام بالقوه وهو يسحب نفسه تسحيب غسل وجاء وجلس وتنح على شكل ريم اول ما شافها وبعدين جلس يأكل ويناظرها ريم وهي تلف وجهه:علي لا تجلس تناظرني كذا خليني اكل علي : كيف اناظر ريم :ناظر اكلك علي : والله محد قالك تصيرين حلوه ريم طالعت بطرف عين وقامت واخذت صحنه وجلست بعيد عنه وهو يضحك عليها وكل شوي يرفع راسه ويناظرها وبعد ماخصلوا اكل قام علي يغسل وريم تجمع الصحون اخذتها للمطبخ وغسلتها ورجعت لعلي اللي جالس باقي في مكانه ريم:علي قوم ابغى اوريك حاجه علي:وشو ريم وهي تشد شعره :يالله يالكسل قوم قام علي وريم تحسبه سحب اخذته لين وقفت على باب الغرفه الصغيره علي ناظر الحوسه والباب المكسور ومرت الاحداث قدامه سريع غمض وتقدم فتح الباب شوي شوي وهو يشوف الاغراض مرميه وكل شي طايح ريم مسكته من يده :علي انا اسفه خليتك تنهار وتدمر كل شي انت بنيته علي كان ساكت وهو يجمع الصور والاوراق واللوحات ويرفعها ريم :الله يخليك سامحني ماكنت ادري عن ذا كله علي ترك اللي بيده والتفت لها :اصلا خلاص ماعاد تهمني ذي الاغراض ريم بخوف :كيف يعني علي قرب وهو يوقف قبالها وحط راسه براسهاا وقال : كل ذي كان مجرد اشواق بقلبي لاني ما كنت اقدر احكيها كنت اكتبها واعبر عنها بكل طريقه تمر في بالي احيان ارسم واحيان اكتب واحيان اصور واحيان ابكي واحيان اروح اطل عليك من شباك غرفتك واحيان احشر طراد واقرقر عليه لين يضيق واحيان ارش عطورك حولي وانسدح بين كل الذكريات واحيان اكلم السلسال يعني كانت اكثر من طريقه بس لشخص واحد ريم:انا الحين ما استوعبت شي منها كلها علي ابتسم ومسك يدها تعالي نستوعبها مع بعض دخلوا يرفعون الاغراض ويرتبونها وهم يرتبون طاحت عين علي على صوره :ريييم تعالي شوفي ريم :وشو علي:تذكرين ذي الصوره ريم: ههههه اكيد اتذكرها كيف انساها (الصوره كانت لعلي وريم وكان وجهه علي مفقع ضرب من ابوه لما طق مشعل وعوره اشتكى مشعل لابو عمر وماكانت اول شكوى تجي على علي في ذا اليوم ورنه ابوه رن وراح بكل بساطه يتصور مع ريم) علي: هههههه يالله ي ربي ذاك اليوم انطقيت طق ما احد انطقه من قبلي ريم :اصلا انت كنت اكثر انسان تنطق في الحياه علي:بسبتك كل شي بسبتك ريم:اتركني عنك ذاك اليوم ماكان بس بسبتي ضحك علي وهو يتذكر ذاك اليوم من صحى الصباح وهو في راسه شر وماخلا احد من شره اخوانه اخواته عمامه عيالهم العمال  الخيل ومشعل وابوه وام محمد كلهم اذاهم اخر. شي سواه فقش صيته  وبعدها طق مشعل وهو مريض وصل الخبر لابوه وجاء له من الضرب وتفقيع الوجهه اكبر نصيب علي وهو يضحك:احسن شي سويته ذاك اليوم طقيت مشعل وفقشت صيته ريم: مدري كيف كنت مصادقتك وامشي معك وانت بذاك الشر كله علي :لا تجحدين اني كنت اطق يمينك وشمالك وفي كل مكان حولك بس عندك اصبعي ما ارفعه ريم : من جد مدري ليش ماكنت اخاف علي :طلعتيها كلها من عيوني من شهرين ريم تفشلت: ممكن تنسى ذا الشهرين علي:لا ريم بخيبة امل :ليه علي :حياتي معك كلها حلوه ان كانت ذكرى حلوه وان كانت سيئه مابي انسى اي شي عشته معك ابتسمت ريم ورجعوا يرتبون وكل شوي يوقفون عند صوره او دفتر جمع علي الالوان وجاب اللوحات :ريم تعالي صار وقتها ريم: لا يكون بتخليني الونها والله اخربها عليك علي:جعلها فدا تعالي بس جات ريم وجلست جنب علي :والله اخاف اخربها علي وهو يمد لها الفرشه: انا معك مابنخربها اخذت ريم الفرشه وهي ماتدري وش تبتدي فيه انقذها علي اللي جا من وراها حط يده على يدها اللي فيها الفرشه وبدا يلون معاها وهو يشرح لها قصة اللوحه ومتى رسمها وبأي حاله رسمها ٠٠٠٠ عند طراد صحى وهو مقرر يكلم علي ويطلعون يتعشون يتمشون مع الشباب وكان يدق ولا يرد ويدق ولا يرد استغرب وقال اكيد نايم اتصل على بدر بدر:هلا طراد طراد:هلا كيفك بدر :نشكر الله وانت طراد :كويس اسمع كلمتم علي اليوم بدر:لا ادق عليه من فتره ما يرد شكله نايم طراد:اي شكله بدر :وش عندك الليله طراد :ابد ماعندي شي يمكن اروح الاستراحه او اي مكان بدر: اسمع وش رايك نجمع الشباب ونطلع نلعب كوره او نسوي اي شي طراد:تسوي خير فيني بدر:يلا اجل بكلمهم .. عند علي وريم اللي لونوا اللوحات وخلصوا وبعدها قامو يلعبون بالالوان وكل واحد يكب على الثاني وضحكهم بالبيت كله وقف علي على صراخ ريم:اااه عيني عيني علي ترك اللي بيده وجاء ركض :ريم ريم وش بك ريم استغلت الفرصه وكبت علبة الالوان كلها على راس علي لحقها علي وهو مليان الوان  طاحت ريم وهي تضحك جلس علي فوقها وهو يشخمط على وجهها بالالوان وهي تضحك تركها علي وطاح