جواهـــر - الفصل 9 - بقلم دانة الروح - مكتملة | روايتك

ـــــــــــــــ في بيت عبدالله ـــــــــــــــــــ جواهر يا بنيتي نزلي تحت والدج يباج جواهر: يايه يمه دقيقه بس .... طالعت بشكلها بالمرايا ..حلوه وماحد يقول غير هالكلام وبتوريه وش كثر هو خسران انه تخلى عنها وعن امها بهذاك الشكل ما راح تسكت صممت تقول له رايها فيه بكل صراحه ... نزلت وقبل لا تدخل حطت ايدها على صدرها ... بسم الله من ايش خايفه ماتدري دقت الباب : هذا انا جواهر ابوها: ادخلي يا جواهر .. فتحت الباب وعلى طول سكرت من غير ما ترفع عينها بالشخص اللى حست انه وقف لما جت ودخلت .... وقفت وعلى طول راحت عينها صوبه وناظرت بعيونه هو بعد كان يناظر فيها بعيون كلها شوق ولهفه وابتسم ..صح رجل مو كبير بس باين عليه هيبه اعتدل بوقفته وعلى طول والدها تكلم: تعالي يا جواهر لا تستحين هذا والدج تركي عبدالله واكيد عرفتيه ..تعالي سلمي عليه تقدمت جواهر وهي معصبه ما بينت على ويهها بس من جوا شابه نار على انه جاي بعد هالسنين ويبي يتعرف عليها ...قدمت ايدها بتصافحه مد ايده يالله لمست اصابعها اصابع ايديه وعلى طول نزلت ايدها بسرعه وراحت لعند ابوها وجلست بجنبه ابوها: اشلونج جواهر ؟؟؟ جواهر: زينه الحمدلله ابوها: ما شاء الله صرتي عروس ....... قالها وهو يبتسم جواهر طالعت فيه بنظره استهزاء وعلى طول اخفتها ابوها: ليه يا بنيتي ساكته ليه ما تهرجين معاي قولي أي شي اسأليني جواهر: مادوى اسأل عن شي ابوحسن مستمع لكل اللى يدور بينهم ..وقف وقرر يتركهم لحالهم ابوحسن: انا بروح دقايق وبرجع بسوي مكالمه ضرورية للوزارة جواهر بسرعه تكلمت: يبه لا تتركني بروحي ابوحسن: لا تخافين منتي بروحج انتي مع والدج راح وتركهم جواهر بعدها معصبه وماتدرى اشلون بتبدي الكلام اللى جهزته من قبل لو هي شافته والحين اول ما شافته مدرى وش اللى رابط على لسانها ما تقول أي شي اول ما شافته حست بشي ناحيته ايش هو ما تدري؟؟؟ ابوها: جواهر سمعيني انا مو جاي اعتذر عن شي ولا جاي ابرر موقف صار من زمان واستوى اللى صار صار خلاص واعتقد والدج علمج بكل شي ... واكيد عرفتي انه مو ذنبي يمكن اخطيت انى ما دورت زين واهملت بفترة مرض والدي لكن والله عمري ما نسيت ماريا ولا راح انساها بيوم جواهر وهي تستمع لكل هذا وساكته ابوها: اللي ابيه منج تعطيني فرصه وبس ..ادري ما راح اقدر اكون مثل اهلج اللى ربوج ويمكن مالى اى مكانه بقلبج لكن ابي احس انه بنتي معاي بالبيت ولو فتره بحياتي انا مابي اغصبج على شي ولو ودي اقدر والله من بكره تكونين بالبيت عندنا لكن ادرى انه راح تكرهيني زود لانى اجبرتج على شي لا وبعد من انسان اول مره يكون لج فيه صلة قرابه. جواهر: انته لو فعلا كنت مهتم في امى ما صار اللى صار ما خليتني انولد واكون بعيده عنكم على الاقل .... قالتها بحزن لاول مره تشعر فيه ... على الاقل كان لما امي توفت بلقى حضن الابو اللي يعوضني الحنان اللى فقدته لكن وين انت كنت وانا وين والدها: انا غلطان انى ما سألت عنها ادرى وانا مقصر لكن والله لو كنت ادري انها حامل ما تركتها ابدا حتى لو كنت مطلقها اكيد بكون مسؤول عنها بحاول كنت اوفر لها كل شي حتى لو انا بعيد عنها بس وش اقول ما ينفع الحين اقول لو ولو ابوها: جواهر بنيتي وربي الشاهد على من فوق سبع سموات تمنيت بحياتي تكون عندي بنت والله ما اراد اول شي 3 اخوان وبعدين لما عرفت السعاده ويا امج جا القدر وفرقنا وبعدها الحين التوأم وما فيه غيرهم واول ما سمعت انه عندي بنت حسيت انى ملكت الكون كله والله لا تحرميني من هالشي ..