الفصل 1
@riwait_221
{ رواية انتي حمول الوقت وانا سندها }
(البارت الاول )
في بيت ابو مقبل
وقف ابو مقبل وهو ينفض شماغه بعد الفطور: الحمدلله الذي رزقنا واطعمنا
التفت لمقبل :فز ياولد شف شغلك ولا تبطي
مقبل : ابشر يبه ابشر
ام مقبل : عوّد قبل ماتطيح الشمس يايمه
مقبل: ابشري
ام مقبل : يلا يا هيا لمي الفطور وسنعي البيت
هيا : ابشري
فزت هيا تلم السفره وعينها على مقبل وقبل يطلع ركضت له : مقبل
مقبل:سمي
هيا : ابي فلوس معك؟
مقبل: معي لكن وش تبين فيها
هيا: يبي يجي فرقنا الحين وبتقضى لي شوي منه( فرقنا : صاحب بسطه يدور ويبيع على القبايل)
مقبل:اييه ابشري بعزتس وانا اخوتس اشتري اللي ودتس فيه واستانسي خليتس ازين بنات القبيله
ضحكت هيا بفرح : ياعلي ما ذوق حزنك يابعد اهلي
اخذت هيا القروش وراحت تلم السفره وتخلص الشغل قبل يجي فرقنا وتطير الطيور بأرزاقها عصبت طرحتها على راسها ( كنوع من انواع الجديه فالشغل ) وانطلقت وهي تغني اغنيتها المفضله لحجاب :
تجري بي الاقدار من دون مختار
واصبر ولو بانت علي الهزيعه
وكملت وهي تدندن لين انتهت ووقفت على صوت فرقنا لللي ينادي ويسوق لبضاعته
( معنا الزين لزينات معنا الحنا والنقشات معنا كحله وملفع زين وثويبات ( تصغير ثوب ) لترفات ( الجميلات المترفات )
ركضت بعد ما لبست جلالها وطلعت وهي فرحانه وتقلب بالبضايع : بكم هالقطعه يا فرقنا
ضحك فرقنا والتتفت لها: لو سعرها مليون لاخت مقبل يرخص الغالي
صدت ببتسامه وقالت : عطني هالقطعه وعطني ملفع لامي وعطني كحله
فرقنا : ابشري
بدا يطلعها وهيا فرحانه تحسب الفلوس واللي بقى ربطته بطرحتها
ولكن مثل البرق جات عزوف ووقفت وهي تعدل برقعها: ماهيب هيييينه الدله العصلا( تقصد النحيفه وهي هيا )
ضحكت هيا : جاكم القضاء المستعجل وش عندتس غبرتي علينا
ضحكت عزوف وهي تمسح طرحتها عن الغبار : شفت فرقنا رفرف قلبي احب الزين( تقصد الاشياء الحلوه) والزين مايحبني
هيا : واخزياه ياجهير وشلون الزين مايحبتس
عزوف: وشلون يحبني وانا منتثره شحومي لازم اصير عصا عشان يزين علي كل شي
ضحكت هيا بحب: ياجهير انتي اللي تزينين الللبس
عزوف: ياكذبتس ، فرقنا عطني قطعه
ضحك فرقنا: ماعندي قطع الا متر ومتر ونص وانتي اخبر بعمرتس يبي لتس طااقه ( لفة قماش كامل)
طالعته عزوف بحقد ودفت طاولته وطاح كل شي وتركته يهاوش وضحكت بإنتصار
لحقتها هيا وهي تضحك وجلسوا يتقهوون وعزوف كالعاده تحش بكل من يمر
___.
@riwait_221
#أنتي_حمول_الوقت_وأنا_سندها
___.
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