جنبها وانسدح وهو يضحك وريم تضحك وقف علي ضحك وهو يلتفت عليها:طول عمري حاولت اتخيل ذي اللحظه ولا طلع معي ربع اللي صار اليوم ريم:يعني علي:يعني كل شي كنت اخطط له اتفاجأ بشي احلى منه يجبرني على السكوت ريم سكتت ماتدري وش تعبر قامت وهي تقول :شوف كيف انعدمنا علي وهو يقوم:لا ماعليك تروح بالمويه تعالي نغسل ريم وهي تمشي:وش نغسل يبي لنا حماااام كامل التفتوا كلهم يشوفون بعض وانفجروا على اشكالهم ضحك اخذ علي منشفته وهو يضحك وراح الحماام الثاني وريم راحت الحمام تبع الغرفه .. عند طراد وبدر اللي كانوا يجمعون العيال ويدقون على علي مايرد انشغل بالهم عليه بدر:خلنا نروح لبيته طراد : اسمع خل اختك تدق على زوجته يمكن نايم او شي بدر :طيب دق بدر على نجلا نجلا :هلا بدر بدر:نجلا دقي على ريم شوفي علي وينه مايرد نجلا :توني من شوي دقيت مغلق بدر :اها يالله زين سكر بدر والتفت لطراد:تقول توها دقت جوالها مغلق طراد:اخاف صار لهم شي بالطريق بدر:وليه ما نقول مشغولين مع بعض طراد: لا ي رجل وش ذا الشغل اللي من الساعه٢ الظهر بدر: ههههههه صف النيه ي طراد طراد:ادري عنك روح بس لبيته اذا ماهو فيه ولا فيه مصيبه تحترينا بدر:اذكر الله توجهوا لبيت علي ٠٠٠٠ عند شيخه اللي كانت طفشانه ماتعودت تقعد بالبيت وماخلت احد ماتحركشت فيه ابوها امها وعيال فوزيه وريماس وخلود اخر ما وصل معها اخذت لي المويه وعبت الحوش مويه وكبت فيري وصارت راااايحه جااااايه تتزحلق فيه وتغني كان ابو ناصر طالع من المجلس ولا درا ان فيه فيري بالارض يتزحلق زحلقه عررض بطووووول ويطيح وشيخه شافته وانفجرت ضحك جاء فواز يبي يساعد ابوه وطاح وابو ناصر يضحك وشيخه تضحك وبالقوه قاموا ونادوا الخدامه تنظف الارض فواز وهو ماسك شيخه من شعرها :افرضي ابوي طاح واتكسر هاه افرضي شيخه :اقول فك ابوي هذا هو سليم وليتك تكسرت انت ابو ناصر :اتركها ي فواز خلها تسوي اللي تبي شيخه انفلتت من فواز وهي تغنجر وراحت لابوها تبوس راسه وفواز لايعه كبده من الدلع اللي بغير محله طلع فواز وراحت شيخه وجابت البلوت واتكت تلعب مع ابوها وهي ناسيه وشهو الاحترام وتصقع في ابوها من غير شعور ٠٠ عند طراد وبدر اللي كانو يخبطون على باب علي وهم خايفين بعد ماطراد وسوس ببدر فز علي وراح يشوف وش ذا الخبط فتح الباب وهو مفجوع وباين انه توه صاحي :وش فيك وش صار بدر وطراد اللي يناظرونه واقف انفجر بدر ضحك وطراد لحقه يضحك علي اللي يناظر بالمهبل ليش يضحكون :وجع انت وياااه وش ذا الدق وش ذا الضحك بدر اللي ماقدر يتكلم وطراد بعد وعلي يصيح فيهم تكلم طرادبعد تعب :كنا ندق عليكم من الظهر ماتردون خفنا فيك شي لكن بااااين انك بخير علي صفق الباب بوجههم وهو يسمع ضحكهم مر من عند المدخل وشاف نفسه بالروب تنح وهو يناظر روب ريم وانفجر ضحك على شكله وكان الروب لونه وردي (يلعن ام الفشله )دخل وكمل نومه ٠٠ طراد وبدر اللي مازالوا يضحكون وركبوا السياره وهم يضحكون بدر:خايف عليه هاااه خايف عليه ي بوي مادرى عنك وجوه عليل طراد:هههههه وش دراني عنه بالله عليك ماتوقعت ماعاد اشيل همه بدر:ههههههههه آه ي ربي التوبه وكملوا ضحك وهم كل ماسكتو رجعوا انفجروا قابلوا العيال وهم يضحكون بس ماقالوا لهم وش السالفه وطراد اللي كل خمس دقايق يتذكر شكل علي ويضحك وبدر زيه ناصر:وجع انت وياه وش فيه بدر:والله مافيه شي مسكت كذا ضحك عمر:اقص يدي اذا ماعندكم بلا فواز:اكيد انت شفت الضحك بس بدر وطراد مستمرين بالضحك ٠٠٠ عند شيخه اللي كانت تناظر فيلم مع خلود وريماس وهي تتحسر :شوفوا شوفوا الناس الحلوه خلود :قولي الله يرزقك شيخه:والله شكلي بعنس على قول علي ريماس :الظاهر اصلا انتي من يقبل ياخذك ي مفترسه شيخه:شكل جلدك يحكك من زمان ما انطقيتي ريماس :وانا صادقه شيخه وهي توقف وترفع كمومها:وانا بعد صادقه...وجلدتها وخلود تحاول تفكهم لكن مافيه نفع بعد ماطقتها لين قالت بس شيخه:زيدي اتكلمي علي ريماس:الله ياخذك ي دب شيخه :نعم ريماس قامت وراحت وهي تتألم ٠٠٠ عند ابو عمر ابو عمر: ي ام عمر ترا بكره ان شاء الله بنخطب لبدر ام عمر:شوووو ابو عمر:وش بلاك بنروح نخطب ام عمر:ولك ليش انا اخر من يعلم بهالبيت لك انا حيط ي ابو عمر حييط .. ابو عمر:من قالك انك حيط ي مسلمه لكن تو بدر امس كلمني ام عمر :شو بهم اولادي جاي على بالي انقي لهم عرايسن وهن كل واحد طالع مختر له وحده ويتزوج هيك اشه لفه ابو عمر :اذكري الله وخليهم يختارون اللي يبون هم اللي بيعيشون ام عمر: بدك ياني اخسروا متل ماخسرت علي ابو