ولا تحرميني روحج من انه الله ولو حتى بالاخير عوضج بالاب اللي ماكنتي تدرين عنه ابدا الا الحين ...ماودى والله من هالدنيا الا سعادتج ها وش قلتي متي بتين معي جواهر متفاجئة: قصدك اروح معاك للسعوديه واعيش هناك ابوها: ايوه ليش لا وانا والله ما احرمج ابد من اهلج اللى ربوج في أي وقت تبيني تيين لهنا تلقين روحج باليوم الثاني هنا هذول اهلك وما راح انسى فضلهم ..ويكفي انه عندهم خصال حميده بهالشكل ولا لو حد غيرهم ما راح يعلمج بشي وراح يسكتون ولا كأنه شي صار بس ما يبون يتحاسبون بذنبج يوم القيامه جواهر: اروح وياك واترك كل اهلي اشلون ابوها: انا ما قلت اتركيهم بس عيشي معنا فتره وجربي وانتى حرة والله ما اغصبج على شي ما تبينه بس جربي وبس جواهر وهي تفكر( اشلون اتخلى عن هلى بكل سهولة وماما وش راح يصير فيها لو بعدت عنها هذي انا متعلقه فيها وهي بعد ...لا لا ما اقدر ) ابوها: شوفي انا بخلي لج فرصه تفكرين فكري بصدق وفكري بقلب بنت عاشت بدون اب طول هالسنين وظهر لها الاب اللي تمنته فكري بقلب حس بمعاناة الفراق والحين التم الشمل ..!! انا بروح الحين ... واظن ابوحسن معه رقم جوالي اتصلي لما تقررين قالها بكل حزن ونزلت دمعه من عيونه لما شافتها جواهر حست انها دموع عذاب ..على طول مسح دمعته وقرب صوبها وحط ايده على راسها وقال: اشوفج ان شاء الله عن قريب جواهر وطلع على طول وهو تعبان جواهر ظلت بمكانها ما قالت شي ولا ردت عليه ودخل ابوها عليها يكلمها وما ردت عليه الا بكلمه انا بطلع غرفتي اعذرني يبه ********* احداث بعدها مرت فكرت فيها جواهر .... واللى أثر بجواهر أكثر وخلاها توافق تروح تعيش ويا والدها لما جا اخوها الكبير عبدالعزيز للبيت عندهم لانه والده تعب فجأه ما تحمل الخبر وحملوه للمستشفى وهم اللى اتصلوا عليه بعد ما عرفوا عنوانه وعلى طول جا باول طياره يعني والدها من هذاك اليوم كان بالمستشفى ما قدر يتحمل اللي هو فيه ..والله حرام يا جواهر ماهو ذنبه انه صار هالشي يكفي امج راحت من وانتي صغيره لا تخلين والدج يروح بعد منج وانتي كبيره .... من بعدها قررت تعيش مع والدها على قولتها لفتره بس عشان ما تحسس اهلها انها بتتخلى عنهم بكل سهوله .... زارت والدها بالمستشفى وطار من الفرحه لما علمته انها بتعيش وياهم وعلمها انه عبدالعزيز بيجهز كل شي ما عليها الا تجهز روحها في الوقت اللي يقول عليه اخوها عبدالعزيز..وأما هو بيتأخر كم يوم بالكويت لين يكون احسن وبيروح يسوي فحوصات بالخارج بعدها وما راح يطول وبيرجع بعدها للرياض ..كانت بكل يوم تزوره مع اخوها او والدها ولما طلع من المستشفى طلب منها تجي للفندق وتجلس معاه هذاك اليوم طول الوقت سولف معها عرف وش تهتم فيه وش تحبه ..وكانت لما تتكلم مرات تستحي لانها تحس انها تهذر بالكلام وايد مع ابوها وهو توه طالع من المستشفى تعودت تقول له يبه واول مره قالتها بالمستشفى لما شافته (الحمدلله على السلامه يب يبه) ابوها طالع فيها بفرحه لما نادته بهالاسم .... واكيد الاحداث البقيه تعيدنا لبداية رحلتها ويا اخوها ووصولهم للرياض