الفصل 2
@riwait_221
{ رواية انتي حمول الوقت وانا سندها }
(البارت الثاني )
في بيت ابو سند
وقف ساره وهي ترفع البخور وتدور على امها وتغني وتضحك : شاقني ريح البخور يوم بانت الاجوديه
ام سند في حلاها كانها غزال ريميه
ضحكت ثريا : شوهتي الكلمات
طنشتها ام سند ومشت وضحكت ساره : شوهت ولا ماشوهت ماعطتني وجهه
دخل سند وهو يضحك : ماتجملتي فيها من ذا الصبح
ساره : ما تلقون مثلي يصبحكم بصوته ويمسيكم به
مجاهد : مانبي نلقى انا مدري امي متوحمه على طقاقه ولا وشو
مزون : ياحسافة حملها بس
ساره : بالله؟؟
ام سند : وهي صادقه لا فايده ولا عايده بس تغنين
سند : خلوووها خلوها تغني اللي تبي
ضحكت ساره: اااه يا سند هالدنيا والله انك تبري العله
سند : يلا اجل ابري علتي وعطيني فطور
ساره: ابشر انت تامر وانا ألبي
مجاهد : ساحرها انت؟
ضحك سند : سحر اخوي
جاء ابو سند وسكتوا كلهم وجهز الفطور وافطروا ووقف ابو سند : يلا كلٍ يشوف شغله واصبحوا بخير
الكل : ابشر
راح ولفت ساره بضحك وهمس : الا انا ودي اسال جدتي و توحمت عليه يوم جابت ابوي ياربي ما يضحك
ام سند : هذا لللي بقى لتس تعذربين ابوتس
ساره: ماعذربته هاذي امنيه ابيها تحقق
سند : ودي اقولك بحلمتس بس يمكن تصير معجزه
مجاهد : ولا سحر مثل سحركم
ضحكت ثريا: وهو صادق
مزون : ليته يسمع
ساره: اذا نا فتنتي ماهوب سامع
سند : خلاص يلا كلٍ يخلص اموره
انتشروا يشوفون شغلهم وكل واحد له مساره اللي يرتاح له
___.
في بيت ابو فزاع
كانت خزاري تجهز الفطور وجدتها عندها بالمطبخ وهي تدق بعكازها الارض وتغني لخزاري وتضحك وهي تحب خزاري حيل: يازين الثوب وراعييته
وطويل الشعر محنيته
خزاري ياغصن البان
وعيونتس عيون الغزلان
ضحكت خزاري اللي كانت ترقص : ياكبر حظي بتس ياجدتي
ضحكت جدتها: انا والله اللي ياكبر حظي دامتس بنيتي اللي ماجابها بطني وصرتي اغلى من عيالي
خزاري : الله عوضني بتس بدال امي اللي ما شفتها
فزاع : ياهملالي عز الله ما افطرنا دام طار الغزل قايم بينكم
ضحكت ام شايع: تعال تعال لو ما تغار كان حنا بخير
فزاع: تراني يتييم بعد لميني مثلها
حضنته ام شايع: نلمك ليه ما نلمك
خزاري : هذا والله الدلع اللي مانتهنى به
ابو فزاع: مابعد جهز فطوركم
فز فزاع ووقف : مدري عن بنتك
خزاري : جهز يا عيوني الثنتين جهز
ابو فزاع: تسلم عيونتس يلا يا ابوك عجلي
اقبل على امه يحب راسها: كيف اصبحتي ياميمتي
ام شايع : بخيرٍ عساك بخير
ابو فزاع: حمدلله
ام شايع: اليوم اعزم ابو سند للعشاء
ابو فزاع : ابشري على خشمي
ام شايع: تسلم
انتهى فطورهم بهدوء التفت لفزاع: يلا يلا ورانا شغل
فزاع : ابشر
.
@riwait_221
#أنتي_حمول_الوقت_وأنا_سندها
___.
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