عمر:وش به علي ام عمر: من اليوم اللي تجوز رييم فيه وهو المشاكل تنهل علي متل المطر ماكانت تخلص ابو عمر:وحدي الله ي مره هذا شي ربي مقدر ولا لعلي وريم دخل علي مبسوط معها ويحبها انتي وش عليك ام عمر:انا بدي ولادي يعيشو مرتاحين ابو عمر:وهم مرتاحين ام عمر:ومين هي اللي بدوا يتجوزا بدر ابو عمر :شيخه ام عمر:شووو لك ليش هيك ليش ابو عمر:وش بلاك ام عمر:مين قال ان شيخه تصلح لبدر شيخه ماتصلح لو ما بتنفع يكفي بدر هادي وحبوب وراكد وشيخه مجنونه ابو عمر:شيخه ماناقصها شي ي ام عمر وتشرف بدر واشكال بدر ويكون بعلمك بدر اللي جاء واختارها ام عمر:والله مو قرار والله اكيد نجلا وعلي وشوشوا له من شان يجوزها ابو عمر:لا اله الا الله اقطعي الشر ي ام عمر واياني اياك تروحين تكلمين بدر خليه فرحان لا تحوسين حياته ام عمر سكتت وهي تبكي وابوعمر طلع :وش بها ذي انخبلت بعقلها ٠٠ ومن بكره الصبح صحى علي بدري الساعه٧ عشان الشركه ناظر جنبه ماحصل ريم وقام وتوجه للحمام سمع صوت المويه وحصل ريم واقفه تفرش اسنانها قرب عندها:صباح الخير ي عروس ريم وهي بتموت :صباح النور قرب علي واخذ الفرشه من يدها وهي تناظر مستغربه وتكلمت وبفمها معجون:علي وش فيك علي وهو يضحك:اشوف افتحي عن اسنانك ريم: وش تبي اعطيني بخلص علي وهو يضحك :اشوف ي بنت الناس فتحت ريم عن اسنانها وهي بتشوف وش نهايتها قرب علي وهو يفرش لها اسنانها ضحكت ريم وطارت رغوة المعجون على علي ريم:ههههههههههههه ي ويلك لو يدرون شيخه ونجلا علي وهو يضحك ويمسح المعجون :ههههههه وش علي منهم انا علي منك ورجع يفرش اسنانها اخذت ريم الفرشه منه:يوووه وجعتني بسنوني ما تعرف تفرش اعطيني اعطاها علي وهو يضحك عليها واخذ فرشته ومعجونه وجاء جنبها وبدا يفرش وهو مره يدفها يمين ومره شمال ومره يكب علي مويه خلصت ريم وهي تدفه :روح تحمم على ما اصلح الفطور علي وهو يضحك .امرك بس لا تكثرين ترا ما أكل كثير ريم وهي رايحه :بتاكله غصب عنك دخل علي الحمام وهو يضحك وهي راحت تصلح الفطور ٠ عند طراد صحى الصبح ولبس ونزل وهو على الدرج تذكر علي وانفجر ضحك في نص الدرج وابوه وامه يناظرونه بالقوه نزل وهو يضحك ومايدري وش صار مع علي وماتوقع انه كذا قعد على الطاوله وهو يضحك ابو طراد:سم بالله ي ولد وش ذا الضحك من الصبح طراد حاول يتماسك نفسه بس ماااش علق وكمل ضحك ام طراد :بسم الله عليك يمه وش صار لك طراد اللي كان يضحك بزووووود كل ما سألوه فالاخير طرده ابوه من السفره وقام وهو يضحك وراح بسيارته وهو يضحك وبالقوه تماسك نفسه ورجع لوضعه وصل الشركه ونزل وراح لمكتبه ٠٠ اما علي اللي خلص ولبس وجاء وهو متروش بالعطر علي:اوف اوف. وش ذا الزين ريم وهي تبتسم:يالله افطر الساعه صارت٨ علي وهو يجلس :والله شوفي عشانك والا ترا انا ما افطر بالعاده ريم وهي تجلس :اجل خلي بالعاده عندك انك كل يوم بتفطر والا ازعل علي:اتعب على اللي يزعلون انا ريم:هههههههه افطر يلا خلص علي فطور وقام يغسل وريم صارت تجمع الصحون راح علي ورجع تعطر وجاء لريم للمطبخ وهو حاط شنطة الابتوب على كتفه وضمها من وراء وباس خدها:انا بروح تبغين شي ريم :لا سلامتك توجه على للباب وريم وراه عشان تسكر الباب بعده ريم :انتبه لنفسك طيب علي: أن شاء الله وطلع ٠٠ وصل الشركه ودخل وتوجه لمكتب طراد وهو ناسي وش صار امس معهم فتح الباب :سلام رفع راسه طراد واول ماشاف وجه علي انفجر من الضحك مررره ثانيه علي اللي يناظره باستغراب وبيده ملف وبعد شوي تذكر شكله امس وحذف عليه الملف وسحب عقاله وراح له وطراد يضحك وعلي يطق فيه ويضحك معه طراد:هههههههههههههه اآه خلاص ي رجل علي جلس من كثر الضحك:انتم مرضى وش جابكم طراد:والله اني كنت خايف عليك ما توقعت نقزت ذا الاحداث بسرعه ودخلت جو علي وهو يضحك: الحمدلله والشكر لا يكون باخذ اذنك بعد طراد:ماقلت خذ اذني بس اقل شي رد علي: هههههه مادريت والا كان ارد وارتاح كمل طراد ضحك وطقطقه على علي وعلي يضحك مره ومره يضربه .. عند شيخه صحت من الصبح وجهزت ودقت على نجلا نجلا:الو شيخه:وينك نجلا:في بيتنا شيخه:ربع ساعه واجيك مع السواق اجهزي نجلا :ويييين شيخه:بنروح لريم نفطر معها ونتغدا عندهم ويمكن نسهر نجلا :يووووه ي شيخه مالي خلق وبعدين الناس توهم رايحين يبون ياخذون راحتهم تحشرينهم انتي شيخه: اقول فزي بس قالت مالها خلق وبعدين انا حالفه اخرب عليهم واحوس جوهم قومي بس ي ويلك لو اوصل ومانك عند  الباب نجلا باستسلام:طيب قامت نجلا تلبس وتخلص تعرف شيخه لو وصلت ومالقتها بتجلدها ولا عليها من احد ٠٠ عند بدر صحى وقام يلبس عشان يداوم وهو يفكر باليوم وتحمس متى يجي جده بس ٠٠ ام عمر كانت جالسه بالصالون شافت نجلا نازله ام عمر:وين نجلا : بروح لريم مع شيخه ام عمر: شو بك هالايام خفانه اجرك ع الروحات والجيات مع هالشيخه نجلا:يمه شفيك انا كل يوم اروح مع شيخه وش معنى اليوم ام عمر: انضبي على جوى مافي روحه نجلا :ليش ام عمر: بلاش رد كلام وانقلعي من وجهي نجلا :يمه و....... ام عمر :خلصنا  فوتي لجوى بدر:يمه وش فيكم وش ذا الاصوات ام عمر :شرفت ي عريس اي يخزي العين حولك وحواليك بدر ابتسم : الله يسلمك يمه نجلا وهي تبكي :يممه تكفين ام عمر:فوتي انا ما بعيد كلامي بدر :وش فيها نجلا نجلا ببكى:ابغى اروح مع شيخه لريم بدر دق قلبه :وش ماسكك لا تروحين نجلا:امي رافضه بدر:يمه وش فيك وش صاير طول عمرهم يروحون ويجون ام عمر: انت لا تحكي معي وسكر حلقك بدر:افا يمه وش صاير تركتهم ام عمر وراحت تفتح الباب وحصلت شيخه واقفه شيخه:هلا عمه كيفك ام عمر بدون نفس:من الله منيحه شو بدك شيخه استغربت النبره بس قالت يمكن معصبه:اسفه ازعجتك بس كنت انتظر نجلا بنروح لريم ام عمر:نجلا مانا رايحه وانتي روحي ي عمتي انضبي ببيت اهلك بطلي ها السيران كل يوم شيخه:كيف يعني ام عمر:يعني الله معك عمتي صفقت الباب بوجه شيخه وانصدمت شيخه وصدت بسرعه ورجعت للسواق وقالت روح البيت اما بدر ونجلا اللي سمعوا كلام امهم وراحوا ركض للباب فتح بدر الباب وشاف سيارة السواق راحت ورجع لامه بدر:يمه وش سويتي ليش كذا نجلا :حرام عليك يمه وش صار لك ام عمر:انقلع من خلقني انت وهي وبطلوا تحكوا عن هالحربايه نجلا:قلبت مخك بنتك المتخلفه .. سكتت لما سمعت صوت الكف اللي توجه لها من امها بدر:يمه وش صار لك ام عمر:روح الله يغضب عليك انت وهي نجلا طلعت وهي تبكي وبدر طلع من البيت ضايق من تصرف امه مع شيخه ومن دعائها عليه ٠ نجلا كانت ضايقه ودقت على شيخه وماردت شيخه ودقت على علي على طول عند علي كان جالس يراجع بعض اوراقه وهو في اجتماع وبنص الاجتماع دق جواله رفعه وشاف اسم نجلا استغرب انها اتصلت ذا الحزه ومارد ورجعت كررت الاتصال وارسلت تكفى رد سريع علي اختبص وسحب جواله واستأذن وعيون طراد عليه علي :نجلا وش فيه نجلا :وهي تبكي امي علي:وش فيها امي نجلا قالت له كل السالفه وهي تبكي علي تذكر ان خطبة بدر اليوم وخاف شيخه ترفض بدر وهو وده انهم يتزوجون سكر من نجلا وطلع من الشركه انقلق طراد ودق عليه علي :هلا طراد طراد:وش فيك وش صار علي:ولا شي مشكله بسيطه وتعدي طراد:اكيد علي:اي ماعليك ٠٠٠ عند بدر توجهه لابوه وهو ضايق وخايف من نهاية ذا الشغله صح ماحبها بس تعني له ارتاح لها وشيخه مجنونه تفصل بس على نياتها وتحب الناس مايدري وش قلب راس امه عليها دخل العياده وهو ضايق :يبه ابو عمر كان عنده شوي مراجعين وشاف وجهه بدر متكدر :بدر انتظر شوي برا طلع بدر وجلس في الاستراحه وهو ضايق ويفكر بعد نص ساعه ناداه ابوه ابو عمر :وش صاير وش في وجهك (وهو خايف ان امه قالت له شي وبيكنسل ) بدر :امي يبه ابو عمر بخوف :وش فيها امك بدر قال لابوه كل السالفه وقاله مايدري ليش امه زعلانه طلع ابو عمر وبدر وتوجهوا للبيت ٠٠ عند ام عمر اللي اريام جالسه توزها اريام:شفتي يمه قلت لك انها مخططه على بدر وماهي طالعه لين تاخذه في يدها وهذا هي جابت راسه ام عمر:والله ماخلي لها ابني والله اريام:ايه يمه على بالك جياتها عشان علي ونجلا ام عمر:لك وين كانوا عيوني اريام بتمثيل:معليش يمه انتي على نياتك وصلوا بدر وابو عمر قبل علي بحكم قرب العياده من البيت بدر اول ما شاف اريام شك فيها ان هي اللي وازه امه خصوصا انها تكره شيخه والموقف اللي قبل يومين اكبر دليل قرب لعندها وهمس لها والنار تطلع من عيونه:لو اشم بس اشم خبر ان انتي تحت ذا كله راح تكرهين حياتك دخل علي وهو يشوف ابوه وبدر فيه على طول توجهت انظاره لاريام واللي طرا لبدر طرا له احرقها بنظارته وهو يهدد بعيونه ابو عمر: اطلعوا واتركوني مع امكم شوي . طلعوا كلهم واريام خايفه وسكروا الباب اول ما تسكر الباب. مسك علي اريام من يدها :قسم بالله لو تطلعين ورا ذا الشي لدفنك حيه سامعه دفها عنه وهو معصب ويشوف بدر متوتر علي :وش صار عشان امي صارت كذا بدر :مدري اخاف ي علي تكنسل الخطبه كلها علي وهو مستغرب ضيق بدر:لا ان شاء الله بدر :ان شاء الله علي:وينها نجلا بدر :مدري اتوقع بغرفتها ٠ ٠ راح علي لها وبدر ودخلوا ولقوها تبكي علي:نجلا وشهو له الدموع هاذي كلها سوء تفاهم بسيط وينحل نجلا :والله العظيم حرام كل واحد يجرح بشيخه من طرف على بالهم انها ما تهتم والله شيخه ضعيفه واي شي يأثر عليها علي:معليك تنحل روقي انتي بدر:وش قلب راس امي ي نجلا نجلا:مدري قلت بروح مع نجلا وشبت فيني بدر :ما رفعتي صوتك عليها نرفزتيها نجلا :لا والله بدر: ي خوفي اختك المريضه ذيك قلبت راس امي علي:تجرب بس ٠٠ عند ابو عمر :وش ذا الكلام اللي سمعته ام عمر:شو بدك ياني اعمل اتفرج على ابني وهو عم يضيع حالو ابو عمر:اي ضياع تتكلمين عنه انا وش حكيت معك امس ليش تحديني على شي ما ابيه وش قلب مخك على المسكينه وهي ما سوت شي ام عمر :هي مسكينه هي حيه من تحت تبن ابو عمر:احترمي نفسك ي حياة لا تخليني امد يدي عليك بكبر اصحي على نفسك وبطلي خرافات ام ع مر :بدك تضربني ي ابو عمر ي حوينة العشره ابو عمر:اسمعيني زين لو تعكس زواج بدر من شيخه انك تحرمين علي عمرك كله ام عمر شهقت:لا دخيلك ي ابن عمي ابو عمر:تتصلين على شيخه الحين وتعتذرين وتدورين لك عذر والمغرب رايحين نخطب لبدر وصوتك ما اسمعه طلع ابو عمر ولقى علي وبدر بوجهه ونجلا تبكي وهم مصدومين طلع بدر وهو ضايق من الحال اللي وصله وعلي دخل عند امه علي :يمه ليش سويتي كذا حرام عليك ام عمر: اجيت ي روح امك اجيت تقتل القتيل وتمشي بجنازته علي انفجع:يمه وش ذا الكلام ام عمر:مو انته واختك اللي حطيتو شيخه براس بدر وهي ماقصرت بدورها كل يوم والتاني جايه لهون تتغنج علي:يمممه عيب الكلام اللي تقولينه ام عمر:بدك تعلمني العيب ي ابن بطني علي:اخسي يمه لكن الكلام اللي تقولينه مو عدل وش فيها اذا تزوج بدر شيخه وين المشكله ام عمر:بدك اضيع اخوك متل يوم ضيعتك علي:ضيعتيني بأيش يمه ام عمر:جوازتك من هالريم كلها غلط بغلط علي:ليش يمه ام عمر: من تجوزتا وانته من مشكله في مشكله. ولا كانت تخلص مشاكلك معها او مع اهليتها علي:يمه لا تدخليني في الموضوع اللي يجبر بخاطرك وريم انا عايش ومرتاح ولا عندي مشكله وماصيبها عندي رضى ام عمر: لكان روح لعندا رووووح تريك امك ي علي روح علي جاء بيحل مشكله طلع ب مصيبه وش فيها امه وش صاير لها ٠٠٠٠٠٠٠ عند شيخه رجعت لبيتهم وهي منفجعه من ام عمر وش طاري لها وش طااااري لها قالت (يمكن زعلانه ضايقه من اي شي هي تحبني مستحيل تكلمني كذا ) ام ناصر:هاه على اساس بتاخذين نجلا وتروحين لريم شيخه بترقيع: لا يمه ريم اتصلت وقالت بتروح المتسشفى وقلت يمكن تطول بروح لها بكره ام ناصر :ليه وش فيها شيخه:اسنانها يمه ام ناصر :طيب ٠٠ عند بدر كان بيموت من الغبنه والقهر رجع مسرع للبيت وهو بيسأل امه ليش سوت كذا هذا مو طبعها دخل وطلع لغرفة امه قبل يدخل سمع اريام تكلم امه: يمه تكفين وش قاعده تسوين انتي مو من جدك تسمحين لبدر يتزوج شيخه ام عمر: ابوك حالف اني احرم عليه لو ما اعتذر لها قطع عليهم بدر اللي قامت قيامته ودخل مثل الجني وهو يمسك اريام من شعرها ويسحبها سحب من غرفه امه وطاح فيها ضرب وطلع كل شي بداخله من القهر وام عمر تصرخ طلعت نجلا وعبيد على الصراخ وهم يحاولون يفكون اريام من يد بدر اللي بيذبحها وبعد مافكوها دخلت وراء امها وبدر يتحلف ويتوعد بدر والقهر في صوته: والله والله والله لا اربيك والا انتي تدلعتي ومعاد يمسك شي من سمح لك اصلا تاخذين وتعطين في من اتزوج ومن اترك انقلعي من قدام وجهي لدفنك وخليني يضيق خاطري على ذا الزواج لدفنك ي زفت ولا افكر فيك نجلا: خلاص ي بدر عبيد: بدر وش بك بدر وهو يكلم امه:كنت عارف انك ما تسوين كذا كنت عارف لكن اسمعي كلامي يمه زين والله والله والله لو ترفض شيخه او ما تزوجتها ان قعدتي في ذا البيت حرام علي طلع وترك البيت وامه تبكي ونجلا وعبيد مايدري وش السالفه نجلا :كله من ي اريام وش ضرتك شيخه فيه وش ضرتك فيه وراحت نجلا بعد وجلس عبيد مايدري وش صار ٠٠ عند علي اللي رجع لشركه وهو ضايق وطفشان ولا يدري وش بيصير في بدر وشيخه دخل مكتبه وجلس وهو يقلب بالاوراق ونفسه مسدوده دخل طراد وهو يشوف وجه علي مقلوب طراد:خير وش فيه علي:ماهو خير ي طراد طراد:وش فيه علي قاله كل السالفه طراد:نعم لا تقنعني امك ما تقول كذا خييير وين عايشين علي:للاسف قالت .. طراد:وش بها وش صار علي :مدري عمرها ماكانت كذا والبلا انها تحب شيخه طراد : صدقني مو كلامها علي :حتى انا اقول طراد:وش ذا المصايب اللي تحذف عليكم علي: الحمدلله على كل حال ٠٠٠ عند شيخه كانت جالسه مع خلود ويسولفون قطع عليها جوالها رفعت وحصلته ام عمر ردت :هلا عمه ام عمر: شيخه بنتي كنت مزعوجه شوي من نجلا وحطيت الحره فيكي انا اسفه شيخه فرحت:ماعليه ي عمه انا كنت ادري انك اكيد مزعوجه ومستحيل تقولين لي كذا ام عمر: واذا بدك تعي خذي نجلا وطلعوا شيخه:لا ي عمه بلاها اليوم ام عمر :بكيفك سكرت وزفرت شيخه براحه: الحمدلله كنت ادري والله كنت ادري خلود :وش السالفه شيخه قالت لها كل السالفه خلود:ايه صح ام عمر طيبه وماتسويها شيخه:حتى انا قلت ٠٠٠ عند بدر اللي كانت ضايقه فيه الوسيعه مايدري وين يروح طول عمره مايبي يتزوج ولما قرر يتزوج ماظل مصيبه ما طلعت في وجهه ليش ليش وش فيها شيخه عشان امه ترفضها امه اللي عمرها ما اذت احد اكيد شايفه فيها شي لا لا لا اكيد كلااام اريام اريام اثرت فيها الا اثرت فيها كل ذا كان يدور بعقله والشيطان دخل براسه مره يكنسل كل فكرة الزواج ومرره يصر عليها ٠٠٠ عند علي اللي كان يحوس بشغله وهو ماله نفس دق جواله وشاف ابوه يتصل :هلا يبه ابو عمر: هلابك عندك شغل علي: شوي ليه ابو عمر: يمديك تجيب جدك من المزرعه علي: والله مايمديني ابو عمر :زين اجل اجهز المغرب عشان تروح معنا لبيت عمك نخطب لبدر علي بتردد:وامي يبه ابو عمر:تصفق براسها في الجدار علي سكت وسكر ابوه اعالم القصص والروايات 📚: لجوال علي: اوف ي ربي وش ذا الحظ اللي عليك ي بدر اموت واعرف وش قلب امي كذا كمل شغله لين الساعه ٣ وطلع لبيته ٠٠٠ بدر اللي مازال يلفلف بالشوارع وهو ضايق والشيطان يلعب بعقله قطع عليه اتصال ابوه: هلا يبه ابو عمر:وينك ي بدر بدر: ألفلف بالسيااره امر ابو عمر عرف انه ضايق : لا يضيق خاطرك يبه امك كل زعلها عشان ماخذنا رايها ولا اختارت هي لك عروس ودقت على شيخه وتسامحت منها وش تبي بعد بدر بضيق : ي يبه انا ماهمني بس ابي اعرف ليش انقلبت على البنت ابو عمر :معليك امك من بعد حادث علي صار عندها وسواس وهي زعلانه لانها تمنت تزوجك من بنات خوالك بنت رايقه زيك بس تفاجأت بشيخه ومع الايام بتتقبل بدر : اخاف ماتتقبل وابتدي في مشاكل مالها نهايه ابو عمر :لا تخاف المهم دامك فاضي روح جيب جدك من المزرعه عشان المغرب نروح نخطب ي عريس بدر:زين غير طريقه وهو جاهل مصيره وخايف من بكره وضاع حماسه اتجاه زواجه وهو يفكر اذا رفضت شيخه واذا وافقت وش بيسوي ٠ عند ريم كانت مصلحه غدا وتنتظر علي حست فيه فتح الباب وقامت ريم:هلا هلا علي وهو جاي مقبل وحاط يدينه ورا ظهره ضمها بيد وحده وباسها : هلا بك ريم:كيف كان يومك علي : لا تسألين زي الزفت ريم :لييييه علي :اتركي يومي وخذي (مد لها باقة ورد وفيها هديه) صح حاجه بسيطه وماهي من المقام بس اخذتها وانا اركض مثل المجنون ريم وهي تناظره: ياااا علي مااني محتاجه هدايا علي :تستاهلين مافي شي غالي عليك ضمته ريم وهي كل مالها تعلق بعلي وتخاف فقده بادلها علي الحضن وهو يقول : بعوضك باحسن منها ان شاء الله بعدت ريم وهي وصارت بتفتح الهديه علي :لحظه لحظه لحظه ريم :بسم الله وش بك علي راح يركض وريم مستغربه رجع علي بسرعه وبيده الكاميره قال:دقيقه لازم من االيوم ورايح نوثق اللحظات الحلوه ريم ضحكت وابتدى علي تصوير ثبت الكاميره ورجع جلس جنبها وريم ابتدت تفتح الهديه كان الهديه تعليقه ذهب نااعمه وجميييله ذهب ومكتوب فيها الجامحه ريم بحماس :واااااااااااو ي علي تجنن مرره تجنن علي :لا تجاملين انا ماعجبتني مره بروح اجيب غيرها بس احصل وقت ريم :لاااااااااا لا تجيب غيرها هاذي تجنن حبيتها علي :من جدك ريم :اي شوف شلون ناعمه وهاديه وحلوه علي :اجل لبس العافيه ولا تطلعينها منك نهائيا ريم وهي تبوس خده :ابشر على خشمي اخذها علي وسوا علي لها التعليقه:لبس العافيه ريم وهو تناظر المرايه: يعافيك علي كان يناظرها رجعت ريم جابت فاژه كبيره وحطت فيها الورد ريم : يلا عشان تتغدا علي : ي زيييين الريحه بس ريم : تعال بالعافيه علي:تسلم يدينك من يد مانعدمها ريم ابتسمت وجلست : يااخي بطل حكي حلو والله ما اعرف ارد علي وهو يضحك:لا تردين ابتسمي بس واذا مره نفسك تردين بوسيني ريم :انت تلف تلف وترجع للبوسه علي : ي مسلمه المفروض من غير ما الف ولا ادور تكون هاذي قاعده عندك ريم ضحكت : ايه تذكرت ليش يومك كان زفت علي جلس يشرح لها وش صار مع نجلا وبدر وشيخه وامه بس ماقال الكلام اللي قاله عنهم وعن حياتهم ريم كانت مصدومه ريم:علي ماتمزح صح علي :وربي ما امزح .. ريم: اول شي كيف بدر يتزوج شيخه وثاني شي ليه عمتي عاملت نجلا كذا وبعدين ليش منعت نجلا تطلع وليش الغضب كله وعمي لليش تصرف كذا علي : بدر يبي شيخه ولا فيها شي نصيب ريم :ادري بس شخصياتهم مررره غير وبدر مايحب الازعاج وشيخه انت تعرفها علي: دامه مرتاح لها الله يوفقه مو شرط الواحد لازم ياخذ احد يغير حياته مو تجلس نفس الشي ريم :وعمتي وش فيها علي :هذا اللي مجنني مدري وش فيها وش صاير لها اتوقع اريام ورا ذا الشي ريم:لا تظلم اريام علي :ماظلمها اريام حالها مو عاجبني كل يوم طالعه بمصيبه ولا تحس بنفسها صايره تنرفز ريم : مدري علي:وزاد ابوي الطين بله وهدد امي اذا ما اعتذرت انها تحرم عليه ريم :ليش طيب علي: اول شي امي الله يصلحها غلطانه مليون بالميه وفوق ذا كانت ترادد ولا هي مقتنعه بخطئها وابوي عصب وشكلها كانت مكلمته من قبل وقايل لها لا تتدخل وهي عصت ريم:لا حول الله مسكين بدر ما يستاهل طول عمره ما فكر يتزوج ولما تزوج كل المشاكل تجمعت عليه علي :لا تسالين عن حال بدر حاس نفسه بيفرق بين امي ابوي وتأنيب الضمير ذابحه والشيطان داخل براسه ريم : ي ربي والله مو حلوه الاخبار علي :انتي ماشفتي نجلا كانت منجلطه ريم:الله لا يلومها قام علي وهو يغسل : ياخي مدري ليش حاقدين على شيخه والله انها تجنن ريم : اي والله جمعت ريم صحون ودتها المطبخ وغسلت وفرشت اسنانها ولبست المريله على اساس تغسل الصحون غسل علي وفرش اسنانه ولما رجع حصل ريم لابسه المريله بتغسل الصحون علي : وش تسوين ريم:وش بغسل المواعين ومابي ريحتها تلزق فيني علي وهو يدخل يدينها تحت المويه غسلها ونشفها وحمل ريم بين يدينه :اتركي المواعين الحين تعالي ابيك بشغله ٠٠ عند بدر جاب جده وهو في الطريق كان ساكت وضايق الجد حاكم:افا ي عريس وش بك ضايق بدر اللي يرقع :لا ي جدي شوي تو تر الجد حاكم:سبحانه اللي عطى علي ماعطاك بدر :ليش الجد:علي من اركب معه لين نوصل وهو يسولف ويضحك ويوم رحنا نخطب له كان يسابقنا سباق بدر:هههههه علي مرجوج الجد :صادق الله يسعدكم ٠٠٠ عند طراد وصل لبيتهم وهو متكدر خاطره على بدر واللي صار معه وفي نفسه يقول(استغفرالله العظيم وش بلا حظوظهم هذول علي متزوج بمطاقق والهوايش وكل شي جايب مصيبه من وراء هذا الزواج وبدر اللي تورط بذا الزواج اللي مو مبين نهايته ايش ويقولون تزوج ي طراد لا والله خلني اجلس اعزوبي واشري راحة بالي لا اغث احد ولا احد يغثني )دخل البيت وحصل اهله على سفرة الغدا ينتظرونه طراد: السلام عليكم امه وابوه:وعليكم السلام غسل طراد وجلس بيتغدا : كيفكم وش مسوين ام طراد : حنا بخير دامك بخير يمه ابو طراد :خلاص وقفت ضحك طراد كان يحاول ينسى ذا القصه واول ماذكره ابوه انفجر ضحك ابو طراد:عودنا على طير ياللي طراد: انت اللي ذكرتني والا انا وش دخلني جاي ساكت ام طراد: اكل يمه اكل وقف طراد ضحك بالقوه وجلس يتغدا فاجأته امه بالسؤال ام طراد: يمه ي طراد متى ناوي تفرحنا فيك شرق طراد ومد له ابوه الكوب المويه :بسم الله طراد :وش طرا لك يمه ام طراد: ابي افرح فيك يمه ابي ازوجك واشوف عيالك انت ولدي الوحيد طراد:الله يخليك لي يمه بس انا ما افكر اتزوج ولا لي نيه ام طراد :إلى متى هاه إلى متى كل اللي بسنك تزوجوا وعندهم عيال بعد حتى علي تزوج وبدر بيتزوج والباقين بيلحقونهم طراد : ي امي ي عيوني انا مالي دخل بالناس انا لي بنفسي ابو طراد:يعني لين متى لين نموت وتفكر تتزوج طراد: بسم الله اذكروا الله وش ذا الطاري ابو طراد :وانا صادق لين متى لين متى امك كبرت وتعبت وهي شايله همك ومسؤليتك وتبي احد يساعدها ويونسها طراد : ي يمه الله يرحم والدينك كم مره قلت خليني اجيب لك خدامه ماتطيعين ام طراد: انا مابي خدامه مابي خدامه ابيك تتزوج عشانك مو عشاني ابو طراد: ولا انت مالك هم الا تضحك طراد قام :بالعافيه ابو طراد: ايه ازعل وقم كالعاده طلع طراد لغرفته :اوف ي ربي وش ذا المصيبه ي ربي وش ذا المصيبه توني اقول برتاح مايمدي ٠٠ عند بدر وصل جده للبيت وكانو ينتظرونهم للغدا الجد حاكم :السلام عليكم ابو عمر: اهلا ي الله حيه زارتنا البركه الجد حاكم : البقى ي ابو عمر كيفكم ابو عمر:بخير وانت يبه طمني عنك وعن صحتك الجد : الحمد لله ام عمر : اهلين وسهلين ي ابي الجد :هلا ي ام عمر وشلونك طيبه ام عمر:منيحه شلونك انت الجد :الشكر لله ابو عمر :تفضل الغدا جاهز الجد: يلا ابو عمر:بدر يلا الغدا بدر :لا يبه مالي نفس بروح اريح ابو عمر: براحتك طلع بدر الجد :هو وش به بدر اليوم ماكأنها خطبته ابو عمر وهو يرقع : هذا بدير لا توتر كأن طايح عليه مصيبه مختبص ومتوتر .. الجد:ههههههههه الا هو وش طرا له بشيخه ابو عمر:نصيب ٠ الجد : ي سبحان الله فرق بينه وبين علي ابو عمر: علي مطفوق ما مسكته الارض وقتها الجد : والله اني احبه ذا المرجوج هو وينه ابو عمر :في بيته ٠٠ عند بدر كان يحوس بتوتر مايدري وش يسوي يقوم ويقعد ومتوتر وحالته حاله : ي ربي وش ذا العذاب اللي انا عايش فيه المفروض مافيه احد اسعد مني وانا الحين مافيه احد متضايق كثري الله يسامح امي والله يسامح علي دقت الباب نجلا ودخلت:بدر بدر:هلا نجلا ادخلي نجلا: وش فيك بعدك ضايق بدر وهي يجلس على السرير :كيف ما تبيني اضيق والا ازعل وهذا اللي صاير نجلا :ماعليه ي بدر امي كل زعلها جاء عشانها ودها هي تدور لك البنت ودها تخطب لك هي بنفسها وهي خايفه من بعد زواج علي اللي جاء بالركض ومحد اخذ رايها فيه ولا لحقت تفرح زي الناس وزاد عليها انك اخترت شيخه والفرق في شخصياتكم واضح وامي على بالها انكم ماتقدرون تتوافقون بدر :ليش لذا الدرجه شيخه ما تتعاشر نجلا : لا بس امي متعوده على طيش علي لذلك ماتأثرت من زواجه لكن انت عودتها على الكلمه المسموعه ولا تسوي شي لين تشاورها وتاخذ رضاها والشي اللي ماتبيه هي ماتسويه مهما كانت نفسك فيك وفجاءه قررت تخطب ولا درت الا بليله خطبتك وهي ماعندها خبر واللي قالها ابوي وانتزما فتحت فمك فا استكبرتها ولاختك المصون دور في تحريض امي ولا تفكر كلها يومين وهي تسابقك في زواجك بدر :قولك نجلا :ايه لا تشيل هم بدر بتردد: احكي عن شيخه شوي ابي اعرف وش مقدم عليه انا نجلا :شوف ي بدر مابي الف بالكلام ولا بدور ولا بمدح لانها صاحبتي وبنت عمي ولا بكذب عليك ابد بقولك زبدة السنين اللي عشتها مع شيخه شيخه صح خبله ومجنونه وماتفكر وحقها تاخذه ولا تعتبر لاحد انسانه اللزم ماعليها وناستها اذا ماسرت ماتضر ولا تدور الكلام ولا تسمع لاحد لكن اللي يدوس لها على طرف ي ويله شيخه بالضبط مثل علي هذا علي يعصب ويطنقر ويحرق الدنيا وحتى امي وابوي مايوقفون بوجهه بس اذا راق ورضا مافي احن واحسن منه وقلبه علينا دايم مهما زعل منا وضاق شيخه مثله بالضبط وشيخه قلبها مثل القطنه كلمه تفرحها وتوصلها سابع سما بس ماتنزل الارض بسهوله وصبوره اذا كسبت حبها وودها توقف معك مثل روحها ولا تتخلا عنك ولا تترك يدك وهمك قبل همها وزعلك قبل زعلها وضيقك قبل ضيقها وتاخذ لك عذر على كل غلطه لكن اذا اخذت موقف منك لو يجتمعون امة محمد يصلحون بينكم ماقدروا هي اللي ينطبق عليها (اتقوا شر الحليم اذا غضب) يعني باختصار عمرك مابتندم على قرارك ذا بدر براحه بعد ماسمع كلام نجلا: اذا كذا الله يكتب اللي فيه الخير قامت نجلا :لا تخاف بتيسر قام بدر وهو يضم نجلا :ي اختي انتي لو تروحين من ذا البيت ضاعت بركته مع انك اصغر وحده لكن دورك كبير ودايم حنونه والله لا يحرمنا منك نجلا وهي تمسح دموعها:انا مالي غيركم تسوون عيوني والله ولاتزعل ولا تضيق انا معك لو ادري انك ممكن تكون تعيس مع شيخه ماقلت توكل على الله بدر : ي بعد اهلي والله طلعت نجلا وجلس بدر وهو مرتااااح كثير ومستانس انسدح يبي يريح شوي ٠٠٠ عند ابو عمر خلصوا غدا واستأذن الجد بينام وهو طلع يريح شوي انسدح وهو يدعي ان ربي يسهل لبدر ام عمر: عبد الرحمن بعدك زعلان مني ابو عمر كان مطنشها ولا يرد عليها ونام وتركها طلعت ام عمر وهي تبكي وتدعي على شيخه اللي دخلت بينهم ٠٠ على الساعه ٦ المغرب صحت ريم على دق الباب والجرس التفت لعلي اللي رايح فيها ولااا درا ان الباب انفك قامت تشوف مين ريم :مين عبيد: انا عبيد علي فيه ريم :نايم الحين اصحيه يجي انا بفتح الباب وبعد شوي ادخل وروح الصاله عبيد: طيب راحت ريم وهي تصحي علي اللي بالقوه صحى وراح لعبيد علي وهو فيه نوم: هلا عبيد وش عندك عبيد:ارسلني ابوي وجدي وقالوا اجهز لانهم بيروحون لعمي بعد المغرب علي :كم الساعه عبيد: ٦ علي: يوووه خلاص بيأذن اصلا يلا اجيكم بالبيت عبيد: يلا راح عبيد ودخل علي وهو بيموت من النوم ورمى نفسه على السرير ريم : وش بك وش كان يبي عبيد علي وهو يقرب وينسدح بحضن ريم:  يقولون تعال بيروحون لعمي بعد المغرب ريم: طيب قوم علي: يوووه والله مالي خلق بس ماني مفوت شكل شيخه ريم:هههههههه قوم ي حبك للحرش قوم .. علي وهو يقوم يسحب نفسه ودخل واخذ له دش سريع وطلع وهو يتجه لريم اللي واقفه تطلع له كبك وساعه واعطاها المنشفه ريم :وش اسوي جلس علي قبالها : نشفيني مالي خلق اتنشف ريم:هههههههههههه تراك صرت دلوع مره علي :والله مالي خلق اخذت ريم المنشفه وصارت تنشف علي واخذت المجفف وصارت تجفف شعره وهو متخدر ولا يتحرك خلصت وهي تضرب خده بشويش :يلا قضينا قوم البس .. 🍒ــــــــــــــــــــــــــــــــــــ🍒 #الـى_هنا_ينتهي_الجزء_ال🔟 🎀 @ahgeel 👌👈 🌺 🌼🎀🌼 🎀 🌼🎀🌼🎀 🌺🎀🌼🎀🌼🎀🌼